ᑖᓂᐊᓕᐅᑉ ᐊᒡᓚᖏᑦ 11
11
ᐄᑦᔨᑉᑎᒥ ᐊᖓᔪᖅᑲᐅᕕᒃ ᓯᕆᐊᒥᓗ ᐊᖓᔪᖅᑲᐅᕕᒃ
1ᐊᖓᔪᖅᑳᕐᔪᐊᑉ ᑍᕉᓯᐅᑉ ᒦᑎᒥᐅᑕᐅᑉ ᐊᖓᔪᖅᑲᐅᓂᖓᑕ ᐊᕐᕌᒍᑦ ᓯᕗᓪᓕᕐᐹᖓᓂ, ᒪᑭᒋᐊᓚᐅᕐᐳᖓ ᐃᑲᔪᕐᓯᕐᓗᒍᓗ ᓴᐳᑎᔪᒪᓪᓗᒍ. 2“ᒫᓐᓇᓕ ᐅᖃᐅᓯᕆᓂᐊᕐᑕᕋ ᐃᓕᖕᓄᑦ ᓱᓕᑦᓯᐊᕐᐳᖅ: ᐊᖓᔪᖅᑳᕐᔪᐊᑦ ᓱᓕ ᐱᖓᓱᑦ ᓴᖅᑭᑦᓱᒫᕐᐳᑦ ᐴᕐᓯᐊᒥ, ᓯᑕᒪᖓᓪᓗ ᓴᖅᑭᑦᓱᒫᕆᕗᖅ, ᑖᓐᓇ ᐊᔪᕐᓴᖏᓐᓂᕐᐹᖑᔪᒫᕐᐳᖅ ᐊᓯᓕᒫᒥᓂᑦ, ᐱᔪᓐᓇᕐᓂᖃᓕᕈᓂ ᐊᔪᕐᓴᖏᓐᓂᕐᒥᓄᑦ, ᑲᑐᑦᔨᓕᕐᑎᑦᓯᔪᒫᕐᐳᖅ, ᐊᑭᕋᕐᑐᓕᕐᓗᑎᒃ ᒍᕇᓯᐅᑉ ᐊᖓᔪᖅᑲᐅᕕᖓᓄᑦ.
3“ᑕᕝᕙ ᐊᖓᔪᖅᑳᕐᔪᐊᖅ ᐱᔪᓐᓇᕐᓂᓕᒃ ᓴᖅᑭᑦᓱᒫᕆᕗᖅ, ᐊᐅᓚᑦᓯᔪᒫᕐᐳᕐᓗ ᐱᔪᓐᓇᕐᓂᕐᔪᐊᖃᕐᓗᓂ, ᖃᓄᐃᓕᐅᕈᒪᑦᔪᑎᓕᒫᒥᓂᒃ ᐱᓂᐊᕐᓂᖃᕐᓗᓂ. 4ᓴᖅᑭᓯᒪᓕᕐᐸᑦ, ᐊᖓᔪᖅᑲᐅᕕᖓ ᐊᒡᒍᕈᒫᕐᐳᖅ, ᑐᓂᐅᖅᑲᐅᑕᐅᓗᓂᓗ ᕿᓚᐅᑉ ᐊᓄᕆᖏᓐᓄᑦ ᓯᑕᒪᓄᑦ; ᑭᖑᕚᖏᓐᓂᑦ ᑭᖑᕝᕕᕐᑕᐅᔪᒫᓐᖏᓚᖅ, ᐱᔪᓐᓇᕐᓂᕆᓚᐅᕐᑕᒥᑐᓪᓗ ᐱᔪᓐᓇᕐᑎᒋᔪᓐᓃᕐᓗᓂ, ᐊᖓᔪᖅᑲᐅᕕᖓ ᐊᒫᖏᓐᓂᑦ ᓄᓱᒃᑕᐅᔪᒫᕐᒪᑦ, ᑐᓂᔭᐅᓗᓂᓗ ᐊᓯᖏᓐᓄᑦ.
5“ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓂᑦ ᐱᔪᖅ ᓴᓐᖏᔪᕐᔪᐊᖑᓕᕈᒫᕐᒪᑦ, ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖏᑦ ᑖᑦᓱᒪᓐᖓᑦ ᐊᔪᖏᓐᓂᕐᓴᒻᒪᕆᐅᓕᕈᒫᕐᐳᑦ, ᐊᖓᔪᖅᑲᐅᕕᓂᓗ ᐊᐅᓚᑎᑦᓱᒫᕐᐹ ᐱᔪᓐᓇᕐᓂᕐᔪᐊᖃᕐᓗᓂ. 6ᐊᕐᕌᒍᐃᑦ ᑖᒃᑯᐊ ᐊᓂᒍᕐᐸᑕ, ᑖᒃᑯᐊ ᑲᑎᓗᑎᒃ ᑕᐱᕇᓕᕈᒫᕐᐳᑦ; ᐊᖓᔪᖅᑳᕐᔪᐊᑉ ᓯᕿᓂᐅᑉ ᓇᓛᓂᑦ ᐱᓯᒪᔫᑉ ᐸᓂᐊ ᐂᔪᒫᕐᐳᖅ ᐊᖓᔪᖅᑳᕐᔪᐊᒧᑦ ᐅᓐᓄᐊᑉ ᓇᓛᓂ ᐊᖓᔪᖅᑲᐅᔪᒧᑦ, ᑕᐱᕇᓕᕐᑎᑦᓯᓗᓂᓗ, ᑭᓯᐊᓂᓕ ᐱᔪᓐᓇᕐᓂᓂ ᐱᓯᒤᓐᓇᕈᒫᓐᖏᓛ, ᐊᖓᔪᖅᑳᕐᔪᐊᓪᓗ ᑖᑦᓱᒪ ᐱᔪᓐᓇᕐᓂᓂ ᐱᓯᒤᓐᓇᕈᒫᖏᓐᓂᕚ, ᐅᓪᓗᓂ ᑍᒃᑯᓇᓂ ᐊᖓᔪᖅᑳᔪᐊᑉ ᓯᕿᓂᐅᑉ ᓇᓛᓃᑦᑑᑉ ᐸᓂᐊ ᕿᑐᕐᖓᖓᓗ ᐊᑖᑕᖓᓗ ᐃᑲᔪᕐᑐᕐᑎᖓᓗ ᑖᒃᑯᐊ ᑐᖁᑕᐅᔪᒫᕐᐳᑦ. 7ᐊᕐᓇᐅᑉ ᓇᖕᒥᓂᖅ ᐃᓚᖏᓐᓂᑦ ᒪᑭᑦᑐᖃᕈᒫᕐᐳᖅ ᑭᖑᕝᕕᕐᑕᐅᓗᓂᓗ, ᑖᑦᓱᒪ ᐊᖓᔪᖅᑳᕐᔪᐊᖅ ᐅᓐᓄᐊᑉ ᓇᓛᓂ ᓄᓇᖃᕐᑐᖅ ᐅᓇᑕᕆᐊᕐᑐᕈᒫᕐᐹ, ᐃᒡᓗᒐᓴᒡᔪᐊᖏᑕᓗ ᐊᕙᓗᕐᔪᐊᖓᓄᑦ ᐃᑎᕐᓗᓂ; ᐅᓇᑕᕈᒫᕐᐰᑦ ᓵᓚᒋᓗᒋᓪᓗ. 8ᑖᑦᓱᒪ ᑎᒍᔪᒫᕐᐰᑦ ᒎᑎᓐᖑᐊᖏᑦ, ᐃᓄᓐᖑᐊᑦ ᓴᕕᕋᔧᑦ ᐱᖁᑎᖏᓪᓗ ᐊᑭᑐᔪᑦ ᓯᐅᓪᕕᕇᑦ, ᒎᓗᐃᓪᓗ ᐊᐅᓪᓚᕈᑎᓗᒋᑦ ᐄᑦᔨᑉᑎᒧᑦ, ᐊᕐᕌᒍᓂᒡᓗ ᐅᓄᕐᑐᓂᒃ ᐊᖓᔪᖅᑳᕐᔪᐊᖅ ᐅᓐᓄᐊᑉ ᓇᓛᓃᑦᑐᖅ ᑲᒪᒋᓐᖏᑬᓐᓇᕈᒫᕐᐹ. 9ᐊᖓᔪᖅᑳᕐᔪᐊᖅ ᐅᓐᓄᐊᑉ ᓇᓛᓂᑦ ᐱᔪᖅ, ᐅᓇᑕᕆᐊᕈᒫᕐᐳᖅ ᐊᖓᔪᖅᑳᕐᔪᐊᒧᑦ ᓯᕿᓂᐅᑉ ᓇᓛᓂᑦᑐᒧᑦ, ᐅᑎᕈᒫᕆᕗᕐᓕ ᓄᓇᒥᓄᑦ.
10“ᑖᑦᓱᒪᓕ ᐃᕐᓂᖏᑦ ᐸᕐᓇᓕᕈᒫᕆᕗᑦ ᐅᓇᑕᕐᑐᒃᓴᓂᒡᓗ ᐅᓄᕐᑐᕐᔪᐊᓂᒃ ᑲᑎᑦᓯᓗᑎᒃ, ᐃᖏᕐᕋᔪᒫᕐᐳᑦ ᐃᒪᕐᑐᑦ ᐊᑭᕋᕐᑐᕐᑕᐅᔪᓐᓇᖏᓪᓗᓂ ᐅᓕᒃᓯᕙᓪᓕᐊᔪᑎᑐᑦ, ᐅᓇᑕᕈᒫᕐᐳᓪᓗ ᓄᓇᓕᒃᔪᐊᖏᑦ ᑎᑭᐅᒪᓗᒋᑦ. 11ᑕᕝᕙ ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓃᑦᑐᖅ ᓄᓇᒥᓂᑦ ᐊᓂᔪᒫᕐᐳᖅ ᓂᓐᖓᐅᒪᓗᓂ, ᐅᓇᑕᓕᕐᓗᓂᓗ ᐊᖓᔪᖅᑳᕐᔪᐊᒧᑦ ᐅᓐᓄᐊᑉ ᓇᓛᓂᑦ ᐱᓯᒪᔪᒧᑦ, ᐅᓇᑕᕐᑐᒃᓴᕐᔪᐊᖁᑎᖃᕐᑐᒧᑦ, ᑭᓯᐊᓂᓕ ᓵᓚᒋᔪᒫᕐᐹ. 12ᐅᓇᑕᕐᑐᒃᓴᕐᔪᐊᓪᓕ ᐊᐅᓪᓚᕐᑎᑕᐅᒃᐸᑕ, ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓃᑦᑐᖅ ᐱᐅᔪᕆᓕᕈᒫᕐᐳᖅ ᑐᖁᕅᓗᓂᓗ ᑕᐅᓴᓐᑎᓂᒃ ᐅᓄᕐᑐᓂᒃ, ᓵᓚᖃᕐᓂᖓᓕ ᑲᔪᓯᔪᒫᓐᖏᓚᖅ.
13“ᐊᖓᔪᖅᑳᕐᔪᐊᖅ ᐅᓐᓄᐊᑉ ᓇᓛᓂᑦ ᐱᓯᒪᔪᖅ, ᐅᓇᑕᕐᑐᒃᓴᓂᒃ ᐅᓄᕐᑐᕐᔪᐊᓂᒃ ᑲᑎᑎᑦᓯᒃᑲᓐᓂᕈᒫᕐᒪᑦ, ᓯᕗᓪᓕᕐᒥᑦ ᐅᓄᕐᓂᕐᓴᓂᒃ; ᐊᕐᕌᒍᑦ ᖃᑦᓯᑲᓪᓔᑦ ᐊᓂᒍᕐᐸᑕ, ᓱᕐᔪᓕᕈᒫᕆᕗᖅ#11:13 ᓱᕐᔪᓕᕈᒫᕆᕗᖅ ᐅᕝᕙᓗ ᐅᓇᑕᕆᐊᓕᕈᒫᕆᕗᖅ ᐅᓇᑕᕐᑐᒃᓴᕐᔪᐊᖁᑎᖃᕐᓗᓂ ᐅᓇᑕᐅᑎᑦᓯᐊᕆᒃᑐᓂᒃ. 14ᑍᑦᓱᒪᓂ ᐅᓄᕐᑐᑦ ᐊᑭᕋᕐᑐᕋᓱᐊᖃᑦᑕᕈᒫᕐᒪᑕ ᐊᖓᔪᖅᑳᕐᔪᐊᒥᒃ ᓯᕿᓂᐅᑉ ᓇᓛᓃᑦᑐᒥᒃ, ᐱᕋᔧᓪᓗ ᐃᕝᕕᑦ ᐃᓅᖃᑎᖕᓂᑦ ᐱᓯᒪᔪᑦ ᑕᑯᑎᑕᐅᓂᕐᒥᒃ ᓇᓪᓕᐅᑎᑎᑦᓯᓇᓱᐊᕈᒫᕆᕗᑦ, ᓵᓚᖃᕐᓂᐊᓐᖏᓚᓪᓕ. 15ᐊᖓᔪᖅᑳᕐᔪᐊᖅ ᑕᕝᕙ ᐅᓐᓄᐊᑉ ᓇᓛᓂᑦ ᐱᔪᖅ ᑎᑭᑦᓱᒫᕆᕗᖅ, ᓯᕿᓂᐅᑉ ᓇᓛᓃᑦᑐᒧᑦ, ᐃᒡᓗᒐᓴᒡᔪᐊᑦ ᐊᕙᓗᓗᒋᑦ ᐅᓇᑕᕐᑐᒃᓴᖁᑎᒥᓂᒃ, ᐃᑎᕈᑎᒃᓴᒥᖕᓂᒡᓗ ᐊᕙᓗᕐᔪᐊᓄᑦ ᐋᖅᑭᒃᓱᐃᓗᑎᒃ, ᐃᒡᓗᒐᓴᒡᔪᐊᑦ ᓵᓚᐅᔪᒫᕐᐳᑦ, ᓯᕿᓂᐅᑉ ᓇᓛᓃᑦᑐᑦ ᐊᑭᒪᔪᓐᓁᓪᓕᔪᒫᕐᐳᑦ ᐱᔪᓐᓇᕐᓂᖃᕈᓐᓁᕐᓗᑎᒃ; ᐅᓇᑕᕐᑐᒃᓴᖁᑎᖏᑦ ᐊᔪᖏᓐᓂᕐᐹᑦ ᓄᑭᖃᕈᓐᓁᕈᒫᕐᐳᑦ ᐊᒡᓛᑦ. 16ᓵᓚᖃᕐᑐᖅ ᖃᓄᐃᓕᐅᕈᒪᔭᒥᓂᒃ ᐃᓱᒪᕐᓱᑦᓯᐊᕈᒫᕐᐳᖅ; ᑭᐊᓘᓐᓃᑦ ᐊᑭᒪᔪᓐᓇᕈᒫᓐᖏᓛ, ᐃᓂᑖᕈᒫᕐᓗᓂᓗ ᓄᓇᒥ ᑕᑯᒥᓇᕐᑐᒥᒃ ᐊᑎᖃᕐᑐᒥ, ᐱᔪᓐᓇᕐᓂᖃᕐᓗᓂᓗ ᑖᒃᑯᐊ ᐃᒡᓗᒐᓮᑦ ᓯᖁᒥᑦᓱᓐᓇᕐᓗᒋᑦ ᐱᔪᒪᒍᓂ.
17“ᐊᖓᔪᖅᑲᐅᕕᓕᒫᓂ ᐱᔪᓐᓇᕐᓂᕐᔪᐊᕐᑖᖁᒧᑦ, ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓂᒥᐅᑕᖅ ᑕᐱᕆᓕᕈᒫᕐᐹ; ᑐᓂᓯᕕᒋᓗᒍᓗ ᐸᓂᖕᒥᓂᒃ, ᐊᖓᔪᖅᑲᐅᕕᖓ ᓄᑭᖃᕈᓐᓁᖅᑯᓪᓗᒍ, ᐃᓱᒪᒋᔭᖓ ᑲᔪᓯᔪᒫᓐᖏᓚᖅ, ᐱᕙᓪᓕᕈᑎᒋᓇᒍᓘᓐᓃᑦ. 18ᐃᒫᐅᑉ ᓯᓈᓃᑦᑐᓄᑦ ᓄᓇᓕᖕᓄᑦ ᓵᓐᖓᓕᕈᒫᕆᕗᖅ, ᐅᓄᕐᑐᓪᓗ ᐃᒪᐅᑉ ᓯᓈᓃᑦᑐᑦ ᓄᓇᓖᑦ ᐱᑖᕆᔪᒫᕐᐰᑦ, ᐊᖓᔪᖅᑳᖁᑎᖓᑕ ᕿᓂᕐᓂᖓ ᓄᓇᓖᑦ ᐊᓯᖏᓐᓄᑦ ᓄᖅᑲᕐᑎᑦᓱᒫᕐᐹ, ᐃᒻᒥᓄᓪᓗ ᓵᓐᖓᑎᓕᕐᓗᒍ. 19ᑕᒪᑐᒪ ᑭᖑᓂᖓᒍᑦ, ᓄᓇᒥᓄᑦ ᐃᒡᓗᒐᓴᒡᔪᐊᖁᑎᒥᓄᑦ ᐅᑎᓕᕈᒫᕐᐳᖅ, ᐊᖅᑯᑎᒥᓂᓕ ᐅᕐᕈᔪᒫᕐᐳᖅ, ᑕᑯᔭᐅᒃᑲᓐᓂᕈᓐᓁᕐᓗᓂᓗ.
20“ᑭᖑᕝᕕᕐᑎᖓ ᑎᓕᓯᔪᒫᕐᐳᖅ ᐃᓄᐃᑦ ᑖᒃᓰᔭᕐᑎᓪᓗᒋᑦ, ᐊᖓᔪᖅᑲᐅᕕᖓᑕ ᑕᑯᒥᓇᕐᓂᐊᓗᐊᓄᑦ ᐊᑐᕐᑕᐅᓂᐊᕐᑐᓂᒃ, ᐊᑯᓂᐅᖏᑦᑐᕐᓕ ᑖᓐᓇ ᑐᖁᑕᐅᔪᒫᕐᐳᖅ, ᓂᓐᖓᐅᒪᓂᒃᑰᖏᑦᑐᖅ ᐅᓇᑕᕐᓂᒃᑰᖏᑦᑐᕐᓘᓐᓃᑦ.”
ᐱᐅᖏᑦᑐᐊᓗᒃ ᐊᖓᔪᖅᑳᕐᔪᐊᖅ
21“ᑭᖑᕝᕕᕐᑕᐅᔪᒫᕐᐳᖅ ᐱᐅᖏᑦᑐᐊᓗᖕᒧᑦ, ᐊᖓᔪᖅᑳᕐᔪᐊᑎᑐᑦ ᐅᐱᒋᔭᐅᖏᑦᑐᒧᑦ, ᐊᖓᔪᖅᑲᐅᕕᒃ ᐅᓇᑕᕆᐊᕈᒫᕐᐹ, ᐃᓄᖏᑦ ᓵᓚᐅᓂᐊᕐᓂᕐᒥᒃ ᐃᓱᒪᖏᑦᓯᐊᕐᑎᓪᓗᒋᑦ, ᐅᐃᕕᕐᕆᒃᓯᓂᕐᒥᓄᑦ ᐊᖓᔪᖅᑲᐅᕕᒃ ᑎᒍᔪᒫᕐᐹ. 22ᐅᓇᑕᕐᑐᒃᓴᒐᓴᒡᔪᐊᑦ ᓴᓂᕐᑕᐅᔪᑎᑐᑦ ᓵᓚᒋᔪᒫᕐᐰᑦ; ᐊᖓᔪᖅᑳᕐᔪᐊᒃᓴᕐᓗ ᐊᖏᖃᑎᒌᒍᑕᐅᓯᒪᔪᖅ ᑐᖁᓪᓗᒍ. 23ᐃᓅᖃᑎᒌᒡᔪᐊᓂᒃ ᐊᓯᖏᓐᓂᒃ ᐊᖏᖃᑎᒌᒍᑎᖃᖃᑦᑕᕈᒫᕐᐳᖅ, ᐅᐃᕕᕐᕆᒃᓯᓂᕐᒥᒍᑦ, ᓄᓇᓕᖁᑎᖏᑦ ᐃᓄᑭᑦᑑᒐᓗᐊᕐᓗᑎᒃ ᐱᔪᓐᓇᕐᓂᕐᔪᐊᖃᓕᕈᒫᕐᐳᑦ. 24ᓄᓇᐅᑉ ᐊᕕᒃᑐᕐᓯᒪᓂᖏᓐᓂ ᓄᓇᖃᕐᑐᑦ ᐊᔪᕐᓴᖏᓐᓂᕐᐹᑦ ᓵᓚᐅᓂᐊᕋᓱᒋᓐᖏᑎᓪᓗᒋᑦ, ᐅᓇᑕᕆᐊᖃᑦᑕᕈᒫᕐᐰᑦ, ᓵᓚᖃᕈᒫᕐᓗᓂᓗ, ᓯᕗᓕᖏᑕ ᓯᕗᓕᑐᖃᖏᑕᓘᓐᓃᑦ ᐱᓚᐅᕐᓯᒪᓐᖏᑕᖏᓐᓂᒃ ᓵᓚᖃᕈᒫᕐᐳᖅ, ᓵᓚᒃᓴᕈᑎᓂ ᐱᖁᑏᑦ, ᑮᓇᐅᔧᓪᓗ, ᐊᔪᕐᓴᖏᑦᔪᑎᒃᓮᓪᓗ ᓱᓇᑐᐃᓐᓁᑦ ᑐᓂᐅᖅᑲᕐᓗᒋᑦ ᒪᓕᒃᑎᒥᓄᑦ, ᐃᓱᒪᓕᐅᖃᑦᑕᕈᒫᕐᓗᓂᓗ ᓄᓇᓖᑦ ᐊᕙᓗᕐᔪᐊᖏᓐᓂᒃ ᓵᓚᖃᕈᑎᒃᓴᒥᓂᒃ ᐅᓇᑕᕐᓂᒃᑯᑦ, ᑭᓯᐊᓂ ᐱᕕᒃᓴᑭᑦᑑᔪᒫᕐᐳᖅ.
25“ᐅᓇᑕᕐᑐᒃᓴᖁᑎᖏᑦ ᐅᓄᕐᑐᐊᓘᓗᑎᒃ ᐱᔪᓐᓇᕐᓂᖃᕐᔪᐊᓕᕈᒫᕐᐳᖅ, ᓯᕘᕋᔪᓐᓃᕐᓗᓂᓗ ᐊᑭᕋᕐᑐᕆᐊᒃᓴᖅ ᓯᕿᓂᐅᑉ ᓇᓛᓂ ᐊᖓᔪᖅᑳᕐᔪᐊᒧᑦ, ᓯᕿᓂᐅᑉ ᓇᓛᓃᑦᑐᖅ ᐊᖓᔪᖅᑳᕐᔪᐊᖅ ᐅᓇᑕᕈᒫᕐᐳᖅ ᐅᓇᑕᕐᑐᒃᓴᒐᓴᖕᓂᒃ ᐱᔪᓐᓇᕐᑐᕐᔪᐊᓂᒃ, ᓇᖏᕈᓐᓇᕈᒫᓐᖏᓚᕐᓕ ᓵᓚᐅᓂᒃᓴᒧᑦ ᐋᖅᑭᒃᓲᑦᔭᐅᓯᒪᔪᒫᕋᒥ. 26ᐊᖓᔪᖅᑳᕐᔪᐊᑉ ᓂᕿᒃᓴᖏᓐᓂᒃ ᓂᕆᖃᑕᐅᕙᒃᑐᓂᑦ, ᑐᖁᑕᐅᔪᒫᕐᒪᑦ; ᐅᓇᑕᕐᑐᒃᓴᖁᑎᖏᓪᓗ ᐊᖑᐊᕐᑕᐅᔪᑎᑐᑦ ᓵᓚᐅᔪᒫᕐᐳᑦ, ᐅᓄᕐᑐᑦ ᑐᖁᑕᐅᓗᑎᒃ. 27ᑖᒃᑯᐊᒃ ᐊᖓᔪᖅᑳᕐᔪᐊᒃ ᒪᕐᕉᒃ, ᑕᒪᕐᒥᒃ ᐱᐅᖏᑦᑐᒥᒃ ᐆᒻᒪᑎᖃᕐᓗᑎᒃ, ᓂᕆᕕᖕᒥ ᐃᒃᓯᕙᖃᑎᒌᒍᒫᕐᐴᒃ ᓴᒡᓗᓂᕐᒥᒡᓗ ᐃᒻᒥᖕᓄᑦ ᓂᓪᓕᐊᖃᑎᒌᒡᓗᑎᒃ, ᓵᓚᒌᖃᑦᑕᐅᑎᔪᒫᓐᖏᓚᒃ ᐱᕕᒃᓴᖓᒃ ᓈᒻᒪᒃᓯᖏᒻᒪᑦ ᓱᓕ. 28ᐅᓐᓄᐊᑉ ᓇᓛᓂ ᐊᖓᔪᖅᑳᕐᔪᐊᖅ ᓄᓇᒥᓄᑦ ᐅᑎᕈᒫᕐᐳᖅ ᐊᔪᕐᓴᖏᑦᑐᕐᔪᐊᖑᓗᓂ, ᒎᑎᐅᓪᓗ ᐊᖏᖃᑎᒌᒍᑎᒋᓯᒪᓪᓗᒋᑦ ᐃᓄᖁᑎᖏᑦ ᐅᓇᖕᒥᔪᒫᕐᐰᑦ ᐆᒻᒪᑎᒥᓂ, ᐃᓱᒪᕐᓱᑦᓯᐊᕐᓗᓂ ᓱᒃᑯᔨᐊᖃᕈᒫᕐᐳᖅ, ᓄᓇᒥᓄᓪᓗ ᐅᑎᕈᒫᕐᐳᖅ.
29“ᐱᕕᒃᓴᖓ ᓈᒻᒪᒃᓯᒃᐸᑦ, ᓯᕿᓂᐅᑉ ᓇᓛᓃᑦᑐᓄᑦ ᐅᓇᑕᕆᐊᕈᒫᕆᕗᖅ, ᑭᓯᐊᓂᓕ ᓯᕗᓪᓕᕐᑐᑦ ᓵᓚᖃᕈᓯᕆᓚᐅᕐᑕᒥᑐᑦ ᑍᒤᑦᓱᓐᓃᕈᒫᕐᐳᖅ. 30ᐅᒥᐊᕐᔪᐊᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᔪᑦ ᐃᒪᐅᑉ ᓯᓈᓃᑦᑐᑦ ᑭᑎᒻᒥᑦ ᐊᑭᕋᕐᑐᕈᒫᕐᐳᑦ ᑖᑦᓱᒧᖓ, ᑕᕝᕙ ᑲᑉᐱᐊᓱᒻᒪᕆᓕᕈᒫᕐᐳᖅ, ᐅᑎᓕᕈᒫᕐᐳᕐᓗ, ᓂᓐᖓᐅᒪᓂᓂᓗ ᓵᑎᑦᓱᒫᕐᐹ ᐃᑦᔪᕐᓁᑦᑐᓄᑦ ᐊᖏᖃᑎᒌᒍᑕᐅᓯᒪᔪᓄᑦ. ᑭᖑᓂᖓᒍᑦ ᐅᑎᕈᒫᕐᐳᖅ ᐱᑦᓯᐊᕐᕕᒋᓕᕐᓗᒋᓪᓗ ᐃᑦᔪᕐᓁᑦᑐᒥᒃ ᐊᖏᖃᑎᒌᒍᑕᐅᓯᒪᔪᒥᒃ ᕿᒤᓯᒪᔪᑦ ᓈᓚᖔᓕᕐᓗᒋᑦ. 31#ᑖᓂᐊᓕ 9:27; 12:11; ᒫᑎᐅᓯ 24:15; ᒫᑯᓯ 13:14.ᐅᓇᑕᕐᑐᒃᓴᕐᔪᐊᖁᑎᖏᑦ ᓱᕐᔪᒍᒫᕐᐳᑦ#11:31 ᓱᕐᔪᒍᒫᕐᐳᑦ ᐅᕝᕙᓗ ᐅᓇᑕᕆᐊᕈᒫᕐᐳᖅ ᑐᒃᓯᐊᕐᕕᒡᔪᐊᑉ ᐊᕙᓗᕐᔪᐊᖓ ᐃᑦᔪᕐᓇᕐᓯᑎᓪᓗᒍ, ᓄᖅᑲᕐᑎᑦᓯᓗᑎᒡᓗ ᐆᒪᔪᓂᒃ ᖃᐅᑕᒫᑦ ᑐᓂᕐᕈᓯᖃᑦᑕᕐᓂᕐᒥᒃ; ᑕᕝᕙ ᐃᓕᓯᔪᒫᕐᐳᑦ ᐃᑦᔪᕐᓇᕐᑐᕐᔪᐊᒥᒃ ᑲᑉᐱᓇᕐᑐᕐᔪᐊᒥᒃ. 32ᓯᓔᕐᕆᒃᓯᓂᕐᒥᒍᑦ ᓱᕈᕐᑎᑦᓯᔪᒫᕐᐳᖅ ᒎᑎᐅᑉ ᐊᖏᖃᑎᒌᒍᑎᖓᓂᒃ ᓈᓚᖏᑦᑐᓂᒃ, ᒎᑎᒥᒡᓕ ᖃᐅᔨᒪᔪᑦ ᑲᔪᓯᓪᓚᕆᒃᑐᒥᒃ ᐊᑭᕋᕐᑐᕈᒫᕐᐳᑦ ᑖᑦᓱᒥᖓ. 33ᑐᑭᓯᒪᑦᓯᐊᕐᑐᑦ ᐃᓕᓐᓂᐊᕐᑎᑦᓯᔪᒫᕐᐳᑦ ᑖᑦᓱᒪ ᐱᐅᓯᖓᓂᒃ, ᐅᓪᓗᓂᒃ ᐅᓄᕐᑐᓂᒃ ᓴᕕᒡᔪᐊᒧᑦ ᐃᓚᖏᑦ ᑐᖁᑕᐅᒐᓗᐊᕐᑎᓪᓗᒋᑦ, ᐃᑭᑕᐅᓗᑎᒡᓘᓐᓃᑦ, ᑎᒍᔭᐅᓗᑎᒡᓘᓐᓃᑦ, ᐱᖁᑍᕈᑦᔭᐅᓗᑎᒡᓘᓐᓃᑦ. 34ᑐᖁᑕᐅᔭᕌᖓᑕ, ᐃᑲᔪᕐᑎᒃᓴᖃᕈᒫᓐᖏᓚᑦ, ᐅᓄᕐᑐᐊᓗᐃᑦ ᓱᓕᓪᓚᕆᖏᑦᑐᑦ ᐅᐃᕕᕐᕆᔭᐅᓂᕐᒧᑦ ᓵᓚᐅᔪᒫᕐᐳᑦ. 35ᓯᓚᑐᔪᑦ ᐃᓚᖏᑦ ᑐᖁᑕᐅᔪᒫᕐᐳᑦ, ᑲᔪᓯᔪᑦ ᓴᓗᒻᒪᕐᓴᕐᑕᐅᑦᓯᐊᖁᓪᓗᒋᑦ, ᑕᕐᓴᖃᖏᑦᑐᑐᑦ ᐃᓱᐊᓄᑦ ᑎᑭᑦᓱᓐᓇᖁᓪᓗᒋᑦ, ᓂᕈᐊᕐᑕᐅᓯᒪᔪᖅ ᓇᓪᓕᐅᓐᓂᖅ ᑎᑭᑦᓱᒫᕐᒪᑦ.
36 #
2 ᑎᓴᓗᓁ 2:3,4;
ᑕᑯᑎ 13:5,6. “ᐊᖓᔪᖅᑳᕐᔪᐊᖅ ᐱᓂᐊᕐᓂᖃᕈᒫᕐᐳᖅ ᖃᓄᑐᐃᓐᓇ ᐱᔪᒪᔭᒥᓂᒃ, ᐃᒻᒥᓂᒃ ᐊᖏᔪᕈᕐᑎᑦᓱᒫᕐᒪᑦ ᓂᕐᑐᕐᑕᐅᔪᒪᓗᓂᓗ ᒎᑎᓐᖑᐊᓕᒫᓂᑦ ᐊᖏᓂᕐᓴᐅᔪᒪᓗᓂ; ᑐᓴᕐᑕᐅᓚᐅᕐᓯᒪᖏᑦᑐᓂᒃ ᓂᓪᓕᐊᔪᒫᕐᐳᖅ ᒎᑎᒋᔭᐅᔪᓕᒫᓂᑦ ᒎᑎᐅᓂᕐᐹᖑᔪᒧᑦ, ᐱᓇᓱᐊᕈᒪᔭᓕᒫᒥᓂᒃ ᐊᒡᕕᐊᕐᑕᐅᖏᓪᓗᓂ ᐃᓱᒪᕐᓱᕈᒫᕐᐳᖅ ᓇᓪᓕᐅᓐᓂᖅ ᒎᑎᐅᑉ ᓂᓐᖓᐅᒪᓂᖓ ᐃᓱᓕᖅᑳᕐᑎᓐᓇᒍ, ᐋᖅᑭᒃᑕᐅᓯᒪᔪᑦ ᑲᔪᓯᔭᕆᐊᖃᕐᒪᑕ. 37ᓯᕗᓕᕕᓂᕐᒥ ᒎᑎᖏᓐᓂᒃ ᑲᒪᔪᒫᓐᖏᓚᖅ ᐊᕐᓇᓂᒃ ᐃᒃᓕᒍᖕᓂᖃᕈᒫᓐᖏᓚᖅ, ᒎᑎᒥᒡᓘᓐᓂᑦ ᓇᓪᓕᐊᓐᓂᒃ ᒎᑎᖃᕈᒫᓐᖏᓚᖅ, ᐃᒻᒥᓂᒃ ᐊᖏᓂᕐᓴᐅᑎᑦᓱᒫᕐᒪᑦ ᑕᒪᒃᑯᓇᓐᖓᓕᒫᖅ. 38ᑕᒪᒃᑯᐊ ᐊᓯᖏᑎᒍᑦ ᐅᐱᒍᓱᒍᒫᕐᐳᖅ ᒎᑎᓐᖑᐊᒥᒃ ᐃᒡᓗᒐᓴᒡᔪᐊᑦ ᐊᕙᓗᕐᔪᐊᖏᓐᓂ ᓴᐳᑦᔨᔪᒥᒃ; ᒎᑎ ᓯᕗᓕᕕᓂᖏᑕᓘᓐᓃᑦ ᖃᐅᔨᒪᓐᖏᑕᖓᑦ, ᐅᐱᒋᔪᒫᕐᐹ ᑐᓂᓯᕕᒋᕙᒡᓗᒍ ᒎᓗᒥᒃ, ᓯᐅᓪᕕᕆᒥᒡᓗ, ᐅᔭᕋᖕᓂᒡᓗ ᐱᓐᓇᕐᓇᕐᑐᓂᒃ, ᐱᖁᑎᓂᒡᓗ ᐊᑭᑐᔪᓂᒃ. 39ᐅᓇᑕᕆᐊᖃᑦᑕᕈᒫᕐᐳᖅ ᐃᒡᓗᒐᓴᒡᔪᐊᓂᒃ ᓴᐳᓐᓂᐊᕈᑎᒥᖕᓂᒃ ᐊᕙᓗᕐᔪᐊᓕᖕᓂᒃ, ᐃᑲᔪᕐᑎᖃᕐᓗᓂ ᒎᑎᓐᖑᐊᒥᓂᒃ ᐱᒋᓚᐅᕐᓯᒪᓐᖏᑕᒥᖕᓂᒃ, ᐊᖏᔪᒥᒃ ᐅᐱᒋᔪᒪᕐᐰᑦ ᑖᑦᓱᒥᖓ ᑲᒪᑦᓯᐊᕐᑐᑦ ᐅᖃᐅᓯᖃᑦᓯᐊᕐᑐᓪᓗ ᑖᑦᓱᒥᖓ, ᑍᒤᑦᑐᑦ ᐊᖓᔪᖅᑳᓐᖑᕐᑎᑦᓱᒫᕐᐰᑦ ᐃᓄᖕᓄᑦ ᐅᓄᕐᑐᓄᑦ ᓄᓇ ᓂᐅᕐᕈᑎᒋᔪᒫᕐᐹ ᐱᕚᓪᓕᕈᑎᒃᓴᒥᓄᑦ.
40“ᑍᑦᓱᒪ ᐃᓱᐊᓂ ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓂᑦ ᐱᔪᖅ ᐅᓇᑕᖃᑎᒋᔪᒫᕐᐹ, ᐊᖓᔪᖅᑳᕐᔪᐊᓪᓗ ᐅᓐᓄᐊᑉ ᓇᓛᓂᑦ ᐱᔫᑉ ᓱᕐᔪᒍᒫᕆᕚ#11:40 ᓱᕐᔪᒍᒫᕆᕚ ᐅᕝᕙᓗ ᐅᓇᑕᕆᐊᓕᕈᒫᕆᕚ ᕿᒧᒃᓯᐅᑎᑦ ᐃᑭᒪᕝᕕᖕᒥᒃ ᐅᓂᐊᕐᑐᑦ ᐊᑐᕐᓗᒋᑦ, ᐅᓇᑕᕐᑐᒃᓴᒐᓴᒃᔪᐊᖃᕐᓗᓂ, ᐅᒥᐊᕐᔪᐊᖁᑎᖏᓪᓗ ᐅᓄᕐᑐᑦ ᐊᑐᕐᓗᒋᑦ, ᓄᓇᓕᒡᔪᐊᑦ ᐅᓄᕐᑐᑦ ᐅᓇᑕᕈᒫᕐᐰᑦ ᐃᒪᕐᑐᑦ ᖄᒥᑦᑐᑐᑦ. 41ᓄᓇ ᑕᑯᒥᓇᕐᑐᕐᔪᐊᖅ ᐅᓇᑕᕆᐊᕈᒫᕆᕚ ᐊᖏᔫᑎᕐᔪᐊᓂᒃ ᓄᓇᖃᕐᑐᑦ ᐅᓄᕐᑐᑦ ᓵᓚᒋᔪᒫᕐᐰᑦ, ᑭᓯᐊᓂ ᓄᓇᒥ ᐄᑐᒥ, ᒧᐊᐱᒥᓗ, ᐊᒧᓁᑎᒥᓗ ᐊᐅᓚᑦᓯᔩᑦ ᐊᓐᓇᒍᒫᕐᐳᑦ. 42ᐊᖓᔪᖅᑲᐅᓂᖓ ᑎᑭᑦᓱᒫᕐᐳᖅ ᓄᓇᖃᑎᒌᒃᔪᐊᓄᑦ ᐅᓄᕐᑐᓄᑦ; ᐄᑦᔨᑉᑎ ᐊᓐᓇᒍᒫᖏᓐᓂᕗᖅ. 43ᐊᖓᔪᖅᑳᕐᔪᐊᖅ ᑖᓐᓇ ᐊᐅᓚᑦᓯᓕᕈᒫᕐᐳᖅ ᒎᓗᓂᒃ ᓯᐅᓪᕕᕆᓂᒡᓗ ᐄᑦᔨᑉᑎᒥᐅᓪᓗ ᐊᔪᕐᓴᖏᑦᔪᑎᓕᒫᖏᓐᓂᒃ; ᓕᐱᐊᓐᒥᐅᓪᓗ ᐃᑎᐅᐱᐊᒥᐅᓪᓗ ᓵᓚᐅᔪᒫᕆᕗᑦ. 44ᑐᓴᕐᑕᒥᓂᒃ ᐅᖃᐅᓯᕐᓂᒃ ᓯᕿᓂᐅᑉ ᓂᐱᕕᐊᑕ ᓇᓛᓂᑦ ᐱᔪᓂᒃ, ᐅᓐᓄᐊᓪᓗ ᓇᓛᓂᑦ ᐱᔪᓂᒃ ᐃᓱᒪᔮᕈᑎᖃᕈᒫᕐᐳᖅ, ᓱᕐᔪᒍᒫᕐᓗᓂᓗ ᓂᓐᖓᐅᒪᓗᓂ ᓯᖁᒥᑦᓯᔪᒪᓗᓂ ᓱᓇᐅᔪᓐᓃᕐᑎᑦᓯᔪᒪᓪᓗᓂᓗ ᐅᓄᕐᑐᓂᒃ. 45ᐊᖓᔪᖅᑳᕐᔪᐊᕐᓯᐅᑎᓂᒃ ᑐᐱᕐᓯᒪᔪᒫᕐᐳᖅ ᐃᒪᐅᓪᓗ ᖃᖅᑲᐅᓪᓗ ᐃᑦᔪᕐᓁᑦᑑᑉ ᐊᑯᓐᓂᖓᓂ. ᑕᕝᕙᓂᓕ ᑐᖁᔪᒫᕐᐳᖅ ᑭᓇᒧᓪᓘᓐᓃᑦ ᐃᑲᔪᕐᑕᐅᔪᓐᓇᖏᓪᓗᓂ.”
Currently Selected:
ᑖᓂᐊᓕᐅᑉ ᐊᒡᓚᖏᑦ 11: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
