ᒨᓯᓯ ᑕᓪᓕᒪᖏᑦ 11
11
ᐊᑕᓂᐅᖅ ᐊᔪᖏᑦᑐᕐᔪᐊᖑᓂᖓ
1“ᐊᑕᓂᖅ ᒎᑎᒋᔧᑦ ᐱᓐᓈᕆᔭᒃᓴᕆᕙᑦ ᑍᒪᓐᖓᓪᓗ ᐱᖁᔭᓕᒫᖏᑦ ᓈᓚᒡᓗᖏᑦ. 2ᐅᓪᓗᒥ ᐃᖅᑲᐅᒪᓚᐅᕐᓯᐅᒃ ᑐᑭᓯᓚᐅᕐᑕᓯ ᐊᑕᓂᐅᑉ ᐊᑐᕐᑕᑦᓯᒍᑦ ᐋᖅᑭᒃᓱᐃᓯᒪᓂᖏᑦ. ᕿᑐᕐᖓᓯᐅᖏᑦᑐᖅ, ᑕᒪᒃᑯᓂᖓ ᐊᑐᓚᐅᕋᑦᓯ. ᑕᑯᓚᐅᕋᑦᓯ ᐊᑕᓂᐅᑉ ᒎᑎᑦᓯ ᐊᔪᖏᑦᑐᕐᔪᐊᖑᓂᖓᓂᒃ, ᐱᔪᓐᓇᕐᓂᕐᔪᐊᖓᓂᒡᓗ, ᐊᔪᒐᖃᖏᑦᑐᕐᔪᐊᖑᓂᖓᓂᒡᓗ, 3#ᒨᓯᓯ ᐂᑉᐸᖏᑦ 7:8—12:13.ᓇᓗᓁᒃᑯᑕᖏᓐᓂᒡᓗ ᑕᑯᓚᐅᕆᕗᓯ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐱᓇᓱᐊᓚᐅᕐᓂᖓᓂᒃ ᓄᓇᖁᑎᓕᒫᖓᓄᓪᓗ. 4#ᒨᓯᓯ ᐂᑉᐸᖏᑦ 14:28.ᑕᑯᓚᐅᕆᕗᓯ ᐊᑕᓂᐅᑉ ᓵᓚᖃᓪᓚᕆᖕᓂᖓᓂᒃ ᐄᑦᔨᑉᑎᒥᐅᑦ ᐅᓇᑕᕐᑐᒃᓴᖁᑎᖏᓐᓂᒃ, ᕿᒻᒥᕐᔪᐊᑯᑎᖏᓪᓗ ᕿᒧᒃᓯᐅᑎᓄᓪᓗ ᐊᒃᓴᓗᐊᓕᑦ ᐱᖃᓯᐅᑎᓪᓗᒋᑦ, ᐃᒪᕐᒥ ᐊᐅᐸᓗᒃᑕᒥ ᑭᕕᑎᑦᓯᓚᐅᕐᒪᑦ ᐃᓕᑦᓯᓐᓂᒃ ᒪᓕᒐᓱᒃᑐᓂᒃ. 5ᖃᐅᔨᒪᒋᕗᓯ ᐊᑕᓂᐅᑉ ᖃᓄᖅ ᐱᓇᓱᐊᕐᕕᒋᓚᐅᕐᒪᖔᓯ ᐃᓄᖃᖏᑦᑐᒥ ᑕᒪᐅᖓ ᓄᓇᒧᑦ ᑎᑭᓚᐅᖅᑳᕐᑎᓐᓇᓯ. 6#ᒨᓯᓯ ᓯᑕᒪᖏᑦ 16:31,32.ᐃᖅᑲᐅᒪᒋᕗᓯ ᖃᓄᐃᓕᐅᓚᐅᕐᓂᖓᓂᒃ ᑖᑕᓂᒧᑦ ᐊᐱᕋᒧᓪᓗ, ᐃᓔᐊᐱᐅᑉ ᐃᕐᓂᖏᖕᓄᑦ ᕉᐱᓂᐅᑉ ᑭᖑᕚᖏᖕᓄᑦ. ᐃᓄᓕᒫᑦ ᑕᑯᓐᓇᕐᑎᓪᓗᒋᑦ ᓄᓇᕐᔪᐊᖅ ᐃᕐᐸᓚᐅᕐᒪᑦ ᑖᒃᑯᐊᓗ ᓄᓇᒧᑦ ᐄᔭᐅᓚᐅᕐᐳᑦ, ᐃᓚᓕᒫᖏᓪᓗ ᐃᓚᒋᓪᓗᒋᑦ, ᑐᐱᖏᓪᓗ, ᐱᔨᒋᔭᖏᓪᓗ ᐆᒪᔪᖁᑎᓕᒫᖏᓪᓗ, ᐃᓴᕆᐊᓕᒥᐅᑦ ᐊᑯᕐᖓᓐᓂᑦ. 7ᐃᓕᑦᓯ ᑕᕝᕙ ᑕᒪᒃᑯᓂᖓ ᑕᑯᓯᒪᔪᓯ ᐊᑕᓂᐅᑉ ᐱᓇᓱᐊᕐᓯᒪᔭᖏᓐᓂᒃ.”
ᓄᓇᐅᑉ ᐊᖏᕈᑕᐅᓯᒪᔫᑉ ᓮᒻᒪᕐᑕᐅᓇᕐᓂᖓ
8“ᐱᖁᔭᓕᒫᑦ ᒪᓕᒃᑕᒃᓴᕆᕙᓯ ᐃᓕᑦᓯᓐᓄᑦ ᐅᓪᓗᒥ ᑐᓂᓯᒪᔭᒃᑲ. ᓴᓐᖏᔫᖁᓪᓗᓯ, ᓄᓇᒧᓪᓗ ᐃᑳᕈᓐᓇᖁᓪᓗᓯ ᓄᓇᑖᕆᐊᕐᑐᕐᓗᓯ ᑕᒪᑐᒥᖓ ᐃᑎᑐᐃᓐᓇᕆᐊᖃᓕᕐᑕᑦᓯᓐᓂᒃ. 9ᑕᕝᕙ ᑕᒫᓂ ᐊᑯᓂ ᐃᓅᔪᓐᓇᕐᓂᐊᕐᐳᓯ ᓄᓇᒥ ᓂᕿᒃᓴᖃᑦᓯᐊᕐᑐᒥ ᐊᔪᕐᓴᕐᓇᖏᑦᑐᒥᓗ ᐊᑕᓂᐅᑉ ᑐᓂᓂᐊᕐᓂᕋᕐᓗᒍ ᐊᖏᕈᑎᒋᓯᒪᔭᖓᓂᒃ ᓯᕗᓕᕕᓂᑦᓯᓐᓄᑦ ᑭᖑᕚᖏᓐᓄᓪᓗ. 10ᑕᒪᓐᓇ ᓄᓇ ᓄᓇᑖᕆᓂᐊᓕᕐᑕᓯ ᐄᑦᔨᑉᑎᐅᑉ ᓄᓇᖓᑎᑐᑦ ᑍᒤᑦᑑᓐᖏᓚᖅ, ᓄᓇᒋᓚᐅᕐᑕᑦᓯᑐᑦ. ᑍᑲᓂ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᔭᕌᖓᑦᓯ, ᐱᔭᕐᓂᖏᑦᑐᒃᑯᑦ ᐱᕈᕐᑎᑦᓯᓇᓱᖃᑦᑕᓚᐅᕋᑦᓯ, ᐱᕈᕐᓰᕕᖕᒥ ᐱᕈᕐᑐᕕᓂᕐᑎᑐᑦ ᑍᒤᑎᓐᓇᓱᐊᕐᓗᒋᑦ. 11ᓄᓇᓕ ᑕᒪᓐᓇ ᓄᓇᑖᕆᓂᐊᕐᑕᓯ ᖃᖅᑲᖃᐅᕐᓗᓂᓗ ᓇᕐᓴᖃᐅᕐᐳᖅ, ᓯᓚᓗᖕᒧᓪᓗ ᐃᒻᒥᓂᒃ ᐃᒻᒥᕐᓱᕐᑕᐅᖃᑦᑕᕐᐳᖅ. 12ᐊᑕᓂᐅᓪᓕ ᒎᑎᑦᓯ ᑕᒪᓐᓇ ᓄᓇ ᓇᖕᒥᓂᖅ ᑲᒪᒋᖃᑦᑕᕐᐹ ᐊᕐᕌᒍᓕᒫᖅ ᓈᓪᓗᒍ.
13 #
ᒨᓯᓯ ᐱᖓᔪᖏᑦ 26:3-5; ᒨᓯᓯ ᑕᓪᓕᒪᖏᑦ 7:12-16; 28:1-14. “ᑍᒤᒻᒪᑦ, ᐱᖁᔧᑦ ᐃᓕᑦᓯᓐᓄᑦ ᐅᓪᓗᒥ ᑐᓂᔭᒃᑲ ᓈᓚᒃᑕᒃᓴᕆᕙᓯ; ᐊᑕᓂᖅ ᒎᑎᒋᔧᑦ ᐱᓐᓈᕆᔭᒃᓴᕆᕙᑦ ᐱᔨᑦᓯᕐᕕᒋᓗᒍᓗ ᐆᒻᒪᑎᖕᓄᑦ ᐊᑕᖏᕐᑐᒧᑦ ᑕᕐᓂᕐᓄᓪᓗ ᐊᑕᖏᕐᑐᒧᑦ. 14ᑍᒤᑐᐊᕈᕕᑦ ᑕᕝᕙ, ᓄᓇᒋᔭᕐᓄᑦ ᓯᓚᓗᒃᑕᐅᑎᑦᓯᖃᑦᑕᕐᓂᐊᕐᐳᖅ ᐱᔭᕆᐊᖃᓕᕌᖓᑦ, ᐅᑭᐊᒃᓵᒃᑯᑦ ᐅᐱᕐᖔᒃᑯᓪᓗ, ᓂᕿᒃᓴᖃᑦᓯᐊᖁᓪᓗᑎᑦ ᓂᐊᖂᔭᒃᓴᓂᒃ, ᕔᓂᒃᓴᓂᒃ, ᓇᐹᕐᑐᐃᓪᓗ ᐱᕈᕐᑐᖏᓐᓂᒃ ᐅᕐᓱᒃᓴᓂᒃ. 15ᐱᕈᕐᓰᕕᖁᑎᑦᓯᓐᓂᓗ ᐃᕕᒐᕐᓂᒃ ᐱᕈᕐᑐᖃᑦᓯᐊᕐᓂᐊᕐᐳᖅ ᐃᒻᒧᒃᓯᐅᒐᖁᑎᓯ ᓂᕿᒃᓴᖃᑦᓯᐊᖁᓪᓗᒋᑦ, ᓂᕿᒃᓴᖃᑦᓯᐊᕐᓂᐊᕐᐳᓯᓗ ᓂᕆᔪᓐᓇᕐᑕᓕᒫᑦᓯᓐᓂᒃ. 16ᐃᒃᐱᒍᓱᑦᓯᐊᕐᑐᒃᓴᐅᕗᓯᓕ ᓯᓔᕐᕆᔭᐅᖁᓇᓯ ᐊᑕᓂᐅᑉ ᐊᓯᐊᓂᒃ ᒎᑎᓐᖑᐊᓂᒃ ᑐᒃᓯᐊᕐᕕᖃᖃᑦᑕᓕᖁᓇᓯ. 17ᑐᒃᓯᐊᕐᕕᖃᖃᑦᑕᓕᑐᐊᕈᑦᓯ, ᐊᑕᓂᐅᑉ ᓂᓐᖓᒃᕕᒋᒐᔭᕐᒪᓯ, ᓄᓇᒧᓪᓗ ᓯᓚᓗᖃᑦᑕᕐᓂᖅ ᓄᖅᑲᕐᑎᒃᑲᔭᕐᐹ, ᓄᓇᖁᑎᓯᓗ ᐸᓂᓗᐊᓕᕋᔭᕐᐳᖅ ᓂᐊᖂᔭᒃᓴᓂᒃ ᐱᕈᕐᕕᐅᔭᕆᐊᒃᓴᖅ. ᑕᕝᕙᓂᓗ ᓄᓇᒥ ᑐᖁᑲᐅᕐᑐᕋᔭᕐᐳᓯ, ᑕᒪᓐᓇ ᓄᓇᑦᓯᐊᕚᓘᒐᓗᐊᕐᑎᓪᓗᒍ ᐊᑕᓂᐅᑉ ᑐᓂᓯᒪᔭᖓ ᐃᓕᑦᓯᓐᓄᑦ.
18 #
ᒨᓯᓯ ᑕᓪᓕᒪᖏᑦ 6:6-9. “ᑕᒪᒃᑯᐊ ᐃᖅᑲᐅᒪᔭᒃᓴᕆᕙᓯ ᐃᓕᑦᓯᓐᓄᑦ ᐱᖁᔨᑦᔪᑎᒋᔭᒃᑲ ᑍᒧᖎᓐᓇᕆᐅᕐᓴᕐᓗᒋᓪᓗ ᐆᒻᒪᑎᑦᓯᒍᑦ. ᐊᒡᒐᐅᑎᑦᓯᓐᓄᑦ ᓂᒻᒪᐅᑎᓗᒋᑦ ᕿᓚᒃᑕᒃᓴᕆᕙᓯ ᖃᐅᕐᒥᐅᑕᕆᓗᒋᓪᓗ ᐊᑯᓕᐊᑦᓯᓐᓂ ᐃᓕᑦᓯᓐᓄᑦ ᓇᓗᓁᒃᑯᑕᐅᖁᓪᓗᒋᑦ. 19ᕿᑐᕐᖓᑦᓯᓐᓄᓪᓗ ᑕᒪᒃᑯᐊ ᐃᓕᓐᓂᐊᕐᑎᑦᓯᑦᔪᑎᒋᔭᒃᓴᕆᕙᓯ, ᐊᖏᕐᕋᕐᓯᒪᓕᕌᖓᑦᓯᓗ ᐅᖃᖃᑎᒌᒍᑎᒋᖃᑦᑕᕐᓗᒋᑦ, ᐊᖏᕐᕋᕐᓯᒪᖏᒃᑲᓗᐊᕈᑦᓯᓗ, ᑕᖅᑬᕐᓯᕐᑎᓪᓗᓯᓗ ᐃᖅᑲᓁᔭᕐᑎᓪᓗᓯᓗ. 20ᑎᑎᕋᕐᑕᒃᓴᕆᕙᓯ ᐃᒡᓗᑦᓯ ᐃᑎᕐᑕᕐᕕᖏᑕ ᐊᕙᓗᖏᑎᒍᑦ ᐃᒡᓗᒐᓮᓪᓗ ᐊᕙᓗᕐᔪᐊᖏᑕ ᐃᑎᕐᑕᕐᕕᖏᑎᒍᑦ. 21ᑕᕝᕙ ᕿᑐᕐᖓᓯᓗ ᐊᑯᓂ ᐃᓅᓂᐊᕐᐳᓯ ᑕᒫᓂ ᓄᓇᒥ ᐊᑕᓂᐅᑉ ᒎᑎᑦᓯ ᐊᖏᕈᑎᒋᓯᒪᔭᖓᓂ ᑐᓂᔪᒪᓪᓗᓂᐅᒃ ᓯᕗᓕᕕᓂᑦᓯᓐᓄᑦ. ᑕᕝᕙᓂᓗ ᐃᓅᓂᐊᕐᐳᓯ ᓄᓇᐅᑉ ᖁᓛᒍᑦ ᕿᓚᖃᕐᓂᓕᒫᖓᓂ.
22“ᐱᖁᔭᓕᒫᑦ ᓱᖁᓯᔪᐃᑦᑑᓗᑎᑦ ᓈᓚᒃᑕᒃᓴᕆᕙᑎᑦ, ᐊᑕᓂᖅ ᒎᑎᒋᔧᑦ ᐱᓐᓈᕆᓗᒍ, ᐱᖁᔨᓂᓕᒫᖏᓪᓗ ᒪᓕᒡᓗᒋᑦ, ᑖᑦᓱᒧᖓᓗ ᓱᖁᓯᔪᐃᑦᑑᓗᑎᑦ. 23ᑕᕝᕙ ᐃᓅᖃᑎᒌᒡᔪᐊᑦ ᕿᒪᒃᓯᑎᓐᓂᐊᕐᐰᑦ ᐱᕕᒃᓴᖃᖔᖁᓪᓗᓯ, ᓄᓇᖏᓐᓂᒡᓗ ᓄᓇᑖᕐᓂᐊᕐᐳᓯ ᐃᓅᖃᑎᒌᒡᔪᐊᓄᑦ ᐃᓕᑦᓯᓐᓂᑦ ᐊᔪᖏᓐᓂᕐᓴᐅᔪᓄᑦ ᐱᔪᓐᓇᕐᓂᖃᕐᓂᕐᓴᐅᔪᓄᓪᓗ ᓄᓇᒋᔭᐅᓚᐅᕐᑐᒥᒃ. 24#ᔮᓱᐊ 1:3-5.ᓄᓇᓕᒫᕐᓗ ᐱᓱᒡᕕᒋᔭᓯ ᑕᒪᕐᒥᒃ ᓄᓇᑖᕆᓂᐊᕐᐸᓯ; ᓄᓇᒋᔭᓯᓗ ᑭᒡᓕᖃᕐᓂᐊᕐᐳᖅ ᓯᕿᓂᐅᑉ ᓇᓛᓂᑦ ᐃᓄᖃᖏᑦᑐᒥᑦ ᐱᒋᐊᕐᓗᒍ ᓕᐸᓇᓂᐅᑉ ᖃᖅᑲᖏᓐᓄᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ ᑎᑭᓪᓗᒍ, ᑰᒑᓗᖕᒥᓪᓗ ᐃᕗᕅᑎᒥᑦ ᐱᒋᐊᕐᓗᒍ ᓯᕿᓂᐅᑉ ᓄᐃᕕᐊᓂᑦ ᒥᑎᑎᕆᓂᐊᒧᑦ ᐃᒪᕐᔪᐊᕐᒧᑦ ᓯᕿᓂᐅᑉ ᓂᐱᕕᐊᓃᑦᑐᒧᑦ ᑎᑭᓪᓗᒍ. 25ᐃᓄᖕᓄᑦ ᓇᓪᓕᐊᓐᓄᑐᐃᓐᓇᖅ ᐊᑭᕋᕐᑐᕐᑕᐅᔪᓐᓇᕐᓂᐊᓐᖏᓚᓯ; ᐊᑕᓂᐅᑉ ᒎᑎᑦᓯ ᐃᓄᖕᓄᑦ ᓯᕘᕋᒋᔭᐅᑎᓐᓂᐊᕐᒪᓯ, ᑲᑉᐱᐊᒋᔭᐅᑎᓐᓂᐊᕐᐹᓯᓗ ᓇᓂᓕᒫᖅ ᓄᓇᒥ ᐱᓱᒡᕕᒋᔪᒫᕐᑕᑦᓯᓐᓂ, ᑍᒫᒃ ᐅᖃᕐᓯᒪᒐᒥ.
26“ᑕᑯᒋᑦ, ᐅᓪᓗᒥ ᐊᑐᐃᓐᓇᕈᐃᕕᒋᕙᑦᓯ ᓮᒻᒪᕐᑎᑕᐅᓂᕐᒥᒃ ᓱᒋᐊᕐᑕᐅᓂᕐᒥᒡᓗ; 27ᓮᒻᒪᕐᑎᑕᐅᓂᖅ, ᐊᑕᓂᐅᑉ ᒎᑎᑦᓯ ᐱᖁᔨᑦᔪᑎᖏᑦ ᓈᓚᒃᑯᑦᓯᒋᒃ, ᐅᓪᓗᒥ ᐃᓕᑦᓯᓐᓄᑦ ᐅᖃᐅᓯᕆᔭᒃᑲ; 28ᓱᒋᐊᕐᑕᐅᓂᕐᓕ, ᐊᑕᓂᐅᑉ ᒎᑎᑦᓯ ᐱᖁᔨᑦᔪᑎᖏᑦ ᓈᓚᖏᒃᑯᑦᓯᒋᒃ, ᓴᖑᒍᑦᓯᓗ ᐊᖅᑯᒻᒥᑦ ᐅᓪᓗᒥ ᐊᑐᕐᑕᐅᖁᓪᓗᒍ ᐅᖃᐅᓯᕆᔭᓐᓂᑦ, ᒎᑎᓐᖑᐊᓄᓪᓗ ᑐᒃᓯᐊᖃᑦᑕᖔᓕᕈᑦᓯ ᑕᒪᑐᒪ ᓯᕗᕐᖓᒍᑦ ᖃᐅᔨᒪᓚᐅᓐᖏᑕᑦᓯᓐᓄᑦ. 29#ᒨᓯᓯ ᑕᓪᓕᒪᖏᑦ 27:11-14; ᔮᓱᐊ 8:33-35.ᐊᑕᓂᐅᑉ ᒎᑎᑦᓯ ᓄᓇᒧᑦ ᑎᑭᑎᑉᐸᓯ ᓄᓇᑖᕆᓂᐊᓕᕐᑕᑦᓯᓐᓄᑦ, ᖃᖅᑲᖅ ᒋᕆᔨᒥᒃ ᐊᑎᓕᒃ ᓮᒻᒪᕐᑎᑕᐅᖁᔭᒃᓴᕆᕙᓯ ᖃᖅᑲᕐᓗ ᐄᐸᐅᓪᒥᒃ ᐊᑎᓕᒃ ᓱᒋᐊᕐᑕᐅᔪᒃᓴᐅᖁᓗᒍ. 30ᑖᒃᑯᐊᒃ ᖃᖅᑳᒃ ᑰᑉ ᔪᐊᕐᑕᓂᐅᑉ ᐊᑭᐊᓃᓐᖏᓚᒃ, ᓯᕿᓂᐅᑉ ᓂᐱᕕᐊᑕ ᓇᓛᓃᑉᐴᒃ, ᑬᓇᓂᒥᐅᑦ ᓄᓇᖓᓂ ᐊᕋᐸᒥ ᓄᓇᖃᕐᑐᓂ, ᒋᐅᓪᒐᐅᑉ ᐊᑭᐊᓂ, ᓇᐹᕐᑑᑉ ᐆᒃᒥᒃ ᒨᕆᒥᒃ ᐊᑎᓕᐅᑉ ᖃᓂᒋᔭᖓᓂ. 31ᑰᖕᒥᒃ ᔪᐊᕐᑕᓂᒥᒃ ᐃᑳᕈᑦᓯ ᓄᓇᑖᕆᐊᕐᑐᕐᓗᓯ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᐃᓕᑦᓯᓐᓄᑦ; ᓄᓇᑖᕆᒍᑦᓯᐅᒃ ᑍᑲᓂᓗ ᓄᓇᖃᓕᕈᑦᓯ, 32ᑲᒪᑦᓯᐊᕆᑦᓯ ᐱᖁᔭᓕᒫᓐᓂᒃ ᒪᓕᒐᒃᓴᓂᒡᓗ ᒪᓕᑦᓯᐊᖁᓪᓗᓯ ᐅᓪᓗᒥ ᐃᓕᑦᓯᓐᓄᑦ ᐅᖃᐅᓯᕆᓯᒪᔭᓐᓂᒃ.”
Currently Selected:
ᒨᓯᓯ ᑕᓪᓕᒪᖏᑦ 11: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
