ᒨᓯᓯ ᑕᓪᓕᒪᖏᑦ 27
27
ᒎᑎᐅᑉ ᐱᖁᔭᖏᑦ ᐅᔭᕋᒃᑯᑦ ᑎᑎᕋᕐᓯᒪᔪᑦ
1ᑕᕝᕙ ᒨᓯᓯ, ᐃᓴᕆᐊᓕᒥᐅᑦ ᐊᖓᔪᖅᑳᖏᓐᓂᒃ ᐃᓚᖃᕐᓗᓂ, ᐃᓄᖕᓄᑦ ᐅᖃᕐᐳᑦ, “ᐅᓪᓗᒥ ᐃᓕᑦᓯᓐᓄᑦ ᐱᖁᔭᐅᔪᑦ ᐅᖃᐅᓯᕆᔭᒃᑲ ᓈᓚᒃᑕᒃᓴᕆᕙᓯ. 2#ᔮᓱᐊ 8:30-32.ᔪᐊᕐᑕᓂᐅᑉ ᑰᖓᓂᒃ ᐃᑳᓕᕐᓂᑦᓯ ᐅᓪᓗᖓᓂ ᐊᑕᓂᐅᑉ ᒎᑎᑦᓯ ᑐᓂᔭᖓᓄᑦ ᓄᓇᒧᑦ, ᐅᔭᕋᖕᓂᒃ ᐊᖏᔫᑎᓂᒃ ᓇᑉᐹᕐᓯᔪᒃᓴᐅᕗᓯ, ᖄᖓᒍᑦ ᒥᖑᐊᕐᓗᒋᑦ ᖁᐊᕐᑎᑕᒐᕐᒥᒃ, 3ᖄᖓᒍᓪᓗ ᑎᑎᕋᕐᕕᒋᔭᒃᓴᕆᕙᓯ ᐱᖁᔭᓕᒫᓂᒃ, ᐊᔪᕆᕐᑐᐃᑦᔪᑎᐅᔪᓂᒡᓗ. ᓄᓇᒧᑦ ᐊᔪᕐᓴᕐᓇᖏᑦᑐᒧᑦ ᓂᕿᒃᓴᖃᑦᓯᐊᕐᑐᒧᓪᓗ ᐃᑎᓕᕈᑦᓯ ᐊᑕᓂᐅᑉ ᒎᑎᑦᓯ ᑐᓂᔭᖓᓄᑦ, ᐃᓕᑦᓯᓐᓄᑦ, 4ᔪᐊᕐᑕᓂᐅᓪᓕ ᑰᖓᑕ ᐊᑭᐊᓄᑦ ᐃᑳᕐᓯᒪᓕᕈᑦᓯ, ᐅᔭᕅᑦ ᑖᒃᑯᐊ ᓇᑉᐸᕐᑎᑕᒃᓴᕆᕙᓯ ᖃᖅᑲᒥ ᐄᐸᐅᓪᒥ, ᑖᒃᑯᐊ ᐅᓪᓗᒥ ᐃᓕᑦᓯᓐᓄᑦ ᐊᑐᕐᑕᐅᖁᓪᓗᒋᑦ ᐅᖃᐅᓯᕆᔭᒃᑲ, ᒥᖑᐊᕐᓗᒋᓪᓗ ᖁᐊᕐᑎᑕᒐᕐᒧᑦ. 5#ᒨᓯᓯ ᐂᑉᐸᖏᑦ 20:25.ᑕᕝᕙᓂ ᑐᓂᕐᕈᓯᕐᕕᖕᒥᒃ ᐋᑭᒃᓱᐃᔪᒃᓴᐅᕗᓯ ᐊᑕᓂᕐᒧᑦ ᒎᑎᑦᓯᓐᓄᑦ, ᐅᔭᕋᖕᓂᒃ ᓴᓇᕐᕈᑎᓄᑦ ᓴᕕᕋᔭᖕᓄᑦ ᐋᖅᑭᒃᓱᕐᓯᒪᖏᑦᑐᓂᒃ, 6ᑐᓂᕐᕈᓯᕐᕕᖕᒥᒃ ᐋᖅᑭᒃᓱᐃᓂᐊᕈᑦᓯ ᐊᑕᓂᕐᒧᑦ ᒎᑎᑦᓯᓐᓄᑦ ᐋᖅᑭᒃᓱᕐᓯᒪᔪᒃᓴᐅᖕᒪᑕ ᐅᔭᕋᖕᓄᑦ ᐃᓚᓐᖔᑎᕐᓯᒪᖏᑦᑐᓄᑦ. ᑕᕝᕙᓂᓗ ᑐᓂᕐᕈᓯᕐᕕᖕᒥ ᑐᓂᕐᕈᓯᕐᑐᒃᓴᐅᕗᓯ ᑐᖁᑕᒃᓴᓂᒃ ᐃᑯᐊᓚᑕᐅᔪᒃᓴᓂᒡᓗ, 7ᑕᕝᕙᓂᓗ ᑐᓂᕐᕈᓯᕐᑐᒃᓴᐅᕗᓯ ᓂᕆᓗᒋᓪᓗ ᑐᓂᕐᕈᑎᒋᓯᒪᔭᓯ ᐃᓚᒌᖕᓂᕐᒧᑦ ᑐᓂᕐᕈᓯᕈᑎᐅᔪᑦ ᖁᔭᓕᓗᓯᓗ ᐊᑕᓂᐅᑉ ᒎᑎᑦᓯ ᓵᖓᓂ. 8ᐅᔭᕋᖕᓂ ᖁᐊᕐᑎᑕᒐᕐᓂᒃ ᖄᓕᕐᓯᒪᔪᑎᒍᑦ ᑎᑎᕋᕐᑕᒃᓴᕆᕙᓯ ᑕᕐᓴᐅᑦᓯᐊᕐᓗᒋᑦ ᒎᑎᐅᑉ ᐱᖁᔭᓕᒫᖏᑦ.”
9ᑕᕝᕙ ᒨᓯᓯ, ᐃᓚᖃᕐᓗᓂ ᓕᕔᑎᒃᑯᓐᓂᒃ ᑐᓂᕐᕈᓯᕐᑎᑦᓯᔨᓂᒃ, ᐅᖃᓕᕐᐳᖅ ᐃᓴᕆᐊᓕᒥᐅᓕᒫᓄᑦ, “ᓈᓚᒃᑕᐅᑬᓐᓇᓚᐅᕐᓚᖓ ᐃᓴᕆᐊᓕᒥᐅᖑᔪᓯ, ᓂᐱᖃᖏᑦᓯᐊᕐᓗᓯᓗ. ᐅᓪᓗᒥ ᐊᑕᓂᐅᑉ ᒎᑎᑦᓯ ᐃᓄᖁᑎᑖᕆᕚᓯ; 10ᑍᒤᒻᒪᑦ ᑖᓐᓇ ᓈᓚᒃᑕᒃᓴᕆᕙᓯ ᐱᖁᔭᓕᒫᖏᓪᓗ ᒪᓕᒐᒃᓴᐅᖁᔭᖏᓪᓗ ᒪᓕᑦᓯᐊᕐᓗᒋᑦ, ᐅᓪᓗᒥ ᐃᓕᑦᓯᓐᓄᑦ ᑐᓂᔭᒃᑲ.”
ᓈᓚᖏᑦᑑᑉ ᓱᒋᐊᕐᑕᒃᓴᐅᑎᑕᐅᓂᖓ
11ᑕᕝᕙ ᒨᓯᓯ ᐃᓴᕆᐊᓕᒥᐅᓄᑦ ᐅᖃᓕᕐᐳᖅ, 12#ᒨᓯᓯ ᑕᓪᓕᒪᖏᑦ 11:29; ᔮᓱᐊ 8:33-35.“ᑰᖕᒥᒃ ᔪᐊᕐᑕᓂᒥᒃ ᐃᑳᕐᓯᒪᓕᕈᑦᓯ, ᐅᑯᐊ ᑭᖑᕚᕇᑦ ᑭᖑᓕᕇᒡᓗᑎᒃ ᖃᖅᑲᒥ ᒋᕆᔨᒦᑦᑐᒃᓴᐅᕗᑦ ᐃᓄᐃᑦ ᓮᒻᒪᕐᑎᑕᐅᓕᕐᑎᓪᓗᒋᑦ: ᓯᒥᐅᓂᒃᑯᑦ, ᓕᕔᒃᑯᑦ, ᔫᑕᒃᑯᑦ, ᐃᓴᑳᕆᒃᑯᑦ, ᔫᓯᐱᒃᑯᑦ, ᐱᓐᔭᒥᓂᒃᑯᓪᓗ. 13ᐅᑯᐊᓕ ᑭᖑᕚᕇᑦ ᖃᖅᑲᒥ ᐄᐸᐅᓪᒦᑦᑐᒃᓴᐅᕗᑦ ᓱᒋᐊᕐᑕᐅᔪᒃᓴᐅᔪᓂᒃ ᐅᖃᕐᑐᖃᓕᕐᑎᓪᓗᒍ: ᕉᐱᓂᒃᑯᑦ, ᒑᑦᑯᑦ, ᐋᓱᕆᒃᑯᑦ, ᓯᐳᓗᓂᒃᑯᑦ, ᑖᓐᑯᑦ, ᓈᑉᑕᓕᒃᑯᓪᓗ. 14ᓕᕔᑎᓪᓗ ᐅᑯᓂᖓ ᐅᖃᐅᓯᕐᓂᒃ ᐅᖃᕐᑐᒃᓴᐅᕗᑦ ᓂᐱᖅᑯᕐᑐᓗᑎᒃ:
15 #
ᒨᓯᓯ ᐂᑉᐸᖏᑦ 20:4; 34:17; ᒨᓯᓯ ᐱᖓᔪᖏᑦ 19:4; 26:1; ᒨᓯᓯ ᑕᓪᓕᒪᖏᑦ 4:15-18; 5:8. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐅᔭᕋᖕᓂᒃ ᒎᑎᓐᖑᐊᓕᐅᕐᑐᖅ, ᕿᔪᖕᓂᒡᓘᓐᓃᑦ, ᓴᕕᕋᔭᖕᓂᒡᓘᓐᓃᑦ ᐊᑕᓂᐅᑉ ᐆᒥᒋᔭᖓᓂᒃ, ᓴᓇᔨᐅᑉ ᓴᓇᔭᖓ, ᐃᔨᕋᕐᑐᕐᓗᓂ ᐃᓂᒃᓴᖓᓄᓪᓗ ᓇᑉᐸᕐᑎᓪᓗᒍ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
16 #
ᒨᓯᓯ ᐂᑉᐸᖏᑦ 20:12; ᒨᓯᓯ ᑕᓪᓕᒪᖏᑦ 5:16. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐊᑖᑕᒥᖕᓂᒃ ᐊᓈᓇᒥᖕᓂᒡᓗ ᐅᐱᓐᓇᕈᓐᓃᕐᑎᑦᓯᔪᖅ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
17 #
ᒨᓯᓯ ᑕᓪᓕᒪᖏᑦ 19:14. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐃᓅᖃᑎᖓᑕ ᓄᓇᖁᑎᖓᑕ ᑭᒡᓕᖓᑕ ᓇᓗᓁᒃᑯᑕᖓᓂᒃ ᐲᕐᓯᔪᖅ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
18 #
ᒨᓯᓯ ᐱᖓᔪᖏᑦ 19:14. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐊᖑᒻᒥᒃ ᑕᐅᑐᖏᑦᑐᒥᒃ ᑕᒻᒪᕐᑎᑦᓯᔪᖅ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
19 #
ᒨᓯᓯ ᐂᑉᐸᖏᑦ 22:21; 23:9; ᒨᓯᓯ ᐱᖓᔪᖏᑦ 19:33,34; ᒨᓯᓯ ᑕᓪᓕᒪᖏᑦ 24:17,18. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐊᑦᔨᒌᒃᑎᑦᓯᓂᕐᒥᒃ ᐊᑐᖏᑦᑐᖅ ᐱᑦᓯᐊᕐᑕᐅᔭᕆᐊᖃᕐᓂᖏᓐᓂᒃ ᓄᓇᓕᑐᖃᐅᖏᑦᑐᑦ, ᐃᓕᐊᕐᔪᐃᑦ, ᐅᐃᒡᒐᕐᓃᓪᓗ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
20 #
ᒨᓯᓯ ᐱᖓᔪᖏᑦ 18:8; 20:11; ᒨᓯᓯ ᑕᓪᓕᒪᖏᑦ 22:30. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐊᑖᑕᒥᓂᒃ ᑲᓐᖑᓇᕐᑐᒦᑎᑦᓯᔪᖅ ᐃᓐᓇᖓᖃᑎᖃᕐᓂᕐᒥᓄᑦ ᐊᑖᑕᖓᑕ ᓄᓕᐊᖓᑦᑕ ᐃᓚᖓᓐᓂᒃ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
21 #
ᒨᓯᓯ ᐂᑉᐸᖏᑦ 22:19; ᒨᓯᓯ ᐱᖓᔪᖏᑦ 18:23; 20:15. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᓂᕐᔪᑎᒥᒃ ᓄᓕᐊᕐᑐᖅ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
22 #
ᒨᓯᓯ ᐱᖓᔪᖏᑦ 18:9; 20:17. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᓇᔭᖕᒥᓂᒃ ᐃᓐᓇᖓᖃᑎᖃᕐᑐᖅ, ᐊᑖᑕᖓᑕ ᐸᓂᖓᓂᒡᓘᓐᓃᑦ ᐊᓈᓇᖓᑕ ᐸᓂᖓᓂᒡᓘᓐᓃᑦ.’
“ᑕᕝᕙ ᐃᓄᐃᑦ ᑕᒪᕐᒥᒃ ᑭᐅᔪᒃᓴᐅᕗᑦ, ‘ᐋᒦᓐ!’
23 #
ᒨᓯᓯ ᐱᖓᔪᖏᑦ 18:17; 20:14. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐃᓐᓇᖓᖃᑎᖃᕐᑐᖅ ᓴᑭᒥᓂᒃ ᐊᕐᓇᒥᒃ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
24“‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐃᔨᕋᕐᑐᕐᓗᓂ ᐃᓄᐊᕐᑐᖅ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
25“‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᑮᓇᐅᔭᓂᒃ ᐊᑭᓕᕐᑕᐅᔪᒪᓂᕐᒧᑦ ᐸᓯᔭᒃᓴᐅᖏᑦᑐᒥᒃ ᐃᓄᐊᕐᑎᑕᐅᔪᖅ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’
26 #
ᒐᓔᑎ 3:10. “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᒎᑎᐅᑉ ᐱᖁᔭᖏᓐᓂᒃ ᓈᓚᖏᑦᑐᖅ ᐊᔪᕆᕐᑐᐃᑦᔪᑎᖏᓐᓂᒡᓗ.’
“ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’”
Currently Selected:
ᒨᓯᓯ ᑕᓪᓕᒪᖏᑦ 27: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
