ᓴᒧᐃᓕ ᐂᑉᐸᖏᑦ 3
3
ᑍᕕᑎᐅᑉ ᐃᕐᓂᖏᑦ
1ᐅᓇᑕᕐᓃᑦ ᓴᐅᓕᐅᑉ ᐃᓚᖏᓐᓄᑦ ᑍᕕᑎᑯᓪᓗ ᐊᑯᓂ ᑲᔪᓯᓚᐅᕐᐳᖅ; ᑍᕕᑎᓕ ᓴᓐᖏᒃᑎᑉᐸᓪᓕᐊᓚᐅᕐᐳᖅ, ᓴᐅᓕᐅᑉ ᐃᓚᖏᑦ ᓴᓐᖐᓕᕚᓪᓕᐊᖔᓕᕐᑎᓪᓗᒋᑦ.
2ᑍᕕᑎ ᐃᕐᓂᕐᑖᓚᐅᕐᐳᖅ ᕼᐃᐸᕋᓐᒦᑎᓪᓗᒍ, ᐅᓇ ᐊᖓᔪᒃᓯᕐᐸᐅᑎᓪᓗᒍ ᐋᒻᓇᓐ, ᐊᓈᓇᖃᕐᑐᖅ ᐊᕼᐃᓄᐊᒥᒃ ᔨᔭᕆᐅᓪᒥᐅᑕᕐᒥᒃ; 3ᑐᖓᓕᖃᕐᓗᓂ ᓯᓕᐊᑉᒥᒃ, ᐊᓈᓇᖃᕐᑐᖅ ᐊᐱᒊᓕᒥᒃ, ᓁᐳᓕᐅᑉ ᓄᓕᐊᕕᓂᖓᓂᒃ ᑳᕐᒥᐅᓪᒥᐅᑕᕐᒥᒃ; ᐱᖓᔪᖓᑦ ᐋᑉᓴᓚᒻ, ᐊᓈᓇᖃᕐᑐᖅ ᒫᑲᒥᒃ ᐊᖓᔪᖅᑳᕐᔪᐊᑉ ᑕᓪᒤᑉ ᒋᓱᕅᒥᐅᑕᐅᑉ ᐸᓂᖓᓂᒃ; 4ᓯᑕᒪᖓᑦ ᐊᑐᓁᔭ, ᐊᓈᓇᖃᕐᑐᖅ ᕼᐊᒋᑎᒥᒃ; ᑕᓪᓕᒪᖓᑦ ᓯᕚᑍᐊ, ᐊᓈᓇᖃᕐᑐᖅ ᐊᐱᑕᐅᓪᒥᒃ; 5ᐱᖓᓲᔪᕐᑐᖓ ᐃᑕᕆ-ᐊᒻ, ᐊᓈᓇᖃᕐᑐᖅ ᐃᒡᓚᒥᒃ. ᑖᒃᑯᐊ ᑕᕝᕙ ᑍᕕᑎᐅᑉ ᐃᕐᓂᖏᑦ ᕼᐃᐸᕋᓐᒦᑎᓪᓗᒍ ᐃᓅᓚᐅᕐᑐᑦ.
ᐋᑉᓅᑉ ᐃᓚᓕᐅᑎᓂᖓ ᑍᕕᑎᒧᑦ
6ᐅᓇᑕᐅᑎᓃᑦ ᐃᒻᒥᖕᓄᑦ ᑍᕕᑎᒥᒃ ᓴᐅᓕᒥᒡᓗ ᐃᑲᔪᕐᑐᕐᑐᑦ ᑲᔪᓯᑎᓪᓗᒋᑦ, ᐋᑉᓄ ᐱᔪᓐᓇᕐᓯᕙᓪᓕᐊᓚᐅᕐᐳᖅ ᓴᐅᓕᐅᑉ ᒪᓕᒃᑎᖏᓐᓂ.
7ᐅᓪᓗᐃᑦ ᐃᓚᖓᓂ ᐃᔅᐳᓯᐅᑉ ᓴᐅᓕᐅᑉ ᐃᕐᓂᖓᑕ ᐋᑉᓄ ᐸᓯᓚᐅᕐᐹ ᐃᓐᓇᖓᖃᑎᖃᕐᑐᕕᓂᐅᔪᕆᓪᓗᒍ ᓴᐅᓕᐅᑉ ᓄᓕᐊᒃᑲᓐᓂᖓᓂᒃ ᕆᔾᐸᒥᒃ ᐂᐊᐅᑉ ᐸᓂᖓᓂᒃ. 8ᑕᕝᕙ ᐋᑉᓄ ᓂᓐᖓᒻᒪᕆᓚᐅᕐᐳᖅ ᐃᔅᐳᓴᐅᑉ ᐅᖃᐅᓯᕆᔭᖏᓐᓄᑦ, ᐅᖃᕐᓗᓂᓗ, “ᓴᐅᓕᒦᒃ ᐊᑭᕋᕐᑐᕐᓗᖓ ᔫᑕᒥᐅᓂᒃ ᑭᒡᒐᕐᑐᕋᓱᒋᕕᖓ ᐱᒋᐊᕐᓂᖓᓂᑦ ᑲᒪᑦᓯᐊᖏᓐᓇᓚᐅᕐᐳᖓ ᐊᑖᑕᖕᓂᒃ ᖃᑕᓐᖑᑎᖏᓐᓂᒡᓗ ᐱᖃᓐᓇᕆᔭᖏᓐᓂᒡᓗ, ᓵᓚᐅᑎᑦᓯᓚᐅᓐᖏᓚᖓ ᑍᕕᑎᒧᑦ; ᐅᓪᓗᒥᓕ ᐸᓯᓕᕐᐸᕐᒪ ᐊᕐᓇᒧᑦ. 9#ᓴᒧᐃᓕ ᓯᕗᓪᓖᑦ 15:28.ᒎᑎᐅᑉ ᐋᑉᓄ ᓱᒋᐊᕐᓕᐅᒃ ᑕᒪᓐᓇ ᓱᓕᑎᖏᒃᑯᒃᑯ, ᐊᑕᓂᐅᑉ ᐊᖏᕈᑎᒋᓚᐅᕐᒪᒍ ᑍᕕᑎ ᐃᓇᖐᓂᐊᕐᓂᕋᕐᓗᒍ ᓴᐅᓕᐅᑉ ᐊᖓᔪᖅᑲᐅᕕᖓᓂᒃ, 10ᑍᕕᑎᓗ ᐊᖓᔪᖅᑳᕐᔪᐊᓐᖑᕐᓂᐊᕐᓂᕋᓚᐅᕐᒪᒍ ᓴᐅᓕᒥᒃ ᐃᓇᖐᓗᓂ ᐃᓴᕆᐊᓕᒥᐅᓄᑦ ᔫᑕᒥᐅᓄᓪᓗ, ᓄᓇᓕᖕᓂᑦ ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒍ.” 11ᐃᔅᐳᓯᑦᓕ ᐋᑉᓄᒥᒃ ᑭᐅᒃᑲᓐᓂᕈᓐᓁᓪᓕᓚᐅᕐᐳᖅ, ᑲᑉᐱᐊᓱᒻᒪᕆᓕᕋᒥ ᑖᑦᓱᒥᖓ.
12ᑕᕝᕙ ᐋᑉᓄ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᑍᕕᑎᒧᑦ ᕼᐃᐸᕋᓐᒦᑎᓪᓗᒍ, ᐅᖃᕐᓗᓂ, “ᑭᓇ ᐊᐅᓚᑦᓯᓂᐊᕐᐸ ᓄᓇᒥᒃ? ᐊᖏᖃᑎᒌᓚᐅᕐᓗᒃ, ᑕᑯᒋᑦ ᐃᑲᔪᕐᓂᐊᕐᐸᒋᑦ ᐃᓴᕆᐊᓕᒥᐅᑦ ᐃᓕᖕᓂᒃ ᓈᓚᓕᕐᑎᓪᓗᒋᑦ.”
13ᑍᕕᑎᓗ ᑭᐅᕗᖅ, “ᑕᒪᓐᓇ ᐱᐅᕗᖅ; ᐊᖏᖃᑎᒋᓂᐊᕐᐸᒋᑦ ᑭᓯᐊᓂ ᐊᑕᐅᓯᕐᒥᒃ ᐃᓚᖃᕐᑎᓪᓗᒍ ᐃᒤᑦᑑᖁᕙᒋᑦ; ᑮᓇᓐᓂᒃ ᑕᑯᓂᐊᓐᖏᓚᑎᑦ, ᑭᓯᐊᓂ ᓴᐅᓕᐅᑉ ᐸᓂᖓ ᒤᑲᐅᓪ ᑎᑭᑦᔪᑎᖅᑳᕐᓗᒍ, ᐅᕙᓐᓂᒃ ᑕᑯᓕᕋᔭᕐᐳᑎᑦ.” 14#ᓴᒧᐃᓕ ᓯᕗᓪᓖᑦ 18:27.ᑕᕝᕙ ᑍᕕᑎ ᐅᖃᕆᐊᕐᑐᕐᑎᑦᓯᕗᖅ ᐃᔅᐳᓯᑦᒧᑦ ᓴᐅᓕᐅᑉ ᐃᕐᓂᖓᓄᑦ ᐃᒫᒃ ᐅᖃᖁᓪᓗᒋᑦ, “ᓄᓕᐊᕋ ᒤᑲᐅᓪ ᐅᕙᓐᓄᐊᕐᑎᓚᐅᕈᒃ, ᐊᑭᓖᓚᐅᕐᓯᒪᒐᒪ 100ᓂᒃ ᐱᓕᔅᑍᓂᒥᐅᑦ ᐅᓱᖏᑕ ᐅᓕᕝᕙᖏᓐᓂᒃ ᑲᑎᑎᑕᐅᔪᓐᓇᕐᓯᖁᓪᓗᓄᒃ.” 15ᐃᔅᐳᓯᓪᓗ ᑎᓕᓯᓚᐅᕐᐳᖅ, ᐅᐃᖓᓂᑦ ᑎᒍᔭᐅᖁᓪᓗᒍ ᐱᐅᓪᑎ-ᐃᐅᓪᒥᑦ ᓔᓯᐅᑉ ᐃᕐᓂᖓᓂᑦ. 16ᐅᐃᖓᑕᓕ ᐱᐅᓪᑎ-ᐃᐅᑉ ᒪᓖᓐᓇᓚᐅᕐᐹ, ᕿᐊᖏᓐᓇᕐᓗᓂ ᓄᓇᓕᖕᓄᑦ ᐸᕼᐅᕆᒻᒧᑦ ᑎᑭᓪᓗᓂ. ᑕᕝᕙ ᐋᑉᓅᑉ ᐅᖃᐅᑎᕙ, “ᐊᖏᕐᕋᒧᑦ ᐅᑎᓕᕆᑦ,” ᑕᕝᕙ ᐅᑎᓚᐅᕐᐳᖅ.
17ᑕᕝᕙ ᐋᑉᓅᑉ ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᑲᑎᒪᖃᑎᒋᓕᕐᐰᑦ ᐅᖃᐅᑎᓪᓗᒋᓪᓗ, “ᐊᑯᓂᐊᓗᒃ ᑍᕕᑎ ᐊᖓᔪᖅᑳᕐᔪᐊᕐᑖᕆᔪᒪᓚᐅᕋᑦᓯᐅᒃ. 18ᒫᓐᓇ ᐱᕕᒃᓴᖃᓕᕐᐳᓯ; ᐊᑕᓂᐅᑉ ᐊᖏᕐᕕᒋᓯᒪᖕᒪᒍ, ‘ᐱᔨᒐ ᑍᕕᑎ ᐊᑐᕐᓗᒍ ᐃᓴᕆᐊᓕᒥᐅᑦ ᐃᓄᖏᑦ ᐱᐅᓕᓂᐊᕐᐸᒃᑲ ᐱᓕᔅᑍᓂᒥᐅᓂᑦ, ᐊᑭᕋᓕᒫᖏᓐᓂᓪᓗ.’” 19ᐊᒻᒪ ᐋᑉᓄ ᐅᖃᓪᓚᓚᐅᕆᕗᖅ ᐱᓐᔭᒥᓂᐅᑉ ᑭᖑᕚᖏᓐᓄᑦ; ᑭᖑᓂᖓᒍᓪᓗ ᕼᐃᐸᕋᓐᒧᑦ ᑍᕕᑎ ᐅᖃᐅᑎᔭᕐᑐᕐᓚᐅᕐᐹ ᐃᓴᕆᐊᓕᒥᐅᑦ ᐱᓐᔭᒥᓂᐅᓪᓗ ᑭᖑᕚᓕᒫᖏᑕ ᐊᖏᖃᑎᒌᖕᓂᖏᓐᓂᒃ ᐱᑦᓯᐊᕈᒪᓪᓗᑎᒃ.
20ᐋᑉᓄ ᑍᕕᑎᒧᐊᓚᐅᕐᐳᖅ ᕼᐃᐸᕋᓐᒧᑦ ᐃᓚᖃᕐᓗᓂ ᐊᖑᑎᓂᒃ 20ᓂᒃ, ᑍᕕᑎᓗ ᓂᕆᕕᒃᔪᐊᕐᑎᑦᓯᓚᐅᕐᐳᖅ ᐋᑉᓄᒥᒃ ᐃᓚᒋᔭᖏᓐᓂᒡᓗ. 21ᑕᕝᕙ ᐋᑉᓅᑉ ᑍᕕᑎ ᐅᖃᐅᑎᕙ, “ᑕᒫᓐᖔᕐᓗᖓ ᐱᓇᓱᐊᕐᓂᐊᓕᕐᐳᖓ ᑲᑎᕐᓱᐃᔭᕐᑐᕐᓗᖓ ᐃᓴᕆᐊᓕᒥᐅᓕᒫᑦ ᐊᖓᔪᖅᑲᐅᕕᖕᓄᑦ ᐃᓚᓕᐅᑎᓗᑎᒃ, ᐊᖏᖃᑎᒌᒍᑎᓕᐅᖁᓪᓗᒋᑦ ᐃᓕᖕᓄᑦ, ᐊᖓᔪᖅᑳᕐᔪᐊᖑᓕᖁᓪᓗᑎᑦ ᐱᔪᒪᓯᒪᔭᕐᓂᒃ ᐱᖁᓪᓗᑎᑦ ᓄᓇᖃᑎᒌᓕᒫᑦ ᐊᐅᓚᓕᕐᓗᒋᑦ.” ᑕᕝᕙ ᑍᕕᑎᐅᑉ ᐋᑉᓄ ᐊᐅᓪᓚᕐᑎᑉᐹ; ᐃᓱᒫᓘᑎᖃᕋᓂᓗ ᑕᕝᕙᓐᖓᑦ ᐊᐅᓪᓚᕐᐳᖅ.
ᐋᑉᓅᑉ ᑐᖁᑕᐅᓂᖓ
22ᑕᕝᕙ ᑭᖑᓂᑦᓯᐊᖓᒍᑦ ᔪᐊᐱ ᑍᕕᑎᐅᓪᓗ ᐊᖓᔪᖅᑳᖁᑎᒋᑦ ᑎᑭᑉᐳᑦ, ᓵᓚᖃᐅᓯᐊᒥᖕᓂᒃ ᐊᖏᔪᓂᒃ ᓇᒃᓴᕐᓗᑎᒃ. ᐋᑉᓄᓕ ᑕᕝᕙᓃᑦᓱᓐᓁᓚᐅᕐᐳᖅ ᕼᐃᐸᕋᓐᒥ ᑍᕕᑎᐅᑉ ᓇᔪᕐᑕᖓᓂ, ᑍᕕᑎᐅᑉ ᐊᐅᓪᓚᕐᑎᓚᐅᕐᒪᒍ ᐃᓱᒫᓗᖏᑦᓯᐊᖁᓪᓗᓂᐅᒃ. 23ᔪᐊᐱᒃᑯᑦ ᐃᓚᒋᔭᖏᓪᓗ ᑎᑭᓐᓇᒥᒃ, ᐅᖃᐅᑦᔭᐅᕗᑦ ᐋᑉᓅᑉ ᓂᕆᐅᑉ ᐃᕐᓂᖓᑕ ᐊᖓᔪᖅᑳᕐᔪᐊᒧᐊᓚᐅᕐᓂᖓᓂᒃ ᑍᕕᑎᒧᑦ, ᐊᐅᓪᓚᕐᑎᓚᐅᕐᒪᒍ, ᐃᓱᒫᓘᑎᖃᖏᑦᓯᐊᕐᓗᓂ ᐊᐅᓪᓚᕐᑎᑕᕕᓂᐅᓂᖓᓂᒃ. 24ᑕᕝᕙ ᔪᐊᐱ ᐊᖓᔪᖅᑳᕐᔪᐊᒧᐊᕐᐳᖅ ᐅᖃᐅᑎᓪᓗᒍᓗ, “ᖃᓅᖅ ᐱᓇᓱᐊᕐᓂᕐᐲᑦ? ᑕᑯᒋᑦ, ᐋᑉᓅᑉ ᐅᐸᓚᐅᕐᒪᑎᑦ; ᓱᖕᒪᑦ ᖃᓄᐃᓕᓇᒍ ᐊᐅᓪᓚᕐᑎᓚᐅᕐᐱᐅᒃ? 25ᖃᐅᔨᒪᕗᑎᑦ ᐋᑉᓄ ᓂᕆᐅᑉ ᐃᕐᓂᖓ ᕾᓚᐅᕐᐳᖅ ᐃᓕᖕᓂᒃ ᓯᓔᕐᕆᒃᓯᔭᕐᑐᕐᓗᓂ, ᖃᐅᔨᒋᐊᕐᓗᓂ ᖃᓄᐃᓕᐅᖃᑦᑕᕐᒪᖔᕐᐱᑦ ᓇᒧᓐᖓᕐᐸᖕᒪᖔᕐᐱᓪᓗ, ᖃᐅᔨᓇᓱᐊᕆᐊᕐᑐᕐᓗᓂᑎᑦ.”
26ᔪᐊᐱ ᑍᕕᑎᒥᒃ ᕿᒤᒐᒥ, ᑎᓕᓯᓚᐅᕐᐳᖅ ᐋᑉᓄᒥᒃ ᒪᓕᒃᑕᐅᖁᓪᓗᒍ, ᐅᑎᐅᑦᔭᐅᓚᐅᕐᐳᕐᓗ ᓯᓯᑎᕆᓐᒥᑦ ᓰᕋᒦᑦᑑᑉ ᐃᒥᕐᑕᕐᕕᖓᓂᑦ; ᑍᕕᑎᓕ ᖃᐅᔨᒪᓚᐅᓐᖏᓚᖅ ᑕᒪᑐᒥᖓ. 27ᐋᑉᓄᓕ ᑎᑭᒻᒪᑦ ᕼᐃᐸᕋᓐᒧᑦ, ᔪᐊᐱᐅᑉ ᓴᓂᕐᕙᐅᑎᓚᐅᕐᐹ ᐃᑎᕐᑕᕐᕕᐅᑉ ᓴᓂᐊᓄᑦ, ᐃᓄᑑᖃᑎᒋᓪᓗᒍ ᐅᖃᕐᕕᒋᔪᒪᔫᔮᕐᓗᓂᐅᒃ, ᑍᑲᓂᓗ ᑲᐱᕙ ᓈᖓᒍᑦ, ᑕᕝᕙᓂᓗ ᐋᑉᓄ ᑐᖁᕗᖅ, ᑐᖁᑦᓯᓚᐅᕐᓂᖓ ᐱᓪᓗᒍ ᔪᐊᐱᐅᑉ ᓄᑲᖓᓂᒃ ᐊᓴᕼᐃᐅᓪᒥᒃ. 28ᑭᖑᓂᖓᒍᑦ, ᑍᕕᑎ ᑕᒪᑐᒥᖓ ᑐᓴᕋᒥ, ᐅᖃᕐᐳᖅ, “ᐊᑕᓂᖅ ᖃᐅᔨᒪᕗᖅ ᐅᕙᖓᓗ ᐊᐅᓚᑦᓯᔨᒃᑲᓗ ᐸᓯᔭᒃᓴᐅᓐᖏᓐᓇᑦᑕ ᐋᑉᓅᑉ ᓂᕆᐅᑉ ᐃᕐᓂᖓᑕ ᑐᖁᑕᐅᓂᖓᓄᑦ. 29ᐸᓯᔭᒃᓴᐅᓂᕐᓕ ᔪᐊᐱᒧᑦ ᑐᕌᖓᓕᕐᓕ, ᐃᓚᖏᓐᓄᓪᓗ ᑭᖑᕚᖏᓐᓄᓪᓗ ᐊᖑᑎᓂ ᖁᐱᕐᕆᓯᒪᔪᕐᑕᖃᓕᕐᓕ, ᐅᕝᕙᓗ ᐸᕐᑎᕐᑐᖃᕐᓕ, ᐅᕝᕙᓗ ᐊᕐᓇᐅᑉ ᐱᔪᓐᓇᕐᑕᖓᓂᒃ ᑭᓯᐊᓂ ᐱᔪᓐᓇᕐᓗᓂ, ᐅᕝᕙᓗ ᑐᖁᑕᐅᔪᖃᕐᓗᓂ, ᐅᕝᕙᓗ ᓂᕿᒃᓴᖃᖏᑦᑐᖃᕐᓕ!” 30ᑍᒤᒻᒪᑦ ᔪᐊᐱᓗ ᓄᑲᖓᓗ ᐊᐱᓮ ᑍᒫᒃ ᐊᑭᓂᐊᓚᐅᕐᐴᒃ ᐋᑉᓄᒥᒃ, ᑐᖁᑦᓯᓚᐅᕐᓂᖓ ᓄᑲᖓᓂᒃ ᐊᓴᕼᐃᐅᓪᒥᒃ ᐱᓪᓗᒍ ᐅᓇᑕᕐᑎᓪᓗᒋᑦ ᒋᐱᐅᓂᒥ.
ᐋᑉᓅᑉ ᐃᓗᕕᕐᑕᐅᓂᖓ
31ᑕᕝᕙ ᑍᕕᑎᐅᑉ ᔪᐊᐱᒃᑯᑦ ᐃᓚᖏᓪᓗ ᐅᖃᐅᑎᕔᑦ, “ᐊᓐᓄᕌᓯ ᐊᓕᒃᑐᕐᓯᒋᑦ, ᐊᓐᓄᕌᕐᓗᓯᓗ ᐊᕐᔭᓕᓂᑎᕐᓯᒪᔪᓂᒃ, ᕿᒃᓵᒍᑎᖃᓪᓗᓯ ᐋᑉᓄᒥᒃ.” ᐃᓗᕕᕐᑕᐅᓕᕐᑎᓪᓗᒍᓗ ᐊᖓᔪᖅᑳᕐᔪᐊᖅ ᑍᕕᑎ ᐱᓱᓚᐅᕐᐳᖅ ᐃᒃᓯᕐᕕᐊᑕ ᑭᖑᓂᖓᓂ. 32ᐋᑉᓄ ᐃᓗᕕᕐᑕᐅᓚᐅᕐᐳᖅ ᕼᐃᐸᕋᓐᒥ; ᐊᖓᔪᖅᑳᕐᔪᐊᕐᓗ ᓂᐱᖃᕐᓗᓂ ᕿᐊᓚᐅᕐᐳᖅ ᐃᓗᕕᕐᓯᕕᖕᒥ; ᐃᓄᓕᒫᓪᓗ ᕿᐊᓕᕆᓪᓗᑎᒃ. 33ᑍᕕᑎᓗ ᕿᒃᓵᒍᑎᒥᓂᒃ ᐃᓐᖏᓚᐅᕐᐳᖅ ᐋᑉᓄᒧᑦ, ᐅᖃᕐᓗᓂ,
“ᓱᖕᒪᑦ ᐋᑉᓄ ᑐᖁᔭᕆᐊᖃᓚᐅᕐᐹ ᓯᓔᑦᑐᑎᑐᑦ?
34ᐊᒡᒐᖏᑦ ᕿᓚᒃᑕᐅᓯᒪᓚᐅᓐᖏᓚᑦ,
ᐃᑎᒐᖏᓪᓗ ᕿᓚᒃᑕᐅᓯᒪᓚᐅᕋᑎᒃ;
ᑐᖁᓚᐅᕐᐳᖅ ᐱᐅᖏᑦᑐᓕᔪᑎᑐᑦ ᑐᖁᑕᐅᓪᓗᓂ.”
ᐃᓄᓕᒫᓪᓗ ᑍᕕᑎ ᕿᐊᖃᑎᒋᕚᑦ. 35ᑕᕝᕙ ᐃᓄᖕᓂᑦ ᑍᕕᑎ ᐅᓪᓗᓕᒫᖅ ᓂᕆᑎᑕᐅᓇᓱᓚᐅᕋᓗᐊᕐᐳᖅ, ᐊᖏᕈᑎᖃᒻᒪᕆᓚᐅᕐᐳᕐᓕ ᐃᒫᒃ, “ᒎᑎᐅᑉ ᓱᒋᐊᕐᓂᐊᕐᐹᖓ ᓯᕿᓂᖅ ᓂᐱᓚᐅᕐᑎᓐᓇᒍ ᓂᕆᑐᐊᕈᒪ!” 36ᑕᒪᓐᓇ ᐃᓄᖕᓄᑦ ᐃᒃᐱᒋᔭᐅᑦᓯᐊᓚᐅᕐᐳᖅ, ᖁᕕᐊᓲᑕᐅᓪᓗᓂᓗ; ᐊᖓᔪᖅᑳᕐᔪᐊᓪᓗ ᐱᓇᓱᐊᕐᑕᓕᒫᖏᑦ ᖁᕕᐊᒋᔭᐅᓚᐅᕐᐳᑦ ᐃᓄᓕᒫᓄᑦ. 37ᑕᒪᓐᓇ ᐃᓴᕆᐊᓕᒥᐅᓕᒫᓄᑦ ᑐᑭᓯᑦᔪᑕᐅᓚᐅᕐᐳᑦ ᐊᖓᔪᖅᑳᕐᔪᐊᖅ ᑐᖁᑦᓯᔪᓄᑦ ᐋᑉᓄᒥᒃ ᓂᕆᐅᑉ ᐃᕐᓂᖓᓂᒃ ᐱᓇᓱᐊᖃᑕᐅᓚᐅᖏᓐᓂᖓᓂᒃ. 38ᐊᖓᔪᖅᑳᕐᔪᐊᕐᓗ ᐱᔨᒥᓄᑦ ᐅᖃᕐᐳᖅ, “ᖃᐅᔨᒪᓐᖏᓚᓰ ᐅᓪᓗᒥ ᐃᓴᕆᐊᓕᒥᐅᑦ ᓯᕗᓕᕐᑎᖓ ᐊᔪᖏᓐᓂᕐᐹᖅ ᑐᖁᖕᒫᑦ? 39ᐅᓪᓗᒥᓗ ᓴᓐᖐᑦᑑᓕᕐᐳᖓ, ᐊᖓᔪᖅᑳᕐᔪᐊᖑᖁᓪᓗᖓ ᓂᕈᐊᕐᑕᐅᓯᒪᒐᓗᐊᕐᓗᖓ; ᑖᒃᑯᐊ ᔨᕈᐃᐊᐅᑉ ᐃᕐᓂᖏᑦ ᐅᑯᒤᓗᐊᕐᒪᑕ ᐅᕙᓐᓄᑦ. ᐊᑕᓂᐅᑦᑐᖅ ᓱᒋᐊᕐᓕᒋᑦ ᐱᐅᖏᑦᑐᓕᔪᑦ ᐱᓇᓱᐊᕐᓂᕆᓯᒪᔭᖏᑦ ᒪᓕᒡᓗᒋᑦ!”
Currently Selected:
ᓴᒧᐃᓕ ᐂᑉᐸᖏᑦ 3: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
