ᐃᓯᑭᐊᓕᐅᑉ ᐊᒡᓚᖏᑦ 41
41
1ᑕᕝᕙ ᐃᑎᕐᑎᑉᐹᖓ ᐊᑯᓪᓕᕐᐹᒦᑦᑐᒧᑦ ᐃᑦᔪᕐᓁᑦᑐᒃᑯᕕᖕᒧᑦ, ᐃᑎᕐᑕᕐᕕᖓᑕᓗ ᓱᓪᓗᑯᑖᖓ ᐆᒃᑐᕋᕐᒪᒍ ᑐᑭᒧᖃᕐᐳᖅ ᖁᓕᓂᒃ ᐃᑎᒐᖕᓂᒃ. 2ᓴᓂᒧᑐᓂᖃᕐᓗᓂᓗ 18ᓂᒃ ᐃᑎᒐᖕᓂᒃ; ᐊᕙᓗᖏᑕᓗ ᐊᑭᓐᓇᖏᑦ ᓯᑕᒪᐅᔪᕐᑐᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᐳᑦ ᐊᑭᓕᕇᑦ; ᐃᒡᓗᕈᓯᕐᓗ ᐆᒃᑐᕋᕐᒪᒍ ᑕᑭᓂᖃᕐᐳᖅ 68ᓂᒃ ᐃᑎᒐᖕᓂᒃ, ᓴᓂᒧᑐᓂᖃᕐᓗᓂᓗ 34ᓂᒃ.
3ᐊᒻᒪ ᐃᒡᓗᕈᓯᕐᒧᑦ ᐃᓗᕙᓯᖕᓂᕐᐹᒧᐊᕐᓗᓂ ᓱᓪᓗᑯᑖᖓ ᐆᒃᑐᕋᕐᒪᒍ, ᓴᓂᒧᑐᓂᖃᕐᐳᖅ ᐱᖓᓱᓂᒃ ᐃᑎᒐᖕᓂ, ᑐᑭᒧᖃᕐᓗᓂᓗ ᖁᓕᓂᒃ ᐃᑎᒐᖕᓂᒃ; ᐃᑎᕐᑕᕐᕕᖓᓂᑦ ᐃᒡᓗᕈᓯᐅᑉ ᐃᓗᕙᓯᖕᓂᕐᐹᖓᑕ ᐊᑭᓐᓇᖏᑦ ᑐᑭᒧᖃᕐᐳᑦ 12ᓂᒃ ᐃᑎᒐᖕᓂᒃ. 4ᐃᒡᓗᕈᓯᕐᓗ ᐆᒃᑐᕋᕐᒪᒍ ᐊᖏᓂᖓ, ᐊᑦᔨᒌᒥᒃ ᐊᖏᓂᖃᕐᐳᖅ 34ᓂᒃ ᐃᑎᒐᖕᓂᒃ ᑐᑭᒧᑦ ᓴᓂᒧᓪᓗ, ᑕᒪᑐᒪᓕ ᐅᖓᑖᓂ. ᑖᑦᓱᒪ ᐅᖃᐅᑎᕚᖓ, “ᑖᓐᓇ ᑕᕝᕙ ᐃᑦᔪᕐᓁᓐᓂᕐᐹᖅ.”
ᐃᒡᓗᕈᓰᑦ ᑐᒃᓯᐊᕐᕕᒡᔪᐊᑉ ᐊᕙᓗᕐᔪᐊᖓᓄᑦ ᐃᓚᒋᓕᐅᓯᒪᔪᑦ
5ᑖᑦᓱᒪᓗ ᐆᒃᑐᕋᕐᒪᒍ ᑐᒃᓯᐊᕐᕕᒡᔪᐊᑉ ᐊᕙᓗᕐᔪᐊᖓ, ᐃᑦᔪᓂᖃᕐᐳᖅ ᖁᓕᓂᒃ ᐃᑎᒐᖕᓂᒃ; ᑐᒃᓯᐊᕐᕕᒡᔪᐊᓪᓗ ᐊᕙᓗᕐᔪᐊᖓᓄᑦ ᐃᓚᒋᓕᐅᓯᒪᔪᓂᒃ ᐃᒡᓗᕈᓯᖃᐅᕐᐳᖅ 7ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᑐᓂᒃ ᑐᒃᓯᐊᕐᕕᒡᔪᐊᑉ ᐊᕙᑎᓕᒫᖓᓃᑦᑐᓂᒃ. 6ᑖᒃᑯᐊᓗ ᐃᒡᓗᕈᓰᑦ ᖁᓕᕇᖑᕗᑦ ᖁᒻᒧᑦ ᐱᖓᓱᓂᒃ ᓇᑎᖃᕐᓗᑎᒃ ᓇᑎᖅ ᐊᑕᐅᓯᖅ 30ᓂᒃ ᐃᒡᓗᕈᓯᕐᑕᖃᐅᕐᓗᓂ. ᐃᒡᓗᕈᓯᐅᑉ ᖁᓪᓕᐅᑉ ᓇᑎᖏᑦ ᐊᖏᓂᕐᓴᐅᕗᑦ ᐊᕙᓗᒧᑦ ᐊᒃᑐᐊᔪᑦ ᐃᒡᓗᕈᓯᕐᒥᑦ ᐊᓪᓕᕐᒥᑦ ᓇᔪᒻᒥᖃᑕᐅᑎᑦᓯᐊᕈᑎᒃᓴᖏᓐᓄᑦ, ᐃᒡᓗᕈᓰᑦ ᓇᑎᖏᑦ ᐊᕙᓗᕐᔪᐊᒧᑦ ᐊᒃᑐᐊᓪᓗᑎᒃ ᐊᑦᓱᖏᕐᕕᒋᓯᒪᖏᒃᑲᓗᐊᕐᓗᒍ ᐊᕙᑖ. 7ᐃᒡᓗᕈᓰᓪᓗ ᓴᓂᕋᕐᒦᑦᑐᑦ ᖁᒻᒧᑦ ᓇᑎᖏᑕ ᓴᓂᒧᑐᓂᖏᑦ ᐊᖏᓕᕙᓪᓕᐊᓯᒪᕗᑦ ᖁᓕᕇᒃᐸᓪᓕᐊᓂᖏᑦ ᒪᓕᒡᓗᒋᑦ ᑐᒃᓯᐊᕐᕕᒡᔪᐊᑉ ᐊᕙᓗᕐᔪᐊᖓᓂ; ᐊᕙᓗᕐᔪᐊᓪᓗ ᐃᓗᖔᖓᒍᑦ ᐃᒡᓗᕈᓰᑦ ᖃᓕᕇᑦ ᓯᓚᑖᒍᑦ ᒪᔪᕋᐅᑎᓕᐅᕐᓯᒪᕗᖅ ᐃᒡᓗᕈᓰᑦ ᖁᓛᓅᕈᒪᔪᑦ ᐊᑯᓪᓕᕐᐹᒃᑰᕐᓗᑎᒃ ᖁᓛᓅᕈᓐᓇᕐᓗᑎᒃ. 8ᑕᑯᒋᕗᖓ ᑐᒃᓯᐊᕐᕕᒡᔪᐊᑉ ᐊᕙᑖᒍᑦ ᐃᒡᓕᕐᓇᐅᔭᓕᐅᕐᓯᒪᓂᖓᓂᒃ; ᐃᒡᓗᕈᓰᑦ ᑐᓐᖓᕕᒋᔭᖏᓐᓂᒃ ᓯᑕᒪᐅᔪᕐᑐᓂᒃ ᐃᑎᒐᖕᓂᒃ ᓴᓂᒧᑐᓂᓕᖕᓂᒃ. 9ᐃᒡᓗᕈᓰᑦ ᐊᕙᓗᖏᑦ ᐊᕙᓗᕐᔪᐊᒧᑦ ᐊᒃᑐᐊᔪᑦ ᐃᑦᔪᓂᖃᕐᐳᖅ ᓯᑕᒪᐅᔪᕐᑐᓂᒃ ᐃᑎᒐᖕᓂᒃ; ᑍᒤᒻᒪᑦ ᐃᒡᓕᕐᓇᐅᔭᖃᕐᐳᑦ ᐃᒡᓗᕈᓰᑦ ᖁᓛᖏᑕ ᖄᖓᑕ ᓯᓈᒍᑦ. 10ᐃᒡᓗᕈᓰᑦ ᐊᕙᓗᕐᔪᐊᓪᓗ ᐊᑯᓐᓂᖓ ᓴᓂᒧᑐᓂᖃᕐᐳᖅ 34ᓂᒃ ᐃᑎᒐᖕᓂᒃ ᑐᒃᓯᐊᕐᕕᒡᔪᐊᑉ ᐊᕙᑎᓕᒫᖓᒎᖓᓪᓗᓂ. 11ᐃᒡᓗᕈᓰᓪᓗ ᐃᑎᕐᑕᕐᕕᖃᕐᐳᑦ ᓇᑎᖓᑕ ᐃᒡᓗᕈᓯᖃᖏᓐᓂᖓᑕ ᓇᓛᒍᑦ, ᐃᑎᕐᑕᕐᕕᖓᑕ ᐃᓚᖓ ᐅᓐᓄᐊᓪᓗᐊᒧᑦ ᓵᓐᖓᕗᖅ, ᐃᑎᕐᑕᕐᕕᖓᑕᓗ ᐂᑉᐸᖓ ᐅᓪᓗᓪᓗᐊᑉ ᓇᓛᓄᑦ ᓵᓐᖓᓪᓗᓂ; ᑕᒪᓐᓇ ᐃᒡᓗᕈᓯᕐᑕᖃᖏᑦᑐᖅ ᓇᑎᖓ ᓴᓂᒧᑐᓂᖃᕐᐳᖅ 10ᓂᒃ ᐃᑎᒐᖕᓂᒃ.
ᐃᒡᓗ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ
12ᐃᒡᓗ ᑐᒃᓯᐊᕐᕕᒡᔪᐊᑉ ᓱᓇᑕᖃᖏᓐᓂᖓᓄᑦ ᓵᓐᖓᔪᖅ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ ᑐᑭᒧᖃᕐᐳᖅ 150ᓂᒃ ᐃᑎᒐᖕᓂᒃ; ᓴᓂᒧᖃᕐᓗᓂᓗ 116ᓂᒃ ᐃᑎᖓᖕᓂᒃ, ᐊᕙᓗᕐᔪᐊᓕᒫᕐᓗ ᐃᑦᔪᓂᖃᕐᐳᖅ 9ᓂᒃ ᐃᑎᒐᖕᓂᒃ.
ᑐᒃᓯᐊᕐᕕᒡᔪᐊᓕᒫᑉ ᐆᒃᑐᕋᕐᑕᐅᓂᖓ
13ᑐᒃᓯᐊᕐᕕᒡᔪᐊᑉ ᓯᓚᑖ ᐆᒃᑐᕋᕐᒪᒍ ᑕᑭᓂᖃᕐᐳᖅ 168ᓂᒃ ᐃᑎᒐᖕᓂᒃ; ᓱᓇᑕᖃᖏᓐᓂᖓ ᐃᓚᐅᑎᓪᓗᒍ ᑐᒃᓯᐊᕐᕕᒡᔪᐊᖅ ᓴᓂᒧᖃᕐᐳᖅ 168ᓂᒃ ᐃᑎᒐᖕᓂᒃ. 14ᑐᒃᓯᐊᕐᕕᒡᔪᐊᑉ ᓯᕗᕌᑕ ᓴᓂᒧᑐᓂᖓ ᓱᓇᑕᖃᖏᓐᓂᖓ ᐱᖃᓯᐅᑎᓪᓗᒍ, ᓴᓂᒧᑐᓂᖃᕆᕗᖅ 168ᓂᒃ ᐃᑎᒐᖕᓂᒃ. 15aᐊᒻᒪ ᐆᒃᑐᕋᕆᕚ ᑐᒃᓯᐊᕐᕕᒡᔪᐊᑉ ᑐᑭᒧᑐᓂᖓ ᓱᓇᑕᖃᖏᓐᓂᖏᒃ ᐱᖃᓯᐅᑎᓪᓗᒋᒃ ᓴᓂᕌᒎᖓᔫᒃ ᑐᑭᒧᑐᓂᖃᕆᕗᖅ 168ᓂᒃ ᐃᑎᒐᖕᓂᒃ.
ᑐᒃᓯᐊᕐᕕᒡᔪᐊᑉ ᐃᓗᐊᑕ ᓴᓇᓯᒪᓂᖓ
15bᑐᒃᓯᐊᕐᕕᒡᔪᐊᑉ ᐃᑎᕐᕕᐊᑕ ᑐᕐᓲᖑᔭᖓ ᐃᑦᔪᕐᓁᑦᑐᒃᑯᕕᒡᓗ ᐃᑦᔪᕐᓁᓐᓂᕐᐹᒃᑯᕕᒡᓗ 16ᑖᒃᑯᐊ ᐱᖓᓱᑦ ᐊᑕᖏᕐᓗᑎᒃ ᐃᓗᑉᐱᐊᓕᕐᓯᒪᕗᑦ ᕿᔪᖕᒥᒃ ᐃᒐᓛᖏᓪᓗ ᒪᑐᑦᑕᕐᓗᑎᒃ. ᐃᓗᓕᒫᑦᓯᐊᖏᑦ ᕿᔪᖕᒥᒃ ᖄᐹᓕᕐᓯᒪᕗᑦ ᓇᑎᖓᓂᑦ ᐃᒐᓛᖃᕐᕕᖏᑦ ᑎᑭᓪᓗᒋᑦ, ᐃᒐᓛᖏᓪᓗ ᒪᑐᓯᒪᓪᓗᑎᒃ. 17ᑐᒃᓯᐊᕐᕕᒡᔪᐊᑉ ᐃᓗᓕᒫᖓ ᑕᕐᓯᕐᑐᕐᓯᒪᕗᑦ ᓴᓇᓐᖑᐊᕐᓯᒪᔪᓂᒃ ᐅᒃᑯᐊᖏᑕ ᖁᓛᓄᑦ ᑎᑭᓯᒪᔪᓂᒃ ᐊᒡᓛᑦ ᐃᒡᓗᕈᓯᖓᑕ ᐃᓗᓪᓕᕐᐹᖓᓄᑦ ᑎᑭᓪᓗᓂ, ᓯᓚᑖᓄᓪᓗ, ᓴᓂᕋᓕᒫᑦᓯᐊᖏᓪᓗ ᐊᑦᔨᓐᖑᐊᓕᐅᕐᓯᒪᔪᓂᒃ ᑕᕐᓯᕐᑐᕐᓯᒪᕗᑦ. 18ᓯᕈᐱᓐᖑᐊᓂᒃ ᐃᓴᕈᓕᖕᓂᒃ ᓇᐹᕐᑐᓐᖑᐊᑦ ᐹᒦᑦ ᓯᕈᐱᓐᖑᐊᓪᓗ ᐊᑯᓪᓕᕇᒃᐳᑦ ᒪᓕᖃᑦᑕᐅᑎᓯᒪᔪᓂᒃ ᐃᒡᓗᕈᓯᓕᒫᖏᑦ ᓈᓯᒪᕗᑦ. ᓯᕈᐱᓐᖑᐊᓕᒫᓪᓗ ᒪᕐᕉᖕᓂᒃ ᑮᓇᖃᕐᐳᑦ; 19ᐂᑉᐸᖓ ᐃᓅᑉ ᑮᓇᖓᑎᑐᑦ ᑮᓇᖃᕐᐳᖅ ᓇᐹᕐᑐᓐᖑᐊᒧᑦ ᐹᒥᒧᑦ ᑭᖑᓂᕐᒥᓃᑦᑐᒧᑦ ᓵᓐᖓᓪᓗᓂ, ᑮᓇᖓᑕ ᐂᑉᐸᖓ ᓛᔭᑎᑐᑦ ᑮᓇᖃᕐᐳᖅ ᓇᐹᕐᑐᓐᖑᐊᕐᒧᑦ ᐹᒥᒧᑦ ᓯᕗᓂᕐᒥᖕᓃᑦᑐᒧᑦ ᓵᓐᖓᔪᒥᒃ. ᓴᓇᓐᖑᐊᕐᓯᒪᔪᓪᓗ ᑍᒤᓕᖓᔪᐃᓐᓇᐅᕗᑦ ᐊᑭᓐᓇᓕᒫᖏᓐᓂ. 20ᓇᑎᕐᒥᑦ ᐱᒋᐊᕐᓗᑎᒃ ᐅᒃᑯᐊᖏᑕ ᖁᓛᓄᑦ ᑎᑭᐅᒪᓪᓗᑎᒃ ᑍᒤᓕᐅᕐᓯᒪᕗᑦ ᓯᕈᐱᓐᖑᐊᑦ ᐹᒥᓐᖑᐊᓪᓗ ᐊᑭᓐᓇᓕᒫᖏᓐᓂ. 21aᐃᑦᔪᕐᓁᑦᑐᒃᑯᕕᖕᒧᑦ ᐃᑎᕐᕕᐅᑉ ᐅᒃᑯᐊᖓᑕ ᐊᕙᓗᖓ ᓯᒃᑭᑕᓪᓗᐊᒥᒃ ᐊᕙᓗᖃᕐᐳᖅ.
ᑐᓂᕐᕈᓯᕐᕕᒃ ᕿᔪᒃ
21bᐃᑦᔪᕐᓁᓐᓂᕐᐹᑉ ᐃᑎᕐᕕᐊᑕ ᓯᕗᕌᓃᑦᑐᖃᕐᐳᖅ ᑐᓂᕐᕈᓯᕐᕕᐅᔮᕐᑐᒥᒃ 22ᕿᔪᐃᓐᓇᕐᒥᒃ, ᑕᓪᓕᒪᓂᒃ ᐃᑎᒐᖕᓂᒃ ᐳᕐᑐᓂᖃᕐᐳᖅ, ᑕᑭᓂᖃᕐᓗᓂ ᓯᑕᒪᓂᒃ ᐃᑎᒐᖕᓂᒃ, ᓯᓕᖕᓂᖃᕐᓗᓂᓗ ᓯᑕᒪᓂᒃ; ᑎᕆᖅᑯᖏᑦ ᑐᓐᖓᕕᖓᓗ, ᓴᓂᕋᓕᒫᖏᓪᓗ ᕿᔪᐃᓐᓇᐅᕗᑦ. ᑖᑦᓱᒪ ᐅᖃᐅᑎᕚᖓ, “ᑖᓐᓇ ᑕᕝᕙ ᓵ ᐊᑕᓂᐅᑉ ᓯᕗᕌᓃᑦᑐᖅ.”
ᐅᒃᑯᐊᖏᑦ
23ᐃᑦᔪᕐᓁᑦᑐᒃᑯᕕᖕᒧᐊᖓᔪᖅ ᐃᑦᔪᕐᓁᓐᓂᕐᐹᒧᐊᖓᔪᕐᓗ ᑕᒪᖏᒃ ᐃᓗᓕᕇᖕᓂᒃ ᐅᒃᑯᐊᑲᕐᐴᒃ. 24ᐅᒃᑯᐊᖏᑦ ᓯᓚᓪᓕᕇᑦ ᐊᕙᒻᒧᑦ ᐅᒃᑯᐃᕐᑕᕐᐳᑦ, ᐊᑐᓂᓪᓗ ᕿᕕᕐᑕᐅᑎᖃᕐᓗᑎᒃ ᓇᓪᓕᐊᓐᓄᑦ ᐅᒃᑯᐃᕐᑕᐅᑎᖏᓐᓂᒃ. 25ᐃᑦᔪᕐᓁᑦᑐᒃᑯᕕᐅᓪᓗ ᐅᒃᑯᐊᖏᒃ ᑕᕐᓯᕐᑐᕐᓯᒪᕗᑦ ᓯᕈᐱᓐᖑᐊᓂᒃ ᐹᒥᓐᖑᐊᓂᒡᓗ ᓇᐹᕐᑐᓐᖑᐊᓂᒃ, ᐊᑭᓐᓇᒦᑦᑐᑦ ᑕᕐᓯᕐᑐᕐᓯᒪᓂᖏᑎᑐᑦ; ᐅᒃᑯᐊᓪᓗ ᓯᓚᑖᒍᑦ ᖄᐹᓕᕐᓯᒪᕗᑦ ᕿᔪᖕᒥᒃ. 26ᐃᑦᔪᕐᓁᑦᑐᒃᑯᕕᒡᓗ ᐃᒐᓛᖃᐅᕐᐳᖅ ᐃᒡᓗᒌᓂᒃ ᒪᑐᑦᑕᐅᑎᓕᖕᓂᒃ, ᐊᑭᓇᖏᒡᓗ ᐃᒡᓗᒌᒃ ᑕᕐᓯᕐᑐᕐᓯᒪᓪᓗᑎᒃ ᐹᒥᓐᖑᐊᓂᒃ.
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 41: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
