ᒨᓯᓯ ᑕᓪᓕᒪᖏᑦ 15
15
ᐊᕐᕌᒍᑦ 7ᖓᓐᓂ
ᒨᓯᓯ ᐱᖓᔪᖏᑦ 25:1-7
1“ᐊᕐᕌᒍᑦ 7 ᐊᓂᒍᕌᖓᑕ ᑍᒪᓐᖓᑦ ᐃᓕᑦᓯᓐᓄᑦ ᐊᑭᓕᒃᓴᖃᕐᑐᓕᒫᑦ ᐊᑭᓕᒃᓴᖏᑦ ᐊᑭᓕᒃᓴᐅᔪᓐᓁᕐᑎᑕᒃᓴᕆᕙᓯ. 2ᐃᒫᒃ ᑕᒪᓐᓇ ᐋᖅᑭᒃᓯᒪᔪᒃᓴᐅᕗᖅ. ᑮᓇᐅᔭᓂᒃ ᐊᑐᕐᑎᑦᓯᓯᒪᔪᓕᒫᑦ ᐃᓴᕆᐊᓕᐅᖃᑎᒥᓄᑦ ᐊᑭᓕᒃᓴᖏᓐᓂᒃ ᐊᑭᓕᒃᓴᐅᔪᓐᓁᕐᑎᑦᓯᔪᒃᓴᐅᕗᖅ; ᑮᓇᐅᔭᓂᒃ ᐊᑭᓕᐅᑎᔪᒃᓴᓂᒃ ᑲᑎᑦᓯᓇᓱᐊᕐᑐᒃᓴᐅᓐᖏᓚᖅ; ᐊᑕᓂᐅᑉ ᓇᖕᒥᓂᖅ ᐊᑭᓕᒃᓴᐅᔪᓐᓁᖁᓯᒪᓕᕐᑕᖓᓂᒃ. 3ᓄᓇᖃᑎᑐᖃᕆᓐᖏᑕᑦᓯᓕ ᐊᑭᓕᒃᓴᖏᓐᓂᒃ ᑲᑎᑦᓯᔪᓐᓇᕐᐳᓯ ᐊᑭᓕᐅᑎᔪᒃᓴᓂᒃ, ᑭᓯᐊᓂᓕ ᐃᓕᑦᓯ ᓇᖕᒥᓂᖅ ᐃᓅᖃᑎᓪᓚᕆᑦᓯ ᐃᓕᑦᓯᓐᓄᑦ ᐊᑭᓕᒃᓴᖏᓐᓂᒃ ᐊᑭᓕᕐᑕᐅᔪᒪᒧᑦ ᑲᑎᑦᓯᓇᓱᒃᑐᒃᓴᐅᓐᖏᓚᓯ.
4“ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ ᑕᒫᓂ ᓄᓇᒥ ᐃᓕᑦᓯᓐᓄᑦ ᑐᓂᓯᒪᔭᖓᓂ ᓄᓇᖃᕐᑎᓪᓗᓯ. ᓇᖕᒥᓂᕐᓕ ᐃᓅᖃᑎᓯ ᐊᔪᕐᓴᓗᐊᕐᑐᖃᕐᓂᐊᓐᖏᓚᑦ 5ᑖᓐᓇ ᓈᓚᖕᓂᐊᕈᑦᓯᐅᒃ ᐊᑐᕐᑕᐅᖁᔭᓕᒫᖏᓐᓂᒡᓗ ᐊᑐᕋᓱᑦᓯᐊᕈᑦᓯ ᐅᓪᓗᒥ ᐃᓕᑦᓯᓐᓄᑦ ᐱᖁᔨᑦᔪᑎᒋᔭᓐᓂᒃ. 6ᑕᕝᕙ ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ, ᑕᒪᓐᓇ ᐊᖏᕈᑎᒋᓯᒪᖕᒪᒍ. ᐃᓅᖃᑎᒌᒡᔪᐊᓄᑦ ᐅᓄᕐᑐᓄᑦ ᑮᓇᐅᔭᑦᓯᓐᓂᒃ ᐊᑐᕐᑕᐅᑎᑦᓯᔪᒫᕐᐳᓯ, ᑭᓯᐊᓂᓕ ᓇᓪᓕᐊᓐᓂᓪᓘᓐᓃᑦ ᐊᑐᕐᑐᐊᕆᐊᖃᕈᒫᓐᖏᓚᓯ; ᐃᓅᖃᑎᒌᒡᔪᐊᓂᒃ ᐅᓄᕐᑐᓂᒃ ᐊᐅᓚᑦᓯᔪᒫᕐᐳᓯ, ᑭᓯᐊᓂᓕ ᐃᓅᖃᑎᒌᒡᔪᐊᓄᑦ ᓇᓪᓕᐊᓐᓄᓪᓘᓐᓃᑦ ᐊᐅᓚᑕᐅᔪᒫᓐᖏᓚᓯ.
7 #
ᒨᓯᓯ ᐱᖓᔪᖏᑦ 25:35. “ᓄᓇᓖᓪᓕ ᓇᓪᓕᐊᓐᓂᑐᐃᓐᓇᖅ ᓄᓇᒥ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᐃᓕᑦᓯᓐᓄᑦ ᐃᓴᕆᐊᓕᒥᐅᖑᖃᑎᑦᓯᓐᓂᒃ ᐊᔪᕐᓴᕐᑐᖃᕐᐸᑦ, ᐃᒻᒥᓂᒃ ᑭᓯᐊᓂ ᐃᓱᒪᒋᓂᕐᒧᑦ ᐃᑲᔪᕐᑍᓕᒪᔪᒃᓴᐅᓐᖏᓚᑎᑦ. 8ᐃᑲᔪᕐᑍᓕᒪᓂᐊᕐᓇᒍ ᐊᑐᕐᑎᑕᒃᓴᕆᕙᑦ ᓈᒻᒪᒋᔭᖏᓐᓂᒃ, ᓱᓇᑐᐃᓐᓇᐅᒐᓗᐊᕐᐸᑦ. 9ᐅᑦᔨᕐᑐᑦᓯᐊᕆᑦᓯ, ᐱᐅᖏᑦᑐᒥᒃ ᐆᒻᒪᑎᑦᓯᓐᓂ ᐃᓱᒪᖁᓇᓯ, ᐅᖃᕐᓗᓯ, ‘ᐊᕐᕌᒍᑦ 7ᖓ, ᐊᑭᓕᒃᓴᓂᒃ ᓴᒃᑯᐃᕕᒃ ᖃᓂᓗᐊᓕᕐᒪᑦ,’ ᓈᒻᒪᒋᖏᓪᓗᒍᓗ ᖃᑕᓐᖑᑏᑦ ᑕᑯᓐᓇᕐᓗᒍ, ᑐᓂᓯᕕᒋᖏᒃᑯᕕᐅᒃ, ᐊᑕᓂᕐᒧᑦ ᓂᓪᓕᐊᓕᕋᔭᕐᒪᑦ ᐱᑦᔪᑎᒋᓗᑎᑦ, ᑕᕝᕙ ᐊᔪᕐᑐᓕᓯᒪᓕᕋᔭᕐᐳᑎᑦ. 10ᑐᓂᓯᕕᒋᔭᒃᓴᕆᕙᑦ ᐊᓐᓂᕈᓱᖏᓪᓗᑎᑦ ᐱᐅᖏᑦᑐᒥᒡᓗ ᐃᓱᒪᖃᖏᓪᓗᑎᑦ ᑐᓂᓯᓕᕈᕕᑦ ᑖᑦᓱᒧᖓ; ᑕᕝᕙ ᐊᑕᓂᐅᑉ ᓮᒻᒪᕐᑎᓐᓂᐊᕐᐹᑎᑦ ᐱᓇᓱᐊᕐᑕᓕᒫᕐᓂ. 11#ᒫᑎᐅᓯ 26:11; ᒫᑯᓯ 14:7; ᔪᐊᓇᓯ 12:8.ᐊᔪᕐᓴᕐᑐᑦ ᓄᖑᓚᐅᕐᓯᒪᓂᐊᖏᒻᒪᑕ ᓄᓇᒥ; ᑍᒤᒻᒪᑦ ᑕᕝᕙ ᐱᖁᓪᓚᕆᒃᐸᑦᓯ, ᐊᓐᓂᕈᓱᖏᓪᓗᓯ ᐃᑲᔪᕆᐊᖃᕐᐳᓯ ᖃᑕᓐᖑᑎᑦᓯᓐᓂᒃ, ᐱᖃᖏᑦᑐᓂᒃ ᐊᔪᕐᓴᕐᑐᓂᒡᓗ ᓄᓇᒥ.”
ᓯᐊᓛᑦ ᖃᓄᐃᓕᐅᕐᑕᐅᔭᕆᐊᖃᕐᓂᖏᑦ
ᒨᓯᓯ ᐂᑉᐸᖏᑦ 21:1-11
12 #
ᒨᓯᓯ ᐱᖓᔪᖏᑦ 25:39-46. “ᐄᑉᕉᒥᒃ ᖃᑕᓐᖑᑎᖕᓂᒃ ᐊᖑᒻᒥᒃ ᐊᕐᓇᒥᒡᓘᓐᓃᑦ, ᓯᐊᓛᕐᑖᕆᓗᒍ ᓂᐅᕕᕈᕕᑦ, ᑖᑦᓱᒪ ᐱᔨᑦᓯᕐᑕᒃᓴᕆᕚᑎᑦ ᐊᕐᕌᒍᓂᒃ ᐱᖓᓲᔪᕐᑐᓂᒃ, ᐊᕐᕌᒍᓪᓕ 7ᖓᓐᓂ, ᑕᕝᕙ ᕿᓚᕈᑦᔮᕐᑕᒃᓴᕆᕙᑦ ᐃᓕᖕᓂᑦ. 13ᕿᓚᕈᑦᔮᕈᕕᐅᒡᓕ, ᓱᓇᖃᕐᑎᓐᓇᒍ ᐊᐅᓪᓚᕐᑎᑕᒃᓴᕆᓐᖏᓚᑦ. 14ᐊᓐᓂᕈᓱᖏᓪᓗᑎᑦ ᑐᓂᓯᕕᒋᔭᒃᓴᕆᕙᑦ ᓰᐱᖁᑎᖕᓂᑦ, ᓂᐊᖂᔭᒃᓴᖁᑎᖕᓂᓪᓗ ᐃᕖᔧᕕᖕᒥᑦ ᐱᔪᓂᒃ, ᐅᐂᓂᒃᓴᖁᑎᖕᓂᓪᓗ; ᐊᑕᓂᐅᑉ ᐃᓕᖕᓄᑦ ᓮᒻᒪᕐᑎᑦᓯᑦᔪᑎᒋᓯᒪᔭᖏᑦ ᒪᓕᒡᓗᒋᑦ, ᑐᓂᓯᕕᒋᔭᒃᓴᕆᕙᑦ. 15ᐃᖅᑲᐅᒪᔭᕆᐊᖃᕋᑦᓯ ᐃᓕᑦᓯᑦᑕᐅᖅ ᓯᐊᓛᖑᓚᐅᕐᒥᒐᑦᓯ ᓄᓇᒥ ᐄᑦᔨᑉᑎᒥ, ᐊᑕᓂᐅᓪᓕ ᒎᑎᑦᓯ ᑕᕝᕙᓐᖓᑦ ᐊᓂᑎᓚᐅᕐᒪᓯ; ᑍᒤᒻᒪᑦ ᐱᖁᔭᒥᒃ ᑕᒪᑐᒥᖓ ᒫᓐᓇ ᒪᓕᒐᒃᓴᓕᐅᕐᐸᑦᓯ.
16“ᓯᐊᓛᑦᓯᓕ ᐅᖃᐅᑎᒃᐸᓯ, ‘ᐃᓕᑦᓯᓐᓂᑦ ᓅᒍᒪᓐᖏᓚᖓ’; ᐅᖓᓕᕐᓂᕐᒥᓄᑦ ᐃᓕᖕᓂᒃ ᐃᒡᓗᒥᐅᖃᑎᖕᓂᒡᓗ, ᐃᓂᖃᑦᓯᐊᕐᓂᕐᒥᓄᑦ ᐃᓕᑦᓯᓐᓂ. 17ᑕᕝᕙ ᐳᑐᓯᑦᔪᑎᒥᒃ ᐱᔪᒃᓴᐅᕗᓯ ᐃᒡᓗᑦᓯ ᐅᒃᑯᐊᖓᓄᐊᕐᑕᒃᓴᕆᕙᑦ ᓯᐅᑎᖓ ᑲᐱᖃᓯᐅᑦᔭᒃᓴᕆᕙᑦ ᐅᒃᑯᐊᒧᑦ, ᑕᕝᕙ ᑍᒪᓐᖓᓕᒫᖅ ᓯᐊᓛᕆᓕᕋᔭᕐᐸᑦ ᐃᓅᓯᖓ ᓈᓗᒍ. ᐊᕐᓇᕐᑕᐅᖅ ᓯᐊᓛᖅ ᑍᒫᑦᓮᓐᓇᖅ ᐱᓂᐊᕐᕕᒋᔭᒃᓴᕆᕙᑦ. 18ᐊᒃᓱᕈᕐᓇᓗᐊᕐᑐᒃᓴᐅᓐᖏᓚᖅ ᐃᓕᑦᓯᓐᓄᑦ, ᓯᐊᓛᕆᔭᕐᓂᒃ ᓯᐊᓛᖑᔪᓐᓃᕐᑎᑦᓯᒍᕕᑦ; ᑖᑦᓱᒪ ᐱᔨᑦᓯᕐᕕᒋᓯᒪᖕᒪᑎᑦ ᐊᕐᕌᒍᓂᒃ ᐱᖓᓲᔪᕐᑐᓂᒃ ᐃᖅᑲᓁᔭᕐᑎᑦᓯᒐᔭᕈᕕᑦ ᐊᕝᕙᓪᓗᐊᖓᓂᒃ ᐱᓇᓱᐊᕐᓂᕐᓴᐅᓯᒪᖕᒪᑦ.#15:18 ᐱᓇᓱᐊᕐᓂᕐᓴᐅᓯᒪᖕᒪᑦ ᐅᕝᕙᓗ ᐱᓇᓱᐊᕐᑕᐅᒐᔭᕐᑑᑉ ᐊᕝᕙᓪᓗᐊᖓᓂᒃ ᐱᓯᒪᖕᒪᑦ ᑍᒤᓕᐅᕈᕕᑦ, ᐊᑕᓂᐅᑉ ᒎᑎᕕᑦ ᓮᒻᒪᕐᑎᓐᓂᐊᕐᐹᑎᑦ ᑕᒤᑎᒍᑦ ᐱᓇᓱᐊᕐᓂᕆᔭᒃᑯᑦ.”
ᐃᕐᓂᐊᕆᔭᐅᖅᑳᕐᓯᒪᔪᑦ ᐃᒻᒧᒃᓯᐅᖎᑦ ᓰᐲᓪᓗ
19 #
ᒨᓯᓯ ᐂᑉᐸᖏᑦ 13:12. “ᓴᓂᕐᕔᓯᒪᖃᑦᑕᕐᑐᒃᓴᐅᕗᓯ ᐊᑕᓂᕐᒧᑦ ᒎᑎᑦᓯᓄᑦ ᑐᓂᕐᕈᑎᒃᓴᓕᒫᓂᒃ ᐊᖑᑎᓂᒃ ᐃᕐᓂᐊᕆᔭᐅᖄᕐᓯᒪᔪᓂᒃ ᐃᒻᒧᒃᓯᐅᒐᖁᑎᑦᓯᓐᓄᑦ ᓰᐲᖁᑎᑦᓯᓐᓄᓪᓗ; ᑕᒪᒃᑯᐊ ᐃᒻᒧᒃᓯᐅᒊᑦ ᐃᕐᓂᐊᖑᖅᑳᕐᓯᒪᔪᑦ ᐱᓇᓱᐊᕈᑎᒋᔭᒃᓴᕆᓐᖏᓚᓯ, ᓰᐲᓪᓗ ᐃᕐᓂᐊᖑᖅᑲᕐᓯᒪᔪᑦ ᓴᓕᔭᒃᓴᕆᓇᒋᑦ. 20ᑕᒪᒃᑯᐊᓕ ᐊᕐᕌᒍᑕᒫᑦ ᑍᒤᑦᑐᑦ ᓂᕆᔭᒃᓴᕆᕙᓯ, ᐃᓚᓯ ᐃᓚᒋᓗᒋᑦ ᐊᑕᓂᐅᑉ ᒎᑎᑦᓯ ᓵᖓᓂ ᑐᒃᓯᐊᕐᕕᖕᒥ. 21ᐃᕐᓂᐊᕆᔭᐅᖄᕐᓯᒪᔪᕐᓕ ᑕᕐᓴᖃᕐᐸᑦ, ᐱᓱᒍᓐᓇᑦᓯᐊᖏᑉᐸᓪᓘᓐᓃᑦ ᐅᕝᕙᓗ ᑕᐅᑐᖏᑉᐸᑦ, ᐅᕝᕙᓗ ᐊᓯᐊᒍᑦ ᐃᓕᖅᑯᓯᕐᓱᖏᑉᐸᑦ, ᑕᒪᒃᑯᐊ ᑍᒤᑦᑐᑦ ᑐᓂᕐᕈᑎᒋᔭᒃᓴᕆᓐᖏᓚᓯ ᐊᑕᓂᕐᒧᑦ ᒎᑎᑦᓯᓐᓄᑦ. 22ᑍᒤᑦᑐᓪᓕ ᓂᕐᔪᑏᑦ ᐊᖏᕐᕋᑦᓯᓐᓂ ᓂᕆᔪᓐᓇᕐᐸᓯ; ᐅᒃᐱᕐᓂᒃᑯᑦ ᓴᓗᒪᓂᕋᕐᑕᐅᒐᓗᐊᕐᐸᑦ ᓴᓗᒪᓂᕋᕐᑕᐅᖏᑉᐸᓪᓘᓐᓃᑦ, ᓂᕆᔭᒃᓴᕆᕙᓯ, ᑐᑐᖓᔪᒥᒃ ᑐᒃᑑᔮᕐᑐᒥᒡᓘᓐᓃᑦ ᓂᕆᒐᔭᕐᓂᑦᓯᑐᑦ. 23#ᒨᓯᓯ ᓯᕗᓪᓖᑦ 9:4; ᒨᓯᓯ ᐱᖓᔪᖏᑦ 7:26,27; 17:10-14; 19:26; ᒨᓯᓯ ᑕᓪᓕᒪᖏᑦ 12:16,23.ᐊᐅᖏᓪᓕ ᓂᕆᔭᐅᔪᒃᓴᐅᓐᖏᓚᑦ; ᒪᓂᖅᑲᒧᓪᓕ ᑯᕕᔭᒃᓴᕆᕙᓯ ᐃᒥᕐᑎᑐᑦ.”
Currently Selected:
ᒨᓯᓯ ᑕᓪᓕᒪᖏᑦ 15: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
