ᐃᓯᑭᐊᓕᐅᑉ ᐊᒡᓚᖏᑦ 43
43
ᐊᑕᓂᐅᑉ ᐅᑎᕐᓂᖓ ᑐᒃᓯᐊᕐᕕᒡᔪᐊᕐᒧᑦ
1ᑭᖑᓂᖓᒍᑦ ᐃᑎᕐᑕᕐᕕᖕᒧᐊᕐᑎᑉᐹᖓ, ᓯᕿᓂᐅᑉ ᓄᐃᕕᐊᓄᑦ ᓵᓐᖓᔪᒧᑦ. 2#ᐃᓯᑭᐊᓕ 10:3,4,18,19; 11:22,23; ᑕᑯᑎ 1:15.ᑕᑯᒋᓪᓗ, ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐃᓴᕆᐊᓕᒥᐅᑦ ᒎᑎᖓᑕ ᓂᕐᑐᕐᓇᕐᓂᕐᔪᐊᖓᑕ ᕾᓕᕐᓂᖓᓂᒃ ᑕᑯᕗᖓ; ᑎᑭᓕᕐᓂᖓᓗ ᑐᓴᕐᓴᐅᕗᖅ ᑕᕆᐅᕐᔪᐊᑉ ᒥᕿᑦᑕᕐᓂᖓᑕ ᐃᒃᑑᓕᔮᕐᓂᖓᑐᑦ; ᓄᓇᓗ ᖃᐅᒻᒪᒃᑕᐅᕗᖅ ᓂᕐᑐᕐᓇᕐᓂᕐᔪᐊᖓᑕ ᖃᐅᒪᓂᖓᓄᑦ. 3ᑖᓐᓇᓗ ᑕᑯᑎᑕᐅᓂᕋ ᑕᑯᑎᑕᐅᓂᕆᓚᐅᕐᓯᒪᔭᑦᑐᑦ ᑍᒤᑉᐳᖅ ᒎᑎ ᐊᓯᕈᐃᔭᕐᑐᓕᕐᑎᓪᓗᒍ ᔨᕉᓴᓕᒥᒃ, ᐊᒻᒪ ᑕᑯᓚᐅᕐᓯᒪᔭᓐᓂᒃ ᐊᑦᔨᖃᕆᕗᖅ ᑰᑉ ᓰᐸᕆᐅᑉ ᓯᓈᓂ; ᑕᕝᕙ ᓄᓇᒧᑦ ᐅᑯᓪᓗᖓ ᐹᒻᒪᒃᐳᖓ. 4ᐊᑕᓂᐅᓪᓗ ᓂᕐᑐᕐᓇᕐᓂᕐᔪᐊᖓ ᐃᑎᕐᑕᕐᕕᒃᑰᕐᓗᓂ ᓯᕿᓂᐅᑉ ᓄᐃᕕᐊᑕ ᓇᓛᒍᑦ ᑐᒃᓯᐊᕐᕕᒡᔪᐊᒧᑦ ᐃᑎᕐᐳᖅ.
5ᑕᕝᕙ ᐊᓂᕐᓂᐅᑉ ᒪᑭᑎᓪᓗᖓ, ᐃᓗᕙᓯᖕᓂᕐᓴᒧᑦ ᑐᕐᓲᖑᔭᕐᒧᐊᕐᑎᑉᐹᖓ; ᑕᑯᒋᓪᓗ, ᐊᑕᓂᐅᑉ ᓂᕐᑐᕐᓇᕐᓂᕐᔪᐊᖓᓄᑦ ᑐᒃᓯᐊᕐᕕᒡᔪᐊᖅ ᑕᑕᑕᐅᓯᒪᕗᖅ. 6ᐊᖑᓪᓗ ᓇᖏᕐᑎᓪᓗᒍ ᓴᓂᓐᓂ, ᐅᕙᓐᓄᑦ ᐅᖃᕐᑐᒥᒃ ᑐᓴᕐᐳᖓ ᑐᒃᓯᐊᕐᕕᒡᔪᐊᑉ ᐃᓗᐊᓂᑦ; 7ᐅᖃᐅᑎᓪᓗᖓᓗ, “ᐃᓅᑉ ᐃᕐᓂᖓ, ᑖᓐᓇ ᑕᕝᕙ ᐃᒃᓯᕙᐅᑕᕐᔪᐊᒪ ᐃᓂᖓ ᐃᑎᒐᖕᒪᓗ ᐃᑯᕋᖏᑕ ᐃᓂᖓ, ᑕᕝᕙᓂ ᐃᓂᖃᕐᓂᐊᕐᐳᖓ ᐃᓱᖃᖏᑦᑐᒧᑦ ᐃᓴᕆᐊᓕᒥᐅᑦ ᐃᓄᖏᑕ ᐊᑯᕐᖓᓐᓂ. ᐃᓴᕆᐊᓕᒥᐅᓪᓗ ᑭᖑᕚᖏᑕ ᐊᑎᕋ ᐃᑦᔪᕐᓁᑦᑐᖅ ᓇᕐᕈᓇᕐᓯᑎᓐᓂᐊᕈᓐᓁᕐᐹᑦ, ᑖᒃᑯᐊᓘᓐᓃᑦ, ᐊᖓᔪᖅᑳᕐᔪᐊᖏᑕᓘᓐᓃᑦ, ᒎᑎᒥᒡᓗ ᐊᓯᓐᓂᐊᕐᓯᒪᓂᖏᓐᓄᑦ, ᐊᖓᔪᖅᑳᕐᔪᐊᕕᓂᖏᑕᓘᓐᓃᑦ ᑎᒥᕕᓂᖏᓐᓄᑦ. 8ᐊᖓᔪᖅᑳᕐᔪᐊᑦ ᐅᒃᑯᐊᓕᐅᕐᓯᒪᓚᐅᕐᐳᑦ ᑐᒃᓯᐊᕐᕕᒡᔪᐊᖁᑎᒪ ᐅᒃᑯᐊᖃᕐᕕᖓᑕ ᓴᓂᐊᒍᑦ ᑐᖕᒥᕌᖃᕐᓗᑎᒡᓗ ᑐᖕᒥᕌᒪ ᑭᒡᓕᖓᒍᑦ, ᐃᒡᓘᑉ ᐊᑭᓐᓇᖓᓂᒃ ᐊᑯᓐᓂᖃᑐᐃᓐᓇᕐᓗᑕ. ᐊᑎᕋᓗ ᐃᑦᔪᕐᓁᑦᑐᖅ ᓇᕐᕈᓇᕐᓯᑎᓚᐅᕐᐹᑦ ᐱᓂᐊᕐᓂᕐᒥᖕᓄᑦ, ᑍᒤᒻᒪᑦ ᓂᓐᖓᖕᓂᒃᑯᑦ ᓄᖑᓚᐅᕐᐸᒃᑲ. 9ᒫᓐᓇ ᐊᓯᓐᓂᒃ ᒎᑎᖃᕐᓂᕐᒥᒃ ᓄᖅᑲᐅᑦᔨᓕᕐᓕᑦ ᐊᖓᔪᖅᑳᕐᔪᐊᕕᓂᖏᑕᓗ ᑎᒥᕕᓂᖏᑦ ᐅᕙᓐᓂᑦ ᐅᖓᓯᒃᓯᑎᑕᐅᓗᑎᒃ, ᑕᕝᕙ ᐊᑯᕐᖓᓐᓂ ᐃᓂᖃᓕᕐᓂᐊᕐᐳᖓ ᐃᓱᖃᖏᑦᑐᒧᑦ.
10“ᐃᕝᕕᓪᓕ ᐃᓅᑉ ᐃᕐᓂᖓ, ᐃᓴᕆᐊᓕᐅᑉ ᑭᖑᕚᖏᑦ ᓇᓗᓁᕐᓯᕕᒋᒃᑭᑦ ᑐᒃᓯᐊᕐᕕᒡᔪᐊᑉ ᑕᐅᑦᑐᖓᓂᒃ ᐸᕐᓇᒃᑕᐅᓯᒪᓂᖓᓂᒡᓗ, ᑲᓐᖑᓲᑎᖃᓕᖁᓪᓗᒋᑦ ᐊᔪᕐᑐᓕᓂᕐᒥᖕᓂᒃ. 11ᑲᓐᖑᓲᑎᖃᕈᓐᓇᕐᓯᒃᐸᑕ ᐱᓂᐊᕐᓂᕆᓯᒪᔭᓕᒫᒥᖕᓂᒃ, ᑐᒃᓯᐊᕐᕕᒡᔪᐊᑉ ᓴᓇᓯᒪᓂᒃᓴᖓᓂᒃ, ᐋᖅᑭᒃᓯᒪᓂᒃᓴᖓᓂᒡᓗ, ᐊᓂᕕᒃᓴᖏᓐᓂᒃ ᐃᑎᕐᑕᕐᕕᒃᓴᖏᓐᓂᒡᓗ, ᓴᓇᔭᐅᓯᒪᓂᒃᓴᓕᒫᖓᓂᒡᓗ; ᖃᐅᔨᑎᓛᕐᐸᑎᑦ ᒪᓕᒐᓕᒫᖏᓐᓂᒃ ᐱᖁᔭᓕᒫᖏᓐᓂᒡᓗ; ᑕᑯᓐᓇᕐᑎᓪᓗᒋᓪᓗ ᑎᑎᕋᓛᕐᐸᑎᑦ, ᒪᓕᒍᓐᓇᖁᓪᓗᒋᑦ ᐱᓇᓱᐊᖁᓪᓗᒋᓪᓗ ᐱᖁᔭᓕᒫᖏᓐᓂᒃ ᒪᓕᒐᒃᓴᓕᒫᖏᓐᓂᒡᓗ. 12ᐅᓇ ᑕᕝᕙ ᑐᒃᓯᐊᕐᕕᒡᔪᐊᑉ ᐱᖁᔭᖓ; ᖃᖅᑲᐅᑉ ᖄᖓᑕ ᖃᓂᒋᔭᓕᒫᖓ ᐃᑦᔪᕐᓁᑦᑑᓂᕐᐸᐅᔪᒃᓴᐅᕗᖅ. ᑕᑯᒋᑦ, ᑕᒪᓐᓇ ᑕᕝᕙ ᑐᒃᓯᐊᕐᕕᒡᔪᐊᑉ ᐱᖁᔭᖓ.”
ᑐᓂᕐᕈᓯᕐᕕᒃ
13 #
ᒨᓯᓯ ᐂᑉᐸᖏᑦ 27:1,2; ᑯᕉᓂᑲ ᐂᑉᐸᖏᑦ 4:1. “ᐅᑯᐊ ᑕᕝᕙ ᑐᓂᕐᕈᓯᕐᕕᐅᑉ ᐊᖏᓂᖓᓄᑦ ᐆᒃᑐᕋᐅᑎᖏᑦ: ᑐᒃᓯᐊᕐᕕᒡᔪᐊᒥᒃ ᐆᒃᑐᕋᐅᑕᐅᓚᐅᕐᑐᑦ ᐊᑦᔨᖏᑦ ᐊᑐᕐᓗᒋᑦ, ᑐᓂᕐᕈᓯᕐᕕᐅᑉ ᑐᓐᖓᕕᖓᑕ ᓇᑎᖓ ᐃᑎᕐᓴᓕᐅᕐᓯᒪᓗᓂ ᐊᕙᑎᓕᒫᖓ ᑕᓕᕐᑐᑦ ᐊᑕᐅᓯᕐᑐᑦ ᐃᓗᑐᓂᖃᕐᓗᓂ ᑕᓕᕐᑐᓪᓗ ᐊᑕᐅᓯᕐᑐᑦ ᓴᓂᒧᑐᖃᕐᑐᒃᓴᐅᕗᖅ, ᐃᑎᒐᐅᑉ ᕿᑎᖅᑲᖓᓂᒃ ᐳᕐᑐᓂᖃᕐᓗᓂ ᓯᓚᑖᒍᑦ ᐊᖏᓂᕐᓴᒥᒃ ᐃᓚᓯᒪᓗᓂ. ᑍᒫᒃ ᑐᓂᕐᕈᓯᕐᕕᒃ ᐳᕐᑐᓂᑲᕐᑐᒃᓴᐅᕗᖅ. 14ᑐᓂᕐᕈᓯᕐᕕᐅᑉ ᑐᓐᖓᕕᖓᑕ ᓯᓚᑖᒍᑦ ᐃᑎᕐᓴᓕᐅᕐᓯᒪᓂᖓᓂᑦ ᐆᒃᑐᕋᕐᓗᒍ ᐳᕐᑐᓂᖃᕐᑐᒃᓴᐅᕗᖅ ᓯᑕᒪᓂᒃ ᐃᑎᒐᖕᓂᒃ, ᐊᒻᒪ ᐃᒡᓕᕐᓇᐅᔭᖓᑕ ᐂᑉᐸᖓ ᐳᕐᑐᓂᕐᓴᖅ ᒪᕐᕈᑲᓵᖕᓂᒃ ᐃᑎᒑᖕᓂᒃ ᕿᒪᕈᖓᓂᖃᕐᓗᓂ ᓯᓈᓂᑦ ᐊᑦᔨᒌᒥᒃ ᐊᕙᑖᒍᑦ 7ᓂᒃ ᐃᑎᒃᑲᓂᒃ ᐳᕐᑐᓂᖃᕆᐊᖃᕐᐳᖅ. ᐊᒻᒪ ᐃᒡᓕᕐᓇᐅᔭᒃᑲᓐᓂᖓ ᕿᒪᕈᖓᓂᖃᕆᐊᖃᕐᐳᖅ ᓯᓈᓂᑦ ᐃᑎᒑᖕᓂᒃ ᒪᕐᕈᑲᓵᖕᓂᒃ ᐊᕙᑖᒍᑦ ᐊᑦᔨᒌᒥᒃ. 15ᑐᓂᕐᕈᓯᕐᕕᐅᑉ ᖄᖓ ᑐᓂᕐᕈᑎᒃᓴᓂᒃ ᐃᑯᐊᓚᑦᓯᕕᒃ 7ᓂᒃ ᐃᑎᒐᖕᓂᒃ ᓇᑎᖓᓂᑦ ᐳᕐᑐᓂᖃᕆᐊᖃᕐᐳᖅ; ᑎᕆᖅᑯᖏᑎᒍᑦ ᓯᑕᒪᓂᒃ ᓇᒡᔪᓐᖑᐊᖃᕐᓗᓂ ᐳᕐᑐᓂᖓᓂᑦ ᐊᑭᑦᔪᑎᓯᒪᔪᓂᒃ. 16ᑐᓂᕐᕈᓯᕐᕕᐅᑉ ᖄᖓ ᑭᒃᐹᕆᓪᓗᐊᕐᑐᒃᓴᐅᕗᖅ 20ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᓗᓂ ᑐᑭᒧᓪᓗ. 17ᕿᑎᖓᒍᑦ ᖄᖓᓂᑦ ᐊᖏᓂᕐᓴᒥᒃ ᑭᒃᐹᕆᓪᓗᐊᕐᑐᒥᒃ ᐃᓚᖃᕐᑐᒃᓴᐅᒋᕗᖅ 24ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᓗᓂ ᑐᑭᒧᓪᓗ, ᖃᖓᒎᑦ ᓯᓈᓂᑦ ᐊᖏᓂᕐᓴᐅᓗᓂ 10ᐃᓐᓴᓯᒥᒃ ᖄᖓᒎᕈᑦᑎᕐᓯᒪᓗᓂ, ᐃᓗᑐᓂᐅᔭᖓ ᑐᓂᕐᕈᓯᕐᕕᐅᑉ ᓇᑎᖓᓃᑦᑐᖅ ᐊᕙᑖᓂ ᐃᑎᒑᖕᓂᒃ ᒪᕐᕈᑲᓵᖕᓂᒃ ᐃᓗᑐᓂᖃᕐᑐᒃᓴᐅᕗᖅ, ᑐᖕᒥᕌᖃᕐᓗᓂ ᑐᓂᕐᕈᓯᕐᕕᐅᑉ ᓴᓂᕌᒍᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓂᒃ.”
ᑐᓂᕐᕈᓯᕐᕕᐅᑉ ᐃᑦᔪᕐᓁᑎᑕᐅᓂᖓ
18 #
ᒨᓯᓯ ᐂᑉᐸᖏᑦ 29:35-37. ᐅᕙᓐᓄᓪᓗ ᐅᖃᕐᐳᖅ, “ᐃᓅᑉ ᐃᕐᓂᖓ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᑯᐊ ᒪᓕᒃᑕᐅᔪᒃᓴᐅᕗᑦ ᑐᓂᕐᕈᓯᕐᕕᐅᑉ ᐃᑦᔪᕐᓁᑎᑕᐅᓂᒃᓴᖓᓄᑦ: ᐱᔭᕇᕐᑕᐅᒃᐸᑦ ᐅᓪᓗᒥ ᑕᕝᕙᓂ ᑐᓂᕐᕈᓯᕐᑐᒃᓴᐅᕗᓯ ᐃᑯᐊᓚᑦᓯᕕᒋᓗᒍ ᖄᖓᓂ; ᐆᒪᔫᓪᓗ ᐊᐅᖓᓂᒃ ᓯᕐᐸᕐᓴᕐᕕᒋᔭᒃᓴᕆᕙᓯ. 19ᑐᓂᕐᕈᓯᕐᑎᑦᓯᔩᑦ ᓕᕔᑦ ᐃᓚᒌᖕᓂᖓᓐᓂᑦ ᐱᓯᒪᔪᑦ ᔭᑑᑭᐅᑉ ᑭᖑᕚᖏᑦ ᑖᒃᑯᐊᑐᐊᖅ ᓇᔪᕐᑕᓐᓂ ᐱᔨᑦᓯᕐᑐᒃᓴᐅᕗᑦ ᐅᕙᓐᓂᒃ, ᐊᑕᓂᖅ ᒎᑎ ᐅᖃᕐᐳᖅ, ᐊᖑᓴᓪᓗᕐᒥᒃ ᐊᔪᕐᓂᕐᒧᑦ ᑐᓂᕐᕈᓯᐅᑕᐅᓂᐊᕐᑐᒥᒃ ᐱᑎᑕᒃᓴᕆᕙᑎᑦ. 20ᐊᐅᖓᑕ ᐃᓚᖓᓂᒃ ᐱᓗᑎᑦ ᑐᓂᕐᕈᓯᕐᕕᐅᑉ ᓇᒡᔪᓐᖑᐊᖏᑦ ᓯᑕᒪᑦ ᐊᐅᒥᑎᕐᑕᒃᓴᕆᕙᑎᑦ, ᖄᖓᑕᓗ ᑎᕆᖁᖏᑦ, ᐊᕙᑖᑕᓗ ᓯᓇᕐᔪᖏᑦ; ᑍᒤᓕᐅᕐᓗᑎᑦ ᑐᓂᕐᕈᓯᕐᕕᒃ ᐃᑦᔪᕐᓁᑎᑕᒃᓴᕆᕙᑦ ᐊᑐᕐᑕᐅᔪᓐᓇᕐᓯᑎᓪᓗᒍᓗ. 21ᐊᖑᓴᓪᓗᕐᓗ ᐊᔪᕐᓂᕐᒧᑦ ᑐᓂᕐᕈᑎᒃᓴᖅ, ᐃᓂᒃᓴᓕᐅᕐᑕᐅᓯᒪᔪᒥ ᑐᒃᓯᐊᕐᕕᒡᔪᐊᑉ ᐃᓗᐊᓂ ᐃᑯᐊᓚᑎᑕᒃᓴᕆᕙᑦ, ᐃᑦᔪᕐᓁᑦᑐᒃᑯᕕᐅᑉ ᓯᓚᑖᓂ. 22ᐅᓪᓘᓪᓗ ᐂᑉᐸᖓᓂ ᐊᖑᓴᓪᓗᕐᒥᒃ ᒎᑦᓯᒥᒃ ᖃᓄᐃᓐᓂᖃᖏᑦᑐᒥᒃ ᐊᔪᕐᑐᓕᓂᕐᓄᑦ ᑐᓂᕐᕈᓯᕐᑐᒃᓴᐅᕗᑎᑦ; ᑕᕝᕙ ᑐᓂᕐᕈᓯᕐᕕᒃ ᐊᐅᖓᓄᑦ ᐃᑦᔪᕐᓁᑎᑕᐅᓂᐊᕐᐳᖅ, ᐊᖑᓴᓪᓗᕐᒧᑦ ᓴᓗᒻᒪᕐᑕᐅᓚᐅᕐᓂᖓᑐᑦ. 23ᑍᒫᒃ ᓴᓗᒻᒪᕐᑕᐅᑎᑦᓴᕇᕈᕕᐅᒃ, ᐊᖑᓴᓪᓗᕐᒥᒃ ᑐᓂᕐᕈᓯᕐᑐᒃᓴᐅᕗᑎᑦ ᖃᓄᐃᓐᓂᖃᖏᑦᑐᒥᒃ ᓰᐱᐅᓪᓗ ᐊᖑᓴᓪᓗᖓᓂᒃ ᖃᓄᐃᓐᓂᖃᖏᑦᑐᒥᒃ ᑕᒪᖏᒃ ᖃᓄᐃᑦᔪᑎᖃᖏᑦᓯᐊᕐᑐᒃᓴᐅᕘᒃ. 24ᑖᒃᑯᐊᒃ ᐊᑕᓂᕐᒧᑦ ᑐᓂᕐᕈᑎᒋᔭᒃᓴᕆᕚᒃᑭᒃ, ᑐᓂᕐᕈᓯᕐᑎᑦᓯᔨᓄᓪᓗ ᑕᕆᐅᓕᕐᑕᐅᔪᒃᓴᐅᕘᒃ ᑐᓂᕐᕈᑕᐅᓗᑎᒡᓗ ᐃᑯᐊᓚᑎᑕᐅᓗᑎᒃ ᐊᑕᓂᕐᒧᑦ. 25ᖃᐅᑕᒫᑦ ᐅᓪᓗᓂᒃ 7ᓂᒃ ᐊᔪᕐᓂᕐᓄᑦ ᑐᓂᕐᕈᓯᐅᑎᒃᓴᓂᒃ ᐊᑐᐃᓐᓇᕈᐃᖃᑦᑕᕐᑐᒃᓴᐅᕗᑎᑦ ᒎᑦᓯᒥᒃ; ᐊᖑᓴᓪᓗᕐᒥᒡᓗ ᓰᐱᐅᓪᓗ ᐊᖑᓴᓪᓗᖓᓂᒃ, ᖃᓄᐃᑦᔪᑎᖃᖏᑦᓯᐊᕐᑐᓂᒃ. 26ᐅᓪᓗᓂᒃ 7ᓂᒃ ᑐᓂᕐᕈᓯᕐᑎᑦᓯᔩᑦ ᑐᓂᕐᕈᓯᕐᕕᖕᒥᒃ ᓴᓗᒻᒪᕐᓮᔪᒃᓴᐅᕗᑦ ᐃᑦᔪᕐᓁᓕᑎᓪᓗᒍᓗ. 27ᑕᒪᒃᑯᐊ ᐅᓪᓗᐃᑦ ᓈᔭᐅᒃᐸᑕ, ᐅᓪᓗᐃᑦ ᓯᑕᒪᐅᔪᕐᑐᖓᓂᑦ ᐱᒋᐊᕐᓗᑎᒃ ᑐᓂᕐᕈᓯᕐᑎᑦᓯᔩᑦ ᑐᓂᕐᕈᓯᕐᕕᖕᒥ ᑐᓂᕐᕈᓯᖃᑦᑕᓯᒋᐊᕐᑐᒃᓴᐅᕗᑦ ᑐᓂᕐᕈᑎᓂᒃ ᐃᑯᐊᓚᑎᑕᒃᓴᓂᒃ ᓮᒻᒪᖃᑎᒌᖕᓂᕐᒧᓪᓗ ᑐᓂᕐᕈᓯᕈᑎᓂᒃ; ᑕᕝᕙ ᐃᓚᓕᐅᕐᓂᐊᕐᐸᑦᓯ, ᐊᑕᓂᖅ ᒎᑎ ᐅᖃᕐᐳᖅ.”
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 43: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
