ᑖᓂᐊᓕᐅᑉ ᐊᒡᓚᖏᑦ 9
9
ᑖᓂᐊᓕᐅᑉ ᐃᓅᖃᑎᒥᓂᒃ ᑐᒃᓯᐅᑦᔨᓂᖓ
1ᑍᕉᓯᐅᑉ ᐊᕼᐊᓱᐃᕋᓯᐅᑉ ᐃᕐᓂᖓᑕ, ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᖏᑕ ᓯᕗᓪᓕᕐᐹᖓᓂ, ᒥᑏᒥᐅᑉ ᑭᖑᕚᖓᑦ, ᐊᖓᔪᖅᑳᕐᔪᐊᓐᖑᓚᐅᕐᐳᖅ ᑲᐅᓪᑎᐊᒥ. 2#ᔨᕆᒤᐊ 25:11; 29:10.ᐊᕐᕌᒍᑦ ᓯᕗᓪᓕᕐᐹᖓᓂ ᐊᖓᔪᖅᑳᕐᔪᐊᖑᑎᓪᓗᒍ, ᐅᕙᖓ, ᑖᓂᐊᓕ, ᑐᑭᓯᓚᐅᕐᐳᖓ ᒎᑎᐅᑉ ᐅᖃᐅᓯᖏᑦ ᒪᓕᒡᓗᒋᑦ, ᐊᑕᓂᖅ ᐅᖃᕐᓯᒪᖕᒪᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᒍᑦ ᔨᕆᒤᐊᒃᑯᑦ, ᔨᕉᓴᓕᐅᑉ ᓯᖁᒥᑕᐅᓯᒪᓂᖓ ᓯᕕᑐᑎᒋᔪᒫᕐᒪᑦ ᐊᕐᕌᒍᓂᒃ 70ᓂᒃ. 3ᑍᒤᒻᒪᑦ ᐊᑕᓂᕐᒧᑦ ᒎᑎᒧᑦ ᓵᓚᐅᕐᐳᖓ ᕿᓄᕕᒋᓪᓗᒍᓗ ᑐᒃᓯᐊᕐᕕᒋᕙᕋ, ᓂᕆᑦᑍᓕᓪᓗᖓᓗ, ᐊᓐᓄᕌᕐᓯᒪᓪᓗᖓᓗ ᐃᒃᐱᐊᕐᔪᒐᔭᐅᔮᕐᑐᓂᒃ, ᐊᕐᔭᓕᓂᕐᓃᓪᓗᖓᓗ. 4ᑐᒃᓯᐊᓚᐅᕐᐳᖓ ᐊᑕᓂᕐᒧᑦ ᒎᑎᓐᓄᑦ ᖁᔭᓕᓂᕐᒥᒡᓗ ᓴᖅᑭᑎᑦᓯᕕᒋᓪᓗᒍ ᐃᒫᒃ.
“ᐊᑕᓃᖅ, ᐊᖏᔪᐊᓘᕗᑎᑦ ᑕᑕᓐᓇᕐᑑᓪᓗᑎᓪᓗ ᒎᑏᒃ, ᐊᖏᖃᑎᒌᒍᑎᑎᑦ ᓇᒡᓕᖕᓂᕐᒥᒃ ᑲᔪᓯᑎᑉᐸᑎᑦ ᐃᓕᖕᓂᒃ ᓇᒡᓕᒍᓱᒃᑐᓕᒫᓄᑦ, ᐱᖁᔭᕐᓂᒡᓗ ᓈᓚᒃᑐᓄᑦ.
5“ᐱᐅᖏᑦᑐᓕᓯᒪᒐᑦᑕ ᓈᒻᒪᖏᑦᑐᓂᒡᓗ ᐱᓂᐊᕐᓂᖃᕐᓯᒪᓪᓗᑕ, ᐱᐅᖏᑦᑐᐊᓘᓯᒪᒐᑦᑕ ᐃᓕᖕᓂᒡᓗ ᐊᑭᕋᕐᑐᕐᓯᒪᓪᓗᑕ; ᒪᓕᒐᒃᓴᐅᖁᔭᕐᓂᒃ ᐱᖁᔭᕐᓂᒡᓗ ᕿᒤᓯᒪᒐᑦᑕ. 6ᐱᔨᑎᑦ ᐅᖃᕐᑎᑎᑦ ᓈᓚᖃᑦᑕᕐᓯᒪᖏᓐᓇᑦᑎᒍ, ᐃᕝᕕᑦ ᐊᑎᖓᓂ ᐅᖃᓪᓚᖃᑕᕐᓯᒪᔪᑦ ᐊᖓᔪᖅᑳᕐᔪᐊᓄᑦ, ᐊᖓᔪᖅᑳᓄᓪᓗ ᓯᕗᓕᕕᓂᑦᑎᓐᓄᓪᓗ, ᐃᓄᖕᓄᓪᓗ ᓄᓇᑎᓐᓂ ᓄᓇᖃᕐᑐᓕᒫᓄᑦ. 7ᐊᑕᓃᖅ, ᐃᓱᐊᕐᑑᒐᕕᑦ, ᐅᓪᓗᒥᓕ ᐃᓕᖕᓄᑦ ᑲᓐᖑᓱᖕᓂᕐᒥᒃ ᐅᓕᒃᓯᒪᕗᒍᑦ, ᐃᓄᐃᑦ ᔫᑕᒥ ᓄᓇᖃᕐᑐᑦ, ᔨᕉᓴᓕᒥᓗ ᓄᓇᖃᕐᑐᓕᒫᑦ, ᖃᓂᑦᑐᒧᑦ ᐅᖓᓯᒃᑐᒧᓪᓗ ᓄᓇᖃᑎᒌᒃᔪᐃᓪᓗ ᐊᓯᖏᓐᓄᑦ ᓯᐊᒻᒪᕐᑎᓯᒪᒐᑦᑎᒍᑦ, ᐃᓕᖕᓄᑦ ᑲᔪᓯᖃᑦᑕᕐᓯᒪᖏᓐᓂᑦᑎᓐᓄᑦ. 8ᐊᑕᓃᖅ, ᐅᕙᒍᑦ ᐊᖓᔪᖅᑳᕐᔪᐊᕗᑦ, ᐊᖓᔪᖅᑳᕗᓪᓗ, ᓯᕗᓕᕕᓂᕗᓪᓗ ᐅᓕᒃᓯᒪᕗᒍᑦ ᑲᓐᖑᓱᖕᓂᕐᒥᒃ, ᐊᔪᕐᑐᓕᓯᒪᒐᑦᑕ ᐃᓕᖕᓄᑦ. 9ᐊᑕᓂᖅ ᒎᑎᕗᑦ ᓈᒃᑭᒍᓱᖕᒪᑦ ᐃᓱᒪᒋᔪᓐᓁᕐᕕᖃᕈᓐᓇᕐᓗᓂᓗ, ᐅᕙᒍᑦ ᑖᑦᓱᒥᖓ ᐊᑭᕋᕐᑐᕐᓯᒪᒐᓗᐊᕐᑎᓪᓗᑕ; 10ᐊᑕᓂᖅ ᒎᑎᕗᑦ ᓈᓚᓚᐅᖏᓐᓇᑦᑎᒍ ᐱᖁᔭᖏᓪᓘᓐᓃᑦ ᐅᕙᑦᑎᓐᓄᑦ ᑐᓂᓯᒪᔭᖏᑦ ᒪᓕᓚᐅᕐᓇᒋᑦ ᐱᔨᒥᒍᑦ ᐅᖃᕐᑎᒥᒍᑦ ᑐᓂᓯᒪᔭᖏᑦ ᐅᕙᑦᑎᓐᓄᑦ. 11ᐃᓴᕆᐊᓕᑎᓕᒫᑦ ᓯᖁᒥᑦᓯᖃᑦᑕᕐᓯᒪᖕᒪᑕ ᐱᖁᔭᕐᓂᒃ ᒪᓕᖕᓇᒋᓪᓗ, ᐃᓕᖕᓂᒡᓗ ᓈᓚᒍᒪᓇᑎᒃ. ᑍᒤᒻᒪᑦ ᓇᕐᕈᓇᕐᓯᑎᑕᐅᓃᑦ ᐃᖅᑲᕐᑐᐃᓂᒃᑯᓪᓗ ᓱᒋᐊᕐᓯᓃᑦ ᒨᓯᓯᐅᑉ ᐱᔨᒋᔭᕕᑦ ᐱᖁᔭᖏᑎᒍᑦ ᑎᑎᕋᕐᓯᒪᔪᑦ, ᐅᕙᑦᑎᓐᓄᑦ ᑯᕕᓯᒪᕗᑦ, ᐃᓕᖕᓄᑦ ᐱᐅᖏᑦᑐᓕᓯᒪᒐᑦᑕ. 12ᐅᖃᐅᓯᕐᑎᑦ ᓈᒻᒪᒃᓴᖏᓐᓂᑎᓪᓗ ᐅᕙᑦᑎᓐᓂᒃ ᐊᐅᓚᑦᓯᔨᑦᑎᓐᓂᒡᓗ ᑲᔪᓯᓯᒪᖕᒪᑕ ᖁᕕᐊᓇᖏᑦᑐᓄᑦ ᐅᒡᒍᐊᕐᓇᕐᑐᓄᑦ ᑎᑭᓯᒪᕗᒍᑦ. ᕿᓚᐅᑉ ᐊᑖᓂ ᔨᕉᓴᓕᐅᑉ ᐱᓂᐊᕐᕕᐅᓯᒪᓂᖓᑐᑦ ᐱᔭᐅᔪᖃᓚᐅᕐᓯᒪᓐᖏᓚᖅ. 13ᑎᑎᕋᕐᓯᒪᔪᑦ ᒨᓯᓯᐅᑉ ᐱᖁᔭᖏᓐᓂ ᒪᓕᒡᓗᒋᑦ, ᐱᓂᐊᕐᕕᐅᓯᒪᒐᑦᑕ ᖁᕕᐊᓇᖏᑦᑐᓂᒃ, ᑍᒤᒃᑲᓗᐊᕐᑎᓪᓗᒍ ᐊᑕᓂᖅ ᒎᑎᕗᑦ ᕿᓂᓚᐅᓐᖏᓚᕗᑦ ᐊᔪᕐᓂᑦᑎᓐᓂᒡᓗ ᕿᒤᓇᑕ ᓱᓕᑦᓯᐊᕐᓃᑦ ᑲᒪᒋᓚᐅᖏᓐᓇᑦᑎᒍ. 14ᐊᑕᓂᐅᑉ ᐱᐅᖏᑦᑐᒧᑦ ᑲᑉᐱᐊᓇᕐᑐᒧᑦ ᐅᑕᕿᓇᓂ ᑎᑭᑎᓚᐅᕐᐹᑎᒍᑦ, ᐊᑕᓂᖅ ᒎᑎ ᐃᓱᐊᕐᑑᖕᒪᑦ ᖃᓄᐃᓕᐅᕐᑕᓕᒫᒥᓂ; ᐅᕙᒍᓪᓕ ᓈᓚᓚᐅᖏᓚᕗᑦ.
15“ᒫᓐᓇᓕ ᐊᑕᓃᖅ, ᐃᓄᖁᑎᖕᓂᒃ ᐊᐅᓪᓚᕐᑎᑦᓯᓚᐅᕐᑐᑎᑦ ᐄᑦᔨᑉᑎᒥᑦ ᐊᒡᒐᕕᑦ ᐱᔪᓐᓇᕐᓂᖓᓄᑦ ᐊᑏᓪᓗ ᓱᖁᓯᕐᓂᐊᖏᒻᒪᑦ ᐅᓪᓗᒥᒧᑦ ᑎᑭᓪᓗᒍ, ᐱᐅᖏᑦᑐᓕᓯᒪᒐᑦᑕ, ᑕᒻᒪᕐᓯᒪᔪᐊᓘᒐᑦᑕ. 16ᐊᑕᓃᖅ ᐱᓂᐊᕐᓂᑎᑦ ᐃᓱᐊᕐᑐᑦ ᑲᔪᓯᑎᓪᓗᒋᑦ, ᓂᓐᖓᐅᒪᓃᑦ ᔨᕉᓴᓕᒥᑦ ᓴᖑᑎᓚᐅᕈᒃ ᓂᓐᖓᐅᒪᕕᒃᔪᐊᕐᓃᑦ ᐃᒡᓗᒐᓴᒡᔪᐊᖁᑎᖕᓂᑦ, ᖃᖅᑲᒥᑦ ᐃᑦᔪᕐᓁᑦᑐᒥᑦ ᐊᔪᕐᑐᓕᓂᑦᑕ ᓯᕗᓕᑦᑕᓗ ᐱᐅᖏᑦᑐᓕᓂᖏᑕ, ᔨᕉᓴᓕᒻ ᐃᓄᖁᑎᑎᓪᓗ ᒥᑕᐅᑎᒋᔭᒃᓴᓐᖑᕐᑎᓯᒪᖕᒪᒋᑦ ᐃᓄᖕᓄᑦ ᐊᕙᑎᑦᑎᓐᓂ ᓄᓇᖃᕐᑐᓄᑦ. 17ᒫᓐᓇᓕ ᒎᑏ, ᐱᔨᕕᑦ ᑐᒃᓯᐊᕐᓂᖏᑦ ᑐᒃᓯᐅᑦᔨᓂᖏᓪᓗ ᑐᓴᓚᐅᒃᑭᑦ, ᐃᑦᔪᕐᓁᑦᑐᕕᖁᑏᑦ ᓱᕋᒃᓯᒪᔪᖅ ᑮᓇᕐᐱᑦ ᖃᐅᒪᓂᖓᓄᑦ ᑕᑯᓚᐅᕈᒃ, ᐊᑕᓂᖅ ᐱᑦᔪᑎᒋᓗᒍ. 18ᓈᓚᓚᐅᕆᑦ ᒎᑏᒃ, ᑐᓵᓗᑎᓪᓗ; ᐃᔩᒃᑭᒃ ᐅᐃᑎᓚᐅᒃᑭᒃ ᑕᑯᓗᑎᓪᓗ ᐃᒡᓗᒐᓴᒡᔪᐊᓂᒃ ᓱᕋᒃᓯᒪᔪᓂᒃ ᐃᕝᕕᑦ ᐊᑎᕐᓂᒃ ᑍᒎᓯᖃᕐᑐᓂᒃ, ᐃᓱᐊᕐᑑᓂᑦᑎᓐᓄᑦ ᑐᒃᓯᐊᓐᖏᓚᒍᑦ, ᐊᖏᔪᐊᓗᖕᒥᒡᓕ ᓂᑲᒍᓱᖕᓃᑦ ᐱᑦᔪᑎᒋᓪᓗᒍ. 19ᐊᑕᓃᖅ ᑐᓵᓚᐅᕆᑦ! ᐊᑕᓃᖅ ᐃᓱᒪᒋᔪᓐᓁᕐᕕᒋᓚᐅᒃᑭᑦ! ᐊᑕᓃᖅ, ᑐᓵᔭᑎᑦ ᒪᓕᒡᓗᒋᑦ ᐱᓇᓱᐊᓕᕆᑦ ᐅᑕᕿᖏᓪᓗᑎᑦ! ᐃᓕᖕᓂᒃ ᐱᑦᔪᑎᒋᓪᓗᑎᑦ, ᒎᑎᒐ ᐅᑕᕿᓐᖏᓚᐅᕆᑦ, ᐃᒡᓗᒐᓴᖁᑎᑎᑦ ᐃᓄᖁᑎᑎᓪᓗ ᐃᕝᕕᑦ ᐊᑎᕐᓂᒃ ᑍᒍᓯᖃᕐᒪᑕ.”
ᒊᐳᕆᐅᓕᐅᑉ ᓇᓗᓁᕐᓯᓂᖓ ᒎᑎᐅᑉ ᐅᖃᕐᑕᐅᖁᔭᖓᓂᒃ
20ᐅᖃᓪᓚᒃᑎᓪᓗᖓ ᑐᒃᓯᐊᕐᑎᓪᓗᖓᓗ, ᖃᕿᐊᓕᕐᑎᓪᓗᖓᓗ ᐊᔪᕐᓂᓐᓂᒃ, ᐃᓅᖃᑎᒪᓗ ᐃᓴᕆᐊᐊᓕᑎᑦ ᐊᔪᕐᓂᖏᓐᓂᒃ, ᕿᓄᑎᓪᓗᖓᓗ ᐊᑕᓂᕐᒧᑦ ᒎᑎᓐᓄᑦ ᖃᖅᑲᖅ ᐃᑦᔪᕐᓁᑦᑐᖅ ᐱᒋᔭᖓ ᐱᓪᓗᒍ. 21#ᓘᑲᓯ 1:19,26.ᑐᒃᓯᐊᕐᑎᓪᓗᖓ ᓱᓕ, ᒊᐳᕆᐅᓕ, ᐊᖑᑦ ᑕᑯᓚᐅᕐᑕᕋ ᑕᑯᑎᑕᐅᓂᕐᒥ ᓯᕗᓪᓕᕐᒥᒃ, ᕾᕗᖅ ᓱᒃᑲᓕᔪᒥᒃ ᖃᖓᑕᓪᓗᓂ, ᐅᓐᓄᒃᓯᐅᑎᒥᒃ ᑐᓂᕐᕈᓯᕐᓂᖅ ᓇᓪᓕᐅᑎᓪᓗᐊᕐᑎᓪᓗᒍ. 22ᒪᓕᖕᓂᐊᕐᑕᓐᓂᒃ ᐅᖃᐅᑎᕚᖓ, “ᑖᓂᐊᓖ, ᕾᕗᖓ ᑕᑯᑎᑦᓱᒪᓪᓗᑎᑦ ᓯᕗᓂᕐᒥᒃ ᑐᑭᓯᑎᑦᓱᒪᓪᓗᑎᓪᓗ. 23ᑐᒃᓯᐊᓕᑐᐊᕋᕕᑦ ᑭᐅᔭᐅᑦᔪᑏᑦ ᑐᓂᔭᐅᔭᕇᖅᑲᐅᕗᖅ, ᕾᕗᖓ ᐅᖃᐅᑎᔭᕐᑐᕐᓗᑎᑦ, ᐊᖏᔪᒥᒃ ᖁᕕᐊᒋᔭᐅᕗᑎᑦ. ᑍᒤᒻᒪᑦ ᐅᖃᐅᓯᒃᓴᖅ ᐃᓕᖕᓄᑦ ᐃᓱᒪᒋᑦᓯᐊᕈᒃ ᑕᑯᑎᑕᐅᓂᕐᓗ ᑐᑭᓯᓗᒍ.
24“ᓇᓪᓕᐅᓐᓃᑦ 70 7ᐃᕐᑐᕐᓗᒋᑦ ᐅᖃᐅᓯᐅᕗᑦ ᐃᓄᖁᑎᖕᓄᑦ ᐃᒡᓗᒐᓴᖁᑎᖕᓄᓪᓗ ᐃᑦᔪᕐᓁᑦᑐᓄᑦ ᐱᐅᖏᑦᑐᓕᓂᖏᑕ ᓱᒋᐊᕐᑕᐅᓂᖏᑕ ᐃᓱᓕᕝᕕᒃᓴᖏᑦ, ᐊᔪᕐᑐᓕᓂᖅ ᐃᓱᓕᖁᓪᓗᒍ, ᐱᐅᖏᑦᑐᓕᓂᐅᑉ ᓴᓗᒻᒪᕐᑎᑕᐅᕕᒃᓴᖓᓄᑦ, ᐃᓱᐊᕐᑐᓕᓂᖅ ᐃᓱᖃᖏᑦᑐᒧᑦ ᐃᖏᕐᕋᓕᖁᓪᓗᒍ, ᑕᑯᑎᑕᐅᓂᖅ ᓇᓚᐅᑦᑍᓂᕐᓗ ᓇᕿᑦᔪᓯᕐᓗᒍ ᐃᑦᔪᕐᓁᓐᓂᕐᐹᕐᓗ ᐅᕐᓱᒧᑦ ᒥᖑᐊᕐᓗᒍ. 25ᐅᓇ ᖃᐅᔨᒍᒃ ᑐᑭᓯᑦᓯᐊᕐᓗᒍᓗ; ᐱᖁᔨᓂᖅ ᔨᕉᓴᓕᐅᑉ ᓴᓇᔭᐅᒃᑲᓐᓂᕐᓂᒃᓴᖓᓂᒃ ᐅᑎᕐᑎᑕᐅᑦᓯᐊᕐᓂᖓᓂᒡᓗ, ᐱᔪᒫᕐᐳᖅ ᐅᕐᓱᒧᑦ ᒥᖑᐊᕐᑕᐅᓯᒪᔪᖅ ᐊᐅᓚᑦᓯᔨ ᑎᑭᑉᐸᑦ, ᑭᖑᓂᖓᓂ ᓇᓪᓕᐅᓐᓃᑦ 7ᐃᑦ 7ᐃᕐᑐᕐᓗᒋᑦ. ᐊᒻᒪᓗ ᓇᓪᓕᐅᓐᓃᑦ 62 7ᐃᕐᑐᕐᓗᒋᑦ, ᐃᒡᓗᒐᓮᑦ ᓴᓇᔭᐅᒃᑲᓐᓂᕈᒫᕐᐳᑦ, ᐊᑐᕆᐊᖏᓪᓗ, ᑰᒃᕖᓪᓗ, ᑲᑉᐱᐊᓇᕐᑐᑦ ᓇᓪᓕᐅᑎᓯᒪᑎᓪᓗᒋᑦ. 26ᓇᓪᓕᐅᓐᓃᑦ 62 7ᐃᕐᑐᕐᓯᒪᔪᑦ ᐊᓂᒍᕐᐸᑕ ᐅᕐᓱᒧᑦ ᒥᖑᐊᕐᑕᐅᓯᒪᔪᖅ ᑐᖁᑕᐅᔪᒫᕐᐳᖅ ᐃᒻᒥᓂᒃ ᐱᑦᔪᑎᒋᓇᓂ: ᐊᖓᔪᖅᑳᕐᓗ ᑎᑭᑦᓱᒫᕐᐳᖅ ᐃᒡᓗᒐᓮᑦ ᓱᕋᒃᑎᕐᓗᒋᑦ ᐃᑦᔪᕐᓁᑦᑐᕕᒡᓗ. ᐃᓱᐊ ᑕᕝᕙ ᓇᓪᓕᐅᑎᔪᒫᕐᐳᖅ ᓄᓇᑐᑦ ᖄᒥᑦᑐᒥᑦ ᑎᑭᑕᐅᔪᑐᑦ; ᐅᓇᑕᕐᓂᕐᓗ ᑲᔪᓰᓐᓇᕈᒫᕐᐳᖅ ᐃᓱᐊᓄᑦ, ᑲᑉᐱᐊᓇᕐᑐᑦ ᐊᑐᕈᒫᕐᓂᖏᑦ ᐋᖅᑭᒃᑕᐅᔭᕇᕐᒪᑕ. 27#ᑖᓂᐊᓕ 11:31; 12:11; ᒫᑎᐅᓯ 24:15; ᒫᑯᓯ 13:14.ᑖᓐᓇ ᐊᖏᖃᑎᒌᒍᑎᒥᒃ ᐋᖅᑭᒃᓯᔪᒫᕐᐳᖅ ᓇᓪᓕᐅᓐᓃᑦ 7ᐃᑦ ᐃᓚᖓᓐᓂ, ᓇᓪᓕᐅᓐᓃᑦ 7ᐃᑦ ᐃᓚᖓᓐᓂ ᑐᖁᑕᐅᔪᒫᕐᐳᖅ ᐆᒪᔪᑎᑐᑦ ᑐᓂᕐᕈᑎᒋᔭᐅᓗᓂ. ᑐᒃᓯᐊᕐᕕᒡᔪᐊᑉ ᐳᕐᑐᓂᕐᐹᖓᓂ ᐃᓕᓯᔪᒫᕐᐳᖅ ᓇᕐᕈᓇᕐᑐᕐᔪᐊᒥᒃ ᓱᕋᒃᑕᐅᑎᑦᓯᔪᒥᒃ ᐃᒡᓗᒐᓴᒡᔪᐊᓂᒃ ᑖᓐᓇ ᑍᒤᓕᖓᓂᐊᕐᐳᖅ, ᐅᖃᐅᑕᐅᓯᒪᔫᑉ ᓇᓪᓕᐅᑎᓂᖓᑕ ᐃᓱᓕᑦᓯᐊᕐᓂᖓᓄᑦ ᑎᑭᓪᓗᒍ.”
Currently Selected:
ᑖᓂᐊᓕᐅᑉ ᐊᒡᓚᖏᑦ 9: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
