ᓴᒧᐃᓕ ᐂᑉᐸᖏᑦ 21
21
ᓴᐅᓕᐅᑉ ᑭᖑᕚᖏᑕ ᑐᖁᑕᐅᓂᖏᑦ
1ᑍᕕᑎᐅᑉ ᐊᐅᓚᑦᓯᓂᖓᑕ ᐃᓚᖓᓂ ᑳᖕᓇᕐᑐᕐᔪᐊᖃᓚᐅᕐᐳᖅ ᐊᕐᕌᒍᓂᒃ ᐱᖓᓱᓂᒃ, ᑍᕕᑎᓗ ᐊᑕᓂᕐᒧᑦ ᖃᐅᔨᓇᓱᐊᖃᑦᑕᓚᐅᕐᐳᖅ ᑕᒪᓐᓇ ᐱᓪᓗᒍ, ᐊᑕᓂᕐᓗ ᐅᖃᕐᐳᖅ, “ᓴᐅᓕᒃᑯᑦ ᐃᓚᖏᓪᓗ ᐸᓯᔭᒃᓴᐅᕗᑦ ᑐᖁᑦᓯᓂᕐᒧᑦ; ᒋᐱᐅᓁᑎᒥᐅᑦ ᑐᖁᑕᐅᑎᓚᐅᕐᓯᒪᖕᒪᒋᑦ.” 2#ᔮᓱᐊ 9:3-15.(ᒋᐱᐅᓁᑎᒥᐅᑦ ᐃᓴᕆᐊᓕᒥᐅᑕᐅᖏᒻᒪᑕ; ᐅᓄᖏᑦᑐᑦ ᐊᒧᕅᑎᓂ ᐊᒥᐊᒃᑰᓯᒪᕗᑦ; ᐃᓴᕆᐊᓕᒥᐅᓄᓪᓕ ᐊᖏᕐᕕᐅᓯᒪᓚᐅᕐᐳᑦ ᓴᐳᒻᒥᔭᐅᓂᐊᕐᓂᕋᕐᑕᐅᓪᓗᑎᒃ, ᓴᐅᓕᐅᓪᓕ ᐊᓯᕈᓚᐅᕐᐰᑦ ᐃᓴᕆᐊᓕᒥᐅᓂᒃ ᔫᑕᒥᐅᓂᒡᓗ ᐃᓱᒫᓗᒍᑎᖃᕐᓂᕐᓴᐅᓪᓗᓂ.) 3ᑍᒤᒻᒪᑦ ᑍᕕᑎᐅᑉ ᒋᐱᐅᓁᑎᒥᐅᑦ ᑲᑎᖁᓚᐅᕐᐰᑦ ᐅᖃᐅᑎᓪᓗᒋᓪᓗ, “ᖃᓄᐃᓕᐅᕐᑐᒃᓴᐅᕗᖔ ᐃᓕᑦᓯᓐᓄᑦ? ᖃᓄᕐᓗ ᐋᖅᑮᒋᐊᕈᓐᓇᕐᐳᖓ ᐱᑦᓯᐊᕐᑕᐅᖏᓐᓂᕆᓯᒪᔭᑦᓯᓐᓂᒃ, ᐊᑕᓂᐅᑉ ᐃᓄᖁᑎᖏᓐᓂᒃ ᓮᒻᒪᕐᑎᑦᓯᔪᓐᓇᖁᓪᓗᓯ.”
4ᒋᐱᐅᓁᑎᒥᐅᑦ ᑭᐅᕗᑦ, “ᐊᑭᕋᕐᑑᑎᓂᕗᑦ ᓴᐅᓕᒥᒃ ᐃᓚᖏᓐᓂᒡᓗ ᐊᑭᓕᕐᑕᐅᔪᓐᓇᓐᖏᓚᑦ ᓯᐅᓪᕕᕆᒧᑦ ᒎᓗᒧᓪᓘᓐᓃᑦ, ᓇᓪᓕᐊᓐᓂᒡᓘᓐᓃᑦ ᑐᖁᑦᓯᔪᒪᓐᖏᓚᒍᑦ ᐃᓴᕆᐊᓕᒥᐅᓂᒃ.”
ᑍᕕᑎᓗ ᐅᖃᕐᐳᖅ, “ᖃᓄᕐᓕ ᐅᕙᓐᓂᒃ ᐱᓇᓱᐊᕆᐊᖃᕐᑐᕆᒃᓯᕕᓰ?”
5ᑖᒃᑯᐊ ᑭᐅᕗᑦ, “ᓴᐅᓕᐅᑉ ᓄᖑᓐᓇᓱᓚᐅᕐᐹᑎᒍᑦ ᐊᓯᕈᕋᓱᐊᕐᓗᑕᓗ ᓇᓕᕐᐳᓪᓘᓐᓃᑦ ᐃᓅᖁᓇᒍ ᐃᓴᕆᐊᓕᒥᐅᓂ. 6ᑍᒤᒻᒪᑦ ᐊᖑᑎᓂᒃ 7ᓂᒃ ᑭᖑᕚᖏᓐᓂᑦ ᕾᑦᓯᓚᐅᕆᑦ, ᕿᒥᓐᓂᐊᕋᑦᑎᒍ ᐊᑕᓂᐅᑉ ᓵᖓᓂ ᒋᐱᐊᓐᒥ ᓴᐅᓕᐅᑉ ᓄᓇᖓᓂ, ᐊᑕᓂᐅᑉ ᖃᖅᑲᖁᑎᖓᓂ.”
ᐊᖓᔪᖅᑳᕐᔪᐊᖅ ᑭᐅᕗᖅ, “ᐃᓕᑦᓯᓐᓄᑦ ᑐᓂᓂᐊᕐᐸᒃᑲ.”
7 #
ᓴᒧᐃᓕ ᓯᕗᓪᓖᑦ 20:15-17; ᓴᒧᐃᓕ ᐂᑉᐸᖏᑦ 9:1-7. ᔫᓇᑕᓂᒃᑯᒡᓕ ᐊᖏᖃᑎᒌᒍᑎᒋᓚᐅᕐᓯᒪᔭᖓᓄᑦ ᐃᒻᒥᖕᓄᑦ, ᑍᕕᑎᐅᑉ ᑐᖁᑕᐅᑎᓚᐅᓐᖏᓛ ᔫᓇᑕᓂᐅᑉ ᐃᕐᓂᖓ ᒥᐱᐳᓴᑎ, ᓴᐅᓕᐅᑉ ᐃᕐᖑᑕᖓ. 8#ᓴᒧᐃᓕ ᓯᕗᓪᓖᑦ 18:19.ᐊᕐᒧᓁᓗ ᒥᐱᐳᓴᑎᓗ ᑎᒍᓚᐅᕐᐰᑦ, ᕆᔾᐸᐅᑉ ᐃᕐᓂᖏᒃ ᒪᕐᕉᒃ ᐂᐊᐅᑉ ᐸᓂᖓᒍᑦ ᕿᑐᕐᖓᕐᑖᕆᔭᐅᓯᒪᔪᒃ ᓴᐅᓕᒧᑦ; ᑎᒍᓚᐅᕆᕔᑦᑕᐅᖅ ᓴᐅᓕᐅᑉ ᐸᓂᖓᑕ ᒥᕋᐱᐅᑉ ᐃᕐᓂᖏᑦ ᑕᓪᓕᒪᑦ, ᐃᕐᓂᕐᑖᕆᓯᒪᔭᖏᑦ ᐊᑦᕆᐅᓪᒥᑦ ᐸᕐᔨᓔᑉ ᐃᕐᓂᖓᓂᑦ, ᒥᕼᐅᓚᑍᑎᒥᐅᑕᕐᒥᑦ. 9ᑍᕕᑎᐅᑉ ᑖᒃᑯᐊ ᑐᓂᓚᐅᕐᐰᑦ ᒋᐱᐊᓁᑎᒥᐅᑦ ᐃᓄᖏᓐᓄᑦ, ᑖᒃᑯᓇᓐᖓᑦ ᖃᖅᑲᐅᑉ ᖄᖓᓂ ᕿᒥᑕᐅᓚᐅᕐᐳᑦ ᐊᑕᓂᐅᑉ ᓵᖓᓂ, ᑖᒃᑯᐊᓕᒫᑦ 7 ᐊᑕᐅᑦᓯᒃᑯᑦ ᑐᖁᓚᐅᕐᐳᑦ ᐅᐱᕐᖔᖅ ᐃᓱᓕᒋᐊᕕᒃᑎᓪᓗᒍ, ᓂᐊᖂᔭᒃᓮᑦ ᓄᐊᑕᐅᒋᐊᕐᕕᐊᓂ.
10ᓴᐅᓕᐅᓪᓕ ᓄᓕᐊᖓ ᕆᔾᐸ, ᐂᐊᐅᑉ ᐸᓂᖓ, ᐊᑐᓚᐅᕐᐳᖅ ᐳᑐᕐᓛᒥᒃ, ᐅᓕᒋᓪᓗᒍ ᐅᔭᕋᐅᑉ ᖄᖓᓂ ᑐᖁᖓᔪᑦ ᓇᔪᕐᑕᖓᓂ, ᑍᑲᓃᓚᐅᕐᐳᓪᓗ ᑲᑎᕐᓱᐃᕕᐅᑉ ᐱᒋᐊᕐᓂᖓᓂᑦ ᐅᑭᐊᒃᓵᑉ ᓯᓚᓗᓕᕐᓂᖓ ᑎᑭᓪᓗᒍ; ᐅᓪᓗᒃᑯᑦ ᑎᖕᒥᐊᓂᑦ ᑐᖁᖓᔪᑦ ᓴᐳᑎᓚᐅᕐᐰᑦ, ᐅᓐᓄᒃᑯᓪᓗ ᓴᐳᑎᓚᐅᕆᕔᑦ ᐃᕐᓯᓇᕐᑐᓂᑦ ᐆᒪᔪᓂᑦ.
11ᑍᕕᑎᓕ ᑕᒪᑐᒥᖓ ᑐᓴᕋᒥ ᕆᔾᐸᐅᑉ ᐂᐊᐅᑉ ᐸᓂᖓᑕ ᐱᓂᐊᕐᓂᖓᓂᒃ ᓴᐅᓕᐅᑉ ᓄᓕᐊᒃᑲᓐᓂᖓᑕ, 12#ᓴᒧᐃᓕ ᓯᕗᓪᓖᑦ 31:8-13.ᑍᕕᑎ ᑕᕝᕗᓐᖓᕐᐳᖅ ᓴᐅᓕᐅᓪᓗ ᐃᕐᓂᖓᑕᓗ ᔫᓇᑕᓂᐅᑉ ᓴᐅᓂᖏᑦ ᐂᓪᓗᒋᑦ ᔭᐲᓯ-ᒋᓖᑎᒦᑦᑐᒥᑦ. (ᑖᒃᑯᓇᓐᖓᑦ ᑎᒡᓕᒃᑕᐅᓯᒪᔪᑦ ᐃᓄᒋᐊᑐᒃᑯᕕᖕᒥᑦ ᐱᑦ-ᓵᓂᒥᑦ, ᐱᓕᔅᑍᓂᒥᐅᓂᑦ ᓂᕕᓐᖓᕐᑕᐅᓚᐅᕐᓯᒪᔪᑦ ᑍᑦᓱᒪᓂ ᐅᓪᓗᒥ ᓴᐅᓕᑯᒃ ᑐᖁᑕᐅᑎᓪᓗᒋᒃ ᖃᖅᑲᒥ ᒋᐅᓪᐳᐊᒥ.) 13ᑍᕕᑎᐅᑉ ᓴᐅᓕᒃᑯᒃ ᔫᓇᑕᓂᒃᑯᒃ ᓴᐅᓂᖏᑦ ᐂᓚᐅᕐᐰᑦ; ᕿᒥᑕᐅᓚᐅᕐᑐᓪᓗ ᓴᐅᓂᖏᑦ ᑲᑎᓪᓗᒋᑦ ᓇᒃᓴᓚᐅᕆᕔᑦ. 14ᓴᐅᓕᐅᓪᓗ ᔫᓇᑕᓂᐅᓪᓗ ᓴᐅᓂᖏᑦ ᐃᓗᕕᕐᑕᐅᓚᐅᕐᐳᑦ ᓴᐅᓕᐅᑉ ᐊᑖᑕᖓᑕ ᑭᓯᐅᑉ ᐃᓗᕕᖃᕐᕕᖓᓄᑦ, ᓄᓇᓕᖕᓂ ᔨᓚᒥ ᐱᓐᔭᒥᓂᐅᑉ ᓄᓇᖓᓂ, ᐊᖓᔪᖅᑳᕐᔪᐊᑉ ᑎᓕᓯᑦᔪᑎᒋᔭᖓᓂᒃ ᐊᑐᕐᓗᑎᒃ ᐱᓇᓱᐊᓚᐅᕐᐳᑦ. ᑕᒪᑐᒪ ᑭᖑᓂᐊᒍᑦ ᒎᑎᐅᑉ ᑐᒃᓯᐊᕐᓂᖏᓐᓂᒃ ᑭᐅᓚᐅᕐᐰᑦ ᓄᓇᖓ ᐱᓪᓗᒍ.
ᐅᓇᑕᕐᓃᑦ ᐱᓕᔅᑍᓂᒥᐅᑦ ᐃᓄᒃᐸᖏᓐᓂᒃ
ᑯᕉᓂᑲ ᓯᕗᓪᓖᑦ 20:4-8
15ᐅᓇᑕᕆᐊᓪᓚᓚᐅᕆᕗᑦ ᐱᓕᔅᑍᓂᒥᐅᑦ ᐃᓴᕆᐊᓕᒥᐅᓪᓗ, ᑍᕕᑎᒃᑯᑦ ᐃᓚᖏᓪᓗ ᐅᓇᑕᕆᐊᓚᐅᕐᐳᑦ ᐱᓕᔅᑏᓂᒥᐅᓄᑦ, ᐅᓇᑕᕐᑎᓪᓗᒋᑦ ᐱᓕᔅᑍᓂᒥᐅᓂᒃ; ᑍᕕᑎᓗ ᑕᖃᓚᐅᕐᐳᖅ. 16ᐃᓄᒃᐹᓗᒃ ᐊᑎᓕᒃ ᐃᓯᐱ-ᐱᓈᑉᒥᒃ ᕌᐸᒃᑯᑦ ᑭᖑᕚᖓᓐᓂᒥᐅᖅ, ᑲᓐᓄᔭᒥᒃ ᖃᓗᒋᐊᓕᒃ ᐅᖁᒤᓐᓂᓕᖕᒥᒃ 7ᐸᐅᓐ ᐊᕝᕙᕐᒥᒡᓗ ᓴᕕᒡᔪᐊᒥᒡᓗ ᓄᑖᒥᒃ ᐊᑐᕐᓗᓂ, ᐃᓱᒪᖃᓚᐅᕐᐳᖅ ᑐᖁᑦᓯᔪᓐᓇᕋᓱᒋᓪᓗᓂ ᑍᕕᑎᒥᒃ. 17#ᐊᑕᓃᑦ ᓯᕗᓪᓖᑦ 11:36; ᐃᓐᖏᕈᑦ 132:17.ᐊᐱᓮᓕ ᔨᕈᐃᐊᐅᑉ ᐃᕐᓂᖓ ᑍᕕᑎᒥᒃ ᐃᑲᔪᕆᐊᕐᐳᖅ, ᐃᓄᒃᐹᓗᒃ ᐱᓕᔅᑍᓂᒥᐅᖅ ᐅᓇᑕᓕᕐᓗᒍ ᑐᖁᓪᓗᒍᓗ. ᑕᕝᕙ ᑍᕕᑎᐅᑉ ᐃᓚᖏᑕ ᑍᕕᑎ ᐊᖏᕐᑎᓚᐅᕐᐹᑦ ᐅᓇᑕᕆᐊᒃᑲᓐᓂᖃᑦᑕᖁᔭᐅᔪᓐᓃᕐᓗᓂ ᑖᒃᑯᐊ ᐃᓚᒋᓗᒋᑦ, ᐅᖃᕐᓗᑎᒃ, “ᐃᓴᕆᐊᓕᒥᐅᓄᑦ ᓂᕆᐅᖕᓂᖃᕐᕕᒋᔭᐅᒐᕕᑦ, ᐃᓕᖕᓂᒃ ᐊᓯᐅᔨᔪᒪᓐᖏᓚᒍᑦ.”
18ᑕᒪᑐᒪ ᑭᖑᓂᐊᒍᑦ ᐅᓇᑕᕐᓂᖃᓕᓚᐅᕆᕗᑦ ᐱᓕᔅᑍᓂᒥᐅᓂᒃ ᒑᑉᒥ, ᑍᑦᓱᒪᓂ ᓯᐱᑬ ᕼᐅᓴᑍᑎᒥᐅᑕᖅ ᑐᖁᑦᓯᓚᐅᕐᐳᖅ ᐃᓄᒃᐸᖕᒥᒃ ᓴᑉᐸᒥᒃ ᐊᑎᓕᖕᒥᒃ ᕌᐸᒃᑯᑦ ᑭᖑᕚᖏᓐᓂᒥᐅᑕᕐᒥᒃ.
19ᐅᓇᑕᕐᓂᖃᕆᐊᓪᓚᓚᐅᕆᕗᖅ ᐱᓕᔅᑍᓂᒥᐅᓂᒃ ᒑᑉᒥ, ᐃᐅᓪᕼᐊᓇᓐᓗ ᔮᕆ-ᐅᕆᒡᒋᐅᑉ ᐃᕐᓂᖓ ᐱᑦᓕᐊᒥᐅᑕᖅ ᑐᖁᑦᓯᓚᐅᕐᐳᖅ ᒍᓔᐊᒥᒃ ᒋᑍᑎᒥᐅᑕᒥᒃ, ᑖᓐᓇ ᖃᓗᒋᐊᖃᓚᐅᕐᐳᖅ ᓄᕕᕐᓴᕐᕕᐅᑉ ᐃᑳᖓᔪᐊᑐᑦ ᓯᓕᒃᑎᒋᔪᒥᒃ.
20ᐊᓯᐊᓂ ᐅᓇᑕᕐᓂᖃᕆᐊᓪᓚᓚᐅᕆᕗᖅ ᒑᑎᒥ, ᐃᓄᒃᐸᒃᑕᖃᓚᐅᕐᐳᖅ ᐅᓇᑕᕆᐊᒃᓴᖅ ᐊᓕᐊᓁᒍᓱᒃᑐᒥᒃ 6ᓂᒃ ᐃᓗᒃᑐᑦ ᐊᒡᒐᖏᑦ ᐃᓄᒐᓐᖑᐊᖃᓚᐅᕐᐳᑦ 6ᓂᒡᓗ ᐃᑎᒐᖏᑦ ᐃᒡᓗᒃᑐᑦ ᐃᓄᒐᓐᖑᐊᖃᕆᓪᓗᑎᒃ, ᑲᑎᓪᓗᖏᑦ 24ᓂᒃ ᐃᓄᒐᓐᖑᐊᖃᕐᑐᒥᒃ; ᑖᓐᓇᑦᑕᐅᖅ ᕌᐸᒃᑯᑦ ᑭᖑᕚᖏᓐᓂᒥᐅᑕᒋᕗᖅ. 21ᑖᓐᓇ ᓇᕐᕈᓇᕐᑎᑦᓯᓚᐅᕐᐳᖅ ᐃᓴᕆᐊᓕᒥᐅᓂᒃ, ᔫᓇᑕᓂᐅᓪᓗ ᓯᒥᐊᑉ ᐃᕐᓂᖓᑕ ᑐᖁᓚᐅᕐᐹ, ᑍᕕᑎᐅᑉ ᖃᑕᓐᖑᑎᖓᑕ.
22ᑖᒃᑯᐊ ᓯᑕᒪᑦ ᐃᓄᒃᐸᖕᓄᑦ ᕌᐸᒃᑯᓐᓄᑦ ᒑᑎᒥᐅᓄᑦ ᑭᖑᕚᕆᔭᐅᓚᐅᕐᐳᑦ, ᑖᒃᑯᐊ ᑐᖁᑕᐅᓚᐅᕐᐳᑦ ᑍᕕᑎᒧᑦ ᐃᓚᒋᔭᖏᓐᓄᓪᓗ.
Currently Selected:
ᓴᒧᐃᓕ ᐂᑉᐸᖏᑦ 21: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
