ᐂᒨᓯᐅᑉ ᐊᒡᓚᖏᑦ 5
5
ᖃᕿᐊᓕᖁᔨᓂᖅ
1“ᐅᖃᐅᓯᖅ ᐅᓇ ᓈᓚᒃᓯᐅᒃ ᐃᓕᑦᓯᓐᓄᑦ ᓵᓐᖓᓯᑦᔪᑎᒐ, ᐅᒡᒍᐊᓕᕆᑦᓯ, ᐃᓴᕆᐊᓕᒥᐅᑦ ᐃᓄᖏᑦ:
2ᐊᕐᓇᖅ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᖅ ᐃᓴᕆᐊᓕᒥᐅᖅ ᐅᕐᕈᕗᖅ;
ᒪᑭᒃᑲᓐᓂᕐᓂᐊᕈᓐᓁᕐᓗᓂ!
ᓇᓚᕗᖅ ᕿᒪᒃᑕᐅᓪᓗᓂ ᓄᓇᒥᓂ;
ᑭᓇᒥᒡᓘᓐᓃᑦ ᒪᑭᑎᑦᓯᔨᒃᓴᖃᓐᖏᓚᖅ.”
3ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “1,000 ᐃᒡᓗᒐᓴᖕᓂᑦ ᐊᓂᔪᑦ ᐊᒥᐊᒃᑯᖃᕐᓂᐊᕐᐳᖅ 100ᓂᒃ, 100ᓪᓗ ᐊᓂᔪᑦ ᐊᒥᐊᒃᑯᖃᕐᓂᐊᕐᐳᑦ 10ᓂᒃ ᐃᓴᕆᐊᓕᐅᑉ ᑭᖑᕚᖏᓐᓂᑦ.”
4ᐃᒫᒃ ᐊᑕᓂᖅ ᐅᖃᕐᐳᖅ ᐃᓴᕆᐊᓕᐅᑉ ᑭᖑᕚᖏᓐᓄᑦ: “ᐅᕙᓐᓂᒃ ᕿᓂᓕᕆᑦᓯ ᐃᓅᓕᕐᓗᓯᓗ; 5ᐱᑎᓕ ᕿᓂᕈᓐᓁᕐᓯᐅᒃ, ᒋᐅᓪᒐᓪᓘᓐᓃᑦ ᐃᑎᕐᑍᓕᓯᐅᒃ, ᐱᐊᕐᓯᐸᓘᓐᓃᑦ ᐊᖅᑯᓵᕐᑍᓕᓯᐅᒃ; ᒋᐅᓪᒐᓪᒥᐅᓪᓕ ᐊᐅᓪᓚᕈᑦᔭᐅᔪᒫᕐᒪᑕ, ᐱᑎᓕᓗ ᐱᑕᖃᕈᓐᓁᕈᒫᕐᓗᓂ.
6“ᐊᑕᓂᖅ ᕿᓂᓕᕐᓯᐅᒃ ᐃᓅᓕᕐᓗᓯᓗ, ᔫᓯᐱᐅᑉ ᑭᖑᕚᖏᓐᓂᒃ ᐃᑯᐊᓪᓔᔪᑎᑐᑦ ᐱᖁᓇᒍ, ᐊᓯᕈᕐᑕᐅᓗᑎᒡᓗ, ᐱᑎᓕᓗ ᖃᒥᑕᐅᔪᓐᓇᕐᓂᐊᓐᖏᓚᖅ. 7ᐃᖅᑲᕐᑐᐃᑦᓯᐊᕐᓂᕐᒥᒃ ᒧᒥᒃᑎᑦᓯᒐᑦᓯ, ᖁᐱᕐᕈᑎᑐᑦ ᓇᐹᕐᑐᓂᒃ ᓂᕆᔪᑎᑐᑦ, ᐃᓱᐊᕐᑐᓕᓂᕐᓗ ᐊᑐᑦᓯᐊᖏᓐᓇᑦᓯᐅᒃ ᓄᓇᒧᑦ ᐃᒋᑕᐅᔪᑎᑐᑦ.
8 #
ᔫᐱ 9:9; 38:31. ᑖᓐᓇ ᐅᓪᓗᕆᐊᑦ ᐃᓂᒋᔭᖏᑕ ᖃᓄᐃᓕᖓᓂᖏᓐᓂᒃ ᓴᓇᓚᐅᕐᑐᖅ,
ᑖᕐᑐᕐᔪᐊᕐᒥᒡᓗ ᒧᒥᒃᑎᑦᓯᕙᒃᑐᖅ ᐅᓪᓛᓐᖑᕐᑎᓪᓗᒍ,
ᐅᓪᓗᕐᒥᒡᓗ ᑖᕐᓯᑎᑦᓯᕙᒃᑐᖅ ᐅᓐᓄᐊᖑᓕᕐᓗᓂ,
ᑕᕆᐅᕐᔪᐊᒥᒃ ᕾᖁᔨᕙᒃᑐᖅ, ᑯᕕᓪᓗᒍᓗ ᓄᓇᕐᔪᐊᑉ ᖄᖓᓄᑦ,
ᐊᑎᖃᕐᐳᖅ ᐊᑕᓂᕐᒥᒃ.
9ᓴᓐᖏᔪᐊᓗᐃᑦ ᐊᓯᕈᕐᑕᐅᓂᕐᒧᑦ ᑎᑭᑎᑕᐅᑎᑉᐰᑦ,
ᐊᕙᓗᕐᔪᐊᓖᓪᓗ ᕿᒫᕖᑦ ᐊᓯᕈᕐᓗᒋᑦ.
10“ᐆᒥᓱᖕᒪᑕ ᐃᓂᕐᑎᕆᔪᒥᒃ, ᓇᕐᕈᓪᓗᑎᒡᓗ ᓱᓕᔪᒥᒃ ᐅᖃᐅᓯᓕᖕᒥᒃ ᐃᖅᑲᕐᑐᐃᕕᖕᒥ. 11ᐊᔪᕐᓴᕐᑐᓂᒃ ᑐᓪᓕᕌᕋᑦᓯ ᐊᕐᓵᕋᑦᓯᐅᓪᓗ ᓂᐊᖂᔭᒃᓴᖏᓐᓂᒃ, ᑍᒫᒃᑕᐅᖅ, ᐃᒡᓗᕐᔪᐊᓕᐅᕐᓯᒪᒐᓗᐊᕐᑐᓯ ᐅᔭᕋᖕᓄᑦ ᓴᓇᔭᐅᓯᒪᔪᓄᑦ ᐃᓂᒋᓂᐊᓐᖏᓚᓯᓕ, ᐱᐅᔪᐊᓗᖕᓂᒡᓗ ᕔᓂᒃᓴᓂᒃ ᐱᕈᕐᓰᕕᓕᐅᕐᓯᒪᒐᓗᐊᕐᑐᓯ, ᐃᒥᕐᕕᒋᓂᐊᓐᖏᓚᓯᓕ. 12ᐊᔪᕐᓂᓯ ᐅᓄᕐᓂᖏᑦ ᖃᐅᔨᒪᒐᒃᑭᑦ, ᐊᔪᕐᑐᓕᓯᒪᔪᐊᓘᓂᓯᓗ, ᐊᑭᕋᕐᑐᕋᑦᓯᐅᒡᓗ ᐃᓱᐊᕐᑐᓕᔪᑦ, ᐊᑭᓕᕐᑕᐅᓪᓗᓯᓗ ᓴᖑᑎᑕᐅᕙᒃᓗᓯ; ᐊᔪᕐᓴᕐᑐᓪᓗ ᐱᑦᓯᐊᕐᕕᒋᓇᒋᑦ ᐃᖅᑲᕐᑐᐃᕕᖕᓂ. 13ᑍᒤᒻᒪᑦ ᓯᓚᑐᔪᖅ ᓂᐱᖃᕐᓂᐊᓐᖏᓚᖅ ᑍᒤᑦᑐᒥ, ᐱᕕᒃᓴᖅ ᓇᓪᓕᐅᑎᔪᖅ ᐱᐅᖏᑦᑑᖕᒪᑦ.
14“ᐱᐅᔪᒥᒃ ᕿᓂᕆᑦᓯ ᐱᐅᖏᑦᑐᒥᐅᖏᑦᑐᖅ, ᐃᓅᖁᓪᓗᓯ, ᑕᕝᕙ ᕿᓚᖕᒥᐅᒐᓴᒡᔪᐊᑦ ᐊᑕᓂᖓᑕ ᒎᑎᐅᑉ ᐃᓚᒋᓂᐊᕐᐹᓯ, ᐅᖃᐅᓯᕆᔭᓯ ᒪᓕᒡᓗᒍ. 15ᐱᐅᖏᑦᑐᖅ ᐆᒥᒋᓯᐅᒃ, ᐱᐅᔪᖅ ᐅᖓᒋᓗᒍ, ᐊᑲᐅᔪᒥᒡᓕ ᐱᓇᓱᐊᕆᑦᓯ ᐃᖅᑲᕐᑐᐃᕕᖕᓂ, ᕿᓚᖕᒥᐅᒐᓴᒡᔪᐊᑦ ᐊᑕᓂᖓ ᒎᑎ ᓂᑲᒍᓱᓕᖁᓪᓗᒍ ᔫᓯᐱᐅᑉ ᑭᖑᕚᖏᑕ ᐊᒥᐊᒃᑯᖏᓐᓂᒃ.”
16ᑍᒤᒻᒪᑦ ᐊᑕᓂᖅ, ᕿᓚᖕᒥᐅᒐᓴᒡᔪᐊᑦ ᐊᑕᓂᖓ ᒎᑎ ᐅᖃᕐᐳᖅ: “ᕿᐊᓂᕐᔪᐊᖃᕈᒫᕐᐳᖅ ᓄᓇᓖᑦ ᑲᑎᑕᕐᕕᖏᓐᓂ, ᓂᓪᓕᐊᔪᒫᕐᐳᓪᓗ ᐊᖅᑯᑎᓕᒫᓂ, ᐱᕈᕐᓰᕕᓕᕆᔩᓪᓗ ᕿᒃᓵᖁᔭᐅᓂᐊᕐᐳᑦ ᐃᓚᓐᖓᕐᑐᑎᑐᑦ ᕿᐊᖃᑎᖃᕐᓗᑎᒃ ᐊᑭᓕᕐᑕᐅᓗᑎᒃ ᕿᒃᓵᒃᑎᓂᒃ. 17ᕔᓂᒃᓴᓂᒡᓗ ᐱᕈᕐᓰᕕᓕᒫᓂ ᕿᐊᓂᕐᔪᐊᖃᕈᒫᕐᐳᖅ, ᑕᒪᐅᓇ ᐃᓕᑦᓯᑎᒍᑦ ᐊᖅᑯᓵᕈᒫᕋᒪ,” ᐊᑕᓂᖅ ᐅᖃᕐᐳᖅ.
18“ᑲᑉᐱᐊᓐᓇᒦᒃ ᐃᓕᑦᓯ ᐊᑕᓂᐅᑉ ᐅᓪᓗᖓᓂᒃ ᓂᕆᐅᒃᑐᓯ! ᖃᓄᖅ ᐊᑕᓂᐅᑉ ᐅᓪᓗᖓ ᐱᐅᒐᔭᕋᓱᒋᒐᑦᓯᐅᒃ ᐃᓕᑦᓯᓐᓄᑦ? ᐅᓪᓗᖅ ᑍᓐᓇ ᑕᕐᑐᕐᔪᐊᖑᔪᒫᕐᒪᑦ ᖃᐅᒪᓂᖃᖏᓪᓗᓂ. 19ᐊᑦᔨᖃᕈᒫᕐᒪᑦ ᐊᖑᒻᒥᒃ ᓛᔭᒥᒃ ᕿᒫᔪᒥᒃ, ᓇᓄᕐᒥᒡᓗ ᐹᕐᓯᔪᒥᒃ! ᐅᕝᕙᓗ ᐊᑦᔨᖃᕈᒫᕆᕗᖅ ᐃᒡᓗᒧᑦ ᐃᑎᕐᑐᒥᒃ, ᐊᑭᓐᓇᒧᑦ ᐊᔭᑉᐸᒃᐸᑦ ᖁᒡᓗᒋᐊᒧᑦ ᑮᔭᐅᔪᑐᑦ! 20ᐊᑕᓂᐅᑉ ᐅᓪᓗᖓ ᑕᕐᑐᕐᔪᐊᖑᕗᖅ, ᖃᐅᒪᔫᓇᓂᓗ, ᑖᕐᔪᖓᕗᕐᓗ ᖃᐅᒻᒪᓪᓚᕆᒐᓂ.
21 #
ᐂᓮᐊᓯ 1:11-14. “ᓇᓪᓕᐅᓐᓂᕐᓯᐅᕐᕕᓯ ᐆᒥᒋᕙᒃᑲ ᓇᕐᕈᒋᓪᓗᒋᑦ, ᑐᒃᓯᐊᕆᐊᕐᓯᒪᓂᓯᓗ ᖁᕕᐊᒋᓐᖏᓚᒃᑲ. 22ᐅᕙᓐᓄᑦ ᑐᓂᕐᕈᓯᕋᓗᐊᕋᑦᓯ ᐃᑯᐊᓚᑦᓯᓂᕐᒧᑦ ᑐᓂᕐᕈᑎᓂᒃ, ᓂᐊᖂᔭᒃᓴᓂᒡᓗ ᑐᓂᕐᕈᓯᕋᓗᐊᕋᑦᓯ ᐃᓚᓕᐅᕐᓂᐊᓐᖏᓚᒃᑲ, ᑐᓂᕐᕈᓯᕋᓗᐊᕈᑦᓯᓗ ᐃᓚᒋᔭᐅᑦᓯᐊᕈᒪᓂᕐᒧᑦ ᖁᐃᒃᑎᓴᕐᑕᐅᓯᒪᔪᓂᒃ ᐃᒃᐱᒋᓂᐊᓐᖏᓚᒃᑲ. 23ᐃᓐᖏᕐᓂᓯ ᐅᕙᓐᓄᑦ ᓂᐸᖏᓚᐅᕐᓕᑦ, ᓂᑦᔮᑎᑦᓯᓂᓯᓗ ᓄᖃᕐᑎᓕᖕᓄᑦ ᓈᓚᖕᓂᐊᓐᖏᓚᒃᑲ. 24ᐃᖅᑲᕐᑐᐃᑦᓯᐊᕐᓂᓯ ᑯᕕᓕᕐᓕᑦ ᐃᒪᕐᑎᑐᑦ, ᐃᓱᐊᕐᑐᓕᓂᕐᓗ ᑰᒃᑎᑐᑦ ᖄᒥᓪᓗᓂ ᐃᒤᕐᓂᐊᖏᑦᑐᑎᑐᑦ.
25 #
ᐋᐴᓯᑕᓖᑦ 7:42,43. “ᐃᓴᕆᐊᓕᒥᐅᖑᔪᓯ ᑭᖑᕚᖑᖃᑎᒌᑦ ᐅᕙᓐᓄᑦ ᑐᓂᕐᕈᓯᓚᐅᕐᐱᓰ ᐆᑕᒃᓴᓂᒃ ᑐᓂᕐᕈᑎᓂᒡᓗ, ᐃᓄᖃᔪᐃᑦᑐᒦᑎᓪᓗᓯ ᐊᕐᕌᒍᓂᒃ 40ᓂᒃ? 26ᐊᖓᔪᖅᑳᕐᔪᐊᑦᓯᓐᓂᒃ ᒎᑎᓐᖑᐊᒥᒃ ᓴᑰᑎᒥᒃ ᐊᒡᔭᕐᓯᔭᕆᐊᖃᕐᓂᐊᓕᕐᐳᓯ, ᑬᐅᐊᓐᒥᒡᓗ ᒎᑎᓐᖑᐊᑦᓯᓐᓂᒃ ᐅᓪᓗᕆᐊᓐᖑᐊᒥᒃ ᓇᖕᒥᓂᖅ ᓴᓇᓚᐅᕐᑕᑦᓯᓐᓂᒃ. 27ᑍᒤᒻᒪᑦ ᐊᐅᓪᓚᕈᑎᔪᒫᓕᕐᐸᑦᓯ ᑕᒫᓯᑰᓯᐅᑉ ᐅᖓᑖᓄᑦ,” ᐊᑕᓂᖅ ᐅᖃᕐᐳᖅ, ᕿᓚᖕᒥᐅᒐᓴᒡᔪᐃᑦ ᒎᑎᖓᓐᓂᒃ ᐊᑎᖃᕐᑐᖅ.
Currently Selected:
ᐂᒨᓯᐅᑉ ᐊᒡᓚᖏᑦ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
