ᓴᒧᐃᓕ ᐂᑉᐸᖏᑦ 8
8
ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑕ ᓵᓚᖃᕐᓂᖏᑦ
ᑯᕉᓂᑲ ᓯᕗᓪᓖᑦ 18:1-17
1ᑕᒪᑐᒪ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᑍᕕᑎ ᐅᓇᑕᕆᐊᕋᒥ ᐱᓕᔅᑍᓂᒥᐅᑦ ᓵᓚᒋᕔᑦ, ᓄᓇᓗ ᒥᑎᒋ-ᐊᒪ ᓄᓇᑖᕆᕚ ᐱᓕᔅᑍᓂᒥᐅᓂᑦ ᐊᕐᓵᕐᓯᑦᔪᑎᒋᓪᓗᓂᐅᒃ.
2ᒧᐊᐱᒥᐅᓪᓗ ᓵᓚᒋᒋᕔᑦ, ᑎᒍᔭᓂᓗ ᒪᓂᖅᑲᒧᑦ ᓇᓪᓚᕐᑎᑉᐰᑦ; ᐊᒃᓱᓈᒧᑦ ᐆᒃᑐᕋᐅᑎᖃᕐᓗᓂ ᐊᒃᓱᓈᑉ ᐃᓗᐊᓃᑦᑐᑦ ᒪᕐᕈᐃᕐᑕᕐᓗᒋᑦ ᑖᒃᑯᐊ ᑐᖁᑕᐅᑎᑉᐰᑦ, ᐆᒃᑐᕋᕐᑕᖏᑕ ᐱᖓᔪᖏᓐᓃᑦᑐᑦ ᑐᖁᑕᐅᕙᒐᑎᒃ. ᑍᒤᒻᒪᑦ ᒧᐊᐱᒥᐅᑦ ᑍᕕᑎᐅᑉ ᐱᔨᑖᕆᓚᐅᕐᐰᑦ ᑮᓇᐅᔧᔭᓕᕐᓗᑎᒡᓗ ᑖᒃᓰᕈᑎᒥᖕᓂᒃ ᑖᑦᓱᒧᖓ.
3ᑍᕕᑎᐅᓪᓗ ᔫᐸᒥᐅᑦ ᐊᖓᔪᖅᑳᕐᔪᐊᖓ ᕼᐊᑕᑎᔨᕆ ᕅᕼᐊᑉ ᐃᕐᓂᖓ ᓵᓚᒋᓚᐅᕆᕚ, ᑖᓐᓇ ᕼᐊᑕᑎᔨᕆ ᐊᐅᓪᓚᓚᐅᕐᑑᒐᓗᐊᖅ ᓄᓇᖁᑎᕕᓂᓂ ᐅᑎᕐᑎᑦᓱᒪᓪᓗᒍ ᐃᕗᕅᑎᐅᑉ ᑰᖓᑕ ᖁᓛᓃᑦᑐᖅ. 4ᑍᕕᑎᐅᓪᓗ ᑎᒍᓚᐅᕐᐰᑦ 1,700ᐃᑦ ᕿᒻᒥᕐᔪᐊᒃᑰᕐᑏᑦ, 20,000ᐃᓪᓗ ᐅᓇᑕᕐᑐᒃᓮᑦ ᐱᓱᒃᑏᑦ; 100ᓂᒡᓗ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᑎᒍᓯᓚᐅᕐᐳᖅ ᐊᓯᓕᒫᖏᑦ ᑭᖑᓪᓖᖏᑕ ᓄᑭᖏᑦ ᓱᒃᑯᑎᕐᓗᒋᑦ.
5ᓯᕆᐊᒥᐅᑦ ᑕᒫᓯᑰᓯᒥᐅᑍᑦ ᐅᓇᑕᕐᑐᒃᓴᖁᑎᓂᒃ ᐊᐅᓪᓚᕐᑎᑦᓯᓚᐅᕐᐳᑦ ᐃᑲᔪᕆᐊᕐᑐᓂᒃ ᔫᐸᐅᑉ ᐊᖓᔪᖅᑳᕐᔪᐊᖓᓂᒃ ᕼᐊᑕᑎᔨᕆᒥᒃ, ᑍᕕᑎᐅᑉ ᑐᖁᓚᐅᕐᐰᑦ 22,000 ᓯᕆᐊᒥᐅᑦ. 6ᑕᕝᕙ ᑍᕕᑎ ᐅᓇᑕᕐᑐᒃᓴᖁᑎᒥᓂᒃ ᓄᓇᓕᖏᓐᓂ ᐃᓂᑖᕐᑎᑦᓯᓚᐅᕐᐳᖅ ᐊᕌᒻᒥ ᑕᒫᓯᑰᓯᒦᑦᑐᒥ; ᓯᕆᐊᒥᐅᓪᓗ ᐱᔨᑖᕆᓚᐅᕐᐰᑦ ᑮᓇᐅᔧᔭᓕᕐᓗᑎᒡᓗ ᑖᑦᓱᒧᖓ. ᐊᑕᓂᐅᓪᓗ ᑍᕕᑎ ᓵᓚᖃᕐᑎᖃᑦᑕᓚᐅᕐᐹ ᓇᒧᑐᐃᓐᓇᖅ ᐂᑐᐊᕌᖓᑦ. 7ᑍᕕᑎᐅᓪᓗ ᒎᓗᐃᑦ ᕼᐊᑕᑎᔨᕆᐅᑉ ᓴᐴᓗᑕᖏᑦ ᑎᒍᓚᐅᕐᐰᑦ ᑖᑦᓱᒪ ᐱᔨᖓᑕ ᐊᒡᔭᖃᑦᑕᓚᐅᕐᑕᖏᑦ, ᔨᕉᓴᓕᒧᐊᕈᑎᓪᓗᒋᓪᓗ. 8ᑍᕕᑎᓗ ᐊᖏᔪᐊᓗᖕᒥᒃ ᑲᓐᓄᔭᒥᒃ ᑎᒍᓯᓚᐅᕐᐳᖅ ᓄᓇᒥᑦ ᐱᑕᒥᑦ ᐱᕈᑍᒥᓪᓗ, ᐃᒡᓗᒐᓴᖕᓂᑦ ᕼᐊᑕᑎᔨᕆᐅᑉ ᐊᐅᓚᓚᐅᕐᑕᖏᓐᓂᑦ.
9ᐊᖓᔪᖅᑳᕐᔪᐊᕐᓕ ᑐᐃ ᕼᐊᒫᑎᒥᐅᑕᖅ ᑐᓴᕋᒥ ᑍᕕᑎᐅᑉ ᓵᓚᖃᕐᓂᖓᓂᒃ ᕼᐊᑕᑎᔨᕆᐅᑉ ᐅᓇᑕᕐᑐᒃᓴᖁᑎᓕᒫᖏᓐᓂᒃ. 10ᐃᕐᓂᓂ ᔪᕌᒥ ᑎᓕᕚ ᐊᖓᔪᖅᑳᕐᔪᐊᕐᒧᑦ ᑍᕕᑎᒧᑦ, ᐅᐱᒍᓱᒋᐊᕐᑐᖁᓪᓗᒍ ᕼᐊᑕᑎᔨᕆᒥᒃ ᐅᓇᑕᓚᐅᕐᒪᑦ ᓵᓚᒋᓪᓗᒍᓗ; ᑐᐃᒥᒃ ᐅᓇᑕᖃᑎᖃᕐᐸᓚᐅᕐᒪᑦ ᐅᓄᕐᑐᐃᕐᓱᕐᓗᓂ. ᔪᕌᒥ ᓇᒃᓴᓚᐅᕐᐳᖅ ᑍᕕᑎᒧᑦ ᒎᓗᒥᒃ, ᓯᐅᓪᕕᕆᒥᒃ, ᑲᓐᓄᔭᓂᒡᓗ; 11ᑕᒪᒃᑯᐊᑦᑕᐅᖅ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐂᑦᑑᑎᒋᓚᐅᕐᐰᑦ ᐊᑕᓂᕐᒧᑦ, ᓯᐅᓪᕕᕇᑦ ᒎᓗᐃᓪᓗ ᐱᖃᓯᐅᑎᓪᓗᒋᑦ ᑎᒍᓚᐅᕐᑕᓕᒫᑎᒃ ᐃᓅᖃᑎᒌᒡᔪᐊᓂᑦ ᓵᓚᒋᓚᐅᕐᑕᒥᖕᓂᑦ, 12ᐄᑐᒥᒥᑦ, ᒧᐊᐱᒥᑦ, ᐊᒧᓁᑎᒥᑦ, ᐱᓕᔅᑍᓂᒥᑦ, ᐊᒪᓕᒃᒥᓪᓗ, ᐃᓚᖃᕐᓗᑎᒃ ᑎᒍᓚᐅᕐᑕᒥᓂᒃ ᕼᐊᑕᑎᔨᕆᒥᑦ ᕅᕼᐊᑉ ᐃᕐᓂᖓᓂᑦ, ᔫᐸᐅᑉ ᐊᖓᔪᖅᑳᕐᔪᐊᖓᓂᑦ.
13 #
ᐃᓐᖏᕈᑦ 60. ᑍᕕᑎᓗ ᖃᐅᔨᒪᔭᐅᒋᐊᓪᓚᒃᑲᓐᓂᓕᓚᐅᕐᐳᖅ, ᐅᑎᕐᒪᑦ ᑐᖁᑦᓯᓚᐅᕐᑎᓪᓗᒍ 18,000ᓂᒃ ᐄᑐᒤᑎᒥᐅᓂᒃ ᓇᕐᓴᒥ ᐊᑎᓕᖕᒥ ᑕᕆᐅᕐᒥᒃ. 14ᐅᓇᑕᕐᑐᒃᓴᖁᑎᒥᓂᒡᓗ ᐃᓂᑖᕐᑎᑦᓯᓚᐅᕐᐳᖅ ᐄᑐᒥᓕᒫᒥ; ᐃᓄᓕᒫᖏᓪᓗ ᐱᔨᑖᕆᓚᐅᕐᐰᑦ. ᐊᑕᓂᐅᓪᓗ ᑍᕕᑎ ᓵᓚᖃᕐᑎᖃᑦᑕᓚᐅᕐᐹ ᓇᒧᓐᖓᑐᐊᕌᖓᑦ.
15ᑕᕝᕙ ᑍᕕᑎ ᐊᐅᓚᑦᓯᓕᓚᐅᕐᐳᖅ ᐃᓴᕆᐊᓕᓕᒫᒥᒃ; ᐃᓄᓕᒫᖏᓪᓗ ᑲᒪᒋᔭᐅᑦᓯᐊᕐᑎᓚᐅᕐᐰᑦ ᐱᑦᓯᐊᕐᑕᐅᑎᓪᓗᒋᓪᓗ. 16ᔪᐊᐱᓗ ᔨᕈᐃᐊᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ ᐅᓇᑕᕐᑐᒃᓴᖁᑎᖏᓐᓄᑦ; ᔨᕼᐆᓴᐸᑦ ᐊᕼᐃᓗᑎᐅᑉ ᐃᕐᓂᖓ ᑲᒪᔨᐅᑎᓪᓗᒍ ᐱᖁᑎᓕᒫᖏᓐᓂᒃ; 17ᔭᑑᒃ ᐊᕼᐃᑑᑉ ᐃᕐᓂᖓ ᐊᕼᐃᒥᓕᒡᓗ ᐊᐰᐊᑕᐅᑉ ᐃᕐᓂᖓ ᑐᓂᕐᕈᓯᕐᑎᑦᓯᔨᐅᓚᐅᕐᐴᒃ; ᓯᕅᐊ ᑎᑎᕋᕐᑎᐅᑎᓪᓗᒍ; 18ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ ᑲᒪᔨᐅᓚᐅᕐᐳᖅ ᓴᐳᓐᓂᐊᕐᑎᓂᒃ ᓯᕆᑍᑎᓂᒃ ᐱᓕᑍᑎᓂᒡᓗ; ᑍᕕᑎᐅᓪᓗ ᐃᕐᓂᖏᑦ ᐊᖓᔪᖅᑳᖑᓚᐅᕐᐳᑦ.#8:18 ᑍᕕᑎᐅᑉ ᐃᕐᓂᖏᑦ ᐊᖓᔪᖅᑳᖑᓚᐅᕐᐳᑦ ᐃᓚᖏᓐᓂ ᐅᖃᕐᓯᒪᔪᑦ ᑐᓂᕐᕈᓯᕐᑎᑦᓯᔨᐅᓚᐅᕐᐳᑦ
Currently Selected:
ᓴᒧᐃᓕ ᐂᑉᐸᖏᑦ 8: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
