ᒨᓯᓯ ᑕᓪᓕᒪᖏᑦ 22
22
1 #
ᒨᓯᓯ ᐂᑉᐸᖏᑦ 23:4,5. “ᐃᓅᖃᑎᕕᑦ ᐃᒻᒧᒃᓯᐅᒐᖁᑎᖓᓂᒃ ᓰᐱᖁᑎᖓᓂᒡᓘᓐᓃᑦ ᑕᒻᒪᕐᑐᒥᒃ ᑕᑯᒍᕕᑦ, ᑕᑯᓐᓇᑐᐃᓐᓇᕐᑍᓕᒍᒃ; ᐃᓄᖓᓄᓪᓕ ᐅᑎᕐᑎᑕᒃᓴᕆᕙᑦ. 2ᐱᖁᑎᖃᕐᑐᕐᓕ ᐅᖓᓯᒃᑐᒦᑉᐸᑦ ᐅᕝᕙᓗ ᑭᓇᒧᑦ ᐱᒋᔭᐅᖕᒪᖔᑦ ᓇᓗᒍᕕᐅᒃ, ᑕᕝᕙ ᐊᖏᕐᕋᐅᑎᔭᒃᓴᕆᕙᑦ, ᐱᖁᑎᖃᕐᑐᕐᓕ ᕿᓂᕆᐊᕐᐸᑦ, ᑕᕝᕙ ᑐᓂᔭᒃᓴᕆᕙᑦ ᑖᑦᓱᒧᖓ. 3ᑍᒫᑦᓮᓐᓇᕐᑕᐅᖅ ᐱᔪᒃᓴᐅᕗᑎᑦ ᐃᓅᖃᑎᕕᑦ ᓯᐅᑎᖅᑯᕐᑐᔪᖁᑎᖓᓂᒃ; ᐊᓐᓄᕌᖓᓂᒡᓘᓐᓃᑦ, ᓱᓇᑐᐃᓐᓇᕐᒥᒡᓘᓐᓃᑦ ᐊᓯᐅᔨᔭᐅᓯᒪᔪᒥᒃ ᓇᓂᓯᒍᕕᑦ; ᐃᔨᕐᓯᓯᒪᓇᓱᐊᕐᑐᒃᓴᐅᓐᖏᓚᑎᑦ.
4“ᐃᓅᖃᑎᕕᑦ ᓯᐅᑎᖅᑯᕐᑐᔪᖁᑎᖓ ᐃᒻᒧᒃᓯᐅᒐᖁᑎᖓᓘᓐᓃᑦ ᐅᕐᕈᓯᒪᔪᖅ ᐊᖅᑯᑎᒥ ᑕᑯᑐᐃᓐᓇᕐᑕᒃᓴᕆᓐᖏᓚᑦ, ᐃᑲᔪᕐᑕᒃᓴᕆᕙᓪᓕ ᓂᑯᕕᑎᓐᓇᓱᐊᕐᓗᒍ.
5“ᐊᕐᓇᖅ ᐊᖑᑎᓯᐅᑎᓂᒃ ᐊᓐᓄᕌᓂᒃ ᐊᑐᕐᑐᒃᓴᐅᓐᖏᓚᖅ, ᐊᖑᓪᓗ ᐊᕐᓇᕐᓯᐅᑎᓂᒃ ᐊᓐᓄᕌᕐᓯᒪᔪᒃᓴᐅᓐᖏᓚᖅ; ᐊᑕᓂᐅᑉ ᒎᑎᑦᓯ ᑍᒤᓕᐅᕐᑐᑦ ᖁᕕᐊᒋᖏᒻᒪᒋᑦ.
6“ᑎᖕᒥᐊᒧᑦ ᐃᕙᕕᖕᒥᒃ ᑕᑯᒍᕕᑦ, ᓇᐹᕐᑐᒥ ᐅᕝᕙᓗ ᓇᑎᕐᓇᒥ ᐊᕐᓇᕕᐊᒥᒃ ᐃᕙᔪᒥᒃ ᐅᕝᕙᓗ ᐱᐊᕋᖃᕐᑐᒥᒃ, ᑕᕝᕙ ᐊᓈᓇᖓ ᐱᐊᕋᖏᓪᓗ ᐱᓇᓱᐊᕐᑕᒃᓴᕆᓐᖏᓚᑎᑦ. 7ᐱᐊᕋᖏᓐᓂᒡᓕ ᐱᔪᓐᓇᕋᓗᐊᕐᐳᑎᑦ ᐊᓈᓇᖓ ᐱᔭᒃᓴᕆᓐᖏᓚᑦ, ᖃᓄᐃᖏᑦᓯᐊᖁᓪᓗᑎ, ᐊᑯᓂᓗ ᓄᓇᒥ ᐃᓅᔪᓐᓇᖁᓪᓗᑎᑦ.
8“ᓄᑖᒥᒃ ᐃᒡᓗᓕᐅᕈᕕᑦ, ᖁᓛᖓᑕ ᓯᓈᒍᑦ ᐃᔪᒃᑲᕇᒃᑯᓯᕐᑕᒃᓴᕆᕙᑦ, ᐃᓄᖕᒥᒃ ᐃᒡᓘᑉ ᖁᓛᓂᑦ ᐃᔪᒃᑲᕐᑐᖃᕐᓗᓂ ᑐᖁᔪᖃᕐᐸᑦ ᐸᓯᔭᒃᓴᐅᒐᔭᓐᖏᓚᑎᑦ.
9 #
ᒨᓯᓯ ᐱᖓᔪᖏᑦ 19:19. “ᕔᓂᒃᓴᓄᑦ ᐱᕈᕐᓰᕕᖁᑎᖕᓂ ᑕᕝᕗᖓᑦᓮᓐᓇᖅ ᐊᑦᔨᒋᓐᖏᑕᖏᓐᓂᒃ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᔪᒃᓴᐅᓐᖏᓚᑎᑦ; ᑍᒤᓕᐅᕈᕕᑦ, ᑕᕝᕙᓂ ᐱᕈᕐᑎᑕᑎᑦ ᐊᑐᕐᑐᒃᓴᐅᔪᓐᓃᖁᓇᒋᑦ ᕔᓂᒃᓴᓕᐅᕐᕖᓪᓗ ᓇᕐᕈᓇᕐᑎᑕᐅᖁᓇᒍ.
10“ᐱᕈᕐᓰᕕᖁᑎᖕᓂ ᓄᓇᒥᒃ ᒪᒃᐱᕐᑎᕆᔪᒃᓴᐅᓐᖏᓚᑎᑦ ᐅᓂᐊᕐᑕᐅᑎᓪᓗᒍ ᐊᑕᐅᑦᓯᒃᑯᑦ ᐃᒻᒧᒃᓯᐅᒐᕐᒧᑦ ᓯᐅᑎᖅᑯᕐᑐᔪᒧᓪᓗ.
11“ᐊᓐᓄᕌᕐᓯᒪᔪᒃᓴᐅᓐᖏᓚᑎᑦ ᐃᓛᕐᑐᕐᓯᒪᔪᒥᒃ ᓄᕕᕐᓵᒃᓴᓂᒃ ᖃᓪᓗᓈᕐᑕᑦᓯᐊᕙᖕᓂᒡᓗ.
12 #
ᒨᓯᓯ ᓯᑕᒪᖏᑦ 15:37-41. “ᐅᓕᒡᔪᐊᑦ ᓯᑕᒪᓂᒃ ᑎᕆᖅᑯᖏᑎᒍᑦ ᓂᕕᓐᖓᑖᓕᐅᕐᑕᒃᓴᕆᕙᑦ ᐊᑐᖃᑦᑕᕐᑍᑦ.”
ᐱᖁᔭᖅ ᐃᓐᓇᖓᖃᑎᖃᕐᓂᐅᑉ ᐊᑐᕐᑕᐅᑦᓯᐊᕆᐊᖃᕐᓂᖓᓄᑦ
13“ᐊᖑᑦ ᓄᓕᐊᓂᒃᐸᑦ, ᐃᓐᓇᖓᖃᑎᒋᓯᒪᓕᕐᓗᒍ, ᑭᖑᓂᖓᒍᑦ ᓄᓕᐊᕆᔪᒪᔪᓐᓃᕐᐸᒍ, 14ᓱᓕᖏᑦᑐᒥᒡᓗ ᑲᓐᖑᓇᕐᑐᒥᒃ ᐸᓯᔭᒃᓴᐅᓂᕋᕐᐸᒍ, ᐱᐅᓐᖏᑎᓐᓇᓱᒡᓗᓂᐅᒡᓗ ᐅᖃᐅᓯᕆᓕᕐᐸᒍ, ᓄᓕᐊᕐᑖᕆᓕᕐᑎᓪᓗᓂᐅᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᔪᕕᓂᐅᓂᕋᕐᓗᒍ.
15“ᑍᒤᑦᑐᖃᕐᐸᑦ, ᑕᕝᕙ ᐊᕐᓇᐅᑉ ᐊᑖᑕᖓᑕ ᐊᓈᓇᖓᑕᓗ ᐸᓂᖓᑕ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᓐᓂᖓᑕ ᓱᓕᓂᖓᓂᒃ ᓇᓗᓁᕐᓯᑦᔪᑎᒋᓗᒍ ᑲᑎᑎᑕᐅᕋᑖᕐᑎᓪᓗᒋᒃ ᐊᓪᓕᓂᕕᓂᖓ ᐊᐅᒥᑎᕐᓯᒪᔪᖅ ᓇᒃᓴᕐᑕᒃᓴᕆᕚᒃ ᐃᒡᓗᒐᓴᖕᓂ ᐊᖓᔪᖅᑳᓄᑦ ᖃᐅᔨᓇᓱᐊᕐᕕᖕᒧᑦ. 16ᑕᕝᕙ ᐊᕐᓇᐅᑉ ᐊᑖᑕᖓ ᐅᖃᕐᑐᒃᓴᐅᕗᖅ ᐊᖓᔪᖅᑳᓄᑦ, ‘ᐸᓂᒐ ᐊᖑᒻᒧᑦ ᐆᒧᖓ ᑐᓂᓚᐅᕐᐸᕋ ᑲᑎᑎᑕᐅᖁᓪᓗᒍ, ᒫᓐᓇᓕ ᑖᑦᓱᒪ ᓄᓕᐊᕆᔪᒪᔪᓐᓃᕐᐹ; 17ᑕᑯᒋᓪᓗ, ᓱᓕᖏᑦᑐᒥᒃ ᐸᓯᔭᒃᓴᐅᓂᕋᕋᓱᒃᐹ ᐱᐅᓐᖏᑎᓐᓇᓱᒃᓗᓂᐅᒃ ᐅᖃᐅᓯᕆᓯᒪᕚ ᐊᖑᒻᒧᑦ ᐊᒃᑐᕐᑕᐅᓯᒪᑎᓪᓗᒍ ᓄᓕᐊᕐᑖᕆᓚᐅᕐᓂᕋᕐᓗᓂᐅᒃ. ᐅᓇ ᑕᕝᕙ ᐸᓂᖕᒪ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᓐᓂᖓᑕ ᓱᓕᓂᖓᓂᒃ ᓇᓗᓁᕐᓯᑦᔪᑎᒃᓴᐅᕗᖅ.’ ᑕᕝᕙ ᑲᑎᑎᑕᐅᕋᑖᕐᑎᓪᓗᒋᒃ ᐊᓪᓕᓂᕕᓂᖓ ᐃᓯᕕᑕᒃᓴᕆᕚ ᐃᒡᓗᒐᓴᖕᓂ ᐊᖓᔪᖅᑳᑦ ᓵᖓᓄᑦ. 18ᑕᕝᕙ ᐃᒡᓗᒐᓴᖕᓂ ᐊᖓᔪᖅᑳᓄᑦ ᐊᖑᑦ ᑍᒤᓕᐅᓚᐅᕐᑐᖅ ᑏᒐᕐᑐᕐᑕᐅᔪᒃᓴᐅᕗᖅ. 19ᐊᑭᓖᑎᑕᐅᔪᒃᓴᐅᕗᕐᑕᐅᖅ ᓯᐅᓪᕕᕆᓂᒃ 100ᓂᒃ, ᑖᒃᑯᐊᓗ ᑐᓂᔭᐅᓗᑎᒃ ᐊᕐᓇᐅᑉ ᐊᑖᑕᖓᓄᑦ, ᐊᖑᑦ ᐃᓴᕆᐊᓕᒥᐅᑕᕐᒥᒃ ᐊᕐᓇᒥᒃ ᑲᓐᖑᓇᕐᑐᒦᑎᑦᓯᓂᖓᓄᑦ; ᐊᕐᓇᕐᓗ ᓱᓕ ᑖᑦᓱᒧᖓ ᐊᖑᒻᒧᑦ ᓄᓕᐊᕆᔭᐅᔭᕆᐊᖃᕐᐳᖅ; ᐊᖑᑎᐅᓪᓗ ᐊᕕᑦᓴᕆᐊᖃᓐᖏᓛ ᐃᓅᓯᓕᒫᒥᓂ.
20“ᑭᓯᐊᓂᓕ ᐸᓯᔭᒃᓴᐅᑎᑕᐅᔪᖅ ᓱᓕᒃᐸᑦ, ᓇᓗᓁᕐᓯᔪᓐᓇᕐᑐᖃᖏᑉᐸᓪᓗ ᐊᕐᓇᐅᑉ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᓇᓂ ᐂᑉᐸᕐᑖᕐᑐᕕᓂᐅᓂᖓᓂᒃ. 21ᑕᕝᕙ ᑖᒃᑯᓇᓐᖓᑦ ᑕᕝᕙᓐᖓᑦ ᐊᓐᓂᓯᔭᐅᓗᓂ ᐊᑖᑕᖓᑕ ᐃᒡᓗᖓᑕ ᐃᑎᕐᑕᕐᕕᖓᓄᐊᕈᑦᔭᐅᔪᒃᓴᐅᕗᖅ, ᑖᑦᓱᒪᓗ ᐊᕐᓇᐅᑉ ᓄᓇᖓᑕ ᐃᒡᓗᒐᓴᒡᔪᐊᕐᒥᐅᑦ ᐊᖑᑎᖏᑕ ᒥᓪᓗᕐᓗᒍ ᑐᖁᑕᒃᓴᕆᕚᑦ, ᑖᓐᓇ ᐊᕐᓇᖅ ᑲᓐᖑᓇᕐᑐᒥᒃ ᐃᓴᕆᐊᓕᒥᐅᓄᑦ ᑎᑭᑎᑦᓯᖕᒪᑦ ᐃᓐᓇᖓᖃᑎᖃᕐᓯᒪᓂᕐᒥᓄᑦ ᐅᐃᓂᓚᐅᖅᑳᕋᓂ, ᓱᓕ ᐊᑖᑕᖓᑕ ᐃᒡᓗᖓᓂ ᐊᖏᕐᕋᖃᕐᑎᓪᓗᒍ. ᑕᕝᕙ ᑍᒤᓕᐅᕐᓗᓯ ᑕᒪᓐᓇ ᐱᐅᖏᑦᑐᓕᓂᖅ ᓄᖅᑲᕐᑎᒃᑲᔭᕐᐸᓯ.
22“ᐊᖑᓪᓕ ᐊᖑᔭᐅᒃᐸᑦ ᓄᓕᐊᕆᔭᐅᔪᒥᒃ ᐃᓐᓇᖓᖃᑎᖃᕐᑎᓪᓗᒍ, ᑖᒃᑯᐊᒃ ᑕᕝᕙ ᑕᒪᕐᒥᒃ ᑐᖁᑕᐅᔪᒃᓴᐅᕘᒃ, ᑕᕝᕙ ᑍᒤᓕᐅᕐᓗᓯ ᑕᒪᓐᓇ ᐱᐅᖏᑦᑐᓕᓂᖅ ᐃᓴᕆᐊᓕᒥᐅᓂ ᓄᖅᑲᕐᑎᒃᑲᔭᕐᐸᓯ.
23“ᐊᖑᓪᓕ ᐊᖑᔭᐅᒃᐸᑦ ᓄᓇᓕᖕᓂ ᐃᓐᓇᖓᖃᑎᖃᕐᑎᓪᓗᒍ ᐊᕐᓇᒥᒃ ᐊᓯᐊᓂᒃ ᐅᐃᒃᓴᓕᖕᒥᒃ. 24ᑕᕝᕙ ᑖᒃᑯᐊᒃ ᓄᓇᓖᑦ ᓯᓚᑖᓄᐊᕈᑎᓗᒋᒃ ᒥᓪᓗᕐᑕᐅᓗᑎᒃ ᑐᖁᑕᐅᔪᒃᓴᐅᕘᒃ. ᐊᕐᓇᖅ ᑐᖁᑕᐅᔭᕆᐊᖃᕐᐳᖅ ᐃᑲᔪᕐᑕᐅᔪᒪᓗᓂ ᓂᓪᓕᐊᓚᐅᖏᓐᓂᖓ ᐱᓪᓗᒍ, ᑕᕝᕙᓂ ᓄᓇᓕᖕᓃᒃᑲᓗᐊᕐᓗᓂ, ᓂᓪᓕᑐᐊᕐᐸᑦ ᑐᓴᕐᑕᐅᔪᓐᓇᕋᔭᓚᐅᕋᓗᐊᕐᒪᑦ. ᐊᖑᑦᑕᐅᖅ ᑐᖁᑕᐅᔭᕆᐊᖃᕆᕗᖅ ᐊᕐᓇᒥᒃ ᐃᓐᓇᖓᖃᑎᖃᕐᒪᑦ ᐊᓯᐊᓄᑦ ᓄᓕᐊᒃᓴᕆᔭᐅᔪᒥᒃ. ᑕᕝᕙ ᑍᒤᓕᐅᕐᓗᓯ ᑕᒪᓐᓇ ᐱᐅᖏᑦᑐᓕᓂᖅ ᓄᖅᑲᕐᑎᒃᑲᔭᕐᐸᓯ.
25“ᐊᖑᓪᓕ ᐃᒡᓗᒐᓮᑦ ᓯᓚᑖᓂ ᐊᕐᓇᒥᒃ ᖁᓄᔪᕐᓂᐊᕐᐸᑦ ᐊᓯᐊᓄᑦ ᓄᓕᐊᒃᓴᕆᔭᐅᔪᒥᒃ. ᑕᕝᕙ ᐊᖑᑦ ᑖᓐᓇᑐᐊᖅ ᑐᖁᑕᐅᔭᕆᐊᖃᕐᐳᖅ; 26ᐊᕐᓇᕐᓕ ᖃᓄᐃᓕᔭᐅᔭᕆᐊᖃᓐᖏᓚᖅ, ᑐᖁᑕᐅᑦᔪᑎᒃᓴᐅᔪᒥᒃ ᐊᔪᕐᑐᓕᖏᒻᒪᑦ. ᑕᒪᓐᓇ ᐊᑦᔨᖃᕆᕗᖅ ᐊᖑᑦ ᐊᖑᑕᐅᖃᑎᒥᓂᒃ ᐅᐸᒍᑎᓗᓂ ᑐᖁᑦᓯᔪᒥᒃ. 27ᐊᖑᑦ ᐃᒡᓗᒐᓮᑦ ᓯᓚᑖᓂ ᐊᕐᓇᒥᒃ ᖁᓄᔪᕐᓂᐊᕐᐸᑦ, ᐊᕐᓇᖅ ᐃᑲᔪᕐᑕᐅᔪᒪᓗᓂ ᓂᓪᓕᐊᒐᓗᐊᕐᓗᓂ, ᓇᓪᓕᐊᓐᓂᒡᓘᓐᓃᑦ ᐃᑲᔪᕐᑎᒃᓴᖃᖏᒻᒪᑦ.
28 #
ᒨᓯᓯ ᐂᑉᐸᖏᑦ 22:16,17. “ᐊᖑᓪᓕ ᐊᕐᓇᒥᒃ ᐅᐃᒃᓴᖃᖏᑦᑐᒥᒃ ᖁᓄᔪᕐᓂᐊᕐᑎᓪᓗᒍ ᐊᖑᔭᐅᒃᐸᑦ. 29ᑕᕝᕙ ᐊᖑᑦ ᐊᕐᓇᐅᑉ ᐊᑖᑕᖓᓄᑦ ᐊᑭᓖᔪᒃᓴᐅᕗᖅ ᓄᓕᐊᒃᓴᒥᓂᒃ ᐊᑭᓖᐅᑎᒋᔭᐅᓲᑎᑐᑦ 50ᓂᒃ ᓯᐅᓪᕕᕆᓂᒃ, ᐊᕐᓇᕐᓗ ᑖᓐᓇ ᓄᓕᐊᕐᑖᕆᓗᓂᐅᒃ, ᐱᔪᒪᑎᓐᓇᒍ ᐃᓐᓇᖓᖃᑎᒋᓯᒪᖕᒪᒍ. ᐊᖑᑎᐅᓪᓗ ᐊᕕᑕᒃᓴᕆᓐᖏᓛ ᐃᓅᓂᓕᒫᒥᓂ ᐱᔪᒪᑎᓐᓇᒍ ᐱᓕᕆᐊᕆᖕᒪᒍ; ᐊᕕᑕᒃᓴᕆᓐᖏᓛᓗ ᐃᓅᓯᓕᒫᒥᓂ.
30 #
ᒨᓯᓯ ᐱᖓᔪᖏᑦ 18:8; 20:11; ᒨᓯᓯ ᑕᓪᓕᒪᖏᑦ 27:20. “ᐊᖑᑦᑕᐅᖅ ᐊᑖᑕᒥᓂᒃ ᑲᓐᖑᓇᕐᓯᑎᑦᓯᔪᒃᓴᐅᓐᖏᓚᖅ ᓄᓕᐊᖏᑕ ᐃᓚᖓᓐᓂᒃ ᐃᓐᓇᖓᖃᑎᖃᕐᓂᕐᒥᖑᑦ.”
Currently Selected:
ᒨᓯᓯ ᑕᓪᓕᒪᖏᑦ 22: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
