ᑖᓂᐊᓕᐅᑉ ᐊᒡᓚᖏᑦ 7
7
ᑖᓂᐊᓕᐅᑉ ᐅᓂᒃᑳᕐᓂᖏᑦ ᑕᑯᑎᑕᐅᓂᕐᒥᓂᒃ
(7:1—12:13)
ᑖᓂᐊᓕᐅᑉ ᑕᑯᑎᑕᐅᓂᖓ ᐆᒪᔪᓂᒃ ᓯᑕᒪᓂᒃ
1ᐊᕐᕌᒍᑦ ᓯᕗᓪᓕᕐᐹᖓᓐᓂᒃ ᐱᐅᓪᓴᔭᐅᑉ ᐹᐱᓘᓂᒥ ᐊᖓᔪᖅᑳᕐᔪᐊᖑᓂᖓᓂ, ᑖᓂᐊᓕ ᓯᓐᓇᒃᑐᓚᐅᕐᐳᖅ ᑕᑯᑎᑕᐅᓪᓗᓂᓗ ᐃᒡᓕᕐᒥᓂ ᓇᓚᑎᓪᓗᒍ. ᐃᒫᒃ ᓯᓐᓇᒃᑐᕐᒥᓂᒃ ᑎᑎᕋᓚᐅᕐᐳᖅ. 2ᑖᓂᐊᓕ ᐅᖃᕐᐳᖅ, “ᐅᓐᓄᐊᒃᑯᑦ ᑕᑯᑎᑕᐅᓪᓗᖓ ᑕᑯᓚᐅᕐᐳᖓ, ᐊᓄᕆᓂᒃ ᓯᑕᒪᓂᒃ ᕿᓚᖕᒥᑦ ᐱᔪᓂᒃ ᐃᒪᕐᔪᐊᒥᒃ ᐊᐅᓚᑎᑦᓯᔪᓂᒃ. 3#ᑕᑯᑎ 13:1; 17:8.ᐆᒪᔪᐃᓪᓗ ᐊᖏᔪᑦ ᓯᑕᒪᑦ, ᐊᑐᓂᑦ ᐊᑦᔨᒌᖏᑦᑐᑦ, ᖃᑭᕗᑦ ᐃᒫᓂᑦ. 4#ᑕᑯᑎ 13:2.ᓯᕗᓪᓕᕐᐹᖅ ᑕᐅᑦᑐᖃᕐᐳᖅ ᓛᔭᑎᑐᑦ, ᐃᓴᕈᖃᕐᓗᓂᓗ ᓇᒃᑐᕋᓕᒃᑎᑐᑦ. ᑕᑯᓐᓇᕐᑎᓪᓗᖓ ᐃᓴᕈᖏᒃ ᐲᕐᑕᐅᕗᒃ ᓄᓇᒥᓪᓗ ᖃᖓᑦᑕᕐᑎᑕᐅᓪᓗᓂ ᓂᐅᖏᖕᓄᓪᓗ ᒪᕐᕉᖕᓄᑦ ᓂᑯᕕᑎᑕᐅᕗᖅ ᐃᓄᒃᑎᑐᑦ, ᐃᓅᓪᓗ ᐆᒻᒪᑎᖓᓂᒃ ᐆᒻᒪᑎᓕᕐᑕᐅᕗᖅ.
5“ᐆᒪᔫᓪᓗ ᐂᑉᐸᖓ ᓵᓐᓃᓕᕆᕗᖅ, ᓇᓄᕐᑎᑐᑦ ᑕᐅᑦᑐᓕᒃ, ᑖᓐᓇᓗ ᒪᑭᑎᑕᐅᕗᖅ, ᐱᖓᓱᓂᒡᓗ ᑐᓕᒫᓂᒃ ᑭᖕᒥᐊᕐᐳᖅ; ᐅᖃᐅᑎᔭᐅᓪᓗᓂᓗ, ‘ᒪᑭᓪᓗᑎᑦ ᓂᕆᔪᓐᓇᕐᑕᓕᒫᕐᓂᒃ ᓂᕿᒥᒃ ᓂᕆᒋᑦ!’
6“ᑭᖑᓂᖓᓂ, ᑕᑯᓕᕆᕗᖓ ᐆᒪᔪᐊᓗᐃᑦ ᐃᓚᖓᓐᓂᒃ ᓕᐸᕐᑎᑐᑦ#7:6 ᓕᐸᕐᑎᑐᑦ ᓛᔧᑦ ᐊᑦᔨᐸᓗᖏᑦ ᒥᑭᓐᓂᕐᓮᑦ ᑕᐅᑦᑐᖃᕐᑐᒥᒃ, ᕿᒥᕐᓗᖕᒥᒍᑦ ᓯᑕᒪᓂᒃ ᐃᓴᕈᖃᕐᐳᖅ ᑎᖕᒥᐊᑉ ᐃᓴᕈᖏᑎᑐᑦ; ᓯᑕᒪᓂᒡᓗ ᓂᐊᖁᖃᕐᓗᓂ, ᐊᖓᔪᖅᑳᕐᔪᐊᖑᓂᕐᒥᒡᓗ ᑐᓂᓯᕕᒋᔭᐅᕗᖅ ᐊᐅᓚᑦᓯᖁᓪᓗᒍ.
7 #
ᑕᑯᑎ 12:3; 13:1. “ᓱᓕ, ᐅᓐᓄᐊᒥ ᑕᑯᑎᑕᐅᓪᓗᖓ ᑕᑯᒋᕗᖓ ᐆᒪᔪᐊᓗᐃᑦ ᓯᑕᒪᖓᓐᓂᒃ, ᑲᑉᐱᐊᓇᕐᑑᓪᓗᓂ ᓯᕘᕋᓇᕐᑐᖅ ᓴᓐᖏᔪᕐᔪᐊᖑᓪᓗᓂᓗ, ᑭᒍᑎᖃᕐᐳᖅ ᓴᕕᕋᔭᖕᓂᒃ ᐊᖏᔪᐊᓗᖕᓂᒃ; ᖃᖅᑯᐊᕐᐳᖅ ᓂᕆᓪᓗᓂᓗ ᓵᓚᒋᔭᒥᓂᒃ, ᑐᓪᓕᕋᕐᐰᓪᓗ ᐊᒥᐊᒃᑯᓂ. ᐆᒪᔪᕐᔪᐊᖑᖃᑎᒥᓂᑦ ᓯᕗᓪᓕᕐᓂᑦ ᐊᑦᔨᒋᔭᐅᓐᖏᓚᖅ, ᖁᓕᓂᑦ ᓇᒡᔪᖃᕐᑐᖅ. 8#ᑕᑯᑎ 13:5,6.ᓇᒡᔪᖏᓐᓂᒃ ᐃᓱᒪᒃᓴᕐᓯᐅᕈᑎᖃᕐᑎᓪᓗᖓ, ᓇᒡᔪᒃ ᒥᑭᔪᖅ ᓄᐃᕗᖅ ᓇᒡᔪᐃᑦ ᐊᑯᓐᓂᖓᑦᑎᒍᑦ, ᓇᒡᔪᐃᑦ ᓯᕗᓪᓖᑦ ᐱᖓᓱᑦ ᒪᓐᖑᖏᑎᒍᑦ ᑖᑦᓱᒪ ᐲᕐᑎᑉᐰᑦ, ᓇᒡᔪᒃ ᑖᓐᓇ ᐃᔨᖃᕐᐳᖅ ᐃᓅᑉ ᐃᔨᖏᒃᑎᑐᑦ ᖃᓂᖃᕐᓗᓂᓗ ᓂᓪᓕᐊᔪᒥᒃ ᐱᐅᔪᕆᓂᕐᒥᓂᒃ.”
ᑕᑯᑎᑕᐅᓂᖅ ᐃᓅᑦᓮᓐᓇᕐᑐᒥᒃ ᐃᓱᖃᖏᑦᑐᒧᑦ
9 #
ᑕᑯᑎ 20:4;
ᑕᑯᑎ 1:14. “ᑕᑯᓐᓈᕐᑎᓪᓗᖓ, ᐃᒃᓯᕙᐅᑕᕐᔪᐃᑦ ᐃᓂᖏᓐᓄᑦ ᐃᓕᔭᐅᕗᑦ, ᑍᒪᖓᑐᖃᕐᓗ ᐃᓅᖏᓐᓇᕐᑐᖅ ᐃᒃᓯᕙᐅᑕᕐᔪᐊᒥᓄᑦ ᐃᖏᑉᐳᖅ, ᐊᓐᓄᕌᖏᑦ ᐊᐳᑎᑐᑦ ᖃᑯᕐᑎᒋᕗᑦ; ᓄᔭᖏᓪᓗ ᓰᐱᐅᑉ ᒥᖅᑯᖏᑎᑐᑦ ᖃᑯᕐᑎᒋᕗᑦ, ᐃᒃᓯᕙᐅᑕᕐᔪᐊᖓ ᐃᑯᐊᓚᕗᖅ, ᐊᒃᓴᓗᐊᖏᑦ ᐃᑯᒪᐅᓪᓗᑎᒃ. 10#ᑕᑯᑎ 5:11; ᑕᑯᑎ 20:12.ᐃᑯᒪᔪᖅ ᑰᒃᐳᖅ ᑖᑦᓱᒪ ᓵᖓᓂᑦ: ᑕᐅᓴᑎᑦ ᑕᐅᓴᑎᓪᓗ ᐅᖓᑖᓃᑦᑐᑦ ᐱᔨᑦᓯᕐᐳᑦ ᑖᑦᓱᒥᖓ; 10,000 10,000ᐃᕐᑐᕐᓗᒍ ᐅᓄᕐᑎᒋᔪᑦ ᓵᖓᓂ ᓇᖏᕐᐳᑦ, ᐃᖅᑲᕐᑐᐃᓂᖅ ᐱᒋᐊᕐᒪᑦ, ᒪᒃᐱᕐᑐᖅᑲᓪᓗ ᒪᒃᐱᕐᑕᐅᕗᑦ.
11“ᑕᑯᓐᓇᕐᑎᓪᓗᖓ, ᑐᓵᓚᐅᕐᐳᖓ ᓇᒡᔫᑉ ᒥᑭᔫᑉ ᓂᓪᓕᐊᓪᓗᓂ ᐱᐅᔪᕆᓂᖓᓂᒃ: ᑕᑯᓐᓇᕐᑎᓪᓗᖓᓗ ᐆᒪᔪᐊᓗᒃ ᑐᖁᑕᐅᕗᖅ ᑎᒥᖓᓗ ᑐᖁᖓᓕᕐᒪᑦ ᐃᒋᑕᐅᕗᖅ ᐃᑯᒪᒧᑦ ᐃᑯᐊᓚᔪᒧᑦ. 12ᐆᒪᔪᐊᓗᐃᓪᓕ ᐊᓯᖏᑦ ᐊᖓᔪᖅᑲᐅᓂᖏᑦ ᐲᕐᑕᐅᕗᑦ, ᐃᓅᑎᑕᐅᒃᑲᓐᓂᓚᐅᕐᐳᓪᓕ ᓇᓪᓕᐅᓐᓂᕐᓂᒃ.
13 #
ᒫᑎᐅᓯ 24:30; 26:64; ᒫᑯᓯ 13:26; 14:62; ᓘᑲᓯ 21:27; ᑕᑯᑎ 1:7,13; 14:14. “ᑕᑯᑎᑕᐅᑎᓪᓗᖓ ᐅᓐᓄᐊᒥ ᑕᑯᕗᖓ ᐃᓅᑉ ᐃᕐᓂᖓᑕ ᐊᑦᔨᖓᓂᒃ ᓄᕗᔭᓃᑦᑐᒥᒃ, ᑍᒪᖓᑐᖃᕐᓗ ᐃᓅᔪᖅ ᐅᐸᒃᐹ, ᓇᔪᒐᖓᓄᐊᕐᑎᑕᐅᓪᓗᓂᓗ. 14#ᑕᑯᑎ 11:15.ᑖᓐᓇ ᐊᖓᔪᖅᑲᐅᓂᕐᒥᒃ ᑐᓂᓯᕝᕕᐅᕗᖅ, ᐃᓅᖃᓐᓂᕐᓂᕐᒥᒡᓗ ᐊᖓᔪᖅᑲᐅᓂᕐᒥᒡᓗ; ᐃᓄᓕᒫᓪᓗ, ᐃᓅᖃᑎᒌᒡᔪᐃᓪᓗ ᓇᑭᑐᐃᓐᓇᖅ ᐱᓯᒪᔪᑦ ᖃᓄᑐᐃᓐᓇᕐᓗ ᐅᖃᐅᓯᓖᑦ ᑐᒃᓯᐊᕐᕕᒋᕚᑦ: ᐊᖓᔪᖅᑲᐅᕕᖓ ᐃᓱᖃᖏᑦᑐᒧᑦ ᐊᖓᔪᖅᑲᐅᓂᐅᕗᖅ ᐃᓱᓕᓐᓂᐊᕋᓂᓗ, ᐊᖓᔪᖅᑳᔪᐊᖑᕕᖓ ᑍᒪᓐᖓᑦ ᓵᓚᐅᓂᐊᓐᖏᓚᖅ.”
ᑕᑯᑎᑕᐅᓃᑦ ᓇᓗᓁᕐᑕᐅᓂᖏᑦ
15“ᐅᕙᖓ ᑖᓂᐊᓕ, ᐊᓂᕐᓂᑯᑦ ᐃᓱᒪᔮᓚᐅᕐᐳᖓ, ᑕᑯᑎᑕᐅᓂᖅ ᐃᓱᒪᓐᓄᑦ ᑎᑭᓯᒪᔪᖅ ᐱᑦᔪᑎᒋᓪᓗᒍ. 16ᑕᕝᕙᓂ ᓇᖏᕐᑐᑦ ᐃᓚᖓᑦ ᐅᐸᒃᓗᒍ, ᑕᒪᑐᒪ ᑕᑯᔭᒪ ᑐᑭᖓᓂᒃ ᐊᐱᕆᕙᕋ, ᐅᖃᐅᑎᕚᖓᓗ ᖃᐅᔨᑎᓪᓗᓂᖓ ᑕᒪᒃᑯᐊ ᑐᑭᖏᓐᓂᒃ. 17‘ᐆᒪᔪᐊᓗᐃᑦ ᓯᑕᒪᑦ ᑕᑯᔭᑎᑦ ᓯᑕᒪᐅᕗᑦ ᐊᖓᔪᖅᑲᐅᕖᑦ, ᓄᓇᒥ ᐊᖓᔪᖅᑲᐅᓂᐅᔪᒫᕐᑐᑦ. 18#ᑕᑯᑎ 22:5.ᖁᑦᓯᖕᓂᕐᐹᖑᔫᓪᓕ ᐃᑦᔪᕐᓁᑦᑐᖁᑎᖏᑦ ᐊᖓᔪᖅᑲᐅᕕᖕᒥᒃ ᑐᓂᓯᔭᐅᔪᒫᕐᐳᑦ, ᐱᓯᒤᓐᓇᓕᕐᓗᒍᓗ, ᐃᓱᖃᖏᑦᑐᒧᑦ, ᐃᓛᒃ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.’
19“ᑐᑭᓯᔪᒪᓚᐅᕆᕙᕋ ᐆᒪᔪᐊᓗᐃᑦ ᑕᑯᔭᒪ ᓯᑕᒪᖓᑕ ᑐᑭᖓ, ᑖᓐᓇ ᐊᑦᔨᒋᔭᐅᖏᑦᑐᖅ ᐆᒪᔪᐊᓗᖕᓂᑦ ᐊᓯᖏᓐᓂᑦ, ᑲᑉᐱᐊᓇᕐᓂᕐᐹᖑᓪᓗᓂᓗ, ᑭᒍᑎᖃᕐᑐᖅ ᓴᕕᕋᔭᖕᓂᒃ ᑯᑭᖃᕐᓗᓂᓗ ᖃᑯᕐᓕᕐᓂᒃ, ᑖᓐᓇ ᖃᖅᑯᐊᕐᐳᖅ ᓂᕆᓪᓗᓂᓗ ᓵᓚᒋᔭᒥᓂᒃ, ᑐᓪᓕᕋᕐᓗᓂᓗ ᐊᒥᐊᒃᑯᒥᓂᒃ. 20ᑐᑭᓯᔪᒪᓚᐅᕆᕙᒃᑲᓗ ᓂᐊᖁᖓᓂ ᓇᒡᔪᖏᑦ ᖁᓕᑦ, ᐃᓚᖓᓪᓗ ᐊᑯᓐᓂᖏᑎᒍᑦ ᐱᕈᕐᑐᖅ, ᑖᑦᓱᒪᓗ ᓯᕗᓂᐊᒍᑦ ᓇᒡᔪᐃᑦ ᐱᖓᓱᑦ ᐲᕐᑐᑦ, ᑖᓐᓇ ᑕᑯᓴᐅᓂᕐᓴᐅᔮᕐᑐᖅ ᐊᓯᒥᓂᑦ, ᐃᔨᖃᕐᓗᓂᓗ ᖃᓂᕐᒥᓄᓪᓗ ᓂᓪᓕᐊᔪᖅ ᐱᐅᔪᕆᓂᕐᒥᓂᒃ.
21 #
ᑕᑯᑎ 13:7. “ᑕᑯᓐᓈᕐᑎᓪᓗᖓ, ᓇᒡᔪᒃ ᑖᓐᓇ ᐅᓇᑕᖃᑎᖃᕐᐳᖅ ᐃᑦᔪᕐᓁᑦᑐᓂᒃ, ᓵᓚᒋᓕᕐᓗᒋᓪᓗ. 22#ᑕᑯᑎ 20:4.ᑍᒪᓐᖓᑐᖃᕐᓂᑦ ᐃᓅᔪᖅ ᕾᓚᐅᖏᓐᓂᖓᓂ, ᐃᖅᑲᕐᑐᐃᓂᕐᒥᒡᓗ ᓴᖅᑭᑎᑦᓯᓪᓗᓂ ᖁᑦᓯᖕᓂᕐᐹᑉ ᐃᑦᔪᕐᓁᑦᑐᖁᑎᖏᑦ ᓴᐳᑎᕔᑦ, ᓇᓪᓕᐅᑎᓪᓗᓂᓗ ᐊᖓᔪᖅᑲᐅᓂᖅ ᑖᒃᑯᓇᖓᑦ ᐱᓯᒪᔭᐅᓕᕐᕕᒃᓴᖓᑦ.
23“ᐃᓛᒃ ᑐᑭᖓᓂᒃ ᐅᖃᐅᑎᕚᖓ: ‘ᐆᒪᔪᐊᓗᐃᑦ ᓯᑕᒪᖓᑦ ᑖᓐᓇᐅᕗᖅ ᓄᓇᒥ ᐊᖓᔪᖅᑲᐅᕖᑦ ᓯᑕᒪᖓᑦ ᓄᓇᒥ ᓴᖅᑭᑦᓱᒫᕐᑐᖅ. ᑖᓐᓇ ᐊᖓᔪᖅᑲᐅᓂᕐᓂᑦ ᐊᑦᔨᒋᔭᐅᔪᒫᓐᖏᓚᖅ ᓄᓇᕐᔪᐊᒥᒡᓗ ᓄᖒᑦᓯᔪᒫᕐᐳᖅ, ᑐᓪᓕᕋᕐᓗᒍ ᓯᖁᑦᑎᕐᓗᒍᓗ. 24#ᑕᑯᑎ 17:12.ᓇᒡᔪᐃᑦ ᖁᓕᑦ ᑖᒃᑯᐊᖑᕗᑦ ᐊᖓᔪᖅᑳᕐᔪᐊᑦ ᖁᓕᑦ ᑕᕝᕙᓐᖓᑦ ᐊᖓᔪᖅᑲᐅᕕᖕᒥᑦ ᐱᓯᒪᔪᑦ: ᑖᒃᑯᐊ ᑭᖑᓂᖓᑦᑎᒍᑦ ᐊᖓᔪᖅᑳᕐᔪᐊᖅ ᐊᓯᖓᑦ ᓴᖅᑭᑦᓱᒫᕐᐳᖅ, ᑖᒃᑯᓇᖓᑦ ᓯᕗᓪᓕᕐᓂᑦ ᐊᑦᔨᒋᔭᐅᖏᑦᑐᖅ; ᑖᓐᓇ ᓵᓚᖃᕈᒫᕐᐳᖅ ᐊᖓᔪᖅᑳᕐᔪᐊᓂᒃ ᐱᖓᓱᓂᒃ. 25#ᑕᑯᑎ 12:14; 13:5,6.ᑖᓐᓇ ᓂᓪᓕᐊᔪᒫᕐᐳᖅ ᖁᑦᓯᖕᓂᕐᐹᖑᔪᖅ ᐊᑭᕋᕐᑐᕐᓗᒍ ᐅᖁᒤᒃᓴᕐᑎᓪᓗᒋᓪᓗ ᖁᑦᓯᖕᓂᕐᐹᖑᔪᑉ ᐃᑦᔪᕐᓁᑦᑐᖁᑎᖏᑦ, ᐋᖅᑭᒃᓱᐃᓇᓱᐊᕈᒫᕐᓗᓂᓗ ᐱᖁᔭᓂᒃ ᓇᓪᓕᐅᓂᕐᓯᐅᕕᖕᓂᒡᓗ ᐊᓯᑦᔩᓇᓱᐊᕈᒫᕐᓗᓂ. ᖁᑦᓯᖕᓂᕐᐹᓪᓗ ᐃᑦᔪᕐᓁᑦᑐᖁᑎᖏᑦ ᓯᐊᓛᕆᑬᓐᓇᕈᒫᕐᐰᑦ, ᓇᓪᓕᐅᓐᓂᕐᓂᒃ ᐱᖓᓱᓂᒃ ᐊᕝᕙᕐᒥᒡᓗ. 26ᐃᖅᑲᕐᑐᐃᓂᕐᓕ ᓇᓪᓕᐅᑎᔪᒫᕐᐳᖅ, ᐊᖓᔪᖅᑲᐅᓂᖓᑕᓗ ᐱᔪᓐᓇᕐᓂᖓᓂᒃ ᐊᕐᓵᕐᑕᐅᔪᒫᕐᐳᖅ ᓱᓇᐅᔪᓐᓃᕐᑎᑕᐅᓗᓂᓗ ᐃᓱᖃᖏᑦᑐᒧᑦ. 27#ᑕᑯᑎ 20:4; ᑕᑯᑎ 22:5.ᐊᖓᔪᖅᑲᐅᓂᖅ, ᐱᔪᓐᓇᕐᓂᕐᓗ, ᐊᖏᔫᓂᕐᓗ ᐊᑕᓂᐅᕕᖕᒥᑦ ᐱᔪᑦ ᕿᓚᐅᑉ ᐊᑖᓃᑦᑐᓕᒫᑦ ᑐᓂᔭᐅᔪᒫᕐᐳᑦ ᖁᑦᓯᖕᓂᕐᐹᑉ ᐃᑦᔪᕐᓁᑦᑐᖁᑎᖏᓐᓄᑦ, ᑖᑦᓱᒪ ᐊᑕᓂᐅᕕᖓ, ᐃᓱᖃᖏᑦᑐᒧᑦ ᐊᖓᔪᖅᑲᐅᓂᐅᔪᒫᕐᐳᖅ, ᐊᖓᔪᖅᑳᕐᔪᐊᓕᒫᓪᓗ ᐱᔨᑦᓯᕈᒫᕐᐹᑦ ᓈᓚᒡᓗᒍᓗ.’
28“ᑖᒃᑯᐊ ᑕᕝᕙ ᑕᑯᑎᑕᐅᓃᑦ ᐃᓱᐊᑦ, ᐅᕙᖓ ᑖᓂᐊᓕ ᐃᓱᒪᔮᕈᑎᒋᓚᐅᕐᐸᒃᑲ, ᑮᓇᕋᓗ ᐊᐅᖃᕈᓐᓃᓚᐅᕐᐳᖅ, ᑭᓇᒧᓪᓘᓐᓃᑦ ᐅᖃᓚᐅᓐᖏᓚᖓ ᐆᒻᒪᒻᒥᐅᑕᕆᑐᐃᓐᓇᓚᐅᕐᐸᒃᑲᓕ.”
Currently Selected:
ᑖᓂᐊᓕᐅᑉ ᐊᒡᓚᖏᑦ 7: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
