ᑖᓂᐊᓕᐅᑉ ᐊᒡᓚᖏᑦ 5
5
ᐱᐅᓪᓴᔮᑉ ᐱᖁᔨᓂᖓ
1ᐊᖓᔪᖅᑳᕐᔪᐊᖅ ᐱᐅᓪᓴᔮ ᓂᕆᕕᒡᔪᐊᕐᑎᑦᓯᓚᐅᕐᐳᖅ ᐊᖓᔪᖅᑳᖁᑎᒥᓂᒃ 1,000ᓂᒃ, ᕔᓂᑐᖃᑎᒋᓪᓗᒋᓪᓗ. 2ᐱᐅᓪᓴᔮᓕ ᕔᓂᒥᒃ ᐃᒥᕐᑎᓪᓗᒍ, ᐱᖁᔨᓚᐅᕐᐳᖅ ᕾᑕᐅᖁᔨᓪᓗᓂ ᐃᒥᐅᑎᓂᒃ ᒎᓗᓂᒃ ᓯᐅᓪᕕᕆᓂᒡᓗ, ᐊᑖᑕᖓᑕ ᓂᐱᑯᓁᓴᐅᑉ ᐱᓚᐅᕐᑕᕕᓂᖏᓐᓂᒃ ᔨᕉᓴᓕᒻᒥᑦ; ᐊᖓᔪᖅᑳᕐᔪᐊᖅ ᐊᖓᔪᖅᑳᖁᑎᖏᓪᓗ, ᑖᑦᓱᒪᓗ ᓄᓕᐊᖏᑦ, ᐊᕐᓇᖁᑎᖏᓪᓗ ᑖᒃᑯᓂᖓ ᐃᒥᐅᑎᖃᖁᓪᓗᒋᑦ. 3ᐃᒥᐅᑏᓪᓗ ᒎᓗᐃᑦ ᕾᑕᐅᕗᑦ, ᔨᕉᓴᓕᒥᑦ ᐱᔭᐅᓯᒪᔪᑦ ᒎᑎᐅᑉ ᐃᒡᓗᖓᓂᑦ; ᐊᖓᔪᖅᑳᕐᔪᐊᓪᓗ ᐊᖓᔪᖅᑳᖁᑎᖏᓪᓗ, ᑖᑦᓱᒪᓗ ᓄᓕᐊᖏᑦ, ᐊᕐᓇᖁᑎᖏᓪᓗ ᑖᒃᑯᐊ ᐃᒥᐅᑎᒋᓕᕐᐰᑦ. 4ᕔᓂᑐᕐᓗᑎᒡᓗ, ᒎᑎᑎᒃ ᒎᓗᐃᑦ ᓯᐅᓪᕕᕇᓪᓗ, ᖃᖁᕐᓖᓪᓗ, ᓴᕕᕋᔧᓪᓗ, ᕿᔪᐃᓪᓗ ᐅᔭᕅᓪᓗ ᓂᕐᑐᕐᐰᑦ.
5ᑕᕝᕔᓐᓇᖅ ᓴᖅᑭᑦᑐᖃᕐᐳᖅ ᐃᓅᑉ ᐊᒡᒐᖏᓐᓂᒃ, ᐃᒡᓘᓪᓗ ᐊᑭᓐᓇᖓᒍᑦ ᑎᑎᕋᕐᓗᑎᒃ, ᓇᓂᕈᐊᒃᑯᕕᐅᑉ ᖃᓂᒋᔮᒍᑦ ᐊᖓᔪᖅᑳᕐᔪᐊᑉ ᐃᒡᓗᖓᓂ: ᐊᖓᔪᖅᑳᕐᔪᐊᖅ ᑕᐅᑐᒃᐳᖅ ᐊᒡᒊᑦ ᑎᑎᕋᕐᑎᓪᓗᒋᑦ. 6ᑮᓇᖓᑕ ᑕᐅᑦᑐᐊ ᖃᑯᕐᓯᕗᖅ, ᑲᑉᐱᐊᓱᒻᒪᕆᓕᕐᓗᓂ ᓰᖅᑯᖏᒡᓗ ᓴᔪᒃᐴᒃ, ᓂᐅᖏᒃ ᓄᑮᕐᓗᑎᒃ. 7ᐊᖓᔪᖅᑳᕐᔪᐊᕐᓗ ᕾᖁᔨᕗᖅ ᓇᓚᐅᑦᑍᔨᓂᒃ, ᑳᓪᑎᐊᒥᐅᓪᓗ ᓯᓚᑐᔪᖁᑎᖏᓐᓂᒃ, ᐊᖓᒃᑯᓂᒡᓗ, ᐅᖃᐅᑎᓪᓗᒋᓪᓗ ᐹᐱᓘᓂᒥᐅᑦ ᓯᓚᑐᔪᖁᑎᖏᑦ, “ᓇᓪᓕᐊᑦ ᐅᑯᓂᖓ ᑎᑎᖅᑲᓂᒃ ᐅᖃᓕᒫᕐᑐᖅ, ᖃᓄᐃᓕᖕᒪᖔᑕᓗ ᐅᖃᐅᑎᓗᖓ, ᐊᓐᓄᕌᕐᑎᓐᓂᐊᕐᐸᕋ ᐊᐅᐸᓪᓚᕆᒃᑐᓂᒃ ᒎᓗᒥᒡᓗ ᐅᔭᒥᒃᑎᓪᓗᒍ, ᐊᖓᔪᖅᑲᐅᓂᓐᓂᓗ ᑐᖏᓕᕐᒪ ᐱᖓᔪᒋᓕᕐᓂᐊᐹ.” 8ᐊᖓᔪᖅᑳᕐᔪᐊᓪᓕ ᓯᓚᑐᔪᖁᑎᖏᑦ ᕾᕗᑦ, ᑎᑎᕋᕐᓯᒪᔪᓪᓗ ᐅᖃᓕᒫᕈᓐᓇᓐᖏᓔᑦ, ᖃᓄᐃᓕᖕᒪᖔᑕᓗ ᖃᐅᔨᒪᓇᑎᒃ. 9ᐊᖓᔪᖅᑳᕐᔪᐊᕐᓕ ᐱᐅᓪᓴᔮ ᑲᑉᐱᐊᓱᖕᓂᕐᓴᐅᒃᑲᓐᓂᓕᕐᐳᖅ, ᑮᓇᖓ ᖃᑯᕐᓂᕐᓴᐅᓕᕐᓗᓂ, ᐊᖓᔪᖅᑳᖁᑎᖏᓪᓗ ᑕᑕᒥᓐᓂᐊᕐᐳᑦ.
10ᑯᐃᓐᓕ ᐊᖓᔪᖅᑳᕐᔪᐊᑉ ᓄᓕᐊᖓ ᑐᓴᕋᒥ ᐊᖓᔪᖅᑳᕐᔪᐊᑉ ᐊᖓᔪᖅᑳᖁᑎᖏᑕᓗ ᓂᐱᖏᓐᓂᒃ, ᓂᕆᕕᒡᔪᐊᕐᕕᖕᒧᑦ ᐃᑎᕐᐳᖅ ᐅᖃᕐᓗᓂ, “ᐊᖓᔪᖅᑳᕐᔪᐊᖅ ᐃᓅᒋᑦ ᐃᓱᖃᖏᑦᑐᒧᑦ! ᑕᑕᒥᓐᓂᐊᖏᓪᓗᑎᑦ ᑮᓇᕐᓕᕐᓯᒪᖏᓪᓗᑎᓪᓗ! 11ᐊᖑᒻᒥᒃ ᐱᑕᖃᕐᐳᖅ ᐊᖓᔪᖅᑲᐅᕕᖕᓂ, ᒎᑎᑦ ᐃᑦᔪᕐᓁᑦᑐᑦ ᐊᓂᕐᓂᖏᓐᓂᒃ ᐱᓯᒪᔪᒥᒃ; ᐊᑖᑍᑦ ᓂᐱᑯᓁᓴ ᐃᓅᑎᓪᓗᒍ ᖃᐅᔨᒪᓂᖃᓚᐅᕐᑐᖅ ᑐᑭᓯᐅᒪᓂᖃᕐᓗᓂᓗ ᒎᑎᑎᑐᑦ, ᐊᖓᔪᖅᑳᕐᔪᐊᖅ, ᐅᖃᕐᐳᖓ, ᐊᖓᔪᖅᑳᕐᔪᐊᑉ ᐊᑖᑕᕕᑦ ᐊᖓᔪᖅᑳᓐᖑᕐᑎᓚᐅᕐᑕᖓ ᐊᖓᒃᑯᓄᑦ, ᓇᓚᐅᑦᑍᔨᓄᓪᓗ, ᑳᓪᑎᐊᒥᓗ ᓯᓚᑐᔪᓄᑦ, ᑐᖁᖓᔪᓂᒡᓗ ᐅᖃᖃᑎᖃᕐᐸᒃᑐᓄᑦ. 12ᑖᓐᓇ ᑖᓂᐊᓕ, ᐊᖓᔪᖅᑳᕐᔪᐊᑉ ᐊᑎᖃᑎᓚᐅᕐᑕᖓ ᐱᐊᓪᓴᔮᕆᒥᒃ, ᐃᓱᒪᖃᑦᓯᐊᕐᒪᑦ ᖃᐅᔨᒪᑦᓯᐊᕐᓗᓂᓗ, ᑐᑭᓯᒪᑦᓯᐊᕐᓗᓂᓗ, ᓯᓐᓇᒃᑐᐃᓪᓗ ᑐᑭᖏᓐᓂᒃ ᐅᖃᐅᓯᖃᕈᓐᓇᕐᓗᓂ, ᐅᖃᐅᓰᓪᓗ ᓇᓗᓇᕐᑐᑦ ᑐᑭᖏᓐᓂᒃ ᐅᖃᐅᓯᖃᕈᓐᓇᕐᓗᓂ, ᓇᓗᓇᕐᑐᓂᒡᓗ ᓇᓗᓁᕐᓯᔪᓐᓇᕐᓗᓂ; ᕾᖁᓚᐅᕈᒃ ᐅᖃᐅᑎᓂᐊᕐᒪᑎᑦ ᑎᑎᕋᕐᓯᒪᔪᑦ ᖃᓄᖅ ᑐᑭᖃᕐᒪᖔᑕ.”
ᑖᓂᐊᓕᐅᑉ ᓇᓗᓁᕐᓯᓂᖓ ᐃᒡᓘᑉ ᐊᑭᓐᓇᖓᓂ ᑎᑎᕋᕐᓯᒪᔪᓂᒃ
13ᑖᓂᐊᓕᓗ ᕾᑎᑕᐅᕗᖅ ᐊᖓᔪᖅᑳᕐᔪᐊᑉ ᓵᖓᓄᑦ, ᐊᖓᔪᖅᑳᕐᔪᐊᓪᓗ ᐅᖃᐅᑎᕚ, “ᑖᓂᐊᓕᐅᕖᑦ ᐊᑖᑕᒪ ᔫᑕᒥᑦ ᑎᒍᓚᐅᕐᑕᖏᑕ ᐃᓚᖓᑦ? 14ᑐᓴᓚᐅᕋᒪ ᒎᑎᑦ ᐊᓂᕐᓂᖏᑕᒎᖅ ᐃᓚᒋᖕᒪᑎᑦ, ᖃᐅᔨᔪᓐᓇᕋᕕᒡᒎᖅ ᐃᓱᒪᑖᕈᓇᕐᓗᑎᓪᓗ ᑐᑭᓯᔪᓐᓇᕐᓗᑎᓪᓗ ᓯᓚᑐᓂᒃᑯᑦ. 15ᐊᖑᑎᑦ ᓯᓚᑐᔪᑦ ᐊᖓᒃᑯᐃᓪᓗ ᕾᑎᑕᐅᓚᐅᕐᒪᑕ ᐅᖃᓕᒫᖁᓪᓗᒋᑦ ᑎᑎᕋᕐᓯᒪᔪᓂᒃ ᐅᑯᓂᖓ ᑐᑭᖏᓐᓂᒡᓗ ᓇᓗᓁᕐᓯᖁᓪᓗᒋᑦ, ᐊᔪᓚᐅᕐᐳᓪᓕ. 16ᑐᓴᓚᐅᕋᒪ ᓇᓗᓇᕐᑐᑦ ᑐᑭᖏᓐᓂᒃ ᓇᓗᓁᕐᓯᔪᓐᓇᕋᕕᒡᒎᖅ, ᐊᔪᕐᓇᕐᑐᓪᓗᒎ ᑐᑭᓯᔭᒃᓴᐅᖏᑦᑐᑦ ᓇᓗᓇᕈᓐᓁᕐᑎᑦᓱᓐᓇᕋᕕᒋᑦ, ᑎᑎᕋᕐᓯᒪᔪᑦ ᐅᑯᐊ ᐅᖃᓕᒫᕈᓐᓇᕈᕕᒋᑦ ᐅᖃᐅᑎᓗᖓᓗ ᖃᓄᐃᓕᖕᒪᖔᑕ, ᐊᐅᐸᓪᓚᕆᒃᑐᒥᒃ ᐊᓐᓄᕌᕐᑎᑦᓱᒪᕙᒋᑦ ᐅᔭᒥᒡᓗᑎᓪᓗ ᒎᓗᒥᒃ, ᐊᖓᔪᖅᑳᓐᖑᕐᑎᑦᓱᒪᕙᒋᓪᓗ ᐊᖓᔪᖅᑲᐅᓂᕐᒪ ᑐᖏᓕᖏᑕ ᐱᖓᔪᐊᓐᓄᑦ.”
17ᑖᓂᐊᓕᐅᑉ ᐊᖓᔪᖅᑳᕐᔪᐊᖅ ᑭᐅᕚ, “ᑐᓂᕐᕈᑎᑎᑦ ᐱᓯᒪᓕᒃᑭᑦ, ᐊᑭᓕᐅᑎᑎᓪᓗ ᐊᓯᓐᓄᑦ ᑐᓂᓗᒋᑦ: ᐊᖓᔪᖅᑳᕐᔪᐊᕐᓕ ᑎᑎᕋᕐᓯᒪᔪᓂᒃ ᐅᖃᓕᒫᕈᑎᓂᐊᕐᐸᕋ, ᑐᑭᖓᓂᒡᓗ ᐅᖃᐅᑎᓗᒍ.
18“ᐊᖓᔪᖅᑳᕐᔪᐊᖅ, ᒎᑎᐅᑉ ᖁᑦᓯᖕᓂᕐᐹᑉ ᐊᑖᑍᑦ ᓂᐱᑯᓁᓴ ᑐᓂᓯᕕᒋᓚᐅᕐᐹ ᐊᖓᔪᖅᑲᐅᓂᕐᒥᒃ, ᐊᖏᔪᕐᔫᓂᕐᒥᒡᓗ, ᐅᐱᒋᔭᐅᓂᕐᒥᒡᓗ, ᐱᐅᒋᔭᐅᒻᒪᕆᖕᓂᕐᒥᒡᓗ. 19ᐊᖓᔪᖅᑳᕐᔪᐊᖑᓂᖓᑕ ᐅᐱᒋᔭᐅᓂᖓᓂᒃ ᑐᓂᓯᕕᒋᓚᐅᕐᒪᒍ, ᐃᓄᐃᑦ ᓇᓂᑐᐃᓐᓇᖅ ᐃᓅᖃᑎᒋᒃᔪᐃᓪᓗ ᓇᓂᑐᐃᓐᓇᖅ ᖃᓄᑐᐃᓐᓇᕐᓗ ᐅᖃᐅᓯᓖᑦ ᑲᑉᐱᐊᒋᓚᐅᕐᐹᑦ ᓯᕘᕋᒋᓪᓗᒍᓗ. ᑐᖁᑕᐅᖁᔭᓂᓗ ᑐᖁᑕᐅᑎᓚᐅᕐᐰᑦ; ᐆᒪᖁᔭᓂᓗ ᐆᒪᑎᓚᐅᕐᐰᑦ; ᐊᖓᔪᖅᑳᖑᖁᔭᓂᓗ ᐊᖓᔪᖅᑳᓐᖑᕐᑎᓚᐅᕐᐰᑦ; ᒥᑭᒡᓕᑎᖁᔭᖏᓪᓗ ᒥᑭᒡᓕᑎᓚᐅᕐᐳᑦ. 20ᐊᔪᖏᓐᓇᓱᒋᓕᕐᒪᓪᓕ ᐱᐅᔪᕆᓂᕐᒧᓪᓗ ᓯᑎᔫᓕᕐᒪᑦ, ᐊᖓᔪᖅᑳᕐᔪᐊᑉ ᐃᒃᓯᕙᐅᑕᖓᓂᑦ ᐲᕐᑕᐅᓚᐅᕐᐳᖅ ᐱᐅᒋᔭᐅᓂᖓᓗ ᓄᖑᓚᐅᕐᐳᖅ. 21ᐃᓄᐃᑦ ᐃᓂᖓᓂᑦ ᐊᐅᓪᓚᕐᑎᑕᐅᓚᐅᕐᐳᖅ ᐆᒪᔫᑎᑐᓪᓗ ᐃᓱᒪᖃᓕᕐᓗᓂ; ᐃᓅᖃᑎᖃᓕᕐᓗᓂᓗ ᓯᐅᑎᖁᕐᑐᔪᓂᒃ ᓄᔪᐊᕐᑐᓂᒃ, ᐆᒪᔪᕐᑎᑐᓪᓗ ᐃᕕᒃᓱᒐᕐᓂᒃ ᓂᕿᖃᓚᐅᕐᐳᖅ; ᑎᒥᖓᓗ ᖃᐅᓯᕐᑎᑕᐅᖃᑦᑕᓚᐅᕐᐳᖅ ᓯᓚᐅᑉ ᐂᔪᖓᑎᑦᓯᓂᖓᓄᑦ, ᖃᐅᔨᓚᐅᖏᓐᓂᖓᓂ ᒎᑎ ᖁᑦᓯᖕᓂᕐᐹᑉ ᐊᐅᓚᑦᓯᓂᖓᓂᒃ ᐃᓄᐃᑦ ᐊᖓᔪᖅᑳᕐᔪᐊᖑᕕᖏᓐᓂᒃ, ᐊᖓᔪᖅᑲᕐᔪᐊᖑᑎᑦᓯᕙᖕᒪᑦ ᓇᓪᓕᐊᓐᓂᒃ ᐱᖁᔭᒥᓂᒃ.
22“ᐃᕝᕕᓪᓕ ᐱᐅᓪᓴᔮ, ᒥᑭᒡᓕᑎᓚᐅᖏᓐᓇᕕᑦ, ᑕᒪᒃᑯᓂᖓᓕᒫᖅ ᖃᐅᔨᒪᒐᓗᐊᕐᓗᑎᑦ. 23ᐃᓕᖕᓂᒃ ᐊᖏᔪᕈᕐᑎᓯᒪᒐᕕᑦ ᐊᑭᕋᕐᑐᓕᕐᓗᑎᓪᓗ ᕿᓚᖕᒥᐅᑦ ᐊᑕᓂᖓᓄᑦ; ᐃᒡᓗᖓᑕ ᐱᖁᑎᖏᓐᓂᒃ ᐃᒥᐅᑎᓂᒃ ᐃᓕᖕᓄᑦ ᕾᑕᐅᖁᔨᓚᐅᕋᕕᑦ, ᐊᖓᔪᖅᑳᖁᑎᑎᑦ ᓄᓕᐊᑎᓪᓗ ᐊᕐᓇᖁᑎᑎᓪᓗ ᐃᒥᖃᑎᒋᓪᓗᒋᑦ ᕔᓂᒥᒃ ᑖᒃᑯᐊ ᐊᑐᕐᓗᒋᑦ; ᓂᕐᑐᐃᓚᐅᕋᕕᓪᓗ ᒎᑎᖕᓂᒃ ᒎᓘᓂᒃ ᓯᐅᓪᕕᕆᓂᒡᓗ, ᑲᓐᓄᔭᓂᒡᓗ, ᓴᕕᕋᔭᖕᓂᒡᓗ, ᕿᔪᖕᓂᒡᓗ, ᐅᔭᕋᖕᓂᒡᓗ, ᑕᑯᔪᓐᓇᖏᑦᑐᓂᒃ ᑐᓵᔪᓐᓇᖏᑦᑐᓂᒡᓗ ᑐᑭᓯᐊᖏᑦᑐᓂᒃ, ᐅᐱᒋᓚᐅᖏᓐᓇᕕᐅᒃ ᒎᑎ ᐃᕝᕕᑦ ᐃᓅᓯᖓᓂᒃ ᑎᒍᒥᐊᕐᑐᖅ ᖃᓄᐃᓕᐅᕐᓂᓕᒫᓂᒃ. 24ᑍᒤᒻᒪᑦ ᐊᒡᒐᑦ ᑖᑦᓱᒪᓐᖓᑦ ᐱᓯᒪᔪᑦ ᑎᑎᕋᓚᐅᕐᐳᑦ ᑖᒃᑯᓂᖓ ᑎᑎᕋᕐᓯᒪᔪᓂᒃ.
25“ᐃᒫᒃ ᑎᑎᕋᕐᓯᒪᕗᑦ: ᒥᓂ, ᒥᓂ, ᑎᑭᓪ, ᐹᕐᓯᓐ. 26ᐃᒫᒃ ᐅᖃᐅᓯᖏᑦ ᑐᑭᖃᕐᐳᑦ, ᒥᓂ: ᒎᑎᐅᑉ ᐅᓪᓗᐃᑦ ᐊᖓᔪᖅᑳᕐᔪᐊᖑᓂᕐᑎᑦ ᓈᓴᕐᓯᒪᕔᑦ ᐃᓱᓕᑎᓯᒪᓪᓗᒋᓪᓗ. 27ᑎᑭᓪ: ᐅᖁᒤᓐᓂᕐᓯᐅᕈᑎᓄᑦ ᐆᒃᑐᕐᑕᐅᓯᒪᕗᑎᑦ ᐅᕿᓗᐊᕐᓗᑎᓪᓗ, ᖃᐅᔨᔭᐅᓪᓗᑎᓪᓗ ᐱᔪᒪᓗᐊᕐᓂᕐᓂᒃ. 28ᐹᕐᓯᓐ: ᐊᖓᔪᖅᑲᐅᕖᑦ ᐊᕕᒃᑕᐅᓯᒪᕗᖅ, ᑐᓂᔭᐅᓯᒪᓪᓗᓂᓗ ᒥᑎᐊᒥᐅᓄᑦ ᐴᕐᓯᐊᒥᐅᓄᓪᓗ.”
29ᐱᐅᓪᓴᔮᓪᓕ ᐱᖁᔨᓂᖓᓄᑦ, ᑖᓂᐊᓕ ᐊᓐᓄᕌᕐᑎᑉᐹ ᐊᐅᐸᓪᓚᕆᒃᑐᓂᒃ, ᐅᔭᒥᓕᕐᓗᒍᓗ ᒎᓗᒥᒃ, ᐊᖓᔪᖅᑳᓐᖑᕐᑎᓪᓗᒍᓗ ᐊᖓᔪᖅᑳᕐᔪᐊᑉ ᐊᖓᔪᖅᑲᐅᓂᖓᑕ ᑐᖏᓕᖏᑕ ᐱᖓᔪᖓᓐᓂᒃ. 30ᐅᓐᓄᐊᒥᓗ ᑍᑦᓱᒪᓂ ᑲᐅᓪᑎᐊᒥᐅᑦ ᐊᖓᔪᖅᑳᕐᔪᐊᖓᑦ ᐱᐅᓪᓴᔮ, ᑐᖁᑕᐅᓚᐅᕐᐳᖅ. 31ᑍᕉᓯᓗ ᒦᑎᒥᐅᑕᐅᑉ ᐊᖓᔪᖅᑳᕐᔪᐊᖑᕐᑎᑕᐅᓚᐅᕐᐳᖅ, ᐊᕐᕌᒍᖃᕐᓗᓂ 62ᓂᒃ.
Currently Selected:
ᑖᓂᐊᓕᐅᑉ ᐊᒡᓚᖏᑦ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
