ᓴᒧᐃᓕ ᐂᑉᐸᖏᑦ 22
22
ᑍᕕᑎᐅᑉ ᐃᓐᖏᕈᑎᖓ ᓵᓚᖃᕐᓂᕐᒧᑦ
ᐃᓐᖏᕈᑦ 18
1ᐊᑕᓂᐅᑉ ᐱᐅᓕᖕᒪᒍ ᓴᐅᓕᒥᑦ ᐊᑭᕋᕐᑐᕐᑎᖏᓐᓂᓪᓗ ᐊᓯᖏᓐᓂᑦ, ᑍᕕᑎ ᐃᓐᖏᓚᐅᕐᐳᖅ ᐃᓐᖏᕈᒻᒥᒃ ᐊᑕᓂᕐᒧᑦ:
2ᐅᖃᕐᓗᓂ,
“ᐊᑕᓂᖅ ᕾᕐᑐᕆᕙᕋ, ᓴᐳᑦᔨᔨᒋᓪᓗᒍᓗ;
ᓱᖑᔫᓪᓗᓂ ᓴᐴᓗᑕᕆᕙᕋ.
3ᒎᑎᒐ ᕾᕐᑐᕆᓪᓗᒍ ᕿᒫᕕᒋᕙᕋ,
ᓴᐴᓗᑕᕆᕙᕋ ᐱᐅᓕᔭᐅᕕᒃᓴᒪᓗ ᓴᒃᑯᒋᖕᒪᒍ,
ᕿᒫᕕᒃᓴᕆᒐᒃᑯ ᓵᓚᐅᓂᐊᖏᑦᑐᖅ,
ᐱᐅᓕᔨᒐ; ᐱᐅᓕᒐᕕᖓ ᑲᑉᐱᐊᓇᕐᑐᓂᑦ.
4ᐊᑕᓂᕐᒧᑦ ᑐᒃᓯᐊᓚᐅᕐᐳᖓ, ᑖᓐᓇ ᓂᕐᑐᒐᒃᓴᐅᖕᒪᑦ,
ᐱᐅᓕᕚᖓᓗ ᐊᑭᕋᕐᑐᕐᑎᓐᓂᑦ.
5ᑐᖁᒧᑦ ᐃᓗᒪᔭᐅᓚᐅᕐᐳᖓ ᐊᕙᑎᓕᒫᓐᓂᑦ;
ᐊᓯᕈᕐᑕᐅᓇᕐᑐᒧᓪᓗ ᐊᕙᓗᔭᐅᓚᐅᕐᐳᖓ.
6ᐃᓗᕕᐅᑉ ᐊᒃᓱᓈᖓᓄᑦ ᓂᒐᕕᑕᐅᓚᐅᕐᐳᖓ,
ᑐᖂᓪᓗ ᓂᒐᖓᓄᑦ ᓯᕗᕐᖏᕐᑕᐅᓚᐅᕐᐳᖓ.
7ᐊᒃᓱᕈᕐᓇᕐᑐᒦᓕᕐᑎᓪᓗᖓ ᐊᑕᓂᕐᒧᑦ ᑐᒃᓯᐊᓚᐅᕐᐳᖓ;
ᒎᑎᓐᓄᑦ ᑐᒃᓯᐊᓚᐅᕐᐳᖓ ᐃᑲᔪᕐᑕᐅᔪᒪᓪᓗᖓ.
ᑐᒃᓯᐊᕐᕕᖁᑎᖕᒥᓂᑦ ᓂᐱᒐ ᑐᓴᓚᐅᕐᐹ;
ᓈᓚᓚᐅᕐᐹᖓᓗ ᐃᑲᔪᕐᑕᐅᔪᒪᓂᕆᔭᓐᓂᒃ.
8ᑕᕝᕙ ᓄᓇ ᓴᔪᓕᕐᐳᖅ ᓴᔪᒃᐱᓪᓚᒡᓗᓂᓗ;
ᕿᓚᐅᓪᓗ ᑐᓐᖓᕕᖓ ᐊᐅᓚᑦᔭᓚᐅᕐᐳᖅ ᓴᔪᓕᕐᓗᓂᓗ,
ᒎᑎ ᓂᓐᖓᓚᐅᕐᒪᑦ.
9ᐳᔪᕐᒥᒃ ᓱᕐᓗᖓᓂᑦ ᓄᐃᔪᖃᓚᐅᕐᐳᖅ,
ᐃᑯᒪᒥᒃ ᐃᑯᐊᓪᓚᒃᑎᑦᓯᔪᒥᒃ
ᐃᑯᒪᔪᓪᓗ ᐊᐅᒫᓗᐃᑦ ᐊᓂᓚᐅᕐᐳᑦ ᖃᓂᖓᓂᑦ.
10ᕿᓔᑦ ᐊᖕᒪᕐᓗᒋᑦ ᐊᖅᑲᓚᐅᕐᐳᖅ,
ᓄᕗᔭ ᑖᕐᑐᖅ ᐃᑎᒐᖏᑕ ᐊᑖᓃᑎᓪᓗᒍ.
11ᐃᖏᕐᕋᓚᐅᕐᐳᖅ ᓱᒃᑲᓕᓪᓗᓂ, ᐃᓴᕈᓕᖕᓄᑦ ᐃᑭᒪᓪᓗᓂ;
ᑕᑯᔭᐅᓚᐅᕐᐳᖅ ᐃᓴᕈᖃᕐᑎᓪᓗᒍ ᐊᓄᕆᒥᒃ.
12ᐃᒻᒥᓂᒃ ᑕᓕᑎᓯᒪᓚᐅᕐᐳᖅ ᑖᕐᑐᒧᑦ;
ᓄᕗᔭᕐᔪᐊᓄᑦ, ᐃᒥᕐᒥᒃ ᑕᑕᑦᑐᓄᑦ ᐊᕙᓗᔭᐅᓯᒪᓚᐅᕐᐳᖅ;
13ᖃᐅᒪᔪᐊᓗᖕᒧᑦ ᑖᑦᓱᒪ ᓵᖓᓃᑦᑐᒧᑦ
ᐃᑯᒪᔪᓂᒃ ᐊᐅᒫᓗᖕᓂᒃ ᓴᖅᑭᑦᑐᖃᕐᐳᖅ.
14ᐊᑕᓂᖅ ᐃᒃᑑᓕᔮᓚᐅᕐᐳᖅ ᕿᓚᖕᒥᑦ,
ᖁᑦᓯᖕᓂᕐᐸᐅᔫᓪᓗ ᓂᐱᖓ ᑐᓴᕐᓴᐅᕗᖅ.
15ᖃᕐᔪᒥᓄᑦ ᐱᓯᒋᐊᕐᒪᑦ, ᐊᑭᕋᖏᑦ ᓯᐊᒻᒪᕐᐳᑦ;
ᑲᓪᓕᕐᒧᑦ ᕿᒪᒃᓯᑎᑉᐰᑦ ᐅᓪᓚᒃᓯᓪᓗᑎᒃ.
16ᑕᕝᕙ ᐃᒪᕕᐅᑉ ᐃᖅᑲᖓ ᑕᑯᔭᐅᓚᐅᕐᐳᑦ,
ᓄᓇᕐᔪᐊᓪᓗ ᑐᓐᖓᕕᖏᑦ ᓴᖅᑭᑉᐳᑦ ᐃᔨᕐᓯᒪᔪᖃᕈᓐᓃᕐᓗᑎᒃ,
ᐊᑕᓂᐅᑉ ᓱᐊᒃᐰᑦ ᐊᑭᕋᓂ,
ᐊᓄᕆᕐᔪᐊᒧᑦ ᓱᕐᓗᖓᓂᓐᖔᕐᑐᒧᑦ.
17ᖁᑦᓯᒃᑐᒥᑦ ᐃᓴᒃᓗᓂ, ᑎᒍᓚᐅᕐᐹᖓ;
ᐊᒧᓚᐅᕐᐹᖓ ᐃᒪᕐᒥᑦ ᐃᑎᔪᒥᑦ.
18ᐱᐅᓕᓚᐅᕐᐹᖓ ᓲᖑᔪᓂᑦ ᐊᑭᕋᓐᓂᑦ,
ᐅᕙᓐᓂᒃ ᐆᒥᓱᒃᑐᓂᑦ;
ᓲᖑᔫᓗᐊᓚᐅᕐᒪᑕ ᐅᕙᓐᓄᑦ.
19ᐅᖁᒤᑦᑐᒦᓕᕐᑎᓪᓗᖓ ᐅᓇᑕᕆᐊᓚᐅᕐᐹᖓ;
ᐊᑕᓂᐅᓪᓕ ᓴᐳᑎᓚᐅᕐᐹᖓ.
20ᐂᑎᓚᐅᕐᐹᖓ ᐃᓂᒃᓴᒧᑦ ᐱᕕᑐᔪᒧᑦ;
ᓴᐳᑎᓪᓗᖓ ᖁᕕᐊᒋᒐᒥᖓ.
21ᐊᑕᓂᐅᑉ ᐊᑭᓕᓚᐅᕐᐹᖓ ᓱᓕᔪᒥᒃ ᐱᓇᓱᐊᕐᓂᕋ ᐱᓪᓗᒍ;
ᓮᒻᒪᕐᑎᑉᐹᖓ ᐱᓂᐊᕐᓂᒃᑯᑦ ᐸᓯᔭᒃᓴᐅᖏᓐᓂᕋ ᐱᓪᓗᒍ.
22ᐊᑕᓂᐅᑉ ᐱᖁᔭᖏᑦ ᓈᓚᓚᐅᕐᐸᒃᑲ;
ᒎᑎᓐᓂᒃ ᕿᒤᓚᐅᖏᓐᓇᒪ ᐱᐅᖏᑦᑐᓕᓂᕐᒧᑦ.
23ᐱᖁᔭᖏᑦ ᖃᐅᔨᓴᑦᓯᐊᕐᓯᒪᕙᒃᑲ;
ᒪᓕᒐᒃᓴᐅᖁᔭᖏᓪᓗ ᑐᓄᓚᐅᓐᖏᓚᒃᑲ.
24ᐸᓯᔭᒃᓴᐅᓂᖃᓚᐅᓐᖏᓚᖓ ᑖᑦᓱᒪ ᓵᖓᓂ,
ᐅᕙᓐᓂᒃ ᐸᓯᔭᒃᓴᓐᖑᕐᑎᑦᑍᓕᒪᓚᐅᕋᒪ.
25ᑍᒤᒻᒪᑦ ᐊᑭᓕᕐᐹᖓ ᐱᑦᓯᐊᕐᓂᕋ ᒪᓕᒡᓗᒍ,
ᖃᐅᔨᒪᒐᒥ ᐸᓯᔭᒃᓴᐅᖏᓐᓂᓐᓂᒃ ᑖᑦᓱᒪ ᓵᖓᓂ.
26ᑲᒪᑦᓯᐊᕐᑐᓄᑦ ᑲᒪᑦᓯᐊᕐᓃᑦ ᓴᖅᑭᑎᑉᐸᑦ,
ᐸᓯᔭᒃᓴᐅᖏᑦᑐᓄᓪᓗ ᐸᓯᔭᒃᓴᐅᖏᓐᓃᑦ ᓴᖅᑭᑎᑉᐸᑦ.
27ᐃᑦᔪᕐᓁᑦᑐᓄᑦ ᐃᑦᔪᕐᓁᓐᓃᑦ ᓴᖅᑭᑎᑉᐸᑦ,
ᐱᐅᖏᑦᑐᓕᔪᓄᓪᓗ ᐃᓕᕋᓇᕐᓃᑦ ᓴᖅᑭᑎᓪᓗᒍ.
28ᒥᑭᒡᓕᑎᕐᓯᒪᔪᑦ ᐃᓄᐃᑦ ᐱᐅᓕᕙᑎᑦ,
ᐱᐅᔪᕆᔪᓪᓕ ᑕᑯᓴᕐᓗᒋᑦ ᒥᑭᒡᓕᑎᑉᐸᑎᑦ.
29ᐊᑕᓃᖅ ᐃᕝᕕᑦ ᖃᐅᒻᒪᖅᑯᑎᒋᕙᒋᑦ,
ᒎᑎᒪᓗ ᑖᕐᑐᒦᓐᓂᕋ ᖃᐅᒻᒪᒃᑎᑉᐹ.
30ᐃᓛᒃ, ᐃᑲᔪᕐᑎᒋᓗᑎᑦ ᐅᓇᑕᕐᑐᒃᓮᑦ ᐅᐸᒃᑐᕈᓐᓇᕐᐸᒃᑲ,
ᒎᑎᒐᓗ ᐂᑉᐸᕆᓗᒍ ᐊᕙᓗᕐᔪᐊᑉ ᐅᖓᑖᓄᑦ ᒥᓯᒍᓐᓇᕐᐳᖓ.
31ᑖᓐᓇ ᒎᑎ-ᐱᓂᐊᕐᓂᖃᕐᐳᖅ ᓈᒻᒪᓈᑦᓯᐊᕐᑐᒥᒃ;
ᐊᑕᓂᐅᑉ ᐊᖏᕈᑎᒋᓯᒪᔭᖏᑕ ᓱᓕᓂᖏᑦ ᓴᖅᑭᑎᑕᐅᕗᑦ;
ᓴᐴᓗᑕᐅᕗᖅ ᕿᒫᔪᓕᒫᓄᑦ ᑖᑦᓱᒧᖓ.
32ᑭᓇ ᒎᑎᐅᕙ? ᐊᑕᓂᖅ ᑖᓐᓇᑐᐊᖅ;
ᑭᓇᓗ ᕾᕐᑑᕙ? ᒎᑎ ᑖᓐᓇᑐᐊᖅ.
33ᒎᑎ ᓲᖑᔫᓪᓗᓂ ᕿᒫᕕᒃᓴᕆᕙᕋ,
ᐊᖅᑯᑎᒋᓂᐊᕐᑕᒃᑲᓗ ᐊᑦᑕᕐᓇᕈᓐᓃᕐᑎᑉᐰᑦ.
34 #
ᕼᐊᐸᑲ 3:19. ᐃᑎᒐᒃᑲ ᑐᒃᑐᖓᔫᑉ ᐃᑎᒐᖏᑎᑐᑦ ᑍᒤᑎᑉᐰᑦ;
ᖁᐃᑦᓵᖏᑦᓯᐊᕐᑎᓪᓗᖓ ᖃᖅᑲᐅᑉ ᖄᖏᓐᓂ ᐳᕐᑐᔪᓂ.
35ᐃᓕᓴᑎᑉᐹᖓ ᐅᓇᑕᕐᓂᕐᒥᒃ,
ᕿᓗᓯᔪᓐᓇᖁᓪᓗᖓ ᐱᓯᒃᓯᓂᒃ ᑲᓐᓄᔭᓂᒃ.
36ᐊᑕᓃᖅ, ᓴᐳᑎᕙᕐᒪ ᐱᐅᓕᒃᓯᓂᕐᓄᑦ,
ᐃᑲᔪᕐᓂᕐᓄᓪᓗ ᐊᔪᕈᓐᓃᕐᑎᑉᐸᕐᒪ.
37ᓯᓕᒃᑐᒥᒃ ᓇᖏᕐᕕᖃᕐᑎᓐᓇᕕᖓ ᑎᒍᔭᐅᑎᓚᐅᓐᖏᓚᕐᒪ,
ᐃᑎᒐᒃᑲᓗ ᖁᐂᔭᕿᑎᓚᐅᕐᓇᒋᑦ.
38ᐊᑭᕋᕐᑐᕐᑎᒃᑲ ᒪᓕᒡᓗᒋᑦ ᓵᓚᒋᓚᐅᕐᐸᒃᑲ;
ᐅᑎᕆᐊᓚᐅᓐᖏᓚᖓᓗ ᓄᖑᓚᐅᖏᓐᓂᖏᓐᓂ.
39ᓄᖑᓚᐅᕐᐸᒃᑲ; ᑐᓪᓕᕋᕐᓗᒋᑦ, ᒪᑭᑦᓱᓐᓁᓪᓕᖁᓪᓗᒋᑦ;
ᐅᕐᕈᕗᑦ ᓵᓚᐅᓪᓗᑎᒃ ᓵᓐᓂ.
40ᓲᖑᓂᕐᑖᕐᑎᑉᐸᕐᒪ ᐅᓇᑕᕐᓂᕐᒧᑦ;
ᓵᓚᖃᕐᑎᑉᐸᕐᒪᓗ ᐊᑭᕋᕐᑐᕐᑎᓐᓂᒃ.
41ᐊᑭᕋᕐᑐᕐᑎᒃᑲ ᕿᒫᑎᑉᐸᑎᑦ ᐅᕙᓐᓂᒃ,
ᐊᓯᕈᕐᐸᒃᑲᓗ ᐅᕙᓐᓂᒃ ᐆᒥᓱᒃᑐᑦ.
42ᐃᑲᔪᕐᑎᒃᓴᒥᖕᓂᒃ ᕿᓂᕋᓗᐊᕐᐳᑦ, ᐱᐅᓕᔭᐅᔪᓐᓇᓐᖏᓚᓪᓕ;
ᐊᑕᓂᕐᒧᑦ ᑐᒃᓯᐊᕋᓗᐊᕐᐳᑦ, ᑖᑦᓱᒪᓕ ᑭᐅᓐᖏᓔᑦ.
43ᓯᖃᓪᓕᒐᒃᑭᑦ, ᐳᔪᕋᑐᐃᓐᓇᓐᖑᕐᐳᑦ,
ᑐᓪᓕᕋᕐᐸᒃᑲ ᒪᕐᕋᕐᑎᑐᑦ ᐊᖅᑯᑎᒦᑦᑐᑎᑐᑦ.
44ᐱᐅᓕᕙᕐᒪ ᐃᓄᖕᓂᑦ ᐊᑭᕋᕐᑐᕐᑎᓐᓂᑦ;
ᐊᐅᓚᑦᓯᓂᕋ ᑲᔪᓯᑎᑉᐸᑦ ᐃᓅᖃᑎᒋᒡᔪᐊᓄᑦ;
ᐃᓄᐃᑦ ᖃᐅᔨᒪᓚᐅᓐᖏᑕᒃᑲ ᐱᔨᑦᓯᕐᑎᒋᓕᕐᐸᒃᑲ.
45ᐃᓅᖃᑎᒃᓴᔭᕆᓐᖏᑕᒃᑲ ᓵᓐᓄᑦ ᐹᒻᒪᒃᑎᕐᐳᑦ;
ᐅᕙᓐᓂᒃ ᑐᓴᕐᑐᐊᕋᒥᒃ, ᓈᓚᒃᐹᖓ.
46ᐃᓅᖃᑎᒃᓴᔭᕆᓐᖏᑕᕗᑦ ᓴᐱᓕᖃᑦᑕᕐᐳᑦ,
ᓴᔪᓕᕐᓗᑎᒡᓗ ᕾᖃᑦᑕᕐᐳᑦ ᓴᐴᓗᑕᖃᕐᕕᖕᒥᓂᑦ.
47ᐊᑕᓂᖅ ᐃᓅᕗᖅ; ᓂᕐᑐᕐᑕᐅᓕ ᓴᐳᑦᔨᔨᒐ!
ᐊᖏᔪᕈᕐᑎᑕᐅᓕ ᒎᑎᒐ, ᐱᐅᓕᔭᐅᓂᕐᒪ ᕾᕐᑐᖓ!
48ᒎᑎᐅᑉ ᓵᓚᖃᕐᑎᑉᐹᖓ ᐊᑭᕋᕐᑐᕐᑎᓐᓂᒃ;
ᐃᓅᖃᑎᒋᒡᔪᐊᓪᓗ ᓵᓐᓄᑦ ᐱᑎᑉᐰᑦ,
49ᐱᐅᓕᕚᖓ ᐊᑭᕋᕐᑐᕐᑎᓐᓂᑦ;
ᐊᑕᓃᖅ, ᐃᕝᕕᑦ ᓵᓚᖃᕐᑎᑉᐸᕐᒪ ᐊᑭᕋᕐᑐᕐᑎᓐᓂᒃ,
ᓴᐳᑎᕙᕐᒪᓗ ᐃᓄᖕᓂᑦ ᑲᑉᐱᐊᓇᕐᑐᓂᑦ.
50 #
ᕉᒪᒥᐅᓄᑦ 15:9. ᑍᒤᒻᒪᑦ ᐊᖏᒡᓕᑎᑉᐸᒋᑦ ᐊᑕᓃᖅ, ᐃᓅᖃᑎᒌᒡᔪᐊᑦ ᐊᑯᕐᖓᓐᓂ;
ᐃᓐᖏᕐᕕᒋᕙᒋᓪᓗ ᐊᑎᕐᓂᒃ ᓂᕐᑐᐃᑦᔪᑎᓂᒃ.
51ᐊᖏᔪᒥᒃ ᓵᓚᖃᕐᑎᑦᓯᕗᖅ ᐊᖓᔪᖅᑳᕐᔪᐊᖁᑎᒥᓂᒃ;
ᓇᒡᓕᒍᓱᐃᓐᓇᕐᓂᕐᒥᓂᒃ ᓴᖅᑭᑎᑦᓯᕗᖅ ᐅᕐᓱᕐᑎᕐᓯᒪᔭᒥᓄᑦ,
ᑍᕕᑎᒧᑦ, ᑭᖑᕚᖏᓐᓄᓪᓗ ᐃᓱᖃᖏᑦᑐᒧᑦ.”
Currently Selected:
ᓴᒧᐃᓕ ᐂᑉᐸᖏᑦ 22: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
