ᒨᓯᓯ ᑕᓪᓕᒪᖏᑦ 12
12
ᑐᒃᓯᐊᕐᕕᒃᓴᖅ ᐊᑕᐅᓯᑐᐊᖅ
1“ᐅᑯᐊ ᑕᕝᕙ ᐱᖁᔧᑦ ᒪᓕᒐᒃᓮᓪᓗ ᐃᒃᐱᒍᓱᑦᓯᐊᕐᓗᓯ ᒪᓕᒋᐊᖃᕐᑕᓯ ᓄᓇᒥ ᐊᑕᓂᐅᑉ ᓯᕗᓕᕕᓂᑦᓯ ᒎᑎᖓᑦᑕ, ᑐᓂᔭᖓᓂᒃ ᐃᓕᑦᓯᓐᓄᑦ ᓄᓇᑖᕆᖁᓪᓗᒍ ᓄᓇᒥ ᐃᓅᓂᓕᒫᑦᓯᓐᓂ. 2ᓄᓇᑖᕆᓕᕐᑕᑦᓯᓐᓂ ᐃᓅᖃᑎᒌᒡᔪᐊᑦ ᒎᑎᒥᖕᓄᑦ ᑐᒃᓯᐊᕐᕕᒋᕙᒃᑕᕕᓂᖏᑕ ᐃᓂᖏᑦ ᐊᑕᖏᓪᓚᕆᒡᓗᒋᑦ ᓄᖑᑦᓯᐊᒐᒃᓴᕆᕙᓯ, ᖃᖅᑬᑦ ᐳᕐᑐᔪᑦ ᖄᖏᓐᓂ ᐱᖑᐃᓪᓗ ᖄᖏᓐᓂ ᓇᐹᕐᑐᐃᓪᓗ ᑐᖑᔪᕐᑕᓕᒫᑦ ᐊᑖᓃᑦᑐᑦ; 3#ᒨᓯᓯ ᑕᓪᓕᒪᖏᑦ 7:5.ᑐᓂᕐᕈᓯᕐᕕᖁᑎᖏᑦ ᐅᕐᕉᕋᕐᑎᑕᒃᓴᕆᕙᓯ, ᐅᔭᕅᓪᓗ ᓇᐸᔪᖁᑎᖏᑦ ᑐᒃᓯᐊᕐᕖᑦ ᓯᖁᑦᑎᕐᓗᒋᑦ. ᒎᑎᓐᖑᐊᖏᓪᓗ ᐊᓯᕋᒥᒃ ᐊᑎᓖᑦ ᐃᑯᒪᒧᑦ ᐃᑯᐊᓪᓚᒡᓗᒋᑦ; ᒎᑎᓐᖑᐊᖏᓪᓗ ᓴᓇᓯᒪᔪᑦ ᑲᓱᐊᕐᓗᒋᑦ ᓄᖑᓪᓗᒋᑦ, ᐊᑎᖏᓪᓗ ᑕᕝᕙᓃᑦᑐᑦ ᓄᓇᒥ ᓯᖁᑦᑎᕐᓗᒋᑦ ᓄᖑᓪᓗᒋᑦ.
4“ᐊᑕᓂᖅ ᒎᑎᓯ ᑐᒃᓯᐊᕕᒋᔭᒃᓴᕆᓐᖏᓚᓯ ᑖᒃᑯᐊ ᒎᑎᓐᖑᐊᒥᖕᓄᑦ ᑐᒃᓯᐊᕈᓯᕆᕙᒃᑕᖏᑎᑐᑦ. 5ᕿᓂᕆᐊᖃᕈᒫᕐᐳᓯᓕ ᐃᓂᒃᓴᒥᒃ ᐊᑕᓂᐅᑉ ᒎᑎᑦᓯ ᓂᕈᐊᕐᑕᖓᓂᒃ ᑭᖑᕚᖑᖃᑎᒌᓕᒫᑦ ᓄᓇᖏᓐᓂ ᐊᑎᖓᑕ ᐃᓂᒃᓴᖓᓂᒃ ᓇᔪᒐᒃᓴᖓᓂᒡᓗ; ᑕᕝᕙ ᑍᑯᖓ ᐂᖃᑦᑕᕆᐊᖃᕈᒫᕐᐳᓯ, 6ᑕᕝᕙᓂ ᑐᓂᕐᕈᓯᕈᓐᓇᖁᓪᓗᓯ ᑐᓂᕐᕈᑎᒃᓴᓂᒃ ᐃᑯᐊᓚᑎᑕᒃᓴᓂᒃ ᐊᓯᖏᓐᓂᒡᓗ ᑐᓂᕐᕈᑎᒃᓴᓂᒃ ᑐᓂᓯᔪᓐᓇᖁᓪᓗᓯ, ᑕᓪᓕᒪᐅᔪᐃᕈᑎᓯ ᑐᓂᕐᕈᑎᓯᓗ ᑮᓇᐅᔧᑦ ᑕᕝᕗᖓ ᑐᓂᖃᑦᑕᖁᓪᓗᓯᐅᒃ, ᑐᓂᕐᕈᑎᒃᓮᑦ ᐊᑕᓂᕐᒧᑦ ᑐᓂᕐᕈᑎᒋᔪᒪᓪᓗᒋᑦ ᐊᖏᕈᑎᒋᓯᒪᔭᓯ, ᐃᓱᒪᕐᓱᕐᓗᓯᓗ ᑐᓂᔪᒪᔭᑦᓯᓐᓂᒃ ᑐᓂᕐᕈᑎᒋᔪᒪᔭᓯ, ᓯᕗᓪᓕᕐᐹᒥᒡᓗ ᐃᕐᓂᐊᕆᔭᐅᓯᒪᔪᑦ ᐃᒻᒧᒃᓯᐅᒐᖁᑎᑦᓯ ᓰᐱᖁᑎᑦᓯᓗᑦᑕᐅᖅ; 7ᑕᕝᕙᓂᓗ ᐊᑕᓂᐅᑉ ᒎᑎᑦᓯ ᓇᔪᕐᑕᖓᓂ ᓂᕆᔪᒃᓴᐅᕗᓯ ᖁᕕᐊᓱᒻᒪᕆᒡᓗᓯ, ᐃᓚᒋᔭᓯᓗ ᐃᒡᓗᒥᐅᖃᑎᓕᒫᓯ ᐱᓇᓱᐊᕐᓯᒪᔭᓕᒫᓯᓐᓂ, ᐊᑕᓂᐅᑉ ᒎᑎᑦᓯ ᓮᒻᒪᕐᑎᓯᒪᖕᒪᓯ.
8“ᑕᒪᓐᓇᓕ ᓇᓪᓕᐅᑎᒃᐸᑦ, ᐱᓇᓱᐊᕐᓂᕆᖃᑦᑕᓚᐅᕐᑕᓯ ᒪᓕᑐᐃᓐᓇᕐᓗᒍ ᐱᓇᓱᐊᕐᑐᒃᓴᐅᓐᖏᓚᓯ. ᒫᓐᓇᒧᑦ ᑎᑭᓪᓗᒍ ᑐᒃᓯᐊᕐᓂᖃᖃᑦᑕᕐᓯᒪᒐᑦᓯ ᐃᓕᑦᓯᓐᓄᑦ ᓈᒻᒪᒐᓱᒋᔭᓯ ᒪᓕᑐᐃᓐᓇᕐᓗᒍ, 9ᓄᓇᒧᑦ ᐊᑕᓂᐅᑉ ᒎᑎᑦᓯ ᑐᓂᔪᒪᓯᒪᔭᖓᓄᑦ ᓱᓕ ᑎᑭᐅᑎᓚᐅᖏᓐᓇᑦᓯ, ᑕᕝᕙᓂ ᓄᓇᖃᓕᕈᑦᓯ ᐃᓱᒫᓗᖏᓪᓗᓯ ᐃᓅᔪᓐᓇᓛᕋᑦᓯ. 10ᑰᖕᒥᒃ ᔪᐊᕐᑕᓂᐅᑉ ᑰᖓᓂᒃ ᐃᑳᕈᑦᓯ, ᐊᑕᓂᐅᑉ ᓄᓇᑖᕐᑎᑦᓱᒫᕐᐹᓯ ᑕᕝᕙᓂ ᓄᓇᖃᕈᓐᓇᖁᓪᓗᓯ. ᐊᑕᓂᐅᑉ ᓴᐳᑎᓯᒪᔪᒫᕐᐹᓯ ᐊᑭᕋᕐᑐᕐᑎᑦᓯᓐᓂᑦ, ᐃᓱᒫᓗᖏᓪᓗᓯ ᑕᕝᕙᓂ ᓄᓇᖃᕈᓐᓇᖁᓪᓗᓯ. 11ᑕᕝᕙᓂᓗ ᐊᑕᓂᖅ ᒎᑎᓯ ᓂᕈᐊᕈᒫᕐᐳᖅ ᐊᑕᐅᓯᕐᒥᒃ ᑖᑦᓱᒧᖓ ᑐᒃᓯᐊᖃᑦᑕᕐᕕᒃᓴᑦᓯᓐᓂᒃ, ᑕᕝᕙᓂ ᑐᓂᓯᖃᑦᑕᕐᕈᒫᕐᐳᓯ ᐃᓕᑦᓯᓐᓄᑦ ᐱᖁᔨᑦᔪᑎᒋᓯᒪᔭᓕᒫᓐᓂᒃ: ᑐᓂᕐᕈᑎᒃᓴᑦᓯᓐᓂᒃ ᐃᑯᐊᓚᑎᑕᒃᓴᓂᒃ ᐊᓯᖏᓐᓂᒡᓗ ᑐᓂᕐᕈᑎᒃᓴᑦᓯᓐᓂᒃ ᑐᓂᓯᔪᓐᓇᖁᓪᓗᓯ, ᑕᓪᓕᒪᐅᔪᐃᕈᑎᒋᔭᓯᓗ ᐊᓯᖏᓪᓗ ᑐᓂᕐᕈᑎᒃᓴᕆᔭᓯ, ᑐᓂᔭᒃᓴᓯᓗ ᐱᓪᓚᕆᐅᔪᑦ ᐊᑕᓂᕐᒧᑦ ᑐᓂᔭᒃᓴᕆᓪᓗᒋᑦ ᐊᖏᕈᑎᒋᓯᒪᔭᓯ. 12ᑖᑦᓱᒪ ᐊᑕᓂᐅᑉ ᒎᑎᑦᓯ ᓇᔪᕐᑕᖓᓂ ᖁᕕᐊᓱᒃᑐᒃᓴᐅᕗᓯ, ᕿᑐᕐᖓᓯ ᐃᓚᒋᓗᒋᑦ, ᐱᔨᓯᓗ ᐃᓚᒋᓗᒋᑦ, ᓕᕔᑎᒃᑯᓪᓗ ᓄᓇᑦᓯᓐᓂ ᓄᓇᖅᑲᑎᒋᔭᓯ ᐃᓚᒋᓗᒋᑦ; ᐃᖅᑲᐅᒪᓗᓯ ᓕᕔᑎᒃᑯᑦ ᓇᖕᒥᓂᒃᓴᒥᓂᒃ ᓄᓇᖁᑎᖃᖏᒻᒪᑕ. 13ᐃᒃᐱᒍᓱᑦᓯᐊᕐᑐᒃᓴᐅᕗᓯ ᑐᓂᕐᕈᑎᒃᓴᓯᓐᓂᒃ ᑐᓂᕐᕈᓯᕐᑐᒃᓴᐅᖏᓐᓇᑦᓯ ᐃᓕᑦᓯ ᓇᖕᒥᓂᖅ ᑐᓂᕐᕈᓯᕐᕕᒋᔪᒪᑐᐃᓐᓇᕐᑕᑦᓯᓐᓂ; 14ᑕᒪᒃᑯᐊᓕ ᑐᓂᕐᕈᑎᒃᓮᑦ ᑐᓂᔭᒃᓴᕆᕙᓯ ᑐᓂᕐᕈᓯᕐᕕᖕᒥ ᐊᑕᓂᐅᑉ ᓄᓇᒥ ᓂᕈᐊᕐᓯᒪᔭᖓᓂ ᓇᓪᓕᐊᑦᑕ ᑭᖑᕚᕇᑦ ᓄᓇᖁᑎᖓᑦᑕ ᐃᓚᖓᓂ ᐊᓯᐊᓂᐅᖏᑦᑐᖅ. ᑕᕝᕙᓂ ᑭᓯᐊᓂ ᑐᓂᕐᕈᓯᕐᑐᒃᓴᐅᕗᓯ ᐃᑯᐊᓚᑎᑕᒃᓴᓂᒃ ᐊᓯᖏᓐᓂᒡᓗ ᐃᓕᑦᓯᓐᓄᑦ ᐊᑐᕐᑕᐅᖁᓯᒪᔭᓐᓂᒃ.
15“ᐆᒪᔪᖁᑎᑦᓯᓐᓂᒡᓕ ᓇᓂᑐᐃᓐᓇᖅ ᑐᖁᑦᓯᔪᓐᓇᕐᐳᓯ ᓂᕆᔪᓐᓇᕐᓗᓯᓗ ᓇᔪᕐᑕᑦᓯᓐᓂ ᓇᓂᑐᐃᓐᓇᐅᒐᓗᐊᕐᐸᑦ, ᖃᑦᓯᑐᐃᓐᓇᑦᓯᐊᓂᒃ ᐊᑕᓂᐅᑉ ᓮᒻᒪᕐᑎᑦᓯᓂᕐᒥᒍᑦ ᑐᓂᔭᖏᓐᓂᒃ ᐃᓕᑦᓯᓐᓄᑦ, ᐅᒃᐱᕐᓂᒃᑯᑦ ᓴᓗᒪᔫᓂᕋᕐᑕᐅᒃᐸᑕ ᓴᓗᒪᔫᓂᕋᕐᑕᐅᖏᑉᐸᑕᓘᓐᓃᑦ, ᓂᕆᔭᒃᓴᕆᕙᓯ, ᓂᕿᒥᒃ ᓂᕆᒐᔭᕈᑦᓯᑐᑦ ᑐᒃᑐᖓᔫᑉ ᓂᕿᖓᓂᒃ ᐅᕝᕙᓗ ᑐᒃᑑᔮᕐᑐᒥᒃ. 16#ᒨᓯᓯ ᓯᕗᓪᓖᑦ 9:4; ᒨᓯᓯ ᐱᖓᔪᖏᑦ 7:26,27; 17:10-14; 19:26; ᒨᓯᓯ ᑕᓪᓕᒪᖏᑦ 15:23.ᐊᐅᖏᑦ ᓂᕆᔭᕆᐊᖃᕋᔭᓐᖏᑕᑐᐊᕆᕙᓯ; ᒪᓂᖅᑲᒧᓪᓕ ᑯᕕᔭᒃᓴᕆᕙᓯ ᐃᒥᕐᑎᑐᑦ. 17ᐊᑕᓂᕐᒧᓪᓕ ᑐᓂᕐᕈᑎᒃᓴᕆᔭᓯ ᓄᓇᒥ ᓇᔪᕐᑕᑦᓯᓐᓂ ᓂᕆᔭᒃᓴᕆᓐᖏᓚᓯ: ᑕᓪᓕᒪᐅᔪᐃᕈᑎᒋᒍᑦᓯᐅᒃ ᐱᕈᕐᑐᕕᓂᐅᒃᐸᑦ ᓂᐊᖂᔭᒃᓴᖅ, ᕔᓂᒃᓴᖅ, ᓇᐹᕐᑑᓪᓗ ᐱᕈᕐᑐᖓ ᐅᕐᓱᒃᓴᐅᒃᐸᑦ, ᐃᒻᒧᒃᓯᐅᒐᖁᑎᑦᓯᓗ ᕿᑐᕐᖏᕐᖓᐅᑎᒋᒃᐸᒍ ᓰᐱᖁᑎᑦᓯᓘᓐᓃᑦ, ᐊᑕᓂᕐᒧᑦ ᐊᖏᕈᑎᒋᓯᒪᒍᕕᐅᒃ ᑐᓂᕐᕈᑎᒃᓴᕆᔪᒪᓗᒍ, ᐃᓱᒪᕐᓱᕐᓗᑎᑦ ᑐᓂᔪᒪᔭᕐᓂᒃ ᑐᓂᕐᕈᓯᕐᓂᐊᕈᕕᑦ, ᐊᓯᖏᓐᓂᒡᓘᓐᓃᑦ ᑐᓂᕐᕈᑎᒃᓴᕆᔭᕐᓂᒃ. 18ᕿᑐᕐᖓᓯ ᐃᓚᒋᓗᒋᑦ, ᐱᔨᓯᓗ ᓕᕔᑎᓪᓗ ᓄᓇᒋᔭᑦᓯᓐᓂ ᓄᓇᖃᕐᑐᑦ, ᑕᒪᒃᑯᐊ ᓂᕆᔭᒃᓴᕆᕙᓯ ᑐᓂᕐᕈᑎᐅᓯᒪᔪᑦ ᐊᑕᓂᐅᑉ ᒎᑎᑦᓯ ᓇᔪᒑᖓᓂ ᐊᓯᐊᓂᐅᖏᑦᑐᖅ, ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᔭᖓᓂ ᑐᓂᕐᕈᓯᕐᕕᒃᓴᐅᖁᔭᖓᓂ ᑕᕝᕙᓂᑐᐊᖅ. ᑕᕝᕙᓂᓗ ᖁᕕᐊᓲᑎᖃᕐᑐᒃᓴᐅᕗᑎᑦ ᐱᓇᓱᐊᕐᓯᒪᔭᓕᒫᕐᓂᒃ. 19ᐃᒃᐱᒍᓱᑦᓯᐊᕐᑐᒃᓴᐅᕗᓯ, ᓕᕔᑎᓂᒃ ᐱᖃᑕᐅᑎᑦᓯᖏᑦᑑᖁᓇᓯ, ᑕᒫᓂ ᓄᓇᒋᓕᕐᑕᑦᓯᓐᓂ ᓄᓇᖃᕐᓂᓕᒫᑦᓯᓐᓂ.
20“ᐊᑕᓂᐅᓪᓕ ᒎᑎᑦᓯ ᓄᓇᒋᔭᑦᓯ ᑭᒡᓕᖓ ᐊᖏᒡᓕᒋᐊᕐᑎᑉᐸᒍ, ᑕᒪᓐᓇ ᐃᓕᑦᓯᓐᓄᑦ ᐊᖏᕈᑎᒋᓯᒪᖕᒪᒍ, ᓂᕿᒥᒃ ᓂᕆᔪᒃᓴᐅᕗᓯ ᓂᕆᕕᒋᔪᒪᔭᑦᓯᓐᓂ ᓇᓂᑐᐃᓐᓇᖅ. 21ᑐᒃᓯᐊᕐᕕᒃᓴᑐᐊᕆᔭᓯᓕ ᓇᔪᕐᑕᑦᓯᓐᓂᑦ ᐅᖓᓯᓗᐊᕐᐸᑦ, ᑕᕝᕙ ᓇᓂᑐᐃᓐᓇᖅ ᐆᒪᔪᓂᒃ ᐃᒻᒧᒃᓯᐅᒐᕐᓂᒃ ᓰᐱᓂᒡᓘᓐᓃᑦ ᐊᑕᓂᐅᑉ ᑐᓂᓯᒪᔭᖏᓐᓂᒃ ᐃᓕᑦᓯᓐᓄᑦ ᓂᕆᕕᒋᔪᒪᔭᑦᓯᓐᓂ ᓂᕆᔪᓐᓇᕐᐳᓯ, ᐊᖏᕐᕋᑦᓯᓐᓂ, ᑍᒫᒃ ᑕᒪᑐᒥᖓ ᐅᖃᐅᑎᓯᒪᒐᑦᓯ. 22ᓇᓪᓕᐊᑐᐃᓐᓇᖅ ᐅᒃᐱᕐᓂᒃᑯᑦ ᓴᓗᒪᓂᕋᕐᑕᐅᔪᖅ ᓴᓗᒪᓂᕋᕐᑕᐅᖏᑦᑐᕐᓘᓐᓃᑦ, ᑕᕝᕙᓐᖓᑦ ᓂᕿᒥᒃ ᓂᕆᔪᓐᓇᕐᐳᖅ, ᑍᒫᒃ ᑐᒃᑐᖓᔪᒥᒃ ᑐᒃᑑᔭᕐᑐᒥᒡᓘᓐᓃᑦ ᓂᕆᒐᔭᕐᓂᕐᒥᑐᑦ. 23#ᒨᓯᓯ ᐱᖓᔪᖏᑦ 17:10-14.ᓂᕿᒥᒃ ᐊᐅᖃᕐᑐᒥᒃ ᓱᓕ ᓂᕆᔪᒃᓴᐅᓐᖏᓚᓯ, ᐃᓅᓯᖓ ᐊᐅᖓᓃᒻᒪᑦ, ᑍᒤᒻᒪᑦ ᐃᓅᔪᒥᒃ ᓂᕿᖓᓃᑦᑐᒥᒃ ᓂᕆᔪᒃᓴᐅᓐᖏᓚᓯ. 24ᐊᐅᖕᒥᒃ ᓂᕆᔭᒃᓴᓕᐅᕐᑐᒃᓴᐅᓐᖏᓚᑎᑦ; ᐃᒥᕐᑎᑐᓪᓕ ᑯᕕᔭᒃᓴᕆᕙᑦ ᒪᓂᖅᑲᒧᑦ. 25ᑕᒪᓐᓇ ᐱᖁᔨᑦᔪᑎᐅᔪᖅ ᒪᓕᖕᓂᐊᕈᕕᐅᒃ, ᑕᕝᕙ ᐊᑕᓂᐅᑉ ᖁᕕᐊᒋᓂᐊᕐᐹᑎᑦ, ᐃᓘᓐᓈᒍᓪᓗ ᖃᓄᐃᖏᑦᓯᐊᕐᓂᐊᕐᐳᑎᑦ ᑭᖑᕚᓕᒫᑎᓪᓗ. 26ᐊᑕᓂᐅᓪᓕ ᑐᒃᓯᐊᕐᕕᒃᓴᐅᑎᑕᖓᓄᑦ ᐊᑕᐅᓯᕐᒧᑦ ᐋᑦᓯᔪᒃᓴᐅᕗᑎᑦ ᑐᓂᕐᕈᑎᒃᓴᕆᔭᕐᓂᒃ ᑐᓂᔭᒃᓴᕆᔭᕐᓂᒡᓗ ᐊᑕᓂᕐᒧᑦ ᐊᖏᕈᑎᒋᓯᒪᔭᕐᓂᒃ. 27ᑕᕝᕙᓂ ᑐᓂᕐᕈᓯᕐᑐᒃᓴᐅᕗᑎᑦ ᐃᑯᐊᓚᒐᒃᓴᓂᒃ ᐊᑕᖏᕐᓗᒋᑦ ᐊᑕᓂᐅᑉ ᑐᓂᕐᕈᓯᕐᕕᖁᑎᖓᓂ. ᑕᒪᒃᑯᐊᓗ ᑐᓂᕐᕈᑎᒋᔭᒃᓴᕆᕙᑎᑦ ᓂᕆᔭᒃᓴᕕᑦ ᓂᕿᖏᑦ ᐊᐅᖓᓗ ᑯᕕᓗᒍ ᑐᓂᕐᕈᓯᕐᕕᖕᒧᑦ. 28ᑕᒪᒃᑯᐊᓗ ᐱᖁᔨᑦᔪᑎᒋᔭᓕᒫᒃᑲ ᐃᒃᐱᒍᓱᑦᓯᐊᕐᓗᑎᑦ ᓈᓚᒃᑕᒃᓴᕆᕙᑎᑦ, ᑕᕝᕙ ᖃᓄᐃᖏᑦᓯᐊᕐᓂᐊᕐᐳᑎᑦ ᑭᖑᕚᓕᒫᑎᓪᓗ ᐃᓱᖃᖏᑦᑐᒧᑦ, ᐱᓇᓱᐊᕋᔭᕋᕕᑦ ᓈᒻᒪᒋᔭᐅᔪᒥᒃ ᐊᑕᓂᐅᓪᓗ ᒎᑎᕕᑦ ᖁᕕᐊᒋᔭᖓᓂᒃ.”
ᒎᑎᓐᖑᐊᖃᕐᓂᐅᑉ ᐅᓗᕆᐊᓇᕐᓂᖓ
29“ᐊᑕᓂᐅᑉ ᒎᑎᑦᓯ ᐃᓅᖃᑎᒌᒡᔪᐊᓕᒫᑦ ᓄᖑᑎᓐᓂᐊᕐᐰᑦ ᓵᓚᒋᓂᐊᕐᑕᓯ ᓄᓇᑖᕆᓂᐊᕐᑕᑦᓯᓐᓃᑦᑐᑦ, ᓄᓇᒋᔭᖏᓐᓂᒃ ᐊᕐᓵᕐᓂᐊᕋᑦᓯᐅᒃ ᓄᓇᖃᖔᓕᕐᓗᓯᓗ ᑕᕝᕙᓂ. 30ᑖᒃᑯᐊᓕ ᐃᓅᖃᑎᒌᒡᔪᐊᑦ ᓄᖑᑕᐅᓯᒪᓕᕐᓂᖏᑕ ᑭᖑᓂᖓᒍᑦ, ᑲᒪᑦᓯᐊᕐᑐᒃᓴᐅᕗᓯ ᐅᒃᐱᕐᓂᕆᔭᖏᑕ ᐃᓕᖅᑯᓯᖏᓐᓄᑦ ᐅᐃᕕᕆᔭᐅᖁᓇᓯ. ᖃᐅᔨᓇᓱᐊᕐᑐᒃᓴᐅᓐᖏᓚᓯᓘᓐᓃᑦ ᖃᓄᐃᓕᐅᕐᓗᑎᒃ ᒎᑎᒥᖕᓄᑦ ᑐᒃᓯᐊᕐᐸᓚᐅᕐᒪᖔᑕ, ᑐᒃᓯᐊᕈᓯᕆᕙᓚᐅᕐᑕᖏᑎᑐᑦ ᑐᒃᓯᐊᕋᓱᓕᖁᓇᓯ. 31ᐊᑕᓂᖅ ᒎᑎᓯ ᑐᒃᓯᐊᕐᕕᒋᔭᒃᓴᕆᓐᖏᓚᓯ ᑍᒃᑯᐊ ᒎᑎᓐᖑᐊᒥᖕᓄᑦ ᑐᒃᓯᐊᕈᓯᖏᑎᑐᑦ, ᒎᑎᒥᖕᓄᑦ ᑐᒃᓯᐊᓕᕌᖓᒥᒃ ᓈᒻᒪᖏᑦᑐᐊᓗᖕᓂᒃ ᐱᓂᐊᕐᓂᖃᓲᖑᖕᒪᑕ ᐊᑕᓂᐅᑉ ᐆᒥᒋᔭᖏᓐᓂᒃ. ᕿᑐᕐᖓᒥᖕᓂᒃ ᐊᒡᓛᑦ ᑐᓂᕐᕈᓯᓲᖑᖕᒪᑕ ᑐᓂᕐᕈᓯᕐᕕᖕᒥ ᐃᑯᐊᓪᓚᒃᑎᓪᓗᒋᑦ.
32 #
ᒨᓯᓯ ᑕᓪᓕᒪᖏᑦ 4:2; ᑕᑯᑎ 22:18,19. “ᐱᖁᔨᑦᔪᑎᒋᓯᒪᔭᓕᒫᓐᓂᒃ ᐱᓇᓱᐊᕐᑐᒃᓴᐅᕗᓯ; ᐊᓯᖏᓐᓂᒃ ᐃᓚᓯᔪᒃᓴᐅᓐᖏᓚᓯ ᐃᓚᓐᖎᔪᒃᓴᐅᓇᓯᓗ ᑖᒃᑯᓂᖓ.”
Currently Selected:
ᒨᓯᓯ ᑕᓪᓕᒪᖏᑦ 12: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
