ᓴᒧᐃᓕ ᐂᑉᐸᖏᑦ 7
7
ᓁᑕᓂᐅᑉ ᐅᖃᐅᓯᖏᑦ ᑍᕕᑎᒧᑦ
ᑯᕉᓂᑲ ᓯᕗᓪᓖᑦ 17:1-15
1ᐊᖓᔪᖅᑳᕐᔪᐊᖅ ᑍᕕᑎ ᐃᓂᖃᓕᓚᐅᕐᐳᖅ ᐊᖓᔪᖅᑳᕐᔪᐊᑉ ᐃᒡᓗᖓᓂ, ᐊᑕᓂᐅᓪᓗ ᓴᐳᑎᓯᒪᓚᐅᕐᐹ ᐊᑭᕋᓕᒫᖏᓐᓂᑦ ᖃᓂᒋᔭᖓᓃᑦᑐᓂᑦ, 2ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ ᓁᑕᓂᒧᑦ ᐊᑕᓂᐅᑉ ᐅᖃᕐᑎᖓᓄᑦ, “ᑕᑯᒋᑦ ᐃᒡᓗᒦᑉᐳᖓ ᕿᔪᑦᓯᐊᕙᖕᓄᑦ ᓰᑕᕆᓄᑦ ᓯᑎᔪᓄᑦ ᓴᓇᓯᒪᔪᒥ, ᒎᑎᐅᓪᓕ ᐃᒃᓯᕐᕕᖁᑎᖓ ᑐᐱᕐᒦᑐᐃᓐᓇᕐᑎᓪᓗᒍ!”
3ᓁᑕᓂᓗ ᑭᐅᕗᖅ, “ᐃᓱᒪᒋᔧᑦ ᐊᑐᕐᓗᒍ ᐱᓇᓱᐊᓕᕆᑦ; ᐊᑕᓂᐅᑉ ᐃᓚᒋᒻᒪᑎᑦ.” 4ᐅᓐᓄᒃᑎᓪᓗᒍᓕ ᐊᑕᓂᐅᑉ ᐅᖃᐅᓯᖓ ᓁᑕᓂᒧᐊᕐᐳᖅ, 5“ᐱᔨᒐ ᑍᕕᑎ ᐅᐸᒡᓗᒍ ᐅᖃᐅᑎᔭᕐᑐᕈᒃ, ‘ᐊᑕᓂᖅ ᐃᒫᒃ ᐅᖃᕐᐳᖅ: ᐃᒡᓗᒥᒃ ᐃᓂᒃᓴᓐᓂᒃ ᓴᓇᔪᒪᕖᑦ? 6ᑍᒪᓐᖓᓂᑦ ᐃᓴᕆᐊᓕᒥᐅᑦ ᐊᐅᓪᓚᐅᑎᓚᐅᕐᓯᒪᒐᒃᑭᑦ ᐄᑦᔨᑉᑎᒥᑦ ᒫᓐᓇᒧᑦ ᑎᑭᓪᓗᒍ ᐃᓂᖃᓚᐅᕐᓯᒪᓐᖏᓚᖓ ᐃᒡᓗᒥᒃ, ᐊᐅᓪᓚᖃᑕᐅᖃᑦᑕᓚᐅᕐᐳᖓᓕ ᑐᐱᕐᒥ ᐃᓂᖃᕐᓗᖓ. 7ᐊᐅᓪᓚᖃᑕᐅᖃᑦᑕᕐᑎᓪᓗᖓ ᐃᓴᕆᐊᓕᒥᐅᓕᒫᑦ ᐱᖃᑎᒋᓪᓗᒋᑦ, ᐊᐱᕆᓚᐅᕐᓯᒪᓐᖏᓚᖓ ᓯᕗᓕᕐᑎᓂᒃ ᑎᓕᓯᒪᔭᓐᓂᒃ, ᓱᖕᒪᑦ ᓴᓇᓚᐅᕐᓯᒪᓐᖏᓚᓰ ᐃᒡᓗᒥᒃ ᐃᓂᒃᓴᓐᓂᒃ ᕿᔪᑦᓯᐊᕙᖕᓄᑦ ᓰᑕᕆᓄᑦ ᓴᓇᓯᒪᔪᒥᒃ?’
8“ᒫᓐᓇ ᑍᒤᒻᒪᑦ ᐱᔨᒐ ᑍᕕᑎ ᐅᖃᐅᑎᔭᕐᑐᕈᒃ, ‘ᐊᑕᓂᖅ ᖁᑦᓯᖕᓂᕐᐹᖑᔪᖅ ᐃᒫᒃ ᐅᖃᕐᐳᖅ, ᕾᖁᓚᐅᕐᐸᒋᑦ ᓰᐱᓂᒃ ᐰᕐᓯᔨᐅᑎᓪᓗᑎᑦ, ᐊᐅᓚᑦᓯᔨᐅᖁᓪᓗᑎᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ. 9ᐃᓚᒌᓐᓇᓚᐅᕐᐸᒋᑦ ᓇᒧᑐᐃᓐᓇᖅ ᐂᑎᓪᓗᑎᑦ, ᐊᑭᕋᓕᒫᑎᓪᓗ ᓵᓚᒋᖃᑦᑕᓚᐅᕐᐸᒃᑲ ᐱᓪᓗᑎᑦ; ᐅᐱᓐᓇᕐᑐᓐᖑᕐᑎᓐᓂᐊᕐᐸᒋᑦ, ᑍᒃᑯᑎᑐᓇᖅ ᐅᐱᓐᓇᕐᑑᓯᒪᔪᑎᑐᑦ ᓄᓇᕐᔪᐊᕐᒥ. 10ᐃᓂᒃᓴᒥᒃ ᓂᕈᐊᕐᓂᐊᕐᐳᖓ ᐃᓄᖁᑎᒃᑲ ᐃᓴᕆᐊᓕᒥᐅᑦ ᐃᓂᖃᑦᓯᐊᖁᓪᓗᒋᑦ, ᓇᖕᒥᓂᖅ ᓄᓇᖃᖁᓪᓗᒋᑦ, ᐸᕝᕕᓴᒃᑕᐅᖃᑦᑕᖏᓪᓗᑎᒃ ᓇᓪᓕᐊᓐᓄᓪᓘᓐᓃᑦ; ᐃᓴᒋᔭᖃᖏᑦᑐᓄᓪᓗ ᐸᒡᕕᓴᒃᑕᐅᖃᑦᑕᕈᓐᓁᖁᓪᓗᒋᑦ, ᓯᕗᓕᕆᓚᐅᕐᑕᖏᑎᑐᑦ. 11ᑍᒪᓐᖓᑦ ᐃᓱᐊᕐᓮᔨᓂᒃ ᑎᓕᓯᖃᑦᑕᓕᓚᐅᕐᓂᓐᓂᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ; ᐸᒡᕕᓴᒃᑕᐅᑎᓐᓂᐊᕈᓐᓁᕐᐸᑦᓯ ᐊᑭᕋᕐᑐᕐᑎᓕᒫᑦᓯᓐᓂᑦ. ᓱᓕᓗ ᐊᑕᓂᐅᑉ ᓇᓗᓁᕐᓯᕕᒋᓪᓗᓯ ᐅᖃᐅᑎᕚᓯ ᐊᑕᓂᐅᑉ ᑭᖑᕚᒃᓴᓕᐅᕐᑎᓐᓂᐊᓕᕐᐹᓯ. 12#ᐃᓐᖏᕈᑦ 89:3,4; 132:11; ᔪᐊᓇᓯ 7:42; ᐋᐴᓯᑕᓖᑦ 2:30.ᑐᖁᒍᕕᓪᓗ ᓯᕗᓕᕕᓂᕐᓄᑦ ᐃᓗᕕᕐᑕᐅᖃᑕᐅᔪᒫᕐᐳᑎᑦ, ᑭᖑᕚᕕᓪᓗ ᐃᓚᖓᑦ ᐊᖓᔪᖅᑳᕐᔪᐊᕈᕐᑎᑦᓱᒫᕐᐸᕋ ᐊᑕᓂᐅᕕᖓᓗ ᓴᓐᖏᔫᔪᒫᕐᐳᖅ. 13ᑖᓐᓇ ᓴᓇᔪᒫᕐᐳᖅ ᐃᒡᓗᒃᓴᓐᓂᒃ, ᑖᑦᓱᒪᓗ ᐊᖓᔪᖅᑲᐅᕕᖓ ᑲᔪᓯᑎᑦᓱᒫᕐᐸᕋ ᐃᓱᖃᖏᑦᑐᒧᑦ. 14#ᐃᓐᖏᕈᑦ 89:26,27; 2 ᑯᕆᓐᑎ 6:18; ᐄᑉᕈᐃᓄᑦ 1:5.ᑖᑦᓱᒪ ᐊᑖᑕᒋᔪᒫᕐᐹᖓ, ᑖᓐᓇᓗ ᐃᕐᓂᕆᔪᒫᕐᐸᕋ. ᑖᓐᓇᓗ ᐊᔪᕐᑐᓕᒃᐸᑦ, ᓱᒋᐊᕈᒫᕐᐸᕋ ᐊᑖᑕᐅᔪᑐᑦ, ᐊᑖᑕᐅᑉ ᓱᒋᐊᕐᓯᕙᖕᓂᖓᑐᑦ ᐃᕐᓂᕐᒥᓂᒃ. 15ᑭᓯᐊᓂᓕ ᑖᑦᓱᒧᖓ ᓇᒡᓕᖕᓂᕋ ᐲᓚᐅᕐᓯᒪᓂᐊᓐᖏᓚᕋ, ᓴᐅᓕᒥᑦ ᐲᕐᓯᓚᐅᕐᓂᑦᑐᑦ, ᑖᓐᓇ ᐊᒡᕔᕐᑎᓚᐅᕋᒃᑯ ᐊᖓᔪᖅᑳᕐᔪᐊᓐᖑᖔᖁᓪᓗᑎᑦ. 16#ᐃᓐᖏᕈᑦ 89:36,37.ᑭᖑᕚᑎᓪᓕ ᐊᑕᓂᐅᕖᓪᓗ ᓱᖁᓯᔪᐃᑦᑑᑎᑦᓱᒪᕙᒃᑲ ᐃᓱᖃᖏᑦᑐᒧᑦ; ᐊᖓᔪᖅᑲᐅᓃᓪᓗ ᑲᔪᓯᓂᐊᕐᐳᖅ ᐃᓱᖃᖏᑦᑐᒧᑦ.’”
17ᓁᑕᓂᐅᑉ ᑍᕕᑎ ᐅᖃᐅᑎᓚᐅᕐᐹ ᒎᑎᐅᑉ ᐅᖃᕐᑕᐅᖁᔭᓕᒫᖏᓐᓂᒃ ᑕᑯᑎᑦᓯᑦᔪᑎᒋᓚᐅᕐᑕᓕᒫᖏᓐᓂᒡᓗ ᑖᑦᓱᒧᖓ.
ᑍᕕᑎᐅᑉ ᑐᒃᓯᐊᕐᓂᖓ ᖁᔭᓕᓂᕐᒧᑦ
ᑯᕉᓂᑲ ᓯᕗᓪᓖᑦ 17:16-27
18ᑕᒪᑐᒪ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᑍᕕᑎ ᑐᐱᕐᒧᐊᕐᐳᖅ ᐊᑕᓂᐅᑉ ᓇᔪᕐᑕᖓᓄᑦ, ᐃᖏᓪᓗᓂᓗ ᑐᒃᓯᐊᕐᐳᖅ ᐅᖃᕐᓗᓂ, “ᐊᑕᓃᖅ ᒎᑏ, ᓇᓗᖅᑯᑎᕗᖓ ᖃᓄᐃᓕᐅᕐᓯᒪᓂᕆᔭᕐᓂᒃ ᐅᕙᓐᓄᑦ ᐃᓚᓐᓄᓪᓗ. 19ᑍᒤᒃᑲᓗᐊᕐᒪᑦ ᓱᓕᓕ ᐊᖏᓂᕐᓴᒥᒃ ᐱᓇᓱᐊᓕᕆᕗᑎᑦ ᐊᑕᓃᖅ ᒎᑏ; ᐊᖏᕈᑎᖃᕐᐳᑎᑦ ᑭᖑᕚᓐᓄᑦ ᓯᕗᓂᕐᒥ ᑎᑭᑦᓱᒫᕐᑐᓄᑦ, ᑕᑯᑎᓪᓗᖓᓗ ᓯᕗᓂᕐᒥ ᑭᖑᕚᕇᖑᔪᒫᕐᑐᓂᒃ, ᐊᑕᓃᖅ ᒎᑏ! 20ᖃᓄᕐᓗ ᐅᖃᒃᑲᓐᓂᕈᓐᓇᕐᐳᖔ ᐃᓕᖕᓄᑦ? ᐱᔩᑦ ᖃᐅᔨᒪᒐᕕᐅᒃ, ᐊᑕᓃᖅ ᒎᑏ! 21ᑍᒫᒃ ᑕᒪᓐᓇ ᐊᖏᕈᑎᒋᒐᕕᐅᒃ, ᐆᒻᒪᑎᕕᓪᓗ ᐱᔪᒪᔭᕆᓪᓗᓂᐅᒃ ᑕᒪᒃᑯᐊ ᑲᒪᓇᕐᑐᕐᔪᐊᑦ ᐱᓇᓱᐊᕐᓯᒪᕙᑎᑦ, ᐱᔩᓪᓗ ᖃᐅᔨᑎᓪᓗᒍ ᑕᒪᑐᒥᖓ. 22ᑍᒤᒻᒪᑦ ᐊᖏᔪᕐᔪᐊᖑᕗᑎᑦ, ᐊᑕᓃᖅ ᒎᑏ; ᓇᓪᓕᐊᓐᓂᒡᓘᓐᓃᑦ ᐊᑦᔨᖃᓐᖏᓚᑎᑦ, ᐊᓯᖕᓂᒡᓗ ᒎᑎᑕᖃᓐᖏᓚᖅ, ᑐᓴᕐᓯᒪᔭᓕᒫᕗᑦ ᒪᓕᒡᓗᒋᑦ. 23#ᒨᓯᓯ ᑕᓪᓕᒪᖏᑦ 4:34.ᐃᓴᕆᐊᓕᒥᐅᑦ ᐃᓅᖃᑎᒌᒡᔪᐊᓂᒃ ᐊᑦᔨᖃᓐᖏᓚᑦ ᓄᓇᕐᔪᐊᕐᒥ, ᐄᑦᔨᑉᑎᒥᑦ ᓴᐳᑎᔭᕐᑐᓚᐅᕐᐸᑎᑦ ᐃᓄᖁᑎᑎᑦ ᐃᓚᒋᔪᒪᓪᓗᒋᑦ, ᑲᒪᓇᕐᑐᕐᔪᐊᓪᓗ ᐱᓂᐊᕐᓂᕆᓚᐅᕐᐸᑎᑦ ᑖᒃᑯᓄᖓ ᖃᐅᔨᒪᔭᐅᓕᕐᓗᑎᒡᓗ ᓯᓚᕐᔪᐊᒥᐅᓄᑦ, ᐃᓅᖃᑎᒌᒡᔪᐊᑦ ᒎᑎᓐᖑᐊᖏᓪᓗ ᓯᖏᓚᐅᕐᐸᑎᑦ ᐃᓄᖁᑎᑎᑦ ᓄᓇᑖᖔᖁᓪᓗᒋᑦ. 24ᐃᓴᕆᐊᓕᒥᐅᓪᓗ ᓇᖕᒥᓂᕐᑖᕆᓯᒪᕙᑎᑦ ᐃᓄᖁᑎᑖᕆᓪᓗᒋᑦ ᐃᓱᖃᖏᑦᑐᒧᑦ; ᐃᕝᕕᓪᓗ ᐊᑕᓃᖅ, ᒎᑎᒋᔭᐅᓕᕐᓗᑎᑦ ᑖᒃᑯᓄᖓ.
25“ᒫᓐᓇᓗ, ᐊᑕᓃᖅ ᒎᑏ, ᐊᖏᕈᑎᒋᓯᒪᔭᕕᑦ ᓱᓕᓂᖓ ᓇᓗᓁᓕᕈᒃ ᐅᕙᓐᓄᑦ ᑭᖑᕚᓐᓄᓪᓗ, ᐅᖃᐅᓯᕆᓚᐅᕐᑕᑎᓪᓗ ᑲᔪᓯᑎᓪᓗᒋᑦ. 26ᐊᑎᕐᐱᑦ ᖃᐅᔨᒪᔭᐅᓂᖓ ᐊᖏᒡᓕᓂᐊᕐᐳᖅ ᐃᓱᖃᖏᑦᑐᒧᑦ, ᐅᖃᕐᓗᑎᒃ, ‘ᐊᑕᓂᖅ ᖁᑦᓯᖕᓂᕐᐹᖑᔪᖅ ᒎᑎᐅᕗᖅ ᐃᓴᕆᐊᓕᒥᐅᓄᑦ,’ ᑲᔪᓯᑏᓐᓇᕐᓂᐊᕐᐸᑎᓪᓗ ᐱᔨᕕᑦ ᑍᕕᑎᐅᑉ ᑭᖑᕚᖏᑦ ᓵᖕᓂ. 27ᐃᕝᕕᑦ ᐊᑕᓃᖅ ᖁᑦᓯᖕᓂᕐᐹᖑᔪᑎᑦ, ᐃᓴᕆᐊᓕᒥᐅᑦ ᒎᑎᖓ, ᑕᒪᓐᓇ ᐱᔨᖕᓄᑦ ᑕᑯᔭᐅᑎᓚᐅᕋᕕᐅᒃ ᐅᖃᕐᓗᑎᑦ, ‘ᑭᖑᕚᑎᑦ ᐊᖓᔪᖅᑳᕐᔪᐊᖑᔪᒫᕐᐳᑦ’; ᑍᒤᒻᒪᑦ ᐱᔩᑦ ᓴᐱᖏᓪᓗᓂ ᑐᒃᓯᐊᕈᓐᓇᓕᕐᐳᖅ ᑐᒃᓯᐊᕐᓂᕐᒥᒃ ᑕᒪᑐᒥᖓ ᐃᓕᖕᓄᑦ.
28“ᒫᓐᓇᓗ, ᐊᑕᓃᖅ ᒎᑏ, ᐃᕝᕕᑦ ᒎᑎᐅᕗᑎᑦ, ᐅᖃᐅᓯᑎᓪᓗ ᓱᓕᓪᓗᑎᒃ, ᐊᖏᕈᑎᖃᕐᓗᑎᓪᓗ ᐱᐅᔪᐊᓗᖕᒥᒃ ᑕᒪᑐᒥᖓ ᐱᔨᖕᓄᑦ; 29ᒫᓐᓇ ᑍᒤᒻᒪᑦ ᖁᕕᐊᒋᒍᕕᐅᒃ ᑐᒃᓯᐊᕐᐳᖓ ᐱᔨᕕᑦ ᑭᖑᕚᖏᑦ ᓮᒻᒪᕐᑎᓚᐅᒃᑭᑦ, ᑲᔪᓯᑦᓯᐊᖁᓪᓗᒋᑦ ᓵᖕᓂ; ᐃᕝᕕᑦ, ᐊᑕᓃᖅ ᒎᑏ, ᐅᖃᓚᐅᕋᕕᑦ, ᓮᒻᒪᕐᑎᑦᓯᓃᓪᓗ ᐱᔨᕕᑦ ᑭᖑᕚᖏᓐᓄᑦ ᑲᔪᓯᖁᓪᓗᒍ ᐃᓱᖃᖏᑦᑐᒧᑦ.”
Currently Selected:
ᓴᒧᐃᓕ ᐂᑉᐸᖏᑦ 7: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
