ᐂᒨᓯᐅᑉ ᐊᒡᓚᖏᑦ 4
4
1ᓈᓚᒋᑦᓯ ᐃᓕᑦᓯ ᐊᕐᓁᑦ ᖃᖅᑲᒥ ᓴᒥᐊᕆᐊᒥ ᐃᓂᖃᕐᑐᓯ, ᐹᓴᓂᒥᐅᑦ ᐃᒻᒧᒃᓯᐅᒐᖁᑎᖏᑎᑐᑦ ᖁᐃᓂᔪᑎᑐᑦ ᑍᒤᑦᑐᓯ, ᐊᒃᓱᕈᕐᑎᑦᓯᔪᓯ ᐊᔪᕐᓴᕐᑐᓂᒃ, ᓱᓇᐅᔪᓐᓁᕐᑎᑦᓯᔪᓯᓗ ᐃᑲᔪᕐᑕᐅᔭᕆᐊᓕᖕᓂᒃ, ᐅᐃᑦᓯᓐᓄᑦ ᐅᖃᕋᑦᓯ, “ᕔᓂᒥᒃ ᐂᑦᑐᕐᑎᒍᑦ ᐃᒥᕐᓂᐊᕋᑕ!” 2ᐊᑕᓂᖅ ᒎᑎ ᐃᑦᔪᕐᓁᑦᑑᒐᒥ ᐊᖏᒻᒪᕆᒃᐳᖅ, “ᑕᑯᒋᑦ, ᐅᓪᓗᐃᑦ ᓇᓪᓕᐅᑎᔪᒫᕐᐳᑦ ᐃᓕᑦᓯᓐᓄᑦ, ᐊᐅᓪᓚᐅᑦᔭᐅᔪᒫᕋᑦᓯ ᓂᒃᓯᖕᓄᑦ ᓂᒃᓯᖃᑦᑕᐅᑎᓯᒪᓗᓯ, ᑭᖑᓪᓕᕐᐹᓯᓘᓐᓃᑦ ᐃᖃᓗᒃᑎᑐᑦ ᓂᒃᓯᒃᑕᐅᓯᒪᔪᑎᑑᓛᕐᐳᑦ. 3ᐊᓂᔪᒫᕐᐳᓯᓗ ᐊᕙᓗᕐᔪᐊᒃᑯᑦ ᓱᕋᒃᓯᒪᔪᒃᑯᑦ, ᐃᒋᑕᐅᓗᓯᓗ ᕼᐊᕐᒪᓐᒧᑦ,” ᐊᑕᓂᖅ ᐅᖃᕐᐳᖅ.
ᐃᓴᕆᐊᓕᐅᑉ ᐃᓕᑦᓯᔪᓐᓇᖏᓐᓂᖓ
4“ᐱᑎᓕᒧᐊᕆᑦᓯ ᐊᔪᕐᑐᓕᓗᓯᓗ, ᒋᐅᓪᒐᐅᓪᒥᓗ ᐊᔪᕐᑐᓕᓂᓯ ᐊᖏᒡᓕᒋᐊᕐᑎᓯᒋᒃ, ᑐᓂᕐᕈᓯᕐᓗᓯᓗ ᐅᓪᓛᑕᒫᑦ, ᑕᓪᓕᒪᐅᔪᐃᕆᑦᓯᓗ ᐅᓪᓗᐃᑦ ᐱᖓᓱᖏᓐᓂ ᑕᒫᑦ. 5ᑐᓂᕐᕈᓯᓕᕆᑦᓯ ᖁᔭᓕᓂᕐᒧᑦ ᓂᐊᖂᔭᓂᒃ ᐳᕙᓪᓚᕐᓴᐅᑎᓕᖕᓂᒃ, ᐅᖃᕆᑦᓯ ᓇᓗᓁᕐᓯᓗᓯᓗ ᐃᓱᒤᓐᓇᕐᕆᓯᐅᑎᒥᒃ ᑐᓂᕐᕈᓯᕐᓂᑦᓯᓐᓂᒃ, ᑕᒪᓐᓇ ᐱᐅᒋᒐᑦᓯᐅᒃ, ᐃᓕᑦᓯ ᐃᓴᕆᐊᓕᒥᐅᖑᔪᓯ!” ᐊᑕᓂᖅ ᒎᑎ ᐅᖃᕐᐳᖅ.
6“ᑳᒃᑎᓚᐅᕐᐸᑦᓯ ᐃᒡᓗᒐᓴᓕᒫᓂ, ᓂᕿᒃᓴᖃᕐᑎᓚᐅᓐᖏᓚᑦᓯᓗ ᐃᓂᒋᔭᑦᓯᓐᓂ. ᓱᓕ ᐅᑎᓚᐅᓐᖏᓚᓯ ᐅᕙᓐᓄᑦ,” ᐊᑕᓂᖅ ᐅᖃᕐᐳᖅ. 7“ᓯᓚᓗᒡᓗ ᓄᖅᑲᖓᑎᓚᐅᕐᐸᕋ, ᓱᓕ ᑕᖅᑭᓂᒃ ᐱᖓᓱᓂᒃ ᑲᑎᕐᓱᐃᕕᒃ ᓇᓪᓕᐅᑎᓚᐅᕐᑎᓐᓇᒍ, ᐃᒡᓗᒐᓴᖕᓂ ᐊᑕᐅᓯᕐᓂ ᓯᓚᓗᒃᑎᑦᓯᓚᐅᕐᐳᖓ, ᐃᒡᓗᒐᓴᖕᓂᓗ ᐊᓯᖏᓐᓂ ᓯᓚᓗᒃ ᓄᖅᑲᖓᑎᓚᐅᕐᐸᕋ, ᐱᕈᕐᓰᕖᑦ ᐃᓚᖏᑦ ᓯᓚᓗᒃᑕᐅᑎᓚᐅᕐᐸᒃᑲ; ᐱᕈᕐᓰᕖᓪᓗ ᓯᓚᓗᒡᕕᐅᓚᐅᖏᑦᑐᑦ ᑐᖁᓕᓚᐅᕐᐳᑦ. 8ᑕᕝᕙ ᒪᕐᕉᒃ ᐱᖓᓱᓪᓘᓐᓃᑦ ᐃᒡᓗᒐᓮᑦ ᐃᓄᖏᑦ ᐃᒡᓗᒐᓴᖕᓄᑦ ᐊᓯᖏᓐᓄᑦ ᐃᒥᕐᓯᐅᕆᐊᓚᐅᕐᐳᑦ ᐃᒥᕈᒪᓪᓗᑎᒃ, ᓇᓂᓯᓚᐅᓐᖏᓚᓪᓕ, ᓱᓕᓕ ᐅᑎᓚᐅᓐᖏᓚᓯ ᐅᕙᓐᓄᑦ,” ᐊᑕᓂᖅ ᐅᖃᕐᐳᖅ.
9“ᐱᕈᕐᓰᕕᓯ ᕔᓂᓕᐅᕐᕕᓯᓗ ᖁᐱᕐᕈᓄᑦ ᐅᖁᖕᒧᓪᓗ ᐱᔭᐅᑎᓚᐅᕐᐸᒃᑲ, ᕔᓂᓕᐅᕐᕕᓯ, ᓇᐹᕐᑐᖁᑎᓯᓗ ᐱᒋᓕᒃᓮᑦ, ᓇᐹᕐᑐᖁᑎᓯᓗ ᐅᕐᓱᒃᓴᓖᑦ, ᐱᒡᓕᕐᑕᐅᔮᕐᑐᓄᑦ ᓇᐹᕐᑐᐃᑦ ᓂᕆᔭᐅᑎᓚᐅᕐᐸᒃᑲ, ᓱᓕᓕ ᐅᕙᓐᓄᑦ ᐅᑎᓚᐅᓐᖏᓚᓯ,” ᐊᑕᓂᖅ ᐅᖃᕐᐳᖅ.
10“ᖃᓄᐃᓐᓇᕐᑐᓂᒃ ᐱᑎᑦᓯᓚᐅᕐᐳᖓ ᐊᑯᓐᓇᑦᓯᓐᓄᑦ ᐄᑦᔨᑉᑎᒥᐅᑎᑐᑦ, ᐃᓅᓱᒃᑐᖁᑎᓯᓗ ᑐᖁᓚᐅᕐᐸᒃᑲ ᓴᕕᒡᔪᐊᒧᑦ, ᕿᒻᒥᕐᔪᐊᓯᓗ ᑎᒍᔭᕕᓂᓯ ᑐᖁᓚᐅᕐᐸᒃᑲ; ᑕᖕᒫᕐᓯᒪᕕᑦᓯᓗ ᒪᒤᑦᑐᓐᖑᕐᑎᓚᐅᕐᐸᒃᑲ ᑕᒪᑐᒥᖓ ᓁᒪᑎᓚᐅᕐᐸᑦᓯ; ᓱᓕᓕ ᐅᕙᓐᓄᑦ ᐅᑎᓚᐅᓐᖏᓚᓯ,” ᐊᑕᓂᖅ ᐅᖃᕐᐳᖅ.
11 #
ᒨᓯᓯ ᓯᕗᓪᓖᑦ 19:24. “ᐃᓚᓯ ᐃᓚᖏᑦ ᐊᓯᕈᓚᐅᕐᐸᒃᑲ, ᒎᑎᐅᑉ ᓱᑑᒪᒥᒃ ᒍᒨᕋᒥᒡᓗ ᐊᓯᕈᐃᓂᕆᓚᐅᕐᑕᖓᑎᑐᑦ, ᕿᔪᒃᑐᑦ ᐃᑯᒪᔪᑎᑐᑦ ᑍᒤᓚᐅᕐᐳᓯ ᐃᑯᒪᒥᑦ ᐊᒧᔭᐅᔪᑎᑐᑦ, ᓱᓕᓕ ᐅᑎᓚᐅᓐᖏᓚᓯ ᐅᕙᓐᓄᑦ,” ᐊᑕᓂᖅ ᐅᖃᕐᐳᖅ. 12“ᑍᒤᒻᒪᑦ ᓱᒋᐊᕐᓂᐊᕐᐸᑦᓯ, ᐃᓕᑦᓯ ᐃᓴᕆᐊᓕᒥᐅᖑᔪᓯ; ᑍᒤᓕᐅᕐᕕᒋᓂᐊᕋᑦᓯ ᐅᐸᓗᖎᓕᕆᑦᓯ ᒎᑎᓯ ᑲᑎᓂᐊᓕᕋᑦᓯᐅᒃ, ᐃᓕᑦᓯ ᐃᓴᕆᐊᓕᒥᐅᖑᔪᓯ! 13ᑕᑯᒋᑦ, ᖃᖅᑲᓂᒃ ᓴᓇᓚᐅᕐᑐᖅ, ᐊᓄᕆᒥᒡᓗ ᐱᓐᖑᕐᑎᑦᓯᓚᐅᕐᑐᖅ, ᐃᓄᖕᒧᓪᓗ ᓇᓗᓁᕐᓯᓚᐅᕐᑐᖅ ᐃᓱᒪᒋᔭᒥᓂᒃ, ᐅᓪᓛᒥᒡᓗ ᑖᕐᓯᑎᑦᓯᓚᐅᕐᑐᖅ, ᓄᓇᕐᔪᐊᓪᓗ ᐳᕐᑐᓂᕐᐹᖏᓐᓂᒃ ᑐᓪᓕᕋᕐᑐᖅ ᕿᓚᖕᒥᐅᒐᓴᒃᔪᐃᑦ ᐊᑕᓂᖓᑦ ᒎᑎᒥᒃ ᐊᑎᖃᕐᐳᖅ.”
Currently Selected:
ᐂᒨᓯᐅᑉ ᐊᒡᓚᖏᑦ 4: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
