ᒨᓯᓯ ᑕᓪᓕᒪᖏᑦ 31
31
ᔮᓱᐊᑉ ᒨᓯᓯᒧᑦ ᑭᖑᕝᕕᐅᑎᓂᖓ
1ᒨᓯᓯ ᐃᓴᕆᐊᓕᒥᐅᓄᑦ ᓱᓕ ᑲᔪᓯᓪᓗᓂ ᐅᖃᓪᓚᓚᐅᕐᐳᖅ, 2#ᒨᓯᓯ ᓯᑕᒪᖏᑦ 20:12.ᐅᖃᕐᓗᓂᓗ, “ᒫᓐᓇ ᐊᕐᕌᒍᖃᓕᕋᒪ 120ᓂᒃ; ᐊᔪᓕᓕᕐᐳᖓ ᐊᓂᖃᑦᑕᕆᐊᒃᓴᖅ ᐃᑎᖃᑦᑕᕆᐊᒃᓴᕐᓗ, ᐊᑕᓂᐅᓪᓗ ᐅᖃᐅᑎᓚᐅᕐᐹᖓ ᔪᐊᕐᑕᓂᒥᒃ ᐃᑳᕐᓂᐊᖏᓐᓂᕋᕐᓗᖓ. 3ᐊᑕᓂᕐᓕ ᒎᑎᓯ ᓯᕗᓂᑦᓯᓐᓃᓐᓂᐊᕐᐳᖅ ᑕᒫᓂᓗ ᓄᓇᖃᕐᑐᑦ ᐃᓅᖃᑎᒌᒡᔪᐊᑦ ᓄᖑᑎᑦᓱᒫᕐᐰᑦ, ᓄᓇᖏᓐᓂᒃ ᓄᓇᑖᖔᖁᓪᓗᓯ; ᔮᓱᐊᓗ ᑕᓯᐅᕐᑎᒋᓂᐊᕐᐸᓯ, ᐊᑕᓂᖅ ᑍᒫᒃ ᐅᖃᕐᓯᒪᖕᒪᑦ. 4#ᒨᓯᓯ ᓯᑕᒪᖏᑦ 21:21-35.ᐊᑕᓂᐅᑉ ᐃᓄᐃᑦ ᑖᒃᑯᐊ ᓄᖑᓐᓂᐊᕐᐰᑦ, ᑍᒫᑦᓮᓐᓇᖅ ᓵᓚᒋᓚᐅᕐᒪᒋᒃ ᐊᖓᔪᖅᑳᕐᔪᐊᒃ ᓮᕼᐆᓂ ᐊᒻᒪᓗ ᐋᒡ ᐊᒧᕅᑎᒥᐅᑦ ᐊᖓᔪᖅᑳᕐᔪᐊᖏᒃ, ᓄᓇᒋᔭᖏᒡᓗ, ᑖᒃᑯᐊᒡᓗ. 5ᐊᑕᓂᐅᓪᓗ ᓵᓚᖃᕐᑎᑦᓱᒫᕐᐹᓯ ᑖᒃᑯᓂᖓ, ᐱᓇᓱᐊᕐᕕᒋᔭᒃᓴᕆᕙᓯᓗ ᐱᖁᔨᑦᔪᑎᒋᓯᒪᔭᒃᑲ ᐃᓕᑦᓯᓐᓄᑦ ᒪᓕᑦᓯᐊᕐᓗᒋᑦ. 6ᓴᓐᖏᔫᓕᕆᑦᓯ ᓯᕘᕋᖏᓪᓗᓯᓗ, ᓯᕘᕋᒋᔭᒃᓴᕆᓐᖏᓚᓯ ᑲᑉᐱᐊᒋᓇᒋᓪᓗ, ᐊᑕᓂᐅᑉ ᒎᑎᑦᓯ ᐃᓚᒋᓂᐊᕐᒪᓯ, ᓴᒡᓗᕿᓐᓂᐊᖏᒻᒪᓯ ᕿᒪᖕᓂᐊᕐᓇᓂᓯᓗ.”
7ᑕᕝᕙ ᒨᓯᓯᐅᑉ ᔮᓱᐊ ᕾᖁᕚ, ᐅᖃᐅᑎᓪᓗᒍᓗ ᐃᓄᓕᒫᑦ ᐃᓴᕆᐊᓕᒥᐅᑦ ᑐᓵᑎᓪᓗᒋᑦ, “ᓴᓐᖏᔫᓕᕆᑦ ᓯᕘᕋᔪᐃᓪᓗᑎᓪᓗ; ᐃᕝᕕᐅᒐᕕᑦ ᑕᓯᐅᕐᓯᔪᒃᓴᐅᔪᑎᑦ ᐅᑯᓂᖓ ᐃᓄᖕᓂᒃ ᓄᓇᒥᒃ ᓄᓇᑖᕆᐊᕐᑐᓕᕐᑎᓪᓗᒋᑦ ᐊᑕᓂᐅᑉ ᐅᖃᕕᒡᓗᓂ ᐊᖏᕈᑎᒋᓯᒪᓚᐅᕐᑕᖓᓂᒃ ᓯᕗᓕᕕᓂᖏᓐᓄᑦ, ᓄᓇᑖᕆᓂᐊᕐᑕᖏᓐᓄᓪᓗ ᑕᓯᐅᕐᑕᒃᓴᕆᕙᑎᑦ. 8#ᔮᓱᐊ 1:5; ᐄᑉᕈᐃᓄᑦ 13:5.ᐊᑕᓂᖅ ᓯᕗᓂᕐᓃᓐᓂᐊᕐᐳᖅ ᐃᓚᒋᓂᐊᕐᐹᑎᓪᓗ, ᓴᒡᓗᕿᓐᓂᐊᖏᒻᒪᑎᑦ ᕿᒪᖕᓂᐊᕐᓇᑎᓪᓗ, ᑍᒤᒻᒪᑦ ᓯᕘᕋᑦᑍᓕᒋᑦ ᓴᐱᓕᕐᑍᓕᓗᑎᓪᓗ.”
ᐱᑯᔧᑦ ᐊᕐᕌᒍᑦ 7 ᐊᓂᒍᕌᖓᑕ ᑕᒫᑦ ᐊᑐᐊᕐᑕᐅᖃᑦᑕᕐᑐᒃᓴᐅᕗᑦ
9ᒨᓯᓯᐅᓪᓗ ᐱᖁᔧᑦ ᑎᑎᕋᓚᐅᕐᐰᑦ ᑐᓂᓪᓗᒋᓪᓗ ᓕᕔᑎᓄᑦ ᑐᓂᕐᕈᓯᕐᑎᑦᓯᔨᓄᑦ, ᑖᒃᑯᐊ ᐊᒡᔭᕐᓯᔨᐅᖕᒪᑕ ᐊᑕᓂᐅᑉ ᐊᖏᖃᑎᒌᒍᑎᖏᑕ ᐃᒃᓯᕐᕕᖓᓂᒃ, ᐃᓴᕆᐊᓕᒥᐅᓪᓗ ᐊᖓᔪᖅᑳᖏᓐᓄᑦ. 10#ᒨᓯᓯ ᑕᓪᓕᒪᖏᑦ 15:1,2; ᒨᓯᓯ ᑕᓪᓕᒪᖏᑦ 16:13-15.ᐱᖁᔨᓪᓗᓂᓗ ᐅᖃᐅᑎᕔᑦ, “ᐊᕐᕌᒍᑦ 7 ᐊᓂᒍᕌᖓᑕ ᑕᒫᑦ, ᐊᑭᓕᒃᓴᕆᔭᐅᔪᑦ ᓄᖑᑎᑕᐅᓂᖏᑕ ᓇᓪᓕᐅᓐᓂᖓ ᓇᓪᓕᐅᑎᔭᕌᖓᑦ, ᑐᐱᕐᒥᒃ ᐊᖏᕐᕋᖃᖃᑦᑕᕐᓂᕕᓂᕐᒥᖕᓂᒃ ᓇᓪᓕᐅᓐᓂᕐᓯᐅᓕᕌᖓᑕ. 11ᐊᑐᐊᕐᑕᐅᖃᑦᑕᕐᑐᒃᓴᐅᕗᑦ ᐃᓴᕆᐊᓕᒥᐅᑦ ᐃᓄᖏᓐᓄᑦ ᑐᒃᓯᐊᕆᐊᕐᑐᕐᓯᒪᑎᓪᓗᒋᑦ ᐊᑕᓂᕐᒧᑦ ᒎᑎᑦᓯᓐᓄᑦ ᑐᒃᓯᐊᕐᕕᐅᕙᒃᑐᒥ ᑲᑎᖃᑦᑕᕐᕕᖕᒥ. 12ᐃᓄᐃᑦ ᕾᖁᔭᒃᓴᕆᕙᓯ ᐊᖑᑎᑦ, ᐊᕐᓁᓪᓗ, ᓄᑕᕅᓪᓗ, ᓄᓇᖃᕐᑐᑐᖃᐅᖏᑦᑐᓪᓗ ᓄᓇᑦᓯᓐᓃᑦᑐᑦ, ᐃᓄᓕᒫᑦ ᑐᓴᖁᓪᓗᒋᑦ ᑐᑭᓯᖁᓪᓗᒋᓪᓗ ᐊᑕᓂᕐᒥᒃ ᒎᑎᑦᓯᓐᓂᒃ ᐃᓕᕋᓱᒍᓐᓇᖁᓪᓗᒋᑦ, ᑲᒪᑦᓯᐊᕐᓗᑎᒡᓗ ᒪᓕᒍᓐᓇᖁᓪᓗᒋᑦ ᐱᖁᔧᑦ ᐅᖃᐅᓯᓕᒫᖏᓐᓂᒃ. 13ᕿᑐᕐᖓᖏᓪᓗ ᑖᒃᑯᓂᖓ ᖃᐅᔨᓚᐅᕐᓯᒪᖏᑦᑐᑦ, ᑐᓴᕐᓂᐊᕐᒪᑕ ᐃᓕᓐᓂᐊᕐᓗᑎᒡᓗ ᐃᓕᕋᓱᖕᓂᕐᒥᒃ ᐊᑕᓂᕐᒥᒃ ᒎᑎᑦᓯᓐᓂᒃ, ᑍᒪᓐᖓᑦ ᓄᓇᒥ ᓄᓇᖃᕐᓂᓕᒫᒥᖕᓂ ᑕᒫᓂ ᓄᓇᑖᕆᓂᐊᓕᕐᑕᑦᓯᓐᓂ ᔪᐊᕐᑕᓂᐅᑉ ᐊᑭᐊᓃᑦᑐᒥ.”
ᐊᑕᓂᐅᑉ ᑭᖑᓪᓕᕐᐹᒥᒃ ᒨᓯᓯᒧᑦ ᐱᖁᔨᓂᖓ
14ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᑕᑯᒋᑦ, ᐅᓪᓗᖅ ᐃᓅᔪᓐᓃᕐᕕᒃᓮᑦ ᖃᒡᓕᕗᖅ; ᔮᓱᐊ ᕾᖁᓚᐅᕈᒃ, ᐅᕗᖓ ᑐᐱᕐᒧᑦ ᑲᑎᒪᕕᖕᒧᑦ ᐃᑎᕐᓗᓯᒃ, ᐱᔭᒃᓴᖏᓐᓂᒃ ᑎᓕᓂᐊᕋᒃᑯ.” ᑕᕝᕙ ᒨᓯᓯᒃᑯᒃ ᔮᓱᐊᒃᑯᒃ ᑐᐱᕐᒧᐊᕐᐴᒃ, 15ᐊᑕᓂᐅᓪᓗ ᓴᖅᑭᕝᕕᒋᕚᒃ ᓄᕗᔭᒦᓪᓗᓂ ᖁᒻᒧᑦ ᑕᑭᔪᑯᑖᒥ ᑐᐱᐅᓪᓗ ᐃᑎᕐᑕᕐᕕᐊᑕ ᓴᓂᐊᓂ ᓇᐸᓕᕐᓱᓂ.
16ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ: “ᑕᑯᒋᑦ, ᐊᑯᓂᐅᖏᑦᑐᖅ ᑐᖁᓂᐊᓕᕋᕕᑦ ᓯᕗᓕᕕᓂᕐᑎᑦ ᐃᓚᒋᓕᕐᓗᒋᑦ; ᑭᖑᓂᕐᓂ ᐃᓄᐃᑦ ᐅᕙᓐᓂᒃ ᐊᓯᓐᓂᐊᓕᕈᒫᕐᐳᑦ ᐊᖏᖃᑎᒌᒍᑎᒋᓚᐅᕐᑕᕗᓪᓗ ᓯᖁᒥᑕᐅᔪᒫᕐᐳᑦ, ᐅᕙᓐᓂᒃ ᕿᒤᓗᑎᒃ ᐅᒃᐱᖏᑦᑐᑦ ᒎᑎᓐᖑᐊᖏᓐᓄᑦ ᑕᒫᓂ ᓄᓇᑖᕆᓂᐊᓕᕐᑕᖏᑕ ᐃᓄᖏᓐᓂᒃ ᒪᓕᒃᓴᕐᓗᑎᒃ ᑐᒃᓯᐊᖃᑦᑕᓕᕈᒫᕐᐳᑦ. 17ᑕᒪᓐᓇ ᐊᑐᓕᕐᐸᑦ, ᑕᕝᕙ ᓂᓐᖓᒃᕕᒋᔪᒫᕐᐸᒃᑲ; ᕿᒪᒍᒫᕐᐸᒃᑲᓗ ᐊᓚᕐᓗᒋᑦ, ᑕᕝᕙ ᓄᖑᑕᐅᔪᒫᕐᐳᑦ; ᐅᓄᕐᑐᓄᑦ ᐱᓂᕐᓗᖕᓇᕐᑐᓄᑦ ᐊᑲᐅᖏᑦᑐᓄᓪᓗ ᑎᑭᑕᐅᔪᒫᕐᐳᑦ, ᑕᕝᕙ ᐅᖃᓕᕈᒫᕐᐳᑦ, ‘ᒪᑯᐊ ᐱᐅᖏᑦᑐᑦ ᐅᕙᑦᑎᓐᓄᑦ ᑎᑭᑉᐳᑦ ᒎᑎᐅᑉ ᐃᓚᒋᔪᓐᓃᕐᒪᑎᒎᑦ?’ 18ᑕᒪᓐᓇ ᓇᓪᓕᐅᑎᒃᐸᑦ ᓱᓕᓗᖓ ᐊᓚᕈᒫᕐᐸᒃᑲ, ᐱᐅᖏᑦᑐᓂᖏᑦ ᒎᑎᓐᖑᐊᓄᑦ ᐊᓯᓐᓄᑦ ᓵᓐᖓᓕᕐᓂᖏᑦ ᐱᑦᔪᑎᒋᓗᒋᑦ.
19“ᒫᓐᓇᓕ ᑍᒤᒻᒪᑦ, ᐅᓇ ᐃᓐᖏᕈᓯᖅ ᑎᑎᕋᕐᑕᒃᓴᕆᕙᑦ, ᐃᓕᓐᓂᐊᕐᑎᑦᓯᑦᔪᑎᒋᓗᒍᓗ ᐃᓴᕆᐊᓕᒥᐅᓄᑦ; ᓇᓗᓁᕐᓯᓂᐊᕐᒪᑦ ᑖᒃᑯᓂᖓ ᓈᒻᒪᒃᓴᖏᓐᓂᓐᓂᒃ. 20ᓄᓇᒧᑦ ᑕᓯᐅᕐᓂᐊᕐᐸᒃᑲ ᓄᓇᑖᖁᓪᓗᒋᑦ ᐊᔪᕐᓴᕐᓇᖏᑦᑐᒧᑦ ᓂᕿᒃᓴᖃᑦᓯᐊᕐᑐᒧᓪᓗ, ᑕᒪᓐᓇ ᐅᖃᕕᒃᓗᖓ ᐊᖏᕈᑎᒋᓯᒪᒐᒃᑯ ᓯᕗᓕᕆᓚᐅᕐᑕᖏᓐᓄᑦ, ᑕᕝᕙᓂ ᓂᕆᓯᒪᓕᕐᐸᑕ ᐊᕿᐊᑦᑐᕐᓗᑎᒃ ᖁᐃᒃᓯᓪᓗᑎᒡᓗ, ᐊᓯᓐᓄᑦ ᒎᑎᓐᖑᐊᓄᑦ ᓵᖔᓕᕈᒫᕐᐳᑦ ᐱᔨᑦᓯᓕᕐᓗᒋᑦ, ᐅᕙᓐᓂᒃ ᖁᔭᓈᕐᓯᔪᒫᕐᐳᑦ ᐊᖏᖃᑎᒌᒍᑎᒋᓯᒪᔭᒃᑲᓗ ᓯᖁᒥᓪᓗᒋᑦ, 21ᑕᕝᕙ ᐱᓂᕐᓗᖕᓇᕐᑐᓄᑦ ᐊᑲᐅᖏᑦᑐᑎᓄᓪᓗ ᐅᓄᕐᑐᓄᑦ ᑎᑭᑕᐅᔪᒫᕐᐳᑦ, ᑖᑦᓱᒪ ᐃᓐᖏᕈᓯᐅᑉ ᓵᓐᖓᔪᒫᕐᐰᑦ ᓇᓗᓁᕐᓯᓗᓂ ᑖᒃᑯᓂᖓ ᑖᓐᓇ ᐳᐃᒍᕐᑕᐅᓂᐊᖏᒻᒪᑦ ᑭᖑᕚᖏᑕ ᖃᓂᖏᓐᓂᑦ ᖃᐅᔨᒪᒐᒪ ᖃᓄᐃᓕᐅᕋᓱᐊᕐᑕᖏᑦ ᐋᖅᑭᒃᐸᓪᓕᐊᖕᒪᑕ, ᓱᓕ ᑎᑭᑎᓚᐅᖏᒃᑲᓗᐊᕐᓗᑎᒃ ᓄᓇᒧᑦ ᐊᖏᕈᑎᒋᓯᒪᔭᓐᓄᑦ ᑐᓂᓂᐊᕐᓂᕋᕐᓗᒍ ᑖᒃᑯᓄᖓ.”
22ᑕᕝᕙᓂ ᐅᓪᓗᒥᑦᓮᓐᓇᖅ ᒨᓯᓯᐅᑉ ᐃᓐᖏᕈᓯᖅ ᑎᑎᕋᓚᐅᕐᐹ ᐃᓴᕆᐊᓕᐅᒥᓄᓪᓗ ᐃᓕᓐᓂᐊᕐᑎᑦᓯᑦᔪᑎᒋᓪᓗᓂᐅᒃ.
23 #
ᒨᓯᓯ ᓯᑕᒪᖏᑦ 27:23; ᔮᓱᐊ 1:6. ᑕᕝᕙ ᐊᑕᓂᖅ ᔮᓱᐊᒧᑦ ᐅᖃᓕᕐᐳᖅ ᓈᓂᐅᑉ ᐃᕐᓂᖓᓄᑦ ᐅᖃᐅᑎᓪᓗᒍᓗ, “ᓴᓐᖏᔫᓕᕆᑦ ᓯᕘᕋᔪᐃᓪᓗᑎᓪᓗ; ᐃᓴᕆᐊᓕᒥᐅᑦ ᑕᓯᐅᕐᓂᐊᕋᕕᒋᑦ ᓄᓇᒧᑦ ᑖᒃᑯᓄᖓ ᐅᖃᕕᒡᓗᖓ ᐊᖏᕈᑎᒋᓯᒪᔭᓐᓄᑦ; ᐅᕙᖓ ᐱᖃᑎᒋᓂᐊᕐᐸᒋᑦ.”
24ᒨᓯᓯ ᑎᑎᕋᓚᐅᕐᐳᖅ ᒎᑎᐅᑉ ᐱᖁᔭᖏᓐᓂᒃ ᐊᒡᓚᖕᓄᑦ ᑲᑎᑦᓱᒋᑦ ᐃᓱᓕᑦᓯᐊᕐᓱᒋᑦ. 25ᐱᔭᕇᕋᒥᒋᑦ, ᓕᕔᑎᓄᑦ ᑐᓂᕐᕈᓯᕐᑎᑦᓯᔨᓄᑦ ᐅᖃᕐᐳᖅ, ᑖᒃᑯᐊ ᐊᒡᔭᕐᓯᔨᐅᖕᒪᑕ ᐊᑕᓂᐅᑉ ᐊᖏᖃᑎᒌᒍᑎᖏᑕ ᐃᒃᓯᕐᕕᖓᓂᒃ, 26“ᐅᑯᐊ ᐱᖁᔧᑦ ᐊᒡᓚᒃᓯᒪᔪᑦ, ᑎᒍᓗᒋᑦ ᐃᓕᔭᒃᓴᕆᕙᓯ ᐊᑕᓂᐅᑉ ᒎᑎᑦᓯ ᐊᖏᖃᑎᒌᒍᑎᖏᑕ ᐃᒃᓯᕐᕕᖓᑕ ᓴᓂᐊᓄᑦ, ᓇᓗᓁᒃᑯᑕᐅᖁᓪᓗᒋᑦ ᐃᓕᑦᓯᓐᓄᑦ. 27ᖃᐅᔨᒪᒐᒪ ᓈᓚᒍᓐᓇᖏᓐᓂᑦᓯᓐᓂᒃ ᑕᑎᑐᔪᐊᓘᓂᑦᓯᓐᓂᒡᓗ; ᑕᑯᒋᑦ, ᐃᓅᖃᑎᒋᓪᓗᓯ ᓈᓚᒍᓐᓇᓚᐅᖏᓐᓇᑦᓯ ᑕᑎᑐᓴᒍᓐᓇᕐᓗᓯᓗ ᐊᑕᓂᕐᒧᑦ, ᐱᒋᐊᓪᓚᒃᑲᓐᓂᓛᕋᑦᓯ ᑐᖁᖓᓕᕈᒪ. 28ᑭᖑᕚᕇᑦ ᐊᖓᔪᖅᑳᓕᒫᖏᑦ ᐊᐅᓚᑦᓯᔨᐅᔪᓪᓗ ᐅᕙᓐᓄᑦ ᕾᖁᓚᐅᕐᓯᐅᒃ, ᒪᑯᓂᖓ ᐅᖃᐅᑎᓂᐊᕋᒃᑭᑦ; ᕿᓚᒡᓗ ᓄᓇᓗ ᓇᓗᓁᕐᓯᔨᒋᓂᐊᕐᐹᒃᑲᒃ ᑖᒃᑯᓂᖓ ᓈᒻᒪᒃᓴᖏᓐᓂᓐᓂᒃ. 29ᖃᐅᔨᒪᑦᓯᐊᕋᒪ ᑐᖁᓂᕐᒪ ᑭᖑᓂᖓᒍᑦ ᐱᐅᖏᑦᑐᐊᓗᖕᓂᒃ ᐱᐅᓯᕐᑖᕈᒫᕋᑦᓯ; ᒪᓕᒃᑕᐅᖁᓯᒪᔭᒃᑲᓗ ᑐᓄᓐᖓᓕᕈᒫᕋᑦᓯᐅᒃ; ᐅᓪᓗᓂ ᓯᕗᓂᑦᑎᓐᓂ ᐊᔪᕐᑐᓕᓂᐊᓗᖕᓄᑦ ᑎᑭᑕᐅᔪᒫᕐᐳᓯ, ᐱᐅᖏᑦᑐᓕᓂᕐᒥᒃ ᐊᑐᓕᕈᒫᕋᑦᓯ ᐊᑕᓂᐅᑉ ᓵᖓᓂ, ᓂᓐᖓᒃᑎᓪᓗᒍᓗ ᓇᖕᒥᓂᖅ ᐱᓇᓱᐊᕐᑕᑦᓯᓐᓄᑦ.”
ᒨᓯᓯᐅᑉ ᐃᓐᖏᕈᓯᖓ
30ᑕᕝᕙ ᒨᓯᓯ ᐅᖃᓪᓚᓯᓚᐅᕐᐳᖅ ᐃᓐᖏᐅᓯᕐᒥᒃ ᐊᑕᖏᕐᓗᓂᐅᒃ ᐃᓄᓕᒫᑦ ᐃᓴᕆᐊᓕᒥᐅᑦ ᓈᓚᒃᑎᓪᓗᒋᑦ.
Currently Selected:
ᒨᓯᓯ ᑕᓪᓕᒪᖏᑦ 31: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
