ᒨᓯᓯ ᑕᓪᓕᒪᖏᑦ 17
17
1“ᐊᑕᓂᕐᒧᑦ ᒎᑎᑦᓯᓐᓄᑦ ᑐᓂᕐᕈᓯᕐᑐᒃᓴᐅᓐᖏᓚᑎᑦ ᐃᒻᒧᒃᓯᐅᒐᕐᒥᒃ ᓰᐱᒥᒡᓘᓐᓃᑦ ᐃᓕᖅᑯᓯᕐᓱᖏᑦᑐᒥᒃ; ᐊᑕᓂᐅᑉ ᒎᑎᑦᓯ ᑍᒤᑦᑐᑦ ᐆᒥᒋᖕᒪᒋᑦ.
2“ᓄᓇᒋᔭᑦᓯ ᐊᓯᐊᓂ ᑐᓴᕋᔭᕈᑦᓯ ᐊᖑᑎᑦ ᐃᓚᖏᑦ ᐊᕐᓁᓪᓘᓐᓃᑦ ᐊᑕᓂᕐᒧᑦ ᐊᔪᕐᑐᓕᓂᕋᕐᑕᐅᔪᓂᒃ ᐊᖏᖃᑎᒌᒍᑎᒋᓯᒪᔭᖓᓂᒡᓗ ᓯᖁᒥᑦᓯᔪᖃᕐᓂᕅᔪᖃᕐᐸᑦ, 3#ᒨᓯᓯ ᐂᑉᐸᖏᑦ 22:20.ᑐᒃᓯᐊᖃᑦᑕᓕᕐᑐᖃᕐᐸᑦ ᐱᔨᑦᓯᓕᕐᑐᖃᕐᐸᓪᓗ ᒎᑎᓐᖑᐊᓄᑦ ᐅᕝᕙᓗ ᓯᕿᓂᕐᒧᑦ ᑕᖅᑭᕐᒧᓪᓘᓐᓃᑦ ᐅᓪᓗᕆᐊᓄᓪᓘᓐᓃᑦ, ᐊᑕᓂᐅᑉ ᐱᖁᔨᑦᔪᑎᒋᓯᒪᔭᖓᓄᑦ ᐊᑭᕋᕐᑐᕐᑐᓂᒃ. 4ᑍᒤᑦᑐᒥᒃ ᐅᖃᐅᓯᐅᔪᒥᒃ ᑐᓴᕈᑦᓯ, ᖃᐅᔨᓇᓱᐊᑦᓯᐊᕐᑐᒃᓴᐅᕗᓯ ᐊᐱᕐᓱᖃᑦᑕᕐᓗᓯ, ᑕᒪᓐᓇᓗ ᓱᓕᒃᐸᑦ ᐱᐅᖏᑦᑐᓕᓂᕐᒥᒡᓗ ᑍᒤᑦᑐᒥᒃ ᐊᑐᕐᑐᖃᓕᕐᐸᑦ ᐃᓴᕆᐊᓕᒥ, 5ᑕᕝᕙ ᐃᓅᒃ ᐊᖑᓪᓘᓐᓃᑦ ᐊᕐᓇᕐᓘᓐᓃᑦ ᓄᓇᓖᑦ ᓯᓚᑖᓄᐊᕈᑎᓗᒍ ᒥᓪᓗᕐᑕᐅᓗᓂ ᑐᖁᑕᐅᔪᒃᓴᐅᕗᖅ. 6#ᒨᓯᓯ ᓯᑕᒪᖏᑦ 35:30; ᒨᓯᓯ ᑕᓪᓕᒪᖏᑦ 19:15; ᒫᑎᐅᓯ 18:16; 2 ᑯᕆᓐᑎ 13:1; 1 ᑎᒧᑎ 5:19; ᐄᑉᕈᐃᓄᑦ 10:28.ᑐᖁᑕᐅᔪᒃᓴᐅᕗᕐᓕ ᒪᕐᕉᖕᓂᒃ ᐅᖓᑖᓄᓪᓘᓐᓃᑦ ᖃᐅᔨᓯᒪᓪᓚᕆᒃᑐᓂᒃ ᓇᓗᓁᕐᓯᔪᓐᓇᕐᑐᕐᑕᖃᕐᐸᑦ ᓈᒻᒪᖏᑦᑐᓕᓂᕅᔪᓂᒃ ᑖᑦᓱᒥᖓ; ᑐᖁᑕᐅᔪᒃᓴᐅᓐᖏᓚᕐᓕ ᐊᑕᐅᓯᑐᐃᓐᓇᕐᒥᒃ ᖃᐅᔨᓯᒪᔪᖃᕐᑎᓪᓗᒍ. 7#1 ᑯᕆᓐᑎ 5:13.ᖃᐅᔨᓯᒪᔪᓪᓕ ᓯᕗᓪᓕᕐᐸᐅᓗᑎᒃ ᒥᓗᕆᐊᖅᑳᕐᑐᒃᓴᐅᕗᑦ ᐅᔭᖅᑲᓄᑦ ᑐᖁᖁᓪᓗᒍ, ᑕᕝᕙ ᑭᖑᓂᖓᒍᑦ ᐃᓄᓕᒫᑦ ᒥᓪᓗᓕᕋᔭᕐᐳᑦ ᑖᑦᓱᒥᖓ; ᑕᕝᕙ ᑍᒤᓕᐅᕐᓗᓯ ᐱᐅᖏᑦᑐᓕᓂᖅ ᑍᒤᑦᑐᖅ ᓄᖅᑲᕐᑎᒃᑲᔭᕐᐸᓯ.
8“ᐃᓚᖏᓪᓕ ᓄᓇᓕᖕᓂᑦ ᐋᖅᑭᒃᓱᐃᔨᐅᔪᓂᑦ ᐃᓄᑑᑦᔭᐅᓗᑎᒃ ᐅᖁᒤᓗᐊᕐᐸᑕ ᐋᖅᑭᒃᑕᐅᔭᕆᐊᒃᓴᖅ, ᓄᓇᖁᑎᖃᕐᓂᖅ ᓇᓪᓕᐊᑦ ᐱᖃᕆᐊᖃᕐᒪᖔᑦ ᐅᕝᕙᓗ ᑎᒥᒃᑯᑦ ᐋᓐᓂᕐᑕᐅᓯᒪᔪᖃᕐᐸᑦ ᐅᕝᕙᓗ ᑲᒪᔪᖃᕆᐊᖃᕐᐸᑦ ᐱᔮᕆᓗᓂ ᐃᓄᐊᕐᓯᒪᔪᒥᒃ ᑐᖁᑦᓯᓯᒪᔪᒥᒡᓘᓐᓃᑦ. ᑕᒪᒃᑯᐊ ᓇᓪᓕᐊᑦ ᐊᑐᕐᑕᐅᓯᒪᒃᐸᑕ, ᑕᕝᕙ ᑐᒃᓯᐊᕐᕕᖕᒧᐊᕐᑐᒃᓴᐅᕗᓯ ᑲᑎᖃᑦᑕᕐᕕᖕᒧᑦ ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᔭᖓᓄᑦ, 9ᑕᒪᓐᓇᓗ ᑐᓂᔭᒃᓴᕆᕙᓯ ᓕᕔᑎᒃᑯᓐᓄᑦ ᑐᓂᕐᕈᓯᕐᑎᑦᓯᔨᓄᑦ, ᑕᒪᑐᒪᓂᐅᑎᓪᓗᒍᓗ ᑕᕝᕙᓂ ᐋᖅᑭᒃᓱᐃᔨᐅᔪᒧᑦ, ᑕᕝᕙ ᑖᒃᑯᐊ ᑐᑭᑖᖃᑎᒌᓕᕋᔭᕐᐳᑦ ᑕᒪᑐᒧᖓ. 10ᑖᒃᑯᐊ ᐊᖏᖃᑎᒌᒡᓗᑎᒃ ᑐᑭᑖᖃᑎᒌᒃᑐᒃᓴᐅᕗᑦ, ᐃᓕᑦᓯᓐᓄᑦ ᑖᒃᑯᐊ ᐅᖃᐅᓯᕆᔭᖏᑦ ᖃᓄᐃᓕᐅᖁᔨᑦᔪᑎᒋᔭᖏᓪᓗ ᒪᓕᑦᓯᐊᕐᓗᒋᑦ ᐊᑐᕆᐊᖃᕋᔭᕐᐸᓯ. 11ᐊᑐᕐᑕᐅᖁᔭᐅᔪᒥᒃ ᖃᓄᐃᓕᐅᖁᔭᐅᑦᔪᑎᓕᒫᓪᓗ ᑍᒪᓐᓇᓪᓗᐊᖅ ᒪᓕᒡᓗᒋᑦ ᐱᓇᓱᐊᕐᑐᒃᓴᐅᕗᓯ; ᓴᖑᑎᖏᑦᓯᐊᕐᓗᒋᑦ ᑕᓕᕐᐱᒧᑦ ᓴᐅᒥᖕᒧᓪᓘᓐᓃᑦ. 12ᓇᓪᓕᐊᓪᓕ ᓈᓚᖏᑦᑐᖅ ᒪᓕᖏᓪᓗᓂ ᐋᖅᑭᒃᓱᐃᔨᒥᒃ ᑐᓂᕐᕈᓯᕐᑎᑦᓯᔨᒥᒡᓘᓐᓃᑦ ᐱᓇᓱᐊᕆᐊᖃᕐᑕᒥᓂᒃ ᐱᓇᓱᐊᕐᑐᒥᒃ ᑖᓐᓇ ᑐᖁᑕᐅᔪᒃᓴᐅᕗᖅ; ᑍᒫᒃ ᑕᕝᕙ ᑍᒤᓕᐅᕐᓗᓯ ᐱᐅᖏᑦᑐᓕᓂᖅ ᐲᕐᑎᒐᔭᕐᐸᓯ ᐃᓴᕆᐊᓕᒥᑦ. 13ᑕᒪᓐᓇ ᑕᕝᕙ ᑐᓴᕐᑕᐅᒍᓂ ᐃᓄᓕᒫᓄᑦ ᓯᕘᕋᓕᕈᑕᐅᒐᔭᕐᐳᖅ, ᓇᓪᓕᐊᓐᓄᓪᓘᓐᓃᑦ ᐃᓱᒪᒋᑐᐃᓐᓇᕐᑕᒥᓂᒃ ᐱᓇᓱᐊᕈᒪᔪᓐᓁᕈᑕᐅᖓᔭᕐᐳᖅ ᑭᖑᓂᖓᒍᑦ.”
ᐊᖓᔪᖅᑳᕐᔪᐊᖃᕐᓂᕐᒥᒃ ᖃᐅᔨᒪᑦᔪᑎᒃᓴᑦ
14 #
ᓴᒧᐃᓕ ᓯᕗᓪᓖᑦ 8:5. “ᓄᓇᑖᕐᓯᒪᓕᕈᑦᓯᓕ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᑐᓂᓂᐊᕐᑕᖓᓄᑦ, ᑕᕝᕙᓂᓗ ᐃᓂᓪᓚᒃᓯᒪᓕᕈᑦᓯ, ᐅᖃᓕᕈᑦᓯ, ‘ᐊᖓᔪᖅᑳᕐᔪᐊᓕᐅᕈᒪᕗᖓ ᐅᕙᓐᓄᑦ ᐊᖓᔪᖅᑲᐅᓂᐊᕐᑐᒥᒃ, ᐊᓯᑦᑎᑐᑦ ᐃᓅᖃᑎᒌᒡᔪᐊᑎᑐᑦ ᐊᕙᑎᑦᑎᓐᓃᑦᑐᑎᑐᑦ.’ 15ᑕᕝᕙ ᐊᖓᔪᖅᑳᕐᔪᐊᕐᑖᕈᓐᓇᑦᓯᐊᕐᐳᓯ ᐃᓕᑦᓯᓐᓄᑦ ᐊᖓᔪᖅᑲᐅᔪᒥᒃ ᐊᑕᓂᕐᒧᑦ ᒎᑎᑦᓯᓐᓄᑦ ᓂᕈᐊᕐᑕᐅᔪᒥᒃ. ᐃᓅᖃᑎᓪᓚᕆᑦᓯᓐᓂᑦ ᐱᔪᒥᒃ ᐊᖓᔪᖅᑳᕐᔪᐊᓕᐅᕐᑐᒃᓴᐅᕗᓯ ᐃᓕᑦᓯᓐᓄᑦ; ᐃᓅᖃᑎᒃᓴᔭᕆᓐᖏᑕᑦᓯᓐᓂᒃ ᐊᖓᔪᖅᑳᕐᔪᐊᕐᑖᕐᑐᒃᓴᐅᓐᖏᓚᓯ, 16#ᐊᑕᓃᑦ ᓯᕗᓪᓖᑦ 10:28; ᑯᕉᓂᑲ ᐂᑉᐸᖏᑦ 1:16; 9:28.ᑖᓐᓇ ᐅᓄᕐᑐᐊᓗᖕᓂᒃ ᕿᒻᒥᕐᔪᐊᖃᕐᑐᒃᓴᐅᓐᖏᓚᖅ ᓇᖕᒥᓂᒃᓴᒥᓂᒃ, ᐃᓄᖁᑎᒥᓂᒡᓗ ᐄᑦᔨᑉᑎᒧᑦ ᐅᑎᕐᑎᑦᓯᔪᒃᓴᐅᓐᖏᓚᖅ ᕿᒻᒥᕐᔪᐊᓂᒃ ᐅᓄᕐᓯᑎᑦᓯᔪᒪᓗᓂ, ᐊᑕᓂᖅ ᐅᖃᕐᓯᒪᖕᒪᑦ ᐃᓕᑦᓯᓐᓄᑦ, ‘ᑕᐅᕗᖓ ᐅᑎᓚᐅᕐᓯᒪᓂᐊᓐᖏᓚᓯ ᖃᖓᓕᒫᖅ.’ 17#ᐊᑕᓃᑦ ᓯᕗᓪᓖᑦ 11:1-8; ᐊᑕᓃᑦ ᓯᕗᓪᓖᑦ 10:14-22,27; ᑯᕉᓂᑲ ᐂᑉᐸᖏᑦ 1:15; 9:27.ᑖᓐᓇᓗ ᐅᓄᕐᑐᓂᒃ ᓄᓕᐊᖃᕐᑐᒃᓴᐅᓐᖏᓚᖅ, ᑍᒤᒐᔭᕈᓂ ᑕᒪᓐᓇ ᐊᑕᓂᕐᒥᒃ ᕿᒤᑦᔪᑎᒋᒐᔭᕐᒪᒍ; ᐃᒻᒥᓂᒡᓗ ᐊᔪᕐᓴᖏᑦᑐᐊᓘᑎᑦᑐᒃᓴᐅᓐᖏᓚᖅ ᓯᐅᓪᕕᕆᓂᒃ ᒎᓗᓂᒡᓗ. 18ᑖᓐᓇ, ᐊᖓᔪᖅᑳᕐᔪᐊᑉ ᐃᒃᓯᕙᐅᑕᖓᓂ ᐃᒃᓯᕙᓕᕈᓂ ᐊᖓᔪᖅᑲᐅᕕᖕᒥᓂ, ᓇᖕᒥᓂᖅ ᑎᑎᕋᕆᐊᖃᕐᐳᖅ ᐱᖁᔭᓂᒃ ᑖᒃᑯᓂᖓ ᒪᒃᐱᕐᑐᕋᕐᑎᒍᑦ ᐊᑦᔨᓕᐅᕐᓗᒋᑦ ᐱᒋᓂᐊᕐᑕᒥᓂᒃ, ᓕᕔᑎᒃᑯᑦ ᑐᓂᕐᕈᓯᕐᑎᑦᓯᔩᑦ ᐱᓯᒪᔭᖏᑕ ᐊᑦᔨᓪᓚᕆᖏᓐᓂᒃ; 19ᑖᒃᑯᐊᓗ ᑍᒪᓐᖓᑦ ᓇᔪᕐᑎᒋᑦᓮᓐᓇᕆᐊᖃᕐᐰᑦ ᐅᖃᓕᒫᖃᑦᑕᕐᓗᓂᒋᓪᓗ ᐃᓅᓯᓕᒫᒥᓂ, ᐊᑕᓂᕐᒥᒃ ᒎᑎᒥᓂᒃ ᓯᕘᕋᒋᔭᖃᓕᖁᓪᓗᒍ, ᐱᖁᔧᑦ ᒪᓕᒐᒃᓮᓪᓗ ᐅᑯᐊ ᐅᖃᐅᓯᖏᓐᓂᒃ ᒪᓕᑦᓯᐊᕐᓂᕐᒥᓄᑦ, ᐊᑐᑦᓯᐊᕐᓗᒋᓪᓗ. 20ᑕᒪᓐᓇ ᓴᐳᑦᔭᐅᑦᔪᑎᒋᓯᒪᒐᔭᕐᒪᒍ ᐃᓅᖃᑎᒥᓂᑦ ᐱᐅᓂᕐᓴᐅᓇᓱᒋᓕᖁᓇᒍ, ᐊᑕᓂᐅᓪᓗ ᐱᖁᔭᖏᓐᓂᑦ ᓴᖑᖁᓇᒍ, ᑕᓕᕐᐱᖕᒧᓪᓘᓐᓃᑦ ᓴᐅᒥᖕᒧᓪᓘᓐᓃᑦ; ᐊᑯᓂᐅᔪᒥᒃ ᐊᖓᔪᖅᑳᕐᔪᐊᖑᖁᓪᓗᒍ ᐊᖓᔪᖅᑲᐅᕕᖕᒥᓂ, ᑖᓐᓇᓗ ᑭᖑᕚᖏᓪᓗ, ᐃᓴᕆᐊᓕᒥᐅᓂ.”
Currently Selected:
ᒨᓯᓯ ᑕᓪᓕᒪᖏᑦ 17: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
