ᐃᓕᓯᒪᓃᑦ ᐃᒃᓖᓯᐊᓯᑏᔅ 9
9
1ᑕᒪᒃᑯᐊ ᐆᒻᒪᑎᓐᓂ ᐃᓱᒪᒋᓚᐅᕐᐸᒃᑲ, ᖃᐅᔨᓚᐅᕐᐳᖓᓗ ᐃᓱᐊᕐᑐᑦ ᓯᓚᑐᔪᓪᓗ ᑲᓄᐃᓕᐅᕐᑕᖏᑦ ᒎᑎᐅᑉ ᐊᒡᒐᖏᓐᓃᒻᒪᑕ. ᐃᓄᖕᒥᒡᓕ ᑭᓇᒥᒡᓘᓐᓃᑦ ᖃᐅᔨᒪᔪᖃᓐᖏᓚᖅ ᓇᒡᓕᖕᓂᕐᒥᒃ ᐆᒥᓱᖕᓂᕐᒥᒡᓘᓐᓃᑦ ᐱᓂᐊᕐᕕᐅᓂᐊᕐᒪᖔᕐᒥᒃ. 2ᑕᒪᕐᒥᒡᓕ ᐊᑦᔨᒌᒃᑐᒥᒃ ᓯᕗᓂᒃᓴᖃᕐᐳᑦ ᐃᓱᐊᕐᑐᑦ ᐱᐅᖏᑦᑐᓕᔪᓪᓗ, ᐱᐅᔪᓪᓗ ᐱᐅᖏᑦᑐᓪᓗ, ᓴᓗᒪᔪᑦ ᓴᓗᒤᑦᑐᓪᓗ, ᑐᓂᕐᕈᑎᒃᓴᓂᒡᓗ ᑐᓂᓯᔪᑦ ᑐᓂᕐᕈᓯᖏᑦᑐᓪᓗ. ᑍᒤᒻᒪᑦ ᐃᓄᖕᒧᑦ ᐱᐅᔪᒧᑦ, ᑍᒤᒃᑭᕗᖅ ᓱᓕ ᐊᔪᕐᑐᓕᔪᒧᑦ; ᑍᒤᒃᑭᕗᖅ ᐊᖏᕈᑎᖃᕐᑐᓄᑦ ᐊᖏᕈᑎᖃᕆᐊᒃᓴᕐᓗ ᑲᑉᐱᐊᓱᒃᑐᓄᑦ. 3ᑕᒪᓐᓇ ᑕᒪᑦᔭ ᐱᐅᖏᑦᑐᖅ ᑕᒪᑭᕐᓗᓂ ᐊᑐᕐᑕᐅᔪᖅ ᓯᕿᓂᐅᑉ ᐊᑖᓂ; ᐊᑦᔨᒌᒃᑐᒥᒃ ᑕᒪᕐᒥᒃ ᐱᓂᐊᕐᕕᐅᖕᒪᑕ. ᓱᓕᔪᒥᒃ ᐃᓄᐃᑦ ᐆᒻᒪᑎᖏᑦ ᑕᒪᕐᒥᒃ ᐱᐅᖏᑦᑐᒥᒃ ᑕᑕᒻᒪᑕ; ᐃᓱᒤᕈᑎᓂᐅᔮᕐᑐᒥᒃ ᐆᒻᒪᑎᖏᑦ ᑕᑕᑉᐳᑦ ᐃᓅᓂᕐᒥᖕᓂ, ᑕᒪᑐᒪᓗ ᑭᖑᓂᖓᒍᑦ ᑐᖁᕙᒃᐳᑦ. 4ᐃᓅᖃᑕᐅᔪᓪᓕ ᓯᕗᓂᒃᓴᒥᒃ ᓂᕆᐅᖕᓂᖃᕐᐳᖅ, ᕿᒻᒥᖅ ᐆᒪᔪᖅ ᐱᐅᓂᕐᓴᐅᖕᒪᑦ ᓛᔭᒥᑦ ᑐᖁᖓᔪᒥᑦ. 5ᐃᓅᔪᑦ ᖃᐅᔨᒪᖕᒪᑕ ᑐᖁᔪᒫᕐᓂᕐᒥᖕᓂᒃ. ᑐᖁᖓᔪᓪᓕ ᓱᓇᒥᒃ ᖃᐅᔨᒪᓐᖏᓚᑦ. ᐊᑭᓕᕐᑕᐅᑦᔪᑎᒃᓴᒥᖕᓂᒡᓗ ᐱᓂᐊᕈᓐᓃᕐᓗᑎᒃ ᐃᖅᑲᐅᒪᔭᐅᑦᔪᑎᒃᓴᖏᓪᓗ ᐳᐃᒍᕐᑕᐅᕗᑦ. 6ᓇᒡᓕᒍᓱᖕᓂᖏᓪᓗ, ᐆᒥᓱᖕᓂᖏᓪᓗ, ᐊᓐᓂᕈᑦᔨᓂᖏᓪᓗ, ᓄᖑᓯᒪᕗᑦ; ᐃᓚᐅᖃᑕᐅᓂᐊᕈᓐᓃᕐᐳᑦ ᓯᕿᓂᐅᑉ ᐊᑖᓂ ᖃᓄᐃᓕᐅᕐᑕᐅᔪᓂ.
7ᐂᓕᕆᑦ ᓂᐊᖂᔭᖅ ᓂᕆᔭᕐᑐᓕᕈᒃ ᖁᕕᐊᓱᒡᓗᑎᑦ; ᕔᓃᓪᓗ ᐃᒥᕆᐊᕐᑐᓕᕈᒃ ᐆᒻᒪᑎᖕᓂ ᖁᕕᐊᓱᒃᓗᑎᑦ; ᒎᑎᐅᑉ ᐱᓂᐊᕐᓂᑎᑦ ᐃᓚᓕᐅᕇᕐᒪᒋᑦ. 8ᐊᓐᓄᕌᑎᑦ ᑍᒪᓐᖓᓕᒫᖅ ᖃᑯᕐᑕᐅᓕᑦ, ᓂᐊᖁᐃᓪᓗ ᐅᕐᓱᕐᑎᕐᓯᒪᔪᓐᓃᕐᑍᓕᓕ. 9ᓄᓕᐊᑦ ᓇᒡᓕᒋᔧᑦ ᓇᔪᕈᒃ ᖁᕕᐊᓱᒡᓗᑎᑦ ᓯᓔᑦᑐᒥ ᐃᓅᓯᕐᓂ ᐃᓅᑎᓪᓗᑎᑦ ᑐᓂᕐᕈᓯᐊᕐᓂ ᓯᕿᓂᐅᑉ ᐊᑖᓂ, ᑕᒪᓐᓇ ᑐᓂᕐᕈᓯᐊᕆᒐᕕᐅᒃ ᐃᓅᓯᕐᒥ ᐊᒃᓱᕈᕆᐊᓕᖕᒥ ᐃᓅᑎᓪᓗᑎᑦ ᓯᕿᓂᐅᑉ ᐊᑖᓂ ᐃᓅᑎᓪᓗᑎᑦ. 10ᐊᒡᒐᖕᓄᑦ ᓱᓕᐊᒃᓴᒥᒃ ᐱᓯᒪᒍᕕᑦ ᐱᓇᓱᐊᕈᒃ ᐊᒃᓱᕈᕐᓗᑎᑦ, ᓯᕗᓂᕆᔭᕐᓂ ᐃᓗᕕᕐᒥ ᓱᓕᐊᒃᓴᖃᖏᒻᒪᑦ, ᓱᓕᐊᒃᓴᒧᓪᓗ ᐸᕐᓇᖕᓂᖃᕋᓂ, ᖃᐅᔨᒪᓂᕐᑕᖃᕋᓂᓗ, ᓯᓚᑐᓂᕐᑕᖃᕋᓂᓗ.
11ᓯᕿᓂᐅᑉ ᐊᑖᓂ ᑕᑯᓚᐅᕆᕗᖓ ᐃᒫᒃ: ᓱᒃᑲᓕᓂᕐᒧᑦ ᓵᓚᖃᕋᓱᐊᕐᓂᖅ ᓱᒃᑲᓕᓂᕐᐹᒧᑦ ᑐᕌᖓᖏᒻᒪᑦ, ᐅᓇᑕᕐᓂᕐᓗ ᓴᓐᖏᔪᒧᑦ ᑐᕌᖓᓇᓂ, ᓂᕿᒃᓴᕐᓗ ᓯᓚᑐᔪᒧᑦ ᑐᕌᖓᖕᒥᓇᓂ, ᐊᔪᕐᓴᖏᓐᓂᕐᓗ ᐃᓱᒪᑐᔪᒧᑦ ᑐᕌᖓᖕᒥᓇᓂ, ᖁᕕᐊᒋᔭᐅᓂᕐᓗ ᓴᓇᑐᔪᒧᑦ ᑐᕌᖓᖕᒥᓇᓂ; ᐱᕕᒃᓴᒧᓪᓕ ᓇᓪᓕᐅᑎᔪᓄᓪᓗ ᑕᒪᕐᒥᒃ ᑎᑭᑕᐅᕙᒃᐳᑦ. 12ᑭᓇᓘᓐᓃᑦ ᑲᓄᐃᑲᓪᓚᖕᓂᐊᕐᑐᓄᑦ ᐅᐸᓗᖎᕐᓯᒪᔪᓐᓇᖏᒻᒪᑦ: ᓲᕐᓗ ᐃᖃᓗᐃᑦ ᓄᓗᐊᓄᑦ ᑐᖁᑕᐅᓐᓇᕐᑐᒧᑦ ᑎᑭᒻᒪᑕ, ᐅᕝᕙᓗ ᑎᖕᒥᐊᑦ ᓂᒐᕐᓄᑦ ᑎᑭᒻᒪᑕ, ᑍᒫᒃᑕᐅᖅ ᐃᓄᐃᑦ ᐱᐅᖏᑦᑐᓄᑦ ᖃᓄᐃᓕᓇᕐᑐᓄᑦ ᓂᒐᕐᑎᑕᐅᔪᑐᑦ ᑎᑭᑉᐸᒃᐳᑦ, ᑕᕝᕔᓐᓇᖅ ᐅᐸᓗᐃᔭᐅᓪᓗᑎᒃ.
ᓯᓚᑐᓂᐅᑉ ᓯᓔᓐᓂᐅᓪᓗ ᐃᓱᒪᒋᔭᐅᓂᖏᒃ
13ᖃᐅᔨᓚᐅᕆᕗᖓ ᓯᕿᓂᐅᑉ ᐊᑖᓂ ᓯᓚᑐᓂᕐᒥᒃ ᑕᑕᒥᓐᓂᐊᕆᔭᓐᓂᒃ. 14ᓄᓇᓕᒃᔪᐊᕐᑕᖃᓚᐅᕐᐳᖅ ᒥᑭᔪᓂᒃ ᐃᓄᑭᑦᑑᓪᓗᑎᒃ. ᐊᖓᔪᖅᑳᔪᐊᒥᓪᓕ ᑎᑭᑕᐅᓚᐅᕐᐳᑦ, ᓵᓚᖃᕈᒪᓂᕐᒧᓪᓗ ᐊᕙᓗᔭᐅᓪᓗᑎᒃ, ᓴᐴᓗᑕᕐᓂᒡᓗ ᐅᓇᑕᕐᕕᖕᓂᒃ ᓴᓇᕗᑦ ᐊᕙᑖᓂ. 15ᑕᕝᕙᓂᓕ ᐃᓄᒃᑕᖃᓚᐅᕐᐳᖅ ᐊᔪᕐᓴᕐᑐᒥ ᓯᓚᑐᔫᓪᓗᓂᓗ, ᓯᓚᑐᓂᕐᒥᓄᓪᓗ ᓄᓇᓕᒃᔪᐊᑦ ᓴᐳᑎᓚᕐᐰᑦ. ᑭᓯᐊᓂᓕ ᑍᓐᓇ ᐊᔪᕐᓴᕐᑐᖅ ᐃᖅᑲᐅᒪᔭᐅᓚᐅᓐᖏᓚᖅ. 16ᐅᖃᕐᐳᖓᓕ, ᓯᓚᑐᓂᖅ ᐱᐅᓂᕐᓴᐅᕗᖅ ᐊᔪᖏᓐᓂᕐᒥᑦ; ᑭᓯᐊᓂ ᐊᔪᕐᓴᕐᑑᑉ ᓯᓚᑐᓂᖓ ᓇᕐᕈᒋᔭᐅᓚᐅᕐᐳᖅ, ᐅᖃᐅᓯᖏᓪᓗ ᓈᓚᒃᑕᐅᓇᑎᒃ. 17ᓯᓚᑐᔫᓪᓕ ᐅᖃᐅᓰᖏᑦ ᓂᐱᖃᓗᐊᖏᑦᑐᑦ ᓈᓚᒃᑕᐅᓂᕐᓴᐅᕗᑦ, ᐊᖓᔪᖅᑳᑉ ᕾᒐᓛᕐᓂᖓᓂᑦ ᓯᓔᑦᑐᑦ ᐊᑯᓐᓂᖓᓂ. 18ᓯᓚᑐᓂᖅ ᐱᐅᓂᕐᓴᐅᕗᖅ ᐅᓇᑕᐅᑎᓂᑦ, ᐱᐅᖏᑦᑐᓕᔪᕐᓕ ᐊᑕᐅᓯᖅ ᐊᓯᕈᐃᕗᖅ ᐱᐅᔪᓂᒃ ᐅᓄᕐᑐᓂᒃ.
Currently Selected:
ᐃᓕᓯᒪᓃᑦ ᐃᒃᓖᓯᐊᓯᑏᔅ 9: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
