ᒨᓯᓯ ᑕᓪᓕᒪᖏᑦ 9
9
ᐃᓄᐃᑦ ᓈᓚᖏᓐᓂᖓᑦ
1“ᐃᓴᕆᐊᓕᒥᐅᑦ ᓈᓚᒋᑦᓯ! ᐅᓪᓗᒥ ᐃᑳᕐᓂᐊᓕᕐᐳᓯ ᔪᐊᕐᑕᓂᐅᑉ ᑰᖓᒍᑦ, ᓄᓇᑖᖁᓪᓗᓯ ᐃᓅᖃᑎᒌᒡᔪᐊᓄᑦ ᐃᓕᑦᓯᓐᓂᑦ ᐅᓄᕐᓂᕐᓴᕐᔪᐊᖑᔪᓄᑦ ᐊᔪᖏᓐᓂᕐᓴᕐᔪᐊᖑᔪᓄᓪᓗ ᓄᓇᒋᔭᐅᔪᒥᒃ. ᐃᒡᓗᒐᓴᒡᔪᐊᓂᒃ ᐊᖏᔪᕐᔪᐊᖑᔪᓂᒃ, ᐊᕙᓗᕐᔪᐊᖏᓪᓗ ᕿᓚᖕᒧᑦ ᑎᑭᐅᒪᔪᓂᒃ. 2ᐊᓇᑭᒻᑯᑦ ᑭᖑᕚᖏᑦ ᐊᖏᔫᑎᐊᓘᕗᑦ ᓴᓐᖏᔫᑕᐅᓪᓗᑎᒡᓗ, ᐃᓄᒃᐸᐅᕗᑦ, ᑐᓴᐅᒪᕙᓯᓗ ᓇᓪᓕᐊᓐᓄᓪᓘᓐᓃᑦ ᐅᓇᖕᒥᓇᖏᓐᓂᖏᓐᓂᒃ ᐊᓇᑭᒃᑯᑦ. 3ᒫᓐᓇᓕ ᓇᖕᒥᓂᖅ ᑕᑯᓂᐊᕐᐳᓯ ᐊᑕᓂᐅᑉ ᒎᑎᑦᓯ ᓯᕗᓪᓕᐅᓗᓂ ᐃᑯᒪᑎᑐᑦ ᑬᕙᑦᑐᐊᓗᒃᑎᑐᑦ ᐱᓕᕆᓂᖓᓂᒃ. ᑖᒃᑯᐊᓗ ᓵᓚᒋᓂᐊᕐᐰᑦ ᐃᓕᑦᓯ ᑕᒪᐅᓐᖓᕈᓐᓇᕐᓯᖁᓪᓗᓯ, ᑖᒃᑯᓂᖓ ᐊᓂᑎᑦᓯᔪᓐᓇᕐᓯᖁᓪᓗᓯ ᓄᖒᑦᓯᖁᓪᓗᓯᓗ ᐊᑯᓂᐅᖏᑦᑐᖅ, ᑍᒤᑦᑐᓐᓇᖁᓪᓗᓯ ᑕᒪᑐᒥᖓ ᐊᖏᕐᕕᒋᓯᒪᖕᒪᓯ.
4“ᐊᑕᓂᐅᓪᓕ ᒎᑎᑦᓯ ᑖᒃᑯᐊ ᐊᓂᑎᓯᒪᓕᕐᐸᒋᑦ ᐃᓕᑦᓯ ᐱᑦᔪᑎᒋᓗᓯ, ᑕᒪᑐᒪ ᑭᖑᓂᖓᒍᑦ ᐃᓱᒪᔪᒃᓴᐅᓐᖏᓚᓯ ᐃᓕᑦᓯ ᑕᒫᓂ ᓄᓇᑖᕆᐊᖃᕐᓂᑦᓯᓐᓄᑦ ᓄᓇᑖᕐᑎᑕᐅᓇᓱᒋᓗᓯ. ᑍᒤᓐᖏᓚᖅ, ᐊᑕᓂᐅᓪᓕ ᐃᓅᖃᑎᒌᒡᔪᐊᑦ ᑕᒫᓐᖓᑦ ᐊᓂᑎᓐᓂᐊᕐᐰᑦ ᐃᓕᑦᓯ ᐱᓪᓗᓯ ᐱᐅᖏᑦᑐᓕᓂᖏᑦ ᐱᑦᔪᑎᒋᓗᒋᑦ. 5ᐱᐅᔫᓂᓯᓕ ᐋᖅᑭᑦᓯᐊᕐᓯᒪᓂᓯᓗ ᐱᑦᔪᑎᒋᓇᒋᑦ ᐊᑕᓂᐅᑉ ᒎᑎᑦᓯ ᑖᒃᑯᐊ ᓄᓇᖏᓐᓂᒃ ᓄᓇᑖᕐᑎᓯᒪᓐᖏᓛᓯ. ᐃᓅᖃᑎᒌᒡᔪᐊᓪᓕ ᓄᓇᖏᓐᓂᑦ ᐊᓂᑎᓐᓂᐊᕐᐰᑦ ᐱᐅᖏᑦᑐᓕᓂᖏᑦ ᐱᑦᔪᑎᒋᓪᓗᒋᑦ ᐊᖏᕈᑎᒋᓯᒪᔭᓂᓗ ᓯᕗᓕᕕᓂᑦᓯᓐᓄᑦ ᐱᑦᔪᑎᒋᓪᓗᒍ, ᐂᑉᕋᕼᐋᒧᑦ, ᐂᓴᑭᒧᑦ, ᔧᑯᒧᓪᓗ. 6ᐊᑕᓂᐅᓪᓕ ᒎᑎᑦᓯ ᑐᓂᓯᕕᒋᓯᒪᓐᖏᓛᓯ ᓄᓇᒥᒃ ᓱᓇᑐᐃᓐᓇᖃᑦᓯᐊᕐᑐᒥᒃ ᐱᔭᕆᐊᖃᕐᓂᓯ ᐱᑦᔪᑎᒋᓗᒍ. ᑍᒤᓐᖏᓚᖅ, ᑐᓵᖏᑦᑐᐊᓘᕗᓯᓕ ᐃᓅᖃᑎᒌᖑᔪᓯ.
7“ᑍᒪᓐᖓᑦ ᐳᐃᒍᕐᑐᒃᓴᐅᓐᖏᓚᓯ ᖃᓄᖅ ᐊᑕᓂᖅ ᒎᑎᓯ ᓂᓐᖓᒃᑎᓚᐅᕐᒪᖔᑦᓯᐅᒃ ᐃᓄᖃᖏᑦᑐᒥ. ᑍᒪᓐᖓᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᑦᓯᓐᓂᑦ ᐅᓪᓗᒧᑦ ᒪᐅᖓ ᑎᑭᓐᓂᑦᓯᓐᓄᑦ ᑎᑭᓪᓗᒍ, ᑖᑦᓱᒥᖓ ᐊᑭᕋᕐᑐᖃᑦᑕᕐᓯᒪᕗᓯ. 8ᐊᒡᓛᑦ ᖃᖅᑲᒥ ᕼᐆᕆᑉᒥ ᐊᑕᓂᖅ ᓂᓐᖓᒃᑎᓚᐅᕐᐸᓯ, ᐊᑕᓂᐅᑉ ᐊᖏᔪᒥᒃ ᓂᓐᖓᒃᕕᒋᖕᒪᓯ ᐊᒡᓛᑦ ᓄᖑᑕᐅᑐᐃᓐᓇᕆᐊᖃᓕᓚᐅᕐᐳᓯ ᑖᑦᓱᒧᖓ. 9#ᒨᓯᓯ ᐂᑉᐸᖏᑦ 24:18.ᖃᖅᑲᒧᖅ ᒪᔪᕋᕐᓯᒪᑎᓪᓗᖓ ᐱᖁᔭᓂᒃ ᐅᔭᕋᒃᑯᑦ ᑎᑎᕋᑦᓯᒪᔪᓂᒃ ᐊᑕᓂᐅᑉ ᐃᓕᑦᓯᓐᓄᑦ ᐊᖏᖃᑎᒌᒍᑎᖏᓐᓂᒃ ᐱᔭᕐᑐᕐᓯᒪᑎᓪᓗᖓ. ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ ᓂᕆᓚᐅᕐᓇᖓ ᐃᒥᓚᐅᕐᓇᖓᓗ ᒪᔪᕋᕐᓯᒪᓚᐅᕋᒪ. 10ᑕᕝᕙᓂ ᐊᑕᓂᐅᑉ ᑐᓂᓯᕕᒋᓚᐅᕐᐹᖓ ᐅᔭᕌᖕᓂᒃ ᒪᕐᕉᖕᓂᒃ ᓇᖕᒥᓂᖅ ᒎᑎᐅᑉ ᑎᑎᕋᕐᕕᒋᓯᒪᔭᒥᓂᒃ ᐃᓕᑦᓯᓐᓄᑦ ᐅᖃᐅᓯᕆᓯᒪᔭᒥᓂᒃ ᐃᑯᒪᒦᓪᓗᓂ ᑍᑦᓱᒪᓂ ᐅᓪᓗᒥ ᖃᖅᑲᐅᑉ ᑭᒡᓕᖓᓂ ᑲᑎᓐᖓᑎᓪᓗᓯ. 11ᐅᓪᓗᓪᓕ ᐅᓐᓄᐊᓪᓗ 40 ᐊᓂᒍᕐᑎᓪᓗᒋᑦ ᐊᑕᓂᐅᑉ ᑐᓂᓯᕕᒋᓚᐅᕐᐹᖓ ᐅᔭᕌᖕᓂᒃ ᒪᕐᕉᖕᓂᒃ ᑎᑎᕋᕐᕕᒋᓯᒪᔭᒥᓂᒃ ᐊᖏᖃᑎᒌᒍᑎᓂᒃ.
12“ᑕᕝᕙ ᐊᑕᓂᐅᑉ ᐅᖃᐅᑎᕚᖓ, ‘ᒫᓐᓇ ᑐᐊᕕᕐᓗᑎᑦ ᖃᖅᑲᒥᑦ ᐊᖅᑲᓕᕆᑦ, ᐃᓄᖁᑎᑎᑦ ᐄᑦᔨᑉᑎᒥᑦ ᑕᓯᐅᓚᐅᕐᑕᑎᑦ, ᐱᐅᖏᑦᑐᐊᓗᖕᒥᒃ ᐱᓕᕐᒪᑕ ᐊᔪᕐᑐᓕᓕᕐᓗᑎᒡᓗ. ᐱᖁᔨᑦᔪᑎᒋᓚᐅᕐᑕᓐᓂᒃ ᕿᒤᓯᒪᓕᕇᕐᒪᑕ, ᒎᑎᓐᖑᐊᒃᓴᒥᖕᓂᒡᓗ ᓴᓇᓯᒪᓕᕐᓗᑎᒃ.’
13“ᐊᑕᓂᐅᓪᓗ ᐅᖃᐅᑎᒃᑲᓐᓂᕆᕚᖓ, ‘ᐅᑯᐊ ᐃᓄᐃᑦ ᖃᐅᔨᒪᔭᒃᑲ ᑐᓴᕈᓐᓇᖏᑦᑐᐊᓘᖕᒪᑕ. 14ᓄᖅᑲᕐᑎᓐᓇᓱᐊᕐᓂᐊᕐᓇᖓ, ᓄᖑᑦᓱᒪᓕᕋᒃᑭᑦ ᓇᓪᓕᐊᓐᓄᓪᓘᓐᓃᑦ ᐃᖅᑲᐅᒪᔭᐅᔪᓐᓃᖁᓪᓗᒋᑦ. ᑕᕝᕙ ᐃᓅᖃᑎᒌᒡᔪᐊᓄᑦ ᐱᒋᐊᕐᕕᐅᓕᕐᑎᓐᓂᐊᕐᐸᒋᑦ ᑖᒃᑯᓇᓐᖓᑦ ᐅᓄᕐᓂᕐᓴᐅᔪᓂᒃ ᐱᔪᓐᓇᕐᓂᖃᕐᓂᕐᓴᐅᔪᓂᒡᓗ.’
15“ᑕᕝᕙ ᖃᖅᑲᒥᑦ ᐅᑎᕆᐊᓕᓚᐅᕐᐳᖓ ᐊᖅᑲᕐᑎᓕᕐᓗᖓᓗ, ᐊᒡᔭᕐᓯᓪᓗᖓ ᐅᔭᕌᖕᓂᒃ ᒪᕐᕉᖕᓂᒃ ᑎᑎᕋᕐᕕᒋᓯᒪᔫᖕᓂᒃ ᐊᖏᖃᑎᒌᒍᑕᐅᓯᒪᔪᓂᒃ. ᐃᑯᒪᔪᐊᓗᒡᓗ ᖃᖅᑲᒥᑦ ᐊᖅᑲᖃᑦᑕᓚᐅᕐᐳᖅ. 16ᑕᑯᓕᓚᐅᕐᐳᖓᓗ ᐊᑕᓂᐅᑉ ᒎᑎᑦᓯ ᐱᔭᐅᖁᓯᒪᔭᖏᓐᓂᒃ ᒪᓕᒍᓐᓁᕐᓂᑦᓯᓐᓂᒃ, ᑖᑦᓱᒧᖓᓗ ᐊᔪᕐᑐᓕᓂᑦᓯᓐᓂᒃ ᓴᕕᕋᔭᖕᒥᒃ ᒎᑎᓐᖑᐊᒥᒃ ᐃᒻᒧᓕᐅᕐᑎᐅᑉ ᓄᕐᕋᓐᖑᐊᖓᓂᒃ ᓴᓇᓯᒪᓂᑦᓯᓐᓄᑦ. 17ᑕᕝᕙ ᓯᕗᕋᑦᓯᓐᓂ ᑖᒃᑯᐊᒃ ᐅᔭᕌᒃ ᑎᒍᒥᐊᕐᑖᒃᑲᒃ ᐃᒋᓚᐅᕐᐹᒃᑲᒃ ᓯᖁᒥᓪᓗᒋᒡᓗ. 18ᑕᒪᑐᒪ ᑭᖑᓂᖓᒍᑦ ᐊᑕᓂᐅᑉ ᓵᖓᓂ ᐹᒻᒪᖓᓕᓚᐅᕆᕗᖓ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ ᓱᓇᒥᒡᓘᓐᓃᑦ ᓂᕆᓚᐅᕐᓇᖓ ᐃᒥᓚᐅᕐᓇᖓᓗ. ᑍᒤᓕᐅᓚᐅᕐᐳᖓᓕ ᐊᑕᓂᕐᒧᑦ ᐊᔪᕐᑐᓕᓚᐅᕐᓂᑦᓯᓐᓄᑦ ᐊᖏᔪᒥᒃ ᓂᓐᖓᒃᑎᓚᐅᕋᑦᓯᐅᒃ. 19#ᐄᑉᕈᐃᓄᑦ 12:21.ᓯᕘᕋᓕᓚᐅᕋᒪ ᐊᑕᓂᐅᑉ ᓂᓐᖓᐅᒪᔪᐊᓘᓂᖓᓂᒃ, ᐊᖏᔪᒥᒃ ᓂᓐᖓᓚᐅᕐᒪᑦ ᐊᒡᓛᑦ ᐃᓕᑦᓯᓐᓂᒃ ᓄᖒᑦᓯᑐᐃᓐᓇᕆᐊᖃᓕᓚᐅᕐᒪᑦ; ᐊᑕᓂᐅᓪᓕ ᓱᓕ ᑐᒃᓯᐊᕐᓂᓐᓂᒃ ᑐᓴᓚᐅᕆᕚᖓ. 20ᐊᑕᓂᖅ ᐊᖏᔪᒥᒃ ᓂᓐᖓᐅᒪᓚᐅᕆᕗᖅ ᐂᕉᓂᒧᑦ ᐊᒡᓛᑦ ᑐᖁᑐᐃᓐᓇᕆᐊᖃᓕᓚᐅᕐᐹ, ᐂᕉᓂᑦᑕᐅᖅ ᐱᑦᔪᑎᒋᓪᓗᒍ ᑐᒃᓯᐊᕆᐊᖃᓚᐅᕆᕗᖓ. 21ᑭᖑᓂᖓᒍᑦ ᐱᐅᖏᑦᑐᒥᒃ ᐱᓇᓱᐊᓕᓚᐅᕆᕗᖓ, ᑍᓐᓇ ᐃᒻᒧᒃᓯᐅᒐᐅᑉ ᓄᕐᕋᓐᖑᐊᖓ ᓴᕕᕋᔭᒃ ᓴᓇᓚᐅᕐᑕᓯ ᐱᑦᔪᑎᒋᓪᓗᒍ, ᐃᑯᒪᒧᑦ ᐃᑯᐊᓪᓚᒃᑎᓚᐅᕐᓗᒍ ᐊᐅᖕᒪᑦ ᓯᖃᓪᓕᑦᑎᐊᓚᐅᕐᐸᕋ, ᓯᖃᓪᓕᑦᑎᐊᕐᓗᓂ ᐊᒡᓛᑦ ᐳᔪᕋᕐᑎᑐᑦ ᑍᒤᓕᕐᑎᓚᐅᕐᐸᕋ, ᑖᓐᓇᓗ ᓯᖃᓪᓕᓂᖓ ᑰᖕᒧᑦ ᓈᕕᓚᐅᕐᐸᕋ ᖃᖅᑲᒥᑦ ᑰᒃᑐᒧᑦ.
22 #
ᒨᓯᓯ ᓯᑕᒪᖏᑦ 11:3;
ᒨᓯᓯ ᐂᑉᐸᖏᑦ 17:7;
ᒨᓯᓯ ᓯᑕᒪᖏᑦ 11:34. “ᐊᒻᒪᑦᑕᐅᖅ ᐊᑕᓂᖅ ᒎᑎᓯ ᓂᓐᖓᒃᑎᓚᐅᕐᐸᓯ ᓄᓇᓕᖕᓂ ᑕᐱᕋᒥ, ᒫᓴᒥ, ᑭᐳᕌᑎ-ᕼᐊᑖᕙᒥ. 23#ᒨᓯᓯ ᓯᑕᒪᖏᑦ 13:17; ᒨᓯᓯ ᑕᓪᓕᒪᖏᑦ 1:21; ᒨᓯᓯ ᓯᑕᒪᖏᑦ 13:31; ᒨᓯᓯ ᑕᓪᓕᒪᖏᑦ 1:26; ᐄᑉᕈᐃᓄᑦ 3:16.ᐊᑕᓂᐅᓪᓕ ᐊᐅᓪᓚᕐᑎᒻᒪᓯ ᑲᑎᓯ-ᐸᕐᓂᐊᒥᑦ ᑎᓕᔭᐅᓪᓗᓯ ᓄᓇᑖᕆᐊᕐᑐᖁᔭᐅᓪᓗᓯ ᐃᓕᑦᓯᓐᓄᑦ ᑐᓂᓯᒪᔭᖓᓂᒃ, ᐊᑕᓂᕐᒥᒃ ᒎᑎᑦᓯᓐᓂᒃ ᐊᑭᕋᕐᑐᓕᓚᐅᕆᕗᓯ; ᐅᒃᐱᕈᓱᖏᓐᓂᑦᓯᓐᓄᑦ ᑖᑦᓱᒥᖓ ᓈᓚᖏᓐᓂᑦᓯᓐᓄᓪᓗ. 24ᑍᒪᓐᖓᑦ ᐃᓕᑦᓯᓐᓂᒃ ᖃᐅᔨᒪᓕᓚᐅᕐᓂᓐᓂᑦ ᐊᑕᓂᕐᒥᒃ ᐊᑭᕋᕐᑐᐃᓐᓇᖃᑦᑕᕐᐳᓯ.
25“ᑍᒤᒻᒪᑦ ᐹᒻᒪᖓᓚᐅᕐᐳᖓ ᐊᑕᓂᐅᑉ ᓵᖓᓂ ᐅᓪᓗᓂᒃ ᐅᓐᓄᓂᒡᓗ 40ᓂᒃ, ᖃᐅᔨᒪᓚᐅᕋᒪ ᐃᓕᑦᓯᓐᓂᒃ ᓄᖒᑦᓯᔪᒪᓯᒪᓕᖕᓂᖓᓂᒃ. 26ᑐᒃᓯᐊᓚᐅᕐᐳᖓᓗ ᐊᑕᓂᕐᒧᑦ, ‘ᐊᑕᓃᖅ ᒎᑎᐅᔪᑎᑦ, ᓇᖕᒥᓂᖅ ᐃᓄᖁᑎᒋᔭᑎᑦ ᓄᖑᑎᓐᓂᐊᕐᓇᒋᑦ, ᑖᒃᑯᐊ ᓴᐳᑎᓚᐅᕐᑕᑎᑦ ᐊᐅᓪᓚᕐᑎᓚᐅᕐᑕᑎᓪᓗ ᐄᑦᔨᑉᑎᒥᑦ ᓴᓐᖏᓂᕐᔪᐊᕐᓄᑦ ᐱᔪᓐᓇᕐᓂᕐᔪᐊᕐᓄᓪᓗ. 27ᐱᔨᑎᑦ ᐃᖅᑲᐅᒪᓚᐅᒃᑭᑦ, ᐂᑉᕋᕼᐋᒻ, ᐂᓴᑭ, ᔧᑯᓗ, ᐃᓱᒪᒋᓐᖏᓚᐅᒃᑭᑦ ᒫᓐᓇ ᐃᓅᖃᑎᒌᑦ ᑐᓴᕈᓐᓇᖏᑦᑐᐊᓘᓂᖏᑦ, ᐱᐅᖏᑦᑐᓕᓂᖏᓪᓗ, ᐊᔪᕐᑐᓕᓂᖏᓪᓗ. 28ᐄᑦᔨᑉᑎᒥᐅᑦ ᐅᖃᐅᓯᖃᓕᖁᓇᒋᑦ ᐃᓕᖕᓂᒃ ᐃᓄᖁᑎᓂ ᓄᓇᒧᑦ ᐊᖏᕈᑎᖏᓯᒪᔭᒥᓄᑦ ᑎᑭᑎᑦᓱᓐᓇᓐᖏᓔᑦ. ᐅᖃᓕᕋᔭᕆᕗᑦ ᐃᓄᖁᑎᓂ ᐃᓄᖃᖏᑦᑐᒧᐊᕈᑎᓚᐅᕐᐰᑦ ᑐᖁᑦᑕᕐᑐᕈᒪᓪᓗᖏᑦ, ᐃᓄᖁᑎᓂ ᐆᒥᒋᓕᕋᒥᒋᑦ. 29ᐅᑯᐊᓕ ᐃᓅᖃᑎᒌᑦ ᓂᕈᐊᕐᓯᒪᕙᑎᑦ ᐃᕝᕕᑦ ᓇᖕᒥᓂᕆᔪᒪᓪᓗᒋᑦ ᑖᒃᑯᐊᓗ ᐊᐅᓪᓚᕐᑎᓚᐅᕐᐸᑎᑦ ᐄᑦᔨᑉᑎᒥᑦ ᐱᔪᓐᓇᕐᓂᕐᔪᐊᕐᓄᑦ ᓴᓐᖏᓐᓂᕐᔪᐊᕐᓄᓪᓗ.’”
Currently Selected:
ᒨᓯᓯ ᑕᓪᓕᒪᖏᑦ 9: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
