ᐃᓕᓯᒪᓃᑦ ᐃᒃᓖᓯᐊᓯᑏᔅ 3
3
ᓱᓇᑐᐃᓐᓁᑦ ᐱᕕᖃᕐᐳᑦ
1ᓱᓇᑐᐃᓐᓁᑦ ᐱᕕᒃᓴᖃᕐᐳᑦ, ᕿᓚᐅᑉ ᐊᑖᓃᑦᑐᑦ ᓱᓇᑐᐃᓐᓇᐅᒐᓗᐊᕐᐸᑕ ᓇᓪᓕᐅᓐᓂᖃᕐᐳᑦ.
2ᓇᓪᓕᐅᓐᓂᖃᕐᐳᖅ ᐃᕐᓂᐊᖑᕕᒃᓴᒥᒃ, ᓇᓪᓕᐅᓐᓂᖃᕆᕗᖅ ᑐᖁᕕᒃᓴᒥᒃ;
ᓇᓪᓕᐅᓐᓂᖅᑲᕐᐳᖅ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᓂᕐᒥᒃ, ᓇᓪᓕᐅᓐᓂᖃᕆᕗᖅ ᐱᕈᕐᓯᐊᓂᒃ ᓄᓲᕅᓂᕐᒥᒃ;
3ᓇᓪᓕᐅᓐᓂᖃᕐᐳᖅ ᑐᖁᑦᓯᓂᕐᒧᑦ, ᓇᓪᓕᐅᓐᓂᖃᕆᕗᖅ ᐱᔪᓐᓃᕐᑎᑦᓯᓂᕐᒥᒃ;
ᓇᓪᓕᐅᓐᓂᖃᕐᐳᖅ ᐅᕐᕈᑎᑦᓯᓂᕐᒥᒃ, ᓇᓪᓕᐅᓐᓂᖃᕆᕗᖅ ᐃᒡᓗᓕᐅᕐᓂᕐᒥᒃ;
4ᓇᓪᓕᐅᓐᓂᖃᕐᐳᖅ ᕿᐊᓂᕐᒥᒃ, ᓇᓪᓕᐅᓐᓂᖃᕆᕗᖅ ᐃᒡᓚᕐᓂᕐᒥᒃ;#3:4 ᐃᒡᓚᕐᓂᕐᒥᒃ ᐅᕝᕙᓗ ᐃᔪᕐᓂᕐᒥᒃ
ᓇᓪᓕᐅᓐᓂᖃᕐᐳᖅ ᐅᒡᒍᐊᕐᓂᕐᒥᒃ, ᓇᓪᓕᐅᓐᓂᖃᕆᕗᖅ ᑖᓂᓯᕐᓂᕐᒥᒃ;
5ᓇᓪᓕᐅᓐᓂᖃᕐᐳᖅ ᐅᔭᖅᑲᓂᒃ ᐃᒋᑦᓯᓂᕐᒥᒃ, ᓇᓪᓕᐅᓐᓂᖃᕆᕗᖅ ᐅᔭᖅᑲᓂᒃ ᑲᑎᕐᓱᐃᓂᕐᒥᒃ;
ᓇᓪᓕᐅᓐᓂᖃᕐᐳᖅ ᐃᕿᑦᓯᓂᕐᒥᒃ,#3:5 ᐃᕿᑦᓯᓂᖅ ᐅᕝᕙᓗ ᓄᓕᐊᕐᓂᖅ ᓇᓪᓕᐅᓐᓂᖃᕆᕗᖅ ᐃᕿᑦᓯᑦᑍᓕᓂᕐᒥᒃ;
6ᓇᓪᓕᐅᓐᓂᖃᕐᐳᖅ ᕿᓂᕐᓂᕐᒧᑦ, ᓇᓪᓕᐅᓐᓂᖃᕆᕗᖅ ᐊᓯᐅᔨᓂᕐᒥᒃ;
ᓇᓪᓕᐅᓐᓂᖃᕐᐳᖅ ᐱᓯᒪᔪᒪᓂᕐᒥᒃ, ᓇᓪᓕᐅᓐᓂᖃᕆᕗᖅ ᓴᒃᑯᑦᓯᓂᕐᒥᒃ;
7ᓇᓪᓕᐅᓐᓂᖃᕐᐳᖅ ᐊᓕᒃᓯᓂᕐᒥᒃ, ᓇᓪᓕᐅᓐᓂᖃᕆᕗᖅ ᒥᕐᓱᕐᓂᕐᒥᒃ;
ᓇᓪᓕᐅᓐᓂᖃᕐᐳᖅ ᓂᐰᓐᓂᕐᒥᒃ, ᓇᓪᓕᐅᓐᓂᖃᕆᕗᖅ ᐅᖃᕆᐊᖃᕐᓂᕐᒥᒃ;
8ᓇᓪᓕᐅᓐᓂᖃᕐᐳᖅ ᓇᒡᓕᒍᓱᒡᕕᖕᒥᒃ, ᓇᓪᓕᐅᓐᓂᖃᕆᕗᖅ ᐆᒥᓱᒡᕕᖕᒥᒃ;
ᓇᓪᓕᐅᓐᓂᖃᕐᐳᖅ ᐅᓇᑕᕐᓂᕐᒥᒃ, ᓇᓪᓕᐅᓐᓂᖃᕆᕗᖅ ᐅᓇᑕᖏᓐᓂᕐᒥᒃ.
9ᐱᓇᓱᐊᕐᑎ ᓱᓇᒥᒃ ᐱᕚᓪᓕᕈᑎᖃᕐᐹ ᐊᒃᓱᕈᕐᓗᓂ ᓴᓇᔭᒥᓂᑦ? 10ᑕᑯᓯᒪᕗᖓ ᐱᓇᓱᐊᒐᒃᓴᓂᒃ ᒎᑎᐅᑉ ᑐᓂᔭᖏᓐᓂᒃ ᐃᓄᖕᓄᑦ ᐱᓇᓱᐊᕐᑕᐅᖁᓪᓗᒋᑦ. 11ᓱᓇᑐᐃᓐᓇᕐᓂᒡᓗ ᑕᑯᒥᓇᕐᑎᓯᕙᒃᐳᖅ ᓇᓪᓕᐅᓐᓂᖏᑦ ᓈᒻᒪᒃᑎᓪᓗᒋᑦ; ᐊᒻᒪᓗ ᐃᓱᖃᖏᑦᑐᒥᒃ ᐃᓕᓯᕗᖅ ᐃᓄᐃᑦ ᐆᒻᒪᑎᖏᓐᓄᑦ: ᑭᓯᐊᓂᓕ ᑖᒃᑯᐊ ᑐᑭᓯᔪᓐᓇᓐᖏᓚᑦ ᒎᑎ ᓱᓇᒥᒃ ᐱᓚᐅᕐᒪᖔᑦ ᐱᒋᐊᕐᓂᖓᓂᑦ ᐃᓱᐊ ᑎᑭᓪᓗᒍ. 12ᖃᐅᔨᒪᕗᖓᓕ ᐱᐅᓂᕐᓴᒥᒃ ᐱᑕᖃᓐᖏᓚᖅ ᑖᒃᑯᐊ ᖁᕕᐊᓱᒋᐊᖃᕐᓂᖏᓐᓂᑦ, ᐱᐅᔪᒥᒡᓗ ᐱᓇᓱᐊᕆᐊᖃᕐᓂᖏᓐᓂᑦ ᐃᓅᓂᕐᒥᖕᓂ. 13ᐊᒻᒪᓗ ᐃᓄᐃᑦ ᑕᒪᕐᒥᒃ ᓂᕆᔭᕆᐊᖃᕐᒪᑕ ᐃᒥᕆᐊᖃᕐᓗᑎᒡᓗ ᐊᒃᓱᕈᕐᓂᕐᒧᑦ ᓴᖅᑭᑎᑕᒥᖕᓂᒃ ᑕᒪᓐᓇ ᒎᑎᐅᑉ ᑐᓂᕐᕈᑎᒋᖕᒪᒍ.
14ᖃᐅᔨᒪᕗᖓ ᒎᑎᐅᑉ ᖃᓄᐃᓕᐅᕐᓂᖏᑦ ᐃᓱᖃᖏᑦᑐᒧᑦ ᑍᒤᓕᖓᓂᐊᕐᒪᑕ. ᓱᓇᒥᒃ ᐃᓚᔭᐅᔪᓐᓇᓐᖏᓚᑦ, ᓱᓇᒥᒡᓘᓐᓃᑦ ᐃᓚᓐᖓᕐᑕᐅᔪᓐᓇᓐᖏᓚᑦ. ᒎᑎᐅᑉ ᓴᓇᓚᐅᕐᒪᒋᑦ ᐃᓄᐃᓪᓗ ᓯᕘᕋᔭᕆᐊᖃᕐᐳᑦ ᒎᑎᐅᑉ ᓵᖓᓂ. 15ᒫᓐᓇ ᐱᑕᖃᕐᑐᑦ ᑍᑦᓱᒪᓂ ᓴᓇᔭᐅᔭᕇᕐᓯᒪᕗᑦ, ᐱᑕᖃᕈᒫᕐᑐᓪᓗ ᓴᓇᔭᐅᔭᕇᕐᓯᒪᒋᕗᑦ; ᒎᑎᐅᓪᓗ ᐱᔭᕇᕐᓯᒪᔪᑦ ᓴᖅᑭᑎᑦᓱᒫᕐᐰᑦ.
ᓯᓚᕐᔪᐊᕐᒥ ᐊᑦᔨᒌᓐᖏᑎᑦᓯᓂᖃᕐᐳᖅ
16ᓱᓕ ᓯᕿᓂᐅᑉ ᐊᑖᓂ ᐊᓯᐊᓂᒃ ᑕᑯᒃᑲᓐᓂᓚᐅᕆᕗᖓ: ᐃᖅᑲᕐᑐᐃᓂᐅᑉ ᐃᓂᖓᓂ-ᐱᐅᖏᑦᑐᓕᓂᖅ ᑕᕝᕙᓃᓚᐅᕐᐳᖅ, ᐊᑦᔨᒌᒃᑎᑦᓯᓂᐅᑉ ᐃᓂᖓᓂ- ᐱᐅᖏᑦᑐᓕᓂᖅ ᑕᕝᕙᓃᓚᐅᕐᐳᖅ. 17ᐆᒻᒪᑎᑯᑦ ᐃᓱᒪᓚᐅᕐᐳᖓ, “ᒎᑎᐅᑉ ᐃᖅᑲᕐᑐᐃᕕᖕᒧᑦ ᕾᑎᑦᓱᒫᕐᐰᑦ ᐱᐅᔪᑦ ᐱᐅᖏᑦᑐᓕᔪᓪᓗ, ᓇᓪᓕᐅᓐᓂᖃᕐᒪᑦ ᐱᑦᔪᑎᒃᓴᖃᕐᑐᓄᑦ ᓱᓇᑐᐃᓐᓇᕐᓄᑦ ᓴᓇᓯᒪᔪᓄᓪᓗ.” 18ᐆᒻᒪᑎᒃᑯᑦ ᐃᓱᒪᓚᐅᕐᐳᖓ, “ᒎᑏ ᐆᒃᑐᓚᐅᒃᑭᑦ ᐃᓄᐃᑦ ᐃᕐᓂᖏᑦ ᖃᐅᔨᓕᖁᓪᓗᒋᑦ ᓇᖕᒥᓂᖅ ᐆᒪᔪᐃᑦ ᐊᑦᔨᑐᐃᓐᓇᕆᖕᒪᒋᑦ.” 19ᐃᓄᖕᓄᑦ ᖃᓄᐃᓐᓂᕆᔭᐅᕙᒃᑐᑦ ᐆᒪᔪᓂᑦᑕᐅᖅ ᐊᑐᕐᑕᐅᕙᖕᒥᖕᒪᑕ; ᐊᑦᔨᒌᒥᒃ ᖃᓄᐃᓐᓇᕐᑐᒧᑦ ᑎᑭᑕᐅᕙᖕᒪᑕ: ᓲᕐᓗ ᐂᑉᐸᖓ ᑐᖁᕐᒪᑦ ᐊᒻᒪᑦᑕᐅᖅ ᐊᓯᐊ ᑐᖁᒋᓪᓗᓂ. ᑕᒪᕐᒥᒃ ᐊᑦᔨᒌᒃᑐᒥᒃ ᐊᓂᕐᓂᖃᕐᐴᒃ; ᐃᓄᒃ ᐊᔪᖏᓐᓂᕐᓴᐅᓐᖏᓚᖅ ᐆᒪᔪᒥᑦ, ᐃᓛᒃ ᑕᒪᕐᒥᒃ ᑐᑭᖃᓐᖏᓚᑦ. 20ᑕᒪᕐᒥᒃ ᐊᑕᐅᓯᕐᒧᑦ ᐂᕗᑦ: ᓴᓂᕐᒥᑦ ᐱᕗᑦ ᓴᓂᕐᒧᓪᓗ ᐅᑎᕈᒫᕆᕗᑦ. 21ᑭᓇ ᖃᐅᔨᒪᕙ ᐃᓄᐃᑦ ᑕᕐᓂᖏᑦ ᖁᒻᒧᑦ ᐱᖕᒪᖔᑕ, ᐆᒪᔪᐃᓪᓗ ᑕᕐᓂᖏᑦ ᓄᓇᐅᑉ ᐊᑖᓄᑦ ᐱᖕᒪᖔᑕ? 22ᑐᑭᓯᓚᐅᕐᐳᖓᓕ ᐱᐅᓂᕐᓴᕐᑕᖃᓐᖏᓚᖅ ᐃᓄᑉ ᓴᓇᔭᓂ ᖁᕕᐊᓲᑎᒋᓗᓂᐅᒃ, ᑖᑦᓱᒧᖓ ᑐᕌᖓᖕᒪᑦ. ᑭᐊᓕ ᖃᐅᔨᑎᑦᓱᓐᓇᕐᐸᐅᒃ ᓱᓂᐊᕐᒪᖔᑦ ᑖᑦᓱᒪ ᑭᖑᓂᖓᒍᑦ?
Currently Selected:
ᐃᓕᓯᒪᓃᑦ ᐃᒃᓖᓯᐊᓯᑏᔅ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
