ᒨᓯᓯ ᑕᓪᓕᒪᖏᑦ 19
19
ᐃᒡᓗᒐᓮᑦ ᕿᒫᕕᒃᓴᐅᔪᑦ
ᒨᓯᓯ ᓯᑕᒪᖏᑦ 35:9-28; ᔮᓱᐊ 20:1-9
1 #
ᔮᓱᐊ 20:1-9. “ᐊᑕᓂᐅᑉ ᒎᑎᑦᓯ ᐃᓅᖃᑎᒌᒡᔪᐊᓂᒃ ᓄᓇᖃᕐᑐᓂᒃ ᓄᖑᑎᑦᓯᓚᐅᕐᓂᖓᑕ ᑭᖑᓂᖓᒍᑦ ᐃᓕᑦᓯᓐᓄᑦ ᓄᓇᑖᕆᔭᐅᑎᓯᒪᓕᕐᐸᒍ ᑖᒃᑯᐊᓗ ᓄᓇᖓᑦ ᓄᓇᑖᕆᒍᑦᓯᐅᒃ ᐃᒡᓗᒐᓴᖏᓪᓗ ᐃᒡᓗᒋᓕᕈᑦᓯᐅᒃ, 2ᐃᒡᓗᒐᓴᖕᓂᒃ ᐱᖓᓱᓂᒃ ᓴᓂᕐᕔᔪᒃᓴᐅᕗᓯ ᓄᓇᒥ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᐃᓕᑦᓯᓐᓄᑦ ᓄᓇᑖᕆᖁᓪᓗᒍ. 3ᐊᖅᑯᑎᓕᐅᕐᑐᒃᓴᐅᕗᓯ, ᓄᓇᑖᕆᔭᓕᒫᑦᓯᓐᓂ ᐱᖓᓱᐃᓕᖅᑲᖓᓗᒍ ᐅᖓᓯᖕᓂᖏᑦ ᖃᐅᔨᓴᕐᓗᒋᑦ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᓄᓇᑖᕆᖁᓪᓗᒍ, ᐃᓅᖃᑎᒥᓂᒃ ᑐᖁᑦᓯᔪᖃᕐᐸᑦ ᓄᓇᓖᑦ ᑖᒃᑯᐊ ᓇᓪᓕᐊᓐᓄᑦ ᕿᒫᔪᖃᕈᓐᓇᖁᓪᓗᒍ ᓴᐳᑎᔭᐅᑦᔪᑎᒃᓴᖓᓄᑦ. 4ᐃᓄᒡᓕ ᐃᓅᖃᑎᒥᓂᒃ ᐱᔭᕆᐊᖃᕐᐳᖅ, ᑖᒃᑯᓄᖓ ᓇᓪᓕᐊᓐᓄᑦ ᕿᒫᒃᐸᑦ ᐃᒻᒥᓂᒃ ᓴᐳᑎᔪᓐᓇᕐᐳᖅ. ᐃᓅᖃᑎᒥᓂᒃ ᐱᔮᕆᖏᓪᓗᓂ ᑐᖁᑦᓯᒃᐸᑦ ᓯᕗᓂᖓᓂ ᐊᑭᕋᕆᓯᒪᖏᓪᓗᒍ. 5ᐊᖑᑏᒃ ᒪᕐᕉᒃ ᓇᐹᕐᑐᓂᒃ ᓇᑲᑎᕆᔭᕐᑐᕐᐸᑎᒃ, ᐂᑉᐸᖓ ᓇᐹᕐᑐᒥᒃ ᐅᓕᒪᐅᒻᒧᑦ ᓇᑲᑦᓯᒐᓱᒡᓗᓂ, ᐅᓕᒪᐅᑎᖓ ᐃᐳᖓᓂᑦ ᐲᑲᓪᓚᒡᓗᓂ ᐂᑉᐸᓂ ᐅᓕᒪᐅᑎᒧᑦ ᐱᒃᓯᒡᕕᖏᓗᓂᐅᒃ ᑐᖁᑉᐸᒍ, ᑕᕝᕙ ᑐᖁᑦᓯᔪᖅ ᕿᒫᔪᓐᓇᕋᔭᕐᐳᑦ ᑖᒃᑯᓄᖓ ᐃᒡᓗᒐᓴᖕᓄᑦ ᓇᓪᓕᐊᓐᓄᑐᐃᓐᓇᖅ ᐃᒻᒥᓂᒡᓗ ᓴᐳᑎᓗᓂ. 6ᑐᖁᑕᐅᔪᒥᒡᓕ ᐊᑭᔪᒪᔪᖅ ᐊᒃᓱᕈᕐᓗᓂ ᑐᖁᑦᓯᔪᒥᒃ ᒪᓕᒃᐸᑦ ᐊᖑᓗᒍᓗ ᕿᒫᔪᖅ, ᐊᖅᑯᑎᐅᑉ ᓯᕕᑐᓂᖓᓄᑦ, ᐃᑭᓕᕐᓗᒍᓗ ᑐᖁᑉᐸᒍ, ᐊᖑᑦ ᑖᓐᓇ ᑐᖁᑕᒃᓴᐅᖏᒃᑲᓗᐊᕐᑎᓪᓗᒍ, ᑐᖁᑕᓂ ᐊᑭᕋᕆᓚᐅᖏᒻᒪᒍ ᓯᕗᓂᖓᓂ. 7ᑍᒤᒻᒪᑦ ᑕᕝᕙ ᐱᖁᔨᕗᖓ ᐃᓕᑦᓯᓐᓂᒃ, ᐃᒡᓗᒐᓴᖕᓂᒃ ᐱᖓᓱᓂᒃ ᓇᓗᓁᕐᓯᖁᔨᓯᒪᕗᖓ ᕿᒫᕕᒃᓴᐅᓂᐊᕐᑐᓂᒃ.
8“ᐊᑕᓂᐅᓪᓕ ᒎᑎᑦᓯ ᓄᓇᒋᔭᓯ ᑭᒡᓕᖓ ᐊᖏᒡᓕᒋᐊᕐᑎᑉᐸᒍ, ᑕᒪᓐᓇ ᓯᕗᓕᕕᓂᑦᓯᓐᓄᑦ ᐊᖏᕈᑎᒋᓯᒪᒐᒥᐅᒃ ᑍᒤᓐᓂᐊᕐᓂᕋᕐᓗᒍ, 9ᑕᕝᕙ ᑲᒪᑦᓯᐊᕐᓗᓯ ᐱᖁᔨᓂᓕᒫᖏᑦ ᐊᑐᑦᓯᐊᕈᑦᓯᐅᒃ, ᐅᓪᓗᒥ ᐱᖁᔨᑦᔪᑎᒋᔭᒃᑲ, ᐊᑕᓂᖅ ᒎᑎᓯ ᐅᖓᒋᑦᓯᐊᕐᓗᒍ ᐊᑐᕐᑕᐅᖁᔭᖏᓪᓗ ᐊᑐᑦᓯᐊᕐᓗᒋᑦ, ᑕᕝᕙ ᐃᒡᓗᒐᓮᑦ ᕿᒫᕖᑦ ᐱᖓᓱᑦ ᐃᓚᒃᑲᓐᓂᕋᔭᕐᐸᓯ ᐱᖓᓱᒃᑲᓐᓂᕐᓂᒃ. 10ᑍᒤᓕᐅᕐᑐᒃᓴᐅᕗᓯ, ᐸᓯᔭᒃᓴᐅᖏᑦᑐᓂᒃ ᐃᓄᖕᓂᒃ ᑐᖁᑕᐅᔪᖃᖃᑦᑕᖁᓇᒍ ᓄᓇᑦᓯᓐᓂ ᐊᑕᓂᐅᑉ ᒎᑎᑦᓯ ᑐᓂᔭᖓᓂ ᐃᓕᑦᓯᓐᓄᑦ ᓄᓇᑖᕆᖁᓪᓗᒍ, ᐃᓕᑦᓯᓗ ᐸᓯᔭᒃᓴᐅᖁᓇᓯ ᑐᖁᑕᐅᔪᑦ ᐱᓪᓗᒋᑦ.
11“ᐊᖑᓪᓕ ᐃᓅᖃᑎᒥᓂᒃ ᐆᒥᓱᒃᐸᑦ, ᐱᕕᒃᓴᒥᓂᒡᓗ ᓈᒻᒪᓈᕐᓯᓗᓂ, ᐱᔮᕆᓗᓂ ᐱᒋᐊᕐᐸᒍ, ᐃᑭᓕᕐᓗᒍᓗ ᑐᖁᑉᐸᒍ, ᑐᖁᑦᓯᔪᕐᓗ ᕿᒫᒃᐸ ᐃᒡᓗᒐᓴᖕᓄᑦ ᓇᓪᓕᐊᓐᓄᑦ ᓇᓗᓁᕐᓯᒪᔪᓄᑦ. 12ᑕᕝᕙ ᓄᓇᒋᔭᖓᓂ ᐊᖓᔪᖅᑳᖑᔪᑦ ᑖᑦᓱᒪ ᑐᖁᑕᐅᔫᑉ ᐃᓚᒋᔭᖏᓐᓂᒃ ᑎᓕᓯᒐᔭᕐᐳᑦ ᑐᖁᑦᓯᓯᒪᔪᖅ ᑎᒍᔭᐅᔭᕐᑐᖁᓪᓗᒍ ᑍᑲᓐᖓᑦ, ᐊᑭᓂᐊᕈᒪᔪᒧᓪᓗ ᑐᓂᔭᐅᓗᓂ, ᑖᓐᓇ ᑐᖁᑦᓯᔪᕕᓂᖅ ᑐᖁᑕᐅᖁᓪᓗᒍ. 13ᓂᑲᒋᔭᐅᔭᕆᐊᖃᓐᖏᓚᖅ, ᐃᓴᕆᐊᓕᒥᐅᑦ ᑕᕝᕙ ᓴᓗᒻᒪᕐᑕᐅᒐᔭᕐᐳᑦ ᑐᖁᑕᐅᔪᒃᓴᐅᖕᒪᑦ ᐸᓯᔭᒃᓴᐅᖏᑦᑑᑉ ᑐᖁᑕᐅᓂᕕᓂᖓᓂᑦ, ᖃᓄᐃᓕᐅᕐᓂᓕᒫᑦᓯᒍᑦ ᖃᓄᐃᖏᑦᓯᐊᖁᓪᓗᓯ.”
ᓄᓇᐅᑉ ᑭᒡᓕᑐᖃᕕᓂᖏᑦ
14 #
ᒨᓯᓯ ᑕᓪᓕᒪᖏᑦ 27:17. “ᐃᓅᖃᑎᑦᓯ ᓄᓇᖓᑕ ᑭᒡᓕᖓᑕ ᓇᓗᓁᒃᑯᑕᖓᓂᒃ ᐲᕐᓯᔪᒃᓴᐅᓐᖏᓚᑎᑦ, ᓯᕗᓂᑦᓯᓐᓂ ᐃᓅᓚᐅᕐᑐᑦ ᐃᓕᔭᕕᓂᖏᓐᓂᒃ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂᒃ ᐃᓕᑦᓯᓐᓄᑦ.”
ᖃᐅᔨᓯᒪᔪᑦ ᐱᑦᔪᑎᒋᓪᓗᒋᑦ
15 #
ᒨᓯᓯ ᓯᑕᒪᖏᑦ 35:30; ᒨᓯᓯ ᑕᓪᓕᒪᖏᑦ 17:6; ᒫᑎᐅᓯ 18:16; ᔪᐊᓇᓯ 8:17; 2 ᑯᕆᓐᑎ 13:1; 1 ᑎᒧᑎ 5:19; ᐄᑉᕈᐃᓄᑦ 10:28. “ᐃᓄᖕᒥᒃ ᐊᑕᐅᓯᑐᐃᓐᓇᕐᒥᒃ ᖃᐅᔨᓯᒪᔪᖃᕐᑎᓪᓗᒍ ᓈᒻᒪᓐᖏᓚᖅ ᐊᖑᒻᒥᒃ ᐱᕋᔭᒃᓯᒪᔪᒥᒃ ᐸᓯᔭᒃᓴᐅᑎᑦᓯᓇᓱᒋᐊᒃᓴᖅ; ᒪᕐᕉᒃᐸᑎᒡᓕ ᖃᐅᔨᓯᒪᔫᒃ ᐱᖓᓱᓪᓘᓐᓃᑦ, ᐸᓯᔭᒃᓴᓐᖑᕐᑎᑦᓯᔪᓐᓇᕐᐳᑦ. 16ᐊᖑᓪᓕ ᐃᓅᖃᑎᒥᓂᒃ ᐸᓯᔭᒃᓴᓐᖑᕐᑎᑦᓯᓇᓱᐊᕋᔭᕐᐸᑦ ᓱᓕᖏᑦᑐᒧᑦ ᓵᑕᐅᑎᑦᓯᓇᓱᒃᐸᑦ ᐱᕋᔭᒃᓯᒪᓂᕅᓗᓂ, 17ᑕᕝᕙ ᑕᒪᕐᒥᒃ ᑖᒃᑯᐊᒃ ᑲᑎᕕᐅᓲᒧᑦ ᑐᒃᓯᐊᕐᕕᖕᒧᐊᕐᑐᒃᓴᐅᕘᒃ ᖃᐅᔨᓇᓱᐊᕐᑕᐅᓗᑎᒡᓗ ᑐᑭᑖᕈᑕᐅᔪᒃᓴᐅᕘᒃ ᑐᓂᕐᕈᓯᕐᑎᑦᓯᔨᓄᑦ ᐋᖅᑭᒃᓱᐃᔨᓄᓪᓗ ᐱᓇᓱᐊᕐᕕᒃᓴᖏᑕ ᓇᓪᓕᐅᑎᓯᒪᓂᖏᑦ ᒪᓕᒡᓗᒋᑦ. 18ᐋᖅᑭᒃᓱᐃᔩᑦ ᖃᐅᔨᓇᓱᐊᑦᓯᐊᕐᑐᒃᓴᐅᕗᑦ ᐊᐱᕐᓱᑲᑕᑦᓯᐊᕐᓗᑎᒃ; ᐊᖑᓪᓕ ᓱᓕᖏᑦᑐᒥᒃ ᐱᑦᔪᑎᖃᕐᓗᓂ ᓵᑕᐅᑎᑦᓯᓇᓱᐊᕐᓯᒪᒃᐸᑦ ᐃᓴᕆᐊᓕᒥᐅᑕᐅᖃᑎᒥᓂᒃ, 19ᑕᕝᕙ ᓱᒋᐊᕐᑕᐅᔪᒃᓴᐅᕗᖅ ᑖᑦᓱᒪ ᐸᓯᔭᒃᓴᐅᓂᕋᕐᑕᐅᔫᑉ ᓱᒋᐊᕐᑕᐅᑦᔪᑎᒋᒐᔭᓐᖑᐊᓚᐅᕐᑕᖓᓂᒃ. ᑕᕝᕙ ᑍᒤᓕᐅᕐᓗᓯ ᑕᒪᓐᓇ ᐱᐅᖏᑦᑐᓕᓂᖅ ᓄᖅᑲᕐᑎᒃᑲᔭᕐᐸᓯ. 20ᑕᕝᕙ ᐃᓄᓕᒫᓄᑦ ᑐᓴᕐᑕᐅᒐᔭᕐᐳᖅ ᖃᓄᐃᓕᐅᕐᑐᖃᕐᓯᒪᖕᒪᖔᑦ; ᓯᕘᕋᓕᕐᓗᑎᒡᓗ, ᑕᒪᑐᒥᖓᓗ ᐱᐅᖏᑦᑐᒥᒃ ᐱᓇᓱᐊᕐᑐᖃᕈᒪᔪᓐᓃᕋᔭᕐᐳᖅ. 21#ᒨᓯᓯ ᐂᑉᐸᖏᑦ 21:23-25; ᒨᓯᓯ ᐱᖓᔪᖏᑦ 24:19,20; ᒫᑎᐅᓯ 5:38.ᑍᒤᓕᐅᕐᑐᖃᕋᔭᕐᐸᑦ ᑕᑯᓐᓇᕐᓂᑦᓯᒍᑦ ᓂᑲᒍᓱᓕᕐᑐᒃᓴᐅᓐᖏᓚᓯ; ᑕᒪᓐᓇ ᓱᒋᐊᕐᑕᐅᓂᖅ ᐊᑭᓕᕐᑕᐅᔭᕆᐊᖃᕐᒪᑦ ᐃᓅᓯᖅ ᐃᓅᓯᕐᒧᑦ, ᐃᔨ ᐃᔨᒨᑦ, ᑭᒍᑎ ᑭᒍᑎᒧᑦ, ᐊᒡᒊᓪᓗ ᐊᒡᒐᓄᑦ, ᐃᑎᒊᓪᓗ ᐃᑎᒐᖕᓄᑦ.”
Currently Selected:
ᒨᓯᓯ ᑕᓪᓕᒪᖏᑦ 19: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
