ᐃᔅᑕᐅᑉ ᐊᒡᓚᖏᑦ 8
8
ᐃᔅᑕᐅᑉ ᔫᑎᓂᒃ ᓴᐳᑦᔨᓂᖓ
1ᐅᓪᓗᒥ ᑕᕝᕙᓂ ᐊᖓᔪᖅᑳᕐᔪᐊᑉ ᐊᕼᐊᓱᐃᕋᔅᓯᐅᑉ ᑯᐃᓐ ᐃᔅᑕᕐ ᕼᐂᒪᓂᐅᑉ ᔫᑎᑦ ᐊᑭᕋᕐᑐᕐᑎᖓᑦᑕ, ᐱᖁᑎᓕᒫᖏᓐᓂᒃ ᑐᓂᓯᕕᒋᕚ. ᒧᐊᑎᑬᓗ ᐊᖓᔪᖅᑳᕐᔪᐊᑉ ᐃᒡᓗᖓᓄᑦ ᐃᑎᕐᑎᑕᐅᕗᖅ, ᐃᔅᑕᐅᑉ ᐅᖃᐅᓯᕆᓚᐅᕐᒪᒍ ᓱᓇᒋᖕᒪᖔᕐᒥᐅᒃ. 2ᑕᕝᕙ ᐊᖓᔪᖅᑳᕐᔪᐊᑉ ᓇᒡᒍᐊᕐᒥᒃ ᓇᓗᓁᒃᑯᓯᕐᓯᑦᔪᑎᓕᒃ ᐊᑐᕐᑕᓂ ᐲᕐᐹ, ᕼᐂᒪᓂᒥᑦ ᐅᑎᕐᑎᓚᐅᕐᑕᓂ, ᑐᓂᓪᓗᒍᓗ ᒧᐊᑎᑬᒧᑦ; ᐃᔅᑕᕐᐅᓪᓗ ᒧᐊᑎᑬ ᑲᒪᔨᒻᒪᕆᓐᖑᕐᑎᑉᐹ ᕼᐂᒪᓂᐅᑉ ᐱᖁᑎᒋᓚᐅᕐᑕᖏᓐᓄᑦ.
3ᐃᔅᑕᕐᓕ ᐊᖓᔪᖅᑳᕐᔪᐊᑉ ᐃᑎᒐᖏᓐᓄᑦ ᐹᒻᒪᒃᓗᓂ, ᕿᓄᕕᒋᕚ, ᐃᓗᖏᕐᑐᕐᓗᓂ ᖁᕝᕕᐅᕐᓗᓂᓗ ᕼᐂᒪᓂᐅᑉ ᐊᒐᒊᑎᐅᔫᑉ ᐱᓇᓱᐊᕐᑕᐅᑎᓐᓇᓱᓚᐅᕐᑕᖓ ᓄᖅᑲᕐᑎᑕᐅᖁᓪᓗᓂᐅᒃ, ᐱᐅᖏᑦᑐᐊᓗᖕᒥᒃ ᐱᓇᓱᐊᕐᑕᐅᑎᑦᓯᓇᓱᐊᓚᐅᕐᒪᑦ ᔫᑎᓄᑦ. 4ᐊᖓᔪᖅᑳᕐᔪᐊᓪᓗ ᐊᔭᐅᑉᐱᐊᖅ ᒎᓗ ᐃᓴᐅᑎᓪᓗᒍ ᑎᒃᑯᐊᕐᑎᑉᐹ ᐃᔅᑕᕐᒧᑦ. ᑕᕝᕙ ᐃᔅᑕᕐ ᒪᑭᑉᐳᖅ ᐊᖓᔪᖅᑳᕐᔪᐊᓪᓗ ᓯᕗᕌᓄᑦ ᓂᑯᕕᓪᓗᓂ, 5ᐅᖃᕐᓗᓂᓗ, “ᐊᖓᔪᖅᑳᕐᔪᐊᕐᒧᑦ ᖃᓄᐃᒋᔭᐅᖏᑉᐸᑦ, ᑖᑦᓱᒧᖓᓗ ᖁᕕᐊᒋᔭᐅᒍᒪ ᐊᖓᔪᖅᑳᕐᔪᐊᕐᒧᓪᓗ ᓈᒻᒪᓈᕐᑑᔮᕐᐸᑦ ᖃᓄᐃᒋᔭᐅᖏᒃᑯᒪᓗ ᑖᑦᓱᒧᖓ, ᑎᑎᖅᑲᑎᒍᑦ ᐱᖁᔨᔪᖃᓚᐅᕐᓕ ᕼᐂᒪᓂᐅᑉ ᑎᑎᕋᓚᐅᕐᑕᖏᑦ ᓄᖅᑲᕐᑎᑕᐅᖁᓗᒋᑦ, ᕼᐊᒥᑕᑕᐅᑉ ᐃᕐᓂᖓᑕ ᐊᒐᒊᑎᐅᑉ, ᑖᓐᓇ ᑎᑎᕋᓚᐅᕐᒪᑦ ᔫᑎᓕᒫᑦ ᓄᖑᑕᐅᖁᓪᓗᒋᑦ ᐊᖓᔪᖅᑳᕐᔪᐊᑉ ᓄᓇᖁᑎᖏᓐᓃᑦᑐᑦ ᓄᓇᐅᑉ ᐊᕕᒃᑐᕐᓯᒪᓂᓕᒫᖏᓐᓂ. 6ᖃᓄᖅ ᕿᓄᐃᓵᕈᓐᓇᕋᔭᕐᐳᖓ ᑕᑯᓐᓇᕐᓗᖓ ᐃᓅᖃᑎᒃᑲ ᐱᐅᖏᑦᑐᐊᓗᖕᒥᒃ ᑎᑭᑕᐅᓂᐊᕐᑎᓪᓗᒋᑦ? ᐅᕝᕙᓗ ᖃᓄᖅ ᕿᓄᐃᓵᕈᓐᓇᕋᔭᕐᐳᖓ ᑕᑯᓐᓇᕐᓗᖓ ᐃᓚᒃᑲ ᑐᖁᕋᕐᑕᐅᑎᓪᓗᒋᑦ?”
7ᑕᕝᕙ ᐊᖓᔪᖅᑳᕐᔪᐊᖅ ᐊᕼᐊᓱᐃᕋᔅ ᐅᖃᕐᐳᖅ ᑯᐃᓐ ᐃᔅᑕᕐᒧᑦ ᒧᐊᑎᑬᒧᓪᓗ ᔫᑎᒧ, “ᑕᑯᒋᑦ, ᐃᔅᑕᕐ ᕼᐂᒪᓂᐅᑉ ᐱᖁᑎᓕᒫᖏᓐᓂᒃ ᑐᓂᓯᕕᒋᓚᐅᕐᐸᕋ, ᕼᐂᒪᓂᓗ ᕿᒥᑕᐅᓚᐅᕐᐳᖅ ᕿᒥᑦᓯᕕᖕᒥ ᑐᖁᕋᕐᑕᐅᑎᑦᓯᓇᓱᓚᐅᕐᒪᑦ ᔫᑎᓂᒃ. 8ᐃᕝᕕᓪᓕ ᓇᖕᒥᓂᖅ ᑎᑎᕋᓚᐅᕆᑦ ᐱᖁᔭᓐᖑᕐᓂᐊᕐᑐᒥᒃ ᔫᑎᑦ ᐱᑦᔪᑎᒋᓗᒋᑦ, ᓈᒻᒪᒋᔭᕐᓂᒃ, ᐊᖓᔪᖅᑳᕐᔪᐊᑉ ᐱᔪᓐᓇᕐᓂᖓ ᐊᑐᕐᓗᒍ, ᓇᕿᑦᔪᓯᕐᓗᒋᓪᓗ ᐊᖓᔪᖅᑳᕐᔪᐊᑉ ᓇᒡᒍᐊᕐᒥᖓᓄᑦ; ᖃᓄᑐᐃᓐᓇᖅ ᑎᑎᕋᕐᓯᒪᔪᑦ ᐊᖓᔪᖅᑳᕐᔪᐊᑉ ᐱᔪᓐᓇᕐᓂᖓ ᐊᑐᕐᓗᒍ ᓇᑭᑦᔪᓯᕐᓯᒪᔪᕐᓗ ᐊᖓᔪᖅᑳᕐᔪᐊᑉ ᓇᒡᒍᐊᕐᒥᖓᓄᑦ ᓄᖅᑲᕐᑎᑕᐅᔪᓐᓇᖏᒻᒪᑦ.”
9ᑕᕝᕙ ᐊᖓᔪᖅᑳᕐᔪᐊᑉ ᑎᑎᕋᕐᑎᖏᑦ ᕾᖁᔭᐅᕗᑦ, ᐅᓪᓗᖅ 23ᖑᑎᓪᓗᒍ, ᑕᖅᑮᑦ ᐱᖓᔪᒋᓕᕐᑕᖓᓂ, ᓯᕚᓐᒥᒃ ᐊᑎᓕᖕᒥ; ᑎᑎᕋᕐᑕᐅᓚᐅᕐᐳᓪᓗ, ᒧᐊᑎᑬᑉ ᐱᖁᔨᓂᖓ ᒪᓕᒡᓗᒍ ᔫᑎᓄᑦ, ᑐᕌᕐᑎᑕᐅᓪᓗᑎᒃ ᓄᓇᓕᖕᓂ ᐊᐅᓚᑦᓯᔨᓄᑦ, ᐊᖓᔪᖅᑳᒻᒪᕆᖕᓄᑦ, ᓄᓁᓪᓗ ᐊᕕᒃᑐᕐᓯᒪᓂᖏᓐᓂ ᐊᖓᔪᖅᑳᖏᓐᓄᑦ ᓄᓇᒥᒃ ᐃᓐᑎᐊᒥᑦ ᐃᑎᐅᐱᐊ ᑎᑭᓪᓗᒍ, ᓄᓇᓖᑦ ᐊᕕᒃᑐᕐᓯᒪᔪᑦ ᑲᑎᓪᓗᒋᑦ 127ᓄᑦ, ᓄᓇᓕᖕᓂ ᐊᕕᒃᑐᕐᓯᒪᔪᓂ ᑎᑎᕋᐅᓯᖏᑦ ᐊᑐᓂᑦ ᒪᓕᒡᓗᒋᑦ, ᐃᓄᖏᑕᓗ ᐅᖃᐅᓯᖏᑦ ᐊᑐᓂᑦ ᒪᓕᒡᓗᒋᑦ, ᔫᑏᓪᓗ ᑎᑎᕋᐅᓯᖏᑦ ᐅᖃᐅᓯᖏᓪᓗ ᒪᓕᒡᓗᒋᑦ. 10ᒧᐊᑎᑬᓗ ᑎᑎᕋᕐᑕᐅᑎᑦᓯᕗᖅ ᐊᖓᔪᖅᑳᕐᔪᐊᑉ ᐊᕼᐊᓱᐃᕋᓯᐅᑉ ᐱᔪᓐᓇᕐᓂᖓ ᐊᑐᕐᓗᒍ, ᐊᖓᔪᖅᑳᕐᔪᐊᓪᓗ ᓇᒡᒍᐊᕐᒥᖓᓄᑦ ᓇᕿᑦᔪᓯᕐᓗᒋᑦ, ᑖᒃᑯᐊ ᑎᑎᖅᑲᑦ ᐊᐅᓪᓚᕐᑎᑉᐰᑦ ᕿᒻᒥᕐᔪᐊᕐᒥ ᐃᑭᒪᔪᑎᒍᑦ, ᐊᖓᔪᖅᑳᕐᔪᐊᑉ ᐊᑐᖃᑦᑕᕐᑕᖏᓐᓄᑦ ᕿᒻᒥᕐᔪᐊᑎᒍᑦ ᓱᒃᑲᓂᕐᐹᑎᒍᑦ.
11ᑖᒃᑯᑎᒎᓇᖅ ᑎᑎᖅᑲᑎᒍᑦ ᐊᖓᔪᖅᑳᕐᔪᐊᖅ ᐱᔪᓐᓇᕐᓯᑎᑦᓯᓚᐅᕐᐳᖅ ᔫᑎᑦ ᐃᒡᓗᒐᓴᓕᒫᓂ ᐊᑐᓂᑦ ᑲᑐᑦᔨᓗᑎᒃ ᐃᓅᓯᕐᒥᖕᓂᒃ ᓴᐳᓐᓂᐊᖁᓪᓗᒋᑦ, ᐊᓯᕈᐃᖁᓪᓗᒋᑦ, ᑐᖁᑦᓯᖁᓪᓗᒋᑦ, ᓄᖒᑦᓯᑦᓯᐊᖁᓪᓗᒋᓪᓗ ᐅᓇᑕᐅᑎᖃᕐᑐᓕᒫᓂᒃ ᐃᓄᖕᓂᒃ ᖃᓄᐃᑦᑑᒐᓗᐊᕐᐸᑕ ᐅᕝᕙᓗ ᓄᓇᓕᖕᓂ ᐊᕕᒃᑐᕐᓯᒪᔪᑦ ᓇᓪᓕᐊᓐᓂ ᑐᖁᑦᓯᓇᓱᒃᑐᓕᒫᓂᒃ ᔫᑎᓂᒃ, ᕿᑐᕐᖓᖏᑦ ᐊᕐᓁᓪᓗ ᐱᖃᓯᐅᑎᓗᒋᑦ, ᑐᖁᑕᖏᑕᓗ ᐱᖁᑎᖏᑦ ᐱᑖᕆᓗᒋᑦ, 12ᑖᓐᓇ ᐊᑐᓯᒋᐊᕐᕕᒃᓴᖃᓚᐅᕐᐳᖅ ᐊᖓᔪᖅᑳᕐᔪᐊᑉ ᐊᕼᐊᓱᐃᕋᔅᓯᐅᑉ ᓄᓇᖁᑎᓕᒫᖏᓐᓂ ᐅᓪᓗᒥ ᑐᖁᕅᕕᒃᓴᐅᓚᐅᕐᑐᒥᑦ ᐱᒋᐊᕐᓗᓂ, ᐅᓪᓗᖓ 13ᖑᓕᕐᐸᑦ ᑕᖅᑮᑦ 12ᖓᓐᓂ, ᑕᖅᑭᒥ ᐊᑖᕆᒥᒃ ᑍᔭᐅᔪᒥ. 13ᑖᒃᑯᐊ ᑎᑎᕋᕐᓯᒪᔪᑦ ᓴᖅᑭᑎᑕᐅᔭᕆᐊᖃᓚᐅᕐᐳᑦ ᐊᖓᔪᖅᑳᕐᔪᐊᑉ ᐱᖁᔭᓐᖑᕐᑎᑕᖏᑎᑐᑦ ᓄᓇᓕᓕᒫᓄᑦ ᐊᕕᒃᑐᕐᓯᒪᔪᓄᑦ ᐅᓄᕐᓯᑎᑕᐅᓪᓗᑎᒡᓗ ᐃᓄᓕᒫᓄᑦ, ᔫᑎᑦ ᐅᓪᓗᒥ ᑖᑦᓱᒪᓂ ᐅᐸᓗᖎᕐᓯᒪᓗᑎᒃ ᐊᑐᐃᓐᓇᐅᖁᓪᓗᒋᑦ ᐃᒻᒥᖕᓂᒃ ᓴᐳᓐᓂᐊᕈᓐᓇᕐᓗᑎᒃ ᐊᑭᕋᕐᑐᕐᑎᒥᖕᓄᑦ. 14ᑖᒃᑯᐊ ᑎᑎᖅᑲᓂᒃ ᓇᒃᓴᓚᐅᕐᑐᑦ, ᐊᖓᔪᖅᑳᕐᔪᐊᑉ ᕿᒻᒥᕐᔪᐊᖁᑎᖏᓐᓄᑦ ᓱᒃᑲᓂᕐᐹᓄᑦ ᓯᕗᒧᓚᐅᕐᐳᑦ, ᑐᐊᕕᕐᓗᑎᒡᓗ ᑎᓕᐅᕆᕗᑦ ᐊᖓᔪᖅᑳᕐᔪᐊᑉ ᐱᖁᔨᓂᖓᒍᑦ; ᑕᒪᓐᓇᓗ ᐱᖁᔭᖅ ᑎᑎᕋᕐᓯᒪᔪᖅ ᓴᖅᑭᑎᑕᐅᓚᐅᕆᕗᖅ ᓄᓇᒥ ᐊᖓᔪᖅᑳᕐᔪᐊᒃᑯᕕᖕᒥ ᓲᓴᒥ.
15ᑕᕝᕙ ᒧᐊᑎᑬ ᐊᖓᔪᖅᑳᕐᔪᐊᑉ ᓇᔪᕐᑕᖓᓂᑦ ᐊᓂᕗᖅ ᐊᖓᔪᖅᑳᕐᔪᐊᕐᓯᐅᑎᓂᒃ ᐊᓐᓄᕌᓂᒃ ᐊᑐᕐᓗᓂ ᑐᖑᔪᕐᑕᓂᒃ ᖃᖁᕐᑕᓂᒡᓗ ᑕᕐᓴᓕᖕᒥᒃ, ᓂᐊᖂᓯᕐᓯᒪᓪᓗᓂᓗ ᒎᓗᒥᒃ ᐊᖏᔪᒥᒃ ᐅᓕᒡᔪᐊᕐᓯᒪᕗᕐᓗ ᖃᓪᓗᓈᕐᑕᒥᒃ ᓵᑦᑐᒥᒃ ᐊᐅᐸᓪᓗᕆᒃᑐᒥᒃ, ᐃᒡᓗᒐᓴᒡᔪᐊᕐᒥᐅᓪᓕ ᓲᓴᒥᐅᑦ ᕾᒐᓛᓚᐅᕐᐳᑦ ᖁᕕᐊᓱᖕᓂᕐᒧᑦ. 16ᔫᑎᓪᓕ ᐅᕿᒡᓕᓚᐅᕐᐳᑦ, ᖁᕕᐊᓱᒡᓗᑎᒡᓗ ᐅᐱᒍᓱᒡᓗᑎᒡᓗ. 17ᓄᓇᓕᖕᓂ ᐊᕕᒃᑐᕐᓯᒪᔪᓂ ᐃᒡᓗᒐᓴᖕᓂᓗ, ᓇᓂᑐᐃᓐᓇᖅ ᐊᖓᔪᖅᑳᕐᔪᐊᑉ ᐱᖁᔨᓂᖓᑦ ᐅᖃᓕᒫᕐᑕᐅᑐᐊᕐᒪᑦ, ᔫᑎᑦ ᖁᕕᐊᓱᓚᐅᕐᐳᑦ ᓯᕆᓪᓗᑎᒡᓗ, ᓂᕆᕕᒡᔪᐊᕐᓗᑎᒃ ᕿᑲᓚᐅᕐᐳᑦ ᐱᓇᓱᐊᕐᓂᕐᒥᖕᓂᑦ. ᑍᒤᒻᒪᒃ ᐃᓄᐃᑦ ᐅᓄᕐᑐᑦ ᓄᓇᓕᖕᓃᑦᑐᑦ ᔫᑎᓐᖑᖃᑦᑕᐅᕗᑦ, ᔫᑎᓂᒃ ᑲᑉᐱᐊᓱᓕᕋᒥᒃ.
Currently Selected:
ᐃᔅᑕᐅᑉ ᐊᒡᓚᖏᑦ 8: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
