ᐃᓕᓯᒪᓃᑦ ᐃᒃᓖᓯᐊᓯᑏᔅ 7
7
ᐃᓅᓯᕐᒥᒃ ᐃᓱᒪᒃᓴᕐᓯᐅᕈᑎᖃᕐᓂᖅ
1 #
ᓲᓗᒨᓂ 22:1. ᐊᑏᑦ ᐅᐱᒋᔭᐅᑦᓯᐊᕐᐸᑦ ᐱᐅᓂᕐᓴᐅᕗᖅ ᒥᖑᐊᕈᑎᒥᑦ ᐅᕐᓱᒥᑦ ᐊᑭᑐᔪᒥᑦ, ᑐᖁᓂᐅᓪᓗ ᐅᓪᓗᖓ ᐱᐅᓂᕐᓴᐅᒋᕗᖅ ᐃᕐᓂᐊᖑᕕᐅᑉ ᐅᓪᓗᖓᓂᑦ.
2ᐃᓔᕐᓂᕐᒧᑦ ᕿᒃᓵᒃᑐᑦ ᐃᒡᓗᖓᓄᑦ ᐃᑎᕆᐊᒥᒃ ᐱᐅᓂᕐᓴᐅᕗᖅ ᓂᕆᕕᒡᔪᐊᕐᑐᑦ ᐃᒡᓗᖓᓄᑦ ᐃᑎᕐᓂᕐᒥᑦ, ᐃᓄᓕᒫᑦ ᑕᒪᑐᒥᖓ ᑐᕌᒐᖃᕐᒪᑕ, ᐃᓄᐃᓪᓗ ᐃᓅᔪᓕᒫᑦ ᐆᒻᒪᒻᒥᐅᑕᕆᕚᑦ.
3ᕿᒃᓵᖕᓂᖅ ᐱᐅᓂᕐᓴᐅᕗᖅ ᐃᒡᓚᕐᓂᕐᒥᑦ,#7:3 ᐃᒡᓚᕐᓂᖅ ᐅᕝᕙᓗ ᐃᔪᕐᓂᖅ ᑮᓇᕐᒧᑦ ᑲᑕᓗᖓᔪᒧᑦ ᐆᒻᒪᑎ ᐋᖅᑭᒃᑕᐅᖕᒪᑦ.
4ᓯᓚᑐᔫᑉ ᐆᒻᒪᑎᖓ ᐃᓂᖃᕐᐳᖅ ᐃᒡᓗᒥ ᕿᒃᓵᒡᕕᐅᔪᒥ, ᓯᓔᑦᑑᓪᓕ ᐆᒻᒪᑎᖓ ᐃᓂᖃᕐᐳᖅ ᖁᕕᐊᓚᖃᑎᒌᒃᑐᑦ ᐃᒡᓗᖓᓂ.
5ᐱᐅᓂᕐᓴᐅᕗᖅ ᓯᓚᑐᔫᑉ ᓱᐊᖕᓂᖓᓂᒃ ᑐᓵᓗᓂ, ᓯᓔᑦᑑᑉ ᐃᓐᖏᕐᓂᖓᓂᒃ ᑐᓵᓂᕐᒥᑦ.
6ᑲᑭᓪᓚᕐᓇᕐᑑᑉ ᓄᑦᑖᓂᖏᑦ ᑐᓴᕐᓴᐅᖕᒪᑕ ᐅᒃᑯᓯᐅᑉ ᐊᑖᓂ, ᑍᒤᓐᓂᕗᖅ ᓯᓔᑦᑑᑉ ᐃᒡᓚᕐᓂᖓ,#7:6 ᐃᒡᓚᕐᓂᖓ ᐅᕝᕙᓗ ᐃᔪᕐᓂᖓ ᑕᒪᓐᓇ ᑐᑭᖃᓐᖏᓚᖅ.
7ᐅᖁᒤᒃᓴᕐᑎᑕᐅᓂᕐᒧᑦ ᓯᓚᑐᔪᖅ ᓯᓔᑦᑐᓐᖑᕐᑎᑕᐅᖕᒪᑦ, ᓯᓔᕆᒃᓯᕐᓂᐅᓪᓗ ᐆᒻᒪᑎ ᐋᓐᓂᐊᕐᑖᕐᑎᑉᐹ.
8ᓱᓇᑐᐃᓐᓁᑦ ᐃᓱᓕᓐᓂᖓᑦ ᐱᐅᓂᕐᓴᐅᕗᖅ ᐱᒋᐊᓕᓵᕐᓂᕐᒥᑦ, ᕿᓄᐃᓵᕐᑐᖅ ᐊᓂᕐᓂᖅ ᐱᐅᓂᕐᓴᐅᕗᖅ ᐱᐅᔪᕆᔪᒥᑦ ᐊᓂᕐᓂᕐᒥᑦ.
9 #
ᔧᒥᓯ 1:19. ᐊᓂᕐᓃᑦ ᑐᐊᕕᕐᑎᓐᓂᐊᕐᓇᒍ ᓂᓐᖓᖕᓂᕐᒧᑦ, ᓂᖓᐅᒪᓂᖅ ᐃᓂᖃᕐᒪᑦ ᓯᓔᑦᑐᑦ ᓈᖏᓐᓂ.
10ᐃᒫᒃ ᐅᖃᕐᓂᐊᕐᓇᒃ, “ᓱᖕᒪᑦ ᐅᓪᓗᐃᑦ ᐊᑐᓚᐅᕐᑕᕗᑦ ᐱᐅᓂᕐᓴᐅᕙᑦ ᐅᓪᓗᓂᑦ ᒫᓐᓇ ᐊᑐᕐᑐᓂᑦ?” ᑍᒫᒃ ᐊᐱᕆᑎᓪᓗᑎᑦ ᓯᓚᑐᔪᑎᑐᑦ ᐃᓱᒪᖏᓐᓇᕕᑦ.
11ᓯᓚᑐᓂᖅ ᐱᐅᕗᖅ ᐱᖁᑎᓂᒃ ᕿᒤᕕᐅᔪᑎᑐᑦ, ᐱᕚᓪᓕᕈᑕᐅᓪᓗᓂᓗ ᓯᕿᓂᕐᒥᒃ ᑕᑯᔪᓄᑦ. 12ᓯᓚᑐᓂᖅ ᓴᐳᓐᓂᐊᕈᑎᐅᕗᖅ ᓲᕐᓗ ᑮᓇᐅᔭᖅ ᓴᐳᓐᓂᐊᕈᑎᐅᖕᒪᑦ. ᖃᐅᔨᒪᓂᐅᑉ ᐱᕚᓪᓕᕐᓇᕐᓂᖓ ᑕᕝᕙ, ᓯᓚᑐᓂᖅ ᑐᓂᓯᖕᒪᑦ ᐃᓅᓯᕐᒥᒃ ᑖᑦᓱᒥᖓ ᐱᖃᕐᑐᒧᑦ.
13ᒎᑎᐅᑉ ᐱᓇᓱᐊᕐᓂᖓ ᐃᓱᒪᒋᒍᒃ; ᑭᓇ ᑐᑭᓕᐊᕐᓯᑎᑦᓯᔪᓐᓇᕐᐸ ᑖᑦᓱᒪ ᓂᐅᖓᒃᑎᑕᕕᓂᖓᓂᒃ? 14ᐅᓪᓗᒥᒃ ᐊᔪᕐᓴᖏᑦᓯᐊᕐᓇᕐᑐᖃᕐᐸᑦ ᖁᕕᐊᓱᒋᑦ, ᓇᓪᓕᐅᑎᔪᓪᓕ ᐊᒃᓱᕈᕐᓇᕐᐸᑕ ᐃᒫᒃ ᐃᓱᒪᒋᑦ: ᒎᑎ ᐆᒥᖓ ᓴᓇᓯᒪᕗᖅ ᐊᒻᒪᓗ ᐊᓯᐊᓂᒃ, ᐃᓄᒃ ᓱᓇᒥᒃ ᖃᐅᔨᖁᓇᒍ ᑭᖑᓂᕐᒥᓂ ᖃᓄᐃᑦᑐᖃᕈᒫᕐᒪᖔᑦ.
15ᑕᑯᓯᒪᕗᖓ ᐅᓪᓗᓂ ᐃᓅᓂᓐᓂ ᑐᑭᖃᖏᑦᑐᓂᒃ, ᐃᓄᒃᑕᖃᕐᐳᖅ ᐃᓱᐊᕐᑐᓂᒃ ᑐᖁᓯᒪᔪᓂᒃ ᐃᓱᐊᕐᓂᑎᒃ ᐱᑦᔪᑎᒋᓪᓗᒋᑦ. ᐱᐅᖏᑦᑐᓕᔪᓂᒃᑕᐅᖅ ᐃᓄᒃᑕᖃᕆᕗᖅ ᐊᑯᓂ ᐃᓅᔪᓂᒃ ᐊᔪᕐᑐᓕᓂᑎᒃ ᐱᑦᔪᑎᒋᓪᓗᒋᑦ. 16ᐃᓱᐊᕐᑐᓕᓗᐊᕐᓂᐊᕐᓇᒃ, ᓯᓚᑐᓗᐊᕐᓂᐊᕐᓇᒡᓘᓐᓃᑦ: ᓱᖕᒪᑦ ᐃᓕᖕᓂᒃ ᐃᓅᓯᑭᑎᓐᓇᓱᐊᕐᐲᑦ? 17ᐊᔪᕐᑐᓕᓗᐊᕐᓂᐊᕐᓇᒡᓗ, ᓯᓔᑦᑑᓂᐊᕐᓇᒡᓘᓐᓃᑦ: ᓱᖕᒪᑦ ᑐᖁᔭᕆᐊᖃᕐᐲᑦ ᑐᖁᕕᒃᓮᑦ ᓇᓪᓕᐅᑎᖄᕐᑎᓐᓇᒍ? 18ᓈᒻᒪᒃᐳᖅ ᐊᑕᐅᓯᕐᒥᒃ ᑎᒍᒥᐊᕐᓗᑎᑦ ᐂᑉᐸᖓᓗ ᓴᒃᑯᖏᓪᓗᒍ; ᒎᑎᒥᒃ ᓯᕗᕋᔫᑉ ᑕᒪᒃᑯᐊᓕᒫᑦ ᐊᓂᒍᕈᒫᕐᒪᒋᑦ.
19ᓯᓚᑐᓂᐅᑉ ᓯᓚᑐᔪᖅ ᓴᓐᖏᔫᑎᑉᐹ, ᓴᓐᖏᓂᕐᓴᐅᓗᓂ ᐊᖓᔪᖅᑳᓂᑦ ᖁᓕᓂᑦ ᐃᒡᓗᒐᓴᒡᔪᐊᓂᒃ ᐊᐅᓚᑦᓯᔨᓂᑦ.
20ᐃᓄᖕᒥᒃ ᐃᓱᐊᕐᑐᒥᒃ ᓄᓇᒥ ᐱᑕᖃᖏᒻᒪᑦ ᐱᐅᔪᒥᒃ ᐱᓂᐊᕐᓂᖃᕐᑐᒥᒃ ᐊᔪᕐᑐᓕᖏᑦᑐᒥᒡᓗ.
21ᐃᓄᐃᑦ ᐅᖃᐅᓯᕆᔭᓕᒫᖏᑦ ᓈᓚᒃᑍᓐᓇᕆᓂᐊᕐᓇᒋᑦ, ᐱᔨᖕᓂᑦ ᓇᕐᕈᓇᕐᓯᑎᑕᐅᓗᑎᑦ ᐅᖃᐅᓯᐅᑐᐃᓐᓇᕆᐊᖃᕋᕕᑦ. 22ᐅᓄᕐᑐᐃᕐᓱᕐᓗᑎᑦᑕᐅᖅ ᐆᒻᒪᑎᖕᓂ ᖃᐅᔨᒪᒐᕕᑦ, ᓇᖕᒥᓂᖅ ᐊᒡᓛᑦ ᐊᓯᖕᓂᒃ ᓇᕐᕈᓇᕐᓯᑎᑦᓯᖃᑦᑕᕐᓯᒪᒐᕕᑦ.
23ᑕᒪᒃᑯᐊᓕᒫᑦ ᐆᒃᑐᕐᓯᒪᕙᒃᑲ ᓯᓚᑐᓂᒃᑯᑦ; ᐅᖃᓚᐅᕐᐳᖓ, “ᓯᓚᑐᓂᐊᕐᐳᖓ,” ᑕᒪᓐᓇᓕ ᐅᕙᓐᓂᑦ ᐅᖓᓯᒃᑑᓚᐅᕐᐳᖅ. 24ᑕᒪᓐᓇ ᐅᖓᓯᒃᑐᖅ, ᐊᒃᓱᒻᒪᕆᐊᓗᒡᓗ ᐃᑎᔫᓪᓗᓂ, ᑭᐊ ᖃᐅᔨᔪᓐᓇᕐᐸᐅᒃ? 25ᐃᓱᒪᒐ ᕿᓂᕐᑎᓚᐅᕐᐸᕋ ᖃᐅᔨᔪᒪᓪᓗᖓ, ᕿᓂᕐᓗᒍ ᓇᓂᓗᒍᓗ ᓯᓚᑐᓂᖅ, ᓱᓇᑐᐃᓐᓁᓪᓗ ᐋᖅᑭᒃᓯᒪᑦᔪᑎᒋᔭᖏᑦ ᓯᓔᑦᑐᓪᓗ ᐱᐅᖏᑦᑐᓕᑦᔪᓯᖏᑦ, ᓯᓔᑦᑐᓪᓘᓐᓂᑦ ᑐᑮᕈᑎᓂᖏᑦ.
26ᖃᐅᔨᓚᐅᕐᐳᖓ ᑐᖁᒥᑦ ᖃᓯᓕᓇᕐᓂᕐᓴᐅᖕᒪᑦ ᐊᕐᓇᖅ, ᐆᒻᒪᑎᖓ ᓂᒐᐅᔪᖅ ᓄᓗᐊᖑᓪᓗᓂᓗ, ᑕᓕᖏᑕᓗ ᐃᕿᑦᑎᓂᖏᒃ ᐊᕐᓵᕐᑑᔭᐅᔪᑦ. ᒎᑎᒥᒃ ᖁᕕᐊᓱᒃᑎᑦᓯᔫᑉ ᑖᓐᓇ ᕿᒫᔪᓐᓇᕐᐹ, ᐊᔪᕐᑐᓕᔪᕐᓕ ᑖᑦᓱᒪ ᓂᒐᕐᑎᓐᓂᐊᕐᐹ. 27“ᐃᒫᒃ ᖃᐅᔨᓚᐅᕐᐳᖓ,” ᐊᔪᕆᕐᑐᐃᔪᖅ ᐅᖃᕐᐳᖅ, ᓱᓇᑐᐃᓐᓁᑦ ᖃᓄᐃᑦᑐᑦ ᑲᑎᕐᓱᕐᓗᒋᑦ ᐱᑦᔪᑎᖏᓪᓗ ᓇᓂᓪᓗᒋᑦ, 28ᐃᓱᒪᒃᑯᑦ ᕿᓂᖃᑦᑍᓐᓇᕐᐳᖓ, ᓇᓂᓚᐅᕐᓇᒍᓗ: ᐊᖑᑎᒥ ᐊᑕᐅᓯᕐᒥᒃ ᐃᓱᐊᕐᑐᒥᒃ ᑕᐅᓴᓐᑎᑦ ᐊᑯᓐᓂᖓᓂ ᓇᓂᓯᓚᐅᕐᐳᖓ, ᐊᕐᓇᒥᒡᓕ ᐃᓱᐊᕐᑐᒥᒃ ᑖᒃᑯᐊ ᐊᑯᓐᓂᖓᓐᓂᑦ ᓇᓂᓯᓚᐅᓐᖏᓚᖓ. 29ᓱᓕᑦᓯᐊᕐᑐᒥᒃ, ᐅᓇᑐᐊᖅ ᖃᐅᔨᓚᐅᕐᐸᕋ: ᒎᑎᐅᑉ ᐊᖑᑦ ᐃᓱᐊᕐᑑᓪᓗᒍ ᓴᓇᓚᐅᕐᐹ, ᑭᓯᐊᓂᓕ ᐃᓱᒪᔮᕐᓇᕐᑐᓂᒃ ᐅᓄᕐᑐᓂᒃ ᕿᓂᕐᐳᒍᑦ.
Currently Selected:
ᐃᓕᓯᒪᓃᑦ ᐃᒃᓖᓯᐊᓯᑏᔅ 7: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
