ᒨᓯᓯ ᑕᓪᓕᒪᖏᑦ 28

ᓈᓚᖕᓂᐅᑉ ᓮᒻᒪᕐᑎᑕᐅᓇᕐᓂᖓ

ᒨᓯᓯ ᐱᖓᔪᖏᑦ 26:3-13; ᒨᓯᓯ ᑕᓪᓕᒪᖏᑦ 7:12-24

1 # ᒨᓯᓯ ᑕᓪᓕᒪᖏᑦ 11:13-17. “ᐊᑕᓂᐅᑉ ᒎᑎᑦᓯ ᓂᐱᖓᓂᒃ ᓈᓚᖕᓂᐊᕈᑦᓯ ᓱᖁᓯᔪᐃᑦᑑᓗᓯᓗ ᐱᖁᔭᓕᒫᖏᑦ ᒪᓕᖕᓂᐊᕈᑦᓯᒋᒃ ᐅᓪᓗᒥ ᐃᓕᑦᓯᓐᓄᑦ ᑐᓂᓯᒪᔭᒃᑲ, ᑕᕝᕙ ᐊᑕᓂᐅᑉ ᒎᑎᑦᓯ ᓄᓇᕐᔪᐊᕐᒥ ᐃᓅᖃᑎᒌᒡᔪᐊᓂᑦ ᐊᓯᑦᓯᓐᓂᑦ ᐊᔪᖏᓐᓂᕐᓴᐅᓕᕐᑎᓐᓂᐊᕐᐹᓯ. 2ᐊᑕᓂᐅᑉ ᒎᑎᕕᑦ ᓂᐱᖓᓂᒃ ᓈᓚᒃᑯᑦᓯ ᒪᑯᐊ ᑕᕝᕙ ᓮᒻᒪᕐᑕᑎᐅᑦᔪᑎᒃᓮᑦ ᐱᓂᐊᕐᐸᓯ:

3“ᐊᑕᓂᐅᑉ ᓮᒻᒪᕐᑎᓐᓂᐊᕐᐹᓯ ᓄᓇᒋᔭᓯ ᐱᕈᕐᓰᕕᖁᑎᓯᓗ.

4“ᓮᒻᒪᕐᑎᓐᓂᐊᕐᐹᓯᓗ ᐅᓄᕐᑐᓂᒃ ᕿᑐᕐᖓᖃᕐᑎᓪᓗᓂᓯ, ᓂᐊᖂᔭᒃᓴᓂᒡᓗ ᐱᕈᕐᓰᕕᖁᑎᓯ ᐱᕈᕐᕕᐅᕙᓪᓕᐊᖏᓐᓇᕐᓂᐊᕐᐳᑦ, ᐅᓄᕐᑐᓂᒡᓗ ᐃᒻᒧᒃᓯᐅᒐᖁᑎᖃᓕᕐᓗᓯ ᓰᐱᖁᑎᖃᓕᕐᓗᓯᓗ.

5“ᓮᒻᒪᕐᑎᓐᓂᐊᕐᐹᓯᓗ ᓂᐊᖂᔭᒃᓴᓂᒃ ᐱᕈᕐᓰᕕᖁᑎᓯ ᑕᕝᕙᓐᖓᓪᓗ ᓂᕿᒃᓴᖃᑎᑦᓯᐊᕐᓗᓂᓯ.

6“ᓮᒻᒪᕐᑎᓐᓂᐊᕐᐹᓯᓗ ᐱᓇᓱᐊᕐᓂᕆᔭᓕᒫᑦᓯᓐᓂ.

7“ᐊᑕᓂᐅᑉ ᐊᑭᕋᕐᑐᕐᑎᓯ ᐃᓕᑦᓯᓐᓂᒃ ᐅᓇᑕᕋᓱᓕᕐᐸᑕ ᓵᓚᒋᖃᑦᑕᕐᓂᐊᕐᐰᑦ ᓵᑦᓯᓐᓂ; ᐃᓕᑦᓯᓐᓄᑦ ᐅᓇᑕᕆᐊᕋᔭᕐᐳᑦ ᐊᑕᐅᓯᕐᒥᓐᖔᕐᓗᑎᒃ, ᐃᓕᑦᓯᓐᓂᓪᓕ ᕿᒫᓕᕋᔭᕐᐳᑦ ᓵᓐᖓᔭᑐᐃᓐᓇᕐᒥᖕᓄᑦ ᕿᒫᓕᕐᓗᑎᒃ.

8“ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ ᐱᓇᓱᐊᕐᓂᑦᓯᓐᓂ ᓯᕐᓗᐊᖁᑎᓯᓗ ᓂᐊᖂᔭᒃᓴᓂᒃ ᑕᑕᑎᓐᓂᐊᕐᐰᑦ, ᓮᒻᒪᕐᑎᓐᓂᐊᕐᐹᓯ ᓄᓇᒋᔭᑦᓯᓐᓂ ᓄᓇᖃᕐᑎᓪᓗᓯ ᒎᑎᑦᓯ ᑐᓂᔭᖓᓂᒃ ᐃᓕᑦᓯᓐᓄᑦ.

9“ᐊᑕᓂᖅ ᒎᑎᓯ ᓈᓚᖕᓂᐊᕈᑦᓯᐅᒃ ᑖᑦᓱᒪᓗ ᐱᖁᔨᓂᓕᒫᖏᑦ ᒪᓕᖕᓂᐊᕈᑦᓯᒋᒃ, ᑕᕝᕙ ᐃᓄᖁᑎᑖᕆᓂᐊᕐᐹᓯ ᓇᖕᒥᓂᕐᑖᕆᓗᓂᓯ, ᑕᒪᓐᓇ ᐅᖃᕕᒍᑎᒋᓯᒪᖕᒪᒍ. 10ᑕᕝᕙ ᓄᓇᕐᔪᐊᕐᒥᐅᓕᒫᑦ ᖃᐅᔨᔪᒫᕐᐳᑦ ᕾᖁᔭᐅᓯᒪᒐᑦᓯ ᐊᑕᓂᐅᑉ ᐊᑎᖓᓂ; ᓯᕘᕋᒋᓂᐊᕐᐹᓯᓗ. 11ᐊᑕᓂᐅᓪᓗ ᕿᑐᕐᖓᕐᑖᕐᑎᑦᓱᒫᕐᐹᓯ ᐅᓄᕐᑐᓂᒃ, ᐃᒻᒧᒃᓯᐅᒐᕐᓂᒃ ᐅᓄᕐᑐᓂᒃ, ᓂᐊᖂᔭᒃᓴᓂᒡᓗ ᑍᒪᓐᖓᑦ ᐱᕈᕐᑎᑦᓯᕙᓪᓕᐊᖏᓐᓇᕐᓂᐊᕐᐳᓯ ᑕᒫᓂ ᓄᓇᒥ ᓯᕗᓕᕕᓂᑦᓯᓐᓄᑦ ᑐᓂᔪᒪᓪᓗᒍ ᐊᖏᕈᑎᒋᓚᐅᕐᑕᖓᓂ ᓄᓇᖃᕐᑎᓪᓗᓯ. 12ᐊᕐᕌᒍᓕᒫᕐᓗ ᓯᓚᓗᒃᑎᑦᓯᖃᑦᑕᕈᒫᕐᐳᖅ ᓄᓇᒋᔭᑦᓯᓐᓄᑦ ᓯᕐᓗᐊᕐᔪᐊᒥᓂᑦ ᕿᓚᖕᒥᑦ ᓮᒻᒪᕐᑎᓪᓗᓂᓯᓗ ᑕᒤᑎᒍᑦ ᐱᓇᓱᐊᕐᓂᑦᓯᒍᑦ, ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓄᑦ ᐅᓄᕐᑐᓄᑦ, ᐊᑐᕐᑎᑦᓯᔪᓐᓇᖁᓪᓗᓯ, ᐊᓯᑦᓯᓐᓂᓪᓕ ᐊᑐᕐᑐᐊᕆᐊᖃᖃᑦᑕᕈᒫᓐᖏᓚᓯ. 13ᐊᑕᓂᐅᓪᓗ ᒎᑎᑦᓯ ᑕᓯᐅᕐᑎᐅᑎᑦᓱᒫᕐᐹᓯ ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓄᑦ ᑖᒃᑯᓄᖓ ᒪᓕᒃᑎᐅᑐᐃᓐᓇᖏᓪᓗᓯ; ᑍᒪᓐᖓᑦ ᐱᕙᓪᓕᐊᑎᑦᓱᒫᕐᐹᓯ ᖁᒻᒧᒃᐸᓪᓕᐊᑎᓪᓗᓯ, ᑲᑕᒃᐸᓪᓕᐊᑎᖏᓪᓗᓯ; ᐊᑕᓂᐅᑉ ᒎᑎᑦᓯ ᐱᖁᔭᓕᒫᖏᑦ ᐊᑐᕐᑕᐅᖁᔭᖏᓪᓗ ᒪᓕᖕᓂᐊᕈᑦᓯᐅᒃ ᓱᖁᓯᔪᐃᑦᑑᓗᓯ ᐅᓪᓗᒥ ᐃᓕᑦᓯᓐᓄᑦ ᐅᖃᐅᓯᕆᓯᒪᔭᒃᑲ. 14ᑍᒪᓐᖓᑦ ᓈᓚᑦᓯᐊᕆᐊᖃᕐᐸᓯ ᓈᓚᖏᑦᑑᑦᑍᓕᓗᒋᑦ ᓇᓪᓕᐊᓐᓄᓪᓘᓐᓃᑦ ᓴᐅᒥᒧᑦ ᑕᓕᕐᐱᒧᓪᓘᓐᓃᑦ ᓴᖑᑦᑍᓕᓗᓯ, ᒎᑎᐅᓪᓗ ᐊᓯᖏᓐᓂᒃ ᒎᑎᒋᔭᐅᔪᓂᒃ ᑐᒃᓯᐊᕐᕕᖃᕋᓱᒃᑐᒃᓴᐅᓐᖏᓚᓯ.”

ᓈᓚᖏᓐᓂᐅᑉ ᐊᑭᑐᔪᐊᓘᓂᖓ

ᒨᓯᓯ ᐱᖓᔪᖏᑦ 26:14-46

15“ᐊᑕᓂᐅᓪᓕ ᒎᑎᑦᓯ ᓂᐱᖓ ᓈᓚᖕᓂᐊᖏᒃᑯᑦᓯᐅᒃ ᑖᑦᓱᒪᓗ ᐊᑐᕐᑕᐅᖁᓯᒪᔭᖏᑦ ᐱᖁᔭᓕᒫᖏᓪᓗ ᑲᒪᒋᑦᓯᐊᕐᓂᐊᖏᒃᑯᑦᓯᐅᒃ ᐅᓪᓗᒥ ᐃᓕᑦᓯᓐᓄᑦ ᒪᓕᒃᑕᐅᖁᓪᓗᒋᑦ ᐅᖃᐅᓯᕆᔭᒃᑲ, ᒪᑯᐊ ᑕᕝᕙ ᓯᕗᓂᑦᓯᐊᖃᕐᓇᖏᑦᑐᑦ ᐃᓕᑦᓯᓐᓄᑦ ᑎᑭᓐᓂᐊᕐᐳᑦ ᓵᓚᒋᓗᓯᓗ:

16“ᐊᑕᓂᐅᑉ ᓈᒻᒪᖏᑦᔪᑎᖃᓕᕐᑎᓐᓂᐊᐰᑦ ᓄᓇᒋᔭᓯ ᐱᕈᕐᓰᕕᖁᑎᓯᓗ.

17“ᐊᑕᓂᐅᑉ ᓈᒻᒪᖏᑦᔪᑎᖃᓕᕐᑎᓐᓂᐊᐰᑦ ᓂᐊᖂᔭᒃᓴᖁᑎᓯ ᓂᕿᒃᓮᓪᓗ ᑕᕝᕙᓐᖓᑦ ᓂᕿᒃᓴᓕᐊᕆᕙᒃᑕᓯ.

18“ᐊᑕᓂᐅᑉ ᓈᒻᒪᖏᑦᔪᑎᖃᓕᕐᑎᓐᓂᐊᕐᐹᓯ ᐅᓄᖏᑦᑐᓂᒃ ᕿᑐᕐᖓᕐᑖᕐᑎᓪᓗᓂᓯ, ᐱᕈᕐᓰᕕᖁᑎᓯ ᓂᐊᖂᔭᒃᓴᓂᒃ ᐱᕈᕐᕕᐅᑎᑦᓯᐊᖏᓪᓗᓂᐅᒃ, ᐅᓄᖏᑦᑐᓂᒡᓗ ᐃᒻᒧᒃᓯᐅᒐᕐᓂᒃ ᓰᐱᓂᒡᓗ ᐱᖃᕐᑎᓪᓗᓂᓯ.

19“ᐊᑕᓂᐅᓪᓗ ᓈᒻᒪᖏᑦᔪᑎᖃᓕᕐᑎᓐᓂᐊᕐᐹᓯ ᑕᒤᑎᒍᑦ ᐅᖃᕐᓂᕐᓘᑕᐅᖃᑦᑕᓕᕐᓗᓯ ᐃᑎᕈᑦᓯ ᐊᓂᒍᑦᓯᓗ.

20“ᐱᐅᖏᑦᑐᒥᒃ ᐱᓇᓱᐊᕈᑦᓯ ᐊᑕᓂᖃᕈᒪᖏᒃᑯᑦᓯᓗ, ᑕᕝᕙ ᐱᓂᕐᓗᖕᓇᕐᑐᓄᑦ ᑎᑭᑕᐅᑎᑦᓱᒫᕐᐹᓯ, ᓇᓗᓕᕐᓇᕐᑐᒧᓪᓗ, ᐊᑲᐅᖏᑦᔪᑎᒃᓴᖃᕐᓂᕐᓄᓪᓗ ᖃᓄᐃᑦᑐᑐᐃᓐᓇᒥᒃ ᐱᓇᓱᐊᕋᓗᐊᕈᑦᓯ, ᕿᓚᒥᑯᓗᒃ ᓄᖑᑕᐅᑦᓯᐊᕐᓇᕐᑐᒧᑦ ᑎᑭᑕᐅᓚᐅᖅᑳᕐᑎᓐᓇᓯ, ᐅᕙᓐᓂᒃ ᕿᒤᓯᒪᓃᑦ ᐱᑦᔪᑎᒋᓗᒍ. 21ᖃᓂᒪᓇᕐᑐᓄᑦ ᐊᑦᔨᒌᖏᑦᑐᓄᑦ ᑎᑭᑕᐅᖃᑦᑕᕈᒫᕐᐳᓯ ᐊᑕᖏᕐᓗᓯ ᓄᖑᓚᐅᖏᓐᓂᓕᒫᑦᓯᓐᓂ ᑕᒫᓂ ᓄᓇᑖᕆᔪᒫᓕᕐᑕᑦᓯᓐᓂ. 22ᐊᑕᓂᐅᓪᓗ ᓱᒋᐊᕈᒫᕐᐹᓯ ᖃᓂᒪᓇᕐᑐᓄᑦ ᓯᐊᒻᒪᕐᐸᓪᓕᐊᔭᑦᑐᓄᑦ, ᐳᓪᓕᓕᕐᓇᕐᑐᓄᑦ ᐆᑎᕐᓇᕐᑐᓄᓪᓗ, ᓄᓇᒧᑦ ᐸᓂᕐᓇᕐᑐᒧᑦ ᐅᖅᑰᔪᐊᓗᖕᒧᓪᓗ ᓂᐊᖂᔭᒃᓴᖁᑎᓯ ᑎᑭᑕᐅᔪᒫᕐᐳᑦ ᐊᓯᕈᕐᑕᐅᖁᓪᓗᒋᑦ. ᑕᒪᒃᑯᐊᓗ ᐱᓂᕐᓗᖕᓇᕐᑐᐃᑦ ᐃᓕᑦᓯᓐᓃᖏᓐᓇᕈᒫᕐᐳᑦ ᑐᖁᓚᐅᖅᑳᕐᑎᓐᓇᓯ. 23ᓯᓚᓗᓚᐅᕐᓯᒪᓂᐊᓐᖏᓚᖅ ᓄᓇᒧᑦ, ᓄᓇᓯᓗ ᐸᓂᕐᓂᕐᒧᑦ ᓴᕕᕋᔭᒃᑎᑐᑦ ᓯᑎᔫᑎᒋᓕᕈᒫᕐᐳᖅ. 24ᓯᓚᓗᓐᖏᖔᕐᓗᓂ ᐊᑕᓂᖅ ᑎᑭᑎᑦᓯᔪᒫᕐᐳᖅ ᐳᔪᕐᓗᖕᒥᒃ ᐱᕐᓯᓕᕐᓗᓂ ᓯᐅᕋᕐᒥᒡᓗ ᐱᕐᓯᕐᓗᓂ ᑐᖁᑕᐅᓗᓯ ᓄᖑᑕᐅᓚᐅᖏᓐᓂᑦᓯᓐᓂ.

25“ᐊᑕᓂᐅᑉ ᓵᓚᐅᑎᑦᓱᒫᕐᐹᓯ ᐊᑭᕋᑦᓯᓐᓄᑦ; ᐊᑕᐅᓯᕐᒥᓐᖔᕐᓗᓯ ᐅᓇᑕᕆᐊᕈᒫᕐᐸᓯ, ᕿᒫᔪᒫᕐᐳᓯᓕ ᓵᓐᖓᔭᑐᐃᓐᓇᑦᓯᓐᓄᑦ ᕿᒫᓕᕐᓗᓯ, ᓄᓇᕐᔪᐊᕐᒥᐅᓪᓗ ᐊᖓᔪᖅᑲᐅᕕᖃᕐᑐᓕᒫᑦ ᑯᐊᕐᓵᕐᓯᒪᔪᒫᕐᐳᑦ ᖃᓄᐃᓕᕐᓂᑦᓯᓐᓂᒃ ᑕᑯᒍᑎᒃ. 26ᑐᖁᒍᑦᓯᓕ, ᑎᖕᒥᐊᕐᔪᐊᓂᑦ ᐆᒪᔪᓂᓪᓗ ᓄᔪᐊᕐᑐᓂᑦ ᐅᐸᒃᑕᐅᓗᓯ ᑎᒥᑦᓯ ᓂᕆᔭᐅᔪᒫᕐᐳᑦ; ᓇᓪᓕᐊᓐᓄᓪᓘᓐᓃᑦ ᕿᒪᒃᓯᑎᑦᓯᔪᒃᓴᕐᑕᖃᕈᒫᓐᖏᓚᖅ ᑖᒃᑯᓂᖓ. 27ᐊᑕᓂᐅᓪᓗ ᐊᔪᐊᕐᑎᑦᓱᒫᕐᐹᓯ ᐄᑦᔨᑉᑎᒥ ᑍᒤᓚᐅᕐᑐᑎᑐᑦ, ᐅᕕᓂᓯ ᐊᖕᒪᕐᑎᕐᓗᑎᒃ ᐊᕿᐊᕈᕐᓗᓕᕐᓗᓯᓗ ᐊᒥᕐᓗᖕᓂᕐᒧᓪᓗ ᑎᒥᓯ ᓈᔭᐅᓯᒪᔪᒫᕐᐳᑦ, ᐅᖏᓚᖕᓇᕐᑐᒧᓪᓗ ᑕᒪᒃᑯᐊ ᐋᖅᑭᒃᑕᐅᑦᔪᑎᒃᓴᖃᕈᒫᓐᖏᓚᑦ. 28ᐊᑕᓂᐅᑉ ᐃᓱᒤᕈᑎᑎᑦᓱᒫᕐᐹᓯ; ᐊᓇᐅᔪᒫᕐᐹᓯᓗ ᑕᐅᑐᒍᓐᓁᕐᑎᓪᓗᓯ ᓇᓗᓕᕐᑎᓪᓗᓂᓯᓗ. 29ᑕᑦᓯᑲᒍᒫᕐᐳᓯ ᐅᓪᓗᒃᑯᑦ ᖃᐅᒪᑎᓪᓗᒍ ᑕᐅᑐᖏᑦᑐᑎᑐᑦ, ᓇᒧᓐᖓᐅᔭᕆᐊᒃᓴᕐᓗ ᖃᐅᔨᔪᓐᓇᕈᒫᓐᖏᓚᓯ; ᐱᓇᓱᐊᕋᓱᒃᑕᓕᒫᓯ ᐱᔪᓐᓇᕈᒫᓐᖏᓚᓯ ᑍᒪᓐᖓᑦ ᐅᖁᒤᒃᓴᕐᑎᑕᐅᔪᒫᕐᐳᓯ ᑎᒡᓕᒐᕐᕕᐅᖃᑦᑕᕐᓗᓯ, ᓇᓪᓕᐊᓐᓂᒡᓘᓐᓃᑦ ᐃᑲᔪᕐᑎᒃᓴᖃᕈᒫᓐᖏᓚᓯ.

30“ᓄᓕᐊᒃᓴᕐᑖᕈᒫᕐᐳᓯ, ᐊᓯᕕᓪᓕ ᐃᓐᓇᖓᖃᑎᒋᔪᒫᕐᐹ; ᐃᒡᓗᓕᐅᕈᒫᕐᐳᓯ ᐊᖏᕐᕋᕆᔪᒫᓐᖏᓚᓪᓕ; ᕔᓂᒃᓴᓂᒃ ᐱᕈᕐᓰᕕᖕᒥ ᑲᓐᖓᕐᓱᐃᔪᒫᕐᐳᓯ, ᐸᐅᕐᖓᖏᓐᓂᒡᓕ ᑲᑎᕐᓱᐃᔪᒫᓐᖏᓚᓯ. 31ᐃᒻᒧᒃᓯᐅᒐᖁᑎᓯ ᑕᑯᓐᓇᕐᑎᓪᓗᓯ ᑐᖁᑕᐅᔪᒫᕐᐳᑦ, ᓂᕿᖏᓐᓂᒡᓕ ᓂᕆᕕᒋᔪᒫᓐᖏᓚᓯ; ᓯᐅᑎᖅᑯᕐᑐᔪᖁᑎᓯ ᑕᑯᓐᓇᕐᑎᓪᓗᑎᑦ ᑲᑉᐱᐊᓵᕐᑕᐅᓗᓯ ᐱᔭᐅᔪᒫᕐᐳᑦ, ᐃᓕᑦᓯᓐᓄᓪᓗ ᐅᑎᕐᑎᑕᐅᔪᒫᓐᖏᓚᑦ. ᓰᐱᖁᑎᓯ ᐊᑭᕋᕐᑐᕐᑎᑦᓯᓐᓄᑦ ᑐᓂᔭᐅᔪᒫᕐᐳᑦ, ᓇᓪᓕᐊᓐᓂᒡᓘᓐᓃᑦ ᐃᑲᔪᕐᑎᒃᓴᖃᕈᒫᓐᖏᓚᓯ. 32ᑕᑯᓐᓇᕐᑎᓪᓗᓯ ᐃᕐᓂᓯ ᐸᓂᓯᓗ ᑐᓂᔭᐅᔪᒫᕐᐳᑦ ᐃᓄᖕᓄᑦ ᐊᓯᑦᓯᓐᓄᑦ, ᕿᑐᕐᖏᕆᔪᒫᕐᐳᓯ ᐅᓪᓗᓕᒫᖅ ᐅᖓᒋᓗᒋᑦ; ᕿᓂᕋᓱᖕᓂᕐᒧᑦ ᕿᑐᕐᖓᑎᑦ ᐅᑎᓕᕐᒪᖔᑕ ᐅᑎᕈᒫᓐᖏᓚᓪᓕ. 33ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓂᑦ ᐱᓯᒪᔪᓄᑦ ᖃᐅᔨᒪᓐᖏᑕᑦᓯᓐᓄᑦ ᓂᐊᖂᔭᒃᓴᖁᑎᓯ ᓂᕿᒋᔭᐅᔪᒫᕐᐳᑦ ᐊᒃᓱᕈᒻᒪᕆᒃᓗᑎᑦ ᐱᓇᓱᐊᕈᑎᒋᖃᑦᑕᕐᓯᒪᔭᑎᑦ ᐱᕈᕐᑎᓐᓇᓱᐊᕐᓗᒋᑦ; ᐱᑎᑕᐅᖏᑦᓯᐊᕐᓗᓯ ᐅᖁᒤᒃᓴᕐᑎᑕᐅᔪᒫᕐᐳᓯ ᑍᒪᓐᖓᑦ ᐱᑲᒻᒪᒃᑕᐅᖃᑦᑕᕐᓗᓯᓗ ᓂᑲᒋᔭᐅᖏᓪᓗᓯ. 34ᐅᖁᒤᒃᓴᕐᑎᑕᐅᓂᕐᓄᓪᓗ ᑕᒪᒃᑯᓄᖓ ᐃᓱᒤᕈᑎᑎᑕᐅᔪᒫᕐᐳᓯ ᑕᑯᔭᑦᓯᓐᓄᑦ. 35ᐊᑕᓂᐅᓪᓗ ᒥᖑᐊᕈᒫᕐᐰᑦ ᓂᐅᒃᑭᒃ ᐋᓐᓂᐊᓇᕐᑐᓄᑦ ᐳᓪᓕᕐᓇᕐᑐᓄᑦ ᐋᖅᑭᒃᑕᐅᔪᓐᓇᖏᑦᑐᓄᑦ, ᐊᒥᕐᓗᖕᓄᑦ; ᐊᔪᐊᕐᓄᓪᓗ ᑎᒥᓯ ᓈᔭᐅᔪᒫᕐᐳᖅ ᓂᐊᖁᑦᓯᓐᓂᑦ ᐱᒋᐊᕐᓗᒍ ᐃᑎᒐᑦᓯᓐᓄᑦ ᑎᑭᓪᓗᒍ.

36“ᐊᑕᓂᐅᑉ ᐱᔭᐅᑎᑦᓱᒫᕐᐹᓯ, ᐊᖓᔪᖅᑳᕐᔪᐊᓯᓗ ᐊᖓᔪᖅᑳᕐᔪᐊᓐᖑᕐᑎᓯᒪᔭᓯ ᐃᓕᑦᓯᓐᓄᑦ, ᐃᓅᖃᑎᒌᒡᔪᐊᓄᑦ ᓯᕗᓕᓯᓘᓐᓃᑦ ᐃᓕᑦᓯᓘᓐᓃᑦ ᓯᕗᓕᖓᒍᑦ ᓄᓇᒋᓚᐅᕐᓯᒪᓐᖏᑕᑦᓯᓐᓄᑦ ᐊᐅᓪᓚᕈᑦᔭᐅᓗᓯ; ᑕᕝᕙᓂᓗ ᒎᑎᒋᔭᐅᔪᓂᒃ ᕿᔪᖕᓂᒃ ᐅᔭᕋᖕᓂᒡᓗ ᐱᔨᑦᓯᕈᒫᕐᐳᓯ. 37ᓄᓇᓄᑦ ᓇᒧᑐᐃᓐᓇᖅ ᐊᑕᓂᐅᑉ ᓯᐊᒻᒪᕐᑎᑦᓱᒫᕐᐹᓯ, ᐃᓄᖏᓐᓂᓪᓗ ᖁᐊᕐᓵᕈᑕᐅᔪᒫᕐᐳᓯ ᓱᔪᐊᓘᓐᓂᕐᒪᖔᑦᓯ ᐃᓱᒪᒋᔭᐅᓗᓯ; ᑍᒎᓴᒐᐅᓕᕐᓗᓯ#28:37 ᑍᒎᓴᒐᐅᓕᕐᓗᓯ ᐅᕝᕙᓗ ᖃᓃᕿᐅᑕᐅᓕᕐᓗᓯ ᐅᖃᐅᓯᐅᒐᔪᓕᕐᓗᓯᓗ.

38“ᐱᕈᕐᓯᐊᒃᓴᓂᒃ ᐅᓄᕐᑐᓂᒃ ᑲᓐᖓᕐᓱᐃᔪᒫᕐᐳᓯ, ᐅᓄᖏᑦᑐᓂᒡᓕ ᑲᑎᕐᓱᐃᔪᒫᕐᐳᓯ; ᐱᒡᓕᕐᑕᐅᔮᕐᑐᓄᑦ ᓂᐊᖂᔭᒃᓴᖁᑎᓯ ᓄᖑᑕᐅᖃᑦᑕᕈᒫᕐᒪᑕ. 39ᕔᓂᒃᓴᓂᒃ ᐱᕈᕐᓰᕕᖕᒥ ᑲᓐᖓᕐᓱᐃᔪᒫᕐᐳᓯ ᐱᕈᕐᓴᑎᓪᓗᒋᓪᓗ ᑲᒪᒋᑦᓯᐊᕐᓗᒋᑦ, ᐸᐅᕐᖓᖏᓐᓂᒡᓕ ᑲᑎᕐᓱᐃᔪᒫᓐᖏᓚᓯ ᐃᒥᕈᒫᕋᓯᓗ ᐸᐅᕐᖓᖏᓐᓂᑦ, ᓄᓇᐅᑉ ᖁᐱᕐᕈᖏᓐᓄᑦ ᕔᓂᒃᓮᑦ ᓂᕆᔭᐅᔪᒫᕐᒪᑕ. 40ᓇᐹᕐᑐᐃᑦ ᐅᕐᓱᒃᓴᓕᖕᓂᒃ ᐸᐅᕐᖓᓖᑦ ᓇᓂᑐᐃᓐᓇᖅ ᓄᓇᒋᔭᑦᓯᓐᓂ ᐱᕈᕈᒫᕐᐳᑦ, ᓇᐹᕐᑑᓪᓕ ᐱᕈᕐᑐᖏᓐᓂᒃ ᐅᕐᓱᒃᓴᓂᒃ ᐅᕐᓱᕐᑎᕈᑎᒃᓴᖃᕈᒫᓐᖏᓚᓯ, ᓇᐹᕐᑑᑉ ᐸᐅᕐᖓᖏᑦ ᐅᕐᓱᒃᓮᑦ ᐃᓂᒥᖕᓂᑦ ᑲᑕᒐᕈᒫᕐᒪᑕ. 41ᐃᕐᓂᖃᐅᕈᒫᕐᐳᓯ ᐸᓂᖃᐅᕐᓗᓯᓗ, ᐱᒋᔪᒫᓐᖏᓚᓯᓕ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᒪᑕ. 42ᓇᐹᕐᑐᖁᑎᓕᒫᓯ ᓄᓇᒥᓗ ᐱᕈᕐᓯᐊᓯ ᐱᔭᐅᔪᒫᕐᐳᑦ ᖁᐱᕐᕈᓄᑦ ᐱᒡᓕᕐᑕᐅᔮᕐᑐᓄᑦ.

43“ᓄᓇᖃᕐᑐᑐᖃᐅᖏᑦᑐᑦ ᓄᓇᑦᓯᓐᓃᑦᑐᑦ ᐱᓪᓚᕆᐅᓂᕐᒥ ᐃᓂᑖᕐᐸᓪᓕᐊᔪᒫᕐᐳᑦ, ᐃᓕᑦᓯᓕ ᑲᑕᒃᐸᓪᓕᐊᑐᐃᓐᓇᕈᒫᕐᐳᓯ ᐃᓂᕕᓂᑦᓯᓐᓂᑦ. 44ᑖᒃᑯᐊᓗ ᐃᓕᑦᓯᓐᓂᒃ ᑮᓇᐅᔭᓂᒃ ᐊᑐᕐᑐᐊᕐᑎᑦᓯᕙᒍᒫᕐᐳᑦ, ᐃᓕᑦᓯᓗ ᑖᒃᑯᓄᖓ ᐊᑐᕐᑐᐊᕐᑎᑦᓯᕙᓕᕐᓗᓯ; ᑭᖑᓂᖓᒍᑦ ᑖᒃᑯᐊ ᓂᐊᖂᓕᕈᒫᕐᐳᑦ ᐃᓕᑦᓯᓗ ᐸᒥᐅᖑᓕᕐᓗᓯ.

45“ᑕᒪᒃᑯᐊ ᐱᓂᕐᓗᖕᓇᕐᑐᑦ ᑎᑭᑦᓱᒫᕐᐳᑦ ᐃᓕᑦᓯᓐᓄᑦ ᐃᓕᑦᓯᓐᓃᖏᓐᓇᕈᒫᕐᐳᓪᓗ ᓄᖑᑕᐅᓚᐅᖏᓐᓂᓕᒫᑦᓯᓐᓂ, ᐊᑕᓂᐅᑉ ᒎᑎᑦᓯ ᓂᐱᖓᓂᒃ, ᓈᓚᓚᐅᖏᓐᓇᑦᓯ ᐱᖁᔭᖏᓪᓗ ᒪᓕᒐᒃᓴᐅᖁᔭᖏᓪᓗ ᒪᓕᓚᐅᖏᓐᓇᑦᓯᒋᒃ ᐃᓕᑦᓯᓐᓄᑦ ᐊᑐᕐᑕᐅᖁᓚᐅᕐᑕᖏᑦ. 46ᑕᒪᒃᑯᐊᓗ ᓇᓗᓁᒃᑯᑕᐅᔪᒫᕐᐳᑦ ᒎᑎᐅᑉ ᐃᓕᑦᓯᓐᓂᒃ ᓱᒋᐊᕐᓯᓂᖓᓂᒃ ᑭᖑᕚᓯ ᐱᖃᓯᐅᑎᓗᒋᑦ ᐃᓱᖃᖏᑦᑐᒧᑦ. 47ᐊᑕᓂᐅᑉ ᓮᒻᒪᕐᑎᓯᒪᓚᐅᕐᒪᓯ ᑕᒤᑎᒍᑦᓯᐊᖅ, ᐱᔨᑦᓯᓚᐅᓐᖏᓚᓯᓕ ᖁᕕᐊᓱᖕᓂᕐᒧᑦ ᐊᓕᐊᓁᒍᓱᖕᓂᕐᒧᓪᓗ ᐆᒻᒪᑎᒃᑯᑦ. 48ᑍᒤᒻᒪᑦ, ᐊᑭᕋᕐᑐᕐᑎᑦᓯᓐᓂᒃ ᐱᔨᑦᓯᕆᐊᖃᕈᒫᓕᕐᐳᓯ ᐊᑕᓂᐅᑉ ᑎᓕᓂᐊᕐᑕᖏᓐᓂᒃ ᐃᓕᑦᓯᓐᓄᑦ ᓵᓚᒋᔭᐅᖁᓪᓗᓯ, ᑳᒍᒫᕐᐳᓯ, ᐃᒥᕈᒡᓗᓯᓗ, ᐊᓐᓄᕌᖃᖏᓪᓗᓯᓗ ᓱᓇᓕᒫᓂᒡᓗ ᑭᓐᖒᒪᒃᓯᕐᓗᓯ; ᐊᑕᓂᐅᑉ ᐅᖁᒤᒃᓴᕐᑎᑦᓱᒫᕐᐹᓯ ᓂᑲᒋᖏᓪᓗᓂᓯ ᐋᓐᓂᕐᓇᕐᑐᓄᑦ ᓄᖑᑕᐅᓚᐅᖏᓐᓂᑦᓯᓐᓂ. 49ᐊᑕᓂᖅ ᐃᓅᖃᑎᒌᒡᔪᐊᓂᒃ ᓄᓇᕐᔪᐊᑉ ᐃᓱᐊᓂᑦ ᐱᓯᒪᔪᓄᑦ ᐅᐸᒃᑕᐅᑎᑦᓱᒫᕐᐹᓯ ᐅᓇᑕᕆᐊᕐᑕᐅᓗᓯ, ᐅᐸᒃᑐᕈᒫᕐᐳᑦ ᓇᒃᑐᕋᓕᒃᑎᑐᑦ ᐊᐅᕐᓵᕐᑐᑎᑐᑦ, 50ᐃᓅᖃᑎᒌᒡᔪᐊᖑᓗᑎᒃ ᓯᕘᕋᒋᔭᖃᖏᑦᑑᔪᒫᕐᐳᑦ ᓂᑲᒍᓱᖃᖏᓪᓗᑎᒡᓗ ᑭᓇᓕᒫᒥᒃ, ᐃᓅᓱᒃᑑᒐᓗᐊᓄᑦ ᐃᓄᑐᖃᕐᓄᓪᓗ. 51ᐃᒻᒧᒃᓯᐅᒐᖁᑎᓯᓗ ᓄᕐᕋᖏᑦ ᓂᐊᖂᔭᒃᓴᖁᑎᓯᓗ ᓂᕿᒋᔪᒫᕐᐰᑦ, ᓄᖑᓚᐅᖏᓐᓂᑦᓯᓐᓂ; ᐊᒥᐊᒃᑯᔭᐅᔪᒫᓐᖏᓚᓯᓘᓐᓃᑦ ᓂᐊᖂᔭᒃᓴᓂᒃ, ᕔᓂᓂᒃ, ᓇᐹᕐᑐᐃᑦ ᐱᕈᕐᑐᖏᑕ ᐅᕐᓱᖏᓐᓂᒃ, ᐃᒻᒧᒃᓯᐅᒐᕐᓂᒃ, ᓰᐱᓂᒡᓗ; ᐱᕐᓕᕐᓗᓯ ᑐᖁᓚᐅᖏᓐᓂᑦᓯᓐᓂ. 52ᓄᓇᓕᓕᒫᑦᓯᐊᑦ ᐊᑕᓂᐅᑉ ᒎᑎᑦᓯ ᑐᓂᓯᒪᔭᓕᒫᖏᑦ ᐅᓇᑕᕆᐊᕈᒫᕐᐰᑦ, ᐊᕙᓗᕐᔪᐊᖅ ᐳᕐᑐᔪᖅ, ᐊᑦᑕᕐᓇᖏᑦᑐᕐᓗ ᓱᕋᒃᑕᐅᔪᓐᓇᕋᓱᒋᓐᖏᑕᓯ ᐅᕐᕈᔪᒫᕐᐳᖅ.

53“ᐊᑭᕋᓯᓕ ᓄᓇᒋᔭᑦᓯᓐᓂᒃ ᐊᕙᑕᖏᕐᓯᓯᒪᓕᕐᐸᑕ, ᐱᕐᓚᓱᖕᓂᕐᒧᑦ ᐊᒡᓛᑦ ᕿᑐᕐᖓᑦᓯᓐᓂᒃ ᐊᑕᓂᐅᑉ ᒎᑎᕕᑦ ᐃᓕᑦᓯᓐᓄᑦ ᑐᓂᓯᒪᔭᖏᓐᓂᒃ ᓂᕿᖃᓕᕈᒫᕐᐳᓯ. 54ᐊᒡᓛᑦ ᐊᖑᑎᑦ ᐃᕐᓂᐊᖑᓂᕐᒥᖕᓂᑦ ᐊᔪᕐᓴᕐᓚᐅᕐᓯᒪᖏᑦᑐᑦ ᐃᓄᑦᓯᐊᕙᐅᓯᒪᔪᓪᓗ ᓂᕆᔪᒪᓗᐊᕐᓂᕐᒧᑦ ᐊᕙᓗᔭᐅᓯᒪᓕᕐᑎᓪᓗᓯ ᓇᖕᒥᓂᖅ ᕿᑐᕐᖓᓪᓚᕆᖕᒥᖕᓂᒃ ᓂᕿᖃᓕᕈᒫᕐᐳᑦ ᐊᓯᐊᓂᒃ ᓂᕆᔭᒃᓴᖃᖏᓐᓂᕐᒧᑦ. 55ᐊᒡᓛᑦ ᖃᑕᓐᖑᑎᒥᖕᓄᑦ ᓂᕆᔭᖏᑕ ᐃᓚᖓᓂᒃ ᐂᑦᑐᐃᔪᒫᓐᖏᓚᑦ ᓄᓕᐊᒥᖕᓄᓪᓘᓐᓃᑦ ᓇᒡᓕᒋᔭᒥᖕᓄᑦ ᕿᑐᕐᖓᖏᑕᓘᓐᓃᑦ ᐃᓚᖏᓐᓄᑦ ᐊᒥᐊᒃᑰᔪᓄᑦ. 56#ᐊᑕᓃᑦ ᐂᑉᐸᖏᑦ 6:28,29; ᐅᒡᒍᐊᕐᓃᑦ 4:10.ᐊᒡᓛᑦᑕᐅᖅ ᐊᕐᓁᑦ ᐃᕐᓂᐊᖑᓂᕐᒥᖕᓂᑦ ᐊᔪᕐᓴᕐᓚᐅᕐᓯᒪᖏᑦᑐᑦ ᐃᓄᑦᓯᐊᕙᐅᓯᒪᔪᓪᓗ, ᐊᔪᕐᓴᖏᑦᑑᓗᐊᒧᑦ ᐊᒡᓛᑦ ᓇᒧᑐᐃᓐᓇᖅ ᐱᓱᒍᓐᓇᕐᐸᓚᐅᖏᑦᑐᑦ, ᑍᒫᑦᓮᓐᓇᕐᑕᐅᖅ ᓂᕆᖃᑦᑕᓕᕈᒫᕐᐳᑦ. 57ᐊᑭᕋᖏᑕ ᓄᓇᒋᔭᖓᑦ ᐊᕙᓗᓯᒪᓕᕐᐸᒍ, ᓂᕆᔪᒪᓗᐊᕐᓂᕐᒧᑦ ᐊᒡᓛᑦ ᐃᔨᕋᕐᑐᕐᓗᑎᒃ ᐃᕐᓂᐊᕆᕋᑖᕐᑕᒥᖕᓂᒃ ᓂᕆᖃᑦᑕᓕᕈᒫᕐᐳᑦ ᑕᒪᐅᓁᓐᓇᕐᓗ ᐃᓄᕐᓗᑎᒃ ᐃᕐᓂᐊᕆᔭᐅᓯᒪᔪᓂᒃ; ᐅᐃᒥᖕᓂᒡᓘᓐᓃᑦ ᓇᒡᓕᒋᔭᒥᖕᓂᒃ ᓂᕆᖃᑎᖃᕈᒫᓐᖏᓚᑦ ᕿᑐᖓᒥᖕᓂᒡᓘᓐᓃᑦ.

58“ᒎᑎᐅᑉ ᐊᔪᕆᕐᑐᐃᑦᔪᑎᒋᓯᒪᔭᖏᓐᓂᒃ ᐅᕙᓂ ᐊᒡᓚᖕᓂ ᑎᑎᕋᕐᑕᐅᓯᒪᔪᓕᒫᓂᒃ ᓈᓚᖕᓂᐊᖏᒃᑯᑦᓯ ᓱᖁᓯᔪᐃᑦᑑᓂᐊᖏᒃᑯᑦᓯᓗ ᐊᑕᓂᐅᓪᓗ ᒎᑎᕕᑦ ᐊᑎᖓ ᐅᐱᓐᓇᕐᓯᑎᓐᓂᐊᖏᒃᑯᕕᐅᒃ ᐱᐅᓂᕐᐹᖑᔪᖅ ᑲᒪᓇᕐᓂᕐᐸᐅᔪᕐᓗ, 59ᑕᕝᕙ ᐊᑕᓂᐅᑉ ᑎᑭᑕᐅᑎᑦᓱᒫᕐᐹᓯ ᐋᓐᓂᐊᓇᕐᑐᓂᒃ ᐋᖅᑭᒃᑕᐅᔪᓐᓇᖏᑦᑐᓂᒡᓗ ᖃᓂᒪᓐᓇᕐᑐᓂᒡᓗ ᐱᐅᖏᑦᑐᐊᓗᖕᓂᒃ ᐃᓕᑦᓯᓐᓄᑦ ᑭᖑᕚᑦᓯᓐᓄᓪᓗ ᑎᑭᑎᑦᓯᔪᒫᕐᐳᖅ. 60ᑎᑭᑎᑦᓯᒃᑲᓐᓂᕈᒫᕆᕗᖅ ᐊᑲᐅᖏᑦᑐᒻᒪᕆᐊᓗᖕᓂᒃ ᐋᓐᓂᐊᓇᕐᑑᓚᐅᕐᑐᓕᒫᓂᒃ ᐄᑦᔨᑉᑎᒥ ᐊᑐᕐᑕᐅᖃᑦᑕᓚᐅᕐᑐᓂᒃ, ᑲᑉᐱᐊᒋᓚᐅᕐᑕᑦᓯᓐᓂᒃ; ᑕᒪᒃᑯᐊᓗ ᐃᓕᑦᓯᓐᓄᑦ ᓂᐱᓐᖓᔪᒫᕐᐳᑦ. 61ᐊᒻᒪᑦᑕᐅᖅ ᖃᓂᒻᒪᓰᑦ ᖃᓄᐃᑦᑐᑐᐃᓐᓇᓕᒫᑦ, ᐋᓐᓂᐊᓇᕐᑐᓪᓗ ᐃᓕᑦᓯᓐᓄᑦ ᑎᑭᑎᑕᐅᔪᒫᕐᐳᖅ ᐅᕙᓂ ᐊᒡᓚᖕᓂ ᐅᖃᐅᓯᐅᓯᒪᖏᑦᑐᑦ ᐊᑕᓂᐅᑉ ᐱᖁᔭᖏᓐᓂ, ᓄᖑᑕᐅᓂᓯ ᑎᑭᓪᓗᒍ. 62ᐅᓪᓗᕆᐊᑎᑐᑦ ᕿᓚᖕᒦᑦᑐᑎᑐᑦ ᐅᓄᕐᑎᒋᓕᕋᓗᐊᕈᑦᓯ, ᐃᓕᑦᓯᓐᓂᑦ ᖃᑦᓰᓐᓇᑯᓗᐃᑦ ᐊᓐᓇᒍᒫᕐᐳᑦ, ᐊᑕᓂᖅ ᒎᑎᓯ ᓈᓚᓚᐅᖏᓐᓇᑦᓯᐅᒃ. 63ᐊᑕᓂᖅ ᑲᑦᓱᖎᕐᓯᒪᓪᓗᓂ ᐃᓕᑦᓯᓐᓂᒃ ᐊᔪᕐᓴᕈᓐᓁᕐᐸᓪᓕᐊᑎᑦᓯᓚᐅᕐᒪᑦ ᐃᓄᒋᐊᒃᓯᕙᓪᓕᐊᑎᑦᓯᓪᓗᓂᓗ, ᑍᒫᒃᑕᐅᖅ ᑲᑦᓱᖎᕐᓯᒪᓗᓂ ᓄᖒᑦᓯᕙᓪᓕᐊᔪᒫᕐᐳᖅ ᓯᖁᒥᑕᐅᕙᓪᓕᐊᑎᑦᓯᓗᓂᓗ. ᓄᓇᒋᔭᑦᓯᓐᓂᓪᓗ ᐊᒧᔭᐅᕙᓪᓕᐊᔪᒫᕐᐳᓯ ᑕᕝᕙᓐᖓᑦ ᓄᓇᑖᕆᓂᐊᓕᕐᑕᑦᓯᓐᓂᑦ.

64“ᐊᑕᓂᐅᑉ ᐃᓅᖃᑎᒌᒡᔪᐊᓄᑦ ᓇᒧᑐᐃᓐᓇᓕᒫᖅ ᓯᐊᒻᒪᕐᑎᑦᓱᒫᕐᐹᓯ, ᓄᓇᕐᔪᐊᑉ ᐃᓱᐊᓂᑦ ᐱᒋᐊᕐᓗᒍ ᐃᓱᐊᓄᑦ ᑎᑭᓪᓗᒍ, ᑕᒪᒃᑯᓇᓂᓗ ᒎᑎᓐᖑᐊᓂᒃ ᑐᒃᓯᐊᕐᕕᖃᕐᑎᑕᐅᔪᒫᕐᐳᓯ ᓴᓇᔭᐅᓯᒪᔪᓂᒃ ᕿᔪᖕᓂᒃ ᐅᔭᕋᖕᓂᒡᓗ, ᐃᓕᑦᓯ ᓯᕗᓕᕕᓂᑦᓯᓗ ᑐᒃᓯᐊᕐᕕᒋᓚᐅᕐᓯᒪᓐᖏᑕᑦᓯᓐᓄᑦ. 65ᑕᒪᒃᑯᓇᓂᓗ ᐃᓅᖃᑎᒌᒡᔪᐊᓃᑎᓪᓗᓯ ᓮᓕᑦᓯᐊᕐᓇᕐᑐᒥᒃ ᓇᓂᓯᔪᒫᓐᖏᓚᓯ, ᓇᖕᒥᓂᕆᔭᕐᓂᒡᓗ ᑍᔭᒃᓴᕐᑕᖃᕈᒫᓐᖏᓚᖅ; ᐊᑕᓂᐅᑉ ᓵᓚᒋᔭᐅᑎᑦᓱᒫᕐᒪᓯ ᐃᓱᒪᔮᕐᓂᕐᒧᑦ, ᓂᕆᐅᒋᔭᒃᓴᖃᖏᓐᓂᕐᒧᑦ, ᓴᐱᓕᕐᓂᕐᒧᓪᓗ. 66ᐃᓅᓯᓯ ᑍᒪᓐᖓᑦ ᓇᓗᓇᕐᑐᒦᑦᓱᒫᕐᐳᑦ; ᐅᓪᓗᒃᑯᑦ ᐅᓐᓄᐊᒃᑯᓪᓗ ᖁᐊᕐᓵᖓᓇᕐᑐᒦᑦᓱᒫᕐᐳᓯ, ᐃᓅᓂᐊᕐᒪᖔᑦᓯ ᓇᓗᓗᓯ. 67ᐅᓪᓛᒃᑯᑦ ᐅᖃᖃᑦᑕᕈᒫᕐᐳᓯ ‘ᐅᓐᓄᓚᐅᕐᒥᓕᑐᖅ!’ ᐅᓐᓄᒃᑯᓪᓗ ᐅᖃᕐᐸᖕᒥᓗᓯ ‘ᐅᓪᓛᓐᖑᓚᐅᕐᒥᓕᑐᖅ’ ᐆᒻᒪᑎᓯ ᑲᑉᐱᐊᓱᒃᑐᐊᓘᔪᒫᕐᒪᑕ, ᑕᑯᔭᓯ ᐱᑦᔪᑎᒋᓗᒋᑦ. 68ᐊᑕᓂᐅᑉ ᐄᑦᔨᑉᑎᒧᑦ ᐅᑎᕐᑎᑦᓱᒫᕐᐹᓯ ᐅᒥᐊᕐᔪᐊᑎᒍᑦ, ᑕᕝᕗᖓ ᓄᓇᒧᑦ ᐅᑎᓚᐅᕐᓯᒫᑦᔮᖏᓐᓂᕋᕐᓗᓯ ᐅᖃᕐᓯᒪᒐᓗᐊᕐᑎᓪᓗᒍ. ᑕᕝᕙᓂᓗ ᐊᑭᕋᑦᓯᓐᓄᑦ ᐃᓕᑦᓯᓐᓂᒃ ᓂᐅᕐᕈᑎᒋᓇᓱᐊᕈᒫᕐᐳᓯ ᓯᐊᓛᕐᑕᕆᔭᐅᔪᒪᓗᓯ, ᓇᓪᓕᐊᓐᓄᓪᓘᓐᓃᓪᓕ ᓂᐅᕕᕐᑕᐅᔪᒪᓛᓐᖏᓚᓯ.”

Currently Selected:

ᒨᓯᓯ ᑕᓪᓕᒪᖏᑦ 28: EAIB

Highlight

Copy

Compare