ᒨᓯᓯ ᑕᓪᓕᒪᖏᑦ 21
21
ᐱᔮᕆᓗᓂ ᐃᓄᐊᕐᓯᒪᔪᖃᕐᐸᑦ ᓇᓗᓇᕐᐸᓪᓗ ᓇᓪᓕᐊᓐᓄᑦ ᑐᖁᑕᐅᖕᒪᖔᑦ
1“ᐊᖑᒻᒥᒃ ᐱᔮᕆᔭᐅᓗᓂ ᑐᖁᑕᐅᓯᒪᔪᖃᕐᐸᑦ ᐱᕈᕐᓰᕕᖕᒥ ᑕᒫᓂ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᓄᓇᖃᓕᕐᑎᓪᓗᓯ, ᖃᐅᔨᒪᖏᒃᑯᑦᓯᓗ ᓇᓪᓕᐊᓐᓄᑦ ᑐᖁᑕᐅᓯᒪᖕᒪᖔᑦ. 2ᑕᕝᕙ ᐊᖓᔪᖅᑳᓯ ᐋᖅᑭᒃᓱᐃᔨᓯᓗ ᑕᑯᔭᕐᑐᕐᑐᒃᓴᐅᕗᑦ, ᖃᓄᖅ ᐅᖓᓯᖕᓂᖃᕐᒪᖔᑦ ᑐᖁᑕᐅᓯᒪᔫᑉ ᑎᒥᖓᓂᑦ ᐃᒡᓗᒐᓴᖕᓄᑦ ᖃᓂᓛᓄᑦ ᖃᐅᔨᓴᕐᑐᒃᓴᐅᕗᑦ ᐆᒃᑐᕋᕐᓗᒍ. 3ᑕᕝᕙ ᐃᒡᓗᒐᓮᑦ ᑐᖁᑕᐅᓯᒪᔪᒥᒃ ᖃᓂᒃᓴᕐᓂᕐᐹᑉ ᐊᖓᔪᖅᑳᖏᑦ ᐃᒻᒧᒃᓯᐅᒐᕐᒥᒃ ᐱᕈᕋᑖᕕᓂᕐᒥᒃ ᐊᑐᐃᓐᓇᕈᐃᔪᒃᓴᐅᕗᑦ ᓱᓕ ᐊᑐᕐᑕᐅᓚᐅᕐᓯᒪᖏᑦᑐᒥᒃ ᐱᓇᓱᐊᕐᓂᕐᒧᑦ. 4ᑕᕝᕙ ᐃᒡᓗᒐᓮᑦ ᐊᖓᔪᖅᑳᖏᑕ ᐃᒻᒧᒃᓯᐅᒐᖅ ᓄᕐᕋᖅ ᓇᕐᓴᒧᐊᕈᑎᔭᒃᓴᕆᕚᑦ ᑰᖏᓐᓇᕐᑐᒥᒃ ᑰᓕᖕᒧᑦ, ᓄᓇᖓᓗ ᐊᐅᓚᑕᐅᓯᒪᖏᑦᑐᒧᑦ ᐱᕈᕐᓰᕕᐅᓚᐅᕐᓯᒪᖏᑦᑐᒧᓪᓗ, ᑕᕝᕙᓂ ᖁᖓᓯᖓᒍᑦ ᐊᓇᐅᓗᒍ ᑐᖁᑕᒃᓴᕆᕚᑦ. 5ᑕᕝᕙ ᓕᕔᑉ ᑭᖑᕚᖏᑦ ᑐᓂᕐᕈᓯᕐᑎᑦᓯᔩᑦ ᓯᕗᒧᐊᒃᑐᒃᓴᐅᕗᑦ, ᑖᒃᑯᐊ ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᖕᒪᒋᑦ ᐱᔨᑦᓯᖁᓪᓗᒋᑦ ᐃᒻᒥᓄᑦ ᓮᒻᒪᕐᑎᑦᓯᔨᐅᖁᓪᓗᒋᓪᓗ ᐊᑕᓂᐅᑉ ᐊᑎᖓᓂ, ᑖᒃᑯᐊ ᐅᖃᐅᓯᖏᑎᒍᑦ ᐊᑭᕋᕐᑑᑎᑦᔪᑎᓕᒫᑦ ᐋᓐᓂᕐᓯᓇᓱᐊᕐᓂᓕᒫᓪᓗ ᑖᒃᑯᓇᓐᖓᑦ ᐃᓱᐊᕐᓯᑎᑕᐅᔪᓐᓇᕐᒪᑕ. 6ᑕᕝᕙ ᐊᖓᔪᖅᑳᓕᒫᑦ ᐃᒡᓗᒐᓴᖕᓄᑦ ᑖᑦᓱᒪ ᑐᖁᑕᐅᓯᒪᔫᑉ ᑎᒥᖓᓄᑦ ᖃᓂᓐᓂᕐᐹᒥᑦ ᐱᓯᒪᔪᑦ ᐊᒡᒐᖕᒥᖕᓂᒃ ᐅᐊᓴᕐᑐᒃᓴᐅᕗᑦ ᐃᒻᒧᒃᓯᐅᒐᐅᑉ ᓄᕐᕋᖓᑕ ᖁᓛᓂ ᓇᕐᓴᒥ; 7ᓇᓗᓁᕐᓯᓗᑎᒃ, ‘ᐊᖑᒻᒥᒃ ᑖᑦᓱᒥᖓ ᑐᖁᑦᓯᓯᒪᓐᖏᓚᒍᑦ, ᑕᑯᓐᓈᓚᐅᕋᑕᓗ ᑐᖁᑕᐅᑎᓪᓗᒍ. 8ᐊᑕᓃᖅ, ᐃᓴᕆᐊᓕᒥᐅᑦ ᐃᓄᖁᑎᑎᑦ ᐃᓱᒪᒋᔪᓐᓁᕐᕕᒋᓚᐅᒃᑭᑦ, ᑖᒃᑯᐊ ᐱᐅᓕᓚᐅᕐᑕᑎᑦ. ᐸᓯᔭᒃᓴᐅᓂᖅ ᐊᐅᑉ ᐸᓯᔭᒃᓴᐅᖏᑦᑑᑉ ᑯᕕᔭᐅᓂᖓᓄᑦ ᐃᓄᖁᑎᑎᑦ ᐃᓴᕆᐊᓖᑦ ᐱᓯᒪᔭᐅᖁᓇᒋᑦ; ᐸᓯᔭᒃᓴᐅᓂᕐᒥᑦ ᐃᓱᒪᒋᔪᓐᓁᕐᕕᒋᓚᐅᒃᑭᑦ.’ 9ᑕᕝᕙ ᑍᒤᓕᐅᕐᓗᓯ ᐸᓯᔭᒃᓴᐅᓂᖅ ᐲᕋᔭᕐᐸᓯ ᐃᓕᑦᓯᓐᓂᑦ, ᓈᒻᒪᒃᑐᒥᒃ ᐱᓇᓱᐊᕈᑦᓯ ᐊᑕᓂᐅᑉ ᓵᖓᓂ.”
ᐊᕐᓁᑦ ᐅᓇᑕᕐᓂᒃᑯᑦ ᑎᒍᔭᐅᓯᒪᔪᑦ ᐱᓪᓗᒋᑦ
10“ᐅᓇᑕᕆᐊᕈᑦᓯ ᐊᑭᕋᑦᓯᓐᓂᒃ ᐊᑕᓂᐅᑉ ᒎᑎᑦᓯ ᓵᓚᖃᕐᑎᑉᐸᓯ ᐅᓇᑕᕐᓂᒃᑯᑦ, ᐊᖏᕐᕋᐅᑦᔨᒍᑦᓯᓗ ᐃᓄᖕᓂᒃ ᑎᒍᔭᑦᓯᓐᓂᒃ, 11ᑖᒃᑯᐊ ᐃᓚᖏᓐᓂᒃ ᑕᑯᒍᕕᑦ ᐊᕐᓇᒥᒃ ᐃᓂᖁᓇᕐᑐᒥᒃ, ᐃᒃᓯᒋᓗᒍᓗ ᓄᓕᐊᕐᑖᕆᔪᒪᓕᕈᕕᐅᒃ. 12ᑕᕝᕙ ᐃᒡᓗᖕᓄᑦ ᐊᖏᕐᕋᐅᑎᔭᒃᓴᕆᕙᑦ, ᑕᕝᕙᓂᓗ ᓄᔭᖏᑦ ᓴᓕᓗᒋᑦ ᑯᑮᔭᕐᓗᒍᓗ, 13ᑎᒍᔭᐅᓯᒪᔪᖅ ᐊᓐᓄᕌᖏᑕ ᐊᓯᖏᓐᓂᒃ ᐊᓐᓄᕌᕐᑎᓪᓗᒍ, ᐃᒡᓗᖕᓂᓗ ᐊᖏᕐᕋᖃᕐᑐᒃᓴᐅᕗᖅ ᐊᖓᔪᖅᑳᒥᓂᒡᓗ ᕿᒃᓵᒍᑎᖃᕐᑐᒃᓴᐅᕗᖅ ᑕᖅᑭᓕᒫᒥᒃ; ᑭᖑᓂᖓᒍᑦ ᑕᕝᕙ ᐃᓐᓇᖓᖃᑎᒋᔪᓐᓇᕐᓯᖓᔭᕐᐸᑦ, ᐅᐃᑖᕆᓗᓂᑎᑦ ᐃᕝᕕᓪᓗ ᓄᓕᐊᕐᑖᕆᓗᒍ. 14ᑭᖑᓂᖓᒍᓪᓕ ᖁᕕᐊᒋᖏᒃᑯᕕᐅᒃ, ᑕᕝᕙ ᐊᓂᑎᑕᒃᓴᕆᕙᑦ ᐃᓱᒪᕐᓱᓕᕐᓗᓂ ᐂᕕᒋᔪᒪᔭᒥᓄᑦ; ᓂᐅᕐᕈᑎᒋᔭᒃᓴᕆᓐᖏᓚᑦ ᑮᓇᐅᔭᒧᑦ, ᓂᐅᕕᐊᖑᓯᒪᔪᑎᑐᑦ ᐱᔨᑐᑦ ᑍᒤᑦᓴᕆᐊᖃᓐᖏᓚᖅ, ᐃᓐᓇᖓᖃᑎᒋᓯᒪᒐᕕᐅᒃ.”
ᐊᖓᔪᒃᓯᕐᐹᖑᔫᑉ ᐃᕐᓂᐅᑉ ᑭᖑᕐᖑᑎᔭᒃᓴᖓ ᐱᓪᓗᒍ
15“ᐊᖑᓪᓕ ᓄᓕᐊᖃᕐᐸᑦ ᒪᕐᕉᖕᓂᒃ, ᐂᑉᐸᖓ ᐅᖓᒋᓂᕐᓴᕆᓗᒍ ᐂᑉᐸᖓᓗ ᐅᖓᒋᖏᓐᓂᕐᓴᕆᓗᒍ, ᑖᒃᑯᖕᓇᓐᖓᓪᓗ ᐃᕐᓂᕐᑖᕐᓯᒪᒍᓂ ᑕᒪᖏᖕᓂᑦ, ᐅᖓᒋᓂᕐᓴᒥᓂᓪᓗ ᐅᖓᒋᖏᓐᓂᕐᓴᒥᓂᓪᓗ, ᐊᖓᔪᒃᓯᐅᔪᖅ ᐃᕐᓂᕐᑖᖓ ᓇᒡᓕᒋᖏᓐᓂᕐᓴᒥᓂᑦ ᐃᕐᓂᕐᑖᕆᓯᒪᒃᐸᒍ, 16ᑕᕝᕙ ᐱᖁᑎᒥᓂᒃ ᐃᕐᓂᕐᒥᓄᑦ ᑭᖑᕐᖑᑎᔭᒃᓴᖏᓐᓂᒃ ᑐᓂᓯᕝᕕᒃᓴᖓ ᐅᓪᓗᖅ ᓇᓪᓕᐅᑎᒃᐸᑦ, ᑕᕝᕙ ᐅᖓᒋᓂᕐᓴᖓᑕ ᐃᕐᓂᖓ ᐱᑎᖔᕐᑕᒃᓴᕆᓐᖏᓛ ᐅᖓᒋᖏᓐᓂᕐᓴᒥ ᐃᕐᓂᖓᑕ ᐱᔭᒃᓴᖏᓐᓂᒃ, ᐃᕐᓂᐊᖑᖄᕐᓯᒪᓂᖓᓄᑦ. 17ᐊᖓᔪᒃᓯᕐᐹᖁᑎᓂ ᐅᐱᒋᔭᒃᓴᕆᕚ, ᓄᓕᐊᖓᑕ ᐅᖓᒋᓂᕐᓴᖓᑕ ᐃᕐᓂᕆᖏᒃᑲᓗᐊᕐᑎᓪᓗᓂᐅᒃ, ᐱᖁᑎᒥᓕ ᐊᕕᒋᐊᖃᕐᑕᖏᓐᓂᑦ ᒪᕐᕈᐃᕐᓱᓪᓗᐊᕐᑐᓂᒃ ᐃᕐᓂᓂ ᐊᖓᔪᒃᓯᖅ ᑐᓂᓯᕕᒋᔭᒃᓴᕆᕚ, ᑖᓐᓇ ᐱᔪᓐᓇᕐᓂᖓᓂᒃ ᓯᕗᓪᓕᕐᒥᑦ ᐱᓯᒪᖕᒪᑦ; ᐊᖓᔪᒃᓯᐅᓂᖅ ᑖᑦᓱᒪ ᐱᒋᖕᒪᒍ.”
ᐃᕐᓂᖅ ᓈᓚᖏᑦᑐᖅ ᐱᓪᓗᒍ
18“ᐊᖑᓪᓕ ᐃᕐᓂᖃᕐᐸᑦ ᐊᖏᕈᓐᓇᖏᑦᑐᒥᒃ ᓈᓚᒍᓐᓇᖏᑦᑐᒥᒡᓗ, ᐃᕐᓂᖅ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᓈᓚᒍᒪᖃᑦᑕᖏᑉᐸᑦ, ᐋᖅᑭᒋᐊᕐᑕᐅᕙᒃᑲᓗᐊᕐᓗᓂ ᑖᒃᑯᓂᖓ ᓈᓚᒍᒪᖏᑦᐸᑦ, 19ᑕᕝᕙ ᐊᑖᑕᖓᑕ ᐊᓈᓇᖓᑕᓗ ᐃᒡᓗᒐᓴᖕᒥᖕᓂ ᐊᖓᔪᖅᑳᕆᔭᐅᔪᓄᑦ ᐋᑕᒃᓴᕆᕚ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖓᓄᑦ ᓇᔪᒐᕐᒥᖕᓂ, 20ᐅᖃᕐᓗᑎᒡᓗ ᐃᒡᓗᒐᓴᖕᓂ ᐊᖓᔪᖅᑳᓄᑦ, ‘ᐃᕐᓂᕗᑦ ᑐᓴᕈᓐᓇᖏᒻᒪᑦ ᐊᑭᕋᕐᑐᖃᑦᑕᕐᓗᓂᓗ, ᐅᕙᑦᑎᓐᓂᒡᓗ ᓈᓚᒍᒪᓇᓂ; ᓂᕆᑐᔫᓪᓗᓂᓗ ᐋᖓᔮᕐᑎᐅᓪᓗᓂᓗ.’ 21ᑕᕝᕙ ᐊᖑᑎᓕᒫᑦ ᐃᒡᓗᒐᓴᒡᔪᐊᓃᑦᑐᑦ ᒥᓪᓗᕐᓗᒍ ᑐᖁᑕᒃᓴᕆᕚᑦ; ᑍᒫᒃ ᑕᕝᕙ ᐱᐅᖏᑦᑐᓕᓂᖅ ᐲᕋᔭᕐᐸᓯ ᐊᑯᓐᓇᑦᓯᓐᓂᑦ. ᐃᓴᕆᐊᓕᒥᐅᓕᒫᑦ ᖃᓄᐃᑦᑐᖃᕐᓂᕕᓂᖓᓂᒃ ᑐᓴᕋᔭᕐᐳᑦ, ᓯᕘᕋᓕᕐᓗᑎᒡᓗ.”
ᖃᓄᐃᑦᑐᑐᐃᓐᓁᑦ ᐊᑦᔨᒌᖏᑦᑐᑦ ᐱᖁᔧᑦ
22“ᐊᖑᓪᓕ ᑐᖁᑕᐅᓯᒪᒃᐸᑦ ᐱᖁᔭᓂᒃ ᒪᓕᖏᓐᓂᖓᓄᑦ ᑐᖁᑕᐅᑦᔪᑎᒃᓴᐅᔪᒧᑦ ᑐᖁᑕᐅᒃᐸᓪᓗ, ᑎᒥᖓᓗ ᓂᕕᖓᑎᒃᑯᑦᓯᐅᒃ ᓇᐹᕐᑐᒥ, 23#ᒐᓔᑎ 3:13.ᐅᓐᓄᐊᓕᒫᖅ ᓈᓗᒍ ᑎᒥᖓ ᓂᕕᖓᑎᑕᐅᔪᒃᓴᐅᓐᖏᓚᖅ, ᐅᓪᓗᒥ ᑕᕝᕙᓂᑦᓮᓐᓇᖅ ᐃᓗᕕᕐᑕᐅᔪᒃᓴᐅᕗᖅ, ᓂᕕᖓᔪᖅ ᓇᐹᕐᑐᒥ ᒎᑎᐅᑉ ᓇᕐᕈᓇᕐᓯᓂᕋᕐᒪᒍ; ᓄᓇ ᓇᕐᕈᓇᕐᓯᑎᑕᒃᓴᕆᓐᖏᓚᓯ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓ ᓄᓇᑖᖑᖁᓪᓗᒍ ᐃᓕᑦᓯᓐᓄᑦ.”
Currently Selected:
ᒨᓯᓯ ᑕᓪᓕᒪᖏᑦ 21: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
