ᓴᒧᐃᓕ ᐂᑉᐸᖏᑦ 6
6
ᐊᖏᖃᑎᒌᖕᓂᐅᑉ ᐃᒃᓯᕐᕕᖓᑕ ᔨᕉᓴᓕᒧᐊᕐᑕᐅᓂᖓ
ᑯᕉᓂᑲ ᓯᕗᓪᓖᑦ 13:1-14; 15:25—16:6,43
1ᑍᕕᑎᐅᑉ ᐅᓇᑕᕐᑐᒃᓴᖁᑎᓂ ᐱᓯᑎᐅᓂᕐᐹᑦ ᐃᓴᕆᐊᓕᒥᐅᓂᑦ ᑲᑎᖁᓚᐅᕆᕔᑦ, ᑖᒃᑯᐊᓗ 30,000ᓴᐅᓚᐅᕐᐳᑦ. 2#ᒨᓯᓯ ᐂᑉᐸᖏᑦ 25:22.ᑍᕕᑎᐅᓪᓗ ᓯᕗᓕᕐᓗᒋᑦ ᐹᓚᒧᐊᖃᑎᒋᕔᑦ ᔫᑕᒦᑦᑐᒧᑦ, ᐂᒃᓯᕐᓗᑎᒃ ᐊᑕᓂᐅᑉ ᐃᒃᓯᕐᕕᖁᑎᖓᓂᒃ, ᑖᑦᓱᒥᖓ ᐊᑎᖃᕐᑎᑕᐅᔪᒥᒃ ᐊᑕᓂᖅ ᐊᔪᒐᖃᖏᑦᑐᖅ ᐃᒃᓯᕙᐅᑕᕐᔪᐊᕐᒥ ᐃᒃᓯᕙᓯᔪᖅ ᓯᕈᐱᒻ ᖁᓛᓃ. 3#ᓴᒧᐃᓕ ᓯᕗᓪᓖᑦ 7:1,2.ᐂᔭᐅᓚᐅᕐᐳᖅ ᐊᐱᓇᑕᐅᑉ ᐊᖏᕐᕋᖓᓂᑦ ᐱᖑᕐᒦᑦᑐᒥᑦ, ᐃᓕᓪᓗᒍᓗ ᐊᒃᓴᓗᐊᓕᖕᒧᑦ ᓄᑖᒧᑦ; ᐆᔭᓗ ᐊᕼᐂᐅᓗ ᐊᐱᓇᑕᐅᑉ ᐃᕐᓂᖏᒃ, ᐊᐅᓚᑦᓯᓚᐅᕐᐴᒃ ᐊᒃᓴᓗᐊᓕᖕᒥᒃ ᓅᑕᐅᓕᕐᑎᓪᓗᒍ. 4ᐊᕼᐂᐅᓗ ᒎᑎᐅᑉ ᐃᒃᓯᕐᕕᖁᑎᖓᑕ ᓯᕗᓂᐊᓂ ᐱᓱᓚᐅᕐᐳᖅ. 5ᑍᕕᑎᒃᑯᑦ ᐃᓴᕆᐊᓕᒥᐅᓕᒫᓪᓗ ᑖᓂᓯᓚᐅᕐᐳᑦ ᐃᓐᖏᕐᓗᑎᒡᓗ ᐱᔪᓐᓇᕐᓂᓕᒫᑎᒃ ᐊᑐᕐᓗᒍ, ᐊᑕᓂᕐᒥᒃ ᐅᐱᒍᓱᖕᓂᕐᒧᑦ ᓂᓪᓕᐊᑎᑦᓯᓚᐅᕐᐳᑦ ᕼᐊᕐᐱᓂᒃ, ᓄᖃᕐᑎᓕᖕᓂᒡᓗ, ᐊᓇᐅᓪᓚᒐᕐᓂᒃ, ᐊᕕᓗᕋᐅᑎᓂᒃ, ᓯᕙᓂᕈᑎᓂᒡᓗ.
6ᓇᑰᓐᓗ ᓯᖃᓪᓕᓯᕕᖓᓄᑦ ᑎᑭᑎᓪᓗᒋᑦ, ᐃᒻᒧᒃᓯᐅᒐᖅ ᐅᕐᕈᑲᓴᖕᒪᑦ, ᐆᔭᐅᑉ ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᐊᔭᑉᐸᒃᐹ. 7ᐊᑕᓂᐅᓪᓗ ᓂᓐᖓᐅᓯᖓ ᐆᓴᒧᑦ ᑎᑭᑉᐳᖅ; ᒎᑎᐅᓪᓗ ᐊᓇᐅᕚ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᓂᒃ ᐊᒃᑐᕐᓯᓂᖓᓄᑦ; ᐆᔭᓗ ᑐᖁᕗᖅ ᐃᒃᓯᕐᕕᐅᑉ ᓴᓂᐊᓂ. 8ᑍᕕᑎᓗ ᓂᓐᖓᒃᐳᖅ ᐊᑕᓂᐅᑉ ᐆᔭᒥᒃ ᓂᓐᖓᖕᓂᕐᒧᑦ ᓱᒋᐊᕐᓯᓂᖓᓄᑦ; ᑍᒪᓐᖓᓂᓪᓗ ᑖᓐᓇ ᓄᓇ ᑍᔭᐅᓕᓚᐅᕐᐳᖅ ᐱᕆᔾ-ᐆᔭᒥᒃ, ᐅᓪᓗᒥᒧᑦ ᑎᑭᓪᓗᒍ.
9ᑍᕕᑎᓗ ᐅᓪᓗᒥ ᑕᕝᕙᓂ ᑲᑉᐱᐊᓱᓕᓚᐅᕐᐳᖅ ᐊᑕᓂᕐᒥᒃ ᐅᖃᕐᓗᓂᓗ, “ᖃᓄᕐᓕ ᐊᑕᓂᐅᑉ ᐃᒃᓯᕐᕕᖁᑎᖓ ᓇᒃᓴᕈᓐᓇᓕᕐᐸᕋ?” 10ᑍᒤᒻᒪᑦ ᐊᑕᓂᐅᑉ ᐃᒃᓯᕐᕕᖁᑎᖓ ᑍᕕᑎᐅᑉ ᔨᕉᓴᓕᒧᐊᕈᑎᔪᒪᔪᓐᓃᓚᐅᕐᐹ; ᓴᓂᕐᕙᐅᑎᓚᐅᕐᐹᓕ ᐅᐱᑦ-ᐄᑕᒻ ᐃᒡᓗᖓᓄᐊᕈᑎᓪᓗᒍ ᒋᑍᑎᒥᐅᑕᕐᒧᑦ. 11#ᑯᕉᓂᑲ ᓯᕗᓪᓖᑦ 26:4,5.ᐊᑕᓂᐅᓪᓗ ᐃᒃᓯᕐᕕᖁᑎᖓ ᒋᑍᑎᒦᓚᐅᕐᐳᖅ ᑕᖅᑭᓂᒃ ᐱᖓᓱᓂᒃ; ᐊᑕᓂᐅᓪᓗ ᓮᒻᒪᕐᑎᓚᐅᕐᐰᑦ ᐅᐱᑦ-ᐄᑕᒻ ᐃᓚᖏᓪᓗ.
12ᐊᖓᔪᖅᑳᕐᔪᐊᕐᓗ ᑍᕕᑎ ᐅᖃᐅᑦᔭᐅᕗᖅ, “ᐊᑕᓂᐅᑉ ᐅᐱᑦ-ᐄᑕᒻ ᐃᒡᓗᒥᐅᖃᑎᖏᓪᓗ ᓮᒻᒪᕐᑎᑉᐰᑦ ᐱᖁᑎᓕᒫᖏᓪᓗ, ᒎᑎᐅᑉ ᐃᒃᓯᕐᕕᖁᑎᖓ ᐱᓪᓗᒍ.” ᑍᒤᒻᒪᑦ ᑍᕕᑎᐅᑉ ᐃᒃᓯᕐᕕᒃ ᐂᓚᐅᕐᐹ ᐅᐱᑦ-ᐄᑕᒻ ᐃᒡᓗᖓᓂᑦ ᔨᕉᓴᓕᒧᐊᕈᑎᓪᓗᒍᓗ ᖁᕕᐊᓱᒃᑐᐊᓘᓪᓗᑎᒃ. 13ᐊᑕᓂᐅᑉ ᐃᒃᓯᕐᕕᖁᑎᖓᓂᒃ ᐊᒡᔭᕐᓯᔪᑦ ᐱᖓᓲᔪᕐᑐᓂᒃ ᐊᓪᓗᕋᓗᐊᕐᑎᓪᓗᒋᑦ ᑍᕕᑎᐅᑉ ᓄᖅᑲᕐᑎᑉᐰᑦ, ᑐᓂᕐᕈᓯᓚᐅᕐᐳᕐᓗ ᐊᑕᓂᕐᒧᑦ ᐃᒻᒧᒃᓯᐅᒐᕐᒥᒃ ᓄᕐᕋᕐᒥᒡᓗ ᖁᐃᒃᓯᓴᕐᑕᐅᓯᒪᔪᒥᒃ. 14ᑍᕕᑎᓗ ᑖᓂᓯᓚᐅᕐᐳᖅ ᐊᑕᓂᐅᑉ ᓵᖓᓂ ᐱᔪᓐᓇᕐᓂᓕᒫᒥᓂᒃ ᐊᑐᕐᓗᓂ; ᕿᑎᕈᓯᕐᓯᒪᓪᓗᓂ ᖃᓪᓗᓈᕐᑕᒥᒃ ᓵᑦᑐᒥᒃ ᑖᓐᓇᓗ ᐊᑐᕐᑕᑐᐊᕆᓪᓗᒍ. 15ᑕᕝᕙ ᑍᕕᑎᐅᑉ ᐃᓴᕆᐊᓕᒥᐅᓕᒫᑦ ᐱᖃᑎᒋᓪᓗᒋᑦ ᐃᒃᓯᕐᕕᒃ ᔨᕉᓴᓕᒧᐊᕈᑎᓚᐅᕐᐹ ᖁᕕᐊᓱᒡᓗᑎᒃ ᕾᒐᓛᕐᓗᑎᒃ ᑎᑦᑐᓚᐅᑎᓄᓪᓗ ᓂᑦᔮᓪᓗᑎᒃ.
16ᐃᒃᓯᕐᕕᒃ ᐃᒡᓗᒐᓴᖕᓄᐊᕐᑕᐅᓕᕐᑎᓪᓗᒍ, ᒤᑲᐅᓪ ᓴᐅᓕᐅᑉ ᐸᓂᖓ ᑕᑯᓴᕋᒥ ᐃᒐᓛᒃᑯᑦ, ᑕᑯᕗᖅ ᐊᖓᔪᖅᑳᕐᔪᐊᕐᒥᒃ ᑍᕕᑎᒥᒃ ᑖᓂᓯᕐᑐᒥᒃ ᕿᒡᒋᕐᑕᕐᑐᒥᒡᓗ ᐊᑕᓂᐅᑉ ᓵᖓᓂ; ᐆᒻᒪᑎᒥᒍᓪᓗ ᖁᕕᐊᒋᔪᓐᓃᓚᐅᕐᐹ. 17ᐊᑕᓂᐅᓪᓗ ᐃᒃᓯᕐᕕᖁᑎᖓ ᐃᑎᐅᑦᔭᐅᕗᖅ, ᐃᓂᖓᓄᓪᓗ ᐃᓕᔭᐅᓪᓗᓂ, ᑐᐱᐅᑉ ᐃᓗᐊᓄᑦ ᑍᕕᑎᐅᑉ ᐋᖅᑭᒃᓱᓚᐅᕐᑕᖓᓄᑦ; ᑍᕕᑎᓗ ᑐᓂᕐᕈᓯᓚᐅᕐᐳᖅ ᐃᑯᐊᓚᑦᓯᓪᓗᓂᒃ ᑐᓂᕐᕈᑎᓂᒃ ᐃᓚᒌᑦᓯᐊᕐᓂᕐᒧᓪᓗ ᑐᓂᕐᕈᑎᒥᒃ ᐊᑕᓂᕐᒧᑦ. 18ᑍᕕᑎᓗ ᑐᓂᕐᕈᓯᕇᕋᒥ ᑕᒪᒃᑯᓂᖓ ᑐᓂᕐᕈᑎᓂᒃ, ᐃᓄᐃᑦ ᓮᒻᒪᕐᑎᑉᐰᑦ ᐊᑕᓂᐅᑉ ᖁᑦᓯᖕᓂᕐᐹᖑᔫᑉ ᐊᑎᖓᓂ, 19#ᑯᕉᓂᑲ ᓯᕗᓪᓖᑦ 16:43.ᓂᖀᓪᓗ ᑐᓐᓂᕐᓴᐅᑎᒋᕔᑦ ᐃᓄᓕᒫᓄᑦ, ᐃᓴᕆᐊᓕᒥᐅᓕᒫᓄᑦ ᐊᖑᑎᓄᑦ ᐊᕐᓇᓄᓪᓗ, ᐊᑐᓂᑦ ᑐᓂᓯᕕᒋᕔᑦ ᓂᐊᖂᔭᒥᒃ, ᐃᒐᓯᒪᔪᒥᒡᓗ ᓂᕿᒥᒃ, ᓂᐊᖂᔭᓂᒡᓗ ᐸᐅᕐᖓᐅᔭᓕᖕᓂᒃ. ᑭᖑᓂᖓᒍᓪᓗ ᐃᓄᓕᒫᑦ ᑕᕝᕙᓐᖓᑦ ᕿᒪᕉᑎᕗᑦ, ᐊᑐᓂᑦ ᐊᖏᕐᕋᒥᖕᓄᐊᕐᓗᑎᒃ.
20ᑭᖑᓂᖓᒍᑦ ᑍᕕᑎ ᐊᖏᕐᕋᒥᓄᐊᕐᐳᖅ ᐃᓚᒥᓄᑦ, ᒤᑲᐅᓪᓕ ᓴᐅᓕᐅᑉ ᐸᓂᖓᑕ ᐸᕐᕆᐊᕐᐹ, ᐅᖃᐅᑎᓪᓗᒍᓗ, “ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓ ᐃᒻᒥᓂᒃ ᐅᐱᓐᓇᕐᑎᑉᐳᖅ ᐅᓪᓗᒥ, ᐃᒻᒥᓂᒃ ᑕᑯᔭᐅᑎᓚᐅᕐᒪᑦ ᐱᔨᒥᓄᑦ ᐊᕐᓇᓄᑦ, ᓯᓔᑦᑐᑎᑐᑦ ᑲᓐᖑᓱᒐᓂ ᐊᓐᓄᕅᔭᓚᐅᕐᐳᖅ ᑕᑯᓐᓇᕐᑎᓪᓗᒋᑦ!”
21ᑍᕕᑎᓗ ᑭᐅᕗᖅ ᒤᑲᐅᓪᒧᑦ, “ᑖᓂᓯᖅᑲᐅᕗᖓ ᐊᑕᓂᖅ ᐅᐱᒋᓪᓗᒍ, ᐅᕙᓐᓂᒃ ᓂᕈᐊᓚᐅᕐᑐᒧᑦ ᐊᑖᑍᑦ ᐃᓇᖏᕐᑕᐅᖁᓪᓗᒍ, ᐃᓚᖏᓐᓄᓪᓗ ᓯᕗᓕᕐᑎᐅᖁᓪᓗᖓ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓴᕆᐊᓕᒥᐅᓄᑦ, ᑖᓂᓰᓐᓇᕐᓂᐊᕐᐳᖓᓗ ᖁᕕᐊᓱᒡᓗᖓ ᐊᑕᓂᕐᒥᒃ ᐅᐱᒍᓱᒡᓗᖓ. 22ᐅᕙᓐᓂᒃ ᑕᒪᑐᒪᓐᖓᑦ ᑕᑯᒥᓇᖏᓐᓂᕐᓴᐅᓕᕐᑎᓐᓂᐊᕐᐳᖓ, ᐃᓕᖕᓄᑦ ᓱᓇᐅᖏᑦᑑᓂᐊᕋᓗᐊᕐᐳᖓ; ᐱᔨᖕᓄᓪᓕ ᐊᕐᓇᓄᑦ ᐅᖃᐅᓯᕆᔭᕐᓄᑦ, ᐅᐱᒋᔭᐅᑦᓯᐊᕐᓂᐊᕐᐳᖓ!”
23ᒤᑲᐅᓪᓗ ᓴᐅᓕᐅᑉ ᐸᓂᖓ ᕿᑐᕐᖓᕐᑖᓚᐅᓐᖏᓚᖅ ᑐᖁᓂᕐᒥᓄᑦ ᑎᑭᓪᓗᓂ.
Currently Selected:
ᓴᒧᐃᓕ ᐂᑉᐸᖏᑦ 6: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
