ᓴᒧᐃᓕ ᐂᑉᐸᖏᑦ 2
2
ᑍᕕᑎᐅᑉ ᐊᖓᔪᖅᑳᕐᔪᐊᕈᕐᑎᑕᐅᓂᖓ ᔫᑕᒥ
1ᑕᒪᑐᒪ ᑭᖑᕐᖓᓂ ᑍᕕᑎᐅᑉ ᐊᑕᓂᖅ ᐊᐱᕆᕚ, “ᔫᑕᐅᑉ ᓄᓇᓕᖁᑎᖏᓐᓄᑦ ᐂᔪᒃᓴᐅᕗᖔ ᐊᐅᓚᒋᐊᕐᑐᓕᕐᓗᒋᑦ?”
ᐊᑕᓂᖅ ᑭᐅᕗᖅ, “ᐂᔪᓐᓇᕐᐳᑎᑦ.”
ᑍᕕᑎ ᐊᐱᕆᕗᖅ, “ᓇᓪᓕᐊᓐᓄᑦ ᓄᓇᓕᖕᓄᑦ?”
ᐊᑕᓂᖅ ᐅᖃᕐᐳᖅ, “ᕼᐃᐸᕋᓐᒧᑦ.” 2#ᓴᒧᐃᓕ ᓯᕗᓪᓖᑦ 25:42,43.ᑍᒤᒻᒪᑦ ᑍᕕᑎ ᐂᓚᐅᕐᐳᖅ ᕼᐃᑉᐸᕋᓐᒧᑦ, ᓄᓕᐊᖕᓂ ᒪᕐᕉᒃ ᐃᓚᒋᓪᓗᒋᒃ: ᐊᕼᐃᓄᐊᒻ, ᔨᔭᕆᐅᓪᒥᐅᑕᖅ, ᐊᐱᒊᓕᓗ ᓁᐳᓕᐅᑉ ᓄᓕᐊᕕᓂᖓ ᑳᕐᒥᐅᓪᒥᐅᑕᖅ. 3ᑍᕕᑎᓗ ᐊᖑᑏᑦ ᐃᓚᒋᕙᒃᑕᒥ ᐃᓚᖏᑦ ᐃᓚᒋᓚᐅᕐᐰᑦ, ᐃᒡᓗᒥᐅᖃᑎᖏᓪᓗ ᐊᑕᖏᕐᓗᑎᒃ; ᓄᓇᑖᓚᐅᕐᐳᓪᓗ ᕼᐃᐸᕋᓐᒥ ᓄᓇᓕᖕᓂᓗ ᖃᓂᒋᔮᓃᑦᑐᓂ. 4#ᓴᒧᐃᓕ ᓯᕗᓪᓖᑦ 31:11-13.ᔫᑕᐅᓪᓗ ᐃᓄᖏᑕ ᐅᐸᒃᐹᑦ ᕼᐃᐸᕋᓐᒧᑦ, ᑕᕝᕙᓂᓗ ᑍᕕᑎ ᐅᕐᓱᕐᑎᕐᐹᑦ ᐊᖓᔪᖅᑳᕐᔪᐊᓐᖑᕐᑎᓪᓗᒍ ᔫᑕᒥᐅᓄᑦ.
ᑍᕕᑎᓗ ᐅᖃᐅᑎᕚᑦ “ᔭᐲᓯ-ᒋᓖᑎᒥᐅᑦ ᐃᓗᕕᕐᓯᓚᐅᕐᐳᑦ ᓴᐅᓕᒥᒃ.” 5ᑕᕝᕙ ᑍᕕᑎ ᐅᖃᕆᐊᕐᑐᕐᑎᑦᓯᕗᖅ ᔭᐲᓯ-ᒋᓖᑎᒥᐅᓄᑦ, ᐅᖃᐅᑎᓗᒋᓪᓗ: “ᐊᑕᓂᐅᑉ ᓮᒻᒪᕐᑎᓪᓕᓯ, ᐅᐱᒍᓱᑦᓯᐊᕐᓂᑦᓯᓐᓂᒃ ᐊᖓᔪᖅᑳᕐᔪᐊᑦᓯᓐᓄᑦ ᓴᐅᓕᒧᑦ ᓴᖅᑭᑎᑦᓯᒐᑦᓯ, ᑖᑦᓱᒥᖓ ᐃᓗᕕᕐᓯᓂᑦᓯᓐᓄᑦ! 6ᒫᓐᓇᓕ ᐊᑕᓂᐅᑉ ᓇᒡᓕᖕᓂᕐᒥᓂᒃ ᐱᑦᓯᐊᕐᓂᕐᒥᓂᒡᓗ ᓴᖅᑭᑎᑦᓯᕕᒋᓕᓯ! ᐅᕙᖓᓗ ᐱᑦᓯᐊᕐᕕᒋᓂᐊᕐᐸᑦᓯ ᑍᒫᒃ ᐱᓂᐊᕐᓂᕆᓚᐅᕐᑕᓯ ᐱᓪᓗᒍ. 7ᒫᓐᓇᓗ ᑍᒤᒻᒪᑦ ᓲᖑᔫᓕᕆᑦᓯ, ᓯᕗᕋᖏᓪᓗᓯᓗ; ᓴᐅᓕ ᐊᖓᔪᖅᑳᕐᔪᐊᓯ ᑐᖁᖕᒪᑦ, ᔫᑕᐅᓪᓗ ᐃᓄᖏᑕ ᐅᕐᓱᕐᑎᓚᐅᕐᐹᖓ ᐊᖓᔪᖅᑳᕐᔪᐊᕆᔭᐅᖁᓪᓗᖓ ᑖᒃᑯᓄᖓ.”
ᐃᔅᐳᓴᐅᑉ ᐊᖓᔪᖅᑳᕐᔪᐊᕈᕐᑎᑕᐅᓂᖓ ᐃᓴᕆᐊᓕᒥᐅᓄᑦ
8ᓴᐅᓕᐅᑉ ᐅᓇᑕᕐᑐᒃᓴᖏᓐᓄᑦ ᐊᖓᔪᖅᑳᖑᔪᖅ ᐋᑉᓄ ᓂᕆᐅᑉ ᐃᕐᓂᖓ, ᓴᐅᓕᐅᑉ ᐃᕐᓂᖓᓂᒃ ᐃᔅᐳᓴᒥᒃ ᐱᖃᑎᖃᕐᓗᓂ ᐃᑳᓚᐅᕐᐴᒃ ᔪᐊᕐᑕᓂᐅᑉ ᑰᖓᓂᒃ ᒪᕼᐊᓁᒧᑦ ᐂᓪᓗᑎᒃ. 9ᑍᑲᓂᓗ ᐋᑉᓅᑉ ᐃᔅᐳᓴᑦ ᐊᖓᔪᖅᑳᕐᔪᐊᕈᕐᑎᓚᐅᕐᐹ ᓄᓇᓕᖕᓄᑦ ᒋᓕᐊᑎᒧᑦ, ᐋᓱᕅᑎᒧᑦ, ᔨᔭᕆᐅᓪᒧᑦ, ᐃᕗᕅᒧᑦ, ᐱᓐᔭᒥᓂᒃᑯᓐᓄᓪᓗ, ᐊᒡᓛᑦ ᐃᓴᕆᐊᓕᒥᐅᓕᒫᓄᑦ. 10ᐃᔅ-ᐳᓴᑦ ᓴᐅᓕᐅᑉ ᐃᕐᓂᖓ ᐊᕐᕌᒍᖃᓚᐅᕐᐳᖅ 40ᓂᒃ ᐊᖓᔪᖅᑳᕐᔪᐊᕈᕐᑎᑕᐅᑎᓪᓗᒍ ᐃᓴᕆᐊᓕᒥᐅᓄᑦ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒎᖕᓂᒃ ᒪᕐᕉᖕᓂᒃ.
ᔫᑕᐅᓪᓕ ᑭᖑᕚᖏᑦ ᑍᕕᑎᒥᒃ ᒪᓕᖔᓚᐅᕐᐳᑦ. 11ᑍᕕᑎᓗ ᐊᐅᓚᑦᓯᓚᐅᕐᐳᖅ ᕼᐃᐸᕋᓐᒥ ᔫᑕᐅᑉ ᑭᖑᕚᖏᓐᓂᒃ ᐊᕐᕌᒍᓂᒃ 7ᓂᒃ ᑕᖅᑭᓂᒡᓗ ᐱᖓᓲᔪᕐᑐᓂᒃ.
ᐃᓴᕆᐊᓕᒥᐅᑦ ᔫᑕᒥᐅᓪᓗ ᐅᓇᑕᐅᑎᓂᖏᑦ
12ᐋᑉᓄ ᓂᕆᐅᑉ ᐃᕐᓂᖓ, ᐃᔅᐳᓴᐅᓪᓗ ᓴᐅᓕᐅᑉ ᐃᕐᓂᖓᑕ ᐊᖓᔪᖅᑳᖁᑎᖏᑦ ᒪᕼᐊᓁᒥᑦ ᒋᐱᐅᓂᒧᑦ ᐂᓚᐅᕐᐳᑦ. 13ᔪᐊᐱᓗ ᐊᓈᓇᖃᕐᑐᖅ ᔨᕈᐃᐊᒥᒃ, ᑍᕕᑎᐅᓪᓗ ᐊᖓᔪᖅᑳᖁᑎᖏᑦ ᑲᑎᓯᓚᐅᕐᐳ ᑖᒃᑯᓂᖓ ᑕᓯᓕᐅᕐᓯᒪᔪᒥ ᒋᐱᐅᓂᒥ; ᑕᕝᕙᓂᓗ ᐃᒃᓯᕙᓚᐅᕐᐳᑦ, ᐊᑭᓕᕇᒃᓱᑎᒃ. 14ᑕᕝᕙ ᐋᑉᓄ ᐅᖃᕐᐳᖅ ᔪᐊᐱᒧᑦ, “ᐅᕕᒃᑬᑦ ᐃᓚᖏᑦ ᐅᓇᑕᖃᑎᒌᓚᐅᕐᓕᑦ ᑕᑯᓐᓈᕐᑎᓪᓗᑕ ᓵᓚᒋᖃᑦᑕᐅᑎᓇᓱᐊᕐᓗᑎᒃ.”
ᔪᐊᐱᓗ ᑭᐅᕗᖅ, “ᐊᑏ.” 15ᑍᒤᒻᒪᑦ 12ᐃᑦ ᒪᑭᑉᐳᑦ, ᐃᔅᐳᓴᐅᑉ ᓴᐅᓕᐅᑉ ᐃᕐᓂᖓᑕ ᐃᓄᖁᑎᖏᓐᓂᑦ ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᔪᑦ, ᐊᒻᒪ 12ᑕᐅᖅ ᑍᕕᑎᐅᑉ ᐃᓄᖁᑎᖏᓐᓂᒃ ᐱᒋᓪᓗᑎᒃ. 16ᑖᒃᑯᐊᓗ ᐊᑐᓂᑦ ᓂᐊᖁᕐᒥᒃᑎᒍᑦ ᑎᒍᖃᑦᑕᐅᑎᓚᐅᕐᐳᑦ, ᐊᑭᓕᕐᒥᓂᒡᓗ ᑲᐱᓯᓪᓗᑎᒃ ᓴᓂᕋᖓᒍᑦ; ᑖᒃᑯᐊᓕᒫᓪᓗ 24 ᐅᕐᕈᓚᐅᕐᐳᑦ ᐊᑕᐅᑦᓯᒃᑯᑦ ᑐᖁᓪᓗᑎᒃ. ᑍᒤᒻᒪᑦ ᑖᓐᓇ ᓄᓇ ᒋᐱᐅᓂᒦᑦᑐᖅ ᑍᔭᐅᓕᓚᐅᕐᐳᖅ ᕼᐃᓕᑲᑦ-ᕼᐊᔪᕆᒥᒃ, “ᓴᕕᒡᔪᐊᑉ ᐱᕈᕐᓰᕕᖓᓂᒃ.”
17ᐅᓪᓗᒥᓗ ᑕᕝᕙᓂ ᐅᓇᑕᓕᓚᐅᕐᐳᑦ ᓂᓐᖓᐅᑎᖃᑦᑕᐅᑎᓯᒪᓪᓗᑎᒃ; ᐋᑉᓄᒃᑯᓪᓗ ᐃᓴᕆᐊᓕᒥᐅᑦ ᓵᓚᐅᓚᐅᕐᐳᑦ ᑍᕕᑎᐅᑉ ᐃᓄᖁᑎᖏᓐᓄᑦ. 18ᔨᕈᐃᐊᐅᓪᓗ ᐃᕐᓂᖏᑦ ᐱᖓᓱᑦ ᑍᑲᓃᓚᐅᕐᐳᑦ ᐅᑯᐊ: ᔪᐊᐱ, ᐊᐱᓮ, ᐊᓴᕼᐃᐅᓗ. ᑖᓐᓇᓗ ᐊᓴᕼᐃᐅᓪ ᑎᐊᕐᑎᑐᑦ ᑐᒃᑐᖓᔪᑎᑐᑦ ᓱᑲᑦᑑᑎᒋᔪᓐᓇᓚᐅᕐᐳᖅ; 19ᐊᓴᕼᐃᐅᓗ ᒪᓕᒃᓴᕐᐳᖅ ᐋᑉᓄᒥᒃ, ᑐᕌᓪᓗᐊᕐᓗᒍᓗ ᐅᓪᓛᕆᓚᐅᕐᐹ ᓴᖑᓚᐅᕋᓂ ᓴᐅᒥᒧᑦ ᑕᓕᕐᐱᒧᓪᓘᓐᓃᑦ. 20ᑕᕝᕙ ᐋᑉᓄ ᑕᑯᓴᕋᒥ ᑭᖑᒧᑦ ᐅᖃᕐᐳᖅ, “ᐃᕝᕕᐅᕖᑦ, ᐊᓴᕼᐃᐅᓪ?” ᑭᐅᕗᖅ, “ᐄ ᑖᓐᓇᐅᕗᖓ.”
21ᐋᑉᓅᑉ ᐅᖃᐅᑎᕙ, “ᒪᓕᖔᓚᐅᕆᑦ ᐅᓇᑕᕐᑐᓮᑦ ᐃᓚᖓᓐᓂᒃ ᐱᖏᓐᓂᒡᓗ ᐱᓗᑎᑦ.” ᑭᓯᐊᓂᓕ ᐊᓴᕼᐃᐅᓪ ᒪᓖᓐᓇᓚᐅᕐᐳᖅ ᑖᑦᓱᒥᖓ. 22ᐋᑉᓅᓪᓗ ᐊᓴᕼᐃᐅᓪ ᐅᖃᐅᑎᒋᐊᓪᓚᒃᐹ, “ᒪᓕᓐᖏᓚᐅᓐᖓ; ᖃᓄᐃᒻᒪᑦ ᐅᕙᓐᓄᑦ ᑐᖁᑕᐅᑎᓐᓇᓱᐊᕐᐲᑦ? ᑐᖁᑐᐊᕈᒃᑭᑦ ᐊᖓᔪᐃᑦ ᔪᐊᐱ ᑕᑯᓴᕈᓐᓇᕋᔭᖏᓐᓇᒃᑯ.” 23ᐊᓴᕼᐃᐅᓕ ᓄᖅᑲᓚᐅᓐᖏᓚᖅ; ᑍᒤᒻᒪᑦ ᐋᑉᓅᑉ ᖃᓗᒋᐊᒥᓄᑦ ᑲᐱᒋᐊᕋᒥᐅᒃ, ᑲᐱᓚᐅᕐᐹ ᓈᖓᒍᑦ ᐳᑐᒻᒥᑖᕐᓗᓂᐅᒃ ᖃᓗᒋᐊᖓᓗ ᑐᓄᐊᒍᑦ ᓄᐃᓪᓗᓂ; ᐊᓴᕼᐃᐅᓪᓗ ᑕᕝᕙᓂ ᐅᕐᕈᕗᖅ, ᑐᖁᓪᓗᓂᓗ. ᐊᖅᑯᓵᕐᑐᓕᒫᓗ ᐊᓴᕼᐃᐅᑉ ᐅᕐᕈᕕᖓᓄᑦ ᑐᖁᕕᖓᓄᓪᓗ, ᓄᖅᑲᖃᑦᑕᓚᐅᕐᐳᑦ.
24ᔪᐊᐱᒃᑯᒡᓕ ᐊᐱᓮᒃᑯᒃ ᒪᓕᒃᓴᓚᐅᕐᐴᒃ ᐋᑉᓄᒥᒃ; ᓯᕿᓂᖅ ᓂᐱᓕᕐᑎᓪᓗᒍ ᖃᖅᑲᒧᐊᓚᐅᕐᐳᑦ ᐊᒻᒪᒧᑦ, ᒋᐊᑉ ᓯᕗᓂᖓᓃᑦᑐᒧᑦ ᐃᓄᖃᔪᐃᑦᑐᓕᐊᖓᔫᑉ ᐊᖅᑯᑖᓃᑦᑐᒧᑦ ᒋᐱᐅᓂᒥ. 25ᐱᓐᔭᒥᓂᐅᓪᓗ ᑭᖑᕚᖏᑦ ᑕᕝᕙᓂ ᑲᑎᓚᐅᕐᐳᑦ ᐋᑉᓄᒧᑦ ᐊᑐᐃᓐᓇᐅᓕᕐᓗᑎᒃ, ᑲᑎᓐᖓᓚᐅᕐᐳᑦ ᖃᖅᑲᐅᑉ ᖄᖓᓂ. 26ᑕᕝᕙ ᐋᑉᓄ ᔪᐊᐱᒧᑦ ᐅᖃᕐᐳᖅ, “ᐅᓇᑍᓐᓇᕆᐊᖃᕐᐱᑖ ᐃᓱᖃᖏᑦᑐᒧᑦ? ᖃᐅᔨᒪᓐᖏᓚᑏᑦ ᑕᒪᑐᒪ ᑭᖑᕐᖓᓂ ᑕᒪᓐᓇ ᖃᓯᓕᓇᕐᑑᓂᐊᕐᒪᑦ? ᐃᓚᒌᒃᐳᒍᑦ ᓄᓇᖃᑎᒌᓪᓗᑕ ᖃᖓᓖ ᓄᖅᑲᕐᑎᑦᓯᓂᐊᕐᐱᑦ ᐃᓄᖁᑎᖕᓂᒃ ᐅᕙᑦᑎᓐᓂᒃ ᒪᓕᒃᑐᓂᒃ?”
27ᔪᐊᐱᓗ ᑭᐅᕗᖅ, “ᓱᓕᑦᓯᐊᕐᐳᖓ ᒎᑎ ᐆᒪᖕᒪᑦ, ᐅᖃᓚᐅᖏᒃᑯᕕᑦ, ᐃᓄᖁᑎᓐᓄᑦ ᒪᓕᒃᑕᐅᖏᓐᓇᕋᔭᓚᐅᕐᐳᑎᑦ ᐅᓪᓛᒧᑦ ᑎᑭᓪᓗᒍ.” 28ᑕᕝᕙ ᔪᐊᐱ ᑎᑦᑐᓚᐅᑎᒥᓂᒃ ᓂᓪᓕᕐᑎᑦᓯᕗᖅ; ᓄᖅᑲᖁᔨᓕᕐᓗᓂ ᒪᓕᖕᓂᖏᓐᓂᒃ ᐃᓴᕆᐊᓕᒥᐅᓂᒃ, ᐅᓇᑕᕐᓂᖓᓪᓗ ᓄᖅᑲᓚᐅᕐᐳᖅ.
29ᐋᑉᓄᒃᑯᓪᓗ ᐃᓄᖁᑎᖏᓪᓗ ᐅᓐᓄᐊᓕᒫᖅ ᐱᓱᓚᐅᕐᐳᑦ ᔪᐊᕐᑕᓂᐅᑉ ᓇᕐᓴᖓᒍᑦ ᐊᕋᐸᒃᑯᑦ; ᔪᐊᕐᑕᓂᐅᓪᓗ ᑰᖓᓂᒃ ᐃᑳᕋᒥᒃ, ᑲᔪᓯᓪᓗᑎᒃ ᐅᓪᓛᓐᖑᕐᑎᓪᓗᒍ ᒪᕼᐊᓁᒧᑦ ᑎᑭᓚᐅᕐᐳᑦ.
30ᔪᐊᐱᓗ ᒪᓕᒍᓐᓃᕋᒥ ᐋᑉᓄᒥᒃ; ᐃᓄᖁᑎᓕᒫᓂᓗ ᑲᑎᑎᓐᓇᒥᒋᑦ, ᑭᓐᖑᐃᓚᐅᕐᐳᑦ 19ᓂᒃ ᑍᕕᑎᐅᑉ ᐃᓄᖁᑎᖏᓐᓂᒃ, ᐊᓴᕼᐃᐅᓪ ᐱᖃᑕᐅᑎᓐᓇᒍ. 31ᑍᕕᑎᐅᓪᓕ ᐃᓄᖁᑎᖏᑦ ᑐᖁᑦᓯᓚᐅᕐᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ 360ᓂᒃ ᐋᑉᓅᑉ ᐃᓄᖁᑎᖏᓐᓂᒃ. 32ᔪᐊᐱᐅᓪᓗ ᐃᓄᖁᑎᖏᑕ ᐊᓴᕼᐃᐅᓕᐅᑉ ᑎᒥᖓ ᑎᒍᓪᓗᒍ ᐃᓗᕕᕐᐹᑦ ᐃᓚᒌᑦ ᐃᓗᕕᖓᓄᑦ ᐱᑦᓕᐊᒥ. ᔪᐊᐱᒃᑯᓪᓗ ᐅᓐᓄᐊᓕᒫᖅ ᐱᓱᓚᐅᕐᐳᑦ, ᖃᐅᒻᒪᓕᕐᑎᓪᓗᒍᓗ ᕼᐃᐸᕋᓐᒧᑦ ᑎᑭᑉᐳᑦ.
Currently Selected:
ᓴᒧᐃᓕ ᐂᑉᐸᖏᑦ 2: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
