ᓴᒧᐃᓕ ᐂᑉᐸᖏᑦ 23
23
ᑍᕕᑎᐅᑉ ᐅᖃᐅᓯᖏᑦ ᑭᖑᓪᓕᕐᐹᑦ
1ᑍᕕᑎ ᔨᓯᐅᑉ ᐃᕐᓂᖓ ᑖᓐᓇ ᒎᑎᐅᑉ ᐊᖏᔪᕈᕐᑎᓚᐅᕐᐹ, ᔧᑰᑉ ᒎᑎᖓᑕ ᓂᕈᐊᓚᐅᕐᑕᖓ ᐊᖓᔪᖅᑳᕐᔪᐊᓐᖑᖁᓪᓗᒍ, ᐃᓐᖏᐅᓯᓕᐅᕐᑎᐅᓚᐅᕐᑐᖅ ᐱᐅᔪᐊᓗᖕᓂᒃ ᐃᓴᕆᐊᓕᒥᐅᓄᑦ. ᐅᑯᐊ ᑕᕝᕙ ᑍᕕᑎᐅᑉ ᐅᖃᐅᓯᖏᑦ ᑭᖑᓪᓕᕐᐹᑦ:
2“ᐊᑕᓂᐅᑉ ᐊᓂᕐᓂᖓ ᐅᕙᒃᑯᑦ ᐅᖃᓪᓚᒃᐳᖅ,
ᐅᖃᐅᓯᖏᓪᓗ ᖃᓂᓐᓃᑉᐳᑦ.
3ᐃᓴᕆᐊᓕᐅᑉ ᒎᑎᖓ ᐅᖃᓚᐅᕐᐳᖅ;
ᐃᓴᕆᐊᓕᐅᑉ ᓴᐳᑦᔨᔨᖓ ᐅᕙᓐᓄᑦ ᐅᖃᓚᐅᕐᐳᖅ:
ᐊᖓᔪᖅᑳᕐᔪᐊᖅ ᐊᐅᓚᑦᓯᔪᖅ ᓱᓕᑦᓯᐊᕐᑐᒥᒃ,
ᐊᐅᓚᑦᓯᔪᖅ ᓈᓚᑦᓯᐊᕐᓗᓂ ᒎᑎᒥᒃ,
4ᐅᓪᓛᒻᒪᕆᒃᑯᑦ ᓄᕗᔭᖃᖏᑦᑐᒥ ᓯᕿᓂᕐᒧᑦ ᓄᐃᕕᐅᔪᑐᑦ ᑍᒤᑉᐳᖅ,
ᓯᕿᓂᕐᒧᑦ ᐃᕕᒃᓱᒃᒊᑦ ᕿᓪᓛᒡᒋᕐᑕᕐᑎᑕᐅᔪᑎᑐᑦ ᓯᓚᓗᕋᑖᕐᑎᓪᓗᒍ.
5ᑍᒫᒃ ᒎᑎᐅᑉ ᑭᖑᕚᒃᑲ ᓮᒻᒪᕐᑎᑦᓱᒫᕐᐰᑦ,
ᑍᒫᒃ ᐃᓱᖃᖏᑦᑐᒧᑦ ᐊᖏᕐᕕᒋᓯᒪᖕᒪᖓ,
ᐱᖁᔨᑦᔪᑎᖓ ᑕᒤᑎᒍᑦ ᓱᖁᓯᔪᐃᑦᑑᕗᖅ.
ᑕᒪᓐᓇ ᐱᕙᓪᓕᐊᑎᓯᒪᓐᖏᓚᐅᒃ
ᐃᑲᔪᕐᑕᐅᓂᓕᒫᒃᑲ ᐱᔪᒪᔭᕆᔭᒃᑲᓗ?
6ᒎᑎᖃᖏᑦᑐᓕᒫᓪᓕ ᑲᑭᓪᓚᕐᓇᕐᑎᑐᑦ ᐃᒋᑕᐅᕗᑦ;
ᐊᒃᑐᕐᑕᐅᔪᓐᓇᕐᓂᐊᓐᖏᓚᓪᓗ ᐊᒡᒐᑐᐃᓐᓇᕐᓄᑦ;
7ᐃᓄᖕᒧᑦ ᐊᒃᑐᕐᑕᐅᓂᐊᕈᑎᒃ ᐊᑐᕐᑐᒃᓴᐅᕗᑦ
ᓴᕕᕋᔭᖕᒥᒃ ᓴᓇᕐᕈᑎᒥᒃ ᖃᓗᒋᐊᕐᒥᒡᓗ,
ᐃᑭᑕᐅᓂᐊᕐᒪᑕ ᓄᖑᑕᐅᑦᓯᐊᕐᓗᑎᒃ.”
ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᖃᐅᔨᒪᔭᐅᑦᓯᐊᕐᑐᑦ
ᑯᕉᓂᑲ ᓯᕗᓪᓖᑦ 11:10-41
8ᐅᑯᐊ ᑕᕝᕙ ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᐊᔪᖏᑦᑐᕐᔪᐊᖑᓚᐅᕐᑐᑦ; ᓯᕗᓪᓕᕐᐹᖅ ᔫᓯᑉ-ᐹᔅᓰᐸᔅ ᑖᓐᓇ ᑕ-ᑭᒧᓁᑎᒥᐅᑕᖅ; ᐊᖓᔪᖅᑳᖑᓚᐅᕐᑐᖅ ᐱᖓᓱᓄᑦ; ᐅᓈᕐᒥᓄᑦ ᐅᓇᑕᓚᐅᕐᑐᖅ 800ᓂᒃ ᐊᖑᑎᓂᒃ, ᑐᖁᓪᓗᒋᓪᓗ ᐅᓇᑕᕐᓂᕐᒥ ᐊᑕᐅᓯᕐᒥ.
9ᑖᑦᓱᒪ ᑐᖓᓕᕆᔭᖓ ᑖᒃᑯᓇᓐᖓᑦ ᐊᔪᖏᑦᑐᕐᔪᐊᖑᓚᐅᕐᑐᓂᑦ ᐱᖓᓱᓂᑦ ᐃᓕᓯᕆᐅᕗᖅ ᑐᑑᑉ ᐃᕐᓂᖓ ᐊᕼᐅᕼᐂᒥᐅᑕᖅ. ᑖᓐᓇ ᑍᕕᑎᒥᒃ ᐃᓚᖃᓚᐅᕐᐳᖅ ᐱᓕᔅᑍᓂᒥᐅᓂᒃ ᓵᓐᖓᓯᓪᓗᑎᒃ ᐅᓇᑕᕆᐊᕐᑎᓪᓗᒋᑦ, ᐃᓴᕆᐊᓕᒥᐅᓪᓗ ᐃᓄᖏᑦ ᕿᒫᒃᓯᓚᐅᕐᐳᑦ. 10ᑖᓐᓇ ᕿᒪᒃᓯᓇᓂ ᐃᓂᒥᓂ ᓂᑯᕕᓚᐅᕐᐳᖅ ᐱᓕᔅᑍᓂᒥᐅᓪᓗ ᑐᖁᕋᓚᐅᕐᐰᑦ ᐊᒡᒐᖏᑦ ᑕᖃᓚᐅᖏᓐᓂᖏᓐᓂ, ᓴᕕᒡᔪᐊᖓ ᓂᐱᓐᖓᓕᓚᐅᕐᐳᖅ ᐊᒡᒐᖓᓄᑦ; ᐊᑕᓂᕐᓗ ᐊᖏᔪᒥᒃ ᓵᓚᒃᓴᕐᑎᑦᓯᓚᐅᕐᐳᖅ ᑍᑦᓱᒪᓂ ᐅᓪᓗᒥ; ᐅᓇᑕᕐᑐᒃᓮᓪᓕ ᐅᑎᓚᐅᕐᐳᑦ ᐃᓕᓯᕆᒧᑦ ᐊᓐᓄᕅᔭᕐᓯᔭᕐᑐᑐᐃᓐᓇᓕᕐᓗᑎᒃ ᑐᖁᖓᔪᓂᒃ.
11ᑖᑦᓱᒪ ᑐᖓᓕᒃᑲᓐᓂᐊ ᓵᒻᒪᐅᕗᖅ ᐊᒌᑉ ᐃᕐᓂᖓ ᕼᐊᕋᕅᑎᒥᐅᑕᖅ. ᑍᑦᓱᒪᓂ ᐱᓕᔅᑏᓐᒥᐅᑦ ᑲᑎᖕᒪᑕ ᐱᕈᕐᓰᕕᖕᒧᑦ ᐱᕈᕐᑐᓕᖕᒧᑦ ᓕᕼᐃᒧᑦ; ᐃᓴᕆᐊᓕᒥᐅᑦ ᕿᒫᓚᐅᕐᒪᑕ ᐱᓕᔅᑍᓂᒥᐅᓂᑦ. 12ᑖᓐᓇᓕ ᐃᓂᒥᓂᑦ ᓂᑯᕕᓚᐅᕐᐳᖅ, ᓴᐳᓐᓂᐊᓕᕐᓗᓂᓗ, ᐱᓕᔅᑍᓂᒥᐅᓪᓗ ᑐᖁᕋᓚᐅᕐᐰᑦ; ᐊᑕᓂᕐᓗ ᐊᖏᔪᒥᒃ ᓵᓚᒃᓴᕕᒃᔪᐊᕐᑎᑦᓯᓚᐅᕐᐳᖅ.
13ᑲᑎᕐᓱᐃᕕᒃ ᓇᓪᓕᐅᑎᑎᓪᓗᒍ, ᐱᖓᓱᑦ ᐊᖓᔪᖅᑳᖑᔪᑦ 30ᓂᑦ ᐱᓯᒪᔪᑦ ᑕᐅᓄᖓ ᑍᕕᑎᒧᐊᓚᐅᕐᐳᑦ ᕾᕈᓱᖕᒧᑦ ᐊᑑᓚᒻᒧᑦ, ᐱᓕᔅᑍᓂᒥᐅᑦ ᑕᖕᒫᕐᓯᒪᑎᓪᓗᒋᑦ ᓇᕐᓴᒥ ᕆᐰᒻᒥ. 14ᑍᕕᑎ ᑍᑦᓱᒪᓂ ᖃᖅᑲᒥ ᓴᐴᓗᑕᓕᖕᒦᓚᐅᕐᐳᖅ, ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖃᕐᕕᖕᒥᓃᑎᓪᓗᒋᑦ ᐱᑦᓕᐊᒥ. 15ᑍᕕᑎᓗ ᐃᒥᕈᒃᑐᐊᓘᓕᕋᒥ, ᐅᖃᓚᐅᕐᐳᖅ, “ᐃᒥᕐᑎᑕᐅᑦᓴᓚᐅᕐᓚᖓᑐᖅ ᐃᒥᕐᑕᕐᕕᖕᒥᑦ ᐱᑦᓕᐊᑉ ᐃᑎᕐᑕᕐᕕᐊᑕ ᓴᓂᐊᓃᑦᑐᒥᑦ!” 16ᑕᕝᕙ ᐊᖑᑏᑦ ᑖᒃᑯᐊ ᐱᖓᓱᑦ ᐊᔪᖏᑦᑐᐊᓗᐃᑦ ᐱᓕᔅᑍᓂᒥᐅᑎᒎᓚᐅᕐᐳᖅ, ᐃᒥᕐᑕᓚᐅᕐᐳᓪᓗ ᐃᒥᕐᑕᕐᕕᖕᒥᑦ ᐱᑦᓕᐊᒥᑦ ᐃᑎᕐᑕᕐᕕᐅᑉ ᓴᓂᐊᓃᑦᑐᒥᑦ, ᑐᓂᓚᐅᕐᐹᓪᓗ ᑍᕕᑎᒧᑦ. ᑍᕕᑎᐅᓪᓕ ᐃᒥᕈᒪᓚᐅᓐᖏᓛ, ᑯᕕᓚᐅᕐᐹᓕ ᐊᑕᓂᕐᒧᑦ ᑐᓂᕐᕈᑎᒋᓪᓗᒍ. 17ᐅᖃᕐᓗᓂᓗ, “ᐃᒥᕈᓐᓇᓐᖏᑕᕋᐅᓇ ᐊᑕᓃᖅ! ᐃᒥᕋᔭᕐᑑᔮᕋᒪ ᑖᒃᑯᐊ ᐊᖑᑏᑦ ᐊᐅᖏᓐᓂᒃ ᑐᖁᓐᓇᕐᑐᒃᑰᓚᐅᕐᓂᖏᑦ ᐱᓪᓗᒋᑦ!” ᑍᒤᒻᒪᑦ ᐃᒥᕈᒪᓚᐅᓐᖏᓛ. ᑕᒪᒃᑯᐊ ᑕᒪᑦᔭ ᐊᖑᑏᑦ ᑖᒃᑯᐊ ᐊᔪᖏᑦᑐᐊᓗᐃᑦ ᐱᓂᐊᕐᓂᕆᓚᐅᕐᑕᖏᑦ. 18ᐊᐱᓮ ᔪᐊᐱᐅᑉ ᓄᑲᖓ ᔨᕈᐃᐊᐅᑉ ᐃᕐᓂᖓ, ᐊᖓᔪᖅᑳᕆᔭᐅᓛᐅᕐᐳᖅ ᑖᒃᑯᓄᖓ 30ᓄᑦ. ᐅᓈᓂ ᐊᑐᕐᓗᒍ 300ᓂᒃ ᑐᖁᑦᓯᓚᐅᕐᐳᖅ, ᑍᒤᒻᒪᑦ ᖃᐅᔨᒪᔭᐅᒻᒪᕆᓕᓚᐅᕐᐳᖅ ᑖᒃᑯᑎᑐᓇᖅ ᐱᖓᓱᑎᑐᑦ. 19ᐅᐱᒋᔭᐅᓂᕐᓴᐅᓚᐅᕐᐳᖅ ᑖᒃᑯᓇᓐᖓᑦ 30ᓂᑦ, ᑖᒃᑯᓄᖓᓗ ᐊᖓᔪᖅᑳᕐᑖᕆᔭᐅᓚᐅᕐᐳᖅ, ᑭᓯᐊᓂᓕ ᑖᒃᑯᑎᑐᓇᖅ ᐱᖓᓱᑎᑐᑦ ᖃᐅᔨᒪᔭᐅᑦᓯᐊᕐᑎᒋᓚᐅᓐᖏᓚᖅ.
20ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ, ᐃᕐᓂᕆᔭᐅᓚᐅᕐᐳᖅ ᐊᔪᖏᑦᑐᐊᓗᖕᒧᑦ, ᑲᑉᔨᐅᓪᒥᑦ ᐱᓯᒪᔪᖅ, ᐱᓂᐊᕐᓂᖃᓚᐅᕐᐳᖅ ᓯᕘᕋᖏᑦᓯᐊᕐᓗᓂ, ᑐᖁᑦᓯᓚᐅᕐᑐᖅ ᐊᖑᑏᖕᓂᒃ ᒪᕐᕉᖕᓂᒃ ᓛᔭᑎᑑᕐᑑᖕᓂᒃ ᒧᐊᐱᒥᐅᑖᖕᓂᒃ, ᑐᖁᑦᓯᓚᐅᕐᑐᕐᓗ ᓛᔭᒥᒃ ᐃᑎᕐᓴᒦᑦᑐᒥᒃ ᖃᓐᓂᕐᑎᓪᓗᒍ. 21ᐄᑦᔨᑉᑎᒥᐅᑕᒥᒡᓗ ᑐᖁᑦᓯᓚᐅᕐᐳᖅ, ᐊᖑᒻᒥᒃ ᐊᖏᔪᐊᓗᖕᒥᒃ. ᐄᑦᔨᑉᑎᒥᐅᑕᖅ ᖃᓗᒋᐊᕐᒥᓂᒃ ᑎᒍᒥᐊᓚᐅᕐᐳᖅ; ᑖᑦᓱᒪᓕ ᐅᐸᓚᐅᕐᐹ ᐊᔭᐅᑉᐱᐊᓕᔭᕐᓗᓂ, ᐅᓇᑕᕐᓗᓂᐅᒃ ᐄᑦᔨᑉᑎᒥᐅᑕᖅ ᐊᕐᓵᓚᐅᕐᐹ ᖃᓗᒋᐊᖓᓂᒃ, ᑐᖁᓪᓗᒍᓗ ᐅᓈᖓᓄᑦ. 22ᑕᒪᒃᑯᐊ ᐱᓁᐊᐅᑉ ᔨᕼᐅᐃᐊᑕᐅᑉ ᐃᕐᓂᖓᑕ ᐱᓂᐊᕐᓂᕆᓚᐅᕐᐰᑦ, ᑖᓐᓇᑦᑕᐅᖅ ᖃᐅᔨᒪᔭᐅᑦᓯᓚᐅᕐᐳᖅ ᑖᒃᑯᑎᑐᓇᖅ ᐱᖓᓱᑎᑐᑦ ᐊᔪᖏᑦᑐᕐᔪᐊᑎᑐᑦ. 23ᐅᐱᒋᔭᐅᓂᕐᓴᐅᓚᐅᕐᐳᖅ ᑖᒃᑯᓇᓐᖓᑦ 30ᓂᑦ, ᑭᓯᐊᓂᓕ ᑖᒃᑯᓄᖓ ᐱᖓᓱᓄᑦ ᑍᒫᓪᓗᐊᖃᑕᐅᓚᐅᓐᖏᓚᖅ. ᑍᕕᑎᐅᓪᓗ ᓂᕈᐊᓚᐅᕐᐹ ᓴᐳᓐᓂᐊᕐᑎᒥᓄᑦ ᐊᖓᔪᖅᑳᖑᖁᓪᓗᒍ. 24ᐅᑯᐊ 30ᓄᑦ ᐃᓚᒋᔭᐅᓚᐅᕐᐳᑦ; ᐊᓴᕼᐃᐅᓪ ᔪᐊᐱᐅᑉ ᖃᑕᓐᖑᑎᖓ, ᐃᐅᓪᕼᐊᓇᓐ ᑐᑑᑉ ᐱᑦᓕᐊᒥᐅᑕᐅᑉ ᐃᕐᓂᖓ, 25ᓴᒪ ᐃᓕᑲᓗ ᕼᐊᕉᑎᒥᐅᑖᒃ, 26ᕼᐃᓕᔾ ᐱᐅᓪᑍᑎᒥᐅᑕᖅ, ᐂᕋ ᐃᒃᑭᓴᐅᑉ ᐃᕐᓂᖓ ᑎᑯᐊᒥᐅᑕᖅ, 27ᐊᐰᔨᕆ ᐊᓇᑑᑎᒥᐅᑕᖅ, ᒥᐳᓐᓁ ᕼᐅᓴᑍᑎᒥᐅᑕᖅ, 28ᔭᓪᒧᓐ ᐊᕼᐅᕼᐂᒥᐅᑕᖅ, ᒪᕼᐊᕅ ᓂᑐᐸᕼᐊᒥᐅᑕᖅ, 29ᕼᐃᓕᑉ ᐹᓇᐅᑉ ᐃᕐᓂᖓ ᓂᑐᐸᕼᐊᒥᐅᑕᖅ, ᐃᑍ ᕆᐰᑉ ᐃᕐᓂᖓ ᒋᐱᐊᒥᐅᑕᖅ ᐱᓐᔭᒥᓂᐅᑉ ᑭᖑᕚᖏᓐᓂᑦ, 30ᐱᓁᐊ ᐱᕋᑐᓁᒥᐅᑕᖅ, ᕼᐃᑍ ᒑᔅ ᑰᖓᓂᒥᐅᑕᖅ, 31ᐊᐰ-ᐊᐅᓪᐹᓐ, ᐋᕐᐸᑍᑎᒥᐅᑕᖅ, ᐊᔾᒪᕕᑎ ᐸᕼᐅᕆᒻᒥᐅᑕᖅ, 32ᐃᓔᕼᐊᐸ ᓵ-ᐊᓪᐳᓁᒥᐅᑕᖅ, ᔮᓯᓐ ᐃᕐᓂᖏᑕ ᐃᓚᖓᑦ, ᔫᓇᑕᓂ, 33ᓴᒪ ᕼᐊᕋᕅᑎᒥᐅᑕᖅ, ᐊᕼᐂᐊᒻ ᓵᕋᕆᐅᑉ ᕼᐊᕋᕅᑎᒥᐅᑕᐅᑉ ᐃᕐᓂᖓ, 34ᐃᓕᕕᓕᑦ ᐊᕼᐊᔅᐰᑉ ᐃᕐᓂᖓ ᒫᑲᑍᑎᒥᐅᑕᖅ, ᐃᓕᐊᒻ ᐊᕼᐃᑐᐱᓕᐅᑉ ᐃᕐᓂᖓ ᒋᓗᓁᑎᒥᐅᑕᖅ, 35ᕼᐃᔪᕈ ᑳᕐᒥᐅᓪᒥᐅᑕᖅ, ᐹᕅ ᐊᕐᐰᒥᐅᑕᖅ, 36ᐃᒐᐅᓪ ᓁᑕᓂᑉ ᔪᐹᒥᐅᑕᐅᑉ ᐃᕐᓂᖓ, ᐹᓂ ᒐᑍᑎᒥᐅᑕᖅ, 37ᔨᓕᒃ ᐊᒧᓁᑎᒥᐅᑕᖅ, ᓇᕼᐊᕅ ᐱ-ᐊᕌᔅᑕᒥᐅᑕᖅ, ᔪᐊᐱᐅᑉ ᐅᓇᑕᐅᑎᖏᓐᓂᒃ ᑲᒪᔨᐅᓚᐅᕐᑐᖅ ᔨᕈᐃᐊᐅᑉ ᐃᕐᓂᖓ, 38ᐂᕋ ᐃᑕᕅᑎᒥᐅᑕᖅ, ᒐᕆᑉ ᐃᑕᕅᑎᒥᐅᑕᖅ, 39ᔪᕅᐊ ᕼᐃᑍᑎᒥᐅᑕᖅ: ᑖᒃᑯᐊ ᑲᑎᓪᓗᒋᑦ 37ᐅᓚᐅᕐᐳᑦ.
Currently Selected:
ᓴᒧᐃᓕ ᐂᑉᐸᖏᑦ 23: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
