ᐂᒨᓯᐅᑉ ᐊᒡᓚᖏᑦ 3
3
1ᑐᓴᕐᓯᐅᒃ ᐊᑕᓂᐅᑉ ᐅᖃᐅᓯᖓ ᐃᓕᑦᓯᓐᓂᒃ ᐅᖃᐅᑦᔨᔪᖅ, ᐃᓴᕆᐊᓕᒥᐅᑦ ᐃᓄᖏᓐᓂᒃ, ᐅᖃᐅᑦᔨᔪᑦ ᐃᓚᒌᓕᒫᓂᒃ ᐄᑦᔨᑉᑎᐅᑉ ᓄᓇᖓᓂᑦ ᐊᐅᓪᓚᕐᑎᓚᐅᕐᑕᓐᓂᒃ, ᐅᖃᕐᓗᖓ: 2“ᐃᓚᒌᒃᑐᓕᒫᓂᑦ ᓄᓇᕐᔪᐊᒥ ᖃᓂᒋᔭᑐᐊᕆᓯᒪᕙᑦᓯ; ᑍᒤᒻᒪᑦ ᐊᔪᕐᑐᓕᓂᓯ ᒪᓕᒡᓗᒋᑦ ᓱᒋᐊᕐᓂᐊᕐᐸᑦᓯ.”
ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐱᔭᒃᓴᖏᑦ
3“ᒪᕐᕉᒃ ᐃᖏᕐᕋᖃᑎᒌᒃᐸᓐᖏᓛᒃ ᐊᖏᖃᑎᒌᒃᓯᒪᒍᑎᒃ ᑭᓯᐊᓃ?
4“ᓛᔭ ᓂᐱᖅᑯᕐᑐᓗᓂ ᓂᓪᓕᐊᕙᒃᐹ ᓇᐹᕐᑐᐃᑦ ᐊᑯᕐᖓᓐᓂ ᓂᕆᔭᒃᓴᖃᕈᓐᓃᕈᓂ?
“ᐃᓅᓱᒃᑐᖅ ᓛᔭ ᖃᓕᖑᓛᕐᐸᒃᐹ ᓯᑎᒥᓂ ᓱᓇᒥᒃ ᓂᕆᔭᒃᓴᖃᖏᒃᑯᓂ?
5“ᑎᖕᒥᐊᖅ ᓂᒐᕐᑎᑕᐅᔪᓐᓇᕐᐹᑦ ᓄᓇᒥ ᓂᒐᕐᑕᖃᖏᑦᑐᒥ?
“ᓂᒐᖅ ᒪᓂᖅᑲᒥᑦ ᐃᒻᒥᓂᒃ ᐱᒋᐊᕈᓐᓇᕐᐹ, ᓱᓇᒥᒃ ᓂᒐᕐᑎᑕᒃᓴᖃᖏᓪᓗᓂ?
6“ᐃᒡᓗᒐᓴᖕᓂ ᑎᑦᑐᓚᐅᑦ ᓂᓪᓕᕐᐸᑦ ᐃᓄᖏᑦ ᑲᑉᐱᐊᓱᒐᔭᓐᖏᓛᑦ?
“ᐱᓂᕐᓗᖕᓂᐊᓗᖃᕈᓐᓇᕐᐹ ᐃᒡᓗᒐᓴᖕᓂ, ᐊᑕᓂᖅ ᐱᖁᔨᑎᓐᓇᒍ?
7“ᓱᓕᓪᓚᕆᒃᐳᖅ ᐊᑕᓂᖅ ᐱᓂᐊᓲᖑᖏᒻᒪᑦ ᓇᓗᓇᕐᑐᒥᒃ, ᓇᓗᓁᕐᓯᓚᐅᖅᑳᕋᓂ ᐱᔨᓄᑦ ᐅᖃᕐᑎᖁᑎᒥᓄᑦ?
8“ᓛᔭ ᓂᓪᓕᐊᓗᓂ ᐃᕐᓯᓵᕐᐸᑦ! ᑭᓈ ᓯᕘᕋᒐᔭᓐᖏᓛᖅ?
“ᐊᑕᓂᖅ ᒎᑎ ᐅᖃᓚᒃᐸᑦ; ᑭᓇ ᐅᖃᐅᓯᖃᕐᑍᓕᔪᓐᓇᕐᐹ?”
ᓴᒥᐊᕆᐊᑉ ᐊᓯᕈᕐᑕᐅᓂᒃᓴᖓ
9ᐅᖃᕆᐊᕐᑐᕆᑦ ᕿᒫᕕᖕᓄᑦ ᐋᔅᑖᑦᒧᑦ, ᐄᑦᔨᑉᑎᐅᓪᓗ ᕿᒫᕕᖏᓐᓄᑦ, ᐃᒫᒃ ᐅᖃᕐᓗᑎᑦ, “ᑲᑎᓕᕆᑦᓯ ᓴᒥᐊᕆᐊᑉ ᖃᖅᑲᖓᓄᑦ; ᑕᑯᓕᕆᑦᓯᓗ ᑕᕝᕙᓂ ᐅᐃᒪᔮᕐᑐᓂᒃ, ᐱᑦᓯᐊᕐᑕᐅᖏᑦᑐᓂᒡᓗ ᐃᓄᖕᓂᒃ.
10“ᐱᓂᐊᕐᓂᕐᒥᒃ ᐃᓱᐊᕐᑐᒥᒃ ᖃᐅᔨᒪᖏᒻᒪᑕ.” ᐊᑕᓂᖅ ᐅᖃᕐᐳᖅ, “ᑖᒃᑯᐊ ᑲᑉᐱᐊᓱᒃᑎᑦᓯᓂᒃᑯᑦ ᑎᒡᓕᒐᕐᓂᒃᑯᓪᓗ ᐱᓯᒪᔭᒥᖕᓂᒃ ᑐᖅᑯᕐᑎᕆᓯᒪᕗᑦ ᕿᒫᕕᖕᒥᖕᓂ.” 11ᑕᒪᓐᓇ ᐱᓪᓗᒍ ᐊᑕᓂᖅ ᒎᑎ ᐅᖃᕐᐳᖅ: “ᐊᑭᕋᕐᑐᕐᑎᖏᑦ ᓄᓇᒥ ᓇᓂᑐᐃᓐᓈᓕᕐᓂᐊᕐᐳᑦ, ᓴᐳᓐᓂᐊᕈᑎᖏᓪᓗ ᓯᖁᒥᓐᓂᐊᕐᐰᑦ, ᕿᒫᕕᖏᓪᓗ ᑎᒡᓕᒐᕐᕕᒋᓗᒋᑦ.”
12ᐊᑕᓂᖅ ᐃᒫᒃ ᐅᖃᕐᐳᖅ, “ᓰᐱᓕᕆᔨ ᐊᕐᓵᕐᓯᕙᖕᒪᑦ ᓛᔭᒥᒃ ᓂᐅᖕᓂᒃ ᒪᕐᕈᐃᓐᓈᖕᓂᒃ ᓯᐅᑎᐅᓪᓗ ᐃᓔᓐᓇᖓᓂᒃ; ᑍᒫᒃᑕᐅᖅ ᐃᓴᕆᐊᓕᐅᑉ ᐃᓄᖏᑦ ᐃᓔᓐᓇᖏᑦ ᓴᐳᑎᔭᐅᓂᐊᕐᐳᑦ ᓄᓇᖃᕐᑐᑦ ᓴᒥᐊᕆᐊᒥ; ᐊᔪᕐᓴᖏᑦᑐᕐᓯᐅᑎᓂ ᐃᒡᓕᕐᓂ ᓇᓚᕈᕐᑐᑦ, ᐃᒃᓯᕙᐅᑖᓗᖕᓂᓗ ᐃᒃᓯᕙᔪᑦ. 13ᓈᓚᒋᑦᓯ ᐊᑭᕋᕐᑐᕐᓗᓯᓗ ᔧᑰᑉ ᑭᖑᕚᖏᓐᓄᑦ,” ᐊᑕᓂᖅ ᒎᑎ ᐅᖃᕐᐳᖅ, ᕿᓚᖕᒥᐅᒐᓴᒡᔪᐊᑦ ᒎᑎᖓᑦ. 14#ᐊᑕᓃᑦ ᐂᑉᐸᖏᑦ 23:15.“ᐅᓪᓗᒥ ᑍᑲᓂ ᐃᓴᕆᐊᓕᑎᑦ ᓱᒋᐊᕈᒃᑭᑦ ᐊᔪᕐᓂᖏᑦ ᐱᓪᓗᒋᑦ, ᐱᑎᓕᐅᓪᓗ ᑐᓂᕐᕈᓯᕐᕕᖏᑦ ᓯᑯᒥᖃᓯᐅᑎᓂᐊᕐᐸᒃᑲ; ᑐᓂᕐᕈᓯᕐᕕᖏᑕᓗ ᓇᒡᔪᖏᒃ ᓇᑲᑦᓱᒫᕐᐳᒃ ᒪᓂᖅᑲᒧᓪᓗ ᑲᑕᒡᓗᑎᒃ. 15ᐃᒡᓗᐃᓪᓗ ᐅᑭᐅᕐᓯᐅᑎᑦ ᐊᐅᔭᕐᓯᐅᑎᓪᓗ ᐊᓇᐅᓂᐊᕐᐸᒃᑲ, ᑑᒑᓪᓗ ᐃᒡᓗᐃᑦ ᓯᑯᒥᓐᓂᐊᕐᐳᑦ, ᐃᒡᓗᑦᓯᐊᕚᓗᐃᓪᓗ ᓄᖑᓪᓗᑎᒃ,” ᐊᑕᓂᖅ ᐅᖃᕐᐳᖅ.
Currently Selected:
ᐂᒨᓯᐅᑉ ᐊᒡᓚᖏᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
