ᒨᓯᓯ ᑕᓪᓕᒪᖏᑦ 14
14
ᐃᓚᓐᖓᕐᓗᓂ ᕿᒃᓵᖕᓂᕐᒧᑦ ᐊᑐᕐᑕᐅᖁᔭᐅᖏᑦᑐᑦ
1 #
ᒨᓯᓯ ᐱᖓᔪᖏᑦ 19:28; 21:5. “ᐊᑕᓂᕐᒧᑦ ᒎᑎᑦᓯᓐᓄᑦ ᕿᑐᕐᖓᐅᒐᑦᓯ; ᐃᓕᑦᓯᓐᓂᒃ ᑭᓪᓕᐊᔪᒃᓴᐅᓐᖏᓚᓯ ᐅᕝᕙᓗ ᓴᓕᔪᒃᓴᐅᓐᖏᓚᓯ ᓄᔧᕈᑎᓗᓯ, ᑐᖁᔪᑦ ᐱᔪᑎᒋᓗᒋᑦ. 2#ᒨᓯᓯ ᐂᑉᐸᖏᑦ 19:5,6; ᒨᓯᓯ ᑕᓪᓕᒪᖏᑦ 4:20; 7:6; 26:18; ᑍᑑᓯᑦ 2:14; 1 ᐲᑦᑐᕉᓯ 2:9.ᐊᑕᓂᕐᒧᑦ ᒎᑎᑦᓯᓐᓄᑦ ᐃᓄᖁᑎᒋᔭᐅᒐᑦᓯ ᐃᑦᔪᕐᓁᑦᑐᖁᑎᒋᔭᐅᓪᓗᓯ, ᐊᑕᓂᐅᑉ ᓂᕈᐊᕐᓯᒪᖕᒪᓯ ᓇᖕᒥᓂᕆᔪᒪᓪᓗᓯ, ᓄᓇᕐᔪᐊᕐᒦᑦᑐᓕᒫᑦ ᐊᑯᕐᖓᓐᓂᑦ.”
ᐆᒪᔪᐃᑦ ᓴᓗᒪᓂᕋᕐᑕᐅᔪᑦ ᓴᓗᒪᖏᓐᓂᕋᕐᑕᐅᔪᓪᓗ
ᒨᓯᓯ ᐱᖓᔪᖏᑦ 11:1-47
3“ᓱᓇᒥᒡᓘᓐᓃᑦ ᓂᕆᔪᒃᓴᐅᓐᖏᓚᓯ ᐊᑕᓂᐅᑉ ᓴᓗᒪᖏᑦᑑᓂᕋᕐᑕᖏᓐᓂᒃ. 4ᒪᑯᐊ ᑕᕝᕙ ᐆᒪᔪᐃᑦ ᓂᕆᔪᓐᓇᕐᑕᓯ; ᐃᒻᒧᒃᓯᐅᒊᑦ, ᓰᐲᑦ, ᒎᑦᓰᓪᓗ, 5ᑐᒃᑐᖓᔪᐃᑦ, ᓰᐲᓪᓗ ᓄᔪᐊᕐᑐᑦ, ᒎᑦᓰᓪᓗ ᓄᔪᐊᕐᑐᑦ, ᑐᒃᑑᔮᕐᑐᓪᓗ ᐃᐱᒃᓯᒥᒡᓗ ᑍᔭᐅᔪᑦ, ᐋᓐᑎᓘᑉᒥᒡᓗ ᑍᔭᐅᔪᑦ, ᓰᐱᐅᔮᕐᑐᓪᓗ ᖃᖅᑲᒥᐅᑍᑦ. 6ᖃᓄᐃᑦᑐᑐᐃᓐᓁᑦ ᐆᒪᔪᑦ ᐃᑎᒐᖏᑦ ᑯᑭᖃᕐᑐᑦ ᒪᕐᕉᓕᖅᑲᖓᔪᓂᒃ ᑕᒧᓗᕋᐅᔭᕐᐸᒃᑐᓪᓗ ᐆᒪᔪᓕᒫᓂᑦ ᑕᒪᒃᑯᐊ ᓂᕆᔪᓐᓇᕐᐸᓯ. 7ᐆᒪᔪᐃᓪᓕ ᓂᕆᔭᐅᔭᕆᖃᓐᖏᓚᑦ ᑭᓯᐊᓂ ᐃᑎᒐᖏᑦ ᑯᑭᖃᕐᐸᑕ ᒪᕐᕉᓕᖅᑲᖓᔪᓂᒃ ᑕᒧᓗᕋᐅᔭᕐᐸᒡᓗᑎᒡᓗ. ᒪᑯᐊ ᓂᕆᔭᒃᓴᕆᓐᖏᓚᓯ ᑳᒥᓖᑦ, ᐅᑲᓖᑦ, ᓂᕐᔪᑏᓪᓗ ᐹᑦᔪᕐᒥᒃ ᐊᑎᓖᑦ. ᑕᒪᒃᑯᐊ ᑕᒪᑦᔭ ᓴᓗᒪᖏᓐᓂᕋᕐᑕᐅᔭᕆᐊᓖᑦ; ᑕᒧᓗᕋᐅᔭᕐᐸᒃᑑᒐᓗᐊᑦ ᑯᑭᖏᑦ ᒪᕐᕉᓕᖅᑳᖓᖏᒻᒪᑕ. 8ᑰᒃᑰᓯᓂᒃ ᓂᕆᔪᒃᓴᐅᓐᖏᓚᓯ, ᑕᒪᒃᑯᐊ ᓴᓗᒪᖏᑦᑑᓂᕋᕐᑕᐅᔪᒃᓴᐅᖕᒪᑕ; ᐃᑎᒐᖏᑦ ᑯᑭᖃᕐᑑᒐᓗᐊᑦ ᒪᕐᕉᓕᖅᑲᖓᔪᓂᒃ ᑭᓯᐊᓂᓕ ᑕᒧᓗᕋᐅᔭᕐᐸᖏᒻᒪᑕ; ᑕᒪᒃᑯᐊ ᑕᒪᑦᔭ ᓂᕐᔪᑏᑦ ᓂᕆᔭᕆᐊᖃᓐᖏᑕᓯ ᑐᖁᖓᑎᓪᓗᒋᓪᓘᓐᓃᑦ ᐊᒃᑐᕆᐊᖃᓐᖏᓚᓯ.
9“ᖃᓄᐃᑦᑐᑐᐃᓐᓇᕐᓂᒡᓕ ᓂᕆᔪᓐᓇᕐᐳᓯ ᐃᒪᕐᒥᐅᑕᓂᒃ ᐃᖃᓗᖕᓂᒃ ᐸᐱᕈᖃᕐᐸᑕ ᑲᕕᓯᖃᕐᐸᑕᓗ ᓂᕆᔪᓐᓇᕐᐸᓯ, 10ᐸᐱᕈᖃᖏᑦᑐᓪᓕ ᑲᕕᓯᖃᖏᑦᑐᓪᓗ ᓂᕆᔭᒃᓴᕆᓐᖏᓇᓯ; ᑕᒪᒃᑯᐊ ᓴᓗᒤᑦᑑᖕᒪᑕ ᐃᓕᑦᓯᓐᓄᑦ.
11“ᑎᖕᒥᐊᓂᒃ ᖃᓄᐃᑦᑐᑐᐃᓐᓇᕐᓂᒃ ᓴᓗᒪᓂᕋᕐᑕᐅᔪᓂᒃ ᓂᕆᔪᓐᓇᕐᐳᓯ. 12ᒪᑯᐊᓕ ᑕᕝᕙ ᑎᖕᒥᐊᑦ ᓂᕆᔭᕆᐊᖃᓐᖏᑕᓯ; ᓇᒃᑐᕋᓖᑦ, ᐅᒃᐱᒡᔪᐊᑦ, ᓇᒃᑐᕋᓕᐅᔮᕐᑐᑦ, ᑭᒡᒐᕖᑦ, 13ᓂᕿᑐᕐᑏᑦ ᐸᓴᕐᑦᒥᒃ ᐊᑎᓖᑦ, ᑭᒡᒐᕕᐊᕐᔪᐃᓪᓗ, ᑬᑦᓗ ᐊᑦᔨᒐᓚᓕᒫᖏᓪᓗ; 14ᑐᓗᒐᓕᒫᓪᓗ ᐊᑦᔨᒐᓚᓕᒫᖏᓪᓗ; 15ᑎᖕᒥᐊᕐᔪᐊᓪᓗ ᑎᖏᔪᓐᓇᖏᑦᑐᑦ, ᑭᒡᒐᕕᐊᕐᔫᔮᕐᑐᓪᓗ ᐅᓐᓄᐊᒃᑯ ᖃᖓᑕᕙᒃᑐᑦ, ᓇᐅᔧᓪᓗ, ᕿᓐᓄᐊᔪᐊᓪᓗ, ᐊᑦᔨᒐᓚᓕᒫᖏᓪᓗ; 16ᐅᒃᐱᒡᔪᐊᓪᓗ ᒥᑭᔪᑦ ᐊᖏᓂᕐᓮᓪᓗ, ᕼᐃᓐᓯᓂᒡᓗ ᑍᔭᐅᔪᑦ ᐃᒪᕐᒥᐅᑍᑦ 17ᐱᓕᑲᓃᓪᓗ, ᑲᕆᐊᓃᓪᓗ ᕙᐅᓪᓮᑦ ᑐᖁᖓᔪᕐᓯᐅᕐᑏᓪᓗ ᑯᕐᒧᕌᓐᑎᓪᓗ, 18ᓂᐅᑯᑖᓖᓪᓗ ᓯᑐᐊᕆᒃᒥᒃ ᑍᔭᐅᔪᑦ, ᓂᐅᑯᑖᓖᓪᓗ ᕼᐃᕌᓂᒥᒃ ᐊᑎᓖᑦ, ᐊᑦᔨᒐᓚᓕᒫᖏᓪᓗ; ᕼᐅᐳᐃᓪᓗ ᐅᓐᓄᐊᕐᓯᐅᑏᓪᓗ ᐃᓴᕈᓖᑦ.
19“ᖁᐱᕐᕈᓕᒫᓪᓗ ᐃᓴᕈᓖᑦ ᑕᒪᒃᑯᐊ ᐃᓕᑦᓯᓐᓄᑦ ᓴᓗᒤᑉᐳᑦ; ᓂᕆᔭᐅᔭᕆᐊᖃᕋᑎᒡᓗ. 20ᐃᓴᕈᓕᓕᒪᓪᓕ ᖁᐱᕐᕈᐃᑦ ᓴᓗᒪᔪᑦ ᓂᕆᔪᓐᓇᕐᐸᓯ.
21 #
ᒨᓯᓯ ᐂᑉᐸᖏᑦ 23:19; 34:26. “ᓂᕐᔪᑎᓂᒃ ᐃᒻᒥᖕᓂᒃ ᑐᖁᔪᕕᓂᕐᓂᒃ ᓂᕆᔪᒃᓴᐅᓐᖏᓚᓯ; ᓄᓇᖃᑎᑐᖃᕆᓐᖏᑕᑦᓯᓐᓄᑦ ᓄᓇᑦᓯᓐᓃᑦᑐᒧᑦ ᑐᓂᔪᓐᓇᕐᐸᓯ ᓂᕆᔭᐅᖁᓪᓗᒋᑦ ᑖᒃᑯᓄᖓ, ᐅᕝᕙᓗ ᓄᓇᖃᑎᒋᓐᖏᑕᑦᓯᓐᓄᑦ ᐊᓯᑦᓯᓐᓃᑦᑐᓄᑦ ᓂᐅᕐᕈᑎᒋᔪᓐᓇᕐᐸᓯ; ᐃᓕᑦᓯᓕ ᐊᑕᓂᕐᒧᑦ ᒎᑎᑦᓯᓐᓄᑦ ᐃᓄᖁᑕᐅᕗᓯ ᐃᑦᔪᕐᓁᑦᑑᓪᓗᓯ.
“ᒎᑦᓰᑦ ᓄᕐᕋᖓᓂᒃ ᐆᔪᓕᐅᕐᑐᒃᓴᐅᓐᖏᓚᓯ ᐊᓈᓇᖓᑕ ᐃᒻᒧᖓᓄᑦ.”
ᑕᓪᓕᒪᐅᔪᐃᕐᓂᕐᒧᑦ ᐱᖁᔧᑦ
22 #
ᒨᓯᓯ ᐱᖓᔪᖏᑦ 27:30-33; ᒨᓯᓯ ᓯᑕᒪᖏᑦ 18:21. “ᑕᓪᓕᒪᐅᔪᐃᕐᑐᒃᓴᐅᕗᓯ ᐱᕈᕐᓯᐊᒃᓴᑦᓯ ᐃᓕᐅᕋᓚᐅᕐᑕᓯ ᐱᕈᕐᑎᑕᓕᒫᖏᓐᓂᒃ, ᐱᕈᕐᓰᕕᖕᓂᑦ ᐊᕐᕌᒍᑕᒫᑦ ᐱᕈᕐᑎᑉᐸᒃᑕᑦᓯᓐᓂᑦ. 23ᑕᕝᕙ ᐊᑕᓂᐅᑉ ᒎᑎᑦᓯ ᓵᖓᓂ, ᑐᒃᓯᐊᕐᕕᒃᓴᐅᖁᓪᓗᒍ ᓂᕈᐊᕐᓯᒪᔭᖓᓄᐊᕐᑐᒃᓴᐅᕗᓯ; ᑕᓪᓕᒪᐅᔪᐃᕈᑎᓯ ᓂᕆᔭᒃᓴᕆᕙᓯ ᓂᐊᖂᔭᒃᓮᑦ, ᐅᐂᓃᓪᓗ, ᓇᐹᕐᑐᐃᓪᓗ ᐸᐅᕐᖓᖏᑕ ᐅᕐᓱᖏᑦ, ᐃᒻᒧᒃᓯᐅᒐᖁᑎᑦᓯᓪᓗ ᓰᐱᖁᑎᑦᓯᓗ ᓯᕗᓪᓕᕐᐹᒥᒃ ᐃᕐᓂᐊᕆᓯᒪᔭᖏᑦ. ᑐᑭᓯᕙᓪᓕᐊᖁᓪᓗᓯ ᐊᑕᓂᕐᒥᒃ ᒎᑎᑦᓯᓐᓂᒃ ᑍᒪᓐᖓᓕᒫᖅ ᐃᓕᕋᓱᒋᐊᖃᕐᓂᕐᒥᒃ. 24ᑐᒃᓯᐊᕐᕕᒃᓴᐅᖁᔭᐅᓯᒪᔪᕐᓕ ᓇᔪᕐᑕᑦᓯᓐᓂᑦ ᐅᖓᓯᓗᐊᕐᐸᑦ, ᐊᔪᕐᓇᕐᐸᓪᓗ ᑕᓪᓕᒪᐅᔪᐃᕆᐊᕐᑐᕆᐊᒥᒃ, ᑕᕝᕙ ᐊᑕᓂᐅᑉ ᒎᑎᑦᓯ ᓮᒻᒪᕐᑎᓯᒪᒃᐸᓯ, ᑕᓪᓕᒪᐅᔪᖏᓐᓂᒃ ᐋᑦᓯᕕᒋᔭᕆᐊᓕᐅᑉ ᐅᖓᓯᓗᐊᕐᓂᖓᓄᑦ ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᔭᖓ, ᐊᑎᖓᓂ ᑐᒃᓯᐊᕐᕕᒃᓴᐅᖁᓯᒪᔭᖓ ᑕᕝᕙ ᐃᒫᒃ ᐱᔪᒃᓴᐅᕗᓯ: 25ᑖᒃᑯᐊ ᓂᐅᕐᕈᑎᒋᔭᒃᓴᕆᕙᓯ ᑮᓇᐅᔭᓐᖑᕐᑎᖔᕐᓗᒋᑦ ᑖᒃᑯᐊᓗ ᓇᒃᓴᕐᓗᒋᑦ ᐂᔪᒃᓴᐅᕗᓯ ᐊᑕᓂᐅᑉ ᒎᑎᕕᑦ ᓂᕈᐊᕐᓯᒪᔭᖓᓄᑦ. 26ᑮᓇᐅᔧᓪᓗ ᓂᐅᕕᐅᑎᒋᔪᓐᓇᕐᐸᑎᑦ ᐱᔪᒪᔭᑐᐃᓐᓇᕐᓂᒃ ᐃᒻᒧᒃᓯᐅᒐᕐᒥᒡᓘᓐᓃᑦ, ᓰᐱᒥᒡᓘᓐᓃᑦ, ᐅᐂᓂᒥᒡᓘᓐᓃᑦ, ᓴᓐᖏᔪᒥᒡᓘᓐᓃᑦ ᐃᒥᐊᓗᖕᒥᒃ, ᓂᕆᔪᒪᔭᑐᐃᓐᓇᕐᓂᒃ ᐃᒥᕈᒪᔭᕐᓂᒡᓘᓐᓃᑦ ᐊᑕᓂᐅᑉ ᒎᑎᑦᓯ ᓵᖓᓂ, ᐃᓚᑎᑦ ᐃᒡᓗᒥᐅᖃᑎᑎᑦ ᐃᓚᒋᓗᒋᑦ ᓂᕆᔪᒃᓴᐅᕗᓯ ᖁᕕᐊᓱᖃᑎᒌᒡᓗᓯ.
27“ᓕᕔᑉ ᑭᖑᕚᖏᑦ ᒥᓂᑕᒃᓴᕆᓐᖏᓚᓯ ᓄᓇᖅᑲᑎᒋᔭᓯ, ᑖᒃᑯᐊ ᓇᖕᒥᓂᖅ ᓄᓇᖁᑎᖃᖏᒻᒪᑕ ᑭᖑᕐᖑᑎᔭᒃᓴᖃᕋᑎᒡᓗ. 28ᐊᕐᕌᒍᑦ ᐱᖓᓱᑦ ᐊᓂᒍᕌᖓᑕ ᑕᒫᑦ ᐱᕈᕐᑎᑕᕕᓂᑦᓯ ᓂᐊᖂᔭᒃᓮᑦ ᑕᓪᓕᒪᐅᔪᖏᓐᓂᒃ ᑲᑎᑦᓯᔪᒃᓴᐅᕗᓯ ᑕᒪᒃᑯᐊᓗ ᓄᓇᒋᔭᑦᓯᓐᓂ ᑲᑎᑕᒃᓴᕆᕙᓯ. 29ᓕᕔᑉ ᑭᖑᕚᖓ, ᑖᓐᓇ ᓇᖕᒥᓂᕐᑕᕐᓯᒪᖏᒻᒪᑦ ᓄᓇᖁᑎᒃᓴᒥᓂᒃ, ᓄᓇᖃᑎᑐᖃᕆᓐᖏᑕᓯ ᐱᖃᑕᐅᔭᕆᐊᖃᕆᕗᑦ, ᐃᓕᐊᕐᔪᐃᓪᓗ, ᐅᐃᒡᒐᕐᓃᓪᓗ ᑕᕝᕙᓂ ᓄᓇᖃᑎᒋᔭᓯ. ᑖᒃᑯᐊᓗ ᕾᔪᒃᓴᐅᕗᑦ ᓂᕆᓗᑎᒃ ᐊᕿᐊᑦᑐᕐᓗᑎᒡᓗ; ᑕᕝᕙ ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ ᖃᓄᓕᒫᖅ ᐱᓇᓱᐊᕐᓂᕆᔭᑦᓯᓐᓂ.”
Currently Selected:
ᒨᓯᓯ ᑕᓪᓕᒪᖏᑦ 14: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
