ᒨᓯᓯ ᑕᓪᓕᒪᖏᑦ 16
16
ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᓂᖅ
ᒨᓯᓯ ᐂᑉᐸᖏᑦ 12:1-20
1 #
ᒨᓯᓯ ᐂᑉᐸᖏᑦ 12:1-20; ᒨᓯᓯ ᐱᖓᔪᖏᑦ 23:5-8; ᒨᓯᓯ ᓯᑕᒪᖏᑦ 28:16-25. “ᐊᑕᓂᖅ ᒎᑎᒋᔧᑦ ᐅᐱᓐᓇᕐᓯᑎᑕᒃᓴᕆᕙᑦ ᓇᓪᓕᐅᓐᓂᕐᓯᐅᕐᓗᑎᑦ ᖄᖏᕐᑕᐅᕕᖕᒥᒃ ᑕᖅᑭᒥ ᐊᐱᑉᒥᒃ ᑍᔭᐅᔪᒥ; ᑕᕝᕙᓂ ᑕᖅᑭᒥ ᐅᓐᓄᐊᒃᑯᑦ ᓴᐳᑎᔭᐅᓚᐅᕐᓯᒪᒐᑦᓯ ᐊᐅᓪᓚᕐᑎᑕᐅᓪᓗᓯᓗ ᐄᑦᔨᑉᑎᒥᑦ. 2ᑐᒃᓯᐊᕐᕕᖕᒧᐊᕐᑐᒃᓴᐅᕗᓯ ᑐᖁᑦᓯᓗᓯᓗ ᓰᐱᖁᑎᑦᓯ ᐃᓚᖓᓐᓂᒃ ᐅᕝᕙᓗ ᐃᒻᒧᒃᓯᐅᒐᖁᑎᑦᓯᓐᓂᒃ ᖄᖏᕐᑕᐅᕕᒃᓯᐅᑎᒥ ᓂᕆᔭᒃᓴᐅᖁᓪᓗᒍ ᐊᑕᓂᐅᑉ ᒎᑎᓯ ᐅᐱᓐᓇᕐᓯᑎᑕᐅᓂᖓᓄᑦ. 3ᑍᒤᑦᑐᒥᒃ ᓂᕆᓕᕐᑎᓪᓗᓯ, ᓂᐊᖂᔭᕐᑐᕐᑐᒃᓴᐅᓐᖏᓚᓯ ᐳᕙᓪᓚᕐᓴᐅᑎᖃᕐᑐᒥᒃ. ᐅᓪᓗᓂᒃ 7ᓂᒃ ᓂᐊᖂᔭᓂᒃ ᐳᕙᓪᓚᕐᓴᐅᑎᖃᖏᑦᑐᓂᒃ ᓂᕿᖃᕐᑐᒃᓴᐅᕗᓯ, ᑍᒤᑦᓴᕆᐊᖃᓚᐅᕋᑦᓯ ᐄᑦᔨᑉᑎᒥᑦ ᑐᐊᕕᕐᓗᓯ ᐊᐅᓪᓚᕆᐊᖃᓕᕐᑎᓪᓗᓯ. ᓂᐊᖂᔭᓂᒃ ᑕᒪᒃᑯᓂᖓ ᓂᕆᔪᒃᓴᐅᕗᓯ ᑍᒤᑦᑐᑦ ᑍᔭᐅᕙᖕᓂᐊᕐᒪᑕ ᐅᖁᒤᒃᓴᑎᕐᑕᐅᓂᐅᑉ ᓂᐊᖂᔭᖁᑎᖏᓐᓂᒃ; ᑍᒫᓐᖓᑦ ᐃᓅᓯᓕᒫᑦᓯᓐᓂ ᐃᖅᑲᐅᒪᒃᓯᔪᓐᓇᖁᓪᓗᓯ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓚᐅᕐᓯᒪᓂᑦᓯᓐᓂᒃ, ᓄᓇᒥᑦ ᐅᖁᒤᒃᓴᕐᑎᑕᐅᕕᖕᒥᑦ. 4ᐅᓪᓗᓂᒃ 7ᓂᒃ ᓄᓇᒋᔭᑦᓯᓐᓂ ᐃᓘᓐᓇᑦᓯᐊᖓᓂ ᐳᕙᓪᓚᕐᓴᐅᑎᑕᖃᕐᑐᒃᓴᐅᓐᖏᓚᖅ ᐊᑐᓂᑦ ᐊᖏᕐᕋᕆᔭᖏᓐᓂ; ᐃᑯᐊᓚᑎᑦᓯᓂᒃᑯᑦ ᑐᓂᕐᕈᑎᕕᓂᕐᒥᒃ ᐅᓐᓄᒥᓗ ᑕᕝᕙᓂ ᑐᓂᕐᕈᑕᐅᔪᕕᓂᐅᑉ ᓂᕿᖓ ᐅᓪᓗᒥ ᑕᕝᕙᓂᑦᓮᓐᓇᖅ ᓂᕆᔭᐅᔪᒃᓴᐅᕗᖅ ᓄᖑᑕᐅᓗᓂ.
5“ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕈᑎᒃᓴᒧᑦ ᑐᓂᕐᕈᑎᒃᓴᖅ ᐆᒪᔪᖅ ᑐᖁᑕᒃᓴᕆᕙᓯ ᑐᒃᓯᐊᕐᕕᖕᒥ ᐊᓯᐊᓂᐅᖏᑦᑐᖅ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᓄᓇᒥ; 6ᑕᕝᕙᓂ ᑭᓯᐊᓂ ᐊᑎᖓᑕ ᐃᓂᖓᓂ ᖄᖏᕐᑕᐅᕕᒃᓯᐅᑎᒥᒃ ᑐᓂᕐᕈᓯᕐᑐᒃᓴᐅᕗᓯ ᓯᕿᓂᖅ ᓂᐱᓕᕐᑎᓪᓗᒍ, ᑍᑦᓱᒪᓂ ᐄᑦᔨᑉᑎᒥᑦ ᐊᐅᓪᓚᓕᕐᑎᓪᓗᓯ ᑍᒤᓪᓗᐊᓕᕐᑎᓪᓗᒍ ᐊᐅᓪᓚᓚᐅᕋᑦᓯ. 7ᓂᕿᖓ ᐆᔪᓕᐅᕐᑕᒃᓴᕆᕙᓯ ᓂᕆᓗᒍᓗ ᐃᓂᒥ ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᔭᖓᓂ; ᐅᓪᓛᖑᓕᕐᐸᓪᓕ ᐊᖏᕐᕋᕐᑐᒃᓴᐅᕗᓯ ᑐᐱᑦᓯᓐᓄᑦ. 8ᐅᓪᓗᓂᒡᓕ ᓱᓕ ᐱᖓᓲᔪᕐᑐᓂᒃ ᓂᐊᖂᔭᓂᒃ ᓂᕿᖃᕐᑐᒃᓴᐅᕗᓯ ᐳᕙᓪᓚᕐᓴᐅᑎᖃᖏᑦᑐᓂᒃ; ᐅᓪᓗᓪᓕ 7ᖓᓐᓂ ᑲᑎᔪᒃᓴᐅᕗᓯ ᑐᒃᓯᐊᕆᐊᕐᑐᕐᓗᓯ ᐊᑕᓂᕐᒧᑦ ᒎᑎᑦᓯᓐᓄᑦ, ᑕᕝᕙᓂᓗ ᐅᓪᓗᒥ ᐱᓇᓱᐊᕐᑐᒃᓴᐅᓐᖏᓚᓯ.”
ᐱᕈᕐᑐᓂᒃ ᑲᑎᕐᓱᐃᕕᐅᑉ ᓇᓪᓕᐅᓐᓂᕐᓯᐅᕈᑕᐅᓂᖓ
ᒨᓯᓯ ᐂᑉᐸᖏᑦ 34:22; ᒨᓯᓯ ᐱᖓᔪᖏᑦ 23:15-21
9 #
ᒨᓯᓯ ᐱᖓᔪᖏᑦ 23:15-21; ᒨᓯᓯ ᓯᑕᒪᖏᑦ 28:26-31. “ᓂᐊᖂᔭᒃᓴᓂᒃ ᑲᑎᕐᓱᐃᒋᐊᓕᕐᓂᑦᓯᓐᓂᑦ ᐱᒋᐊᕐᓗᓯ ᐱᓇᓱᐊᕈᓯᕐᓂᒃ ᓈᓮᒋᐊᓯᔪᒃᓴᐅᕗᓯ ᐱᓇᓱᐊᕈᓯᕐᓄᑦ 7ᓄᑦ ᑎᑭᓪᓗᒋᑦ, 10ᑕᕝᕙ ᐱᕈᕐᑐᓂᒃ ᑲᑎᕐᓱᐃᕕᖕᒥᒃ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐱᓇᓱᐊᕈᓰᑦ 7ᖓᓐᓂ, ᐊᑕᓂᖅ ᒎᑎᓯ ᐅᐱᓐᓇᕐᓯᑎᑕᐅᖁᓪᓗᒍ, ᑐᓂᕐᕈᓯᕐᕕᐅᓂᖓᒍᑦ ᐃᓱᒪᕐᓱᕐᓗᑎᒃ ᑐᓂᔪᒪᔭᒥᖕᓂᒃ ᑐᓂᓯᓂᒃᑯᑦ ᐱᕈᕐᑎᑕᕕᓂᕐᒥᖕᓂᑦ ᓮᒻᒪᕐᑎᑕᐅᑦᔪᑎᒋᔭᒥᖕᓂᑦ ᑖᑦᓱᒪᓐᖓᑦ. 11ᖁᕕᐊᓱᒃᑐᒃᓴᐅᕗᓯ ᐊᑕᓂᐅᑉ ᒎᑎᑦᓯ ᓵᖓᓂ, ᕿᑐᕐᖓᓯ ᐃᓚᒋᓗᒋᑦ, ᐱᔨᓯᓗ ᐊᕐᓁᑦ ᐊᖑᑎᓪᓗ, ᓕᕔᑎᒃᑯᓪᓗ, ᓄᓇᖃᕐᑐᑐᖃᐅᖏᑦᑐᓪᓗ, ᐃᓕᐊᕐᔪᐃᓪᓗ, ᐅᐃᒡᒐᕐᓃᓪᓗ ᑕᕝᕙᓂ ᓄᓇᑦᓯᓐᓂ ᓄᓇᖅᑲᑎᒋᔭᓯ. ᑍᒤᓕᐅᕐᑐᒃᓴᐅᕗᓯ ᑲᑎᖃᑦᑕᕐᕕᖕᒥ ᑐᒃᓯᐊᕐᕕᖕᒥ. 12ᑕᒪᓐᓇ ᐃᒃᐱᒋᑦᓯᐊᕐᑕᒃᓴᕆᕙᓯ ᐱᖁᔨᑦᔪᑎᐅᔪᖅ ᓈᓚᑦᓯᐊᕐᓗᒍᓗ; ᐳᐃᒍᕐᑐᒃᓴᐅᓐᖏᓚᓯ ᓯᐊᓛᕆᔭᐅᓚᐅᕋᑦᓯ ᐄᑦᔨᑉᑎᒥ.”
ᓇᓪᓕᐅᓐᓂᕐᓯᐅᕐᕕᒃ ᑐᐲᓐᓇᕐᒥ ᐃᓂᖃᕐᓂᕐᒥᒃ
ᒨᓯᓯ ᐱᖓᔪᖏᑦ 23:33-43
13 #
ᒨᓯᓯ ᐱᖓᔪᖏᑦ 23:33-36,39-43; ᒨᓯᓯ ᓯᑕᒪᖏᑦ 29:12-38. “ᓂᐊᖂᔭᒃᓴᓕᒫᓂᒃ ᐃᕖᔧᔭᕇᕈᑦᓯ ᕔᓂᒃᓴᓕᒫᓪᓗ ᐃᑏᔭᕐᑕᐅᔭᕇᕐᐸᑕ, ᑕᕝᕙ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐅᓪᓗᓂᒃ 7ᓂᒃ ᑐᐲᓐᓇᕐᒥ ᐃᓂᖃᓚᐅᕐᓂᑦᓯᓐᓂᒃ. 14ᖁᕕᐊᓱᒃᑐᒃᓴᐅᕗᓯ ᓇᓪᓕᐅᓐᓂᕐᓯᐅᓕᕐᑎᓪᓗᓯ ᕿᑐᕐᖓᓯ ᐃᓚᒋᓗᒋᑦ, ᐱᔨᓯᓗ ᐊᖑᑎᑦ ᐊᕐᓁᓪᓗ ᐃᓚᒋᓗᒋᑦ, ᓕᕔᑎᒃᑯᓪᓗ, ᓄᓇᖃᕐᑐᑐᖃᐅᖏᑦᑐᓪᓗ, ᐃᓕᐊᕐᔪᐃᓪᓗ, ᐅᐃᒡᒐᕐᓃᓪᓗ ᓄᓇᑦᓯᓐᓂ ᓄᓇᖅᑲᑎᒋᔭᓯ. 15ᐊᑕᓂᖅ ᒎᑎᓯ ᐅᐱᓐᓇᕐᓯᑎᑕᒃᓴᕆᕙᓯ ᓇᓪᓕᐅᕐᓂᕐᓯᐅᕐᓗᓯ ᐅᓪᓗᓂᒃ 7ᓂᒃ ᑲᑎᖃᑦᑕᕐᕕᖕᒥ ᑐᒃᓯᐊᕐᕕᖕᒥ. ᖁᕕᐊᓱᒃᑐᒃᓴᐅᕗᓯ, ᐊᑕᓂᐅᑉ ᒎᑎᑦᓯ ᓮᒻᒪᕐᑎᓯᒪᖕᒪᓯ ᐱᕈᕐᑎᑕᑦᓯᒍᑦ ᐃᖅᑲᓁᔭᕐᓂᑦᓯᒍᓪᓗ.
16“ᐊᖑᑎᓕᒫᑦ ᐃᓅᖃᑎᒌᒡᔪᐊᓂᑦ ᐱᓯᒪᔪᑦ ᑐᒃᓯᐊᕆᐊᖃᑦᑕᕐᑐᒃᓴᐅᕗᑦ ᐊᑕᓂᕐᒧᑦ ᐱᖓᓱᐃᕐᑐᕐᓗᑎᒃ ᐊᕐᕌᒍᒥ ᐊᑕᐅᓯᕐᒥ ᑕᕝᕙᓂ ᑐᒃᓯᐊᕐᕕᖕᒥ: ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᒥ, ᐱᕈᕐᑐᓂᒃ ᑲᑎᕐᓯᕕᐅᑉ ᓇᓪᓕᐅᓐᓂᕐᓯᐅᕐᑕᐅᓂᖓᓂ, ᑐᐲᓐᓇᕐᒥᓗ ᐃᓂᖃᓚᐅᕐᓂᑦᓯ ᓇᓪᓕᐅᓐᓂᕐᓯᐅᕐᑕᐅᓂᖓᓂ. ᐊᖑᑎᓪᓕ ᐊᑐᓂᑦ ᑐᓂᕐᕈᑎᒃᓴᒥᖕᓂᒃ ᓇᒃᓴᕐᑐᒃᓴᐅᕗᑦ; 17ᐊᖑᑎᓕᒪᑦ ᑐᓂᓯᔪᒃᓴᐅᕗᑦ ᐱᔪᓐᓇᕐᑕᒥᖕᓂᒃ, ᓮᒻᒪᕐᑎᑕᐅᓂᒃᑯᑦ ᐊᑕᓂᕐᒧᑦ ᒎᑎᑦᓯᓐᓄᑦ ᑐᓂᓯᕕᐅᓯᒪᓂᑎᒃ ᒪᓕᒡᓗᒋᑦ.”
ᐊᑦᔨᒌᒃᑎᑦᓯᓗᓂ ᐊᐅᓚᑦᓯᔪᒃᓴᐅᓂᖅ
18“ᐋᖅᑭᒃᓱᐃᔨᒃᓴᓂᒃ ᑎᓕᓯᔪᒃᓴᐅᕗᓯ ᐊᖓᔪᖅᑳᖑᓂᐊᕐᑐᓂᒡᓗ ᐊᑕᓂᐅᑉ ᑐᓂᓯᒪᔭᖏᓐᓂ ᓄᓇᑦᓯᓐᓂ, ᑭᖑᕚᖑᖃᑎᒌᑦ ᒪᓕᒡᓗᒋᑦ; ᑖᒃᑯᐊᓗ ᐋᖅᑭᒃᓱᐃᔨᐅᔪᒃᓴᐅᕗᑦ ᐃᓄᖕᓂᒃ ᐊᑦᔨᒌᒃᑎᑦᓯᓗᑎᒃ. 19#ᒨᓯᓯ ᐂᑉᐸᖏᑦ 23:6-8; ᒨᓯᓯ ᐱᖓᔪᖏᑦ 19:15.ᐃᓄᖕᓂᒃ ᐋᖅᑭᒃᓱᐃᓂᖅ ᐱᑦᓯᐊᕆᐊᖃᕐᐳᖅ; ᐃᓔᓐᓇᕐᓯᐅᕐᓗᑎᒃ ᐋᖅᑭᒃᓱᐃᔪᒃᓴᐅᓐᖏᓚᑦ; ᓯᓔᕐᕆᒃᓯᓇᓱᐊᕐᑐᓂᒡᓗ ᒪᓕᒃᓴᕐᑐᒃᓴᐅᓐᖏᓚᑦ, ᑐᓂᕐᕈᑎᒋᔭᐅᔪᑦ ᓯᓔᕐᕆᒃᓯᕈᑕᐅᓇᓱᐊᕐᓗᑎᒃ ᑕᑯᓐᓇᕈᓐᓃᕐᑎᑦᓯᔪᓐᓇᕐᒪᑕ ᐊᒡᓛᑦ ᓯᓚᑐᔪᓂᒃ ᐱᑦᓯᐊᕋᓱᒃᑐᓂᒡᓗ ᐊᒡᓛᑦ, ᓈᒻᒪᓈᖏᑦᑐᓂᒡᓗ ᐃᓱᒪᑖᕐᑎᑦᓯᓕᕈᓐᓇᕐᓗᑎᒃ. 20ᓈᒻᒪᓈᕐᓯᒪᔪᒥᒃ ᐊᑦᔨᒌᓐᖏᑎᑦᓯᖏᑦᑐᒥᒡᓗ ᑖᑦᓱᒥᖓᑐᐊᖅ ᒪᓕᒃᑐᒃᓴᐅᕗᓯ, ᐃᓅᖁᓪᓗᓯ ᑭᖑᕐᖑᑦᔨᓗᓯᓗ ᓄᓇᒥᒃ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᐃᓕᑦᓯᓐᓄᑦ.
21 #
ᒨᓯᓯ ᐂᑉᐸᖏᑦ 34:13. “ᑐᓂᕐᕈᓯᕐᕕᖕᒥᒃ ᐊᑕᓂᕐᒧᑦ ᒎᑎᑦᓯᓐᓄᑦ ᓴᓇᓕᕈᕕᑦ, ᓴᓂᐊᓄᑦ ᓇᑉᐸᕐᓯᔪᒃᓴᐅᓐᖏᓚᑎᑦ ᕿᔪᖕᒥᒃ ᐊᕐᓇᓐᖑᐊᒥᒃ ᐊᓯᕋᒥᒃ ᐊᑎᓕᖕᒥᒃ. 22#ᒨᓯᓯ ᐱᖓᔪᖏᑦ 26:1.ᐅᔭᕋᖕᓂᒡᓗ ᓇᐸᔪᓂᒃ ᒎᑎᓐᖑᐊᕆᔭᐅᓲᓂᒃ, ᐋᖅᑭᒃᓯᔪᒃᓴᐅᓐᖏᓚᑎᑦ; ᐊᑕᓂᐅᑉ ᒎᑎᑦᓯ ᑕᒪᒃᑯᐊ ᐆᒥᒋᖕᒪᒋᑦ.”
Currently Selected:
ᒨᓯᓯ ᑕᓪᓕᒪᖏᑦ 16: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
