ᒨᓯᓯ ᑕᓪᓕᒪᖏᑦ 29
29
ᐊᑕᓂᐅᑉ ᐊᖏᕈᑎᖃᕐᓂᖓ ᐃᓴᕆᐊᓕᒥᐅᓄᑦ ᓄᓇᒥᒃ ᒧᐊᐱᒥᒃ
1ᒪᑯᐊ ᑕᕝᕙ ᐊᖏᖃᑎᒌᒍᑏᑦ ᐅᖃᐅᓯᕐᑕᖏᑦ ᒨᓯᓯᒧᑦ ᐊᑕᓂᐅᑉ ᐅᖃᐅᓯᕆᔭᐅᖁᓚᐅᕐᑕᖏᑦ ᐃᓴᕆᐊᓕᒥᐅᓄᑦ ᒧᐊᐱᒥᐅᑦ ᓄᓇᖓᓃᑎᓪᓗᒋᑦ; ᑕᒪᒃᑯᐊᓕᒫᑦ ᐃᓚᓕᐅᑎᔭᐅᓚᐅᕐᐳᑦ ᖃᖅᑲᒥ ᕼᐆᕆᑉᒥ ᐊᑕᓂᐅᑉ ᐊᖏᖃᑎᒌᒍᑎᒋᓯᒪᔭᖏᓐᓄᑦ.
2ᒨᓯᓯᐅᑉ ᐃᓄᓕᒫᑦ ᐃᓴᕆᐊᓕᒥᐅᑦ ᑲᑎᖁᓚᐅᕐᐰᑦ ᐅᖃᐅᑎᓪᓗᓂᒋᓪᓗ, “ᓇᖕᒥᓂᖅ ᑕᑯᓚᐅᕐᓯᒪᕗᓯ ᐊᑕᓂᐅᑉ ᖃᓄᐃᓕᐅᕆᓂᖓᓂᒃ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐊᖓᔪᖅᑳᖁᑎᖏᓐᓄᓪᓗ, ᓄᓇᖁᑎᓕᒫᖓᓄᓪᓗ. 3ᑕᑯᓚᐅᕆᕗᓯ ᐱᐅᖏᑦᑐᐊᓗᖕᓂᒃ ᖃᓂᒪᓇᕐᑐᓂᒃ, ᑲᒪᓇᕐᑐᓕᓂᕐᓂᒡᓗ, ᓇᓗᓁᒃᑯᑕᕐᔪᐊᓂᒡᓗ ᐊᑕᓂᐅᑉ ᐱᓇᓱᓚᐅᕐᑕᖏᓐᓂᒃ. 4ᑭᓯᐊᓂᓕ ᐊᒡᓛᑦ ᐅᓪᓗᒥᒧᑦ ᑎᑭᓪᓗᒍ ᓱᓕ ᑐᑭᓯᑎᓚᐅᕐᓯᒪᓐᖏᓛᓯ ᐊᑐᖃᑦᑕᓚᐅᕐᑕᑦᓯᓐᓂᒃ. 5ᐊᕐᕌᒍᓂᒃ 40ᓂᒃ ᐊᑕᓂᐅᑉ ᑕᓯᐅᓚᐅᕐᐹᓯ ᐃᓄᖃᖏᑦᑐᒃᑯᑦ; ᐊᓐᓄᕌᓯᓕ ᐊᑐᕐᑕᓯ ᐃᑎᒐᒍᑎᓯᓗ ᐊᑐᕈᓐᓁᓪᓕᔪᖃᓚᐅᓐᖏᓚᑦ. 6ᓂᐊᖂᔭᒥᒃ ᓂᕿᒃᓴᖃᓚᐅᓐᖏᓚᓯ ᕔᓂᒥᒃ ᐃᒥᐊᓗᖕᒥᒡᓘᓐᓃᑦ ᐃᒥᒃᓴᖃᓚᐅᓐᖏᓚᓯ, ᐊᑕᓂᐅᓪᓕ ᐊᑐᕆᐊᖃᕐᑕᑦᓯᓐᓂᒃ ᑐᓂᓯᕕᒋᖃᑦᑕᓚᐅᕐᐹᓯ ᐃᓕᓐᓂᐊᕐᑎᑦᓱᒪᓪᓗᓂᓯ ᑖᓐᓇ ᒎᑎᒋᒐᑦᓯᐅᒃ. 7#ᒨᓯᓯ ᓯᑕᒪᖏᑦ 21:21-30; ᒨᓯᓯ ᓯᑕᒪᖏᑦ 21:31-35.ᒪᐅᖓᓕ ᓄᓇᒧᑦ ᑎᑭᓐᓇᑦᓯ, ᐊᖓᔪᖅᑳᕐᔪᐊᖅ ᓮᕼᐆᓂ ᕼᐃᓴᐸᓂᒥᐅᖅ ᐊᖓᔪᖅᑳᕐᔪᐊᕐᓗ ᐋᒡ ᐹᓴᓂᒥᐅᖅ ᐅᕙᑦᑎᓐᓂᒃ ᐅᓇᑕᕆᐊᕋᓱᓚᐅᕐᐳᑦ, ᑖᒃᑯᐊᓕ ᓵᓚᒋᓚᐅᕐᐸᕗᑦ, 8#ᒨᓯᓯ ᓯᑕᒪᖏᑦ 32:33.ᓄᓇᖏᓪᓗ ᓄᓇᑖᕆᓚᐅᕐᐸᕗᑦ, ᐊᕕᒃᑕᐅᑎᓪᓗᒋᓪᓗ ᑭᖑᕚᕇᓄᑦ ᕉᐱᓂᒃᑯᓐᓄᑦ, ᒑᑎᒃᑯᓐᓄᓪᓗ, ᒫᓇᓯᐅᓪᓗ ᑭᖑᕚᖏᑕ ᐃᓚᖏᓐᓄᑦ. 9ᑍᒤᒻᒪᑦ ᑲᒪᑦᓯᐊᕐᓗᓯ ᐊᖏᖃᑎᒌᒍᑕᐅᓯᒪᔫᑉ ᓇᓗᓁᕐᓯᒪᓂᓕᒫᖏᑦ ᓈᓚᒋᐊᖃᕐᐸᓯ, ᐱᔪᓐᓇᑦᓯᐊᖁᓪᓗᓯ ᐃᓘᓐᓈᒍᑦ ᐱᓇᓱᐊᕐᑕᑦᓯᒍᑦ.
10“ᐅᓪᓗᒥᓕ ᐊᑕᓂᐅᑉ ᒎᑎᑦᓯ ᓇᔪᕐᑕᖓᑕ ᓵᖓᓂ ᐃᓘᓐᓇᓯ ᓇᖏᕐᐳᓯ, ᑭᖑᕚᕇᓄᑦ ᑕᓯᐅᕐᑎᐅᔪᓯ, ᐊᖓᔪᖅᑳᖑᔪᓯ, ᐊᐅᓚᑦᓯᔨᐅᔪᓯᓗ, ᐊᖑᑕᐅᔪᓯ ᐃᓴᕆᐊᓕᒥ, 11ᕿᑐᕐᖓᓯ, ᓄᓕᐊᓯᓗ, ᓄᓇᖃᕐᑐᑐᖃᐅᖏᑦᑐᓪᓗ ᓄᓇᖃᖃᑎᒋᔭᓯ, ᑕᒤᑕ ᕿᔪᒃᓴᑦᓯᓐᓂᒃ ᓇᑲᑎᕆᕙᒃᑐᑦ ᐃᒥᒃᓴᑦᓯᓐᓂᒡᓗ ᐃᒥᕐᑕᕐᐸᒃᑐᑦ, 12ᐅᓪᓗᒥ ᐅᕙᓃᑉᐳᓯ ᐅᖃᒻᒪᕆᖕᓂᒃᑯᑦ ᐊᖏᖃᑎᒌᒍᑎᐅᔪᒧᑦ ᐃᑎᖁᓪᓗᓯ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᐋᖅᑭᒃᑕᖓᓄᑦ. 13ᒫᓐᓇ ᐊᑕᓂᐅᑉ ᓱᖅᑯᐃᑦᓯᐊᕐᑐᒥᒃ ᓇᓗᓁᕐᓯᕕᒋᕚᓯ ᐃᓄᖁᑕᐅᓂᑦᓯᓐᓂᒃ ᑖᑦᓱᒧᖓ ᑖᓐᓇᓗ ᒎᑎᒋᒐᑦᓯᐅᒃ, ᑕᒪᑐᒥᖓ ᐊᖏᕐᕕᒋᓚᐅᕐᒪᓯ ᓯᕗᓕᕕᓂᕐᓯᓗ, ᐂᑉᕋᕼᐋᒻ, ᐂᓴᑭ, ᔧᑯᓗ. 14ᐃᓕᑦᓯᓐᓄᑐᐊᖅ ᐅᖃᕕᒍᑎᒥᒃ ᐊᖏᖃᑎᒌᒍᑎᓕᐅᓐᖏᓚᖓ, 15ᑕᒪᓐᓇ ᐅᕙᑦᑎᓐᓄᑦ ᐅᕙᓂ ᓇᔫᑎᔪᓕᒫᓄᑦ ᐅᓪᓗᒥ ᐊᖏᕈᑎᓕᐅᕐᐹ ᑭᖑᕚᕆᔪᒫᕐᑕᑦᑎᓐᓄᓪᓗ ᓱᓕ ᐃᓅᓯᒪᖏᑦᑐᓄᑦ.
16“ᖃᐅᔨᒪᑦᓯᐊᕐᐳᓯ ᐃᓅᓯᓯ ᖃᓄᐃᑦᑑᓚᐅᕐᒪᖔᑦ ᐄᑦᔨᑉᑎᒦᑎᓪᓗᓯ ᖃᓄᕐᓗ ᐃᓅᓯᖃᓚᐅᕐᒪᖔᑦᑕ ᐃᓅᖃᑎᒌᒡᔪᐊᑦ ᐊᓯᑦᑕ ᓄᓇᖏᑎᒍᑦ ᐊᖅᑯᓵᖃᑦᑕᕐᑎᓪᓗᑕ. 17ᑕᑯᖃᑦᑕᓚᐅᕐᐸᓯᓗ ᒎᑎᓐᖑᐊᖏᑦ ᓇᕐᕈᓇᕐᑐᑦ ᕿᔪᐃᑦ, ᐅᔭᕅᑦ, ᓯᐅᓪᕕᕇᑦ, ᒎᓗᐃᓪᓗ ᐱᖁᑎᒋᓚᐅᕐᑕᖏᑦ. 18#ᐄᑉᕈᐃᓄᑦ 12:15.ᐅᓗᕆᐊᓱᒋᑦᓯ ᐃᓕᑦᓯᓐᓃᑦᑐᖃᖁᓇᒍ ᐊᖑᒻᒥᒃ, ᐊᕐᓇᒥᒡᓘᓐᓃᑦ, ᕿᑐᕐᖓᕇᓂᒡᓘᓐᓃᑦ, ᑭᖑᕚᕇᓂᒡᓘᓐᓃᑦ, ᐅᓪᓗᒥ ᐆᒻᒪᑎᒥᒍᑦ ᐊᑕᓂᕐᒥᑦ ᒎᑎᑦᑎᓐᓂᑦ ᓴᖑᓯᒪᔪᒥᒃ ᐃᓅᖃᑎᒌᒡᔪᐊᓪᓗ ᒎᑎᓐᖑᐊᖏᓐᓄᑦ ᑐᒃᓯᐊᕐᕕᖃᖔᕈᒪᓕᕐᑐᓂᒃ; ᑕᒪᓐᓇ ᑍᒤᑦᑐᖅ ᐱᕈᕐᓯᐊᒃᓴᐅᑉ ᓄᓇᒧᑦ ᒪᖒᒪᓂᖓᑐᑦ ᑍᒤᑉᐳᖅ ᐱᕈᕐᑐᖃᕈᒫᕐᓗᓂ ᖃᓯᓕᓇᕐᑐᒥᒃ ᑐᖁᓐᓇᕐᑐᒥᒡᓗ. 19ᐅᓪᓗᒥ ᐅᕙᓃᑦᑐᒥᒃ ᐱᖁᔨᑦᔪᑎᐅᓪᓚᕆᒃᑐᓂᒃ ᑐᓵᔪᒥᒃ ᐃᓱᒪᔪᖃᕐᑍᓕᓕ ᑍᒤᑦᑐᓅᓕᕋᓗᐊᕈᓂ ᖃᓄᐃᓐᓂᐊᕋᓱᒋᖏᑦᑐᒥᒃ, ᓈᓚᒍᒪᖏᓪᓗᓂ ᐊᓯᒥᓂᒃ ᐃᓱᒪᒋᔭᑐᐃᓐᓇᕐᒥᓂᒃ ᐃᓅᔪᓐᓇᕋᓱᒋᔪᒥᒃ. ᑕᒪᓐᓇ ᑍᒤᓕᖓᓂᖅ ᑕᒪᑦᓯᓐᓂᒃ ᓄᖑᑎᑦᓯᔪᒫᕐᐳᖅ, ᐱᐅᔪᓂᒃ ᐱᐅᖏᑦᑐᓂᒡᓗ. 20ᐊᑕᓂᐅᑉ ᐊᖑᑦ ᑍᒤᑦᑐᖅ ᐃᓱᒪᒋᔪᓐᓁᕐᕕᒋᓂᐊᓐᖏᓛ. ᐊᑕᓂᐅᓪᓕ ᓂᓐᖓᕕᒃᔪᐊᕐᓂᖓ ᐃᑯᒪᔪᑎᑐᑦ ᐃᑯᐊᓪᓚᖕᓂᐊᕐᐳᖅ ᑖᑦᓱᒧᖓ, ᑕᒪᒃᑯᐊᓗ ᐅᕙᓂ ᐊᒡᓚᖕᓂ ᑎᑎᕋᐅᓯᐅᓯᒪᔪᑦ ᐊᔪᓕᕈᑕᐅᔪᓐᓇᕐᑐᓕᒫᑦᓯᐊᑦ ᑖᑦᓱᒧᖓ ᑎᑭᓐᓂᐊᕐᐳᑦ, ᑖᑦᓱᒪᓗ ᐊᑎᖓ ᐊᑕᓂᐅᑉ ᐲᕐᓂᐊᕐᐹ ᕿᓚᐅᑉ ᐊᑖᓂᑦ. 21ᐊᑕᓂᐅᑉ ᐃᓄᒃ ᑍᒤᑦᑐᖅ ᖃᐅᔨᑦᔪᑕᐅᖁᓪᓗᒍ ᐃᓴᕆᐊᓕᒥᐅᑦ ᑭᖑᕚᕇᖏᓐᓄᑦ ᐊᔪᓕᕈᑕᐅᔪᓐᓇᕐᑐᓄᑦ ᑎᑭᑕᐅᑎᒃᑲᔭᕐᐹ ᓱᒋᐊᕐᑕᐅᑦᔪᑎᒃᓴᐅᔪᓄᑦ ᐊᖏᖃᑎᒌᒍᑏᑦ ᐃᓗᐊᓃᑦᑐᓄᑦ ᐅᑯᓇᓂ ᑎᑎᕋᕐᓯᒪᔪᓂ ᐊᒡᓚᖕᓂ ᐱᖁᔭᓂ.
22“ᓯᕗᓂᑦᓯᓐᓂ ᐃᓅᖃᑎᒌᖑᔪᒫᕐᑐᓄᑦ, ᑭᖑᕚᒃᓴᑦᓯᓐᓄᑦ, ᓄᓇᖅᑲᑎᒋᓐᖏᑕᑦᓯᓐᓄᓪᓗ ᓄᓇᒥᑦ ᐅᖓᓯᒃᑐᒥᑦ ᐱᓯᒪᔪᓄᑦ ᑕᒪᒃᑯᐊ ᑕᑯᔭᐅᔪᒫᕐᐳᑦ ᐱᓂᕐᓗᒃᑕᐅᓇᕐᑐᑦ ᐋᓐᓂᐊᓇᕐᑐᓪᓗ ᐊᑕᓂᐅᑉ ᓄᓇᑦᓯᓐᓄᑦ ᑎᑭᑎᓯᒪᔭᖏᑦ. 23#ᒨᓯᓯ ᓯᕗᓪᓖᑦ 19:24,25.ᓄᓇᓕᒫᖅ ᐱᕈᕐᓰᕕᓕᒫᓪᓗ ᓱᓇᒃᓴᐅᔪᓐᓃᕈᒫᕐᐳᑦ, ᐅᔭᕋᖕᓄᑦ ᐃᑯᐊᓪᓚᒃᓴᕅᑦᑐᓄᑦ ᑕᕆᐅᕐᒧᓪᓗ; ᑲᓐᖓᕐᓱᐃᕕᐅᔪᒫᓐᖏᓚᖅ, ᐊᒡᓛᑦ ᐱᕈᕐᓂᕐᓗᒃᑐᓂᒃ ᐱᕈᕐᕕᐅᔪᓐᓃᕈᒫᕐᐳᖅ. ᓄᓇᓯᓗ ᓱᑑᒪᒥᐅᑦ ᒍᒨᕋᒥᐅᓪᓗ ᐃᒡᓗᒐᓴᖏᑎᑐᑦ ᑍᒤᑦᑑᓕᕈᒫᕐᐳᖅ, ᐊᑦᒪᒥᐅᑎᑐᓪᓗ ᔨᐳᐃᒥᐅᑎᑐᓪᓗ, ᐊᑕᓂᐅᑉ ᑖᒃᑯᐊ ᓄᖑᑎᓚᐅᕐᒪᒋᑦ ᓂᓐᖓᕕᒡᔪᐊᕐᕕᒋᓪᓗᒋᑦ. 24ᑕᕝᕙ ᐃᓅᖃᑎᒌᒡᔪᐊᓕᒫᑦ ᐊᐱᕐᓱᓕᕈᒫᕐᐳᑦ, ‘ᓱᖕᒪᓂᓐᓇ ᐊᑕᓂᖅ ᑖᑦᓱᒧᖓ ᓄᓇᒧᑦ ᑍᒤᓕᐅᕐᐹ? ᓱᓇᒥᒡᓗ ᐱᑦᔪᑎᖃᕐᓗᓂ ᓂᓐᖓᐅᒪᕕᒡᔪᐊᕐᐹ?’ 25ᑕᒪᓐᓇ ᐃᒤᓕᖓᔪᒥᒃ, ‘ᐱᑦᔪᑎᖃᕐᐳᖅ ᐊᑕᓂᐅᑉ ᐃᓄᖁᑎᖏᑕ ᑖᑦᓱᒧᖓ ᐊᖏᖃᑎᒌᒍᑎᒋᓚᐅᕐᑕᓂ ᓯᖁᓯᒥᒪᖕᒪᒋᑦ, ᓯᕗᓕᕕᓂᖏᑕ ᒎᑎᖓᓄᑦ, ᐊᖏᖃᑎᒌᒍᑎᓕᐊᕆᓚᐅᕐᑕᖓᓄᑦ ᐄᑦᔨᑉᑎᒥᑦ ᐊᐅᓪᓚᕐᑎᓐᓇᒥᒋᑦ. 26ᒎᑎᒋᔭᐅᔪᓂᒃ ᑖᑦᓱᒪ ᐊᓯᖏᓐᓂᒃ ᑐᒃᓯᐊᕐᕕᖃᖃᑦᑕᓕᕐᒪᑕ ᓯᕗᓂᖓᒍᑦ ᑐᒃᓯᐊᕐᕕᒋᖃᑦᑕᓚᐅᕐᓯᒪᓐᖏᑕᒥᖕᓄᑦ, ᒎᑎᓄᑦ ᐊᑕᓂᐅᑉ ᑐᒃᓯᐊᕐᕕᐅᖃᑦᑕᖁᓚᐅᓐᖏᑕᖏᓐᓄᑦ. 27ᑍᒤᒻᒪᑦ ᐊᑕᓂᐅᑉ ᓄᓇᖁᑎᖏᑦ ᓂᓐᖓᐅᒪᕕᒋᓕᕐᐰᑦ ᑎᑭᑎᑦᓯᓯᒪᕗᖅ ᐊᔪᓕᕈᑕᐅᔪᓐᓇᕐᑐᓕᒫᓂᒃ ᑖᒃᑯᓇᓂ ᐊᒡᓚᖕᓂ ᑎᑎᕋᐅᓯᐅᓯᒪᔪᓂᒃ. 28ᐊᑕᓂᖅ ᓂᓐᖓᕕᒡᔪᐊᕐᓯᒪᓕᕐᐳᖅ, ᓂᓐᖓᐅᒪᓂᕐᒥᓄᓪᓗ ᐊᖏᔪᒧᑦ ᓄᓇᒋᔭᖏᓐᓂᑦ ᓄᓲᕋᓕᕐᐰᑦ ᐃᒋᓪᓗᓂᒋᓪᓗ ᓄᓇᖅᑲᑎᒋᓐᖏᑕᖏᓐᓄᑦ, ᒫᓐᓇᓗ ᑕᕝᕙᓃᓕᕐᐳᑦ ᐅᓪᓗᒥᒧᑦ.’
29“ᓱᓕᓕ ᐊᑕᓂᖅ ᒎᑎᕗᑦ ᐊᓐᖏᐊᕆᔭᖃᕐᐳᖅ; ᐱᖁᔭᒥᓂᒡᓕ ᓴᖅᑭᑎᑦᓯᓯᒪᒐᓗᐊᕐᐳᖅ, ᐅᕙᒍᑦ ᑭᖑᕚᕗᓪᓗ ᓈᓚᒋᐊᖃᕐᑕᑦᑎᓐᓂᒃ ᐃᓱᖃᖏᑦᑐᒧᑦ, ᐱᖁᔭᓕᒪᑦ ᐅᑯᐊ ᒪᓕᒃᑕᐅᖁᓪᓗᒋᑦ.”
Currently Selected:
ᒨᓯᓯ ᑕᓪᓕᒪᖏᑦ 29: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
