ᒨᓯᓯ ᑕᓪᓕᒪᖏᑦ 10
10
ᒨᓯᓯᐅᑉ ᐱᖁᔭᓂᒃ ᑐᓂᓯᕕᐅᒃᑲᓐᓂᕐᓂᖓ
ᒨᓯᓯ ᐂᑉᐸᖏᑦ 34:1-10
1“ᑕᕝᕙ ᐊᑕᓂᐅᑉ ᐅᖃᐅᑎᕚᖓ, ‘ᐅᔭᕌᖕᓂᒃ ᒪᕐᕉᖕᓂᒃ ᐲᕐᓯᓚᐅᕆᑦ ᐅᓕᒻᒫᓗᒋᒃ ᓯᕗᓪᓕᕐᑎᑐᑦ ᓴᓇᓯᒪᓗᖏᒃ ᕿᔪᖕᒥᒡᓗ ᐴᓕᐅᕐᓗᒋᒃ ᐃᓂᒃᓴᖏᖕᓂᒃ. ᐅᕙᓐᓄᓪᓗ ᕾᓂᐊᕐᐳᑎᑦ ᒪᔪᕋᕐᓗᑎᑦ ᖃᖅᑲᒧᑦ. 2ᑖᒃᑯᐊᒃ ᑎᑎᕋᕐᕕᒋᓂᐊᕋᒃᑭᒃ ᐅᖃᐅᓯᕐᓂᒃ ᓯᕗᓪᓕᕐᒥᒃ ᑎᑎᕋᕐᓯᒪᓚᐅᕐᑐᑎᑐᑦ ᑍᒃᑯᑎᑐᓇᖅ ᓱᕋᓚᐅᕐᑕᕐᑎᑐᑦ, ᑕᕝᕙ ᐱᒍᕕᒋᒃ ᐃᒃᓯᕐᕕᖕᒧᑦ ᐴᕐᑕᒃᓴᕆᕚᒃᑭᒃ.’
3“ᑕᕝᕙ ᐃᒃᓯᕐᕕᓕᐅᓕᓚᐅᕐᐳᖓ ᕿᔪᖕᒥᒃ ᐊᑬᑦᓯᐊᒥᒃ ᐊᑎᓕᖕᒥᑦ ᐱᓯᒪᔪᒥᒃ ᐅᔭᕌᖕᓂᒡᓗ ᒪᕐᕉᖕᓂᒃ ᐅᓕᒻᒫᓪᓗᒋᒃ ᐲᕐᓯᓚᐅᕆᕗᖓ ᓯᕗᓪᓕᐅᓚᕐᑐᑎᑐᑦ ᓴᓇᓯᒪᓪᓗᒋᒃ ᑖᒃᑯᐊᓗ ᓇᒃᓴᕐᓗᒋᑦ ᖃᖅᑲᒧᑦ ᒪᔪᕋᓕᓚᐅᕐᐳᖓ. 4ᑕᕝᕙ ᐊᑕᓂᐅᑉ ᑖᒃᑯᐊᒃ ᐅᔭᕌᒃ ᑎᑎᕋᕐᕕᒋᓚᐅᕐᐰᑦ ᐅᖃᐅᓯᕐᓂᒃ ᑖᒃᑯᓂᖓᑦᓮᓐᓇᖅ ᑎᑎᕋᓚᐅᕐᑕᒥᑐᑦ ᑎᑎᕋᕐᓗᒋᑦ, ᐱᖁᔭᓂᒃ ᖁᓕᓂᒃ ᑍᑦᓱᒪᓂ ᐃᑯᒪᒦᓪᓗᓂ ᐃᓕᑦᓯᓐᓄᑦ ᑐᓂᓚᐅᕐᑕᒥᓂᒃ ᖃᖅᑲᐅᑉ ᑭᒡᓕᖓᓂ ᑲᑎᒪᑎᓪᓗᓯ. ᑖᒃᑯᐊᒡᓗ ᐊᑕᓂᐅᑉ ᐅᕙᓐᓄᑦ ᑐᓂᓚᐅᕐᐰᑦ. 5ᖃᖅᑲᒦᒌᕋᒪᓕ ᐊᖅᑲᓕᓚᐅᕆᕗᖓ, ᑕᕝᕙ ᐊᑕᓂᐅᑉ ᑍᒫᒃ ᐱᖁᔨᓯᒪᓂᖓ ᒪᓕᒡᓗᒍ, ᐃᒃᓯᕐᕕᖕᒧᑦ ᓴᓇᓚᐅᕐᑕᓐᓄᑦ ᐴᓚᐅᕐᐸᒃᑲ ᑍᒫᓐᖓᓪᓗ ᑕᕝᕙᓃᖏᓐᓇᓕᕐᐳᑦ.”
6 #
ᒨᓯᓯ ᓯᑕᒪᖏᑦ 20:28; 33:38. (ᑕᕝᕙ ᐃᓴᕆᐊᓕᒥᐅᑦ ᐃᒥᕐᑕᕐᕕᖕᒥᑦ ᐱᐊᕌᔅ-ᐱᓂ-ᔮᑲᓐᒥᐅᑦ ᐃᒥᕐᑕᕐᕕᖁᑎᖓᓂᑦ ᓅᓕᕐᐳᑦ, ᓄᓇᒧᑦ ᒧᓯᕋᑎᒧᑦ ᐂᓪᓗᑎᒃ. ᑕᕝᕙᓂᓗ ᐂᕉᓂ ᑐᖁᕗᖅ ᐃᓗᕕᕐᑕᐅᓪᓗᓂᓗ, ᐃᕐᓂᖓᑕᓕ ᐃᓕᓯᕆᐅᑉ ᐃᓇᖏᕐᐹ ᑐᓂᕐᕈᓯᕐᑎᑦᓯᔨᐅᓂᕐᒧᑦ. 7ᑕᕝᕙᓐᖓᓪᓗ ᓄᓇᒥᑦ ᓅᓕᕐᒥᖓᒥᒃ ᒐᑦᒍᑕᒧᐊᕐᐳᑦ ᑕᕝᕙᓐᖓᓪᓗ ᔮᑦᐹᑕᒧᐊᕆᕗᑦ, ᐃᒥᕐᑕᕐᕕᖃᑦᓯᐊᕐᑐᒧᑦ. 8#ᒨᓯᓯ ᓯᑕᒪᖏᑦ 3:5-8.ᑍᑦᓱᒪᓂᐅᑎᓪᓗᒍ ᖃᖅᑲᒦᑎᓪᓗᒋᑦ ᓱᓕ ᐊᑕᓂᖅ ᑎᓕᓯᓚᐅᕐᐳᖅ ᐃᓄᖕᓂᒃ ᓕᕔᑎᒃᑯᑦ ᑭᖑᕚᖏᓐᓂᒃ ᐊᖏᖃᑎᒌᒍᑎᐅᑉ ᐃᒃᓯᕐᕕᖁᑎᖓᓂᒃ ᐊᐅᓚᑦᓯᔨᐅᖁᓪᓗᒋᑦ ᐊᒡᔭᕐᑕᐅᔭᕆᐊᖃᓕᕐᐸᑦ, ᐊᑕᓂᕐᒧᓪᓗ ᑐᓂᕐᕈᓯᕐᑎᑦᓯᔨᐅᖁᓪᓗᒋᑦ, ᐊᑕᓂᐅᓪᓗ ᐊᑎᖓᓂ ᓮᒻᒪᕐᑎᑦᓯᔨᐅᖁᓪᓗᒋᑦ. ᐅᓪᓗᒥᒧᓪᓗ ᑎᑭᓪᓗᒍ ᓱᓕ ᑖᒃᑯᐊ ᑕᒪᒃᑯᓂᖓ ᐱᓇᓱᐊᕐᑎᐅᕗᑦ. 9ᑍᒤᒻᒪᑦ ᑕᕝᕙ ᑖᒃᑯᐊ ᓕᕔᒃᑯᑦ ᑭᖑᕚᖏᑦ ᓄᓇᖁᑎᑖᕐᓯᒪᖏᑦᑐᑑᕗᑦ ᐊᓯᖏᑎᑐᑦ ᑭᖑᕚᕇᑎᑐᑦ; ᑭᓯᐊᓂᓕ ᐱᑎᑕᐅᖔᓚᐅᕐᐳᑦ ᐊᑕᓂᕐᒧᑦ ᑐᓂᕐᕈᓯᕐᑎᑦᓯᔨᐅᓂᕐᒥᒃ, ᑍᒫᒃ ᐊᑕᓂᖅ ᒎᑎᓯ ᑕᒪᑐᒥᖓ ᐊᖏᕈᑎᖃᕐᓯᒪᖕᒪᑦ.)
10 #
ᒨᓯᓯ ᐂᑉᐸᖏᑦ 34:28. “ᖃᖅᑲᒦᓚᐅᕐᐳᖓᓕ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ, ᓯᕗᓪᓕᕐᒥᒃ ᑍᒫᑦᓮᓐᓇᖅ ᐊᑯᓂᐅᑎᒋᔪᖅ ᒪᔪᐊᕐᓯᒪᓚᐅᕐᓂᑦᑐᑦ. ᑕᕝᕙᓂᓗ ᐊᑕᓂᐅᑉ ᓈᓚᓕᓚᐅᕆᕚᖓ ᐊᖏᕐᕕᒋᓪᓗᓂᖓᓗ ᐃᓕᑦᓯᓐᓂᒃ ᓄᖒᑦᓯᔪᒪᔪᓐᓁᕐᓗᓂ. 11ᐊᑕᓂᐅᓪᓗ ᐅᖃᐅᑎᓚᐅᕐᐹᖓ ᐃᓕᑦᓯᓐᓂᒃ ᑕᓯᐅᕐᓯᖁᓪᓗᖓ, ᓄᓇᑖᕈᓐᓇᖁᓪᓗᓯ ᓯᕗᓕᕕᓂᑦᓯᓐᓄᑦ ᐊᖏᕈᑎᒋᓯᒪᓚᐅᕐᑕᖓᓂᒃ.”
ᒎᑎᐅᑉ ᐊᑐᕐᑕᐅᖁᔭᖏᑦ
12“ᒫᓐᓇᓕ ᐃᓴᕆᐊᓕᒥᐅᖑᔪᓯ, ᓈᓚᓚᐅᕆᑦᓯ ᐊᑕᓂᐅᑉ ᒎᑎᑦᓯ ᐊᑐᕐᑕᐅᖁᔭᖏᓐᓂᒃ ᐃᓕᑦᓯᓐᓄᑦ: ᑖᓐᓇ ᐊᑕᓂᖅ ᑐᒃᓯᐊᕐᕕᒋᔭᒃᓴᕆᕙᓯ ᐱᖁᔭᓕᒫᖏᓪᓗ ᒪᓕᒡᓗᒋᑦ, ᐅᖓᒋᔭᒃᓴᕆᕙᓯ, ᐱᔨᑦᓯᕐᓗᒍᓗ ᐆᒻᒪᒻᒧᑦ ᐃᓗᐃᑦᑐᒧᑦ ᑕᕐᓂᕐᓄᓪᓗ ᐃᓗᐃᑦᑐᒧᑦ, 13ᐱᖁᔭᓕᒫᖏᓪᓗ ᓈᓚᒃᑕᒃᓴᕆᕙᓯ. ᐅᓪᓗᒥ ᑖᒃᑯᐊ ᑐᓂᕙᒃᑲ ᐱᕙᓪᓕᐅᑎᒃᓴᐅᖁᓪᓗᒋᑦ ᐃᓕᑦᓯᓐᓄᑦ. 14ᑕᑯᒋᑦ, ᐊᑕᓂᐅᑉ ᒎᑎᑦᓯ ᕿᓔᑦ ᖁᕝᕙᓯᖕᓂᕐᐹᕆᔭᖏᑦ ᐱᖁᑎᒋᕔᑦ; ᓄᓇᕐᔪᐊᕐᑕᐅᖅ ᐱᖁᑎᒋᕚ, ᑖᑦᓱᒪᓃᑦᑐᓕᒫᓪᓗ ᐱᖁᑎᒋᒋᕔᑦ. 15ᐊᑕᓂᐅᓪᓕ ᓯᕗᓕᕕᓂᑦᓯᓐᓄᑦ ᓇᒡᓕᒍᓱᖕᓂᖓᑕ ᓴᓐᖏᔫᓗᐊᕐᓂᖓᓄᑦ ᐃᓅᖃᑎᒌᖑᔪᓯ ᓂᕈᐊᓚᐅᕐᐹᓯ ᐊᓯᑦᓯᓐᓂᒃ ᐃᓅᖃᑎᒌᖑᔪᓂᒃ ᐱᓇᓂ, ᓱᓕ ᓂᕈᐊᕐᓯᒪᓪᓗᓂᓯ ᐃᓄᖁᑎᒋᖕᒪᓯ. 16ᑍᒤᒻᒪᑦ, ᒫᓐᓇᒥᑦ ᐱᒋᐊᕐᓗᓯ ᐊᑕᓂᕐᒥᒃ ᓈᓚᑦᓯᐊᕐᑐᒃᓴᐅᕗᓯ ᑐᓵᓐᖏᓴᕐᑐᒃᓴᐅᓇᓯᓗ. 17#1 ᑎᒧᑎ 6:15; ᑕᑯᑎ 17:14; 19:16; ᐋᐴᓯᑕᓖᑦ 10:34; ᕉᒪᒥᐅᓄᑦ 2:11; ᒐᓔᑎ 2:6; ᐃᐱᓯ 6:9.ᐊᑕᓂᖅ ᒎᑎᒋᔭᓯ ᒎᑎᒋᔭᐅᔪᓕᒫᓂᑦ ᐊᖏᓂᕐᓴᐅᖕᒪᑦ ᐱᔪᓐᓇᕐᓂᕐᐹᖑᓪᓗᓂᓗ. ᐱᔪᓐᓇᕐᑐᕐᔪᐊᖑᕗᖅ ᐊᔪᒐᖃᖏᑦᑐᕐᔪᐊᖑᓪᓗᓂᓗ, ᓯᕘᕋᒋᔭᐅᔪᒃᓴᐅᕗᕐᓗ. ᐃᓄᖕᓂᒡᓗ ᐃᓔᓐᓇᕐᓯᐅᓐᖏᓚᖅ, ᓯᓔᕐᕆᔭᐅᔪᓐᓇᕋᓂᓗ. 18ᑲᒪᒋᔭᐅᑦᓯᐊᖁᔨᓪᓗᓂᓗ ᐋᖅᑭᒃᓯᓲᖑᕗᖅ ᐃᓕᐊᕐᔪᖕᓂᒃ ᐅᐃᒡᒐᕐᓂᕐᓂᒡᓗ; ᓄᓇᖃᕐᑐᑐᖃᐅᖏᑦᑐᓪᓗ ᓇᒡᓕᒋᕔᑦ ᐃᓅᖃᑎᑦᑎᓐᓄᑦ ᓄᓇᖅᑲᑎᒋᔭᐅᔪᑦ, ᓂᕿᒃᓴᖃᕐᑎᓪᓗᒋᑦ ᐊᓐᓄᕌᒃᓴᖃᕐᑎᑉᐰᑦ. 19ᑍᒤᒻᒪᑦ, ᓄᓇᖃᕐᑐᑐᖃᐅᖏᑦᑐᓂᒃ ᓄᓇᑦᓯᓐᓃᑦᑐᓂᒃ ᓇᒡᓕᒍᓱᒃᑐᒃᓴᐅᕗᓯ, ᐃᓕᑦᓯᑦᑕᐅᖅ ᓄᓇᑐᖃᕆᓐᖏᑕᑦᓯᓐᓃᓚᐅᕋᑦᓯ ᐄᑦᔨᑉᑎᒥ. 20ᐊᑕᓂᖅ ᒎᑎᒋᔭᓯ ᓈᓚᒐᒃᓴᕆᕙᓯ ᑖᓐᓇᓗ ᑭᓯᒥ ᑐᒃᓯᐊᕐᕕᒋᓗᒍ. ᑖᑦᓱᒧᖓᓗ ᓱᖁᓯᔪᐃᑦᑑᔪᒃᓴᐅᕗᓯ ᑖᑦᓱᒪᓗ ᐊᑎᖓᒍᑦ ᑭᓯᐊᓂ ᐊᖏᒻᒪᕆᒃᑐᒃᓴᐅᕗᓯ. 21ᓂᕐᑐᒐᒃᓴᕆᕙᓯ ᒎᑎᒋᒐᑦᓯᐅᒃ, ᓇᖕᒥᓂᖅ ᑕᑯᓯᒪᒐᑦᓯ ᑖᑦᓱᒪ ᐊᔪᖏᑦᑐᐊᓘᓂᖓᓂᒃ ᑲᒪᓇᕐᑐᕐᔪᐊᖑᓂᖓᓂᒡᓗ ᐃᓕᑦᓯ ᐱᑦᔪᑎᒋᓪᓗᓯ. 22#ᒨᓯᓯ ᓯᕗᓪᓖᑦ 46:27; ᒨᓯᓯ ᓯᕗᓪᓖᑦ 15:5; 22:17.ᓯᕗᓕᕕᓂᓯᓕ ᐄᑦᔨᑉᑎᒧᐊᓕᕐᑎᓪᓗᒋᑦ ᑍᑯᓐᖓᕐᑐᑦ 70ᑐᐃᓐᓇᐅᓚᐅᕐᐳᑦ; ᒫᓐᓇᓕ ᐊᑕᓂᐅᑉ ᒎᑎᑦᓯ ᐅᓪᓗᕆᐊᑎᑐᑦ ᕿᓚᖕᒦᑦᑐᑎᑐᑦ ᐅᓄᕐᓯᑎᓯᒪᓕᕐᐹᓯ.”
Currently Selected:
ᒨᓯᓯ ᑕᓪᓕᒪᖏᑦ 10: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
