ᐃᐱᓯᒥᐅᓄᑦ 2
2
ᑐᖁᒥᑦ ᐃᓅᓯᕐᒧᑦ
1 #
ᑯᓘᓯ 2:13. ᐃᓕᑦᓯᑦᑕᐅᖅ ᐅᒃᐱᕐᓂᕐᒥ ᑐᖁᖓᓚᐅᕐᐳᓯ, ᐱᐅᖏᑦᑐᓕᓂᕐᒧᑦ ᐊᔪᕐᑐᓕᓂᕐᒧᓪᓗ. 2ᑍᑦᓱᒪᓂ ᑍᒫᒃ ᐃᓅᓯᖃᕐᑎᓪᓗᓯ ᓯᓚᕐᔪᐊᕐᒥᐅᑦ ᐃᓕᖅᑯᓯᖏᓐᓂᒃ ᒪᓕᓚᐅᕐᐳᓯ, ᓯᓚᕐᔪᐊᓪᓗ ᐊᐅᓚᑦᓯᔨᖓᓂᒃ ᓈᓚᒃᓗᓯ, ᑕᕝᕙ ᐊᓂᕐᓂᕐᒥᒃ ᒫᓐᓇ ᒎᑎᒥᒃ ᓈᓚᓐᖏᑎᑦᓯᔪᒥᒃ ᐃᓄᖕᓂᒃ. 3ᑕᒪᑦᑕ ᐃᓚᒃ ᑍᑯᑎᑐᓇᖅ ᐃᓅᓯᒪᒐᑦᑕ ᐱᔪᒪᔭᑐᐃᓐᓇᕗᑦ ᐃᒃᐱᒋᔭᕗᓪᓗ ᒪᓕᒡᓗᒋᑦ, ᑎᒥᑦᑕᓗ ᐃᓱᒪᑦᑕᓗ ᐱᔪᒪᓕᑐᐃᓐᓇᕐᑕᖓᓂᒃ ᐊᑐᕐᐸᒃᓗᑕ, ᐃᓕᖅᑯᓯᑐᐃᓐᓇᖅ ᒪᓕᒡᓗᒍ ᑕᒤᓐᓂᒃ ᐊᑦᔨᖃᑐᐃᓐᓇᕐᓯᒪᕗᒍᑦ, ᑍᒤᑎᓪᓗᑕᓗ ᒎᑎᐅᑉ ᓂᓐᖓᐅᓯᖓᑕ ᕿᑐᕐᖓᕆᓚᐅᕐᐹᑎᒍᑦ.
4ᒎᑎᐅᓪᓕ ᓂᑲᒍᓱᖕᓂᕐᔪᐊᖓᑕ ᐊᒥᒐᖏᑦᑐᐊᓘᓂᖓᓄᑦ, ᓇᒡᓕᒍᓱᖕᓂᕐᔪᐊᒥᓄᓪᓗ ᓇᒡᓕᒋᓚᐅᕋᒥᑎᒍᑦ, 5ᐅᒃᐱᕐᓂᕐᒥ ᑐᖁᖓᑎᓪᓗᑕ ᐱᐅᖏᑦᑐᓕᓂᕐᒧᑦ, ᐆᒻᒪᕐᑎᓚᐅᕐᐹᑎᒍᑦ ᒪᑭᑎᓪᓗᑕᓗ ᙭ᔅᑑᓯ ᐃᓚᒋᓪᓗᒍ, ᑕᕝᕙ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᐱᐅᓕᔭᐅᓯᒪᕗᓯ. 6ᐃᓚᒋᓪᓗᒍᓗ ᒪᑭᑎᓚᐅᕐᐹᑎᒍᑦ, ᕿᓚᖕᒥ ᐃᒃᓯᕙᖃᑕᐅᖁᓪᓗᑕ ᔩᓱᓯ ᙭ᔅᑑᓯᒧᑦ. 7ᑍᒤᓕᐅᓚᐅᕐᐳᕐᓕ ᓇᓪᓕᐅᑦᑐᒃᓴᒥ ᐱᔪᒫᕐᑐᒥ ᓴᖅᑭᑎᑦᓱᒪᓪᓗᒍ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᕐᔪᐊᖓ ᓇᓕᖃᖏᑦᑑᑉ ᐊᒥᒐᖏᓐᓂᖓ ᓇᒡᓕᒍᓱᖕᓂᖓᑕᓗ ᓴᖅᑭᑎᑕᐅᓯᒪᓂᖓ ᙭ᔅᑑᓯ ᔩᓱᓯᒥ. 8ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᐱᐅᓕᔭᐅᓯᒪᒐᑦᓯ ᐅᒃᐱᕐᓂᒃᑯᑦ; ᑕᒪᓐᓇᓗ ᐃᓕᑦᓯᓐᓂᒃ ᐱᓯᒪᓐᖏᓚᓯ, ᒎᑎᐅᓪᓕ ᑐᓂᕐᕈᑎᒋᕚ ᐊᑭᖃᖏᑦᑐᖅ. 9ᐱᓂᐊᕐᓂᒃᑯᑦ ᐃᒻᒥᓂᒃ ᐱᓯᒪᔪᖃᖏᒻᒪᑦ, ᑍᒤᒻᒪᑦ ᓇᓪᓕᐊᓪᓘᓐᓃᑦ ᐱᐅᔪᕆᑦᔪᑎᖃᕈᓐᓇᓐᖏᓚᖅ ᑕᒪᑐᒥᖓ. 10ᒎᑎᐅᑉ ᓴᓇᓯᒪᕚᑎᒍᑦ, ᙭ᔅᑑᓯ ᔩᓱᓯᒃᑯᑦ ᐱᓐᖑᕐᑎᓚᐅᕐᐹᑎᒍᑦ ᐱᓇᓱᐊᑦᓯᐊᖁᓪᓗᑕ, ᒎᑎᐅᑉ ᑕᒪᓐᓇ ᓯᕗᓂᖓᒍᑦ ᐅᐸᓗᖕᒊᔭᕇᕐᓯᒪᓚᐅᕐᐹ, ᑍᒤᓕᐅᖁᓪᓗᑕ.
᙭ᔅᑑᓯᒥ ᐊᑕᐅᓯᐅᓂᖅ
11ᑍᒤᒻᒪᑦ ᖃᓄᐃᑦᑑᓚᐅᕐᓂᑦᓯᓐᓂᒃ ᐃᖅᑬᓚᐅᕆᑦᓯ, ᔫᑎᐅᖏᑦᑐᓯ ᑍᔭᐅᓪᓗᓯ ᑭᐱᓯᒪᖏᑦᑐᓂᒃ ᔫᑎᓄᑦ, ᐃᒻᒥᖕᓂᒃ ᑍᔪᓄᑦ ᑭᐱᓯᒪᔪᓂᒃ ᓇᖕᒥᓂᖅ ᑎᒥᒥᒃᑎᒍᑦ ᑭᐱᓯᒪᔪᑦ ᐊᒡᒐᖕᓄᑦ. 12ᐃᕾᒋᑦᓯ ᑍᑦᓱᒪᓂ ᙭ᔅᑑᓯᖃᕋᓯ ᐊᕝᕗᑎᓯᒪᓚᐅᕐᑐᓯ, ᐃᓴᕆᐊᓕᒥᐅᓪᓗ ᓂᕈᐊᕐᑕᐅᓯᒪᓂᖏᓐᓄᑦ ᐃᓚᒋᔭᐅᓚᐅᖏᑦᑐᓯ, ᐊᖏᕈᑕᐅᓯᒪᔪᒥᒡᓗ ᐱᓯᒪᖃᑕᐅᓚᐅᖏᑦᑐᓯ, ᑍᒤᑦᑑᓪᓗᓯ ᐃᓅᓚᐅᕐᑐᕐᓯ ᐅᕙᓂ ᓯᓚᕐᔪᐊᕐᒥ ᓂᕆᐅᒋᔭᒃᓴᖃᕋᓯ ᒎᑎᖃᕋᓯᓗ. 13ᒫᓐᓇᓕ ᐃᓕᑦᓯ ᙭ᔅᑑᓯ ᔩᓱᓯᒦᑦᑐᓯ ᓯᕗᕐᖓᒍᑦ ᐅᖓᓯᒃᑐᒦᓚᐅᕐᑐᓯ ᖃᓂᒡᓕᑎᑕᐅᓯᒪᕗᓯ ᙭ᔅᑑᓯᐅᑉ ᐊᐅᖓᓄᑦ. 14᙭ᔅᑑᓯᐅᑉ ᐃᓅᖃᑎᒌᑦᓯᐊᓕᕐᑎᓚᐅᕐᒪᑎᒍᑦ, ᔫᑎᓪᓗ ᔫᑎᐅᖏᑦᑐᓪᓗ ᐊᑕᐅᓯᓐᖑᕐᑎᓪᓗᒋᑦ, ᐊᕙᓗᕐᔪᐊᕐᓗ ᐊᒡᕕᐊᕈᑕᐅᔪᖅ ᓯᖅᑯᒥᓚᐅᕐᐹ ᐊᕕᑎᑦᓯᓯᒪᔪᖅ ᐊᑭᕋᕇᒃᑎᑦᓯᔪᕐᓗ. 15#ᑯᓘᓯ 2:14.ᔫᑎᓪᓗ ᐱᖁᔭᖏᑦ ᐊᕕᓯᒪᑎᑦᓯᔪᑦ ᐊᑐᕈᓐᓃᕐᑎᓚᐅᕐᐰᑦ, ᑖᒃᑯᐊ ᒪᕐᕈᐃᓕᖓᔪᑦ ᐊᑕᐅᓯᓐᖑᕐᑎᑕᐅᖁᓪᓗᒋᑦ ᐃᒻᒥᒍᑦ ᓄᑖᓐᖑᕐᑎᑕᐅᓗᑎᒃ, ᐃᓅᖃᑎᒌᑦᓯᐊᓕᕐᑎᓪᓗᒋᓪᓗ. 16#ᑯᓘᓯ 1:20.ᑐᖁᓂᕐᒥᒍᓪᓗ ᓴᓐᓂᖓᔪᓕᖕᒥ ᐊᑭᕋᕇᖕᓂᖅ ᓄᖑᑎᓚᐅᕐᐹ; ᓴᓐᓂᖓᔪᓕᒃᑯᓪᓗ ᐊᑕᐅᓯᓐᖑᕐᑎᓚᐅᕐᐹᑎᒍᑦ ᑎᒥᒥ ᐃᓅᖃᑎᒌᓕᕐᑎᓪᓗᑕᓗ ᒎᑎᒧᑦ ᐅᑎᕐᑎᓪᓗᑕ. 17#ᐂᓮᐊᓯ 57:19.ᑎᑭᓚᐅᕆᕗᖅ ᐅᖃᐅᓯᖃᕐᓗᓂ ᑕᒤᓐᓄᑦ ᐃᓅᖃᑎᒌᑦᓯᐊᓕᕐᓇᕐᑐᒥᒃ ᐃᓕᑦᓯᓐᓄᑦ ᐅᖓᓯᒃᑐᒦᓚᐅᕐᑐᓄᑦ ᖃᓂᑦᑐᒦᓚᐅᕐᑐᓄᓪᓗ; 18ᑖᑦᓱᒨᓇ ᑕᒪᑦᑕ ᐊᑐᓂᑦ ᐊᖅᑯᑎᒃᓴᖃᓕᕐᐳᒍᑦ ᐊᑖᑕᒧᑦ ᐊᓂᕐᓂᒃᑯᑦ ᐊᑕᐅᓯᒃᑯᑦ.
19ᑍᒤᒻᒪᑦ ᓄᓇᖃᑎᒋᔭᐅᖏᑦᑐᑎᑐᑦ ᑕᑯᓕᒪᓇᖏᑦᑐᑎᑐᓪᓗ ᑍᒤᑦᑑᓐᓃᕐᐳᓯ, ᐃᑦᔪᕐᓁᑎᑕᐅᓯᒪᔪᓄᓪᓕ ᐃᓚᒋᔭᐅᓕᕐᐳᓯ ᒎᑎᐅᑉ ᐃᒡᓗᒥᐅᖃᑎᖏᓐᓄᑦ. 20ᐃᒡᓗᓕᐊᖑᖃᑕᐅᓕᕐᓗᓯᓗ ᐋᐴᓯᑕᓖᑦ ᓇᓚᐅᑦᑍᔪᓪᓗ ᑐᓐᖓᕕᓕᐊᕆᓚᐅᕐᑕᖓᓐᓄᑦ, ᑐᓐᖓᕕᖕᒧᓪᓕ ᑎᕆᖅᑯᕆᔭᐅᕗᖅ ᑕᕝᕙ ᙭ᔅᑑᓯ ᔩᓱᓯ. 21ᑖᓐᓇ ᐃᒡᓗᓕᐊᖑᔪᒧᑦ ᑕᒤᓐᓂᒃ ᐊᑦᓱᖏᐅᒪᑎᑦᓯᕗᖅ ᐱᕈᕐᑎᑦᓯᓪᓗᓂᓗ ᑕᑯᒃᓴᐅᖏᑦᑐᒥᒃ ᐃᑦᔪᕐᓁᑦᑐᒥᒃ ᑐᒃᓯᐊᕐᕕᒡᔪᐊᕐᒥᒃ ᐊᑕᓂᕐᒥ. 22ᑖᑦᓱᒨᓇ ᐃᓕᑦᓯᑦᑕᐅᖅ ᐃᒡᓗᓕᐊᖑᖃᑕᐅᓕᕐᐳᓯ ᒎᑎᒧᑦ ᐃᓂᒋᔭᒃᓴᐅᖁᓪᓗᓯ.
Currently Selected:
ᐃᐱᓯᒥᐅᓄᑦ 2: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
