ᑖᓂᐊᓕᐅᑉ ᐊᒡᓚᖏᑦ 6
6
ᑖᓂᐊᓕᐅᑉ ᓛᔭᓄᑦ ᐃᒋᑕᐅᓂᖓ
1ᑍᕉᓯ ᖁᕕᐊᓱᒡᓗᓂ ᓴᖅᑭᑎᑦᓯᓚᐅᕐᐳᖅ ᐊᖓᔪᖅᑳᖑᖃᑎᒋᓂᐊᕐᑕᒥᓂᒃ 120ᓂᒃ, ᐊᖓᔪᖅᑲᐅᕕᓕᒫᒥᓄᑦ. 2ᑖᒃᑯᐊ ᐱᖓᓱᓂᒃ ᐊᖓᔪᖅᑳᖃᕐᑎᑉᐰᑦ, ᑖᓂᐊᓕ ᐱᖓᓱᒋᔭᐅᓪᓗᓂ: ᐊᖓᔪᖅᑳᖁᑎᖏᑦ ᐅᖃᕆᐊᖃᕐᓗᑎ ᑖᒃᑯᓄᖓ, ᐊᖓᔪᖅᑳᕐᔪᐊᖅ ᐅᖁᒤᒃᓴᖁᓇᒍ. 3ᑖᓂᐊᓕᓕ ᐊᖓᔪᖅᑳᖑᖃᑎᒥᓂᑦ ᐊᑦᔨᒋᔭᐅᓚᐅᓐᖏᓚᖅ ᐊᖓᔪᖅᑳᕐᔪᐊᓪᓘᓐᓃᑦ ᐊᖓᔪᖅᑳᖁᑎᖏᓐᓂᑦ, ᐊᔪᖏᑦᓯᐊᕐᒪ ᐊᐅᓚᒋᐊᓕᒃᑎᒍᑦ, ᐊᖓᔪᖅᑳᕐᔪᐊᖅ ᐃᓱᒪᓚᐅᕐᐳᖅ ᐊᖓᔪᖅᑲᐅᕕᓕᒫᒥᓄᑦ ᐊᖓᔪᖅᑲᐅᓕᖁᓪᓗᒍ. 4ᑍᒤᒻᒪᑦ, ᐊᖓᔪᖅᑳᖑᖃᑎᖏᑦ ᐊᖓᔪᖅᑳᕐᔪᐊᓪᓗ ᐊᖓᔪᖅᑳᖁᑎᖏᑦ ᕿᓂᓚᐅᕐᐳᑦ ᑖᓂᐊᓕ ᐸᓯᔪᒪᓪᓗᒍ ᐊᖓᔪᖅᑲᐅᕕᖕᒥᒃ ᐊᐅᓚᑦᓯᓂᖓᒍᑦ, ᐸᑦᓯᑎᒃᓴᕐᓯᔪᓐᓇᓚᐅᓐᖏᓚᓪᓕ, ᓈᒻᒪᖏᑦᑐᒥᒃ ᓇᓂᓯᕝᕕᒋᔪᓐᓇᓚᐅᖏᓐᓇᒥᑦᔪᒃ, ᐃᕿᐊᓱᒍᓐᓇᖏᒻᒪᑦ ᓈᒻᒪᖏᑦᑐᒥᒡᓗ ᐱᓂᐊᕐᓂᖃᕋᓂ. 5ᐊᖑᑎᑦ ᑖᒃᑯᐊ ᐅᖃᖃᑎᒌᓕᓚᐅᕐᐳᑦ, “ᐸᑦᓯᑎᒃᓴᕐᓯᐊᕈᓐᓇᓐᖏᓚᒍᑦ ᑖᓂᐊᓕᒧᑦ ᑐᕌᖓᔪᒥᒃ, ᒎᑎᖓᑕ ᐱᖁᔭᖏᑎᒍᑦ ᑭᓯᐊᓂ ᕿᓂᕈᑦᑕ.”
6ᐊᖓᔪᖅᑳᖑᖃᑎᖏᑦ, ᐊᖓᔪᖅᑳᕐᔪᐊᓪᓗ ᐊᖓᔪᖅᑳᖁᑎᖏᑦ ᐊᖓᔪᖅᑳᕐᔪᐊᕐᒧᑦ ᐂᓚᐅᕐᐳᑦ ᐅᖃᕐᓗᑎᒃ, “ᐊᖓᔪᖅᑳᕐᔪᐊᖅ ᑍᕉᓯ, ᐃᓅᒋᑦ ᐃᓱᖃᖏᑦᑐᒧᑦ! 7ᓄᓇᒧᑦ ᐊᐅᓚᑦᓯᔨᐅᑎᑕᑎᑦ ᐊᖓᔪᖅᑳᑦ, ᐊᖓᔪᖅᑳᖁᑎᑎᓪᓗ, ᐃᓱᒪᓕᐅᕐᑎᖁᑎᑎᓪᓗ, ᐊᐅᓚᑦᓯᔨᐅᔪᓪᓗ ᐊᖏᖃᑎᒌᖕᒪᑕ ᐊᖓᔪᖅᑳᕐᔪᐊᖅ ᐱᖁᔭᓕᐅᖁᓪᓗᒍ ᒪᓕᒃᑕᐅᔭᕆᐊᓕᖕᒥᒃ ᐊᑐᕐᑕᐅᔭᕆᐊᖃᓪᓚᕆᒡᓗᓂ ᐃᒤᓕᔪᒥᒃ, ᓇᓪᓕᐊᑦ ᑐᒃᓯᐊᕐᑐᖅ ᒎᑎᒧᑦ ᓇᓪᓕᐊᓐᓄᑐᐃᓐᓇᖅ ᐃᓄᖕᒧᓪᓘᓐᓂᑦ, ᐅᓪᓗᐃᑦ 30 ᐊᑯᓐᓂᖓᓂ, ᐃᕝᕕᑦ ᐊᖓᔪᖅᑳᕐᔪᐊᖅ ᐊᓯᖕᓄᑦ, ᓛᔧᑦ ᓯᑎᖓᓄᑦ ᐃᒋᑕᐅᔪᒃᓴᐅᕗᖅ. 8ᒫᓐᓇ ᐊᖓᔪᖅᑳᕐᔪᐊᖅ, ᐱᖁᔭᓕᐅᓕᕆᑦ, ᑎᑎᕋᕐᓗᒍᓗ ᐊᓯᑦᔨᕐᑕᐅᔪᓐᓇᖁᓇᒍ, ᒦᑎᒥᐅᑦ ᐳᕐᓯᐊᒥᐅᓪᓗ ᐱᖁᔭᖏᑦ ᒪᓕᒡᓗᒋᑦ, ᐲᕐᑕᐅᔪᓐᓇᖏᑦᑐᒥᒃ.” 9ᑍᒤᒻᒪᑦ ᐊᖓᔪᖅᑳᕐᔪᐊᖅ ᑍᕉᓯ ᐱᖁᔭᓕᐅᕐᐳᖅ ᑎᑎᕋᕐᓗᓂ ᐊᑎᓕᐅᕐᓗᒍᓗ. 10ᑖᓂᐊᓕᓕ ᖃᐅᔨᒐᒥ ᐱᖁᔭᖅ ᐋᖅᑭᒃᑕᐅᔭᕇᕐᒪᑦ, ᐊᖏᕐᕋᕐᐳᖅ ᒪᔪᕋᕐᓗᓂᓗ ᐃᒡᓗᕈᓯᕐᒥᓄᑦ, ᐃᒐᓛᕐᒧᑦ ᔨᕉᓴᓕᒧᑦ ᓵᖓᔪᒧᑦ, ᓰᖅᑯᕐᓗᓂᓗ ᑐᒃᓯᐊᕐᐸᒃᐳᖅ ᐅᓪᓗᖅ ᐱᖓᓱᐃᕐᓱᕐᓗᒍ, ᖁᔭᓕᓪᓗᓂᓗ ᒎᑎᒥᓄᑦ ᑍᒫᒃ ᐱᐅᓯᕆᕙᒃᑕᒥᑐᑦ.
11ᐊᖑᑎᓪᓗ ᑍᒃᑯᐊ ᑲᑎᓪᓗᑎᒃ ᕾᕗᑦ, ᑖᓂᐊᓕᓗ ᑕᑯᕚᑦ ᒎᑎᒧᑦ ᑐᒃᓯᐊᕐᑐᖅ ᐃᑲᔪᕐᑕᐅᔪᒪᓂᕐᒥᒃ. 12ᐊᖓᔪᖅᑳᕐᔪᐊᒧᓪᓗ ᐂᕗᑦ ᐅᖃᕐᕕᒋᓪᓗᒍᓗ ᐱᖁᔭᓕᐊᕆᓯᒪᔭᖓᓂᒃ ᐅᖃᕐᓗᑎᒃ, “ᐱᖁᔭᓕᐅᓚᐅᓐᖏᓚᑏᑦ? ᐅᓪᓗᓂᒃ 30ᓂᒃ ᓇᓪᓕᐊᑦ ᑐᒃᓯᐊᕐᑐᖅ ᒎᑎᒧᑦ ᓇᓪᓕᐊᓐᓄᑐᐃᓐᓇᖅ ᐃᓄᖕᒧᓪᓘᓐᓃᑦ, ᐊᖓᔪᖅᑳᕐᔪᐊᑉ ᐊᓯᐊᓄᑦ, ᑍᒤᓕᐅᕐᑐᖅ ᓛᔧᑦ ᓯᑎᖓᓄᑦ ᐃᒋᑕᐅᑯᓪᓗᒎ?” ᐊᖓᔪᖅᑳᕐᔪᐊᖅ ᑭᐅᕗᖅ, “ᐱᖁᔭᖅ ᐊᓯᑦᔨᕐᓯᒪᓐᖏᓚᖅ, ᒦᑎᒥᐅᑦ ᐳᕐᓯᐊᒥᐅᓪᓗ ᐱᖁᔭᖏᑦ ᒪᓕᒡᓗᒋᑦ ᐊᓯᑦᔨᕐᑕᐅᔪᓐᓇᓐᖏᓚᖅ.”
13ᑖᒃᑯᐊ ᐊᖓᔪᖅᑳᕐᔪᐊᒧᑦ ᐅᖃᓕᕐᐳᑦ, “ᐊᖓᔪᖅᑳᕐᔪᐊᖅ, ᑖᓂᐊᓕ, ᔫᑕᒥᑦ ᑎᒍᔭᐅᓯᒪᔪᑦ ᐃᓚᖓᑦ, ᐃᓕᖕᓂᒃ ᓈᓚᖏᒻᒪᑦ, ᐱᖁᔭᓕᐊᕆᓚᐅᕐᑕᕐᓂᒡᓘᓐᓃᑦ ᒪᓕᖏᒻᒪᑦ; ᓱᓕ ᑐᒃᓯᐊᖃᑦᑕᕐᒪᑦ ᐅᓪᓗᖅ ᐱᖓᓱᐃᕐᓱᕐᓗᒍ.”
14ᐊᖓᔪᖅᑳᕐᔪᐊᕐᓕ ᑕᒪᑐᒥᖓ ᑐᓴᕋᒥ ᐃᓱᒪᔮᒻᒪᕆᓕᕐᐳᖅ, ᖃᓄᑐᐃᓐᓇᕐᓗ ᕿᓂᓕᕐᐳᖅ ᑖᓂᐊᓕ ᓴᐳᑎᔪᒪᓪᓗᒍ ᓯᕿᓂᐅᑉ ᓂᐱᓂᖓ ᑎᑭᓪᓗᒍ. 15ᐊᖑᑎᓪᓗ ᑖᒃᑯᐊ ᑲᑎᒪᓪᓗᑎᒃ ᐊᖓᔪᖅᑳᕐᔪᐊᒧᐊᕐᐳᑦ ᐅᖃᐅᑎᓪᓗᒍᓗ, “ᐊᖓᔪᖅᑳᕐᔪᐊᖅ ᐃᖅᑲᐅᒪᒋᑦ ᒦᑎᒥᐅᑦ ᐳᕐᓯᐊᒥᐅᓪᓗ ᐱᖁᔭᖏᑦ ᒪᓕᒡᓗᒋᑦ, ᐊᖓᔪᖅᑳᕐᔪᐊᑉ ᐱᖁᔭᓕᐊᖏᑦ ᒪᓕᒐᖏᓪᓗ ᐊᓯᑦᔨᕐᑕᐅᔪᓐᓇᖏᒻᒪᑕ.”
16ᑍᒤᒻᒪᑦ ᐊᖓᔪᖅᑳᕐᔪᐊᖅ ᐱᖁᔨᕗᖅ, ᑖᓂᐊᓕ ᐂᔭᐅᖁᓪᓗᒍ ᓛᔧᓪᓗ ᓯᑎᖓᓄᑦ ᐃᒋᑕᐅᖁᓪᓗᒍ, ᐊᖓᔪᖅᑳᕐᔪᐊᕐᓗ ᑖᓂᐊᓕᒧᑦ ᐅᖃᕐᐳᖅ, “ᒎᑎᕕᑦ ᑍᒪᓐᖓᑦ ᐱᔨᑦᓯᕐᑕᕕᑦ, ᓴᐳᑎᓕᑎᑦ!” 17ᐅᔭᕋᒡᓗ ᐃᓕᔭᐅᕗᖅ ᓛᔧᑦ ᓯᑎᖓᑕ ᐹᖓᓄᑦ, ᐊᖓᔪᖅᑳᕐᔪᐊᓪᓗ ᓇᕿᑦᔪᓯᕐᐹ ᓇᒡᒍᐊᕐᒥᖕᒥᓄᑦ ᓇᓗᓁᒃᑯᑕᕐᒥᓄᑦ, ᐊᖓᔪᖅᑳᖁᑎᖏᑕᓗ ᓇᓗᓁᒃᑯᑕᖏᓐᓄᑦ, ᑖᓂᐊᓕᐅᑉ ᖃᓄᐃᓕᐅᕐᑕᐅᓂᖓ ᐊᓯᑦᔨᕐᑕᐅᖁᓇᒍ. 18ᐊᖓᔪᖅᑳᕐᔪᐊᕐᓗ ᐅᑎᕐᐳᖅ ᐃᒡᓗᒥᓄᑦ ᐅᓐᓄᒡᓗ ᓂᕆᓚᐅᓐᖏᓚᖅ ᑐᓴᕐᓂᕋᕐᑐᓂᒡᓗ ᑐᓵᔪᒪᓇᓂ, ᓯᓂᓚᐅᓐᖏᓚᕐᓘᓐᓃᑦ.
19ᐅᓪᓛᒻᒪᕆᒃᑯᓪᓕ ᐊᖓᔪᖅᑳᕐᔪᐊᖅ ᒪᑭᑉᐳᖅ ᖃᐅᒻᒪᓕᓵᕐᑎᓪᓗᒍ, ᑐᐊᕕᕐᓗᓂᓗ ᓛᔧᑦ ᓯᑎᖓᓄᐊᕐᐳᖅ. 20ᓛᔧᑦ ᓯᑎᖓ ᖃᒡᓕᓪᓗᒍ, ᑖᓂᐊᓕᒧᑦ ᕾᒐᓛᕐᐳᖅ ᓂᐱᒧᑦ ᖁᓱᔪᒧᑦ, “ᑖᓂᐊᓖ, ᒎᑎᐅᑉ ᐆᒪᔫᑉ ᐱᔨᖓ, ᒎᑎᕕᑦ, ᑍᒪᓐᖓᑦ ᐱᔨᑦᓯᕐᑕᕕᑦ ᓛᔭᓂᑦ ᓴᐳᑎᕙᑏᑦ?”
21ᑖᓂᐊᓕᐅᑉ ᑭᐅᕚ, “ᐊᖓᔪᖅᑳᕐᔪᐊᖅ, ᐃᓅᒋᑦ ᐃᓱᖃᖏᑦᑐᒧᑦ! 22ᒎᑎᒐ ᐂᖏᓕᖁᑎᒥᓂᒃ ᑎᓕᓯᓚᐅᕐᐳᖅ, ᓛᔧᓪᓗ ᖃᓂᖏᑦ ᒪᑐᓪᓗᒋᑦ, ᑖᒃᑯᓇᖓᑦ ᖃᓄᐃᓕᔭᐅᓐᖏᓚᖓ, ᖃᐅᔨᔭᐅᒐᒪ ᐸᓯᔭᒃᓴᐅᖏᓐᓂᓐᓂᒃ ᑖᑦᓱᒪ ᓵᖓᓂ; ᐃᓕᖕᓄᓪᓗ ᐊᖓᔪᖅᑳᕐᔪᐊᖅ, ᓈᒻᒪᖏᑦᑐᒥᒃ ᐱᓇᓱᐊᓚᐅᕐᓯᒪᖏᓐᓇᒪ.”
23ᐊᖓᔪᖅᑳᕐᔪᐊᕐᓗ ᖁᕕᐊᓱᖕᓂᕐᒥᒃ ᑕᑕᑕᐅᕗᖅ, ᐱᖁᔨᓪᓗᓂᓗ ᑖᓂᐊᓕ ᓛᔧᑦ ᓯᑎᖓᓂᑦ ᐊᒧᔭᐅᖁᓪᓗᒍ. ᑖᓂᐊᓕᓗ ᐊᒧᔭᐅᖕᒪᑦ, ᓇᐅᒃᑯᑐᐃᓐᓇᖅ ᐃᑭᖃᓐᖏᓚᖅ, ᒎᑎᓂ ᑕᑎᒋᖕᒪᒍ. 24ᐊᖓᔪᖅᑳᕐᔪᐊᑉ ᐱᖁᔨᓂᖓᓄᑦ, ᐊᖑᑎᑦ ᑖᓂᐊᓕᒥᒃ ᓱᓕᖏᑦᑐᒥᒃ ᐸᓯᒃᓯᕋᓱᓚᐅᕐᑐᑦ, ᕾᑎᑕᐅᕗᑦ ᐃᒋᑕᐅᓪᓗᑎᒃᓗ ᓛᔧᑦ ᓯᑎᖓᓄᑦ, ᓄᓕᐊᖏᑦ ᕿᑐᕐᖓᖏᓪᓗ ᐃᓚᒋᓪᓗᒋᑦ; ᓛᔭᒃᑯᕕᐅᑉ ᓇᑎᖓᓄᑦ ᓱᓕ ᑐᓚᐅᕐᑎᓐᓇᒋᑦ ᓛᔭᓂᑦ ᐊᑯᕐᑕᐅᓪᓗᑎᒃ ᓴᐅᓂᖏᑦ ᓯᖁᓪᓗᕐᑕᐅᕗᑦ.
25ᐊᖓᔪᖅᑳᕐᔪᐊᕐᓗ ᑍᕉᓯ ᐃᓄᖁᑎᓕᒫᒥᓄᑦ, ᐃᓅᖃᑎᒌᒡᔪᐊᓄᑦ ᓇᑭᑐᐃᓐᓇᖅ ᐱᓯᒪᔪᓄᑦ ᐃᓄᖕᓄᓪᓗ ᖃᓄᑐᐃᓐᓇᖅ ᐅᖃᐅᓯᖃᕐᑐᓄᑦ ᐊᖓᔪᖅᑲᐅᕕᖕᒥᓃᑦᑐᓄᑦ ᐅᖃᕐᐳᖅ: “ᐊᖏᔪᒥᒃ ᓮᒪᓂᖃᕆᑦᓯ! 26ᐱᖁᔭᓕᐅᕐᐳᖓ ᐊᖓᔪᖅᑲᐅᕕᓕᒫᓐᓂ ᐃᓄᐃᑦ ᓴᔪᒃᑐᒃᓴᐅᕗᑦ ᓯᕘᕋᓗᑎᒡᓗ ᑖᓂᐊᓕᐅᑉ ᒎᑎᖓᓂᒃ:
ᑖᓐᓇ ᐃᓅᖕᒪᑦ ᓱᖁᓯᕐᓂᐊᕋᓂᓗ ᐃᓱᖃᖏᑦᑐᒧᑦ,
ᐊᖓᔪᖅᑲᐅᕕᖓ ᐊᓯᕈᕐᑕᐅᓂᐊᓐᖏᓚᖅ,
ᐊᑕᓂᐅᓂᖓᓗ ᐃᓱᓕᓐᓂᐊᓐᖏᓚᖅ.
27ᑖᓐᓇ ᐊᓐᓇᒃᑎᑦᓯᕙᒃᑐᖅ ᓴᐳᑦᔨᕙᒡᓗᓂᓗ;
ᓇᓗᓁᒃᑯᑕᕐᓂᒃ ᑲᒪᓇᕐᑐᓂᒡᓗ ᐱᓂᐊᕐᓂᖃᕐᐳᖅ ᕿᓚᖕᒥ ᓄᓇᒥᓗ.
ᑖᓂᐊᓕ ᓴᐳᑎᓚᐅᕐᐹ ᓔᔧᑦ ᐱᔪᓐᓇᕐᓂᖏᓐᓂᑦ.”
28ᑍᒤᒻᒪᑦ ᑖᓂᐊᓕ ᐱᔪᓐᓇᕐᓯᕙᓪᓕᐊᓚᐅᕐᐳᖅ ᓱᓇᑐᐃᓐᓇᕐᓂᒃ ᑍᕉᓯ ᐊᖓᔪᖅᑳᕐᔪᐊᖑᑎᓪᓗᒍ ᓮᕋᓯᓗ ᐴᕐᓯᐊᒥᐅᖅ ᐊᖓᔪᖅᑳᕐᔪᐊᖑᓂᖓᓂ.
Currently Selected:
ᑖᓂᐊᓕᐅᑉ ᐊᒡᓚᖏᑦ 6: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
