ᐃᓯᑭᐊᓕᐅᑉ ᐊᒡᓚᖏᑦ 46
46
ᐊᖓᔪᖅᑳᖅ ᓇᓪᓕᐅᓐᓂᕐᓯᐅᕐᓃᓪᓗ
1“ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑐᕐᓲᖑᔭᕐᒧᑦ ᐃᓗᕙᓯᖕᓂᕐᓴᒧᑦ ᐃᑎᕐᑕᕐᕕᒃ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᒪᑐᓯᒤᓐᓇᕐᑐᒃᓴᐅᕗᖅ ᐅᓪᓗᑦ ᐱᖓᓲᔪᕐᑐᑦ ᐱᓇᓱᐊᕐᕕᐅᕙᒃᑐᑦ ᐊᑐᕐᑎᓪᓗᒋᑦ; ᓴᐸᑎᐅᓕᕌᖓᓪᓕ ᐅᒃᑯᐃᓐᖔᕐᑐᒃᓴᐅᕗᖅ ᑕᖅᑭᓂᕋᑖᒥᓗ ᓇᓪᓕᐅᓐᓂᕐᓯᐅᕐᓃᑦ ᐊᑐᓕᕌᖓᑕ. 2ᐊᖓᔪᖅᑳᖅ ᐃᑎᕐᑐᒃᓴᐅᕗᖅ ᑐᕐᓲᖑᔭᕐᒥᑦ ᓯᓚᕙᓯᖕᓂᕐᓴᒥᑦ, ᓇᖏᕐᑐᒃᓴᐅᕗᕐᓗ ᐃᑎᕐᑕᕐᕕᐅᑉ ᐊᕙᓗᖏᒃᑕ ᓴᓂᐊᓂ. ᑕᕝᕙ ᑐᓂᕐᕈᓯᕐᑎᑦᓯᔨ ᑐᓂᕐᕈᓯᕐᑐᒃᓴᐅᕗᖅ ᐃᑯᐊᓚᑦᓯᓗᓂ ᐃᓅᖃᑎᒌᑦᓯᐊᕐᓂᕐᒧᓪᓗ ᑐᓂᕐᕈᓯᕐᓗᓂ, ᑕᕝᕙᓂᓗ ᐃᑎᕐᑕᕐᕕᐅᑉ ᐅᒃᑯᐊᖃᕐᕕᖓᓂ ᑐᒃᓯᐊᕐᑐᒃᓴᐅᕗᖅ. ᑐᒃᓯᐊᕇᕈᓂ ᐊᓂᔪᒃᓴᐅᕗᖅ, ᐃᑎᕐᑕᕐᕕᒡᓕ ᐅᑯᐊᕐᑕᐅᔪᒃᓴᐅᓐᖏᓚᖅ ᐅᓐᓄᖕᒧᑦ ᑎᑭᓪᓗᒍ. 3ᓴᐸᑎᐅᓕᕌᖓᑦ ᑕᖅᑮᓚᓪᓗᐊᒥᓗ ᓇᓪᓕᐅᓐᓂᕐᓯᐅᕐᕕᐅᓕᕌᖓᑦ ᐃᓄᐃᑦ ᐃᑎᕐᑕᕐᕕᐅᑉ ᓵᖓᓃᓪᓗᑎᒃ ᑐᒃᓯᐊᖃᑦᑕᕐᑐᒃᓴᐅᕗᑦ ᐊᑕᓂᕐᒧᑦ. 4ᓴᐸᑎᐅᓕᕌᖓᑦ ᐊᖓᔪᖅᑳᖅ ᐊᑕᓂᕐᒧᑦ ᑐᓂᕐᕈᓯᕐᑐᒃᓴᐅᕗᖅ ᐃᑯᐊᓚᑎᑕᒃᓴᓂᒃ ᐱᖓᓲᔪᕐᑐᓂᒃ ᓄᕐᕋᐅᔭᕐᓂᒃ ᖃᓄᐃᓗᑕᖃᖏᑦᑐᓂᒃ ᐊᑕᐅᓯᕐᒥᒡᓗ ᓰᐱᐅᑉ ᐊᖑᓴᓪᓗᖓᓂᒃ ᖃᓄᐃᓗᑕᖃᖏᑦᑐᒥᒃ; 5ᓰᐱᐅᑉ ᐊᖑᓴᓪᓗᖓᓂᒃ ᑐᓂᕐᕈᓯᓕᕈᓂ ᖃᑦᑕᐅᔭᐅᑉ ᓇᑉᐸᓪᓗᐊᖓᑐᑦ ᐊᖏᑎᒋᔪᒥᒃ ᓂᐊᖂᔭᒃᓴᒥᒃ ᐱᖃᓯᐅᑦᔨᔪᒃᓴᐅᕗᖅ, ᓄᕐᕋᐅᔭᕐᓂᒡᓗ ᑐᓂᕐᕈᓯᓕᕈᓂ ᑐᓂᖃᓯᐅᑎᔪᓐᓇᕐᑕᓕᒫᒥᓂᒃ ᑐᓂᖃᓯᐅᑦᔨᔪᓐᓇᕐᐳᖅ, ᑐᓂᕐᕈᑎᒋᔭᖏᑦ ᐃᓚᖃᕐᓗᑎᒃ ᖃᑦᑕᐅᔭᐅᑉ ᓇᑉᐸᓪᓗᐊᖓᑎᑑᕐᑐᒥᒃ ᓂᐊᖂᔭᒃᓴᒥᒃ ᐸᐅᕐᖎᓪᓗ ᐅᕐᓱᖓᓂᒃ ᐅᕐᓱᒃᓴᖃᐅᑎᑎᑐᑦ ᐱᖓᓱᑎᑐᑦ ᐊᖏᑎᒋᔪᒥᒃ. 6ᑕᖅᑮᓚᓪᓗᐊᒥᒃ ᓇᓪᓕᐅᓐᓂᕐᓯᐅᕐᑎᓪᓗᒋᑦ ᑐᓂᕐᕈᓯᕐᑐᒃᓴᐅᕗᖅ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᐊᑕᐅᓯᕐᒥᒃ ᖃᓄᐃᓗᑕᖃᖏᑦᑐᒥᒃ, ᓄᕋᐅᔭᕐᓂᒡᓗ ᐱᖓᓲᔪᕐᑐᓂᒃ, ᓰᐲᓪᓗ ᐊᖑᓴᓪᓗᖓᓂᒃ ᐊᑕᐅᓯᕐᒥᒃ, ᖃᓄᐃᓗᑕᖃᖏᑦᑐᓂᒃ. 7ᐊᖑᓴᓪᓗᕐᒥᒃ ᓰᐲᓪᓗ ᐊᖑᓴᓪᓗᖓᓂᒃ ᑐᓂᓯᓕᕈᓂ ᐃᓚᖃᖃᑦᑕᕐᑐᒃᓴᐅᕗᑦ ᖃᑦᑕᐅᔭᐅᑉ ᓇᑉᐸᓪᓗᐊᖓᓂᒃ ᓂᐊᖂᔭᒃᓴᒥᒃ, ᓄᕐᕋᐅᔭᕐᓂᒃ ᑐᓂᓯᓕᕈᓂ ᐃᓚᖃᖃᑦᑕᕐᑐᒃᓴᐅᕗᖅ ᐊᖓᔪᖅᑳᑉ ᑐᓂᔪᓐᓇᕐᑕᓕᒫᖏᓐᓂᒃ, ᐃᓚᖃᕐᑎᓪᓗᒋᑦ ᐸᐅᕐᖎᑦ ᐅᕐᓱᖓᓂᒃ ᐅᕐᓱᒃᓴᖃᐅᑎᑎᑐᑦ ᐱᖓᓱᑎᑐᑦ ᐊᖏᑎᒋᔪᓂᒃ ᓂᐊᖂᔭᒃᓴᓂᒡᓗ ᖃᑦᑕᐅᔭᐅᑉ ᓇᑉᐸᓪᓗᐊᖓᑎᑐᑦ ᐊᖏᑎᒋᔪᓂᒃ. 8ᐊᖓᔪᖅᑳᖅ ᐃᑎᕐᑕᕐᕕᐅᑉ ᑐᕐᓲᖑᔭᖓᒍᑦ ᐃᑎᕈᓂ, ᐊᓂᔪᒃᓴᐅᕗᖅ ᑕᕝᕘᓇᑦᓮᓐᓇᖅ ᐃᑎᕐᕕᒋᓚᐅᕐᑕᒥᒍᑦ.
9“ᐃᓄᐃᓪᓕ ᐊᑕᓂᕐᒧᐊᕈᑎᒃ ᓇᓪᓕᐅᓐᓂᕐᓯᐅᕐᓇᐅᑎᓪᓗᒍ, ᐅᓐᓄᐊᓪᓗᐊᑉ ᓇᓛᓃᑦᑐᒃᑯᑦ ᐃᑎᕐᑐᕕᓃᑦ ᐊᓂᔪᒃᓴᐅᕗᑦ ᐅᓪᓗᓪᓗᐊᑉ ᓇᓛᓃᑦᑐᒃᑯᑦ ᐃᑎᕐᑕᕐᕕᒃᑯᑦ; ᐅᓪᓗᓪᓗᐊᓪᓗ ᓇᓛᓃᑦᑐᒃᑯᑦ ᐃᑎᕐᑐᕕᓃᑦ ᐅᓐᓄᐊᓪᓗᐊᑉ ᓇᓛᓃᑦᑐᒃᑯᑦ ᐊᓂᔪᒃᓴᐅᕗᑦ; ᓇᓪᓕᐊᑦ ᐃᑎᕐᕕᒋᓚᐅᕐᑕᒥᒍᑦ ᐊᓂᔪᒃᓴᐅᓐᖏᓚᖅ, ᐃᑎᕐᕕᒋᓚᐅᑕᖏᑕᓕ ᐊᑭᓪᓗᐊᖓᒍᑦ ᐊᓂᔪᒃᓴᐅᕗᑦ. 10ᐃᓄᐃᑦ ᐃᑎᓕᕐᐸᑕ ᐊᖓᔪᖅᑳᖅ ᐃᑎᖃᑕᐅᔪᒃᓴᐅᕗᖅ ᐊᑕᐅᑦᓯᒃᑯᑦ ᐃᑎᖃᑎᒋᓗᒋᑦ; ᐊᓂᓕᕐᐸᑕᓗ ᐊᓂᖃᑕᐅᖕᒥᓗᓂ. 11ᓇᓪᓕᐅᓐᓂᕐᓯᐅᕐᕖᑦ ᓇᓪᓕᐅᓯᒪᑎᓪᓗᒋᑦ ᐊᖑᓴᓪᓗᕐᒥᒃ ᑐᓂᕐᕈᓯᕐᓂᐊᕐᑎᓪᓗᒋᑦ ᓰᐱᐅᓪᓘᓐᓃᑦ ᐊᖑᓴᓪᓗᖓᓂᒃ ᓂᐊᖂᔭᒃᓮᑦ ᑐᓂᕐᕈᑕᐅᓂᐊᕐᑐᖅ ᖃᑦᑕᐅᔭᐅᑉ ᓇᑉᐸᓪᓗᐊᖓᑐᑦ ᐊᖏᑎᒋᔪᒃᓴᐅᕗᖅ, ᓄᕐᕋᐅᔭᕐᓂᒃ ᑐᓂᕐᕈᑎᖃᕐᑎᓪᓗᒋᑦ ᑐᓂᔪᓐᓇᕐᑕᓕᒫᒥᖕᓂᒃ ᑐᓂᓯᔪᒃᓴᐅᕗᑦ, ᐃᓚᖃᕐᑎᓪᓗᒋᑦ ᓇᐹᕐᑑᑉ ᐅᕐᓱᖓᓂᒃ ᐅᕐᓱᒃᓴᖃᐅᑎᑎᑐᑦ ᐱᖓᓱᑎᑐᑦ ᐊᖏᑎᒋᔪᒥᒃ.
12“ᐊᖓᔪᖅᑳᖅ ᐃᓱᒪᕐᓱᕐᓗᓂ ᑐᓂᕐᕈᑎᒋᔪᒪᔭᒥᓂᒃ ᑐᓂᓯᔪᒪᒃᐸᑦ ᐊᑕᓂᕐᒧᑦ, ᐃᑯᐊᓚᑎᑕᒃᓴᒥᒃ ᐃᓅᖃᑎᖃᑦᓯᐊᕐᓂᕐᒧᖔᔪᒥᒡᓘᓐᓃᑦ ᐃᑎᕐᑕᕐᕕᒃᑯᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒃᑯᑦ ᐃᑎᕐᑐᒃᓴᐅᕗᖅ; ᑐᓂᕐᕈᓯᕐᑐᒃᓴᐅᕗᕐᓗ ᓴᐸᑎᒥ ᑐᓂᕐᕈᓯᕐᓗᓂ ᐱᐅᓯᕆᕙᒃᑕᒥᑐᑦ. ᐱᔭᕇᕈᓂ ᑕᕝᕙᓐᖓᑦ ᐊᓂᔪᒃᓴᐅᕗᖅ, ᐊᓂᔭᕇᕐᐸᓪᓗ ᐃᑎᕐᑕᕐᕕᒃ ᐅᒃᑯᐊᕐᑕᐅᔪᒃᓴᐅᕗᖅ.”
ᖃᐅᑕᒫᑦ ᑐᓂᕐᕈᑕᐅᖃᑦᑕᕐᑐᒃᓮᑦ
13“ᖃᐅᑕᒫᑦ ᓄᕐᕋᐅᔭᕐᒥᒃ ᐊᑕᐅᓯᕐᒥᒃ ᐊᕐᕌᒍᓕᖕᒥᒃ ᐊᑐᐃᓐᓇᕈᐃᔪᒃᓴᐅᕗᖅ ᖃᓄᐃᓗᑕᖃᖏᑦᑐᒥᒃ ᐃᑯᐊᓚᑎᑕᐅᓗᓂ ᐊᑕᓂᕐᒧᑦ ᑐᓂᕐᕈᑕᐅᖁᓪᓗᒍ; ᖃᐅᑕᒫᑦᓯᐊᖅ ᐊᑐᐃᓐᓇᕈᐃᖃᑦᑕᕐᑐᒃᓴᐅᕗᖅ ᐅᓪᓛᑕᒫᑦ. 14ᐅᓪᓛᑕᒫᓪᓗ ᓂᐊᖂᔭᒃᓴᒥᒃ ᑕᓪᓕᒪᓂᒃ ᐅᖁᒤᓐᓂᓕᖕᒥᒃ ᑐᓂᕐᕈᓯᕐᓃᑦ ᐃᓚᒃᓴᖏᓐᓂᒃ ᐸᐅᕐᖎᓪᓗ ᐅᕐᓱᖓᓂᒃ ᐅᕐᓱᒃᓴᖃᐅᑎᑎᑐᑦ ᐊᖏᑎᒋᔪᒥᒃ ᐃᓚᓕᐅᑎᔪᒃᓴᒥᒃ ᓂᐊᖂᔭᒃᓴᒧᑦ ᑐᓂᕐᕈᓯᕈᑕᐅᓗᑎᒃ ᐊᑕᓂᕐᒧᑦ ᐊᑐᐃᓐᓇᕈᐃᖃᑦᑕᕐᑐᒃᓴᐅᕗᖅ; ᑕᒪᑦᔭ ᑐᓂᕐᕈᓯᕐᓂᕐᒧᑦ ᐃᑯᐊᓚᑎᑕᒃᓴᒧᑦ ᒪᓕᒐᒃᓮᑦ ᐊᑐᕐᑕᐅᔪᒃᓴᐅᔪᑦ ᑍᒪᓐᖓᓕᒫᖅ. 15ᑍᒫᒃ ᓄᕐᕋᐅᔧᑦ, ᓂᐊᖂᔭᒃᓮᓪᓗ, ᐸᐅᕐᖎᓪᓗ ᐅᕐᓱᖏᑦ ᐊᑕᓂᕐᒧᑦ ᐊᑐᐃᓐᓇᕈᕐᑕᐅᖃᑦᑕᕐᑐᒃᓴᐅᕗᑦ, ᐅᓪᓛᑕᒫᑦᓯᐊᖅ, ᐃᑯᐊᓚᑎᑕᐅᓗᑎᒃ ᑐᓂᕐᕈᑎᒃᓴᐅᖁᓪᓗᒋᑦ.”
ᐊᖓᔪᖅᑳᑉ ᓄᓇᒥᒃ ᐊᑐᕐᓂᖓ
16“ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐊᖓᔪᖅᑳᖅ ᓄᓇᖁᑎᒥ ᐃᓚᖓᓂᒃ ᐃᕐᓂᕐᒥᓄᑦ ᑐᓂᕐᕈᑎᖃᕐᐸᑦ, ᐃᕐᓂᖓᑕ ᑭᖑᕚᖏᑕᓗ ᓄᓇᖁᑎᑖᕆᔭᒃᓴᕆᕚᑦ, ᑭᖑᕐᖑᑎᓕᕐᓗᒍ. 17#ᒨᓯᓯ ᐱᖓᔪᖏᑦ 25:10.ᐊᖓᔪᖅᑳᕐᓕ ᐱᔨᒥ ᐃᓚᖓᓐᓄᑦ ᓄᓇᖁᑎᒥᓂᒃ ᑐᓂᕐᕈᑎᖃᕐᐸᑦ, ᑖᑦᓱᒪ ᐱᔨᐅᑉ ᓄᓇᖁᑎᒋᔭᒃᓴᕆᕚ; ᑭᓯᐊᓂᓕ ᐅᑎᕐᑎᑦᓯᕕᒃᓴᖅ ᓇᓪᓕᐅᑎᒃᐸᑦ ᐅᑎᕐᑎᑦᓴᕆᐊᖃᕋᔭᕐᐹ ᐊᖓᔪᖅᑳᒥᓄᑦ; ᐃᕐᓂᖏᓐᓄᑐᐊᖅ ᓄᓇ ᑐᓂᕐᕈᑕᐅᓯᒪᔪᖅ ᑭᖑᕐᖑᑎᔭᐅᔪᒃᓴᐅᖕᒪᑦ. 18ᐊᖓᔪᖅᑳᕐᓕ ᐃᓄᐃᑦ ᓄᓇᖁᑎᖓᓂᒃ ᓇᓪᓕᐊᓐᓂᒡᓘᓐᓃᑦ ᓄᓇᖁᑎᑖᕐᑐᒃᓴᐅᓐᖏᓚᖅ, ᓄᓇᖃᑎᒋᔭᐅᔪᒥᒃ ᐊᕐᓵᕐᓯᓗᓂ; ᓄᓇᒥᒡᓕ ᑐᓂᓯᓂᐊᕈᓂ ᐃᕐᓂᕐᒥᓄᑦ ᓄᓇᖁᑎᒥᓂᒃ ᑭᓯᐊᓂ ᑐᓂᓯᔪᒃᓴᐅᕗᖅ, ᐃᓄᖁᑎᓐᓂᒃ ᐅᖁᒤᒃᓴᕐᑎᑦᓯᖁᓇᒍ ᓄᓇᖁᑎᖏᓐᓂᒃ ᓄᓇᖁᑎᑖᕐᓂᕐᒧᑦ.”
ᑐᒃᓯᐊᕐᕕᒡᔪᐊᑉ ᓂᕿᓕᐅᕐᕕᖏᑦ
19ᑕᕝᕙ ᐃᑎᕐᑕᕐᕕᖕᒧᐊᕈᑎᓪᓗᖓ ᐃᑎᕐᑎᑉᐹᖓ ᐃᑎᕐᑕᕐᕕᒃᑯᑦ, ᐃᒡᓗᕈᓯᕐᒧᐊᕈᑎᓪᓗᖓᓗ ᐅᓐᓄᐊᓪᓗᐊᑉ ᓇᓛᓄᑦ ᓵᓐᖓᔪᒧᑦ ᑐᓂᕐᕈᓯᕐᑎᑦᓯᔨᓄᑦ ᐃᒡᓗᕈᓯᕆᔭᐅᔪᒃᓴᓄᑦ ᐃᑦᔪᕐᓁᑦᑐᓄᑦ; ᑕᕝᕙᓂᓗ ᑕᑯᕗᖓ ᑖᕙᓂ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑑᒥᒃ. 20ᐅᖃᐅᑎᕚᖓᓗ, “ᐅᕙᓂ ᑐᓂᕐᕈᓯᕐᑎᑦᓯᔩᑦ ᐆᑦᓯᔪᒃᓴᐅᕗᑦ ᓂᕿᓂᒃ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᒧᑦ ᑐᓂᕐᕈᑕᐅᔪᕕᓂᕐᓂᒃ ᐊᔪᕐᓂᕐᒧᓪᓗ ᑐᓂᕐᕈᑕᐅᔪᕕᓂᕐᓂᒃ, ᑕᕝᕙᓂᓗ ᓂᐊᖂᔭᒃᓴᓂᒃ ᑐᓂᕐᕈᑕᐅᔪᕕᓂᕐᓂᒃ ᐆᑦᓯᓗᑎᒃ, ᐃᑦᔪᕐᓁᑎᑕᐅᓯᒪᔪᑦ ᐊᓐᓂᑦᔭᐅᖁᓇᒋᑦ ᑐᕐᓲᖑᔭᕐᒧᑦ ᓯᓚᕙᓯᖕᓂᕐᓴᒧᑦ ᐃᓄᐃᑦ ᖃᓄᐃᓐᓇᕐᑐᒧᐊᕐᑎᑕᐅᖁᓇᒋᑦ.”
21ᐊᓂᑎᒃᑭᕚᖓᓗ ᑐᕐᓲᖑᔭᕐᒧᑦ ᓯᓚᕙᓯᖕᓂᕐᓴᒧᑦ, ᑕᑯᑎᑉᐹᖓᓗ ᑐᕐᓲᖑᔭᐅᑉ ᑎᕆᖅᑯᖏᓐᓂᒃ ᓯᑕᒪᓂᒃ; ᑖᒃᑯᐊᓗ ᑎᕆᖅᑯᖏᑦ ᐊᑐᓂᑦ ᑐᕐᓲᖑᔭᖃᕐᐳᑦ.
22ᑎᕆᖅᑯᖏᓪᓗ ᐊᑐᓂᑦ ᓂᕈᑭᑦᑐᓂᒃ ᑐᕐᓲᖑᔭᖃᕐᐳᑦ, 68ᓂᒃ ᐃᑎᒐᖕᓂᒃ ᑐᑭᒧᖃᕐᓗᑎᒃ 48ᓂᒡᓗ ᓴᓂᒧᑐᓂᖃᕐᐳᑦ. 23ᐃᓗᖏᑦ ᐊᑐᓂᑦ ᐅᔭᕋᖕᓂᒃ ᐊᕙᓗᓕᐅᕐᓯᒪᕗᑦ, ᐊᑐᓂᓪᓗ ᐊᕙᓗᖏᓐᓄᑦ ᐊᒃᑐᐊᔪᓂᒃ ᐃᑯᐊᓚᑦᓯᕕᖃᕐᐳᑦ ᓂᕿᓕᐅᕐᕕᖃᕐᑐᓂᒃ ᐊᑖᒍᑦ. 24ᑕᕝᕙ ᐅᖃᐅᑎᕚᖓ, “ᑖᒃᑯᐊ ᑕᕝᕙ ᑐᒃᓯᐊᕐᕕᒡᔪᐊᕐᒥ ᐱᓇᓱᐊᕐᑎᓄᑦ ᐃᒐᕕᐅᖃᑦᑕᕐᓂᐊᕐᑐᑦ ᐃᓄᖕᓄᑦ ᑐᓂᕐᕈᑕᐅᓯᒪᔪᓕᒫᓂᒃ.”
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 46: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
