ᒨᓯᓯ ᑕᓪᓕᒪᖏᑦ 32

1“ᕿᓚᐅᔪᑎᑦ ᑐᓵᓚᐅᕆᑦ, ᐅᖃᓪᓚᖕᓂᐊᕋᒪ;

ᓄᓇᕐᔪᐊᕐᓗ ᖃᓂᕐᒪ ᐅᖃᐅᓯᖏᓐᓂᒃ ᑐᓵᓚᐅᕐᓕ.

2ᐊᔪᕆᕐᑐᐃᑦᔪᑎᒋᔭᒃᑲ ᓯᓚᓗᒃᑎᑐᑦ ᑲᑕᒐᕐᓕᑦ,

ᐅᖃᐅᓯᒃᑲ ᖃᐅᓯᕐᑎᑦᓯᓗᑎᒃ ᒥᓂᔪᑎᑐᑦ,

ᓯᓚᓗᒃᑐᑎᑐᑦ ᐃᕕᒃᓱᒐᕐᓄᑦ ᐱᕈᕐᐸᓪᓕᐊᔪᓄᑦ,

ᒥᓂᔪᑎᑐᓪᓗ ᑍᒤᓐᓂᐊᕐᐳᑦ ᐃᕕᒐᕐᓄᑦ.

3ᐊᑕᓂᐅᑉ ᐊᑎᖓ ᐅᖃᐅᓯᕆᔪᒪᕙᕋ,

ᐅᓐᓂᕐᓯᐅᕈᑎᒋᓯᐅᒃ ᐊᑕᓂᐅᑉ ᐊᔪᖏᑦᑐᕐᔪᐊᖑᓂᖓ.

4ᕾᕐᑑᓪᓗᓂ, ᐱᓇᓱᐊᕐᓂᖓ ᐋᖅᑭᑦᓯᐊᕐᓯᒪᕗᖅ;

ᑖᑦᓱᒪ ᐱᓇᓱᐊᕐᑕᓕᒫᖏᑦ ᓈᒻᒪᓈᕐᓯᒪᑦᓯᐊᕐᐳᑦ.

ᒎᑎ ᓱᖁᓯᔪᐃᑦᑑᕗᖅ ᓈᒻᒪᓈᕐᓯᒪᖏᓐᓂᖃᕋᓂᓗ;

ᐃᓱᐊᕐᑐᕗᖅ ᓈᒻᒪᑦᓯᐊᕐᑑᓪᓗᓂᓗ.

5ᐃᒻᒥᖕᓂᒃ ᓱᒃᑯᑎᕐᓯᒪᕗᑦ; ᑖᑦᓱᒪᓗ ᕿᑐᕐᖓᕆᓐᖏᓔᑦ, ᐸᓯᔭᒃᓴᐅᒐᒥᒃ:

ᑭᖑᕚᖑᖃᑎᒌᑦ ᐊᔪᕐᑐᓕᕗᑦ ᐱᐅᖏᑦᑐᓕᔨᐅᓪᓗᑎᒡᓗ.

6ᑍᒫᒃ ᐊᑕᓂᖅ ᐊᑭᓂᐊᕐᕕᒋᕕᓯᐅᒃ?

ᓯᓔᑦᑑᔪᓯ ᑐᑭᖃᖏᑦᑐᓯᓗ ᐃᓅᔪᓯ.

ᑖᓐᓇ ᐊᑖᑕᒋᓐᖏᓚᓯᐅᒃ? ᑖᑦᓱᒪ ᓴᓇᓚᐅᓐᖏᓛᓰ?

ᑖᑦᓱᒪ ᐱᓐᖑᕐᑎᓚᐅᓐᖏᓛᓰ ᐃᓂᑖᕐᑎᓪᓗᓯᓗ?

7ᐅᓪᓗᓂᒃ ᐃᖅᑬᓚᐅᕆᑦᓯ ᑍᑦᓱᒪᓂᐅᓚᐅᕐᑐᓂᒃ;

ᐊᑖᑕᓯ ᐊᐱᕐᓱᓚᐅᕐᓯᐅᒃ ᖃᓄᐃᑦᑐᖃᓚᐅᕐᓯᒪᖕᒪᖔᑦ,

ᐊᖓᔪᖅᑳᓯᓗ ᐊᐱᕐᓱᓚᐅᕐᓯᐅᒃ ᑖᒃᑯᓇᓐᖓᑦ ᐅᖃᐅᑦᔭᐅᓂᐊᕋᑦᓯ.

8 # ᐋᐴᓯᑕᓖᑦ 17:26. ᖁᑦᓯᖕᓂᕐᐹᒍᔪᖅ ᐃᓅᖃᑎᒌᒡᔪᐊᓂᒃ ᓄᓇᑖᕐᑎᑦᓯᓕᕋᒥ;

ᐃᓅᖃᑎᒌᑦ ᓇᓂ ᓄᓇᖃᕐᑐᒃᓴᐅᖕᒪᖔᑕ ᐋᖅᑭᒃᓱᐃᓚᐅᕐᐳᖅ,

ᐃᓅᖃᑎᒌᒡᔪᐊᓪᓗ ᐊᑐᓂᑦ ᐊᖓᔪᖅᑳᖃᐅᕐᑎᓚᐅᕐᐰᑦ.

9ᔧᑰᓪᓕ ᑭᖑᕚᖏᑦ ᓇᖕᒥᓂᖅ ᓂᕈᐊᕆᓚᐅᕐᐰᑦ.

10ᑖᑦᓱᒪ ᓇᓂᓚᐅᕐᐹ ᐃᓄᖃᖏᑦᑐᒦᑎᓪᓗᒍ,

ᓱᓇᖃᖏᑦᑐᒥ, ᐊᓄᕌᖏᓐᓇᕐᑐᒥ ᐃᓄᖃᖏᑦᑐᒥ;

ᑖᑦᓱᒪ ᐊᕙᓗᓯᒪᓚᐅᕐᐹ ᓴᐳᑎᓯᒪᓪᓗᒍ ᑲᒪᒋᑦᓯᐊᕐᓗᒍᓗ,

ᓴᐳᑎᓯᒪᓚᐅᕐᐹ ᐃᒻᒥᓂᒃ ᓴᐳᑎᓯᒪᒐᔭᕐᓂᕐᒥᑐᑦ.

11ᓇᒃᑐᕋᓕᒃᑎᑐᑦ ᐱᐊᕋᕐᒥᓂᒃ ᖃᖓᑕᔭᕆᐅᕐᓮᔪᑎᑐᑦ, ᕿᑐᕐᖓᒥ ᖁᓛᓂ ᖃᖓᑕᔪᑎᑐᑦ,

ᐊᑖᓂᑦ ᐊᒃᑭᕐᓯᖃᑦᑕᕐᑐᑎᑐᑦ ᐃᓴᕈᕐᒥᓄᑦ ᐃᓵᖓᓪᓗᑎᒃ ᐋᓐᓂᖁᓇᒋᑦ.

12ᐊᑕᓂᐅᑉ ᓇᖕᒥᓂᖅ ᑕᓯᐅᓚᐅᕐᐹ,

ᓄᓇᖃᑎᑐᖃᕆᓐᖏᑕᑦᑕ ᒎᑎᖏᓐᓂᑦ ᐃᑲᔪᕐᑕᐅᓚᐅᕋᓂ.

13ᑖᑦᓱᒪ ᓄᓇᒃᑯᑦ ᐳᕐᑐᔪᑎᒍᑦ ᐃᖏᕐᕋᑎᓚᐅᕐᐹ,

ᐱᕈᕐᓰᕕᖕᒥᓗ ᐱᕈᕐᑐᓂᒃ ᓂᕿᖃᓚᐅᕐᐳᖅ;

ᐅᔭᖅᑲᓪᓗ ᐊᑯᓐᓂᖏᓐᓂᑦ ᐃᒍᑦᑍᑦ ᓰᕐᓇᐅᑎᖏᓐᓂᒃ ᓇᓂᓯᖃᑦᑕᓚᐅᕐᐳᖅ;

ᓇᐹᕐᑐᐃᓪᓗ ᐱᕈᕐᑐᖏᓐᓂᒃ ᐅᕐᓱᒃᓴᓕᖕᓂᒃ ᓇᓂᓯᖃᑦᑕᓚᐅᕐᐳᖅ ᐅᔭᕋᓛᓂᑦ.

14ᐃᒻᒧᒃᓯᐅᒐᖁᑎᖏᑦ ᒎᑦᓯᖁᑎᖏᓪᓗ ᐃᒻᒧᓕᐊᓘᓚᐅᕐᐳᑦ;

ᓰᐱᖁᑎᖏᑦ, ᐊᖑᓴᓪᓗᖁᑎᖏᓪᓗ, ᐃᒻᒧᒃᓯᐅᒐᖁᑎᖏᓪᓗ ᐹᓴᓂᒥ ᐱᐅᓂᕐᐹᖑᓚᐅᕐᐳᑦ ᖁᐃᓂᔫᓪᓗᑎᒃ,

ᓂᐊᖂᔭᒃᓴᖁᑎᖏᓪᓗ ᓯᖃᓪᓕᓯᒪᑦᓯᐊᓚᐅᕐᐳᑦ

ᐊᑦᔨᒌᖏᑦᑐᓂᒡᓗ ᕔᓂᖁᑎᖃᐅᑦᓯᐊᕐᓗᑎᒃ.

15ᔨᓱᕋᓐᓕ ᖁᐃᒃᓯᓚᐅᕐᐳᖅ, ᐊᑭᕋᕐᑐᓕᕐᓗᓂᓗ;

ᖁᐃᒃᓯᓚᐅᕐᐳᓯ ᓯᓕᒃᓯᓪᓗᓯ, ᒪᓂᖅᑲᑑᓕᕐᓗᓯᓗ;

ᖁᐃᒃᓯᓚᐅᕐᐳᑦ ᓂᕿᒃᓴᓂᒡᓗ ᑲᑎᑦᓯᓯᒪᔪᐊᓘᓪᓗᑎᒃ;

ᒎᑎᒥᒡᓕ ᐱᓐᖑᕐᑎᑦᓯᔨᒥᖕᓂᒃ ᕿᒤᓚᐅᕐᐳᑦ

ᒥᑕᐅᑎᒋᓪᓗᒍᓗ ᕾᕐᑐᖅ ᐱᐅᓕᔭᐅᕕᒃᓴᕆᔭᓂ.

16ᒎᑎᓐᖑᐊᓄᑦ ᓵᓐᓂᕐᒥᖕᓄᑦ ᐊᑕᓂᕐᒥᒃ ᓂᓐᖓᒃᓮᓪᓗᑎᒃ ᓯᖕᓇᑎᑦᓯᓚᐅᕐᐳᑦ;

ᓇᕐᕈᓇᕐᑐᓕᓂᕐᒥᖕᓄᑦ ᐊᑕᓂᕐᒥᒃ ᓂᓐᖓᒃᑎᑦᓯᓚᐅᕐᐳᑦ.

17 # 1 ᑯᕆᓐᑎ 10:20. ᐊᓂᕐᓂᕐᓗᖕᓄᑦ ᑐᓂᕐᕈᓯᖃᑦᑕᓚᐅᕐᐳᑦ ᒎᑎᒨᖏᑦᑐᖅ,

ᒎᑎᓄᑦ ᓯᕗᓕᕕᓂᖏᑕ ᖃᐅᔨᒪᓚᐅᓐᖏᑕᖏᓐᓄᑦ,

ᓄᑖᓄᑦ ᒎᑎᓄᑦ ᖃᐅᔨᒪᓚᐅᓐᖏᑕᒥᖕᓄᑦ,

ᒎᑎᓄᑦ ᓯᕗᓕᕕᓂᑦᓯ ᓈᓚᓚᐅᕐᓯᒪᓐᖏᑕᖏᓐᓄᑦ.

18ᐃᓱᒪᒋᔭᖃᓚᐅᓐᖏᓚᑎᑦ ᕾᕐᑐᒥᒃ ᐃᓕᖕᓂᒃ ᕿᑐᕐᖓᕐᑖᓚᐅᕐᑐᒥᒃ,

ᐳᐃᒍᓚᐅᕐᐳᑎᑦ ᒎᑎᒥᒃ ᐃᓕᖕᓂᒃ ᐃᕐᓂᐊᖑᑎᑦᓯᓯᒪᔪᒥᒃ.

19ᐊᑕᓂᐅᑉ ᑕᒪᓐᓇ ᑕᑯᒐᒥᐅᒃ ᓂᓐᖓᐅᒪᕕᒋᓕᓚᐅᕐᐰᑦ,

ᐃᕐᓂᖏᓪᓗ ᐸᓂᖏᓪᓗ ᑖᑦᓱᒥᖓ ᓂᓐᖓᒃᓮᖕᒪᑕ.

20ᐅᖃᕐᓗᓂᓗ, ‘ᐊᓚᕐᓂᐊᓕᕐᐸᒃᑲ,

ᖃᐅᔨᓴᕐᓂᐊᓕᕐᐸᒃᑲᓗ ᖃᓄᐃᓕᓛᕐᒪᖔᑕ,

ᑐᓵᖏᑦᑐᐊᓘᖕᒪᑕ ᑖᒃᑯᐊ ᑭᖑᕚᖑᖃᑎᒌᑦ,

ᕿᑐᕐᖎᑦ ᓱᖁᓯᔪᐃᑦᑑᔪᓐᓇᖏᑦᑐᑦ.

21 # 1 ᑯᕆᓐᑎ 10:22; ᕉᒪᒥᐅᓄᑦ 10:19. ᒎᑎᓐᖑᐊᖏᓐᓄᑦ ᓂᓐᖓᒃᑎᑕᐅᕗᖓ

ᓯᖕᓇᕗᖓ ᒎᑎᐅᓂᕋᕐᑕᖏᓐᓄᑦ ᓱᓕᖏᑦᑐᓄᑦ,

ᒎᑎᓪᓚᕆᐅᖏᑦᑐᓂᒃ ᒎᑎᖃᕋᓱᖕᒪᑕ.

ᑍᒤᒻᒪᑦ ᐃᓅᖃᑎᒌᒡᔪᐊᓂᒃ ᐊᑐᕐᓗᖓ ᓂᓐᖓᒃᓴᕐᓂᐊᕐᐸᒃᑲ;

ᐃᓅᖃᑎᒌᒡᔪᐊᓄᑦ ᓯᓔᑦᑐᓄᑦ ᓯᖕᓇᓕᕐᑎᓐᓂᐊᕐᐸᒃᑲ.

22ᓂᓐᖓᐅᓯᕋ ᐃᑯᒪᑎᑐᑦ ᐃᑯᐊᓪᓚᒃᑐᑎᑐᑦ ᑍᒤᓕᕐᐳᖅ,

ᓄᓇᕐᔪᐊᕐᒦᑦᑐᓕᒫᓂᒡᓗ ᐃᑯᐊᓪᓚᒃᑎᑦᓯᓂᐊᕐᐳᖅ.

ᐊᒡᓛᑦ ᓄᓇᕐᔪᐊᑉ ᐊᒃᐸᓯᖕᓂᖓᓃᑦᑐᑦ ᑎᑭᓪᓗᒋᑦ

ᖃᖅᑬᓪᓗ ᑐᓐᖓᕕᖏᑦ ᐊᒡᓛᑦ ᑎᑭᓪᓗᒋᑦ.

23ᐱᓂᕐᓗᒃᑕᐅᓇᕐᑐᓄᑦ ᐃᓱᓕᑦᓱᓐᓇᖏᑦᑐᓄᑦ ᑎᑭᑕᐅᑎᑦᓱᒪᕙᒃᑲ

ᖃᕐᔪᓕᒫᒃᑲᓗ ᐊᑕᖏᕐᓗᒋᑦ ᑖᒃᑯᓄᖓ ᓵᖓᓂᐊᕐᐳᑦ ᐊᓯᕈᕈᒪᓪᓗᒋᑦ;

24ᑐᖁᕋᕈᒫᕐᐳᑦ ᐱᕐᓕᕋᕐᓗᑎᒃ ᖃᓂᒪᓐᓇᕐᒧᓪᓗ ᐆᑎᕐᓇᕐᑐᒧᑦ;

ᑐᖁᕋᕈᒫᕐᐳᑦ ᖃᓂᒪᓐᓇᕐᑐᓄᑦ ᐱᐅᖏᑦᑐᐊᓗᖕᓄᑦ;

ᓂᕐᔪᑎᓄᑦ ᓄᔪᐊᕐᑐᓄᑦ ᐅᐸᒃᑐᕐᑕᐅᑎᑦᓱᒫᕐᐸᒃᑲ,

ᖁᒡᓗᒋᐊᓄᓪᓗ ᐹᕐᖑᕐᑐᓄᑦ ᑮᔭᐅᑎᓪᓗᒋᑦ.

25ᐃᒡᓗᖃᖏᑦᑐᓂ ᓴᕕᒡᔪᐊᒧᑦ ᑐᖁᕋᕐᑕᐅᔪᒫᕐᐳᑦ;

ᑲᑉᐱᐊᓇᕐᑐᓄᑦ ᑎᑭᑕᐅᔪᒫᕐᐳᑦ ᐊᖏᕐᕋᒥᖕᓂ,

ᑐᖁᕋᕐᑕᐅᔪᒫᕐᐳᑦ ᐃᓅᓱᒃᑐᑦ ᐊᖑᑎᑦ ᐅᐃᒡᒐᓱᐃᓪᓗ,

ᓄᑕᕋᓛᑯᓗᐃᑦ ᐊᒫᒪᒃᑐᑦ ᐃᓄᑐᕾᓪᓗ ᖃᑯᕐᑕᓂᒃ ᓄᔭᓖᑦ.

26ᐅᖃᕋᔭᓚᐅᕈᒪ, ᐅᖓᓯᒃᑐᒧᑦ ᓯᐊᒻᒪᕐᓕᑦ, ᐳᐃᒍᕐᑕᐅᒐᔭᕐᐳᑦ ᐃᓄᖕᓄᑦ.

27ᐊᑭᕋᕐᑐᕐᑎᖏᑦ ᐱᐅᔪᕆᓂᐊᕋᓱᒋᖏᒃᑯᒃᑭᑦ ᑍᒤᓕᐅᕋᔭᕐᐳᖓ,

ᐊᑭᕋᖏᑦ ᓱᓕᖏᑦᑐᒥᒃ ᐅᖃᐅᓯᖃᕐᓂᐅᓴᖏᑉᐸᑕ,

ᐅᖃᓕᖁᓇᒋᑦ, ᐱᔪᓐᓇᕐᓂᑦᑎᓐᓄᑦ ᓵᓚᖃᕐᐳᒍᑦ ᐊᑕᓂᖅ ᐃᑲᔪᕐᑎᒋᓇᒍ ᓵᓚᖃᕐᐳᒍᑦ.’

28ᐃᓴᕆᐊᓕᒥᐅᑦ ᐃᓅᖃᑎᒌᒡᔪᐊᖑᕗᑦ ᓯᓚᑐᓂᖃᕋᑎᒃ,

ᑐᑭᓯᔪᓐᓇᕋᑎᒡᓗ.

29ᓯᓚᑐᒍᑎᒃ ᑕᒪᑐᒥᖓ ᖃᐅᔨᒐᔭᕐᐳᑦ,

ᓱᖕᒪᑦ ᑍᒤᑦᑐᒦᓕᕐᒪᖔᕐᒥᒃ ᑐᑭᓯᒐᔭᕐᐳᑦ.

30ᖃᓄᖅ ᐊᑕᐅᓯᕐᒧᑦ 1,000 ᕿᒫᑎᑕᐅᔪᓐᓇᕐᐹᑦ?

ᖃᓄᕐᓗ ᒪᕐᕉᖕᓄᑦ 10,000 ᕿᒫᑎᑕᐅᔪᓐᓇᕐᐸᑦ?

ᕾᕐᑑᑉ ᐱᔪᓐᓇᕐᑎᑦᓯᔨᖏᑕ ᕿᒪᒃᓯᒪᒃᐸᒋᑦ,

ᐊᑕᓂᐅᓪᓗ ᖁᔭᓈᕐᓯᒪᓕᕐᐸᒋᑦ ᑭᓯᐊᓂ.

31ᕾᕐᑐᖓᑦ ᕾᕐᑐᖁᑎᑦᑎᑐᑦ ᑍᒤᓐᖏᓚᖅ, ᐊᑭᕋᕐᑐᕐᑎᖏᑦ ᑍᒫᒃ ᐃᓱᒪᖃᕐᐳᑦ.

32ᐊᑭᕋᕐᑐᕐᑎᖏᑦ, ᐱᐅᖏᑦᑐᐊᓘᕗᑦ ᓱᑑᒪᒥᐅᑎᑐᑦ ᒍᒨᕋᒥᐅᓪᓗ ᐱᕈᕐᓰᕕᖏᑎᑐᑦ;

ᐸᐅᕐᖓᖏᑦ ᕔᓂᒃᓮᑦ ᑐᖁᓐᓇᕐᐳᑦ,

ᐸᐅᕐᖎᓪᓗ ᕔᓂᒃᓮᑦ ᑲᑎᓐᖓᔪᑦ ᖃᓯᓕᓇᕐᐳᑦ,

33ᕔᓂᖁᑎᖏᑦ ᖁᒡᓗᒋᐊᑦ ᑐᖁᓐᓇᕐᑐᖏᑎᑐᑦ ᑍᒤᑉᐳᑦ,

ᖁᒡᓗᒋᐊᓪᓗ ᑐᖁᓐᓇᕐᑐᖏᑕ ᐃᒪᖏᑎᑐᑦ ᑍᒤᑦᑑᓪᓗᑎᒃ.

34ᐊᑕᓂᐅᑉ ᐃᖅᑲᐅᒪᕔᑦ ᐊᑭᕋᕐᑐᑎᖏᑦ

ᐅᑕᖅᑭᓪᓗᓂ ᐱᕕᒃᓴᒥᒃ ᓈᒻᒪᓇᕐᑐᒥᒃ ᓱᒋᐊᕐᓯᕕᒃᓴᒥᓂᒃ ᑖᒃᑯᓂᖓ.

35 # ᕉᒪᒥᐅᓄᑦ 12:19; ᐄᑉᕈᐃᓄᑦ 10:30. ᐊᑭᓂᐊᕐᓂᖅ ᐱᒋᕙᕋ, ᐊᑭᒪᓂᕐᓗ,

ᐹᓪᓚᒡᕕᒃᓴᖓᑦ ᓇᓪᓕᐅᑎᓕᕐᐳᖅ;

ᐊᓯᕈᕐᑕᐅᓂᒃᓴᖓᑕᓗ ᐅᓪᓗᖓ ᑎᑭᓕᕐᐳᖅ,

ᐊᓯᕈᕐᑕᐅᕕᒃᓴᖓᑦ ᐊᑯᓂᐅᔪᓐᓃᕐᐳᖅ.

36 # ᐃᓐᖏᕈᑦ 135:14. ᐊᑕᓂᐅᑉ ᐃᓄᖁᑎᓂ ᓴᐳᑎᓂᐊᕐᒪᒋᑦ

ᐱᔨᓂ ᓈᒃᑭᒋᓂᐊᕐᒪᒋᑦ,

ᐱᔪᓐᓇᕐᓂᖃᖏᑦᑐᑦ ᑕᑯᓕᕈᓂᒋᑦ,

ᓇᓪᓕᐊᓪᓘᓐᓃᑦ, ᐱᔨᐅᒐᓗᐊᕐᐸᑦ ᐱᔨᐅᖏᒃᑲᓗᐊᕐᐸᓪᓘᓐᓃᑦ.

37ᑕᕝᕙ ᐊᑕᓂᖅ ᐅᖃᕈᒫᕐᐳᖅ, ‘ᓇᐅᒡᓕ ᒎᑎᖏᑦ, ᕾᕐᑐᖏᑦ ᑕᑎᒋᓚᐅᕐᑕᖏᑦ?

38ᓂᕆᑎᖃᑦᑕᓚᐅᕐᐱᓯᐅᒃ ᖁᐃᓂᔪᓂᒃ ᑐᓂᕐᕈᓯᕐᕕᒋᓪᓗᒋᑦ,

ᕔᓂᒥᒡᓗ ᐃᒥᕐᑎᖃᑦᑕᕐᓗᒋᑦ ᑐᓂᕐᕈᑎᑦᓯᓐᓄᑦ?

ᒫᓐᓇ ᒪᑭᓪᓗᑎᒃ ᑖᒃᑯᓇᓐᖓᑦ ᐃᑲᔪᕐᑕᐅᓕᕆᑦᓯ;

ᓴᐳᑦᔨᔨᒋᓕᕐᓯᐅᒃ!

39ᒫᓐᓇ ᑕᑯᓕᕆᑦᓯ ᐅᕙᖓᐅᒐᒪ, ᑖᓐᓇᑐᐊᑦᓯᐊᖑᓪᓗᖓ ᒎᑎᐅᒐᒪ;

ᐊᓯᓐᓂᒃ ᓴᓂᒃᑯᑦ ᒎᑎᑕᖃᓐᖏᓚᖅ;

ᑐᖁᑦᓯᕙᒡᓗᖓ ᐃᓅᑎᑦᓯᕙᒃᐳᖓ;

ᐃᑭᓕᕐᑎᑦᓯᓲᖑᓪᓗᖓᓗ ᒪᒥᑎᑦᓯᕙᒃᐳᖓ,

ᑭᓇᓘᓐᓃᑦ ᐱᔪᓐᓇᕐᓂᓐᓂᒃ ᕿᒫᔪᓐᓇᓐᖏᓚᖅ.

40ᐊᒡᒐᒃᑲ ᖁᒻᒧᑦ ᐃᓵᒡᓗᒋᑦ,

ᐅᖃᕕᒡᓗᖓ ᐊᖏᒻᒪᕆᒃᐳᖓ, ᐃᓅᒐᒪ ᐃᓱᖃᖏᑦᑐᒧᑦ,

41ᓴᕕᒡᔪᐊᕋ ᕿᓪᓚᕆᒃᑐᖅ ᐃᐱᒃᓴᕈᒃᑯ,

ᑎᒍᒥᐊᓕᕐᓗᖓᓗ ᐃᖅᑲᕐᑐᐃᓂᕐᒧᑦ,

ᐊᑭᕋᕐᑐᕐᑎᒃᑲ ᐊᑭᓂᐊᕐᕕᒋᓂᐊᕐᐸᒃᑲ

ᓱᒋᐊᕐᓂᐊᕐᓗᒋᓪᓗ ᐅᕙᓐᓂᒃ ᐆᒥᓱᒃᑐᑦ.

42ᖃᕐᔪᒃᑲ ᐊᐅᖏᓐᓂᒃ ᑯᑐᖕᓂᐊᕐᐳᑦ,

ᓴᕕᒡᔪᐊᕋᓗ ᐅᕕᓂᖏᓐᓂᒃ ᑲᐳᕅᓂᐊᕐᐳᖅ.

ᑐᖁᔪᑦ ᐊᐅᖏᓐᓂᒃ ᑎᒍᔭᐅᔪᓪᓗ;

ᓄᔭᖅᑯᕐᑐᔪᑦ ᓂᐊᖁᖏᓐᓂᑦ ᐊᑭᕋᓐᓂᑦ.’

43 # ᕉᒪᒥᐅᓄᑦ 15:10; ᑕᑯᑎ 19:2. ᓂᕐᑐᕐᓯᐅᒃ ᑖᑦᓱᒪ ᐃᓄᖁᑎᖏᑦ, ᐃᓅᖃᑎᒌᒡᔪᐊᖑᔪᓯ;

ᓴᐳᑎᖕᒪᒋᑦ ᐱᔨᒥ ᐊᐅᖏᑦ,

ᐊᑭᕋᕐᑐᕐᑎᓂ ᐊᑭᓂᐊᕐᕕᒋᖕᒪᒋᑦ,

ᐃᓄᖁᑎᒥ ᓄᓇᖓ ᓴᓗᒻᒪᕐᓴᕐᒪᒍ.”

44ᒨᓯᓯᓕ ᕾᒐᒥ ᐃᓐᖏᕈᓯᐅᑉ ᐅᖃᐅᓯᓕᒪᖏᑦ ᐊᑐᐊᓚᐅᕐᐰᑦ ᐃᓄᐃᑦ ᑐᓵᑎᓪᓗᒋᑦ, ᔮᓱᐊ ᓈᓂᐅᑉ ᐃᕐᓂᖓ ᐊᑐᐊᕐᓯᖃᑎᒋᓪᓗᒍ.

ᒨᓯᓯᐅᑉ ᑭᖑᓪᓕᕐᐹᒥᒃ ᐅᖃᐅᑦᔪᐃᑦᔪᑎᖏᑦ

45ᒨᓯᓯᐅᓪᓕ ᑕᒪᒃᑯᐊ ᐅᖃᐅᓰᑦ ᐅᖃᐅᓯᕆᔭᕇᕋᒥᒋᑦ ᐃᓴᕆᐊᓕᒥᐅᓕᒪᓄᑦ, 46ᐃᓄᖕᓄᑦ ᐅᖃᕐᐳᖅ, “ᐆᒻᒪᑎᑦᓯᓐᓄᑦ ᑐᖅᑯᕐᓯᐅᒃ ᐅᖃᐅᓯᓕᒫᑦ ᐅᖃᐅᓯᕆᔭᒃᑲ, ᒪᓕᒃᑕᒃᓴᕆᕙᓯ ᐅᓪᓗᒥ ᐃᓕᑦᓯᓐᓄᑦ ᐅᖃᐅᓯᕆᓯᒪᔭᒃᑲ, ᕿᑐᕐᖓᑦᓯᓐᓄᑦ ᐊᔪᕆᕐᑐᐃᑦᔪᑎᒋᔭᒃᓴᕆᕙᓯ, ᑖᒃᑯᐊᑦᑕᐅᖅ ᑲᒪᑦᓯᐊᕐᓗᑎᒃ ᒪᓕᖁᓪᓗᒋᑦ ᐱᖁᔧᑦ ᐅᑯᐊ ᐅᖃᐅᓯᓕᒫᖏᓐᓂᒃ. 47ᐅᑯᐊ ᐊᔪᕆᕐᑑᓰᑦ ᐅᖃᐅᓯᑐᐃᓐᓇᐅᖏᒻᒪᑕ, ᐃᓅᓯᑦᓯᓐᓂᒡᓕ ᐱᑦᔪᑎᖃᕐᐳᑦ, ᐊᑯᓂ ᐃᓅᖁᓪᓗᓯ ᓄᓇᒥ ᔪᐊᕐᑕᓂᐅᑉ ᐊᑭᐊᓂ ᓄᓇᑖᕆᔪᒫᓕᕐᑕᑦᓯᓐᓂ.”

48 # ᒨᓯᓯ ᓯᑕᒪᖏᑦ 27:12-14; ᒨᓯᓯ ᑕᓪᓕᒪᖏᑦ 3:23-27. ᐅᓪᓗᒥ ᑖᑦᓱᒪᓂᑦᓮᓐᓇᖅ ᐊᑕᓂᐅᑉ ᒨᓯᓯ ᐅᖃᐅᑎᕚ, 49“ᖃᖅᑲᒧᑦ ᐊᐸᕅᒧᑦ ᒪᔪᕋᕆᑦ, ᖃᖅᑲᒧᑦ ᓂᐴᒧᑦ, ᒧᐊᐱᒦᑦᑐᒧᑦ, ᐃᒡᓗᒐᓮᑦ ᔨᕆᑰᑉ ᐊᑭᐊᓃᑦᑐᒧᑦ; ᑕᕝᕙᓐᖓᑦ ᑬᓇᓂᐅᑉ ᓄᓇᖓ ᑕᑯᓂᐊᕋᕕᐅᒃ ᐃᓴᕆᐊᓕᒥᐅᓄᑦ ᑐᓂᓂᐊᕐᑕᕋ ᓄᓇᑖᕆᔭᐅᖁᓪᓗᒍ. 50ᑕᕝᕙᓂ ᖃᖅᑲᒥ ᑐᖁᓂᐊᕋᕕᑦ ᒪᔪᕋᕐᕕᒋᔭᕐᓂ, ᐊᖓᔪᐃᑦ ᐂᕉᓂ ᑐᖁᓚᐅᕐᒪᑦ ᖃᖅᑲᒥ ᕼᐅᕆᒥ ᓯᕗᓕᕕᓂᓂ ᐃᓚᒋᓪᓗᒋᑦ; 51ᑕᒪᑦᓯᒃ ᐅᕙᓐᓄᑦ ᓱᖁᓯᔪᐃᑦᑑᓚᐅᖏᓐᓇᑦᓯᒃ ᐃᓴᕆᐊᓕᒥᐅᑦ ᑕᒃᑯᐊᓐᓂ, ᒥᕆᐸᑦ-ᑲᑏᔅ ᐃᒪᖓᑕ ᖃᓂᒋᔮᓂ ᐃᓄᖃᖏᑦᑐᒥ ᔨᓐᒥ, ᐃᓄᐃᑦ ᓵᖏᓐᓂ ᐅᕙᓐᓂᒃ ᐅᐱᓐᓇᕐᑎᑦᓯᓚᐅᖏᓐᓇᕕᑦ. 52ᓄᓇᓕ ᐅᖓᓯᒋᔮᓂᑦ ᑕᑯᓂᐊᕐᐸᑦ, ᐃᓴᕆᐊᓕᒥᐅᓄᑦ ᑐᓂᓂᐊᕐᑕᕋ ᑕᕝᕗᖓᓕ ᓄᓇᒧᑦ ᐃᑎᕐᓂᐊᓐᖏᓚᑎᑦ.”

Currently Selected:

ᒨᓯᓯ ᑕᓪᓕᒪᖏᑦ 32: EAIB

Highlight

Copy

Compare