ᓴᒧᐃᓕ ᐂᑉᐸᖏᑦ 18
18
ᐋᑉᓴᓚᐅᑉ ᓵᓚᐅᓂᖓ ᑐᖁᑕᐅᓂᖓᓗ
1ᐊᖓᔪᖅᑳᕐᔪᐊᑉ ᑍᕕᑎᐅᑉ ᐃᓄᖁᑎᓕᒫᓂ ᑲᑎᖁᓚᐅᕐᐰᑦ, ᐊᕕᒃᑐᓚᐅᕐᐰᓪᓗ 1,000ᓄᑦ ᐊᖓᔪᖅᑳᖑᓂᐊᕐᑐᑦ, 100ᓄᓪᓗ. 2ᑍᕕᑎᐅᓪᓗ ᐊᐅᓪᓚᕐᑎᓚᐅᕐᐰᑦ ᐱᖓᓲᓕᓪᓗᒋᑦ, ᔪᐊᐱ ᐱᖓᔪᖏᓐᓂ ᐊᖓᔪᖅᑳᖑᓚᐅᕐᐳᖅ, ᔪᐊᐱᐅᓪᓗ ᓄᑲᖓ ᐊᐱᓮ ᐱᖓᔪᖓᑦᑕ ᐃᓚᖏᓐᓂ ᐊᖓᔪᖅᑳᖑᓪᓗᓂ ᔨᕈᐃᐊᐅᑉ ᐃᕐᓂᖏᒃ, ᐃᑍᓗ ᒋᑍᑎᒥᐅᑕᖅ ᐱᖓᔪᖓᑦᑕ ᐃᓚᖏᓐᓂ ᐊᖓᔪᖅᑳᖑᓪᓗᓂ. ᐊᖓᔪᖅᑳᕐᔪᐊᓪᓗ ᐅᖃᐅᑎᕔᑦ, “ᓇᖕᒥᓂᖅ ᐊᐅᓪᓚᖃᑎᒋᓂᐊᕐᐸᑦᓯ.”
3ᑖᒃᑯᐊ ᑭᐅᕗᑦ, “ᐅᕙᑦᑎᓐᓂᒃ ᒪᓕᒋᐊᖃᓐᖏᓚᑎᑦ, ᕿᒫᓕᕈᑦᑕ, ᐅᕙᑦᑎᓐᓂᒃ ᑲᒪᑦᔮᖏᒻᒪᑕ. ᕿᑎᖅᑲᓕᒫᕗᑦ ᑐᖁᑕᐅᒐᓗᐊᕐᐸᑕ, ᖃᓄᐃᒃᓴᑦᔮᓐᖏᓚᑦ; ᐃᕝᕕᓪᓕ 10,000ᑎᑐᑦ ᐊᑑᑎᖃᕐᐳᑎᑦ ᐅᕙᑦᑎᓐᓄᑦ; ᐱᐅᓂᕐᓴᐅᕗᖅ ᐃᒡᓗᒐᓴᖕᓃᑐᐃᓐᓇᕐᓗᑎᑦ ᐃᑲᔪᕆᐊᕐᑐᓂᒃ ᑎᓕᓯᑐᐃᓐᓇᖃᑦᑕᕈᕕᑦ.”
4ᐊᖓᔪᖅᑳᕐᔪᐊᖅ ᑭᐅᕗᖅ, “ᐱᓇᓱᐊᕐᓂᐊᕐᐳᖓ ᐱᐅᓂᕐᐹᖑᓇᓱᒋᔭᑦᓯᓐᓂᒃ.” ᑍᒤᒻᒪᑦ ᐊᖓᔪᖅᑳᕐᔪᐊᖅ ᐃᑎᕐᑕᕐᕕᐅᑉ ᓴᓂᐊᓂ ᓇᖏᓚᐅᕐᐳᖅ, ᐅᓇᑕᕐᑐᒃᓴᖁᑎᖏᑦ ᓴᓂᖅᑯᑎᓪᓗᒋᑦ ᐊᕕᒃᑐᕐᓯᒪᓪᓗᑎᒃ 100ᓄᑦ 1,000ᓄᓪᓗ. 5ᐊᖓᔪᖅᑳᕐᔪᐊᑉ ᑎᓕᓚᐅᕐᐰᑦ ᔪᐊᐱᒃᑯᑦ, ᐊᐱᓮᓗ, ᐃᑍᓗ: “ᐅᕙᖓ ᐱᓪᓗᖓ ᐋᓐᓂᕐᑍᓕᓯᐅᒃ ᐃᓅᓱᒃᑐᖅ ᐋᑉᓴᓚᒻ.” ᐅᓇᑕᕐᑐᒃᓴᓕᒫᓪᓗ ᑐᓴᓚᐅᕐᐳᑦ ᑍᕕᑎᐅᑉ ᑎᓕᓯᑦᔪᑎᒋᔭᖓᓂᒃ ᐊᖓᔪᖅᑳᖑᔪᓄᑦ.
6ᑕᕝᕙ ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᐅᓇᑕᕆᐊᓚᐅᕐᐳᑦ ᐃᓴᕆᐊᓕᒥᐅᓂᒃ; ᐃᕗᕅᒥᐅᓪᓗ ᓇᐹᕐᑐᖏᓐᓂ ᐅᓇᑕᓕᓚᐅᕐᐳᑦ. 7ᐃᓴᕆᐊᓕᒥᐅᑦ ᓵᓚᐅᓚᐅᕐᐳᖅ ᑍᕕᑎᐅᑉ ᐅᓇᑕᕐᑐᒃᓴᖏᓐᓄᑦ, ᑐᖁᑕᐅᔪᓪᓗ ᐅᓄᕐᑐᐊᓘᓚᐅᕐᐳᑦ 20,000ᓮᑦ ᐅᓪᓗᒥ ᑍᑦᓱᒪᓂ. 8ᓇᐹᕐᑐᐃᑦ ᐃᒻᒧᐊᓂ ᑐᖁᔪᑦ ᐅᓄᕐᓂᕐᓴᐅᓚᐅᕐᐳᑦ; ᐅᓇᑕᕐᓂᕐᓂᑦ ᓴᕕᒡᔪᐊᒧᑦ ᑐᖁᑕᐅᔪᓂᑦ ᓇᑎᕐᓇᒦᑦᑐᓂᑦ.
9ᐋᑉᓴᓚᒻᓕ ᑲᑎᓯᑲᓪᓚᓚᐅᕐᐳᖅ ᑍᕕᑎᐅᑉ ᐅᓇᑕᕐᑐᒃᓴᖏᓐᓂᒃ. ᐋᑉᓴᓚᒻ ᓯᐅᑎᖅᑯᕐᑐᔫᑉ ᕿᒻᒥᕐᔪᐊᓪᓗ ᕿᑐᕐᖓᖓᓂᒃ ᕿᒧᒃᓯᐅᑎᖃᓚᐅᕐᐳᖅ, ᓇᐹᕐᑐᓪᓗ ᑎᓴᒃᑕᐅᑉ ᐊᑖᒎᓕᕋᒥ ᓂᐊᖁᐊ ᓇᒃᑎᑉᐳᖅ ᐊᕙᓚᖓᔪᖏᓐᓄᑦ, ᕿᒧᒃᓯᐅᑎᖓ ᑲᔪᓯᑎᓪᓗᒍ ᐋᑉᓴᓚᒻ ᓂᕕᖓᔪᖅ ᕿᒪᒃᐹ. 10ᑍᕕᑎᐅᑉ ᐅᓇᑕᕐᑎᖏᑕ ᐃᓚᖓᓐᓂᑦ ᑕᑯᔭᐅᒐᒥ ᐅᖃᐅᓯᕆᕚᑦ ᔪᐊᐱᒧᑦ, “ᑕᑯᒋᑦ, ᐋᑉᓴᓚᒻ ᑕᑯᕙᕋ ᓇᐹᕐᑐᒥ ᑎᓴᒃᑕᒥ ᓂᕕᖓᔪᖅ!”
11ᔪᐊᐱ ᑭᐅᕗᖅ, “ᑕᑯᓚᐅᕈᕕᐅᒃ, ᖃᓄᐃᒻᒪᓕ ᑐᖁᓚᐅᖏᑉᐱᐅᒃ? ᓇᖕᒥᓂᖅ ᑐᓂᓯᕕᒋᒐᔭᕐᐸᒋᑦ ᓯᐅᓪᕕᕆᓂᒃ ᖁᓕᓂᒃ ᑕᑦᓯᒥᒡᓗ.”
12ᑖᓐᓇᓕ ᔪᐊᐱᒧᑦ ᑭᐅᕗᖅ, “1,000ᓂᒃ ᓯᐅᓪᕕᕆᓂᒃ ᑐᓂᓂᐊᕋᓗᐊᕈᕕᖓ, ᐊᒡᒐᓐᓄᑦ ᐱᒋᐊᕋᔭᓐᖏᓚᕋ ᐊᖓᔪᖅᑳᕐᔫᐊᑉ ᐃᕐᓂᖓ; ᑐᓴᓚᐅᕋᑦᑕ ᐊᖓᔪᖅᑳᕐᔪᐊᖅ ᐅᖃᐅᑦᔨᑎᓪᓗᒍ ᐃᓕᑦᓯᓐᓂᒃ ᐊᐱᓮᒥᒃ ᐃᑍᒥᒡᓗ, ‘ᐅᕙᖓ ᐱᓪᓗᖓ ᐋᓐᓂᕐᑕᐅᑦᑍᓕᓕ ᐃᓅᓱᒃᑐᖅ ᐋᑉᓴᓚᒻ.’ 13ᓈᓚᖏᓪᓗᖓ ᐊᖓᔪᖅᑳᕐᔪᐊᒥᒃ ᑐᖁᓚᐅᕈᒃᑯ ᐋᑉᓴᓚᒻ, ᐊᖓᔪᖅᑳᕐᔪᐊᑉ ᑕᒪᓐᓇ ᑐᓴᕋᔭᕐᐹ, ᑐᓴᐅᒪᓐᖏᑕᖃᕈᓐᓇᖏᒻᒪᑦ ᓱᓇᓕᒫᓂᒃ ᐃᕝᕕᓪᓗ ᓴᐳᑎᒐᔭᓐᖏᓚᕐᒪ.”
14ᔪᐊᐱ ᐅᖃᕐᐳᖅ, “ᑕᒪᐅᖓᑐᐃᓐᓈᕈᑎᒋᔪᒪᔪᓐᓁᕐᐸᒋᑦ.” ᐱᖓᓱᓂᒃ ᑲᐱᓯᒍᑎᓂᒃ ᑎᒍᓯᕗᖅ, ᐋᑉᓴᓚᒻᓗ ᑖᒃᑯᓄᖓ ᑲᐱᕚ ᓴᒡᕕᖓᒍᑦ, ᓂᕕᖓᑎᓪᓗᒍ ᓇᐹᕐᑐᒥ ᑎᓴᒃᑕᒥ, ᓱᓕᓕ ᑐᖁᓚᐅᓐᖏᓚᖅ. 15ᑕᕝᕙ ᔪᐊᐱᐅᑉ ᓴᐳᓐᓂᐊᕐᑎᖏᑦ ᖁᓖᑦ ᐋᑉᓴᓚᒻᒧᐊᕐᓗᑎᒃ ᑲᐳᕐᐹᑦ, ᑐᖁᓪᓗᒍᓗ.
16ᑕᕝᕙ ᔪᐊᐱᐅᑉ ᑎᑦᑐᓚᐅᑎ ᓂᓪᓕᖁᕚ ᐅᓇᑕᕐᓂᖅ ᓄᖅᑲᖁᓪᓗᒍ, ᐅᓇᑕᕐᑐᒃᓮᓪᓗ ᐅᑎᕐᐳᑦ ᒪᓕᒃᑐᕕᓃᑦ ᐃᓴᕆᐊᓕᒥᐅᓂᒃ. 17ᐋᑉᓴᓚᐅᓪᓗ ᑎᒥᖓ ᑎᒍᕚᑦ, ᐃᒋᓪᓗᒍᓗ ᐃᑎᕐᓵᓗᖕᒧᑦ ᓇᐹᕐᑐᓕᖕᓃᑦᑐᒧᑦ, ᕿᖕᓂᕚᓪᓗ ᐅᔭᕋᒡᔪᐊᓄᑦ; ᐃᓴᕆᐊᓕᒥᐅᓕᒫᓪᓗ ᕿᒪᒃᓯᕗᑦ ᐊᖏᕐᕋᒥᖕᓄᑦ.
18ᐋᑉᓴᓚᒻ ᐃᓅᓪᓗᓂ ᓇᓗᓁᒃᑯᑕᕐᒥᒃ ᓇᑉᐸᕐᓯᓚᐅᓯᒪᕗᖅ ᐊᖓᔪᖅᑳᕐᔪᐊᑉ ᓇᕐᓴᖁᑎᖓᓂ, ᐅᖃᕐᓗᓂ, “ᐃᕐᓂᖃᖏᓐᓇᒪ ᐊᑎᕐᒪ ᐃᖅᑲᐅᒪᔭᐅᑦᔪᑎᒃᓴᖓᓂᒃ”; ᓇᑉᐸᕐᑎᑕᓂᓗ ᐃᒻᒥᓂᒃ ᐊᑦᓯᓚᐅᕐᐹ, ᐅᓪᓗᒥᒧᑦ ᓱᓕ ᑍᔭᐅᕗᖅ ᐋᑉᓴᓚᐅᑉ ᓇᓗᓁᒃᑯᑕᖓᓂᒃ.
ᑍᕕᑎᐅᑉ ᐅᖃᐅᑦᔭᐅᓂᖓ ᐋᑉᓴᓚᐅᑉ ᑐᖁᓂᖓᓂᒃ
19ᑕᕝᕙ ᐊᕼᐂᒫᔅ ᔭᑑᑭᐅᑉ ᐃᕐᓂᖓ ᐅᖃᕐᐳᖅ ᔪᐊᐱᒧᑦ, “ᐅᓪᓚᒡᓗᖓ ᐅᖃᕆᐊᕐᑐᓚᐅᕐᓚᖓ ᐊᖓᔪᖅᑳᕐᔪᐊᕐᒧᑦ ᑐᓴᕈᒥᓇᕐᑐᒥᒃ ᐊᑕᓂᐅᑉ ᐱᐅᓕᓚᐅᕐᒪᒍ ᐊᑭᕋᖏᓐᓂᑦ.”
20ᔪᐊᐱ ᑭᐅᕗᖅ, “ᐋᒃᑲ, ᐅᓪᓗᒥ ᑐᓴᕈᒥᓇᕐᑐᒥᒃ ᐅᖃᕐᓂᐊᓐᖏᓚᑎᑦ; ᐅᓪᓗᐃᑦ ᐊᓯᖏᓐᓂ ᐅᖃᕈᓐᓇᓛᕐᐳᑎᑦ, ᐅᓪᓗᒥᐅᖏᑦᑐᖅ ᐊᖓᔪᖅᑳᕐᔪᐊᑉ ᐃᕐᓂᖓ ᑐᖁᖕᒪᑦ.” 21ᐅᖃᐅᑦᔨᕗᕐᓗ ᐃᑎᐅᐱᐊᒥᐅᑕᕐᒧᑦ ᓂᐅᕕᐊᕆᓯᒪᓪᓗᓂᐅᒃ ᐱᔨᒥᓄᑦ, “ᐂᓕᕆᑦ ᐊᖓᔪᖅᑳᕐᔪᐊᕐᒧᑦ ᑕᑯᓚᐅᕐᑕᕐᓂᒃ ᐅᖃᐅᑎᔭᕐᑐᕐᓗᒍ.” ᐱᔨᖓᓗ ᐅᑯᓚᐅᕐᓗᓂ ᔪᐊᐱᒧᑦ, ᐅᓪᓚᒃᓯᕗᖅ.
22ᐊᕼᐂᔅᓕ ᔭᑑᑭᐅᑉ ᐃᕐᓂᖓ ᐅᖃᕆᐊᓪᓚᓚᐅᕐᐳᖅ, “ᖃᓄᐃᓕᔭᐅᓂᐊᕋᓗᐊᕈᒪ ᐅᖃᕆᐊᕐᑐᕐᑎᓚᐅᓐᖓ ᐱᔨᖕᓄᑦ ᐱᖃᑕᐅᓗᖓ ᑯᔅᒥᐅᓂᒃ ᒪᓕᖃᑕᐅᓗᖓ.”
ᔪᐊᐱᐅᑉ ᐊᐱᕆᕚ, “ᓱᖕᒪᑦ ᑍᒫᒃ ᐱᓂᐊᕈᒪᕕᑦ, ᐃᕐᓃᒃ? ᐊᑭᓕᕐᑕᐅᔮᓐᖏᑦᑐᑎᑦ ᑕᒪᑐᒧᖓ.”
23ᐊᕼᐂᒫᔅ ᐅᖃᕆᐊᓪᓚᒃᐳᖅ, “ᖃᓄᐃᑦᑐᖃᕐᓂᐊᕋᓗᐊᕐᐸᑦ, ᐅᓪᓚᖕᓂᐊᕐᐳᖓ.”
ᔪᐊᐱ ᐅᖃᕐᐳᖅ, “ᐊᑏ ᐅᓪᓚᓕᕆᑦ.” ᐊᕼᐂᒫᔅ ᐅᓪᓚᒃᓯᓚᐅᕐᐳᖅ ᔫᐊᕐᑕᓂᐅᑉ ᓇᕐᓴᖓᒍᑦ, ᐊᑯᓂᐅᖏᑦᑐᕐᓗ ᐱᔨ ᑯᔅᒥᐅᑕᖅ ᖄᖏᕐᐹ.
24ᑍᕕᑎᓕ ᐃᒃᓯᕙᓚᐅᕐᐳᖅ ᐃᒡᓗᒐᓮᑦ ᐃᑎᕐᑕᕐᕕᐊᑕ ᐃᓗᐊᑕᓗ ᐊᑯᓐᓂᖓᓂ; ᖃᐅᔨᓴᕐᑎᓕ ᐊᕙᓗᕐᔪᐊᑉ ᖄᖓᓃᑦᑐᖅ ᒪᔪᕐᓗᓂ ᐃᑎᕐᑕᕐᕕᐅᑉ ᖁᓛᓄᑦ; ᑕᑯᓴᕋᒥ ᑕᑯᕗᖅ, ᐃᓄᖕᒥᒃ ᐃᓄᑑᓪᓗᓂ ᐅᓪᓚᒃᑐᒥᒃ. 25ᐊᖓᔪᖅᑳᕐᔪᐊᕐᓗ ᐅᖃᐅᑎᕚ, ᐊᖓᔪᖅᑳᕐᔪᐊᕐᓗ ᐅᖃᕐᐳᖅ, “ᐃᓄᑑᒍᓂ, ᑐᓴᕈᒥᓇᕐᑐᒥᒃ ᐅᖃᕆᐊᕐᑐᕐᐳᖅ.” ᖃᒡᓕᕙᓪᓕᐊᓕᕐᑎᓪᓗᒍ ᐅᓪᓚᒃᑐᖅ.
26ᖃᐅᔨᓴᕐᑎ ᑕᑯᒋᕗᖅ ᐊᓯᐊᓂᒃ ᐃᓄᑑᓪᓗᓂ ᐅᓪᓚᒃᑐᒥᒃ, ᐃᑎᕐᑕᕐᕕᖕᒥᓗ ᑲᒪᔨᒧᑦ ᐅᖃᕐᐳᖅ, “ᑕᑯᒋᑦ! ᑍᑲᑦᑕᐅᖅ ᐊᖑᑦ ᐅᓪᓚᒃᑐᖅ!”
ᐊᖓᔪᖅᑳᕐᔪᐊᖅ ᑭᐅᕗᖅ, “ᑖᓐᓇᑦᑕᐅᖅ ᑐᓴᕈᒥᓇᕐᑐᒥᒃ ᐅᖃᕆᐊᕐᑐᕆᕗᖅ.”
27ᖃᐅᔨᓴᕐᑐᕐᓗ ᐅᖃᕐᐳᖅ, “ᑖᓐᓇ ᓯᕗᓪᓕᖅ ᐅᓪᓚᐅᓯᖃᕐᐳᖅ ᐊᕼᐂᒫᔅᑐᑦ ᔭᑑᑭᐅᑉ ᐃᕐᓂᖓᑐᑦ.”
ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑖᓐᓇ ᐃᓄᑦᓯᐊᕙᐅᕗᖅ, ᐅᖃᕆᐊᕐᑐᕐᑐᖅ ᑐᓴᕈᒥᓇᕐᑐᒥᒃ.”
28ᐊᕼᐂᒫᔅ ᐊᖓᔪᖅᑳᕐᔪᐊᕐᒧᑦ ᓂᓪᓕᐅᓯᕐᒥᒃ ᓂᓪᓕᕐᐳᖅ, ᐹᒻᒪᒡᓗᓂᓗ ᒪᓂᖅᑲᒧᑦ ᑖᑦᓱᒪ ᓵᖓᓄᑦ, ᐅᖃᕐᓗᓂᓗ, “ᐊᑕᓂᖅ ᒎᑏᑦ ᓂᕐᑐᕐᑕᐅᓕ, ᓵᓚᖃᕐᑎᒻᒪᑎᑦ ᐃᓄᖕᓂᑦ ᐊᑭᕋᕐᑐᕐᑐᓂᒃ ᐊᖓᔪᖅᑳᕐᔪᐊᖅ!”
29ᐊᖓᔪᖅᑳᕐᔪᐊᖅ ᐊᐱᕆᕗᖅ, “ᐃᓅᓱᒃᑐᖅ ᐋᑉᓴᓚᒻ ᖃᓄᐃᖏᒃᑲᓗᐊᕐᐹ?”
ᐊᕼᐂᒫᔅ ᑭᐅᕗᖅ, “ᐊᖓᔪᖅᑳᒃ, ᔪᐊᐱᐅᑉ ᑎᓕᖕᒪᖓ ᑕᑯᓚᐅᕐᐳᖓ ᐅᐃᒪᔮᕐᑐᓂᒃ, ᖃᐅᔨᓚᐅᓐᖏᓚᖓ ᖃᓄᐃᓕᐅᕐᒪᖔᑕ.”
30ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐊᕙᓂ ᓇᖏᓚᐅᕆᑦ,” ᑕᐅᕗᓐᖓᕐᓗᓂᓗ ᓇᖏᓕᕐᐳᖅ.
31ᓂᐅᕕᐊᖑᓯᒪᔪᖅ ᐱᔨ ᐃᑎᐅᐱᐊᒥᐅᑕᖅ ᑎᑭᓐᓇᒥ ᐅᖃᕐᐳᖅ ᐊᖓᔪᖅᑳᕐᔪᐊᕐᒧᑦ, “ᑐᓴᕈᒥᓇᕐᑐᒥᒃ ᐅᖃᕆᐊᕐᑐᕐᐳᖓ ᐊᖓᔪᖅᑳᕐᔪᐊᖅ! ᐅᓪᓗᒥ ᐊᑕᓂᐅᑉ ᓵᓚᖃᕐᑎᑉᐹᑎᑦ ᐊᑭᕋᕐᑐᓕᓚᐅᕐᑐᓕᒫᓂᒃ ᐃᓕᖕᓂᒃ!”
32ᐊᖓᔪᖅᑳᕐᔪᐊᖅ ᐊᐱᕆᕗᖅ ᐃᑎᐅᐱᐊᒥᐅᑕᒧᑦ, “ᐃᓅᓱᒃᑐᖅ ᐋᑉᓴᓚᒻ ᖃᓄᐃᓐᖏᓛᖅ?”
ᓂᐅᕕᐊᖑᓯᒪᔪᖅ ᐱᔨ ᑭᐅᕗᖅ, “ᑖᓐᓇᓗ ᐊᑭᕋᕐᑐᕐᑐᓕᒫᓪᓗ ᐃᓕᖕᓄᑦ ᖃᓄᐃᖏᑦᑑᖁᔪᒥᓇᕋᓗᐊᕐᐳᑦ.”
33ᑕᕝᕙ ᐊᖓᔪᖅᑳᕐᔪᐊᖅ ᑎᑭᑕᐅᕗᖅ ᕿᒃᓵᖕᓂᕐᔪᐊᕐᒧᑦ, ᐃᒡᓗᕈᓯᕐᒧᐊᕐᐳᕐᓗ ᐃᑎᕐᑕᕐᕕᐅᑉ ᖁᓛᓄᑦ ᕿᐊᓕᕐᓗᓂ; ᕿᐊᓪᓗᓂᓗ ᐅᖃᕐᐳᖅ, “ᐃᕐᓃᒃ! ᐃᕐᓃᒃ ᐋᑉᓴᓚᒻ! ᐋᑉᓴᓚᒻ, ᐃᕐᓃᒃ! ᑐᖁᖔᓚᐅᕈᒪᓕ ᑐᖁᓐᖏᖔᕐᑎᓪᓗᑎᑦ, ᐃᕐᓃᒃ! ᐋᑉᓴᓚᒻ, ᐃᕐᓃᒃ!”
Currently Selected:
ᓴᒧᐃᓕ ᐂᑉᐸᖏᑦ 18: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
