ᓴᒧᐃᓕ ᐂᑉᐸᖏᑦ 17
17
ᕼᐅᓮᑉ ᑕᒻᒪᕐᑎᑦᓯᓂᖓ ᐋᑉᓴᓚᒻᒥᒃ
1ᐊᑯᓂᐅᖏᑦᑐᖅ ᑕᒪᑐᒪ ᑭᖑᓂᐊᒍᑦ, ᐊᕼᐃᑐᐱᓕ ᐅᖃᕐᐳᖅ ᐋᑉᓴᓚᒻᒧᑦ, “ᓂᕈᐊᕐᑎᓚᐅᓐᖓ ᐊᖑᑎᓂᒃ 12,000ᓂᒃ, ᐅᓐᓄᒃ ᒪᓕᒃᓴᕆᐊᕐᓂᐊᕋᑦᑕ ᑍᕕᑎᒥᒃ. 2ᐅᓇᑕᕆᐊᕐᓂᐊᕋᒃᑯ ᑕᖃᓯᒪᓂᖓᓂ ᓴᓐᖐᓕᓯᒪᓂᖓᓂᓗ, ᐅᐃᒻᒪᒃᑎᓐᓂᐊᕋᒃᑯ; ᐃᓚᒋᔭᓕᒫᖏᓪᓗ ᕿᒪᒃᓯᑎᓪᓗᒋᑦ. ᐊᖓᔪᖅᑳᕐᔪᐊᖅ ᑖᓐᓇᑐᐊᖅ ᑐᖁᓐᓂᐊᕋᒃᑯ, 3ᐃᓚᒋᔭᓕᒫᖏᓪᓗ ᐅᑎᕐᑎᓐᓂᐊᕐᐸᒃᑲ ᐃᓕᖕᓄᑦ ᓄᓕᐊᒃᓴᑐᑦ ᐅᐃᒃᓴᒥᓄᑦ ᐅᑎᕐᕕᐅᔪᑎᑐᑦ. ᐊᑕᐅᓯᕐᒥᒃ ᑭᓯᐊᓂ ᐃᓄᖕᒥᒃ ᑐᖁᑦᓯᔪᒪᒐᕕᑦ, ᐊᓯᖏᓪᓕ ᐊᓯᕈᕐᑕᐅᓂᐊᓐᖏᓚᑦ.” 4ᑕᒪᓐᓇ ᐋᑉᓴᓚᐅᑉ ᖁᕕᐊᒋᕚ ᐃᓴᕆᐊᓕᒥᐅᓪᓗ ᐊᖓᔪᖅᑳᓕᒫᖏᑕ.
5ᑕᕝᕙ ᐋᑉᓴᓚᒻ ᐅᖃᕐᐳᖅ, “ᒫᓐᓇ ᕼᐅᓮ ᐊᑬᑎᒥᐅᑕᖅ ᕾᖁᔭᐅᓕ, ᑐᓴᓚᐅᕐᑕᓕ ᖃᓄᖅ ᐅᖃᐅᓯᖃᕐᓂᐊᕐᒪᖔᑦ.” 6ᕼᐅᓮ ᑎᑭᐅᑎᖕᒪᑦ, ᐋᑉᓴᓚᐅᑉ ᐅᖃᐅᑎᕚ, “ᐊᕼᐃᑐᐱᓕᐅᑉ ᐃᓱᒪᑖᕐᑎᑦᓯᒍᑎᒋᓚᐅᕐᑕᖓᓂᒃ; ᒪᓕᒃᑐᒃᓴᐅᕕᑖ? ᒪᓕᒃᑐᒃᓴᐅᖏᒃᑯᑦᑕ ᐅᖃᐅᑎᓚᐅᕐᑎᒍᑦ ᖃᓄᐃᓕᐅᕐᑐᒃᓴᐅᖕᒪᖔᑦᑕ.”
7ᑕᕝᕙ ᕼᐅᓮ ᐋᑉᓴᓚᒻᒧᑦ ᑭᐅᕗᖅ, “ᐊᕼᐃᑐᐱᓕᐅᑉ ᐃᓱᒻᒥᕐᑐᐃᑦᔪᑎᒋᔭᖓ ᑕᒪᑐᒪᓂ ᐱᐅᓐᖏᓚᖅ.” 8ᕼᐅᓮᓗ ᐅᖃᒃᑲᓐᓂᕐᐳᖅ, “ᖃᐅᔨᒪᕗᑎᑦ ᐊᑖᑍᑦ ᑍᕕᑎ ᐃᓚᒋᔭᖏᓪᓗ ᐅᓇᑕᒃᑲᒻᒪᕆᐊᓘᖕᒪᑕ, ᐃᕐᓯᓇᕐᑑᕗᓪᓗ ᓇᓄᕐᑐᑦ ᐊᕐᓵᕐᑕᐅᕋᑖᕐᑐᑐᑦ ᐱᐊᕋᕐᒥᓂᒃ, ᐊᑖᑍᓪᓗ ᖃᐅᔨᒪᔪᒻᒪᕆᐅᓪᓗᓂ ᐅᓇᑕᕐᓂᕐᒥᒃ; ᐅᓐᓄᒃᑯᓪᓗ ᐃᓅᖃᑎᒥᓃᖃᑦᑕᕋᓂ. 9ᒫᓐᓇ ᐃᒻᒪᖄ ᐃᔨᕐᓯᒪᕗᖅ ᕾᕈᓱᖕᒥ, ᐊᓯᐊᓂᓘᓐᓃᑦ. ᑍᕕᑎᓗ ᐅᓇᑕᕆᐊᕈᓂ ᐅᓇᑕᕐᑎᖁᑎᖕᓂᒃ, ᑐᓴᕐᑐᒥᒃ ᐅᖃᕐᑐᖃᕐᓂᐊᕐᐳᖅ, ‘ᐋᑉᓴᓚᐅᑉ ᐃᓄᖁᑎᖏᑦ ᓵᓚᐅᕗᑦ.’ 10ᐊᒡᓛᑦ ᓯᕘᕋᔪᐃᑦᑐᑦ ᐊᖑᑏᑦ, ᑲᑉᐱᐊᓱᖃᖏᑦᑐᓪᓗ ᓛᔭᑎᑐᑦ, ᑲᑉᐱᐊᓱᓕᕐᓂᐊᕐᐳᑦ ᐃᓴᕆᐊᓕᒥᐅᓕᒫᑦ ᖃᐅᔨᒪᖕᒪᑕ ᐊᑖᑍᑦ ᐅᓇᑕᒃᑲᒻᒪᕆᐊᓘᖕᒪᑦ ᐅᓇᑕᕐᑐᒃᓴᖁᑎᖏᓪᓗ ᐅᓇᑕᒃᑲᒻᒪᕆᐊᓘᓪᓗᑎᒃ. 11ᐃᒤᒋᐊᖃᕐᑐᕆᕙᒋᓪᓕ ᐃᓴᕆᐊᓕᒥᐅᓕᒫᑦ ᑲᑎᑎᓪᓗᒋᑦ ᓄᓇᒋᔭᖏᓐᓂᑦ ᑖᓐᒥᑦ ᐱᐊᕐᓯᐸᒧᑦ ᑎᑭᓪᓗᒋᑦ, ᓯᒡᔭᒥ ᓯᐅᕋᕐᑎᑐᑦ ᐅᓄᕐᑎᒋᔪᑦ, ᐃᕝᕕᓪᓗ ᓇᖕᒥᓂᖅ ᓯᕗᓕᕐᓗᒋᑦ ᐅᓇᑕᕆᐊᕐᓗᑎᑦ. 12ᓇᓂᔪᓐᓇᕐᓂᐊᕐᐸᕗᑦ ᑍᕕᑎ ᓇᓃᒐᓗᐊᕐᐸᑦ, ᐅᓇᑕᕆᐊᕐᓗᒍᓗ ᖃᐅᔨᓚᐅᖏᓐᓂᖓᓂ ᖃᓄᐃᑦᑐᖃᓕᕐᒪᖔᑦ; ᑖᓐᓇᓗ ᐃᓚᒋᔭᖏᓪᓗ ᐊᓐᓇᑦᑐᖃᕐᓂᐊᓐᖏᓚᑦ. 13ᕿᒫᑐᐊᕐᐸᓪᓗ ᐃᒡᓗᒐᓴᖕᓄᑦ, ᐃᓄᖁᑎᓕᒫᕗᑦ ᐊᒃᓱᓈᒥᒃ ᓇᒃᓴᕐᓂᐊᕐᐳᑦ ᐃᒡᓗᒐᓴᖕᓄᑦ, ᑕᕝᕙᓐᖓᓪᓗ ᐃᒡᓗᒐᓴᓕᒫᖅ ᓄᓱᖕᓂᐊᕐᐸᕗᑦ ᓇᕐᓴᒧᑦ, ᐊᑕᐅᓯᕐᒥᒡᓘᓐᓃᑦ ᐅᔭᕋᖕᒥᒃ ᖃᓕᕇᒃᑐᖃᕈᓁᕐᓂᐊᕐᐳᖅ ᖃᖅᑲᐅᑉ ᖄᖓᓂ.”
14ᐋᑉᓴᓚᒻ ᐃᓴᕆᐊᓕᒥᐅᓕᒫᓪᓗ ᐅᖃᕐᐳᑦ, “ᕼᐅᓮᑉ ᐊᑬᑎᒥᐅᑕᐅᑉ ᐃᓱᒻᒥᕐᑐᐃᑦᔪᑎᒋᔭᖓ ᐱᐅᓂᕐᓴᐅᕗᖅ ᐊᕼᐃᑐᐱᐅᑉ ᐃᓱᒻᒥᕐᓱᐃᑦᔪᑎᖏᓐᓂᑦ.” ᐊᑕᓂᖅ ᐱᒋᐊᕐᑎᑦᓯᓚᐅᕐᒪᑦ ᐊᕼᐃᑐᐱᓕᐅᑉ ᐃᓱᒻᒥᕐᑐᐃᒍᑎᒋᔭᖓ ᐱᐅᔪᐊᓗᒃ ᒪᓕᒃᑕᐅᖁᓇᒍ, ᑲᑕᖕᓇᕐᑐᒧᑦ ᑎᑭᑎᑦᓯᔪᓐᓇᖁᓪᓗᒍ ᐋᑉᓴᓚᒻᒧᑦ.
ᑍᕕᑎᐅᑉ ᐅᖃᐅᑦᔭᐅᓂᖓ ᕿᒪᒃᓯᓂᖓᓗ
15ᑭᖑᓂᐊᒍᑦ ᕼᐅᓮᑉ ᐅᖃᐅᑎᕚᒃ ᔭᑑᒃ ᐊᐰᐊᑕᓗ ᑐᓂᕐᕈᓯᕐᑎᑦᓯᔩᒃ ᖃᓄᖅ ᐃᓱᒻᒥᕐᑐᐃᒍᑎᖃᓚᐅᕐᓂᕐᒥᓂᒃ ᐋᑉᓴᓚᒻᒧᑦ ᐃᓴᕆᐊᓕᒥᐅᓪᓗ ᐊᖓᔪᖅᑳᖏᓐᓄᑦ ᖃᓄᕐᓗ ᐊᕼᐃᑐᐱᐅᓪ ᐅᖃᓚᐅᕐᒪᖔᑦ. 16ᕼᐅᓮ ᐅᖃᕆᐊᓪᓚᒃᐳᖅ, “ᑐᐊᕕᕐᓗᓯ ᒫᓐᓇ! ᐅᖃᕆᐊᕐᑐᕐᑎᑦᓯᓕᕆᑦᓯᒃ ᑍᕕᑎᒧᑦ ᓯᓂᒃᑕᖁᓇᒍ ᑰᑉ ᐃᑳᕐᕕᖓᓂ ᐃᓄᖃᔪᐃᑦᑐᒥ, ᐃᑳᖔᖁᓪᓗᒋᓪᓕ ᔫᐊᕐᑕᓂᐅᑉ ᑰᖓᓂᒃ ᒫᓐᓇᑦᓴᐅᑎᒋᒃᑯᑦ, ᐊᖓᔪᖅᑳᕐᔪᐊᖅ ᐃᓄᖁᑎᓕᒫᖏᓪᓗ ᐊᖑᔭᐅᖁᓇᒋᑦ ᑐᖁᑕᐅᖁᓇᒋᓪᓗ.”
17ᐊᐱᐊᑕᐅᑉ ᐃᕐᓂᖓ ᔫᓇᑕᓂ ᔭᑑᑭᐅᓪᓗ ᐃᕐᓂᖓ ᐊᕼᐂᒫᔅ ᐅᑕᕿᓚᐅᕐᐴᒃ ᐃᓐ-ᕈᒋᓕᐅᑉ ᑰᖓᓂ, ᔨᕉᓴᓕᐅᑉ ᖃᓂᒋᔭᖓᓂ, ᑕᑯᔭᐅᔪᒪᖏᓐᓇᒥᒃ ᐃᑎᕐᑎᓪᓗᒋᒃ ᐃᒡᓗᒐᓴᖕᓄᑦ; ᐱᔨᒧᑦ ᐊᕐᓇᒧᑦ ᐅᐸᒃᑕᐅᖏᓐᓇᖃᑦᑕᓚᐅᕐᐴᒃ ᐅᖃᐅᑎᔭᐅᕙᒡᓗᑎᒡᓗ ᖃᓄᐃᑉᐸᓪᓕᐊᓕᕐᓂᖏᓐᓂᒃ, ᑖᒃᑯᐊᒃᑕᐅᖅ ᐅᖃᕆᐊᕐᑐᖃᑦᑕᓚᐅᕐᐴᒃ ᑍᕕᑎᒧᑦ. 18ᐅᓪᓗᐃᓪᓕ ᐃᓚᖓᓐᓂ ᓄᑲᑉᐱᐊᒧᑦ ᑕᑯᔭᐅᓚᐅᕐᐴᒃ, ᐋᑉᓴᓚᒻᓗ ᐅᖃᐅᑎᓪᓗᒍ, ᑍᒤᒻᒪ ᑐᐊᕕᕐᓗᑎᒃ ᐃᔨᕆᐊᕐᑐᓚᐅᕐᐴᒃ ᐊᖑᑎᐅᑉ ᐸᕼᐅᕆᐅᑉ ᐃᒡᓗᖓᓄᑦ, ᑖᓐᓇ ᐃᒥᕐᑕᕐᕕᖃᓚᐅᕐᐳᖅ ᐃᒡᓗᖓᑕ ᖃᓂᒋᔭᖓᓂ; ᑖᒃᑯᐊᒡᓗ ᐃᓗᐊᓄᑦ ᐃᔨᓚᐅᕐᐴᒃ. 19ᐊᖑᑎᐅᑉ ᓄᓕᐊᖓᑕ ᐃᒥᕐᑕᕐᕕᐅᑉ ᑭᓪᓚᖓ ᐅᓕᓚᐅᕐᐹ ᓂᐊᖂᔭᒃᓴᒥᒡᓗ ᑲᓐᖓᕐᓱᕐᕕᒋᓪᓗᒍ, ᖃᐅᔨᔭᐅᖁᓇᒍ. 20ᐋᑉᓴᓚᐅᑉ ᐊᖓᔪᖅᑳᖁᑎᖏᑦ ᑎᑭᓐᓇᒥᒃ ᐃᒡᓗᒧᑦ ᐊᕐᓇᒧᑦ ᐊᐱᕆᕗᑦ, “ᓇᐅᒡᓕ ᐊᕼᐂᒫᔅᑯᒃ ᔫᓇᑕᓂᒃᑯᒃ?”
ᐊᕐᓇᐅᑉ ᑭᐅᕔᑦ, “ᑰᖕᒥᒃ ᐃᑳᓚᐅᕐᐴᒃ.”
ᐊᖑᑏᑦ ᕿᓂᓚᐅᕐᐳᑦ ᓇᓂᓯᓇᑎᒡᓗ, ᑕᕝᕙ ᐅᑎᓚᐅᕐᐳᑦ ᔨᕉᓴᓕᒧᑦ. 21ᐊᐅᓪᓚᕆᕐᒪᑕ, ᐊᕼᐂᒫᔅᑯᒃ ᔫᓇᑕᓂᒃᑯᒃ ᐊᓂᕘᒃ ᐃᒥᕐᑕᕐᕕᖕᒥᑦ, ᐊᐅᓪᓚᕐᓗᑎᒡᓗ ᐅᖃᕆᐊᕐᑐᕐᓗᑎᒃ ᑍᕕᑎᒧᑦ. ᐅᖃᐅᑎᓚᐅᕐᐹ ᐊᕼᐃᑐᐱᓕᐅᑉ ᐃᓱᒪᒋᓚᐅᕐᑕᖓᓂᒃ ᑖᓐᓇ ᐱᓪᓗᒍ ᐅᖃᐅᑎᓚᐅᕐᐹᓗ, “ᑐᐊᕕᕐᓗᑎᑦ ᐃᑳᓕᕆᑦ ᑰᖕᒥᒃ.” 22ᑍᒤᒻᒪᑦ ᑍᕕᑎᒃᑯᑦ ᐃᓄᖁᑎᖏᓪᓗ ᐸᕐᓇᒃᑲᒥᒃ ᐃᑳᓚᐅᕐᐳᑦ ᔪᐊᕐᑕᓂᐅᑉ ᑰᖓᓂᒃ; ᖃᐅᒻᒪᓕᕐᑎᓪᓗᒍ ᐃᑳᕇᕐᑐᐃᓐᓇᐅᓚᐅᕐᐳᑦ. 23ᐊᕼᐃᑐᐱᓕ ᖃᐅᔨᒐᒥ ᐃᓱᒻᒥᕐᑐᐃᒍᑎᒋᔭᖓ ᒪᓕᒃᑕᐅᖏᓐᓂᖓᓂᒃ, ᓯᐅᑎᖅᑯᕐᑐᔪᖁᑎᒥᓄᑦ ᐃᑭᕗᖅ ᐅᑎᕐᓗᓂᓗ ᓄᓇᒧᑦ ᐱᕈᕐᕕᒋᓯᒪᔭᒥᓄᑦ. ᐱᓇᓱᐊᕆᐊᓕᖕᒥᓂᒡᓕ ᐊᖏᕐᕋᒥᓂ ᐱᔭᕇᕋᒥ, ᐃᒻᒥᓂᒃ ᕿᒥᑉᐳᖅ; ᑐᖁᓪᓗᓂᓗ, ᐃᓗᕕᕐᑕᐅᓚᐅᕐᐳᕐᓗ ᐃᓚᒌᑦ ᐃᓗᕕᖃᕐᕕᖓᓄᑦ.
24ᑕᕝᕙ ᑍᕕᑎ ᓄᓇᓕᖕᓄᑦ ᒪᕼᐊᓁᒧᑦ ᑎᑭᑉᐳᖅ, ᐋᑉᓴᓚᒻᑯᑦ ᐃᓴᕆᐊᓕᒥᐅᓪᓗ ᐃᑳᓕᕐᑎᓪᓗᒋᑦ ᔪᐊᕐᑕᓂᐅᑉ ᑰᖓᓂᒃ. 25ᐋᑉᓴᓚᐅᑉ ᐊᒪᓴ ᑲᒪᔨᓐᖑᕐᑎᓚᐅᕐᐹ ᐅᓇᑕᕐᑐᒃᓴᓄᑦ ᔪᐊᐱᒥᒃ ᐃᓇᖐᓪᓗᓂ. ᐋᒪᓴ ᐃᕐᓂᕆᔭᐅᓚᐅᕐᐳᖅ ᔨᑎᕆᒧᑦ ᐃᓴᕆᐊᓕᒥᐅᑕᕐᒧᑦ; ᐊᓈᓇᖓᓗ ᐊᐱᒊᓕᒥᒃ ᐊᑎᖃᕐᐳᖅ, ᓇᕼᐊᓯᐅᑉ ᐸᓂᖓ ᔨᕈᐃᐊᐅᑉ ᔪᐊᐱᐅᓪᓗ ᐊᓈᓇᖓᑕ ᓄᑲᖓ. 26ᐋᑉᓴᓚᒻᑯᑦ ᐃᓄᖁᑎᖏᓪᓗ ᑕᖕᒫᓚᐅᕐᐳᑦ ᒋᓕᐊᑎᐅᑉ ᓄᓇᖓᓂ.
27ᑍᕕᑎᓕ ᑎᑭᒻᒪᑦ ᒪᕼᐊᓁᒧᑦ, ᐅᐸᒃᑕᐅᕗᖅ ᓱᐰᒧᑦ ᓇᕼᐊᓯᐅᑉ ᐃᕐᓂᖓᓄᑦ ᐃᒡᓗᒐᓴᖕᓂᑦ ᕌᐸᒥᑦ ᐊᒧᓁᑎᒦᑦᑐᒥᑦ ᐱᔪᒥᑦ, ᒪᑬᕆᒧᓪᓗ ᐊᒥᐅᓕᐅᑉ ᐃᕐᓂᖓᓄᑦ ᓘᑎᐸᒥᑦ ᐱᔪᒥᑦ, ᐸᕐᔨᓔᒥᓪᓗ ᒋᓕᐊᑎᒥᐅᑕᒥᑦ ᕉᒋᓕᒦᑦᑐᒥᑦ, 28ᑖᒃᑯᐊ ᓇᒃᓴᕐᐳᑦ ᐊᐅᒻᒥᓯᓂᒃ, ᐴᒍᑕᕐᓂᒃ, ᐅᒃᑯᓯᖕᓂᒡᓗ ᒪᕐᕋᕕᓂᕐᓂᒃ, ᓂᕿᒃᓴᓂᒡᓗ, ᓂᐊᖂᔭᒃᓮᓪᓗ ᓄᕗᖕᒥᐅᑕᖏᓐᓂᒃ ᐹᕐᓕᓂᒃ, ᓂᕿᓂᒡᓗ, ᓂᕿᓕᐅᕐᓯᒪᔪᓂᒃ ᐊᓗᒐᒃᓴᓂᒃ, ᐲᓐᓂᓯᓂᒡᓗ ᓂᕿᒧᓪᓗ ᐃᓚᒃᓴᓂᒃ ᓕᓐᑎᓂᒃ, 29ᕼᐊᓂᓂᒡᓗ, ᓰᐱᓂᒡᓗ ᓰᓯᓂᒡᓗ, ᓂᕿᓂᒡᓗ ᐆᒪᔪᖁᑎᖏᓐᓂᑦ ᐱᔪᓂᒃ, ᑍᕕᑎᒃᑯᑦ ᐃᓚᖏᑕᓗ ᓂᕆᔭᒃᓴᖏᓐᓂᒃ; ᖃᐅᔨᒪᓚᐅᕋᒥᒃ ᑍᕕᑎᒃᑯᑦ ᐃᓚᖏᓪᓗ ᑳᒐᔭᕐᓂᖏᓐᓂᒃ ᑕᖃᓯᒪᓗᑎᒡᓗ ᐃᒥᕈᒃᑲᔭᕐᓂᖏᓐᓂᒡᓗ ᐃᓄᖃᔪᐃᑦᑐᒥᓐᖔᕐᓗᑎᒃ.
Currently Selected:
ᓴᒧᐃᓕ ᐂᑉᐸᖏᑦ 17: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
