ᐃᓕᓯᒪᓃᑦ ᐃᒃᓖᓯᐊᓯᑏᔅ 4
4
1ᓱᓕ ᖃᐅᔨᓇᓱᐊᒃᑲᓐᓂᓚᐅᕐᐳᖓ, ᑕᑯᓚᐅᕐᐳᖓᓗ ᐅᖁᒤᒃᓴᕐᑎᑕᐅᓂᕐᓂᒃ ᐊᑐᕐᑕᐅᔪᓂᒃ ᓯᕿᓂᐅᑉ ᐊᑖᓂ: ᑕᑯᒋᑦ ᐅᖁᒤᒃᓴᕐᑎᑕᐅᔪᑦ ᖁᕝᕕᖏᑦ, ᒪᓂᒍᐃᔨᒃᓴᖃᓐᖏᓚᓪᓕ; ᐅᖁᒤᒃᓴᕐᑎᑦᓯᔨᖏᑦ ᐊᖏᔪᒥᒃ ᐱᔪᓐᓇᕐᓂᖃᕐᐳᑦ, ᑖᒃᑯᐊᓕ ᒪᓂᒍᐃᔨᒃᓴᖃᓐᖏᓚᑦ. 2ᑍᒤᒻᒪᑦ ᑐᖁᓯᒪᔪ ᐃᓱᒪᒋᓚᐅᕐᐸᒃᑲ ᖁᕕᐊᓇᕐᑐᒦᓐᓂᕐᓴᐅᓱᒋᓪᓗᒋᑦ ᑐᖁᖓᖏᑦᑐᓂᑦ, ᒫᓐᓇ ᐃᓅᔪᓂᑦ. 3ᑖᒃᑯᓇᓐᖓᓪᓕ ᐱᐅᓂᕐᓴᐅᒋᕗᖅ ᐃᓅᓚᐅᖏᑦᓯᐊᒻᒪᕆᒃᑐᑦ, ᐱᐅᖏᑦᑐᓕᓂᐅᔪᓂᒃ ᓯᕿᓂᐅᑉ ᐊᑖᓂ ᑕᑯᓚᐅᖏᑦᑐᖅ.
4ᓱᓕ ᖃᐅᔨᓚᐅᕆᕗᖓ ᓴᓇᓂᓕᒫᑦ ᓴᓇᔪᓐᓇᑦᓯᐊᕐᓃᓪᓗ ᑐᓱᒋᔭᐅᖕᒪᑕ ᐊᓯᖏᓐᓄᑦ. ᑕᒪᓐᓇ ᑐᑭᖃᖏᒻᒪᑦ ᐊᓄᕆᒥᒡᓗ ᐊᖑᓯᓇᓱᑐᐃᓐᓇᕐᓂᐅᔮᕐᓗᓂ. 5ᓯᓔᑦᑑᑉ ᐊᒡᒐᓂ ᐸᑎᒃᑎᑉᐰᑦ ᐃᒻᒥᓂᒡᓗ ᐅᒋᐊᕐᓗᓂ. 6ᐊᑕᐅᓯᕐᒥᒃ ᑎᒍᒥᐊᕐᑐᕐᓂᖅ ᓂᐰᑦᑑᓗᓂ ᐱᐅᓂᕐᓴᐅᕗᖅ ᐃᒡᓗᒃᑐᑦ ᑎᒍᒥᐊᕐᑐᕐᓂᕐᒥᑦ ᓴᓇᔭᒃᓴᓂᒃ ᐊᓄᕆᒥᒡᓗ ᐊᖑᓯᓇᓱᐊᕐᓂᕐᒥᑦ.
7ᓱᓕ ᑕᑯᓚᐅᕆᕗᖓ, ᑕᒪᓐᓇ ᑐᑭᖃᖏᒻᒪᑦ ᓯᕿᓂᐅᑉ ᐊᑖᓂ ᐱᓂᐊᕐᓂᖅ. 8ᐃᓄᑐᐊᕐᑕᖃᕐᐳᖅ ᐃᓅᖃᑎᖃᕋᓂᓗ: ᐃᕐᓂᖃᓐᖏᓚᖅ ᖃᑕᓐᖑᑎᖃᕋᓂᓗ. ᑭᓯᐊᓂ ᐊᒃᓱᕈᕐᓗᓂ ᓴᓇᓂᖓ ᐃᓱᓕᑦᓱᓐᓇᓐᖏᓚᖅ, ᐃᔨᖏᒡᓗ ᐱᖃᕈᒪᓂᕐᒥᒃ ᓈᒻᒪᒃᓯᔪᓐᓇᓐᖏᓛᒃ. ᐊᐱᕆᓚᐅᕐᓯᒪᓐᖏᓚᕐᓕ, “ᑭᓇᒥᒃ ᓴᓇᒍᑦᔨᕗᖓ? ᓇᖕᒥᓂᕐᓗ ᖁᕕᐊᓱᖕᓂᒃᓴᓐᓂᒃ ᐊᓯᐅᔨᑦᓗᖓ?” ᑕᒪᓐᓇ ᑐᑭᖃᓐᖏᓚᖅ ᐱᓂᐊᕐᓂᕐᓗ ᖁᕕᐊᓇᖏᑦᑑᓪᓗᓂ.
9ᐃᓅᒃ ᒪᕐᕉᒃ ᐱᐅᓂᕐᓴᐅᕗᒃ ᐃᓄᑑᓂᕐᒥᑦ, ᐊᒃᓱᕈᕐᓂᕐᒧᑦ ᓴᓇᓗᑎᒃ ᐃᒻᒥᖕᓄᑦ ᐃᑲᔪᖃᑦᑕᐅᑎᖕᒪᑎᒃ. 10ᑕᒪᕐᒥᒃ ᐅᕐᕈᒃᐸᑎᒃ, ᐂᑉᐸᖓᑕ ᒪᑭᑎᓐᓂᐊᕐᒪᒍ. ᑲᑉᐱᐊᓐᓇᒦᒡᓕ ᐃᓄᑐᐊᖅ ᐅᕐᕈᒃᐸᑦ, ᑭᓇᒥᒡᓘᓐᓃᑦ ᒪᑭᑎᑦᓯᔨᒃᓴᖃᓐᖏᓚᖅ. 11ᓱᓕᓗ, ᓂᒡᓚᓱᒃᑐᒥ ᒪᕐᕉᒃ ᓇᓚᖃᑎᒌᒃᐸᑎᒃ ᐅᖅᑰᖃᑎᒌᖕᓂᐊᕐᐴᒃ; ᖃᓄᕐᓕ ᐃᓄᑐᐊᖅ ᐃᒻᒥᓂᒃ ᐅᖅᑰᑎᑦᓱᓐᓇᕐᐸ? 12ᐃᓄᑐᐊᖅ ᓵᓚᒋᔭᐅᔪᓐᓇᕐᐳᖅ ᐊᓯᒥᓄᑦ, ᒪᕐᕉᒡᓕ ᓴᓚᖃᕈᓐᓇᕐᐴᒃ ᐊᑕᐅᓯᕐᒥᒃ. ᐊᒃᓱᓈᕐᓕ ᐱᖓᓲᓕᖅᑲᖓᔪᖅ ᕿᒃᑐᕋᕐᓴᕅᓐᖏᓚᖅ.
13ᐊᔪᕐᓴᕐᑐᖅ ᓯᓚᑐᓗᓂ ᐃᓅᓱᒃᑐᖅ ᐱᐅᓂᕐᓴᐅᕗᖅ ᐊᖓᔪᖅᑳᕐᔪᐊᑐᖃᕐᒥᑦ ᓯᓔᑦᑐᒥᑦ ᐅᖃᐅᑦᔭᐅᑦᔪᓯᐊᒥᓂᒃ ᓈᓚᒍᓐᓁᓪᓕᔪᒥᑦ. 14ᑎᒍᔭᐅᓯᒪᕕᖕᒥᑦ ᐱᓗᓂ ᐊᖓᔪᖅᑳᕐᔪᐊᖑᕐᓯᒪᒍᓂ, ᐊᖓᔪᖅᑲᐅᕕᖕᒥᓂ ᐃᓅᓚᐅᕋᓗᐊᕈᓂ ᐊᔪᕐᓴᕐᑑᓗᓂ. 15ᑕᑯᓚᐅᕐᐳᖓ ᐃᓄᖕᓂᒃ ᓯᕿᓂᐅᑉ ᐊᑖᓂ ᐃᓅᔪᓂᒃ ᓇᒧᑐᐃᓐᓇᖅ ᐱᔪᓂᒃ, ᒪᓕᒡᓗᑎᒡᓗ ᐃᓅᓱᒃᑐᒥᒃ ᐊᖓᔪᖅᑳᕐᔪᐊᒥᒃ ᑭᖑᕝᕕᕐᓯᔪᒥᒃ. 16ᐃᓄᐃᑦ ᐃᓱᖃᓚᐅᓐᖏᓚᑦ ᐃᓅᓱᒃᑑᑉ ᑖᑦᓱᒪ ᐊᖓᔪᖅᑳᖑᕐᕕᒋᔭᖏᑦ; ᑭᖑᓂᖓᓂᓗ ᑭᖑᕝᕕᕐᓯᔪᑦ ᑖᑦᓱᒥᖓ ᖁᕕᐊᓲᑎᖃᓐᖏᓚᑦ. ᑕᒪᓐᓇᑕᐅᖅ ᑐᑭᖃᓐᖏᓚᖅ, ᐊᓄᕆᒥᒃ ᐊᖑᓯᓇᓱᐊᑐᐃᓐᓇᕐᓂᐅᔮᕐᑐᖅ.
Currently Selected:
ᐃᓕᓯᒪᓃᑦ ᐃᒃᓖᓯᐊᓯᑏᔅ 4: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
