ᐃᓕᓯᒪᓃᑦ ᐃᒃᓖᓯᐊᓯᑏᔅ 5
5
ᑐᐊᕕᕐᓗᑎᑦ ᑲᔪᓯᓂᐊᖏᑦᑐᓂᒃ ᐊᖏᕈᑎᖃᕐᑍᓕᒋᑦ
1ᐊᓪᓗᕐᓂᑎᑦ ᐅᑦᔨᕆᑦᓯᐊᒃᑭᑦ ᐊᑕᓂᐅᑉ ᐃᒡᓗᖓᓄᑦ ᐂᓕᕈᕕᑦ; ᑕᕝᕗᓐᖓᓗ ᖃᒡᓕᓕᕆᑦ ᑐᓵᔭᕐᑐᕐᓗᑎᑦ ᓯᓔᑦᑐᑦ ᑐᓂᕐᕈᓯᑐᐃᓐᓇᕐᓂᖏᑦ ᐱᐅᓂᕐᓴᐅᖏᒻᒪᑕ, ᑖᒃᑯᐊᓗ ᑕᒻᒪᓕᕋᓗᐊᕐᒪᖔᕐᒥᒃ ᖃᐅᔨᔪᓐᓇᖏᒻᒪᑕ. 2ᖃᓃᑦ ᑐᐊᕕᕐᑎᓐᓂᐊᕐᓇᒍ, ᐆᒻᒪᑏᓪᓗ ᑐᐊᕕᕐᓗᓂ ᓂᓪᓕᐊᑎᓐᓂᐊᕐᓇᒍ ᒎᑎᐅᑉ ᓵᖓᓂ. ᒎᑎ ᕿᓚᖕᒦᒻᒪᑦ, ᐃᕝᕕᓗ ᓄᓇᒦᓐᓇᕕᑦ; ᑍᒤᒻᒪᑦ ᐅᖃᐅᓯᕐᑎᑦ ᐅᓄᕐᓯᑎᓐᓂᐊᕐᓇᒋᑦ. 3ᓯᓐᓇᒃᑑᒪᓃᑦ ᐊᑐᓕᕐᐸᖕᒪᑕ ᖃᓄᐃᓕᐅᕐᑐᖃᓗᐊᕐᑎᓪᓗᒍ, ᓯᓔᑦᑑᓪᓗ ᓂᐱᖓ ᐃᓕᑕᕆᔭᐅᓕᕐᐳᖅ ᐅᓄᕐᑐᓂᒃ ᐅᖃᐅᓯᒃᓴᖃᓂᖓᒍᑦ. 4#ᐃᓐᖏᕈᑦ 66:13,14.ᒎᑎᒧᑦ ᓱᓇᑐᐃᓐᓇᕐᒥᒃ ᐊᑐᕐᓂᐊᕐᓂᕋᕐᓗᒍ ᐊᖏᕈᑎᖃᕈᕕᑦ, ᐊᑏ ᑲᔪᓯᑎᓴᕅᒍᒃ; ᓯᓔᑦᑐᓂᒃ ᖁᕕᐊᒋᔭᖃᖏᒻᒪᑦ. ᐊᖏᕈᑎᒋᔭᑎᑦ ᑲᔪᓯᑎᖃᑦᑕᒃᑭᑦ. 5ᐱᐅᓂᕐᓴᐅᕗᖅ ᓱᓇᒥᒃ ᐊᖏᕈᑎᖃᖏᒃᑯᕕᑦ, ᐊᖏᕈᑎᒋᓯᕐᒪᔭᕐᓂᒃ ᑲᔪᓯᑎᑦᓯᓐᖏᒍᕕᑦ ᐱᐅᖏᓐᓂᕐᓴᐅᖕᒪᑦ. 6ᖃᓂᕐᐱᑦ ᐊᔪᕐᑐᓕᑎᑦᑍᓕᓕᑎᑦ, ᐅᖃᕐᓂᐊᕐᓇᒡᓗ ᒎᑎᐅᑉ ᐅᖃᕆᐊᕐᑐᕐᑎᑕᖓᓄᑦ ᑕᒻᒪᕐᓂᕋᕐᓗᒍ. ᓱᖕᒪᑦ ᒎᑎ ᓂᓐᖓᐅᒪᔭᕆᐊᖃᕐᐹ ᐸᓯᔭᐅᔪᒪᖏᓐᓂᕐᓂᒃ, ᐊᒡᒐᖕᓄᓪᓗ ᓴᓇᓚᐅᕐᑕᕐᓂᒃ ᐊᓯᕈᐃᓗᓂ? 7ᐅᓄᕐᑐᓂᒃ ᓯᓐᓇᒃᑑᒪᓂᖃᕐᑎᓪᓗᒍ, ᐅᓄᕐᑐᓂᒡᓗ ᐅᖃᐅᓯᕐᑕᖃᕐᑎᓪᓗᒍ ᓱᓕᖏᓐᓂᕐᑕᖃᕐᒪᑦ. ᒎᑎᓕ ᓯᕘᕋᒋᒍᒃ.
ᐃᓅᓯᐅᑉ ᑐᑭᖃᖏᓐᓂᖓ
8ᑕᑯᒍᕕᑦ ᐊᔪᕐᓴᕐᑐᒥᒃ ᐅᖁᒤᑎᑕᐅᔪᒥᒃ, ᐊᑦᔨᒌᒃᑎᑦᓯᑦᓯᐊᕐᓂᐅᓪᓗ ᐃᓱᐊᕐᑐᓕᓂᐅᓪᓗ ᐊᑐᕐᑕᐅᖏᓐᓂᖓᓂᒃ ᑲᑉᐱᐊᓇᕐᑐᒃᑯᑦ, ᓄᓇᐅᑉ ᐊᐅᓚᑦᓯᔨᖏᑎᒍᑦ, ᑕᒪᓐᓇ ᑕᑕᒥᓐᓂᐊᕈᑎᒋᓇᒍ; ᐊᖓᔪᖅᑳᖅ ᖃᐅᔨᓴᕐᑎᖃᕐᒪᑦ ᐊᖓᔪᖅᑲᐅᖅᑭᔭᒥᓂᒃ, ᑖᒃᑯᐊᓗ ᐊᖓᔪᖅᑳᖑᖅᑭᔭᖃᕆᓪᓗᑎᒃ.
9ᑍᒤᒻᒪᑦ ᓄᓇᐅᑉ ᑮᓇᐅᔭᓕᐅᕈᑕᐅᓂᖓ ᑕᒤᓐᓄᑦ ᐊᑐᕐᐳᖅ; ᐊᖓᔪᖅᑳᕐᔪᐊᖅ ᐊᒡᓛᑦ ᐱᔨᑦᓯᕐᑕᐅᕗᖅ ᐱᕈᕐᓰᕕᓕᕆᔪᓂᑦ.
10ᑮᓇᐅᔭᓂᒃ ᐅᖓᒋᔭᓕᒃ ᑮᓇᐅᔭᓂᒃ ᓈᒻᒪᒃᓯᔪᓐᓇᓐᖏᓚᖅ; ᑍᒫᒃᑕᐅᖅ ᐱᖃᓗᐊᕈᒪᓂᕐᒥᒃ ᐅᖓᒋᔭᓕᒃ ᐱᖃᓗᐊᕐᓂᕐᒥᒃ ᓈᒻᒪᒃᓯᔪᓐᓇᓐᖏᓚᖅ. ᑕᒪᓐᓇ ᑐᑭᖃᓐᖏᓚᖅ. 11ᓱᓇᑐᐃᓐᓁᑦ ᐊᖏᒡᓕᒃᐸᑕ, ᑕᒪᒃᑯᓂᖓ ᓂᕆᔪᑦ ᐊᖏᒡᓕᒋᕗᑦ; ᓱᓇᒥᒡᓕ ᑍᒪ ᐱᕚᓪᓕᕐᐹ ᐱᖁᑎᖃᕐᑐᖅ? ᐃᔨᒥᓄᓪᓕ ᑕᒪᒃᑯᓂᖓ ᑕᐅᑐᑐᐃᓐᓇᕐᐹ? 12ᑎᒥᐅᑉ ᐊᒃᓱᕈᕐᓂᖓᓄᑦ ᓴᓇᔫᑉ ᓯᓂᖕᓂᖓ ᒪᒪᕐᐳᖅ, ᒥᑭᔪᒥᒃ ᐊᖏᔪᒥᒡᓘᓐᓃᑦ ᓂᕆᒐᓗᐊᕈᓂ; ᐊᒃᓱᐃᑦᑑᕐᓕ ᐱᖃᓗᐊᕐᓂᕐᒥᓄᑦ ᓯᓂᑦᓯᐊᕈᓐᓇᓐᖏᓚᖅ. 13ᐱᐅᖏᑦᑐᐊᓗᖕᒥᒃ ᓯᕿᓂᐅᑉ ᐊᑖᓂ ᐊᑐᕐᑕᐅᔪᒥᒃ ᑕᑯᓯᒪᕗᖓ: ᐊᒃᓱᐃᑦᔪᑏᑦ ᐱᖃᕐᑐᒥᑦ ᐱᓯᒪᔭᐅᔪᑦ ᐋᓐᓂᐊᕈᑎᒋᓪᓗᒋᑦ.
14ᑖᒃᑯᐊ ᐊᒃᓱᐃᑦᔪᑎᑦ ᐊᓯᐅᕗᑦ ᐱᖃᕐᑑᑉ ᑕᒻᒪᕐᓂᖓᓄᑦ; ᐃᕐᓂᕐᑖᕈᓂᓗ ᕿᑐᕐᖓᖓ ᓱᓇᒥᒃ ᐱᒃᓴᖃᓐᖏᓚᖅ. 15#ᔫᐱ 1:21; ᐃᓐᖏᕈᑦ 49:17; 1 ᑎᒧᑎ 6:7.ᐊᓈᓇᒥᓂᑦ ᐃᕐᓂᐊᖑᓪᓗᓂ ᐊᓐᓄᕌᖃᓚᐅᖏᒻᒪᑦ, ᑍᒫᑦᓮᓐᓇᖅ ᐊᓐᓄᕌᖃᖏᓪᓗᓂ ᐅᑎᕈᒫᕆᕗᖅ; ᓱᓇᒥᒃ ᑎᒥᒥᓄᑦ ᐊᒃᓱᕈᕈᑎᕕᓂᕐᒥᓂᒃ ᓇᒃᓴᕈᒫᓐᖏᓚᖅ, ᑎᒍᒥᐊᕐᓗᒍ ᐊᐅᓪᓚᕈᑎᔭᒃᓴᖓᓂᒃ ᐱᑕᖃᓐᖏᓚᖅ. 16ᑕᒪᓐᓇᑦᑕᐅᖅ ᑕᕝᕙ ᐱᐅᖏᑦᑐᖅ: ᑍᒫᒃ ᓄᓇᒧᑦ ᑎᑭᓚᐅᕋᒥ ᑍᒫᑦᓮᓐᓇᖅ ᐅᑎᕈᒫᕆᕗᖅ. ᓱᓇᒥᒡᓕ ᐱᕙᓪᓕᕈᑎᖃᕐᐹ ᐊᓄᕆᒥᒃ ᐊᖑᓯᓇᓱᖕᓂᕐᒧᑦ ᐊᒃᓱᕈᓚᐅᑐᐃᓐᓇᕐᓗᓂ? 17ᐅᓪᓗᓂᒃ ᐃᓅᓂᕐᒥᓂ ᓂᕆᕗᖅ ᑖᕐᑐᒥ, ᕿᒃᓵᖕᓂᖃᕐᓗᓂ ᐅᓄᕐᑐᓂᒃ ᖃᓂᒪᓂᖃᕐᓗᓂᓗ ᓂᓐᖓᐅᒪᓂᖃᕐᓗᓂᓗ.
18ᐃᒫᒃ ᑕᕝᕙ ᐱᐅᔪᖅ ᑕᑯᓚᐅᕐᑕᕋ: ᓈᒻᒪᒃᐳᖅ ᓂᕆᓗᓂ ᐃᒥᕐᓗᓂᓗ ᖁᕕᐊᒋᔭᖃᕐᓗᓂᓗ ᓴᓇᔭᒥᓂᒃ ᐊᒃᓱᕈᕐᓂᕐᒥᓄᑦ ᓴᓇᔭᒥᓂᒃ ᓯᕿᓂᐅᑉ ᐊᑖᓂ ᓴᓇᔭᐅᕙᒃᑐᒥᒃ ᐅᓪᓗᓂᒃ ᐅᓄᖏᑦᑐᓂᒃ ᒎᑎᐅᑉ ᑐᓂᔭᖏᓐᓂᒃ ᑖᑦᓱᒧᖓ; ᑕᒪᓐᓇ ᑖᑦᓱᒧᖓ ᑐᕌᖓᖕᒪᑦ. 19ᑍᒫᑦᓮᓐᓇᕐᑕᐅᖅ ᒎᑎᐅᑉ ᑐᓂᓯᕕᒋᔭᖏᑦ ᐊᒃᓱᐃᓐᓂᕐᒥᒃ ᐱᖃᕐᓂᕐᒥᒡᓗ ᖁᕕᐊᓱᒍᑎᖃᖁᕔᑦ, ᑐᓂᓯᕕᐅᓂᕐᒥᖕᓂᒡᓗ ᐃᓚᓕᐅᕐᓯᓗᓂ ᐊᒃᓱᕈᕐᓂᒃᑯᓗ ᓴᓇᔭᒥᓂᒃ ᖁᕕᐊᒋᔭᖃᕐᓗᓂ, ᑕᒪᓐᓇ ᒎᑎᐅᑉ ᑐᓂᕐᕈᑎᒋᖕᒪᒍ. 20ᐅᓪᓗᓂᒡᓗ ᐊᑐᕇᕐᑐᓂᒃ ᐃᓱᒪᖃᓗᐊᓐᖏᓚᖅ, ᒎᑎᐅᑉ ᐱᔭᒃᓴᖃᕐᑎᒻᒪᒍ ᐆᒻᒪᑎᖓᓗ ᖁᕕᐊᓱᒃᑎᒻᒪᒍ.
Currently Selected:
ᐃᓕᓯᒪᓃᑦ ᐃᒃᓖᓯᐊᓯᑏᔅ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
