ᐃᓯᑭᐊᓕᐅᑉ ᐊᒡᓚᖏᑦ 42
42
ᐃᒡᓘᒃ ᒪᕐᕉᒃ ᑐᒃᓯᐊᕐᕕᒡᔪᐊᑉ ᖃᓂᒋᔮᓃᑦᑑᒃ
1ᑕᕝᕙ ᑐᕐᓲᖑᔭᕐᒧᐊᕈᑎᕚᖓ, ᓯᓚᕙᓯᖕᓂᕐᓴᒧᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ, ᐃᒡᓗᒧᐊᕈᑎᕚᖓᓗ ᑐᒃᓯᐊᕐᕕᒡᔪᐊᑉ ᓱᓇᑕᖃᖏᓐᓂᖓᑕ ᐊᑭᐊᓃᑦᑐᒧᑦ. 2ᐃᒡᓗ ᐅᓐᓄᐊᓪᓗᐊᑉ ᓇᓛᓃᑦᑐᖅ ᑐᑭᒧᖃᕐᐳᖅ 168ᓂᒃ ᐃᑎᒐᖕᓂᒃ, 84ᓂᒡᓗ ᓴᓂᒧᑐᓂᖃᕐᓗᓂ. 3ᑕᒪᑐᒪ ᐱᕕᑐᓂᖓ 34ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᐳᖅ ᑐᒃᓯᐊᕐᕕᒡᔪᐊᑉ ᑭᒡᓕᖓᓃᑦᑐᖅ, ᑐᕐᓲᖑᔭᒧᑦ ᓯᓚᓪᓕᕐᒧᑦ ᖁᐊᕐᑎᑕᒐᓕᖕᒧᑦ ᓵᓐᖓᓪᓗᓂ, ᓇᑎᖏᓪᓗ ᑖᒃᑯᐊ ᐱᖓᓲᓕᖅᑲᖓᕗᑦ ᖁᓕᕇᖑᓪᓗᑎᒃ. 4ᐃᒡᓗᐃᑦ ᓯᕗᕌᒍᑦ ᐊᖅᑯᑎᖃᕐᐳᖅ, 16ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᑐᒥᒃ 168ᓂᒃ ᑕᑭᓂᖃᕐᓗᓂ, ᐃᑎᕐᑕᕐᕕᖃᐅᕐᓗᑎᒡᓗ ᐅᓐᓄᐊᓪᓗᐊᑉ ᓇᓛᒍᑦ. 5ᐃᒡᓗᕈᓰᑦ ᖁᓛᓃᑦᑐᑦ ᓴᓂᒧᑭᓐᓂᕐᓴᐅᕙᓪᓕᐊᓯᒪᕗᑦ ᐊᓪᓕᕐᒦᑦᑐᓂᑦ, ᐃᓗᐊᒍᑦ ᖁᒻᒧᑦ ᒪᔫᑎᖃᕐᓂᖏᓐᓄᑦ ᓇᑎᖏᑦ ᒥᑭᒡᓕᕙᓪᓕᐊᓯᒪᖕᒪᑕ. 6ᐃᒡᓗᕈᓰᑦ ᖁᓕᕇᖑᓪᓗᑎᒃ ᐱᖓᓱᓂᒃ ᓇᑎᖃᕐᐳᑦ, ᓱᑲᕐᓂᒡᓗ ᓇᐸᕕᖃᕋᑎᒃ ᑐᕐᓲᖑᔭᕐᒦᑦᑐᑎᑐᑦ ᓯᓚᓪᓕᕐᒦᑦᑐᑎᑐᑦ; ᑍᒤᒻᒪᑦ ᖁᓪᓖᑦ ᓇᑎᖏᑦ ᐊᑖᓃᑦᑐᑦ ᓇᑎᖏᓐᓂᑦ ᒥᑭᓐᓂᕐᓴᐅᕙᓪᓕᐊᓯᒪᕗᑦ. 7ᐊᕙᓗᕐᔪᐊᖅ ᓯᓚᑖᓃᑦᑐᖅ ᖁᒻᒧᑦ ᑐᑭᓕᐊᑦᓯᐊᕐᓗᓂ 84ᓂᒃ ᐃᑎᒐᖕᓂᒃ ᐳᕐᑐᓂᖃᕐᐳᖅ, ᐃᓗᐊᑕ ᓴᓂᕋᖓ ᑐᕐᓲᖑᔭᕐᒧᑦ ᓯᓚᓪᓕᕐᒧᑦ ᓵᓐᖓᔪᖅ ᐃᒡᓗᕈᓯᖏᓐᓄᑦ ᖁᒻᒧᑦ ᒥᑭᒡᓕᕙᓪᓕᐊᓯᒪᒐᓗᐊᕐᑎᓪᓗᒍ. 8ᐃᒡᓗᕈᓰᑦ ᑐᕐᓲᖑᔭᕐᒧᑦ ᓯᓚᓪᓕᕐᒧᑦ ᓵᓐᖓᔪᑦ 84ᓂᒃ ᐃᑎᒐᖕᓂᒃ ᐳᕐᑐᓂᖃᕐᑐᒦᑉᐳᑦ, ᐃᒡᓗᕈᓰᑦ ᑐᒃᓯᐊᕐᕕᒡᔪᐊᕐᒧᑦ ᓵᓐᖓᔪᑦ 168ᓂᒃ ᑕᑭᓂᖃᕐᑐᒦᑎᓪᓗᒋᑦ. 9ᐃᒡᓗᕈᓯᒃᑯᑦ ᐊᒃᐸᓯᖕᓂᕐᐹᒃᑯᑦ ᐃᑎᕐᑕᕐᕕᖃᕐᐳᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒃᑯᑦ, ᑐᕐᓲᖑᔭᕐᒥᑦ ᓯᓚᓪᓕᕐᒥᓐᖔᖓᔪᒥᒃ, 10ᐊᕙᓗᕐᔪᐊᑉ ᓴᓂᕋᖓᑕ ᓯᓚᑖᓂᑦ ᐱᒋᐊᕐᓯᒪᔪᒥᒃ.
ᐅᓪᓗᓪᓗᐊᑉ ᓇᓛᓂ ᐃᒡᓗᑕᖃᕆᕗᖅ, ᑐᕐᓲᖑᔭᐅᑉ ᐃᒡᓗᐃᓪᓗ ᐊᑭᐊᓃᑦᑐᓂᒃ 11ᐃᒡᓗᕈᓰᑦ ᓯᕗᕌᒍᑦ ᓱᓪᓗᑯᑖᒃᑕᖃᕐᐳᖅ; ᐅᓐᓄᐊᓪᓗᐊᑉ ᓇᓛᓃᑦᑑᑉ ᐊᑦᔨᖓᓂᒃ, ᑍᒫᓪᓗᐊᖅ ᑕᑭᓂᖃᕐᐳᖅ ᓴᓂᒧᑐᓂᖃᕐᓗᓂᓗ, ᐃᑎᕐᑕᕐᕕᖓ ᐋᖅᑭᒃᓯᒪᓂᖓᓗ ᐅᒃᑯᐊᖏᓪᓗ ᐊᑦᔨᒋᒋᕔᑦ. 12ᐅᒃᑯᐊᕐᑕᖃᕆᕗᖅ ᐃᒡᓗᕈᓯᕐᓂ ᐊᒃᐸᓯᖕᓂᕐᓴᒦᑦᑐᒥᒃ ᐃᒡᓘᑉ ᐅᓪᓗᓪᓗᐊᖓᑕ ᓇᓛᓂ ᐊᕙᓗᐊᑕ ᐃᓱᐊᓂ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥᒃ, ᑕᕝᕗᖓ ᐃᑎᕐᑐᖃᕈᓂ ᓱᓪᓗᑯᑖᒧᑦ, ᐊᕙᓗᕐᔪᐊᑉ ᐊᕕᒃᓯᒪᒋᐊᓕᕐᓂᖓ ᐊᑭᓪᓗᐊᖓᓃᑉᐳᖅ.
13ᑕᕝᕙ ᐅᖃᐅᑎᕚᖓ, “ᑖᒃᑯᐊ ᐃᒡᓗᐃᑦ ᐅᓐᓄᐊᓪᓗᐊᑉ ᓇᓛᓃᑦᑐᑦ ᓯᕿᓂᐅᓪᓗ ᓇᓛᓃᑦᑐᑦ ᐃᑦᔪᕐᓁᑦᑑᕗᑦ, ᑖᒃᑯᓇᓂ ᑐᓂᕐᕈᓯᕐᑎᑦᓯᔩᑦ ᐊᑕᓂᐅᑉ ᓇᔪᕐᑕᖓᓄᐊᕐᓂᐊᕐᑐᑦ ᑐᓂᕐᕈᑎᕕᓂᕐᓂᒃ ᐃᑦᔪᕐᓁᓐᓂᕐᐹᓂᒃ ᓂᕆᔪᒃᓴᐅᕗᑦ; ᑐᓂᕐᕈᑏᓪᓗ ᐃᑦᔪᕐᓁᓐᓂᕐᐹᖏᑦ ᑕᕝᕗᓐᖓᕐᑕᐅᕙᖕᓂᐊᕐᐳᑦ ᑐᓂᕐᕈᑕᐅᓯᒪᔪᑦ ᓂᐊᖂᔭᒃᓮᑦ, ᐊᔪᕐᓂᕐᓄᑦ ᑐᓂᕐᕈᑎᕕᓃᑦ, ᐸᓯᔭᒃᓴᐅᓂᕐᒧᓪᓗ ᐊᑭᓕᐅᑎᒃᓴᓄᑦ ᑐᓂᕐᕈᑎᕕᓃᑦ, ᑕᒪᓐᓇ ᐃᑦᔪᕐᓁᑦᑐᒃᑯᕕᐅᖕᒪᑦ. 14ᑐᓂᕐᕈᓯᕐᑎᑦᓯᔩᑦ ᐃᑦᔪᕐᓁᑦᑐᒃᑯᕕᖕᒧᑦ ᐃᑎᕐᑐᕕᓂᐅᒍᑎᒃ, ᑐᕐᓲᖑᔭᕐᒧᑦ ᐊᓂᔪᒃᓴᐅᓐᖏᓚᑦ ᐊᓐᓄᕌᑦ ᐊᑐᕐᑕᑎᒃ ᐊᑐᐃᓐᓇᕐᓗᒋᑦ ᑕᕝᕗᖓᓕ ᕿᒪᒃᑕᒃᓴᕆᕔᑦ ᐱᔨᑦᓯᕐᕕᒋᔭᒥᖕᓄᑦ, ᑕᒪᒃᑯᐊ ᐃᑦᔪᕐᓁᒻᒪᑕ; ᐊᓐᓄᕌᓂᒃ ᐊᓯᖏᓐᓂᒃ ᐊᑎᓗᑎᒃ ᑭᓯᐊᓂ ᐊᓂᖃᑦᑕᕆᐊᖃᕐᐳᑦ ᐃᓄᐃᑦ ᓇᔪᕐᐸᒃᑕᖏᓐᓅᓕᕈᑎᒃ.”
ᑐᒃᓯᐊᕐᕕᒡᔪᐊᑉ ᓇᔪᕐᑕᖓᑕ ᐆᒃᑐᕋᕐᑕᐅᓂᖓ
15ᑐᒃᓯᐊᕐᕕᒡᔪᐊᓪᓕ ᐃᓗᐊ ᐆᒃᑐᕋᕇᕋᒥᐅᒃ, ᐃᑎᕐᑕᕐᕕᒃᑯᑦ ᓯᕿᓂᐅᑉ ᓄᐃᕕᐊᓄᑦ ᓵᓐᖓᔪᒃᑯᑦ ᐊᓂᖃᑎᒋᕚᖓ, ᑐᒃᓯᐊᕐᕕᒡᔪᐊᓪᓗ ᐊᕙᑎᓕᒫᖓ ᐆᒃᑐᕋᓕᕆᕚ. 16ᐆᒃᑐᕋᐅᑎᓂ ᓱᓪᓗᓕᒃ ᐱᓪᓗᓂᐅᒃ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᐆᒃᑐᕋᕐᒪᒍ, ᑕᑭᓂᖃᕐᐳᖅ 840ᓂᒃ ᐃᑎᒐᖕᓂᒃ. 17ᐊᒻᒪ ᐅᓐᓄᐊᓪᓗᐊᑉ ᓇᓛᓃᑦᑐᖅ ᐆᒃᑐᕋᕐᒪᒍ, ᑕᑭᓂᖃᕐᐳᑦ 840ᓂᒃ ᐃᑎᒐᖕᓂᒃ, 18ᐊᒻᒪ ᐅᓪᓗᓪᓗᐊᑉ ᓇᓛᓃᑦᑐᖅ ᐆᒃᑐᕋᕐᒪᒍ, ᑕᑭᓂᖃᕐᐳᑦ 840ᓂᒃ ᐃᑎᒐᖕᓂᒃ, 19ᐊᒻᒪ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ ᐆᒃᑐᕋᕐᒪᒍ, ᑕᑭᓂᖃᕐᐳᑦ 840ᓂᒃ ᐃᑎᒐᖕᓂᒃ. 20ᐊᑭᓐᓇᓕᒫᖏᑦ ᓯᑕᒪᑦ ᐆᒃᑐᕋᕇᕐᒪᒋᑦ. ᐊᕙᑖᒍᑦ ᐊᕙᓗᕐᔪᐊᖓ, 840ᓂᒃ ᐃᑎᒐᖕᓂᒃ ᑕᑭᓂᖃᕐᐳᖅ ᓴᓂᒧᖃᕐᓗᓂᓗ ᑭᒃᐹᕆᓪᓗᐊᕐᓗᓂ, ᐊᕙᓗᕐᔪᐊᕐᓗ ᐊᕕᒃᓯᒪᑎᑦᓯᕗᖅ ᐃᑦᔪᕐᓁᑦᑐᓂᒃ ᐃᑦᔪᕐᓁᑦᑑᖏᑦᑐᓂᒡᓗ.
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 42: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
