ᐃᓕᓯᒪᓃᑦ ᐃᒃᓖᓯᐊᓯᑏᔅ 8
8
1ᑭᓇ ᓯᓚᑐᔪᑎᑐᑦ ᑍᒤᑉᐸ? ᖃᐅᔨᒪᔪᖅ ᓱᓇᑐᐃᓐᓁᑦ ᑐᑭᖏᓐᓂᒃ? ᐊᖑᑎᐅᑉ ᓯᓚᑐᔫᑉ ᓯᓚᑐᓂᖓᑕ ᑮᓇᖓ ᖃᐅᒪᑎᑉᐹ. ᑮᓇᖓᑕᓗ ᐃᓕᕋᓇᕐᓂᖓ ᑕᐅᑦᑐᑦᓯᐊᕆᒃᑎᑉᐹ.
ᐊᖓᔪᖅᑳᕐᔪᐊᖅ ᓈᓚᒃᓯᐅᒃ
2ᐅᖃᕐᐳᖓ, ᐊᖓᔪᖅᑳᕐᔪᐊᑉ ᐱᖁᔭᖏᑦ ᒪᓕᑦᓯᐊᒃᑭᑦ ᒎᑎᒧᑦ ᐊᖏᕐᓯᒪᓂᕆᔧᑦ ᐱᑦᔪᑎᒋᓪᓗᒍ. 3ᑐᐊᕕᕐᓂᐊᕐᓇᒃ ᓇᔪᒐᖓᓂᑦ ᐊᓂᔪᒪᓗᑎᑦ. ᐱᐅᖏᑦᑐᒥᒡᓗ ᐱᓇᓱᐊᕐᓂᖃᕐᑐᒥᒃ ᓴᐳᑦᔨᓇᓱᐊᕐᓂᐊᕐᓇᒃ, ᐃᓱᒪᒋᔭᒥᓂᒃ ᑖᓐᓇ ᐱᓇᓱᐊᓲᖑᖕᒪᑦ. 4ᐊᖓᔪᖅᑳᕐᔪᐊᑉ ᐅᖃᐅᓯᖏᑦ ᐱᔪᓐᓇᕐᓂᖃᕐᒪᑕ; ᑭᐊ ᐅᖃᐅᑎᔪᓐᓇᕐᐸᐅᒃ, “ᖃᓄᐃᓕᐅᕐᐲᑦ?” 5ᑖᑦᓱᒪ ᐱᖁᔭᖏᓐᓂᒃ ᒪᓕᑦᓯᐊᕐᑐᖅ, ᑲᑉᐱᐊᓇᕐᑐᒥᒃ ᖃᐅᔨᓂᐊᓐᖏᓚᖅ; ᓯᓚᑐᔫᓪᓗ ᐆᒻᒪᑎᖓ ᖃᐅᔨᒪᓂᐊᕐᐳᖅ ᐱᕕᒃᓴᒥᒃ ᖃᓄᕐᓗ ᐱᐅᓯᖃᕆᐊᖃᕐᓂᕐᒥᒃ. 6ᓱᓇᑐᐃᓐᓁᑦ ᓈᒻᒪᑦᓯᐊᕐᑐᒥᒃ ᐱᕕᒃᓴᖃᕐᐳᑦ ᓇᖕᒥᓂᕐᓗ ᐱᐅᓯᖃᕐᓗᑎᒃ; ᐃᓅᑉ ᖁᕕᐊᓱᖏᓐᓂᖓ ᐊᖏᔫᒐᓗᐊᕐᑎᓪᓗᒍ. 7ᐃᓄᐃᑦ ᓇᓪᓕᐊᓐᓂᒃ ᓯᕗᓂᒃᓴᒥᒃ ᖃᐅᔨᒪᔪᖃᖏᒻᒪᑦ, ᑭᐊ ᐅᖃᐅᑎᔪᓐᓇᕐᐸᐅᒃ ᓯᕗᓂᕐᒥ ᖃᓄᐃᓐᓂᐊᕐᑐᒥᒃ? 8ᐃᓄᖕᒥᒡᓗ ᓇᓕᐊᓐᓂᒃ ᐊᓄᕆᒥᒃ ᐊᐅᓚᑦᓯᔪᖃᕈᓐᓇᖏᒻᒪᑦ, ᑍᒤᒻᒪᑦ ᐅᓪᓗᒥᒡᓗ ᑐᖁᕕᒃᓴᒥᒃ ᐊᐅᓚᑦᓯᔪᖃᕈᓐᓇᖏᓐᓂᕗᖅ. ᐅᓇᑕᕐᑐᒃᓴᖅ ᓄᖅᑲᕐᑎᑕᐅᖏᒻᒪᑦ ᐅᓇᑕᕐᑎᓪᓗᒋᑦ, ᐱᐅᖏᑦᑐᓕᓂᕐᓗ ᓄᖅᑲᕐᑎᑦᓯᓂᐊᖏᓐᓂᕗᖅ ᐱᓇᓱᐊᕐᑎᒋᔭᒥᓂᒃ.
ᐱᐅᖏᑦᑐᓕᔪᑦ ᐃᓱᐊᕐᑐᓪᓗ
9ᑕᒪᒃᑯᐊ ᑕᒪᕐᒥᒃ ᑕᑯᓚᐅᕐᐸᒃᑲ, ᐃᓱᒪᓐᓄᓪᓗ ᓱᓇᑐᐃᓐᓁᑦ ᐊᑐᓚᐅᕐᐸᒃᑲ ᓯᕿᓂᐅᑉ ᐊᑖᓃᑦᑐᑦ, ᐱᕕᖃᕐᒥᖕᒪᑦ ᐃᓄᒃ ᐊᓯᒥᓂᒃ ᐊᐅᓚᑦᓯᓗᓂ ᐋᓐᓂᐊᕐᓂᕐᒥᓄᑦ. 10ᑕᑯᓚᐅᕆᕗᖓ ᐱᐅᖏᑦᑐᓕᔪᓂᒃ ᐃᓗᕕᕐᑕᐅᕙᒃᑐᓂᒃ, ᐂᕙᓚᐅᕐᑐᑦ ᐅᑎᕐᐸᒃᓗᑎᒡᓗ ᐃᑦᔪᕐᓁᑦᑐᕕᖕᒧᑦ, ᓂᕐᑐᕐᑕᐅᓪᓗᑎᒡᓗ ᓄᓇᓕᒡᔪᐊᓂ ᑍᒤᓕᐅᕐᕕᒋᓚᐅᕐᑕᒥᖕᓂ. ᑕᒪᓐᓇ ᓱᓕᓐᖏᓚᖅ.
11ᐱᐅᖏᑦᑐᓕᔪᑦ ᐃᖅᑲᕐᑐᕐᑕᐅᓂᖏᑦ ᐱᓇᓵᕐᑎᑕᐅᒃᐸᑕ, ᑕᕝᕙ ᐃᓄᐃᑦ ᐆᒻᒪᑎᖏᑦ ᐱᐅᖏᑦᑐᓕᔪᒪᓂᕐᒧᑦ ᑲᔪᖏᕐᑎᑕᐅᓕᕐᐳᑦ. 12ᐊᔪᕐᑐᓕᔪᖅ ᐅᓄᕐᑐᕐᔪᐊᓂᒃ ᐱᐅᖏᑦᑐᓕᒐᓗᐊᕐᐸᑦ ᓱᓕ ᐊᑯᓂ ᐃᓅᕗᖅ, ᖃᐅᔨᒪᕗᖓᓕ ᐃᓄᐃᑦ ᒎᑎᒥᒃ ᓯᕘᕋᔪᑦ ᐱᐅᓂᕐᓴᒥᒃ ᐱᔭᐅᔪᒫᕐᒪᑕ, ᒎᑎᐅᑉ ᓵᖓᓂ ᐅᐱᒍᓱᒃᑐᑦ ᑖᑦᓱᒥᖓ. 13ᐊᔪᕐᑐᓕᔪᓪᓕ ᐱᐅᔪᒥᒃ ᑐᕌᒐᖃᓐᖏᓚᑦ, ᒎᑎᒥᒃ ᓯᕘᕋᖏᒻᒪᑕ, ᐅᓪᓗᖏᑦ ᑕᑭᔫᔪᒫᓐᖏᓚᑦ ᑕᕐᕋᑐᑦ ᑕᑭᔫᔪᑐᑦ. 14ᓱᓕ ᑐᑭᖃᖏᑦᑐᒥᒃ ᐱᑕᑲᕆᕗᖅ ᓄᓇᒥ, ᐃᓄᐃᑦ ᐃᓱᐊᕐᑐᖅ ᐱᓂᐊᕐᕕᐅᕙᖕᒥᖕᒪᑕ ᐊᔪᕐᑐᓕᔪᑦ ᐱᓂᐊᕐᕕᐅᓂᒃᓴᖏᓐᓂᒃ, ᐊᔪᕐᑐᓕᔪᓪᓗ ᐃᓱᐊᕐᑐᑦ ᐱᓂᐊᕐᕕᐅᓂᒃᓴᖏᓐᓂᒃ ᐱᓂᐊᕐᕕᐅᕙᒃᑐᑦ. ᐅᖃᕐᐳᖓ, ᑕᒪᓐᓇ ᑐᑭᖃᓐᖏᓚᖅ.
15ᑍᒤᒻᒪᑦ ᐃᓅᓯᕐᒥᒃ ᖁᕕᐊᓲᑎᖃᖁᔨᕗᖓ, ᐃᓄᒃ ᐱᐅᓂᕐᓴᒥᒃ ᐱᔭᒃᓴᖃᖏᒻᒪᑦ ᓂᕆᓗᓂ ᐃᒥᕐᓗᓂᓗ ᖁᕕᐊᓱᒡᓗᓂᓗ. ᖁᕕᐊᓱᖕᓂᐅᑉ ᑕᕝᕙ ᐃᓚᒋᓂᐊᕐᐹ ᐱᓇᓱᐊᕐᑕᒥᓂ ᑕᒤᓐᓂ, ᐅᓪᓗᑲᕐᓂᕐᒥᓂ ᑕᒤᓐᓂ ᒎᑎᐅᑉ ᑐᓂᔭᖓᓂᒃ ᑖᑦᓱᒧᖓ ᓯᕿᓂᐅᑉ ᐊᑖᓂ.
16ᐃᓱᒪᒐ ᐊᑐᕋᒃᑯ ᓯᓚᑐᓂᕐᒥᒃ ᑐᑭᓯᔪᒪᓪᓗᖓ ᖃᐅᔨᔪᒪᓪᓗᖓᓗ ᐱᓂᐊᕐᓂᐅᕙᒃᑐᓂᒃ ᓄᓇᒥ, ᐊᒡᓛᑦ ᐃᔩᒃ ᓯᓂᖕᓂᕐᒥᒃ ᖃᐅᔨᕙᒍᓐᓃᕐᑎᓪᓗᒋᒃ ᐅᓪᓗᑯᑦ ᐅᓐᓄᐊᒥᓗ. 17ᑕᑯᓚᐅᕆᕗᖓ ᒎᑎᐅᑉ ᐱᓂᐊᕐᓂᕆᓯᒪᔭᖏᓐᓂᒃ ᑕᒤᓐᓂᒃ. ᓇᓪᓕᐊᑦ ᑐᑭᓯᔪᓐᓇᓐᖏᓚᖅ ᖃᓄᐃᓕᐅᕐᑐᖃᕐᒪᖔᑦ ᓯᕿᓂᐅᑉ ᐊᑖᓂ. ᐊᒃᓱᕈᕐᓗᓂ ᑐᑭᓯᓇᓱᐊᕋᓗᐊᕈᓂ, ᐃᓄᒃ ᖃᐅᔨᔪᓐᓇᖏᒻᒪᑦ ᑐᑭᖓᓂᒃ. ᓯᓚᑐᔪᖅ ᐊᒡᓛᑦ ᖃᐅᔨᒪᓂᕋᕋᓗᐊᕐᐸᑦ, ᑕᒤᓐᓂᒃ ᑐᑭᓯᔭᕇᕈᓐᓇᓐᖏᓚᖅ.
Currently Selected:
ᐃᓕᓯᒪᓃᑦ ᐃᒃᓖᓯᐊᓯᑏᔅ 8: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
