ᓴᒧᐃᓕ ᐂᑉᐸᖏᑦ 5
5
ᑍᕕᑎᐅᑉ ᐊᖓᔪᖅᑳᕐᔪᐊᓐᖑᕐᓂᖓ ᐃᓴᕆᐊᓕᒥᐅᓄᑦ ᔫᑕᒥᐅᓄᓪᓗ
ᑯᕉᓂᑲ ᓯᕗᓪᓖᑦ 11:1-9; 14:1-7
1ᑕᕝᕙ ᐃᓴᕆᐊᓕᒥᐅᑦ ᑭᖑᕚᓕᒫᖏᑦ ᑍᕕᑎᒧᐊᕐᐳᑦ ᕼᐃᐸᕋᓐᒧᑦ ᐅᖃᐅᑎᓪᓗᒍᓗ, “ᑕᑯᒋᑦ ᓇᖕᒥᓂᕆᔭᐅᕗᒍᑦ ᐊᐅᖃᖃᑕᐅᓪᓗᑕᓗ ᐃᓕᖕᓄᑦ. 2ᑍᑦᓱᒪᓂ, ᓴᐅᓕ ᐊᖓᔪᖅᑳᕐᔪᐊᖑᑎᓪᓗᒍ, ᐃᓴᕆᐊᓕᒥᐅᑦ ᐃᓄᖏᑦ ᐅᓇᑕᕐᓂᒃᑯᑦ ᑕᓯᐅᓚᐅᕐᐸᑎᑦ, ᐊᑕᓂᐅᓪᓗ ᐊᖏᕐᕕᒋᓚᐅᕐᐹᑎᑦ, ‘ᐃᓄᖁᑎᓐᓂᒃ ᐰᕐᓯᔨᐅᓂᐊᕐᐳᑎᑦ, ᐊᖓᔪᖅᑳᕐᔪᕆᔭᐅᓗᑎᓪᓗ.’” 3ᑍᒤᒻᒪᑦ ᐃᓴᕆᐊᓕᒥᐅᑦ ᐃᓄᖏᑕ ᐊᖓᔪᖅᑳᓕᒫᖏᑦ ᐊᖓᔪᖅᑳᕐᔪᐊᒧᐊᓚᐅᕐᐳᑦ ᑍᕕᑎᒧᑦ ᕼᐃᐸᕋᓐᒦᑦᑐᒧᑦ; ᑍᕕᑎᐅᓪᓗ ᐊᖏᖃᑎᒋᓚᐅᕐᐰᑦ ᐊᑕᓂᐅᑉ ᓵᖓᓂ, ᑖᒃᑯᓇᓐᖓᓪᓗ ᓇᐹᕐᑑᑉ ᐅᕐᓱᖓᓄᑦ ᑕᕝᕙᓂ ᐅᕐᓱᕐᑎᕐᑕᐅᕗᖅ, ᐊᖓᔪᖅᑳᕐᔪᐊᓐᖑᕐᑎᓪᓗᒍ ᐃᓴᕆᐊᓕᒥᐅᓄᑦ. 4#ᐊᑕᓃᑦ ᓯᕗᓪᓖᑦ 2:11; ᑯᕉᓂᑲ ᓯᕗᓪᓖᑦ 3:4; 29:27.ᑍᕕᑎ ᐊᕐᕌᒍᖃᓚᐅᕐᐳᖅ 30ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 40ᓂᒃ. 5ᐊᐅᓚᑦᓯᓚᐅᕐᐳᖅ ᔫᑕᒥᒃ ᕼᐃᐸᕋᓐᒦᓪᓗᓂ ᐊᕐᕌᒍᓂᒃ 7ᓂᒃ ᑕᖅᑭᓂᒡᓗ ᐱᖓᓲᔪᕐᑐᓂᒃ; ᔨᕉᓴᓕᒥᓗ ᐊᐅᓚᑦᓯᓚᐅᕐᐳᖅ ᐃᓴᕆᐊᓕᒥᐅᓕᒫᓂᒃ ᔫᑕᒥᒡᓗ ᐊᕐᕌᒍᓂᒃ 33ᓂᒃ.
6 #
ᔮᓱᐊ 15:63; ᐃᓗᐊᕐᓮᔩᑦ 1:21. ᐊᖓᔪᖅᑳᕐᔪᐊᕐᓗ ᑍᕕᑎ ᐃᓚᖏᓪᓗ ᐅᓇᑕᕆᐊᓚᐅᕐᐳᑦ ᔨᕉᓴᓕᒧᑦ ᔨᐳᓮᑎᒃᑯᓐᓂᒃ, ᑕᕝᕙᓂ ᓄᓇᖃᕐᑐᓂᒃ, ᑖᒃᑯᐊ ᐅᖃᓚᐅᕐᐳᑦ ᑍᕕᑎᒧᑦ, “ᑕᕝᕗᖓ ᐃᑎᓚᐅᕐᓯᒪᑦᔮᖏᑦᑐᑎᑦ, ᑕᐅᑐᖏᑦᑐᓂᑦ ᑐᓯᐊᑦᑐᓂᓪᓗ ᐅᓂᒃᓯᒪᑎᑕᐅᔪᓐᓇᕐᐳᑎᑦ.” ᐃᓱᒪᖃᓚᐅᕋᒥᒃ, “ᑍᕕᑎ ᐅᕗᖓ ᐃᑎᕈᓐᓇᓐᖏᓚᖅ.” 7ᑍᕕᑎᐅᓪᓕ ᓵᓚᒋᓚᐅᕐᐹ ᑎᒍᓪᓗᒍᓗ ᓮᐅᓂᐅᑉ ᓲᖑᔫᑦᔪᑎᖓ, ᑍᔭᐅᓕᕐᓗᓂᓗ, “ᑍᕕᑎᐅᑉ ᐃᒡᓗᒐᓴᖏᓐᓂᒃ.”
8ᑍᑦᓱᒪᓂ ᐅᓪᓗᒥ ᑍᕕᑎᐅᑉ ᐃᓄᖁᑎᓂ ᐅᖃᐅᑎᓚᐅᕐᐰᑦ, “ᑭᓇᒃᑰᑦ ᐆᒥᓱᖃᑎᒋᕙᒃᑲ ᔨᐳᓮᑎᓂᒃ; ᑐᖁᑦᓱᒪᓪᓗᒋᓪᓗ? ᐊᑏ ᐃᑎᓚᐅᕆᑦᓯ ᐃᒥᐅᑉ ᐊᖅᑯᑎᖓᒍᑦ ᐅᓇᑕᕆᐊᕐᓗᒋᑦ ᑕᐅᑐᖏᑦᑐᑦ ᑐᓯᐊᑦᑐᓪᓗ.” ᑍᒤᒻᒪᑦ ᐃᒫᒃ ᐅᖃᐅᓯᕐᑕᖃᕐᐳᖅ, “ᑕᐅᑐᖏᑦᑐᑦ ᑐᓯᐊᑦᑐᓪᓗ ᐃᑎᕐᓂᐊᓐᖏᓚᑦ ᐊᑕᓂᐅᑉ ᐃᒡᓗᖓᓄᑦ.”
9ᐊᕙᓗᕐᔪᐊᓕᒡᓗ ᑎᒍᔭᕇᕋᒥᐅᒃ, ᑍᕕᑎ ᑍᑲᓂ ᓄᓇᑖᓚᐅᕐᐳᖅ, ᐊᑦᑎᕐᓗᒍᓗ ᑍᕕᑎᐅᑉ ᐃᒡᓗᒐᓴᖏᓐᓂᒃ. ᐃᒡᓗᒐᓴᓕᐅᓚᐅᕐᐳᕐᓗ ᑲᓂᒋᔭᖓᓃᑦᑐᓂᒃ, ᐱᒋᐊᕐᓗᓂ ᓄᓇᒥᑦ ᐳᕐᑐᓯᒋᐊᕐᓯᒪᔪᒥᑦ ᐱᖑᐊᕐᔫᑉ ᓯᕿᓂᐅᑉ ᓄᐃᕕᐊᓃᑦᑐᒥᑦ ᐃᒡᓗᒐᓮᑦ ᒥᒃᓯᖔᖓᓄᑦ ᑎᑭᓪᓗᑎᒃ. 10ᑍᕕᑎᓗ ᓲᖑᓯᕙᓪᓕᐊᑐᐃᓐᓇᓕᓚᐅᕐᐳᖅ, ᐊᑕᓂᐅᑉ ᒎᑎᐅᑉ ᖁᑦᓯᖕᓂᕐᐹᖑᔫᑉ, ᐃᓚᒋᓚᐅᕐᒪᒍ.
11ᐊᖓᔪᖅᑳᕐᔪᐊᕐᓗ ᕼᐂᕋᒻ ᑍᕆᒥᐅᑕᖅ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑐᓂᒃ ᑍᕕᑎᒧᑦ; ᑐᓂᓪᓗᒍᓗ ᕿᔪᖕᓂᒃ ᓰᑕᕆᓂᒃ ᓯᑎᔪᓂᒃ, ᕿᔪᓕᕆᔨᓂᒃ ᐅᔭᕋᓕᕆᔨᓂᒡᓗ ᐊᖓᔪᖅᑳᕐᔪᐊᑉ ᐃᒡᓗᖓᓂᒃ ᓴᓇᔭᕐᑐᕐᑐᓂᒃ. 12ᑍᕕᑎᓗ ᖃᐅᔨᑦᓯᐊᓕᓚᐅᕐᐳᖅ ᐊᑕᓂᐅᑉ ᐊᖓᔪᖅᑳᕐᔪᐊᖑᓂᕐᒥᒃ ᐱᑎᒻᒪᒍ ᐃᓴᕆᐊᓕᒥᐅᓄᑦ, ᐊᑕᓂᐅᕕᖓᓗ ᐊᔪᕐᓴᕈᓐᓃᕐᑎᑉᐸᓪᓕᐊᓚᐅᕐᒪᒍ ᐃᓄᖁᑎᖏᑦ ᐱᓪᓗᒋᑦ.
13ᓅᓯᒪᓕᕋᒥᓕ ᕼᐃᐸᕋᓐᒥᑦ ᔨᕉᓴᓕᒧᑦ, ᑍᕕᑎ ᓄᓕᐊᒐᕐᑖᒃᑲᓐᓂᓚᐅᕐᐳᖅ ᓄᓕᐊᓂᒃᑲᓐᓂᕐᓗᓂᓗ ᔨᕉᓴᓕᒥᑦ; ᐅᓄᕐᑐᓂᒡᓗ ᐃᕐᓂᕐᑖᒃᑲᓐᓂᓚᐅᕐᐳᖅ ᐸᓂᒃᑖᒃᑲᓐᓂᕐᓗᓂᓗ. 14ᐅᑯᐊ ᑕᕝᕙ ᕿᑐᕐᖓᕐᑖᕆᓚᐅᕐᑕᖏᑦ ᔨᕉᓴᓕᒦᓕᕐᓗᓂ: ᓵᒧᐊ, ᓲᐸᑉ, ᓁᑕᓂ, ᓲᓗᒨᓂ, 15ᐃᑉᕼᐊᕐ, ᐃᓔᓱ-ᐊ, ᓂᕕᒡ, ᔮᐱᐊ, 16ᐃᓔᓴᒪ, ᐃᓔᐊᑕ, ᐃᓕᕕᓕᑦᓗ.
ᓵᓚᖃᕐᓃᑦ ᐱᓕᔅᑏᓂᒥᐅᓂᒃ
ᑯᕉᓂᑲ ᓯᕗᓪᓖᑦ 14:8-17
17ᐱᓕᔅᑍᓂᒥᐅᓪᓕ ᑐᓴᕋᒥᒃ ᑍᕕᑎ ᐊᖓᔪᖅᑳᕐᔪᐊᓐᖑᕐᑎᑕᐅᓂᖓᓂᒃ ᐃᓴᕆᐊᓕᒥᐅᓄᑦ, ᐅᓇᑕᕐᑐᒃᓴᖁᑎᒥᖕᓂᒃ ᑎᓕᓯᓚᐅᕐᐳᑦ ᑍᕕᑎᒥᒃ ᑎᒍᓯᔭᕐᑐᖁᓪᓗᒋᑦ; ᑍᕕᑎᓕ ᑐᓴᕋᒥ ᐂᓚᐅᕐᐳᖅ ᓴᐴᓗᑕᓕᖕᒧᑦ. 18ᐱᓕᔅᑍᓂᒥᐅᓪᓕ ᑎᑭᓐᓇᒥᒃ ᓇᕐᓴᒥ ᕆᐰᒻᒥ ᓯᐊᒻᒪᖓᓕᓚᐅᕐᐳᑦ. 19ᑍᕕᑎᓗ ᐊᑕᓂᕐᒥᒃ ᐊᐱᕐᓱᓚᐅᕐᐳᖅ, “ᐅᓇᑕᕆᐊᕈᓐᓇᕐᐳᖔ ᐱᓕᔅᑍᓂᒥᐅᓂᒃ? ᑖᒃᑯᓂᖓ ᓵᓚᖃᕐᑎᓐᓂᐊᕐᐱᖔ?”
ᐊᑕᓂᖅ ᑭᐅᕗᖅ, “ᐊᑏ ᐅᓇᑕᕆᐊᓕᕆᑦ; ᓵᓚᖃᕐᑎᓐᓂᐊᕐᐸᒋᑦ ᐱᓕᔅᑍᓂᒥᐅᓂᒃ.”
20ᑍᒤᒻᒪᑦ ᑍᕕᑎ ᐰᓕ-ᐱᕋᔨᒻᒧᐊᕐᐳᖅ, ᑍᑲᓂᓗ ᐱᓕᔅᑍᓂᒥᐅᑦ ᓵᓚᒋᕔᑦ; ᐅᖃᕐᐳᕐᓗ, “ᐊᑕᓂᖅ ᓯᕗᓂᓐᓂ ᓵᓚᖃᕐᐳᖅ ᐊᑭᕋᑦᑎᓐᓂᒃ, ᐃᒪᕐᒧᑦ ᖄᒥᐅᑦᔭᐅᔪᐊᑎᑐᑦ.” ᑍᒤᒻᒪᑦ ᑖᓐᓇ ᓄᓇ ᑍᔭᐅᓚᐅᕐᐳᖅ ᐰᓕ-ᐱᕋᔨᒻᒥᒃ. 21ᐱᓕᔅᑍᓂᒥᐅᓪᓗ ᕿᒫᓚᐅᕐᐳᑦ ᒎᑎᓐᖑᐊᑎᒃ ᑕᕝᕗᖓ ᕿᒪᒡᓗᒋᑦ, ᑍᕕᑎᐅᓪᓗ ᐃᓄᖁᑎᖏᑕᓗ ᑖᒃᑯᐊ ᐊᐅᓪᓚᕈᑎᓚᕐᐰᑦ.
22ᑭᖑᓂᐊᒍᓪᓕ ᐱᓕᔅᑍᓂᒥᐅᑦ ᐅᑎᓚᐅᕆᕗᑦ, ᓇᓂᑐᐃᓐᓈᓕᕐᓗᑎᒡᓗ ᕆᐰᒻ ᓇᕐᓴᖓᓂ. 23ᑕᕝᕙ ᑍᕕᑎᐅᑉ ᐊᑕᓂᖅ ᐊᐱᕆᕚ, ᑭᐅᕚᓗ, “ᐅᓇᑕᕆᐊᕐᑍᓕᒃᑭᑦ ᑕᒫᓐᖓᑦ; ᑐᓄᐊᓂᓪᓕ ᐅᐸᓕᒃᑭᑦ, ᐅᓇᑕᕆᐊᕐᓗᓯᐅᒃ ᓇᐹᕐᑐᐃᑦ ᐸᐅᕐᖓᓖᑦ ᖃᓂᒋᔮᓂᑦ. 24ᑐᓴᑐᐊᕈᑦᓯᓕ ᐱᓱᒡᕙᓗᖕᓂᒃ ᓇᐹᕐᑐᐃᑦ ᐸᐅᕐᖓᓖᑦ ᓄᕗᖏᓐᓃᓪᓗᓯ, ᐅᓇᑕᕆᐊᕐᓂᐊᕐᐳᓯ; ᑕᕝᕙ ᐊᑕᓂᖅ ᐃᓕᑦᓯᓐᓂᑦ ᓯᕗᓪᓕᐅᓗᓂ ᐅᓇᑕᕐᓂᐊᕐᐳᖅ ᓵᓚᒋᓗᒋᑦ ᐱᓕᔅᑍᓂᒥᐅᑦ ᐅᓇᑕᕐᑎᖏᑦ.” 25ᑍᕕᑎᓗ ᐱᓇᓱᐊᓚᐅᕐᐳᖅ ᐊᑕᓂᐅᑉ ᐱᓇᓱᐊᖁᔭᖓᓂᒃ, ᑐᖁᕅᓚᐅᕐᐳᕐᓗ ᐱᓕᔅᑍᓂᒥᐅᓂᒃ ᒋᐸᒥᑦ ᒋᔨᕆᒧᑦ ᑎᑭᓪᓗᒍ.
Currently Selected:
ᓴᒧᐃᓕ ᐂᑉᐸᖏᑦ 5: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
