ᑖᓂᐊᓕᐅᑉ ᐊᒡᓚᖏᑦ 8
8
ᑖᓂᐊᓕᐅᑉ ᑕᑯᑎᑕᐅᓂᖓ ᓰᐲᑦ ᐊᖑᓴᓪᓗᖓᓂ ᒎᑦᓯᒥᒡᓗ
1ᐊᖓᔪᖅᑳᕐᔪᐊᑉ ᐱᐅᓪᓴᔮᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᑦ ᐱᖓᔪᖓᓐᓂ, ᐅᕙᖓ ᑖᓂᐊᓕ, ᑕᑯᑎᑕᐅᓚᐅᕐᐳᖓ, ᑍᑦᓱᒪ ᑕᑯᑎᑕᐅᓂᕐᒪ ᓯᕗᓪᓕᐅᑉ ᑭᖑᓂᖓᒍᑦ. 2ᑕᑯᑎᑕᐅᓪᓗᖓ, ᐅᕙᓐᓂᒃ ᑕᑯᓚᐅᕐᐳᖓ ᐊᖓᔪᖅᑳᕐᔪᐊᑉ ᐃᒡᓗᖓᓃᓪᓗᖓ ᓄᓇᒥ ᓲᓴᒥ ᓄᓇᐅᑉ ᐊᕕᒃᑐᕐᓯᒪᓂᖓᑕ ᐃᓚᖓᓂ ᐊᑎᖃᕐᑐᒥ ᐃᓛᒥᒥᒃ, ᑕᑯᑎᑕᐅᓪᓗᖓ ᑰᑉ ᐊᑎᖃᕐᑑᑉ ᐅᓔᒥᒃ ᓯᓈᓂᓚᐅᕐᐳᖓ. 3ᖁᒻᒧᑦ ᕿᕕᐊᕋᒪ, ᑕᑯᕗᖓ ᓰᐱᒥᒃ ᐊᖑᓴᓪᓗᕐᒥᒃ ᒪᕐᕉᖕᓂᒃ ᓇᒡᔪᖃᕐᑐᒥᒃ, ᑰᑉ ᓴᓂᐊᓂ ᓇᖏᕐᑐᒥᒃ, ᓇᒡᔪᖏᒡᓗ ᑕᑭᔪᐊᓘᕗᒃ: ᓇᒡᔪᖓᑕ ᐂᑉᐸᖓ ᐃᒡᓗᐊᓂᑦ ᑕᑭᓂᕐᓴᐅᕗᖅ ᑭᖑᓪᓕᐅᓪᓗᓂᓗ ᑎᑭᐅᑎᕗᖅ. 4ᑕᐅᑐᒃᑎᓪᓗᖓ ᓰᐱᐅᑉ ᐊᖑᓴᓪᓗᖓ ᐅᐸᒃᑐᖃᑦᑕᕐᐳᖅ, ᓯᕿᓂᐅᑉ ᓂᐱᕕᐊᑕ ᓇᓛᓄᑦ, ᐅᓐᓄᐊᓪᓗ ᓇᓛᓄᑦ, ᓯᕿᓂᐅᓪᓗ ᓇᓛᓄᑦ. ᐆᒪᔪᓂᑦ ᓱᓇᑐᐃᓐᓇᕐᓂᑦ ᐊᑭᕋᕐᑐᕐᑕᐅᔪᓐᓇᓐᖏᓚᖅ, ᑭᓇᒥᒡᓘᓐᓃᑦ ᑖᑦᓱᒪᖓᑦ ᓴᐳᑎᔭᐅᔪᖃᕈᓐᓇᕋᓂ, ᐃᓱᒪᒥᓂᒃ ᖁᕕᐊᒋᔭᒥᓂᒡᓗ ᐱᓇᓱᐊᑐᐃᓐᓇᕐᐳᖅ, ᐊᔪᖏᑦᑐᒪᕆᐅᓕᕐᓗᓂᓗ.
5ᑕᒪᑐᒥᖓ ᐃᓱᒪᒃᓴᕐᓯᐅᕐᑎᓪᓗᖓ, ᑕᕝᕔᓐᓇᖅ ᐊᖑᓴᓪᓗᖅ ᒎᑦᓯ ᓴᖅᑭᑉᐳᖅ ᓯᕿᓂᐅᑉ ᓂᐱᕕᐊᑕ ᓇᓛᓂᑦ, ᓇᒡᔪᖃᕐᑐᖅ ᐅᑦᔨᕐᓇᕐᑐᒥᒃ ᐃᔨᖏᒃᑕ ᐊᑯᓂᖓᓂ, ᓄᓇᕐᔪᐊᓕᒫᖅ ᐸᖓᓕᒃᕕᒋᕚ ᓄᓇᒧᑦ ᑐᓐᖓᓇᓂ. 6ᑖᓐᓇ ᓂᓐᖓᐅᒪᓂᕐᒧᑦ ᐊᒃᓱᕈᕐᓗᓂ ᐅᐸᒃᑐᕐᐳᖅ ᓰᐱᐅᑉ ᐊᖑᓴᓪᓗᖓᓄᑦ ᒪᕐᕉᖕᓂᒃ ᓇᒡᔪᓕᖕᒧᑦ ᑰᑉ ᓯᓈᓂ ᓇᖏᕐᑐᒧᑦ. 7ᑕᑯᕙᕋᓗ ᓰᐱ ᐊᖑᓴᓪᓗᖅ ᐊᐳᕐᒪᒍ, ᓇᒡᔪᖏᒃ ᒪᕐᕉᒃ ᓯᖁᒥᑉᐴᒃ, ᓰᐱ ᐊᖑᓴᓪᓗᖅ ᑖᑦᓱᒥᖓ ᐊᑭᒪᔪᓐᓇᓐᖏᓚᖅ; ᒎᑦᓯᐅᑉ ᐅᕐᕈᑎᑉᐹ ᓄᓇᒧᑦ ᑐᓪᓕᕋᕐᓗᒍᓗ, ᑭᐊᓘᓐᓃᑦ ᓰᐱ ᐊᖑᓴᓪᓗᖅ ᓴᐳᑎᔪᓐᓇᓐᖏᓛ ᒎᑦᓯᐅᑉ ᐱᔪᓐᓇᕐᓂᖓᓂᑦ.
8ᒎᑦᓯ ᑖᓐᓇ ᐊᔪᕈᓐᓃᕐᐸᓪᓕᐊᑐᐃᓐᓇᕐᐳᖅ, ᐱᔪᓐᓇᕐᓂᖓᑕ ᐊᔪᖏᓐᓂᕐᐹᖓᓂ, ᓇᒡᔪᖓ ᓇᑲᓪᓗᓂ ᐲᕐᐳᖅ, ᐃᓂᖓᓂᓕ ᐱᕈᕐᑐᖃᕐᐳᖅ ᓇᒡᔪᖕᓂᒃ ᓯᑕᒪᓂᒃ ᖁᒻᒧᑦ ᓴᖕᒥᔪᓂᒃ ᑐᕌᕐᓗᑎᒡᓗ ᕿᓚᐅᑉ ᐊᓄᕆᖏᓐᓄᑦ ᓯᑕᒪᓄᑦ. 9ᓇᒡᔪᖕᓂᑦ ᑖᒃᑯᓇᖓᑦ ᐱᕈᕐᑐᖃᕆᕗᖅ, ᒥᑭᔫᓪᓗᓂ ᓄᐃᔪᖅ, ᐱᔪᓐᓇᕐᓂᕐᔪᐊᕐᑖᕐᐳᕐᓕ ᓯᕿᓂᐅᑉ ᓇᓛᓄᑦ ᓯᕿᓂᐅᑉ ᓂᐱᕝᕕᐊᑕ ᓇᓛᓄᑦ ᓄᓇᒧᓪᓗ ᑕᑯᒥᓇᕐᑐᒧᑦ. 10#ᑕᑯᑎ 12:4.ᑖᓐᓇ ᐊᖏᔪᕐᔪᐊᖑᓕᕐᐳᖅ ᕿᓚᖕᒥᐅᒐᓴᒃᔪᐃᑦ ᑎᑭᓪᓗᒋᑦ, ᐅᓪᓗᕆᐊᑦ ᐃᓚᖏᑦ ᐃᒋᑉᐰᑦ ᓄᓇᒧᑦ ᑐᓪᓕᕋᕐᓗᒋᓪᓗ. 11ᐃᒻᒥᓂᒡᓗ ᐊᖏᔪᕈᕐᑎᑉᐳᖅ ᕿᓚᖕᒥᐅᒐᓴᒃᔪᐊᓄᓪᓗ ᐊᖓᔪᖅᑳᕐᔪᐊᒧᑦ ᑐᖏᓕᕆᔭᐅᓕᕐᓗᓂ, ᑐᓂᕐᕈᓯᕐᓃᓪᓗ ᖃᐅᑕᒫᕐᓯᐅᑎᑦ ᓄᖅᑲᕐᑎᑉᐰᑦ ᑖᑦᓱᒧᖓ ᑐᓂᕐᕈᑕᐅᕙᒃᑐᑦ, ᑐᓂᕐᕈᓯᕐᕕᐅᓪᓗ ᐃᓂᖓ ᐊᒃᐸᓯᒃᑐᓐᖑᕐᑎᑉᐹ. 12ᐅᓇᑕᕐᓂᖏᓐᓄᑦ, ᕿᓚᖕᒥᐅᒐᓴᒡᔪᐃᑦ ᐃᑦᔪᕐᓁᑦᑐᑦ, ᖃᐅᑕᒫᓪᓗ ᐆᒪᔪᓂᒃ ᑐᓂᕐᕈᓯᕐᓂᖅ ᑐᓂᔭᐅᕗᑦ ᑖᑦᓱᒧᖓ. ᑖᓐᓇᓗ ᖃᓄᐃᓕᐅᕐᑕᓕᒫᒥᓂᒃ ᐊᔪᕈᓐᓃᕐᐳᖅ, ᓱᓕᑦᓯᐊᕐᓂᕐᓗ ᓄᓇᒧᑦ ᐃᒋᑕᐅᕗᖅ.
13ᑐᓴᕐᐳᖓᓗ ᐃᑦᔪᕐᓁᑦᑐᒥᒃ ᐃᑦᔪᕐᓁᑦᑑᖃᑎᒥᓄᑦ ᐅᖃᕐᑐᒥᒃ, “ᖃᓄᖅ ᐊᑯᓂᐅᑎᒋᔪᖅ ᑕᑯᑎᑕᐅᑦᔪᑎ ᓇᓪᓕᐅᑎᓇᓱᐊᕐᓂᐊᕐᐹ? ᖃᐅᑕᒫᑦ ᐆᒪᔪᓂᒃ ᑐᓂᕐᕈᓯᖃᑦᑕᕐᓂᖅ, ᐅᓇᑕᕐᓂᕐᓗ ᓱᓇᖃᕈᓐᓁᕐᑎᑦᓯᔪᖅ, ᐃᑦᔪᕐᓁᑦᑐᕕᐅᓪᓗ ᑐᓂᔭᐅᓯᒪᓂᖓ, ᐃᑦᔪᕐᓁᑦᑐᓪᓗ ᑐᓪᓕᕋᕐᑕᐅᓂᖏᑦ?”
14ᐅᖃᐅᑎᕚᖓᓗ, “ᐅᓪᓗᐃᑦ ᐅᓐᓄᐊᓪᓗ 2,300ᐃᑦ ᐊᓂᒍᕐᐸᑕ; ᑕᕝᕙ ᐃᑦᔪᕐᓁᑦᑐᕕᒃ ᐃᑦᔪᕐᓁᓕᑎᒃᑲᓐᓂᕈᒪᕙᕋ.”
ᐂᖏᓕᐅᑉ ᒊᐳᕆᐅᓕᐅᑉ ᓇᓗᓁᕐᓯᓂᖓ ᑕᑯᑎᑕᐅᓂᕐᒥᒃ
15ᐅᕙᖓ ᑖᓂᐊᓕ ᑕᑯᓐᓇᕐᑎᓪᓗᖓ ᑕᒪᑐᒥᖓ ᑕᑯᑎᑕᐅᓂᕐᒥᒃ, ᑐᑭᓯᓇᓱᐊᕐᑎᓪᓗᖓᓗ, ᓵᓐᓂ ᓇᖏᕐᑐᖃᓕᕐᐳᖅ ᐃᓄᒃᑎᑐᑦ ᑕᐅᑦᑐᖃᕐᑐᒥᒃ. 16#ᓘᑲᓯ 1:19,26.ᑐᓵᓕᕐᐳᖓᓗ ᐊᖑᑎᐅᑉ ᓂᐱᖓᓂᒃ ᑰᑉ ᐅᓔᑉ ᓇᓛᓂᑦ ᐅᖃᕐᑐᒥᒃ, “ᒊᐳᕆᐅᓖ, ᐊᖑᑦ ᐅᓇ ᐅᖃᐅᑎᓚᐅᕈᒃ ᑕᑯᑎᑕᐅᓂᐅᑉ ᑐᑭᖓᓂᒃ.” 17ᖃᓂᒋᔭᓐᓄᓪᓗ ᕾᕗᖅ, ᓯᕘᕋᓂᕐᒥᒡᓗ ᑕᑕᑉᐳᖓ ᓵᖓᓂᓗ ᐅᕐᕈᓪᓗᖓ ᐹᒻᒪᒃᐳᖓ, ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ, ᑐᑭᓯᓕᕆᑦ ᑕᑯᑎᑕᐅᓂᖅ ᑕᒪᓐᓇ ᐱᑦᔪᑎᖃᕐᒪᑦ ᓱᓇᓕᒫᑦ ᐃᓱᒃᓴᖓᓂᒃ. 18ᐅᖃᓪᓚᒃᑎᓪᓗᒍ, ᐃᑎᔪᒥᒃ ᓯᓂᓕᓚᐅᕐᐳᖓ, ᑮᓇᕋ ᒪᓂᖅᑲᒧᑦ ᑐᓐᖓᓪᓗᓂ: ᑖᑦᓱᒪ ᐊᒃᑐᕐᐹᖓ ᓂᑯᕕᑎᓪᓗᖓᓗ.” 19ᐅᖃᐅᑎᕚᖓ, “ᐅᖃᐅᑎᓂᐊᕋᒃᑭᑦ ᓱᓇᒥᒃ ᐱᔪᖃᕈᒫᕐᒪᖔᑦ ᐅᓪᓗᐃᑦ ᑭᖑᓪᓕᖏᓐᓂ ᓂᓐᖓᐅᒪᓂᕐᔪᐊᖅ ᓇᓪᓕᐅᑎᒃᐸᑦ, ᑕᑯᑎᑕᐅᓂᖅ ᑕᒪᓐᓇ ᐱᑦᔪᑎᖃᕐᒪᑦ ᐃᓱᐊᓂ ᐱᔪᒫᕐᑐᓂᒃ.
20“ᓰᐱ ᐊᖑᓴᓪᓗᖅ ᒪᕐᕉᖕᓂᒃ ᓇᒡᔪᓕᒃ ᑐᑭᖃᕐᐳᖅ ᒥᑎᐊᑉ ᐴᕐᓯᐊᓪᓗ ᐊᖓᔪᖅᑳᕐᔪᐊᖃᕐᕕᐊᓂᒃ. 21ᑕᑯᔧᑦ ᒎᑦᓯ, ᑐᑭᖃᕐᐳᖅ ᒍᕇᓯᒥᐅᑦ#8:21 ᒍᕇᓯᒥᐅᑦ ᐃᓚᖏᓐᓂ ᑍᔭᐅᔪᖅ ᔭᕚᓇᒥᐅᑦ ᐊᖓᔪᖅᑳᕐᔪᐊᖃᕐᕕᖓᓂᒃ, ᓇᒡᔪᒃ ᐊᖏᔪᖅ ᐃᔨᖏᒃᑕ ᐊᑯᓐᓂᖓᓃᑦᑐᖅ ᑐᑭᖃᕐᐳᖅ ᐊᖓᔪᖅᑳᕐᔪᐊᖓᓐᓂᒃ ᓯᕗᓪᓕᕐᐹᒥᒃ. 22ᓇᒡᔪᐃᑦ ᓯᑕᒪᑦ ᓇᒡᔪᖕᒥᒃ ᐲᕐᑐᒥᒃ ᑭᖑᕝᕕᐅᑎᔪᑦ, ᑐᑭᖃᕐᐳᑦ ᐊᖓᔪᖅᑲᐅᕕᖕᒥᑦ ᑕᕝᕙᓐᖓᑦ ᐃᓅᖃᑎᒌᒡᔪᐊᓂᑦ ᓯᑕᒪᑦ ᐊᖓᔪᖅᑳᕐᔪᐊᖃᕐᕖᑦ ᓴᖅᑭᑦᓱᒫᕐᒪᑕ, ᐊᑐᓂᓪᓕ ᐱᔪᓐᓇᕐᓂᖏᑦ ᐊᑦᔨᒌᒍᒫᓐᖏᓚᑦ.
23“ᑖᒃᑯᐊ ᐊᖓᔪᖅᑳᕐᔪᐊᖑᑎᓪᓗᒋᑦ, ᐊᑭᕋᕐᑐᕐᑎᖏᑦ ᐱᐅᖏᑐᒻᒪᕆᐅᓕᕈᒫᕐᒪᑕ, ᐊᖓᔪᖅᑳᕐᔪᐊᑉ ᑮᓇᖓ ᐃᓕᕋᓇᕐᑐᖅ ᓯᓔᕐᕆᒃᓯᔪᓐᓇᕐᑐᖅ, ᒪᑭᑦᓱᒫᕐᐳᖅ. 24ᑖᑦᓱᒪ ᐱᔪᓐᓇᕐᓂᖓ ᓴᓐᖏᔪᕐᔪᐊᖑᓕᕈᒫᕐᐳᖅ, ᓇᖕᒥᓂᖅ ᐱᔪᓐᓇᕐᓂᕐᒥᓅᖏᑦᑐᖅ: ᑖᓐᓇ ᐊᖏᔪᐊᓗᖕᒥᒃ ᓵᓚᖃᕈᒫᕐᐳᖅ, ᖃᓄᐃᓕᐅᕋᓱᐊᕐᑕᒥᓂᒃ ᑕᒤᓐᓂᒃ ᑲᔪᓯᓗᓂ, ᓱᓇᐅᔪᓐᓁᕐᑎᑦᓯᔪᒫᕐᐳᖅ ᐊᔪᖏᑦᑐᕐᔪᐊᖁᑕᐅᔪᓂᒃ ᐃᓄᖕᓂᒡᓗ ᐃᑦᔪᕐᓁᑦᑐᓂᒃ. 25ᑖᓐᓇ ᐅᐃᕕᕐᕆᒃᓯᓂᕐᒥᒍᑦ ᐊᔪᕈᓐᓁᕈᒫᕐᐳᖅ, ᐃᒻᒥᓂᒡᓗ ᐊᔪᖏᑦᑐᕐᔪᐊᖑᓂᕋᓕᕐᓗᓂ. ᓵᓚᐅᓂᐊᕋᓱᒋᖏᑦᑐᑦ, ᐅᓄᕐᑐᑦ ᓯᖁᒥᑦᓱᒫᕐᐰᑦ, ᐊᑭᕋᕐᑐᕐᓗᓂᓗ ᐊᖓᔪᖅᑲᐅᔪᓄᑦ ᐊᖓᔪᖅᑳᕐᔪᐊᓄᓪᓗ. ᑭᓯᐊᓂᓕ ᓵᓚᐅᔪᒫᕆᕗᖅ, ᐃᓅᑉ ᐱᔪᓐᓇᕐᓂᖓᓅᖏᑦᑐᖅ. 26ᑕᑯᑎᑕᐅᓃᑦ ᐅᓪᓗᓂᒃ ᐅᓐᓄᐊᓂᒡᓗ ᐅᖃᐅᓯᐅᔪᑦ ᐃᓕᖕᓄᑦ ᓱᓕᑦᓯᐊᕐᐳᑦ, ᑕᑯᑎᑕᐅᓂᕐᓕ ᒪᑐᒍᒃ, ᐅᖃᐅᓯᖃᕐᒪᑦ ᓯᕗᓂᕐᔪᐊᒥ ᐱᔪᒫᕐᑐᓂᒃ.”
27ᐅᕙᖓ, ᑖᓂᐊᓕ, ᑕᖃᓚᐅᕐᐳᖓ ᐅᓪᓗᓂᒡᓗ ᐅᓄᕐᑐᓂᒃ ᖃᓂᒪᓪᓗᖓ, ᑭᖑᓂᖓᒍᑦ ᒪᑭᓐᓇᒪ ᐊᖓᔪᖅᑳᕐᔪᐊᑉ ᐱᔭᒃᓴᐅᑎᑕᖏᓐᓂᒃ ᐱᓇᓱᐊᓕᓚᐅᕆᕗᖓ. ᑕᑕᒥᓐᓂᐊᓚᐅᕐᐳᖓᓕ ᑕᑯᑎᑦᔪᑎᓂᒃ ᑐᑭᓯᔭᐅᔪᓐᓇᕐᑑᑉ ᐅᖓᑖᓃᓚᐅᕐᒪᑕ.
Currently Selected:
ᑖᓂᐊᓕᐅᑉ ᐊᒡᓚᖏᑦ 8: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
