ᓴᒧᐃᓕ ᐂᑉᐸᖏᑦ 15
15
ᐋᑉᓴᓚᐅᑉ ᐊᑭᕋᕐᑐᕋᓱᐊᕐᓂᖓ
1ᑕᒪᑐᒪ ᑭᖑᓂᐊᒍᑦ, ᐋᑉᓴᓚᒻ ᐃᒻᒥᓂᒃ ᕿᒧᒃᓯᐅᑎᒥᒃ ᐊᒃᓴᓗᐊᓕᒃᑖᓚᐅᕐᐳᖅ ᕿᒻᒥᕐᔪᐊᓂᒡᓗ, ᒪᓕᒃᑎᑖᕐᓗᓂᓗ ᐊᖑᑎᓂᒃ 50ᓂᒃ. 2ᐅᓪᓛᒃᑯᑦ ᒪᑭᖃᑦᑕᓚᐅᕐᐳᖅ ᐂᕙᒡᓗᓂᓗ ᐊᖅᑯᑎᐅᑉ ᓴᓂᐊᓄᑦ ᐃᒡᓗᒐᓮᑦ ᐃᑎᕐᑕᕐᕕᐊᓄᑦ ᑕᕝᕙᓂᓗ ᓇᖏᕐᐸᒡᓗᓂ; ᓇᓪᓕᐊᓪᓗ ᑕᒪᐅᓈᕋᖓᑦ ᐃᓱᐃᓪᓕᐅᕈᑎᖃᕐᓗᓂ ᐊᖓᔪᖅᑳᕐᔪᐊᒧᑦ ᐋᖅᑭᒃᑕᐅᖁᔭᒥᓂᒃ, ᐋᑉᓴᓚᐅᑉ ᕾᖁᓚᐅᕐᐹ ᓇᑭᓐᖔᕐᒪᖔᓪᓗ ᐊᐱᕆᓪᓗᒍ, ᐊᖑᑎᐅᓪᓗ ᐅᖃᐅᑎᑐᐊᕐᐸᒍ ᓇᓪᓕᐊᓐᓂᑦ ᑭᖑᕙᕇᓂᑦ ᐱᓯᒪᖕᒪᖔᑦ, 3ᐋᑉᓴᓚᐅᑉ ᐅᖃᐅᑎᒐᔭᓚᐅᕐᐹ, “ᑕᑯᒋᑦ, ᐱᖁᔭᒧᑦ ᓴᐳᑎᔭᐅᓯᒪᕗᑎᑦ, ᑭᓯᐊᓂᓕ ᐃᑲᔪᕐᑎᖃᓐᖏᓚᑎᑦ ᐊᖓᔪᖅᑳᕐᔪᐊᒧᑦ ᑐᓴᕐᑕᐅᔪᓐᓇᕐᓗᑎᑦ.” 4ᐋᑉᓴᓚᒻᓗ ᐅᖃᕆᐊᓪᓚᒃᐳᖅ, “ᖃᓄᕐᑐᖅ ᐋᖅᑭᒃᓱᐃᔨᐅᓚᐅᕐᓚᖓ! ᐃᓱᐃᓪᓕᐅᕈᑎᖃᕐᑐᖃᑐᐊᕐᐸᑦ ᐅᕙᓐᓄᑦ ᐂᒐᔭᕐᒪᑕ ᐱᔭᕆᐊᓕᖏᓐᓂᒡᓗ ᐱᑎᑦᓱᓐᓇᕋᔭᕋᒃᑭᑦ.” 5ᐊᖑᒻᒧᑦ ᐋᑉᓴᓚᒻ ᐅᐸᒃᑕᐅᑐᐊᕌᖓᒥ ᐹᒻᒪᒃᑎᕐᕕᐅᓪᓗᓂ, ᐋᑉᓴᓚᐅᑉ ᐃᓴᒃᓗᓂ ᐃᕿᑉᐸᓚᐅᕐᐰᑦ, ᑯᓂᒡᓗᒋᓪᓗ. 6ᐋᑉᓴᓚᒻ ᑍᒤᓕᐅᓚᐅᕐᐳᖅ ᐃᓴᕆᐊᓕᒥᐅᓕᒫᓂᒃ ᐊᖓᔪᖅᑳᕐᔪᐊᕐᒧᑦ ᐂᓇᓱᐊᕐᑐᓂᒃ ᐃᑲᔪᕐᑕᐅᔭᕐᑐᕐᓗᑎᒃ, ᑍᒤᓕᐅᕐᓂᕐᒥᓄᑦ ᐱᐅᒋᔭᐅᓕᓚᐅᕐᐳᖅ.
7ᐊᕐᕌᒍᐃᑦ ᓯᑕᒪᑦ ᐊᓂᒍᕐᑎᓪᓗᒋᑦ ᐋᑉᓴᓚᒻ ᐊᖓᔪᖅᑳᕐᔪᐊᕐᒧᑦ ᑍᕕᑎᒧᑦ ᐅᖃᕐᐳᖅ, “ᐊᖓᔪᖅᑳᒃ, ᕼᐃᐸᕋᓐᒧᐊᕈᓐᓇᕐᑎᓚᐅᓐᖓ ᐊᖏᕈᑎᒋᓯᒪᔭᓐᓂᒃ ᑲᔪᓯᑎᑦᓯᓗᖓ ᑐᓂᓯᔪᓐᓇᖁᓪᓗᖓ ᐊᑕᓂᕐᒧᑦ. 8ᒋᓱᕅᒦᑎᓪᓗᖓ ᓯᕆᐊᒥ, ᐊᑕᓂᕐᒧᑦ ᐊᖏᓚᐅᕋᒪ ᐅᑎᕐᑎᑐᐊᕐᐸᖓ ᔨᕉᓴᓕᒧᑦ, ᑐᒃᓯᐊᕐᕕᒋᓛᕐᓂᐊᕐᓂᕋᕐᓗᒍ ᕼᐃᐸᕋᓐᒥ.”
9ᑕᕝᕙ ᐊᖓᔪᖅᑳᕐᔪᐊᑉ ᐅᖃᐅᑎᕚ, “ᐊᐅᓪᓚᓕᕆᑦ ᐃᓱᒫᓗᖏᑦᓯᐊᕐᓗᑎᑦ.” ᑕᕝᕙ ᒪᑭᓐᓇᒥ, ᐋᑉᓴᓚᒻ ᕼᐃᐸᕋᓐᒧᐊᓕᓚᐅᕐᐳᖅ. 10ᑭᓯᐊᓂᓕ ᐃᔨᕋᕐᑐᕐᓗᓂ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᐃᓴᕆᐊᓕᒥᐅᑦ ᑭᖑᕚᓕᒫᖏᓐᓄᑦ ᐃᒫᒃ ᐅᖃᖁᓪᓗᒋᑦ, “ᑎᑦᑐᓚᐅᑎᓂᒃ ᑐᓴᑐᐊᕈᑦᓯ, ᕾᒐᓛᓛᕐᐳᓯ, ‘ᐋᑉᓴᓚᒻ ᐊᖓᔪᖅᑳᕐᔪᐊᕈᕐᐳᖅ ᕼᐃᐸᕋᓐᒥ!’” 11ᐋᑉᓴᓚᒻ ᐊᖑᑎᓂᒃ 200ᓂᒃ ᐃᓚᖃᓚᐅᕐᐳᖅ ᕾᖁᓚᐅᕐᑕᒥᓂᒃ ᔨᕉᓴᓕᒥᑦ ᐊᐅᓪᓚᓕᕐᓗᑎᒃ; ᑖᒃᑯᐊ ᐃᓚᒋᓚᐅᕐᐹᑦ ᖁᕕᐊᓱᒡᓗᑎᒃ, ᖃᐅᔨᒪᓇᑎᒃ ᐊᑭᕋᕐᑐᕋᓱᐊᕐᓂᖓᓂᒃ. 12ᐂᑦᑑᑎᒥᓂᒃ ᑐᓂᕐᕈᓯᕐᑎᓪᓗᒍ, ᐋᑉᓴᓚᒻ ᐅᖃᕆᐊᕐᑐᕐᑎᑦᓯᓚᐅᕐᐳᖅ ᓄᓇᓕᖕᓄᑦ ᐃᕼᐃᑐᐱᓕᒥᐅᓄᑦ ᒋᓗᓁᑎᒦᑦᑐᒧᑦ, ᐊᖓᔪᖅᑳᕐᔪᐊᑉ ᑍᕕᑎᐅᑉ ᐃᓱᒪᓕᐅᕐᑎᖓᑕ ᐃᓚᖓᓐᓄᑦ. ᐊᖓᔪᖅᑳᕐᔪᐊᒥᒃ ᓯᖏᑦᓯᓇᓱᐊᕐᑐᑦ ᓲᖑᓯᕙᓪᓕᐊᓚᐅᕐᐳᑦ, ᐋᑉᓴᓚᐅᓪᓗ ᒪᓕᒃᑎᖏᑦ ᐅᓄᕐᓯᕙᓪᓕᐊᖏᓐᓇᓕᓚᐅᕐᐳᑦ.
ᑍᕕᑎᐅᑉ ᕿᒪᒃᓯᓂᖓ ᔨᕉᓴᓕᒥᑦ
13ᐅᖃᕆᐊᕐᑐᕐᑐᒥᒃ ᑍᕕᑎᒧᐊᕐᑐᖃᕐᐳᖅ, ᐅᖃᕐᓗᓂ, “ᐃᓴᕆᐊᓕᒥᐅᑉ ᓴᖑᓕᕐᒪᑕ ᐋᑉᓴᓚᒻᒥᒃ ᒪᓕᖔᕈᒪᓪᓗᑎᒃ.”
14ᑕᕝᕙ ᑍᕕᑎᐅᑉ ᐊᖓᔪᖅᑳᖁᑎᓕᒫᓂ ᔨᕉᓴᓕᒦᑦᑐᑦ ᐅᖃᐅᑎᕔᑦ, “ᒪᑭᓪᓗᑕ ᒫᓐᓇᑦᓴᐅᑎᒋ ᕿᒪᒃᓯᓕᕐᑕ; ᑕᒪᐅᓐᖓᑐᐊᕐᐸᑦ ᓴᐱᔭᐅᓗᑕ ᓵᓚᒋᓂᐊᕐᒪᑎᒍᑦ; ᑐᐊᕕᕐᓗᑕ! ᐋᑉᓴᓚᐅᑉ ᐱᕕᒃᓮᕈᑎᑐᐃᓐᓇᕆᐊᖃᕐᒪᑎᒍᑦ, ᐱᐅᖏᑦᑐᐊᓗᖕᒥᒡᓗ ᐅᕙᑦᑎᓐᓄᑦ ᑎᑭᑎᑦᓯᒐᔭᕐᒪᑦ ᐃᒡᓗᒐᓴᖕᒦᑦᑐᓕᒫᓪᓗ ᑐᖁᓪᓗᓂᒋᑦ!”
15ᑖᒃᑯᐊ ᐊᖓᔪᖅᑳᖁᑎᖏᑦ ᑭᐅᕗᑦ ᐊᖓᔪᖅᑳᕐᔪᐊᕐᒧᑦ, “ᑕᑯᒋᑦ, ᐱᔨᑎᑦ ᐊᑐᐃᓐᓇᐅᕗᑦ ᖃᓄᑐᐃᓐᓇᖅ ᑐᑭᑖᑐᐊᕈᕕᑦ.” 16ᑕᕝᕙ ᐊᖓᔪᖅᑳᕐᔪᐊᖅ ᐊᐅᓪᓚᓕᕐᐳᖅ, ᐃᒡᓗᒥᐅᖃᑎᓕᒫᓂ ᐃᓚᒋᓪᓗᒋᑦ, ᓄᓕᐊᒃᑲᓐᓂᓂᓕ ᖁᓖᑦ ᕿᒪᓚᐅᕐᐰᑦ ᐃᒡᓗᖓᓂᒃ ᑲᒪᖁᓪᓗᒋᑦ.
17ᐊᖓᔪᖅᑳᕐᔪᐊᖅ ᐃᓄᐃᓪᓗ ᐃᓚᒋᔭᖏᑦ ᐃᒡᓗᒐᓴᖕᓂᑦ ᐊᐅᓪᓚᓕᕋᒥᒃ; ᓄᖅᑲᓚᐅᕐᐳᑦ ᐃᒡᓗᒧᑦ ᑭᖑᓪᓕᕐᐹᒧᑦ. 18ᐊᖓᔪᖅᑳᖁᑎᖏᑦ ᓴᓂᐊᓂ ᓇᖏᕐᑎᓪᓗᒋᑦ ᓴᐳᓐᓂᐊᕐᑏᑦ ᓯᕆᑍᑏᑦ, ᐱᓕᑍᑏᓪᓗ ᓵᖓᒍᑦ ᖄᖏᓚᐅᕐᐳᑦ, ᐅᓇᑕᕐᑐᒃᓮᓪᓗ 600 ᒋᑍᑎᒥᐅᑦ ᒪᓕᒃᑐᑦ ᒑᑎᒥᑦ ᖄᖏᓚᐅᕆᕗᑦ, ᐊᖓᔪᖅᑳᕐᔪᐊᑉ ᓯᕗᕌᒍᑦ. 19ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ ᐃᑍᒧᑦ ᒋᑍᑎᒥᐅᑕᕐᒧᑦ, “ᓱᖕᒪᑦ ᐅᕙᑦᑎᓐᓂ ᐃᓚᐅᕖᑦ? ᐅᑎᓕᕆᑦ ᐊᖓᔪᖅᑳᕐᔪᐊᓐᖑᕐᑐᖅ ᐱᖃᑎᒋᓕᕈᒃ; ᓄᓇᖃᑎᒃᓴᔭᕆᖏᓐᓇᑦᑎᒋᑦ, ᓇᖕᒥᓂᕐᓗ ᕿᒫᓯᒪᓪᓗᑎᑦ ᓄᓇᖕᓂᑦ. 20ᕿᓚᒥᐊᐱᒃ ᑕᒫᓂ ᓄᓇᖃᕐᓯᒪᒐᕕᑦ, ᓱᖕᒪᓪᓕ ᓇᒧᑐᐃᓐᓇᖅ ᐃᖏᕐᕋᖃᑎᒋᔭᕆᐊᖃᕐᐱᒌᑦ? ᖃᐅᔨᒪᖏᓐᓇᒪᓘᓐᓃᑦ ᓇᒧᑦ ᐂᖕᒪᖔᕐᒪ; ᐅᑎᓕᕆᑦ, ᐃᓅᖃᑎᑎᑦ ᐃᓚᒋᓗᒋᑦ; ᐊᑕᓂᐅᓪᓗ ᐱᑦᓯᐊᕐᕕᒋᓕᑎᑦ ᓱᖁᓯᔪᐃᑦᑑᕕᒋᓕᑎᓪᓗ.”
21ᐃᑍᓕ ᑭᐅᕗᖅ, “ᐊᖓᔪᖅᑳᒃ, ᐊᑕᓂᖅ ᐃᓅᖕᒪᑦ, ᐊᑕᓂᕋᓗ ᐊᖓᔪᖅᑳᕐᔪᐊᕋ ᐃᓅᓪᓗᓂ, ᐊᖓᔪᖅᑳᕐᔪᐊᕋ ᐊᑕᓂᕋᓗ ᓇᒧᓐᖓᑐᐊᕐᐸᑦ ᒪᓖᓐᓇᐅᔭᕐᓂᐊᕐᐸᕋ, ᑐᖁᓂᐊᕋᓗᐊᕈᒪ ᐃᓅᓂᐊᕈᒪᓘᓐᓃᑦ ᓇᔪᕐᑕᖓᓃᖃᑕᐅᖏᓐᓇᕐᓂᐊᕐᐳᖓ.”
22ᑍᕕᑎᓗ ᑭᐅᕗᖅ, “ᐊᑏ, ᑲᔪᓯᓕᕆᑦ!” ᑍᒤᒻᒪᑦ ᐃᑍ ᒋᑍᑎᒥᐅᑕᖅ ᒪᓕᒃᓴᕐᐳᖅ ᐃᓅᖃᑎᓂ ᐃᓚᓕᒫᓂᓗ ᐃᓚᒋᓪᓗᒋᑦ. 23ᐃᓄᓕᒫᓪᓗ ᓂᐱᖃᕐᓗᑎᒃ ᕿᐊᓚᐅᕐᐳᑦ ᑍᕕᑎᒃᑯᑦ ᐊᐅᓪᓚᓕᕐᑎᓪᓗᒋᑦ, ᐊᖓᔪᖅᑳᕐᔪᐊᕐᓗ ᐃᑳᓚᐅᕐᐳᖅ ᑭᑐᕌᓂᐅᑉ ᑰᖓᓂᒃ, ᒪᓕᒃᑕᐅᓪᓗᓂ ᐃᓄᖁᑎᓕᒫᒥᓄᑦ, ᐃᓄᖃᔪᐃᑑᓪᓗ ᓇᓛᓄᑦ ᑐᕌᓚᐅᕐᐳᑦ.
24ᐊᐰᐊᑕᓗ ᑐᓂᕐᕈᓯᕐᑎᑦᓯᔨ ᕾᓚᐅᕆᕗᖅ, ᔭᑑᒃᓗ ᐃᓚᒋᔭᐅᓪᓗᓂ, ᐃᓚᖃᕐᓗᑎᒃ ᓕᕔᑎᓂᒃ, ᐊᒡᔭᕐᓯᓪᓗᑎᒃ ᐊᖏᖃᑎᒌᒍᑏᑦ ᐃᒃᓯᕐᕕᖓᓂᒃ; ᒪᓂᖅᑲᒧᑦ ᐃᓕᓯᒪᓚᐅᕐᐹᑦ ᐃᓄᓕᒫᑦ ᐃᒡᓗᒐᓴᖕᓂᑦ ᐊᓂᔪᐃᓐᓇᐅᓚᐅᖅᑳᕐᑎᓐᓇᒋᑦ. 25ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ ᔭᑑᒃᒧᑦ, “ᐊᖏᖃᑎᒌᖕᓂᐅᑉ ᐃᒃᓯᕐᕕᖓ ᐅᑎᕐᑎᓚᐅᕈᒃ ᐃᒡᓗᒐᓴᖕᓄᑦ. ᐊᑕᓂᐅᑉ ᖁᕕᐊᒋᒍᓂᖓ, ᐅᓪᓗᐃᑦ ᐃᓚᖓᓐᓂ ᐅᑎᕐᑎᓛᕐᐹᖓ ᑕᑯᒃᑲᓐᓂᕐᓗᒍ ᐃᓂᒋᕙᒃᑕᖓᓂ. 26ᖁᕕᐊᒋᖏᒃᑯᓂᖓᓕ, ᐅᕙᓐᓄᑦ ᐱᓂᐊᕈᒪᔭᒥᓂᒃ ᐃᓱᒪᕐᓱᓕᕐᓕ.” 27ᐅᖃᕆᐊᒃᑲᓐᓂᕐᐳᖅ ᔭᑑᒃᒧᑦ, “ᑕᑯᒋᑦ, ᐃᕐᓃᑦ ᐊᕼᐂᒫᔅ ᔫᓇᑕᓂᓗ ᐊᐰᐊᑕᐅᑉ ᐃᕐᓂᖓ ᐃᓚᒋᓗᒋᒃ ᐅᑎᓕᕆᑦᓯ ᐃᒡᓗᒐᓴᖕᓄᑦ ᐃᓱᒫᓗᖏᑦᓯᐊᕐᓗᑎᑦ. 28ᐅᕙᖓᓕ, ᐅᑕᖅᑭᓂᐊᕐᐳᖓ ᑰᑉ ᐃᑳᕐᕕᖏᓐᓂ ᐃᓄᖃᔪᐃᑦᑐᒥ ᐃᓕᖕᓂᑦ ᑐᓴᓚᐅᖏᓐᓂᓐᓂ.” 29ᑍᒤᒻᒪᑦ ᔭᑑᒃᑯᒃ ᐊᐰᐊᑕᒃᑯᒃ ᐊᖏᖃᑎᒌᒍᑏᑦ ᐃᒃᓯᕐᕕᖓᓂᒃ ᑎᒍᓯᓚᐅᕐᐴᒃ ᐅᑎᕐᑎᓪᓗᒍᓗ ᔨᕉᓴᓕᒧᑦ; ᑕᕝᕙᓃᓕᕐᓗᑎᒡᓗ.
30ᑍᕕᑎᓕ ᖃᖅᑲᒧᑦ ᐅᕐᓱᒃᓴᕐᑕᓕᖕᒧᑦ ᒪᔪᐊᕐᐳᖅ, ᕿᐊᓪᓗᓂ ᐂᕙᓪᓕᐊᓚᐅᕐᐳᖅ; ᑲᒥᓪᓛᓚᐅᕐᐳᖅ ᓂᐊᖁᐊᓗ ᐅᓕᒃᓯᒪᓪᓗᓂ ᕿᒃᓵᖕᓂᕐᒧᑦ ᓇᓗᓁᒃᑯᑕᐅᓪᓗᓂ; ᒪᓕᒃᑐᓕᒫᓪᓗ ᓂᐊᖁᕐᒥᖕᓂᒃ ᐅᓕᒃᓯᓯᒪᓚᐅᕆᕗᑦ ᒪᔪᕋᕐᓗᑎᒃ ᕿᐊᒋᓪᓗᑎᒃ. 31ᑍᕕᑎ ᐅᖃᐅᑦᔭᐅᒐᒥ ᐊᕼᐃᑐᐱᐅᓪ ᐃᓚᓕᐅᑎᓂᖓᓂᒃ ᐋᑉᓴᓚᐅᑉ ᐊᑭᕋᕐᑐᓕᕐᓂᖓᓄᑦ, ᑐᒃᓯᐊᓚᐅᕐᐳᖅ, “ᐊᑕᓃᖅ, ᐃᓕᖕᓄᑦ ᑐᒃᓯᐊᕐᐳᖓ, ᐊᕼᐃᑐᐱᐅᑉ ᐃᓱᒪᓕᐅᕆᓂᖓ ᑐᑭᖃᕈᓐᓃᕐᑎᓚᐅᕈᒃ!”
32ᑍᕕᑎ ᖃᖅᑲᐅᑉ ᖄᖓᓄᐊᕋᒥ, ᑕᕝᕙᓂ ᑐᒃᓯᐊᕐᕕᐅᕙᒃᑐᒧᑦ ᒎᑎᒧᑦ, ᑕᑯᒋᑦ, ᕼᐅᓮᑉ ᐊᑬᑎᒥᐅᑕᐅᑉ ᑲᑎᕚ ᐊᓐᓄᕌᖏᑦ ᐊᓕᒃᑐᕐᓯᒪᓪᓗᑎᒃ ᓂᐊᖁᐊᓗ ᒪᕐᕋᒥᑎᕐᓯᒪᓪᓗᓂ. 33ᑍᕕᑎᐅᑉ ᐅᖃᐅᑎᕚ, “ᐅᕙᓐᓄᑦ ᒪᓕᒃᑯᕕᑦ ᐅᖁᒤᒃᓴᐅᑎᒋᑐᐃᓐᓇᕐᓂᐊᕐᐸᒋᑦ, 34ᐅᑎᕈᕕᓪᓕ ᐃᒡᓗᒐᓴᖕᓄᑦ, ᐋᑉᓴᓚᒻ ᐅᖃᐅᑎᓗᒍ ᐱᔨᑦᓯᕐᓂᐊᕐᓂᕋᕐᓗᒍ ᐊᑖᑕᖓᓂᒃ ᐱᔨᑦᓯᓚᐅᕐᓂᕐᑐᑦ, ᑕᕝᕙ ᓵᓚᒃᓴᐅᑎᔪᓐᓇᕐᓂᐊᕐᐸᕐᒪ ᐊᕼᐃᑐᐱᓕᐅᑉ ᐃᓱᒪᓕᐅᕈᑎᒋᔭᖏᓐᓂᒃ. 35ᑐᓂᕐᕈᓯᕐᑎᑦᓯᔩᒃ ᔭᑑᒃᓗ ᐊᐰᐊᑕᓗ ᑍᑲᓃᓐᓂᐊᕐᒥᔫᒃ; ᐅᖃᐅᑎᖃᑦᑕᕐᓂᐊᕐᐹᒃᑭᒃ ᑐᓴᕐᑕᓕᒫᕐᓂᒃ ᐊᖓᔪᖅᑳᕐᔪᐊᖃᕐᕕᖕᒥᑦ. 36ᑕᑯᒋᑦ, ᐃᕐᓂᕐᒥᖕᓂᒃ ᑕᕝᕙᓃᖃᑎᖃᕐᐴᒃ, ᐊᕼᐂᒫᔅᒥᒃ ᔭᑑᑭᐅᑉ ᐃᕐᓂᖓᓂᒃ, ᔫᓇᑕᓂᓗ ᐊᐰᐊᑕᐅᑉ ᐃᕐᓂᖓᓂᒃ, ᑖᒃᑯᐊᒃ ᐅᕙᓐᓄᑦ ᑎᓕᔪᓐᓇᕐᐹᒃᑭᒃ ᖃᐅᔨᔭᓕᒫᕐᓂᒃ ᐅᖃᐅᑎᓗᒋᒃ.”
37ᑍᒤᒻᒪᑦ ᕼᐅᓮ, ᑍᕕᑎᐅᑉ ᐱᖃᓐᓇᕆᔭᖓ, ᐅᑎᓚᐅᕐᐳᖅ ᐃᒡᓗᒐᓴᖕᓄᑦ, ᐋᑉᓴᓚᒻ ᑎᑭᓪᓗᐊᓕᕐᑎᓪᓗᒍ ᔨᕉᓴᓕᒧᑦ.
Currently Selected:
ᓴᒧᐃᓕ ᐂᑉᐸᖏᑦ 15: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
