ᒨᓯᓯ ᑕᓪᓕᒪᖏᑦ 20
20
ᐅᓇᑕᕐᓂᐅᑉ ᐱᐅᓯᖏᑦ
1“ᐅᓇᑕᕆᐊᕐᓂᐊᓕᕈᑦᓯ ᐊᑭᕋᑦᓯᓐᓄᑦ, ᑕᑯᓕᕈᑦᓯᐅᒡᓗ ᕿᒧᒃᓯᐅᑎᖃᕐᑐᑦ ᐊᒃᓴᓗᐊᓕᖕᓂᒃ ᕿᒻᒥᕐᔪᐊᖃᕐᓗᑎᒡᓗ ᐅᓇᑕᕐᑐᒃᓴᖃᕐᓗᑎᒡᓗ ᐃᓕᑦᓯᓐᓂᑦ ᐅᓄᕐᓂᕐᓴᓂᒃ, ᓯᕘᕋᒋᔭᒃᓴᕆᓐᖏᓚᓯ; ᐊᑕᓂᐅᑉ ᒎᑎᑦᓯ, ᐃᓕᑦᓯᓐᓂᒃ ᐱᐅᓕᒃᓯᓚᐅᕐᑑᑉ ᐄᑦᔨᑉᑎᒥᑦ, ᑖᑦᓱᒪ ᐃᓚᒋᓂᐊᕐᒪᓯ. 2ᐅᓇᑕᕆᐊᕐᕕᖕᒧᓪᓕ ᑎᑭᓕᕈᑦᓯ, ᑐᓂᕐᕈᓯᕐᑎᑦᓯᔨ ᐅᓇᑕᕐᑐᒃᓮᑦ ᓯᕗᕌᓄᐊᕐᓗᓂ ᐅᓇᑕᕐᑐᒃᓴᓄᑦ ᐅᖃᕐᑐᒃᓴᐅᕗᖅ, 3‘ᐃᓴᕆᐊᓕᒥᐅᖑᔪᓯ, ᓈᓚᒋᑦᓯ! ᐅᓪᓗᒥ ᐅᓇᑕᕆᐊᕐᓂᐊᕋᑦᓯ ᐊᑭᕋᑦᓯᓐᓂᒃ, ᓯᕘᕋᒋᔭᒃᓴᕆᓐᖏᓚᓯ, ᓴᐱᕐᑐᒃᓴᐅᓇᓯᓗ, ᐅᕝᕙᓗ ᐅᐃᒻᒪᒃᑐᒃᓴᐅᓐᖏᓚᓯ. 4ᐊᑕᓂᐅᑉ ᒎᑎᑦᓯ ᐃᓚᒋᓂᐊᕐᒪᓯ, ᑖᑦᓱᒪᓗ ᓵᓚᒃᓴᕐᑎᓐᓂᐊᕐᐹᓯ.’
5“ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᐅᓇᑕᕐᑐᒃᓴᓄᑦ ᐅᖃᕐᑐᒃᓴᐅᕗᑦ, ‘ᐅᕙᓃᑦᑐᖃᕐᐹ ᐃᒡᓗᓕᐅᕋᑖᕐᓯᒪᔪᒥᒃ, ᓱᓕᓕ ᑐᒃᓯᐊᕐᓂᒃᑯᑦ ᑐᓂᔭᐅᓯᒪᖏᑦᑐᒥᒃ? ᑍᒤᓯᒪᔪᖃᕐᐸᑦ ᑖᓐᓇ ᐊᖏᕐᕋᕐᑐᒃᓴᐅᕗᖅ, ᐊᖏᕐᕋᖏᒃᑯᓂ, ᐅᓇᑕᕐᑐᓂᓗ ᑐᖁᑕᐅᒃᐸᑦ, ᑕᕝᕙ ᐊᓯᐊᓄᑦ ᐃᒡᓗᒃᓴᖓ ᑐᒃᓯᐊᕐᓂᒃᑯᑦ ᑐᓂᔭᐅᓕᕋᔭᕐᐳᖅ. 6ᐅᕙᓃᑦᑐᖃᕆᕚ ᐱᕈᕐᓰᕕᖁᑎᒥᓂ ᕔᓂᒃᓴᓂᒃ ᑲᓐᖓᕐᓱᐃᕋᑖᕐᓯᒪᔪᒥᒃ, ᓱᓕ ᕔᓂᒃᓴᓂᒃ ᑲᑎᕐᓱᐃᔪᓐᓇᕐᓯᓚᐅᖏᑦᑐᒥᒃ? ᑍᒤᓯᒪᔪᖃᕐᐸᑦ ᑖᓐᓇ ᐊᖏᕐᕋᕐᑐᒃᓴᐅᕗᖅ, ᐊᖏᕐᕋᖏᒃᑯᓂ, ᐅᓇᑕᕐᑐᓂᓗ ᑐᖁᑕᐅᒃᐸᑦ, ᑕᕝᕙ ᐊᓯᖓᓄᑦ ᕔᓃᑦ ᖁᕕᐊᓲᑎᒋᔭᐅᓗᑎᒃ ᐱᔭᐅᓕᕋᔭᕐᐳᑦ. 7ᐅᕙᓃᑦᑐᖃᕆᕚ ᓄᓕᐊᒃᓴᖃᕐᑐᒥᒃ ᑲᑎᑎᑕᒃᓴᐅᓂᕐᒧᑦ ᐊᑐᐃᓐᓇᐅᓕᕐᓯᒪᔪᒥᒃ? ᑍᒤᑦᑐᖃᕐᐸᑦ ᑖᓐᓇ ᐊᖏᕐᕋᕐᑐᒃᓴᐅᕗᖅ, ᐊᖏᕐᕋᖏᒃᑯᓂ, ᐅᓇᑕᕐᑐᓂᓗ ᑐᖁᑕᐅᒃᐸᑦ, ᑕᕝᕙ ᐊᓯᐊᑕ ᐊᕐᓇᖅ ᑖᓐᓇ ᓄᓕᐊᕐᑖᕆᓕᕋᔭᕐᒪᒍ.’
8“ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᐅᖃᒃᑲᓐᓂᕋᔭᕆᕗᑦ ᐅᓇᑕᕐᑐᒃᓴᓄᑦ, ‘ᐅᕙᓃᑦᑐᖃᕐᐹ ᓯᕘᕋᓂᕐᒧᑦ ᓄᑭᖃᑦᓯᐊᕈᓐᓃᕐᑐᒥᒃ? ᑍᒤᑦᑐᖃᕐᐸᑦ ᑖᓐᓇ ᐊᖏᕐᕋᕐᑐᒃᓴᐅᕗᖅ, ᐊᖏᕐᕋᖏᒃᑯᓂ, ᐃᓚᒥᓂᒃ ᓯᕘᕋᓕᕐᑎᑦᓯᒐᔭᕐᒪᑦ.’ 9ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᐅᖃᓪᓚᒌᕐᐸᑕ ᐅᓇᑕᕐᑐᒃᓴᓄᑦ, ᐊᖓᔪᖅᑳᖏᑦ ᐊᑐᓂᑦ ᐃᓚᒌᖕᓂᐊᕐᑐᓂᒃ ᓂᕈᐊᓕᕋᔭᕐᐳᑦ.
10“ᐃᒡᓗᒐᓴᖕᓄᑦ ᖃᒡᓕᓕᕈᑦᓯ ᐅᓇᑕᕆᐊᕐᓗᓯ, ᐅᓇᑕᖏᑦᔪᑎᒃᓴᒥᒃ ᐅᖃᕐᕕᐅᑎᑦᓴᕆᐊᖃᕐᐸᓯ. 11ᐅᓇᑕᕈᒪᖏᓪᓗᑎᒃ ᑭᐅᒃᐸᑕ ᐊᕙᓗᕐᔪᐊᖓᑕᓗ ᐅᒃᑯᐊᖓᓂᒃ ᒪᑐᐃᕐᓯᓗᑎᒃ ᓴᐱᓕᕐᐸᑕ, ᑕᕝᕙ ᐃᓄᓕᒫᖏᑦ ᓯᐊᓛᕐᑖᕆᔭᒃᓴᕆᕙᓯ ᐊᒃᓱᕈᕐᓇᕐᑐᓂᒡᓗ ᓴᓇᑎᑕᒃᓴᕆᕙᓯ. 12ᐃᒡᓗᒐᓴᒡᔪᐊᕐᒥᐅᓪᓕ ᐃᓕᑦᓯᓐᓄᑦ ᐃᒻᒥᖕᓂᒃ ᑐᓂᔪᒪᖏᑉᐸᑕ, ᐅᓇᑕᖔᕈᒫᒃᐸᑕᓗ, ᑕᕝᕙ ᐊᕙᓗᔭᒃᓴᕆᕙᓯ ᐅᓇᑕᕐᑐᒃᓴᖁᑎᑦᓯᓐᓄᑦ. 13ᐊᑕᓂᐅᓪᓗ ᒎᑎᑦᓯ ᐃᒡᓗᒐᓮᑦ ᑖᒃᑯᐊ ᐃᓕᑦᓯᓐᓄᑦ ᑐᓂᒃᐸᒋᑦ ᓵᓚᒋᒍᑦᓯᐅᒡᓗ, ᑕᕝᕙ ᑕᕝᕙᓃᑦᑐᑦ ᐊᖑᑎᓕᒫᑦ ᑐᖁᑕᒃᓴᕆᕙᓯ. 14ᐊᕐᓁᓪᓕ ᕿᑐᕐᖓᖏᓪᓗ, ᐆᒪᔪᖁᑎᖏᓪᓗ ᓱᓇᑐᐃᓐᓇᓕᒫᖏᓪᓗ ᑕᕝᕙᓂ ᐃᒡᓗᒐᓴᒡᔪᐊᓃᑦᑐᑦ ᐱᑖᕆᔭᒃᓴᕆᕙᓯ. ᐊᑭᕋᑦᓯ ᐱᖁᑎᓕᒫᑦᓯᐊᖏᑦ ᐊᑕᖏᕐᓗᒋᑦ ᐱᑖᕆᔪᓐᓇᕐᐸᓯ. ᐊᑕᓂᐅᑉ ᒎᑎᑦᓯ ᑐᓂᓯᒪᖕᒪᒋᑦ ᐃᓕᑦᓯᓐᓄᑦ. 15ᑍᒫᒃ ᑕᕝᕙ ᐃᒡᓗᒐᓮᑦ ᐅᖓᓯᒋᔭᑦᓯᓐᓃᑦᑐᑦ ᐱᓇᓱᐊᕐᕕᒋᔭᒃᓴᕆᕙᓯ, ᑕᒫᓐᖓᑦ ᐃᓅᖃᑎᒌᒡᔪᐊᓂᑦ ᓄᓇᑖᕆᓛᕐᑕᑦᓯᓐᓂᑦ ᐅᖓᓯᒃᐸᑕ.
16“ᓄᓇᒋᓕᕐᑕᑦᓯᓐᓂᓕ ᐃᒡᓗᒐᓮᑦ ᓵᓚᒋᒍᑦᓯᐅᒃ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᑐᓂᒃᐸᒋᑦ, ᐃᓄᓕᒫᖏᑦ ᐊᓂᕐᓂᖃᕐᑐᓕᒫᑦ ᑐᖁᑕᒃᓴᕆᕙᓯ. 17ᐊᑕᖏᑦᓯᐊᕐᓗᒋᑦ ᐃᓄᖏᑦ ᓄᒍᑦᓯᐊᕆᐊᖃᕐᐸᓯ, ᕼᐃᑍᑎᑦ, ᐊᒧᕅᑎᓪᓗ, ᑬᓇᓂᒥᐅᑦ, ᐱᕆᔧᑎᓪᓗ, ᕼᐃᕔᑎᑦ, ᔨᐳᓮᑎᓪᓗ, ᑍᒤᓕᐅᖁᓪᓗᓯ ᐊᑕᓂᐅᑉ ᒎᑎᑦᓯ ᐱᖁᓯᒪᖕᒪᓯ. 18ᑐᖁᑕᒃᓴᕆᕙᓯ, ᐊᔪᕆᕐᓱᕐᑕᐅᖁᓇᓯ ᒎᑎᓐᖑᐊᕆᔭᒥᖕᓄᑦ ᑐᒃᓯᐊᕐᓗᑎᒃ ᐱᐅᖏᑦᑐᐊᓗᖕᓂᒃ ᐃᓕᖅᑯᓯᕆᖃᑦᑕᕐᑕᖏᓐᓂᒃ, ᐊᔪᕐᑐᓕᑎᑕᐅᖁᓇᓯᓗ ᐊᑕᓂᕐᒧᑦ ᒎᑎᑦᓯᓐᓄᑦ.
19“ᐃᒡᓗᒐᓴᖕᓂᒃ ᐊᑯᓂ ᐊᕙᓗᓯᓯᒪᓕᕈᑦᓯ, ᐅᓇᑕᕐᓂᒃᑯᑦ ᓵᓚᒋᓇᓱᐊᕐᓗᒋᑦ, ᓇᐹᕐᑐᐃᑦ ᐱᕈᕐᑐᓖᑦ ᓇᑲᑎᕐᑕᒃᓴᕆᓐᖏᓚᓯ, ᐅᓕᒪᐅᑎᓄᑦ. ᐱᕈᕐᑐᖏᑦ ᓂᕿᒋᔭᕆᐊᖃᕋᑦᓯᐅᒃ, ᓇᐹᕐᑐᐃᓪᓕ ᓇᑲᑎᕐᑕᒃᓴᕆᓐᖏᓚᓯ. ᓇᐹᕐᑐᑦ ᓇᑎᕐᓇᒦᑦᑐᑦ ᐊᑭᕋᕆᖏᓐᓇᑦᓯᐅᒃ. 20ᓇᐹᕐᑐᐃᓪᓕ ᐊᓯᖏᑦ ᓇᑲᑎᕈᓐᓇᕐᐸᓯ ᖃᐅᔨᒪᔭᓯ ᓂᕿᒃᓴᓕᐅᕈᓐᓇᖏᑦᑐᑦ ᑕᒪᒃᑯᐊ ᓇᑲᑎᕐᓗᒋᑦ ᓴᐴᓗᑕᓕᐊᕆᓗᒋᓪᓗ ᐃᒡᓗᒐᓴᒡᔪᐊᓄᑦ ᐃᓕᑦᓯᓐᓂᒃ ᐅᓇᑕᕋᓱᐊᕐᑐᓄᑦ, ᓵᓚᖃᓚᐅᖏᓐᓂᑦᓯᓐᓂ ᑖᒃᑯᓂᖓ.”
Currently Selected:
ᒨᓯᓯ ᑕᓪᓕᒪᖏᑦ 20: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
